TITUS
Svan Prose Texts II (Lower Bal)
Part No. 108
Previous part

Text: 108 
Page of edition: 212 
Line of edition: 17 
CVIII. მაჰრენ მუხვბემ ნალმა̈რგი


Line of edition: 18       ლჷმა̈რდელიხ ეშხუ ხეხვ-ჭა̈შ. გუნ დიდა̈რ ლჷმა̈რხ, მარე გეზალ
Line of edition: 19    დემეგ ხა̈რდენახ ი ამნოშ გუნ გვი ათკვეშახ. აშხვ ლეთ უშხვა̈რ
Line of edition: 20    ხა̈სგვრჷნახ ი ლიმბუა̈ლ ახარახ: -- მ' ესერ ხარს მინე ქონება, ლა̈ს
Line of edition: 21    ესერ ჷსცურეხ?

Line of edition: 22       ამჟი ყორლისგა ლა̈ხშჷმ ლერვალე (\ ჲერვალე). ოთკარეხ ჩუ
Line of edition: 23    ყორ ი ჴეც ლა̈ხმუშგვრა̈ნხ ისგა: -- მ' ესერ ლი, იმემ ესერ გვი
Line of edition: 24    ხაკვიშხ, მა̈გ ესერ მინე ქონებას რაგდი?

Line of edition: 25       -- მ' ესერ ხარხ, მიჩ' ესეროღვ მა̈ზიგ ლახჴედახ, გეზალ ესერ
Line of edition: 26    დემეგ ხორიხ.

Line of edition: 27       -- ჷეზალს ესერ აღვე ჯი ოხწესისგ.
Line of edition: 28    სანაფ ა̈ნკიდ ჯიბხენჟი ი ა̈ლი ლახემ ქა ი: -- ა̈ლი სამდ ჩვ
Line of edition: 29    ესეროღვ აბიჴვხ ი ჩვ ესეროღვ ლა̈ლემხ (ლა̈ნემხ) ი სემი ესერ
Line of edition: 30    ნაღვჟურგეზალ ა̈ხთა̈ვიხ სამ ზავლისგა ი, ჟი ესერ ლას ა̈ნჷრდეხ, ეშხუ
Line of edition: 31    ნაღვჟურგეზალ ნომ' ესეროღვ ათტკა̈ლბჷნხ ი მიჩ ესეროღვ ლახეჰხ.

Line of edition: 32       ამჲა̈რდ (\ ა̈მჲა̈რდ) იმედ ხა̈ქვეხ. ა ჴეც ა̈ლი ატა̈ხ მიჩა ქორთე.
Line of edition: 33    სანაფ ჩუ ლა̈ლემხ ი სამ ზავჟი ტკისდ სემი ნაღვჟურგეზალ ახთაუნხ
Line of edition: 34    ი ეჯგვა̈ს იცხემხ, ერე მახეღვა̈ჟთექა ანჴა̈დხ. სემი ზა̈ ქა̈დსრულა̈ნ,
Line of edition: 35    ა̈ლი ისგაიდ ლა̈ხმუშგვრა̈ნხ.

Line of edition: 36       -- ათსრულენახ ესერ მა მიჩა ნა̈ქვ ა?

Line of edition: 37       ამჲა̈რდ მაჴვამ ხა̈ქვეხ: -- ალ ესერ მახეღვაჟა̈რ მიჩა ნაჰოდ ხარხ.

Page of edition: 213 
Line of edition: 1       ქეიფ ათყერხ ი ეჯ ლეთ ჩვარდა: მინეშმყ. მერმა ლადეღ ჰამს
Line of edition: 2    ესღჷრდა, ეჩქას ხა̈ქვე ი: -- მინ' ესერ ჟჷრ ჲერვა ხოცხომეხ, ეჯი
Line of edition: 3    მიჩა რა̈შიშ ესერ ჭგშხრე ნაზვსოღვ ხეჭა̈მ ი მიჩა ლა̈ზგათეჲსგ'
Line of edition: 4    ესერ ხეჴდჷნი.

