TITUS
Svan Prose Texts II (Lower Bal)
Part No. 105
Previous part

Text: 105 
Page of edition: 208 
Line of edition: 1 
CV. ბაბა სოლომა̈ნ


Line of edition: 2       ბაბა სოლომა̈ნიშცა̈ლ მეთხვა̈რ, ცხა̈ჲ, და̈რ ლჷწსელი. აშხუნ
Line of edition: 3    ომჩედელი ჩვიბეჴევიშ ტვიბ ლეჟა. ამეჩუ ღვაშ ი კვიცრა ჩოთდაგრა
Line of edition: 4    ეჲ ლადეღ. ათხე ნებოზს და̈რს ოთბინა ლიჟმურელ. ხაკუჩ ბა̈ზი
Line of edition: 5    ხოჩა ბინა ა̈ნთხას. ჩოხჴიდა ძირთე (ნენჩათე) ნა̈თხვროლ ი ამეჩუ
Line of edition: 6    ხა̈თხელინა ნენზს, ერე ლასჷმდ ჟ'ა̈ხმარგეს ეჯი. ეჯგვა̈რ ესერ
Line of edition: 7    ახხუა ნენზ, მიჩას ჩი აბთქჷნა, ერე აშხალ ესერ მა̈გ გიმდ ხა̈ბკენა,
Line of edition: 8    ქა ლუსუფთავე, ქა ლჷჯელვაშალ.

Line of edition: 9       ნა̈თხვროლ ამთეჲსგა ისგოხჴიდა ი ჴაშვა̈რჟი ჟი ლოხრეკა. ზექ
Line of edition: 10    ოხჴიდა მასა̈რდ. ჩიხახვა̈რ ლატყბად ლოხდა ისგა. ამჟი ჩოლბურელი
Line of edition: 11    ხოჩამდ, ეჩქას გვა̈მიდ სრვილ ბა̈ჩ ომშყედელი. ლახჷმბაჟა ესერ
Line of edition: 12    ჩუ, მარე დემეგ ოთჯჷრვა ი ადა̈იდ ოხკვარ', ეჩქას ლემასგვჟი ხოყირა
Line of edition: 13    ი ლემესგ ჩოთპანტა. ათხე ჰეჭვ ლახარა, -- იშგანდ ესერ ლი გვეშ.

Line of edition: 14       -- მარ' ესერ ე ჲა̈რ ლი, ე სგოღვ ანჴა̈დ, ღირთემ ესერ ნალჟჷრ
Line of edition: 15    მასა̈რდ ხუღვე.

Line of edition: 16       მესმა̈შჟი მაგრიშ (მეგმემ) ნა̈ყვიჩ ესერ ოხკვარა ი სერ ჩოთთქვიმა
Line of edition: 17    ლემესგ, მჷჭკმა̈რ გარ ოთცვირა.

Line of edition: 18       ათხე გუდ ომჴედ, ამსვალდ დემეგ ლი, ეჯის. თეფდ ოსფხეჭა
Line of edition: 19    ჟი: -- ატ, ხოლ' ესერ კუჭულდ, ნომოღვ ოსღალტე ჩუ: -- ამჟი
Line of edition: 20    სგა 'სერ ათგენა მეგამ ლასჷსჯა̈ვიდ, დოშდულ ჟ'ახწედა გიმს,
Line of edition: 21    ლოჰოდ' ესერ გვი ი ხოჩა გვა̈რიშ. ლჷღა̈რთ მეგამცა̈ლ ესერ ოლმა̈ზ
Line of edition: 22    მიჩეშთეჲსჷა. ათხე ქა ლოხდა თეფ ლადგა̈რიდ, გუნ ესერ ნა̈კლებ ჰერ
Line of edition: 23    ხასმოლნა ქა თეფიშ. ა̈ლი ნაზიმჟი ესერ ესჩემა ჟი, ლასგამშვ ესერ
Line of edition: 24    დემეგ ახსგენა ჟი. ეჯგვა̈რ ესერ ოთბინა ლიყულელ, ერე გიმ-მეგემ
Line of edition: 25    ესერ ოლქუთნელი, "კიდევ, კიდევ"ს ესერ ხაყლუნა.

Line of edition: 26       -- ვოშ' ესერ ლჷმა̈რ მიჩა მჷდგა̈რი, ვოშა? -- ეჯის ესერ ლახჭედნახ
Line of edition: 27    ჲარვ-სამ ა̈დგიხენქა ქა̈მ მერდოლ.

Line of edition: 28       -- ეშხუ ესერ, ეშხუ! -- ა̈მის ესერ ოსცადა.

Line of edition: 29       -- იმღა როქვ ათწინენა ეშხუ გარ ამსვალდ, შან გარ
Line of edition: 30    როქოღვ ხარ!

Line of edition: 31       ათხე ბა̈ზი სგა ხაგ ალ მეგამ ლალფარს. "ჩუ როქვ დემ ირჰი"
Line of edition: 32    აშხუნღვე ჩოლრჷჰელი. ლეჟ' ათპირე ამთე ლეჟა: "იმჟი ესეროღ
Line of edition: 33    ლესესხ გოშა̈რ!"

Line of edition: 34       ლეჟ' ომჩედელი ი ამეჩუ წჷრნი პერ ლჷმგენ. ალ პერს შხჷლ,
Line of edition: 35    შხჷლ გარ ესერ ხა̈გნენა ი ხემ' ეჯჟი ლუმკვიდნელი გარ ესერ.

Page of edition: 209 
Line of edition: 1       ლოხბინა მჯჷროშვ პერიშ ეჩხავ-ამხავ ლიპანტე (ლიფხინკა̈ლი),
Line of edition: 2    ცხვი ჟ'ახხუა ნენსგაჩუ, მამაგვეშ ხა̈თმენ', ეჯჟი.

Line of edition: 3       ლეღვა̈რ ჩოთცვირა სერ ამჟი ი მიკვა̈რ ჟი ოხკიდა, ლექვ' ახგენა
Line of edition: 4    ი შუკვს ლახხუახ ქამცთე მეზა მეღვჭარა, ლახჭედნახ:

Line of edition: 5       -- იმღ' ესერ ხა̈ზ ამჟი ხოლა ჰა̈ბ, მ' ესერ ხათჷმ?

Line of edition: 6       ქა ლოხთონა ლეღვ, იმგვ' აცვირ ა̈ლი ი: -- ა̈ნკიდხოღვ, მიჩ
Line of edition: 7    ესერ დეშ ოხჴიდა. მინ ჩუ ნომოღვ ა̈დჷგა̈ნხ ეჩეჩუ.


Line of edition: 8 
პირიბე აფრასიძე. ქვედა ლუჰა. მ.ქალდანი. 19.ვიიი 1956 c̣.



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.