TITUS
Svan Prose Texts II (Lower Bal)
Part No. 89
Previous part

Text: 89 
Page of edition: 189 
Line of edition: 32 
LIXXXIX. ტჷტარა̈ილ


Line of edition: 33       ა̈რიხ ეშხუ დი-გეზალ, ხორიხ ეშხუ ვოჴა̈რ დინა. ალის ხოლამდ ი
Line of edition: 34    ბეშდაბხ.

Line of edition: 35       აშხვ ლადეღ ლუზრობთ' ესღრიხ დი-გეზალ. ალა̈რ ისჷრკა̈ლხ
Line of edition: 36    ი იმარელხ. ათხე ტჷტარჷლდ ხა̈ქვე: -- სა̈რკ ესეროღვ ლიხწონეხ.

Page of edition: 190 
Line of edition: 1       ზურალდ ოსჭყილ: -- მიჩ ესერ ჲა̈რ ლახწენისგ სა̈რკს, მუქვნი'
Line of edition: 2    ესერ დეჲშა ფერიშ!

Line of edition: 3       ალა̈რს ხორდახ ეშხუ ფირუ̈ლდ. ალი ფირუ̈ლდ აშმეიდ ლალდა̈ღთ'
Line of edition: 4    ესყა̈დ ვოჴა̈რ დინას. ალის ალ ზურალდ ეჯი მოლე მა̈ტყილდი
Line of edition: 5    ლახემ ი ქანჷლდი, ხა̈ქვ', ერე: -- მა̈ტყ ესერ ნებოზს ჩუ
Line of edition: 6    ლუკულინე კულიდოვ ა̈ნტიხ, ქაჷ ეჯი -- სგვირ ქა ლჷჟფჷნედ.

Line of edition: 7       ესყა დინას ფირუ̈ლდ, იგვნი ეჯჟი. ფირუ̈ლდ ლა̈ხჭედივ: -- იმღ'
Line of edition: 8    ესერ იგვნი?

Line of edition: 9       -- იმღ' ესერ ი მინე ზურალდ მა̈ტყ ეჯი კულიდ ლჷსყე ი ქან
Line of edition: 10    ეჯი სგვირდ მჷსყ'ოღვ ოხჴიდ ნებოზს.

Line of edition: 11       ფირუ̈ლდი ლა̈ხჭედივ: -- გელა̈ლახვს ესერ ხამურტკვალნე მა?

Line of edition: 12       -- ჲე 'სერ.

Line of edition: 13       -- ჭაფხვრის ესერ ხა̈ჩხუნე მა? -- ჲე 'სერ.

Line of edition: 14       -- სგიმილდს ესერ ხათრე მა? -- ჲე 'სერ.

Line of edition: 15       -- აღვე მა̈ტყ ეჯი ჰაკვა̈დს ესეროღვ ლახა̈ბ, ქან შდჷმ ლექვ'
Line of edition: 16    ესეროღვ ოსდე, ჯი ამეჩუ ჩვ ესეროღვ ესგურდა ი ნებოზს
Line of edition: 17    ამთეჲსგა ისგ' ესერ ჴედნი.

Line of edition: 18       ქაფიშვდ ფირუ̈ლდ, ჯი აიეჩუ სგურდა. ნებოზს ფირუ̈ლდდ მა̈ტყ
Line of edition: 19    კულიდ მჷსყე ი ქან სგვირდ მჷსყე ოხჴიდ. სგანჴა̈დ დინა ი ფირუ̈ლდ
Line of edition: 20    სგა̈ნკვა̈რ. ალა̈რ მა̈გ, იმჟი ზურალდ ხა̈ქვე, ეჯჟი მჷსყ'
Line of edition: 21    ოხჴიდ.

Line of edition: 22       მერმა ლადეღ მიჩა დინას ლახემ ფირვ ლელდაღვდ, მა̈ტყი
Line of edition: 23    ლახემ ი ქანი: -- მა̈ტყ ესერ კულად მჷსყე ი ქან სგვირდ მჷსყ'ოღვ
Line of edition: 24    ა̈ნტიხ.

Line of edition: 25       ესყა ალ დინას ფირუ̈ლდ, ღეშგიმ ხაჭიმ ლაგვნიშვ. ფირუ̈ლდ
Line of edition: 26    ლა̈ხჭედივ: -- იმღ' ესერ იგვნი?
Line of edition: 27    -- იმღ' ისერ ი მიჩა დის ესერ ოთშგურანა ი მა̈ტყ კულიდ
Line of edition: 28    მჷსყე ი ქან სგვირდ მჷსკ' ესეროღვ ოხჴიდ.

Line of edition: 29       -- აღვე გელა̈ლახვს ესერ ხამურტკვალნე მა?

Line of edition: 30       -- ქვიშშვ ესერ- მუბჭკვე, მა̈ ხეკვდი.

Line of edition: 31       -- ჭაფხვრის ესერ ხა̈ჩხუნე მა?

Line of edition: 32       -- ზისხშვ ესერ მჷჰრე. მა̈ ხეკვდი.

Line of edition: 33       ათხე ლა̈ჲბინე ლიქინე ფირუ̈ლდდ ეჩხავ-ამხავ ი დინას ალა̈რ
Line of edition: 34    ჟ'ოხბირდლავე. ნებოზს დინად ფირუ̈ლდ სგა̈ნკვა̈რ, ლაგვნიშვ ხაჭამდ',
Line of edition: 35    ეჯჟი. მიჩა დი ლა̈ხჭედივ დინას: -- იმღ' ესერ იგვნი?

Line of edition: 36       -- იმღ' ესერ ი ამჟ'-ამჟი, ჟ' ესერ ოხბირდლავა ქან ი მა̈ტყ
Line of edition: 37    ფირუ̈ლდს მიჩეშდ.