Line of edition: 5       ა̈ლი ქა̈დჷნგზარვა̈ნ ი ბოფშა̈რს ხა̈ქვეხ: -- ამჟი ი ამჟი ესერ
Line of edition: 6    ხა̈ღვენახ პირობ ი და̈ს ესერ ხა̈მედახა ეჩხავ ლაზი?

Line of edition: 7       ხოშა ლახვბად ა̈დმიჭრალეხ. ეჩქას ხოხვრილ ოხპა̈რ ჟი ი:
Line of edition: 8    -- ჲაღვ' ესერ ჯი მინ' ესეროღვ ნაცა̈დ ლი. მინ მინე დის ი მუსოღვ
Line of edition: 9    ლოხსგიდივხ ხოჩამდ ი ჯი ესერ ეჩხავ ღჷრი, მ' ესერ პირობა̈რ
Line of edition: 10    ლოჰოდახ, ეჯის ესერ ქასრულე.

Line of edition: 11       აჩა̈დ ა̈ლი. ქა̈თყაჰა̈ნ მიჩა დის ი იუს ი ლახვბას, ეშჭიმ რა̈შიშ
Line of edition: 12    ნაზვს, სგა̈თჴედჷნ ამჲა̈რე ა̈დგითე. ამეჩუ ამჲა̈რე ქორ ღოშგიმ
Line of edition: 13    ლექვა ტვიბრ' აღრი. ეშხუ ზურალ აშყვდელი ამეჩუ ტვიბრაჲსგა,
Line of edition: 14    ესნა̈რი ა̈ლი ლი და̈ვა̈შ დი. ა̈მის ლუსვა̈რ ეჯი ღოშგიმჩუ ხა̈კვრენა.
Line of edition: 15    ათხე ოთჭკუარა ნაღვჟურს ი: -- ისგ' ესეროღვ ა̈ხჴვა̈სგ ი ლუსვჟი
Line of edition: 16    შდიქ' ესეროღვ ესა̈გ.

Line of edition: 17       ისგა̈ხჴვა̈სგ ი ლუსვჟი შდიქ ესა̈გ: -- ჯი ესერ დი ი ჯი გეზალ.

Line of edition: 18       -- ჰა, ნაურ, მ' ესერ ღერმათ ლოჰოდა მიჩეშდ ალ ლიღბა̈ლ,
Line of edition: 19    იმ ესერ ლოხშყა̈დვნა ა̈ლი? ა̈ლი ესერ ოდო ხოყრენს, ბა̈იშ ესერ
Line of edition: 20    ლეზჰჷნი ხარენა ჯი მიჩა გეზალს. ათხე მიჩა გეზალს ესერ ხორი
Line of edition: 21    ეშდჲორი დინაგეზალ. ამ ესერ ტობლისგა ხარა̈ ეჯჲა̈რს ლაქნალ.
Line of edition: 22    მუგვრე ბიდა̈რ ესერ ხა̈ზხ ქა̈მშხენ, ეჯჟი ესერ ღჷრიხ ჩი ლადეღ
Line of edition: 23    ეშთელისგა. ეშდეშხუ ესერ აშხვჟი ჴედნიხ ი იქნა̈ლხ, მეშდჲორე
Line of edition: 24    ეჯი ღოშგიმ ნა̈ჩკდ ესერ იქნა̈ლ ი მიჩა ლიღბა̈ლ ეჩეჲსგ' ესერ
Line of edition: 25    ა̈რი. ქ' ესეროღვ აჩა̈დ ი ეჯ ტობა̈შ ძგიდს ფათქჷლდოღვ ადბარჯე,
Line of edition: 26    ჟიქაქა ჩოღვ ა̈დლაფრა̈ნ. ღოშგიმ ესერ ანჴეს, ეჯის ბიდილდ ჟ'ოღვ
Line of edition: 27    ოხკიდ ი, ვოდე დ' ესერ ხახვდ ლა̈ხღვენენეს, ეჩქად ბიდილდ ქა
Line of edition: 28    ნომოღვ ლახტის. ეჩქას ეჯი ლაგას ესერ ხა̈გნე.

