TITUS
Svan Prose Texts II (Lower Bal)
Part No. 107
Previous part

Text: 107 
Page of edition: 210 
Line of edition: 1 
ზღაპრები
Line of edition: 2 
CVII. ჯამა̈ხჷრსა̈


Line of edition: 3       იმეგ ა̈რი ეშხუ [ოჴა̈რ] ბეფშილდ. ჟ'ა̈ნპირსდეხ ი ჯამა̈ხჷრსა
Line of edition: 4    ათჟა̈ხხ. [აშხვ] დადად ჟ'ა̈ნკიდ მიჩა ჭაშვემ თეკრა̈შ ლა̈თხვარა̈რ ი
Line of edition: 5    ქა ლახემ ალ ბეფშილდს [ი ხა̈ქვე]: -- ჩიქი ესერ ეშდსემი გარ ლჷზა̈
Line of edition: 6    ლი ჯი. ვოდედ' ესერ ეშდარა ზავთეჟი აჩეს, ეჩქად ალა̈რს გაროღ
Line of edition: 7    ლახხვეტ თე ი ეჩქანღვ' ესერ იღბა̈ლ ბაცს ხარ მიჩ. ლიზელა̈ლოღ
Line of edition: 8    [ჲნოლითხვაროღ] ა̈დბინე. ურინ ესერ ქა̈ტხენი ი ხოჩ' ესერ ზგარობ
Line of edition: 9    ხერი. მესმა̈შჟი ესერ ლემბა̈ჟდ ნომოღ ა̈ნჴიდ, იმ დო ხეწეს.

Line of edition: 10       ჟ'ა̈ნიცხ ი ურინ ქაჩა̈დ ლა̈თხვართე ი ხოჩა ზგარობ ხად. მესმა̈შჟი
Line of edition: 11    აჩა̈დ ი ხეკარქ ჲორი ნა̈თხვრა. ისგანტა̈ხ ბინათეჲსგა ი ჩვა̈თბურა̈ნ.
Line of edition: 12    ამეჩუ სგა ლახაგა̈ნ მიჩა ბინას ი რაგა̈დ ხესმი, ამჟი სგაჩა̈დ
Line of edition: 13    ალი კარა̈ვთეჲსგა ი და̈რ ესხვიდ ამეჲსგა.

Line of edition: 14       ჯამა̈ხჷრსა̈ს პირწამა̈ლჩუ მჷხირ ხოჩხინა̈ნ ი ჟ'ანნარჰე ეჯნოშ ი
Line of edition: 15    ბა̈ზი ჩვა̈რი. მჷხა̈რ ჩვა̈დრჷჰა̈ნ ი ჟ'ანჷგა̈ნ. ხოპირა ლაზელალთე ლიზი,
Line of edition: 16    ეჯჟი ყორისგა მარე ლახხვიდ. ამნემ "ხოჩა ლადეღ" ხა̈ქვე: -- სემი
Line of edition: 17    ლადეღ ესერ იზელალოღ ლა̈თხვარს ი, მ' ესერ ქა ხასჷმდეს, ლემბა̈ჟდ
Line of edition: 18    ნომაგვეშოღ ოხჴა̈დ.

Line of edition: 19       ჲორი ლადეღ ქაჩა̈დ ი მესმა̈შჟი ჩვა̈თბურა̈ნ კოჯლისგა ი ჩვა̈თუჟდა.
Line of edition: 20    ა̈ხეჲცხჷნ ჟი ი, ჯი ადყურდა, ეჩეჩუ მადეჲ ხოჩა ბინაჲსგა
Line of edition: 21    ლა̈ხეჲცხჷნ ჟი. ლა̈ჲსგიდივ ი კარავა̈ტ ლეჟა აყვრე სიმაქ ი ალი
Line of edition: 22    ხარგა̈დი: -- მიჩ' ესერ ბედჟი ჯი ურინ ლი ჟი ლუჲცხუნე. ათხე
Line of edition: 23    ლა̈თხვართ'ოღ აჩა̈დ ი, საბრალ ესერ ჰერ იმგვა ხასჷმდეს, ეჩეჩუ
Line of edition: 24    ქოღ ათხვიდ ხვის.