Page of edition: 191 
Line of edition: 1       მერმა ლადეღ ვოჴრჷლსიდ ლახემ. ნებოზს ვოჴრჷლდ მა̈ტყ
Line of edition: 2    კულიდ მჷსყე ი ქან სგვირდ მჷსყ' ოხჴიდ.

Line of edition: 3       მესსა ლადეღ მიჩა დინასიდ ლახემ, მარე ეჯნემ ლჷბირდლავეიდ
Line of edition: 4    ა̈ნტიხ. ეჩქანღვე დი-გეზალდ ხა̈ქვეხ უშხვარ, ერე: -- ფირუ̈ლდ
Line of edition: 5    ჩვ ესეროვ ა̈ზიჰა̈.

Line of edition: 6       ალი ტჷტარჷლდ ჩვა̈ცხირ, ეჩქას ფირუ̈ლდს გა̈ნხენჩუ ლახსგურდა
Line of edition: 7    ი ლა̈ჲბინე ლიგვნი. ფირუ̈ლდ ლა̈ხჭედივ: -- იმღ' ესერ იგვნი?

Line of edition: 8       ვოჴრჷლდ ქა ხა̈ქვ', ერე: -- ამჟ'-ამჟი, ლისენის ესერ ხედრა̈ლხ
Line of edition: 9    ი ეჯღ' ესერ იგვნი.

Line of edition: 10       -- აღვე ამიღა ნომოვ ანფა̈შ. ჯინემ მიჩა ნოჲ ლეღვ ესეროღვ
Line of edition: 11    ლა̈ემ, ნოჲ ტუფ ესეროღვ ლა̈ჲსჷრგებე. მიჩა ფა̈თვ, ჯიჯვ ი ამკა̈ლიბა̈რ
Line of edition: 12    ნომაგვეშ ესეროღვ ადცუდე ჩუ ი მა̈გ მიჩა ლალდია̈რმჷყ
Line of edition: 13    ესეროღვ აშდვიხვ ჩუ. შომ' ესერ ეჩხავ ამხავ ლიზელა̈ლ ესწჷხე/ჷნეს,
Line of edition: 14    ეჩქას ჟ' ესეროღვ ა̈ნბარჯე ი ეჩეჩუ რა̈შ ესერ ჟი ლჷჰინგირ ი
Line of edition: 15    მიჩა ლერექვ ი ლელდისგ ესერ ხეხელი.

Line of edition: 16       ათხე ალ დი-გეზალ აჩა̈დხ ლუზრობთე. ანჴა̈დ ალ დინა ი
Line of edition: 17    ფირუ̈ლდა̈შ ლალდია̈რმჷყ ჟ'ანბარჯე. ამეჩუ რა̈შ ჟი ლჷლა̈ბ, აშხვხენჩუ
Line of edition: 18    ოქრ ი ვარჩა̈ილშვ ი მერმახენჩუ მიჩა ლერექვ-ლელდისგვშ, ხაბჷდ.

Line of edition: 19       ჟ'ა̈ნრჷქვა̈ნ, ჟ'ა̈ხჷლდესგა̈ნ ი რა̈შს ჟი ლახაგურდა ი აჩა̈დ ლუზრობთე.
Line of edition: 20    ლუზრობისგა მა̈გ მიჩ ხენთურალ. ანჴა̈დ ალ დინა ი უშდილ ჩვადკვა̈რ
Line of edition: 21    ეშხუ კალოშ. ჯი ხონკი სგანტა̈ხ ქორთე ი რა̈შ,
Line of edition: 22    იმგვა ხაბჷდ, ეჩეჩუ ათა̈ბ.

Line of edition: 23       ალ კალოშ კესა̈რშერდ ა̈დკვა̈რხ შითეჲსგა. ნა̈ზირ-ვა̈ზრა̈რს
Line of edition: 24    ხა̈ქვეხ, ერე: -- ალი კალოშ ესვა ხემარგდეს, ეჯი ხელწიფხეშ
Line of edition: 25    გეზლა̈შ ხეხვ ესეროღვ ლა̈სვ.

Line of edition: 26       ესხრიხ ალ ვეზირ-ნა̈ზირა̈რ ი ალ დი-გეზალთეჲსგა ლა̈ხჴედჷნხ.
Line of edition: 27    ჩიქი ეშხუ იზმეხ ალ კალოშს, ღვე მერმე, მარე ჟი დეხდასმოშ
Line of edition: 28    ხემა̈რგხ.

Line of edition: 29       ათხე ტჷტარჷლდ ხკქვე ი: -- მიჩ ესეროღვი ლახწონეხ.

Line of edition: 30       ზურალდ ოსჭყილ: -- ჯ' ესერ იმხენ ა̈ნჴდა ამგვა̈რ კალოშს?
Line of edition: 31    ჩვ ესეროღვ ა̈თთჷრ!

Line of edition: 32       ათხე ვეზირ-ნა̈ზირა̈რდ მადე ჩემინხ ი ქა ლახწონეხ კალოშ.
Line of edition: 33    ალის ჟ'ა̈ხმარგ კალოშ ი ვეზირ-ნა̈ზირა̈რდ ხა̈ქვეხ: -- ოთჴერივ ესე
Line of edition: 34    როღვ.

Line of edition: 35       ალ დინად ჟ'ა̈ნფიშგ მიჩა რა̈შ, ჟ'ა̈ნრექვა̈ნ, ჟ'ა̈ნჷლდესგა̈ნ ი
Line of edition: 36    ოთჴერივ ნა̈ზირ-ვეზირა̈რს.


Line of edition: 37 
კლარა აფრასიძე. ჭელირი. მ.ქალდანი. 12.VIII.1954



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.