Line of edition: 29       ქაჩა̈დ, ამჟი ჩემინ. ფათქჷლდთეჲსგა ისგაჩა̈დ. ისგლადეღქა ანპა̈დხ
Line of edition: 30    ეშდეშხუ აშ ლაპორშვ ი ა ბიდილდა̈რ ჩვადკვა̈რხ მიჟ-დოშდვლა̈შ
Line of edition: 31    უწდუნად ი ქა̈დქანა̈ნხ. ეჩქანღვე ბიდილდა̈რ ისგა ლა̈ჲტიხხ
Line of edition: 32    ი ქაპა̈რხ. ამჟი მეშდჲორე ანჴა̈დ შიშდ. ამნემ ბიდილდ ქესშყვიჟ
Line of edition: 33    ი ლა̈იდ ა მიჩა ფათქჷლდა̈შ გა̈ნხენჩუ ადკვა̈რ. ბიდილდ
Line of edition: 34    ჟა̈ნკიდ ი შუნ ხუღვა ა̈მის. ამჟი ქანტა̈ხ ტობხენქა ი ბიდილდ
Line of edition: 35    დემეგ ახხვიდ. ისგაიდ ადსკინე ტობთელისგა.
Line of edition: 36    -- მ' ესერ ტა̈რ ბედნიერ სგეჯი, ბიდილდ ქ' ესეროღვ ლახტიხ. მ' ესერ
Line of edition: 37    მიჩ ხეცხენი, ეჯ ესერ ჟჷრს ხეჩო.

Page of edition: 214 
Line of edition: 1       -- ხახვდ ესერ ხეღვნი მოშ?

Line of edition: 2       ედ ხახვდ ლიღვნემ ვა̈რია ხა̈ქვე: -- დაჩვირდ ესერ ხეღვნი.

Line of edition: 3       ამჟი ამნემ მადე ლახტის ი ჟ'ანნა̈კვ ა̈ლი: -- ჲაღვ' ესერ ეზერ-
Line of edition: 4    -- ი ში ი ში ქა ლახემხ უშხვა̈რ ლიხეხვჭაშჟი: -- ჯი ესერ მიჩ დე-
Line of edition: 5    მის ხოღლა̈ტი, ოღონდ მიჩა ნა̈ქვს ქ' ესეროღვ ა̈ხჭა̈მ. მინ ესერ
Line of edition: 6    ეშდჲორი ლიხ ლავდილა, თვით ვოთა̈ხისგა ნა̈ნკ-ნა̈ნკდ ესერ ა̈რიხ.
Line of edition: 7    ბა̈ზი ესერ ისგანჴეს მიჩა ბაბა̈შთეჲსგა, ეჩქას კა̈ცხა̈შ ლექვა ლაღ-
Line of edition: 8    რალშვ ი გვა̈მიდ ლა̈ხირულშვოღვ აჩა̈დ ი ქ' ესერ ხაპა̈ტივეხ ბა̈იზ
Line of edition: 9    ლეთს ეჩქას. ეჩქანღვე ქ' ესეროღვ ანჴა̈დ მინე ლარდოლთექა ი
Line of edition: 10    მიჩა ლარდაჲსგა ლეტვრ' ესერ ჩუ დემის დეგნი ჰამდ ი მერმო-
Line of edition: 11    ლეშს ჩვ ესერ დიგეხ. ეჩქას ესერ ლეტვრე იმგვა ხეტვარეს, ეშ-
Line of edition: 12    თეჲსგა ლოხყუგნეოღვ ი ჯი ყორს ესერ ჩუ ხოკრე, ეჩქას ესერ
Line of edition: 13    ლაგას ათგენისგ ადა̈იდ.