Line of edition: 25       აჩა̈დ მერმა ლადეღ ლა̈თხვართე, ხეკარქ ნა̈თხვრა. ჩუ ლჷდგა̈რ
Line of edition: 26    ხოხალდა ი ეჯღაჲ ესხრი ა ქვინჷმგენე. ეშჭიმ, ეშჭიმ ი ლექვ' ა̈თჴედჷნ
Line of edition: 27    კოჯ მებჭკვა ლექვა. ამეჩუ ნა̈თხვრას ქა სეწა̈დ, ჩუ ლჷხნერე ლი.
Line of edition: 28    ისგა ლიბერგ ხოპირ', ეჯჟი კოჯხენქა ლიმშერა̈ლ ხასჷმდ. ნა̈თხვრას
Line of edition: 29    ლახხვიე ი თეფ ლა̈ჲმურჯვინე ი ამ ჰერთეჲსგ' ესხრი. აჩა̈დ აშთეჲსგა ი
Line of edition: 30    და̈ლ იღვჟა̈ლ კოჯლისგა. ქა მეჴდელი კარავა̈ტხენქა ი კოჯს ხაბურგა ისგა
Line of edition: 31    ი მაშედ და̈რ ხაყა. ალის ხეწა̈დ, ეჩქას ლახყალვნივ ი ჟ'ოშჭენ. ამნემ
Line of edition: 32    ღეშგიმხენ ლაჰიე: -- ჰა, ხოჩ' ესერ ჭაბიგვ, იმღ'

Page of edition: 211 
Line of edition: 1       ესერ ცვირე? მიჩ ესერ ნასბრალოშ ხარ, იდგა̈რი ესერ ი ღეშდოღ
Line of edition: 2    ანტა̈ხ, შგვირ ესერ მამა ხარ!

Line of edition: 3       ათხე ლა̈ხშყა̈დ ნაშგურან ი სგაჩა̈დ ი ჟ'ა̈დტიხ კარავა̈ტთეჟი
Line of edition: 4    და̈ლ. და̈ლდ ხა̈ქვე ი: -- ეშხუ მეგჭად ქოღ ესჭყჷლალე: ღვაჟმარემ
Line of edition: 5    ჰერ ესერ ხოჩა ლი, ჰა̈ლდ ესერ ხაყვლენი.

Line of edition: 6       ათხე ჯამა̈ხჷრსა̈ ესხრი სერ ი და̈ლდ ხა̈ქვე: -- მ' ესერ დო ლესეს
Line of edition: 7    მიჩა ლერექვ მოლე ჩოღ ესცვირ.

Line of edition: 8       ქა̈დშყვიჟ ფატა̈ნ ი, ჯი ქა ხოსგდივ, ეჯჟი ა ფატა̈ნ სგა ლახჴჷრმე
Line of edition: 9    ბეფშს და̈ლდ.

Line of edition: 10       ლოხსგიდივ და̈ლ ამიშ ცხვი-ცჷჴემდს ი: -- ალი ესერ მიჩა დედეს
Line of edition: 11    ჩუ ხაწვენა. ჯი ქა̈ხიოღ აჩა̈დ ი ცხვი-ცჷჴემდ, ჩოღ აცვირ
Line of edition: 12    ამეჩუ.

Line of edition: 13       ეშხუ-ჲორი ბა̈ჴ ლაჲგ ი სგანტა̈ხ ი, ღვაშა̈შ ჯუღვ ხაბჷდ, ეჯჟი
Line of edition: 14    ესხვიდ ალ ცხვი-ცჷჴემდ.

Line of edition: 15       ნა̈თხვრა ქადძენძურე. ოშჭენ ბინათე ი ესხრი სერ, სგატა̈ხ ა
Line of edition: 16    ბინათეჲსგა ი ამეჲსგა და̈რ ესხვიდ ათხე. მოლე ხა̈ნუნღვე ანჴა̈დ
Line of edition: 17    ეშხუ მეთხვა̈რ ი იმბუა̈ლხ. ჯამა̈ხჷრსა̈ ლა̈ხჭედივ: -- მ' ესერ ხაშხა მიჩ?

Line of edition: 18       -- მიჩ ნაჰაჯ ესერ ხაშხა.

Line of edition: 19       ჯამა̈ხჷრსა̈დ ხა̈ქვე ი: -- მიჩ ესერ ეჯზუ აფხნეგა̈რ ხონჴრი ბა̈ზი,
Line of edition: 20    ერე ხეჰრი ესერ ნა̈ნკდ-ნა̈ნკდ ლირდეს.

Line of edition: 21       ნაჰაჯდ ნაქვ ხაყერ ი აჩა̈დ.