Line of edition: 14       ამჟი ა̈მიშ ნაქვ (ნა̈ქვ) ქადსრულე. ისგა ლა̈ხმუშგვარ ჴეცს-
Line of edition: 15    ისგაჩა̈დ ქორთე ი ეჯჟი ლაღრალშვ ი ზირულდ, ერე აშგარ ათჷნ-
Line of edition: 16    ბაჟჷნხ: -- ამგვა̈რ ესერ ლა̈ხირულშვ და̈რმოშ ლი მინეშთეჲსგა მეჴ-
Line of edition: 17    დე, ჰეურდ ესერ ა̈ლი ხოჩ' ამსვალღ ლი.

Line of edition: 18       მიჩა ხეხვ ა̈თბა̈ც ჴეცს ი: -- ბა̈ზი ესერ ნომოღვ ა̈ზიჰხ ა̈ლი-
Line of edition: 19    ჩვესეროღვ ხორდახ.

Line of edition: 20       ათხე, ცხა̈ჲ, ჩვაცვირხ ბა̈ზი ი ჩვა̈რი. ჴეც ი მიჩა ხეხვ ჩვად.
Line of edition: 21    ყურდახ. ა̈მისი ლაყვრა ლახთონეხ, მარე ა̈ლი დემეგ ადყურდა ი მიჩა
Line of edition: 22    ხახვემ ლარდათ' აჩა̈დ ქა. ხაჭიმ ლარდოლს ლეჟა-ლექვა. აშხვ ლარ-
Line of edition: 23    დახენქა ნა̈რჰი ანღრი. ლოხყუგნე ამელისგა. მიჩა ლეჲხურიდ ყორ
Line of edition: 24    ჩოსკარე ი ისგა̈დჴერნე ლარდათელისგა. ჩვა̈რიხ ბა̈ზი აშხუდ.

Line of edition: 25       -- ჲაღვ' ესერ მჷხა̈რ ჰამს დოსდ ესერ ანგენისგ მიჩ "ი, ლირ-
Line of edition: 26    ჰა̈ლდ. მიჩა დედეშ ი ბაბა̈შ ჟი ლიგნა̈ლდ ყერბ ქ' ესეროღვ ადჯელვე
Line of edition: 27    ი ეჯჲა̈რე ლერქვა̈რ ქ' ესეროღვ ადშდაბვნე. ეჩქას ესერ ეჯჲა̈რ ჷ'ა̈ნ-
Line of edition: 28    გენის ი ეჯგვა̈რ ესერ ხენწმიხ, ერე ლა̈დიშ ლადეღს ეცერ ქაიდ
Line of edition: 29    ხაკვრჟნეხ ი ბა̈ზი მიჩეშთეჲსგ' ესეროღვიდ ანტა̈ხ.

Line of edition: 30       ამჟი ირჰალ ი სგაჩა̈დ, ყერბ ქადჯელვე, ლერქვა̈რ ქოთშდაბვნე
Line of edition: 31    ი ალჲა̈რს ხამბაჟხ: -- მ' ესერ ამსვალდ ირი ამგვა̈რიშ, დემეგ ესერ
Line of edition: 32    ხაჴდჷნენა მინეშთეჲსგა ა̈მიშ მაჯონს.

Line of edition: 33       ხეხვ ხარგა̈დი მიჩა ჭაშვ ი: -- აშ ესერ ხოჰრა ეჯღაჲ ნა̈თხვრა̈ზ
Line of edition: 34    ლეღვ ი ქ' ესეროღვ ლახსა̈რინე ლა̈დიშ ლადეღი.

Line of edition: 35       -- ეზერ ესერ, ჩვ ესეროღვ არდა.

Line of edition: 36       ი ჟ'ანჷგა̈ნხ ალჲა̈რ. ანჴა̈დ ი ლიც ანჴიდ ი ლაბრალს ხა̈გვშე.

Line of edition: 37       -- ჲაღვ' ესერ ბა̈ზი ჩოღვ არდა ი, იმგვა ესერ ხოცხონეს"
Line of edition: 38    იშდრალოღვ მინე ა̈დგიჲსგა.

Page of edition: 215 
Line of edition: 1       ა̈ლი ჩუ ლიბვრეს აშ ხა̈კიკ. ჩვა̈დბურა̈ნ ი ათხე ნებოზს ჴეც
Line of edition: 2    ანჴა̈დ ი აშხვხენჩუ ლა̈ჩვ ხა̈ცვ ი მერმახენჩუ ბიკ. ბიკ ა̈ლი ჩვადბუჭკურე
Line of edition: 3    ი ლა̈ჩვ ქადტუმურე. მახეღვა̈ჟილდს ხა̈ქვე: -- ხა̈მედ' ესერ
Line of edition: 4    მა ლიმა̈რჯვი?

Line of edition: 5       -- მიჩ ესერ მა̈ ხემედი, ათხე გარ ესერ ხოწვა დეცე რჷჰი.
Line of edition: 6    და̈ვდ ლა̈ჩვ ისგათა̈გ ხოშა სალჯაბთელისგა, ჩვაჯა̈ბხ ი ნაღვჟური
Line of edition: 7    ისგა ლა̈ჲსგურეხ მინე ტაბა̈გს ი ჩვა̈დდირპნხ. ჩჭადყურდახ
Line of edition: 8    ი ნაღვჟურსი ხა̈ქვეხ: -- ჩვ ესეროღვ ადყურდა, ბა̈ზი ნაბ ესერ ხუღვა.

Line of edition: 9       ამჟი ქაჩა̈დ ა̈ლი ი მიჩა ლეჲხურითეჲსგა ისგაიდ აჩა̈დ.

Line of edition: 10       -- მ' ესერ ხოჩა, მჷხა̈რდ ესერ დრევ ლოჰოდახ ი მჷხა̈რ ესერ
Line of edition: 11    ეჯღაჲ ჩვ ესერ ა̈ზჰენიხ.

Line of edition: 12       -- გონა̈ბ ესერ ნომოღვ ხარ ი მჷხა̈რ ესერ მიჩა დედე უშდად
Line of edition: 13    ესერ ჴედნი, ეჩქას ესერ ჟ'ოღვ ა̈ნნაჟრე, ნომ' ესეროღვ ა̈დვა̈შგდე
Line of edition: 14    ი მიჩა დედეშ ლჴრქვა̈რ ესერ ქოღვ ადშყოდელე.

Line of edition: 15       ა̈ლი ტკისდ ამჟი ჩემინ მერმა ლადეღ. ჴეციშ ხახვ მასა̈რდ
Line of edition: 16    ათბაჟჷნ ი: -- მა̈ღილ ესერ ხერი, ქ' ესეროღვ ლახსა̈რინე ი ჩვ ესეროღვ
Line of edition: 17    ხორდახ ა̈ლი.

Line of edition: 18       -- ეზერ ესერ აღვე, -- და̈ვდ (ხა̈ქვე): -- ჩვ ესეროღვ ხორდახ.
Line of edition: 19    ეშდჲორი ესერ ხორიხ დინაგეზალ ი ეშხუ ქოღვ ლახემხ ხახვდ.

Line of edition: 20       ქოხჴა̈დ თანახმათე ხეხვი.

Line of edition: 21       -- მარე იმჟი ესერ ხეკვეს ლახომეხ, მიჟ-დოშდულ ესერ დემეგ
Line of edition: 22    ხოწვახ ეჯჲა̈რს?

Line of edition: 23       -- იმჟი ესერ ი თვით ჭიშხ ლარდახენქა ქ' ესეროღვ ახწონნეხ
Line of edition: 24    დინოლს ი, ჲერვ' ესერ ა̈დცხონას, ეჯი ესეროღვ ხად.

Line of edition: 25       ამჟი ჩვასკა̈ბხ. ბა̈ზი ჩვა̈რი. ისგაიდ ატა̈ხ მიჩა ხახვთე. -- მ' ესერ
Line of edition: 26    ხოქვახ? -- ლა̈ხჭედივ ლეჲხური.