Line of edition: 22       მოლე გარ ხა̈ნ ლი მეჩდე ი ანჴა̈დ აშთეჲსგა ეშხუ ზურალ. ამნემ
Line of edition: 23    ოხკჷრმე ბარგა̈რ ი ჯუღვს ქა ხეწა̈დ, ეჩქას ლაცვ ოთთხა̈რ ი ხა̈ქვე: -- მიჩ
Line of edition: 24    ესერ ალ ი ალ საჩქვა̈რ ხუღვა ი, ვოდ ესერ ირდი, ეჩქად როქვ
Line of edition: 25    ლითხვარიშ იღბა̈ლ ხუღვა. ათხე როქვ მიჩ ლა̈ხმუშგვრი,
Line of edition: 26    ეჯისი ლა̈ხშა̈დოღ.

Line of edition: 27       ამჟი აშთეჲსგა ლა̈ხსადგომ ეშხუ მახეღვა̈ჟ. ოხჴა̈დხ ლიმბუა̈ლ ი
Line of edition: 28    მუშგვრიდ ოხუმბავე ი: -- მიჩეშდ ესერ მეჩი ზურალს ლოხსა̈ყვდურა
Line of edition: 29    ი მიჩა ჲორი ლახვბა და̈ვს როქვ ოთდავშა ი ეჩეჩუოღ
Line of edition: 30    ლოხვმარგ.

Line of edition: 31       ალა̈რს ნა̈თხვრა̈შ ჩიხა̈ხვ ლატყბას ხოზხ ი ამჟი ყორს ლოხშყუბმე
Line of edition: 32    ჲერდვალეშემ. ესკარეხ ყორ ჩუ ი და̈ვ.

Line of edition: 33       -- ჰა, ხოლ' ესერ მეთხვარა, მოლე ყვიჟ'ოღ ლოხოთეხ, ოდო
Line of edition: 34    მა̈იდშვ ესერ იდგა̈რი.

Line of edition: 35       ათხე ალ ბეფშ ჟ'ანპა̈რ ი ყვიჟე ქა ლოხხელ და̈ვს. და̈ვდ ყლიპ
Line of edition: 36    გარ ათღანე ალ ბეფშს, ჩვადირტყვ. ათხე ჯამა̈ხჷრსა̈ს ხაჰერ:

Line of edition: 37       -- ადა̈იდოღ ლახემ ყვიჟე.

Page of edition: 212 
Line of edition: 1       ამნემ ჟი ლა̈ჲშგვინ გა̈ჩ ი ქა. ლოხხელ ამნოშ ჩიხა̈ხვიშ ნა̈ხვიტ.
Line of edition: 2    და̈ვდ ადთხჷპნე თხვიმ ი ვარ ხა̈ქვე: -- ამნოშ ესერ დემინ ხებიშდი,
Line of edition: 3    შივშვოღ ლახემ.

Line of edition: 4       შივშვ მადე ლახემ ი უშხვა̈რ (\ უშხვარ) ხაფხეჭხ, იბურგელხ
Line of edition: 5    ი ჩვათწინდა ჯამა̈ხჷრსა̈. ათხე, ლაჲსვილ გა̈ჩ ი ეშდთირი ლუთხვიმ
Line of edition: 6    ლი ი ხაქცურე კინჩხა̈რს. ეშხუ გარ ხოკლი, ეჩქას ა̈თბა̈ც და̈ვ:

Line of edition: 7       -- ნომოღ ათქვიც ალი ი, მ' ესერ ხასკორა, ჩი ესერ ქა ხოსრულე.

Line of edition: 8       ჯამა̈ხჷრსა̈ტ ხაჰერ: -- ჲაღვე, ამეჩუ ესერ მა̈ ამსვალდ ხოდვაშა,
Line of edition: 9    მა̈გ ქოღ ანტიხ.

Line of edition: 10       -- აღვ' ესერ ჩელტიშ ყოროღ ლაჲკარე ნანღლა̈შქა ი ამეჲსგ'
Line of edition: 11    ესერ ხორი მიჩა ლიხვბა.

Line of edition: 12       ამხენქა სემი გარ მარე ბადეჲ ეშდჲორი მარე ანჴა̈დხ მიჩა ნადვაშ
Line of edition: 13    ი ალ თხვიმი ჟ'ახქვიც და̈ვს. ჯამა̈ხჷრსა̈ ქორთ' აჩა̈დ ი ხოჩა ლირდ'
Line of edition: 14    ა̈დჴიდ.

Line of edition: 15       ვოდ ეჯა̈რს ლეწედ, ეჩქადოღ ლა̈რიდ


Line of edition: 16 
ვლადიმერ წულუკიანი. ზედა ლუჰა. მ.ქალდანი. 17.ვიიი 1956



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.