Line of edition: 27       -- მ' ესერ ი აშ-აშ ამჟი ესერ ი იმჟი ესერ ათჷრეს ჯინემ ჯი?

Line of edition: 28       -- იმჟი ესერ ი ხეჭა̈მ ესეროღვ ი ჯი ესერ ჭჷშხემ ცერს იქვთუნნი
Line of edition: 29    ი ეჯის ესერ ლა̈ხბერგი.

Line of edition: 30       მერმა ლადეღ ჩვა̈დრჷჰა̈ნ ი ყერბ ქადჯელვე, ლაბრალს ჟ'ესგვეშ
Line of edition: 31    ი ათხე და̈ვდ ლოხთუმუნე მიჩა ხახვ ი: -- ქ' ესეროღვ აჩა̈დ ი თვით
Line of edition: 32    ჭიშხ ქ' ესეროღვ ახწონნე ლარდახენქა ი ა̈ლიი ქოღვ ა̈დჴერნე.
Line of edition: 33    ჲესვ' ესერ ლა̈ხბურგენეს, ეჯი ა̈მისოღვ ხად ხახვდ.

Line of edition: 34       ამჟი ქაჩა̈დხ ლარდოლთე. მინე დიდ ხა̈ქვე: -- თვით ესერ ჭიშხ
Line of edition: 35    ქოღვ ანწონეხ ლარდოლხენქა.

Line of edition: 36       ნაღვჟურს ხა̈ქვე: -- ათხე ქ' ესეროღვ ა̈ნულკუჰე.

Line of edition: 37       ა̈ხჭა̈მ ნაღვჟურ ი, ა ცერ ესქუთნე, ა̈მის ლა̈ხბურგა̈ნ.

Page of edition: 216 
Line of edition: 1       ა̈მიღა ჴეციშ ხეხვ კილს აფა̈შგ. მანმა ხაკუ მაჩენემ ლიჰვდი ი
Line of edition: 2    ხა̈ქვე ჴეცს: -- ა̈ლის ესერ, ბა̈ქ ესერ ლი, დეშ ესერ ხაჰვდი ჯი ი
Line of edition: 3    ჩვ' ესეროღვ ა̈ზიჰ ბა̈ზი!

Line of edition: 4       ა̈ლი და̈ვდ ა̈დსისტკე: --ჯი ესერ პირობა̈რს დემის აჟვმე. ეჯობ
Line of edition: 5    ესერ დემეგ ლი ათხე.

Line of edition: 6       -- ჲაღვ' ესერ იმჟი ხოჩა?

Line of edition: 7       -- იმჟი ესერ ი ქ' ესეროღვ ხაწონე თედ დინოლ მა̈გ ი, ჲერვ'
Line of edition: 8    ესერ ა̈ნულკუჰას, ეჯიოღვ ხად.

Line of edition: 9       ამჟი მერმა ლაღრიშდ ა̈მიშ მჷჩემ ლიხ. ბა̈ზი ისგაჩა̈დ მიჩა
Line of edition: 10    ხახვთე.

Line of edition: 11       -- მ' ესერ ხოჩა, ამჟი ი ამჟი ესერ ლიხ გოშა̈რ ი იმჟო ესერ ჯი?

Line of edition: 12       -- ჯი ესერ ლერსგვან თეჩუ ქიმს ანკვანე, ეჩქას ესერ მიჩ ლა̈ხბერგი
Line of edition: 13    ისგა.

Line of edition: 14       ა̈ხჭა̈მ ამელეჟა ა ნაღვჟურ ი, ა ქიმ ანკვა̈რ, ა̈მის ლა̈ხბურგა̈ნ ისგა.
Line of edition: 15    ჴეციშ ხახვემ ლიკილიიდ ა̈დბინე: -- ა̈ჰ, ბა̈ქ ესერ ლი, ბა̈ქ: -- და̈ვს
Line of edition: 16    ხა̈ქვე.

Line of edition: 17       -- ჲაღვ' ესერ იმჟი ხოჩა, პირობა̈რს ესერ დეშ აჟვმე, მარე ა̈მიშ
Line of edition: 18    ესერ ლეჭშჷრიდ ჩუ ემა ხეყენი, ეჩქას მჷხა̈რ ჰამს მიჩა რა̈შ ჟ' ესეროღვ
Line of edition: 19    ა̈ნჰინგრე, ჟ'ოღვ ახსგურა ი ძღვიდქ' ესერ ეშხუ ქოღვ
Line of edition: 20    ათსკინავნე ი მერმე სგოღვ ახსკინავნე, ეჩქას ესერ ა̈მიშ ლეჭშჷრიდ
Line of edition: 21    ჩუ ხაყა.

Line of edition: 22       ათხე ბა̈ზი ჩვა̈დპანტა̈ნხ. ჯი მიჩა ხახვთჷჲსგაიდ აჩა̈დ: -- მ' ესერ
Line of edition: 23    ჩემნეს, ამჟი ი ამჟი ესერ ლიხ გოშა̈რ.

Line of edition: 24       -- გონა̈ბ ესე{რ} ნომოღვ ხარ, ჯი ესე{რ} ჟი ხოჴერჴე ა̈მიშ
Line of edition: 25    მაშედს. ჯი ესერ მჷსკდილს ლაჰედნე. ჯი ესერ ჭაჭა̈რთეჟი ჟ'ადრინე, ეჩქას
Line of edition: 26    რა̈შ ჟ' ესერ პერნი ი დეცს ესერ ხა̈ხპე ი ჩვ ესერ ადვა̈ში,
Line of edition: 27    მარე შომ' ესერ ჟ'ახსგურდეს ი რა̈შ ჟ'ოხპერეს, ეჩქას ალ მჷსკდილ
Line of edition: 28    ისგოღფ ხასდა ი ფოყა̈რჩუოღვ ხაჴიდ ი ჟ' ესერ ხეხვრენი. ეჩქანღვ' ესერ
Line of edition: 29    ჯი ლაგას ხა̈გნე.

Line of edition: 30       ჰამს ჟ'ანჷგა̈ნ ი ა მჷსკდილ ისგა ხა̈ზ ი რა̈შ ა̈ლი ჟ'ა̈ნჰინგრე.
Line of edition: 31    და̈ვ ი მიჩა ხეხვ ქანჭა̈დხ. ათხე ჟ'ახსგურდა ა̈ლი. ჟ'ამპა̈რ კაჩ რა̈შ.
Line of edition: 32    ამჟი ვობა̈შ ჟი დემეგ აფიშვდ, ა მჷსკა̈დშვ ში ფოყა̈რჩუ ხაჴიდ რა̈შ
Line of edition: 33    ა̈ლი ჩვანტა̈ხ გიმთეჩუ. დინა̈შ დიდ რა̈ქვე: -- ბა̈ქ ესერ ლი
Line of edition: 34    მა̈გ, ა̈მის ესერ დეშ ხაჰვდიხ! -- ი ისგაჩა̈დ ქორთე.

Line of edition: 35       ამჟი ქანსკინე მიჩა ლეჲხურიდ, მიჩა დედეშ რა̈შს ჰინგირ ჟი
Line of edition: 36    ხაჴიდ, ჟი ლახსგურდა ი ჟი ლა̈ჲქაბუნე მიჩა ლეჭშჷრი. ესხრიხ,
Line of edition: 37    ესხრიხ, ამჟი და̈ვა̈შ ხეხვ გუდ აჴა̈დ, ერე დინა ქა მეჩდელი.

Page of edition: 217 
Line of edition: 1       -- ჰატ, ა̈ნმარგ ესეროღვ, ოდო მინე გეზჷლ .ესერ ომჩედ ი
Line of edition: 2    ნაღვჟურ ესერი ოთხვაჲას!

Line of edition: 3       ჴეცდ ჟ'ა̈ნჰინგრე მიჩა რა̈შ, ხაღვიჭ. ისგოხკუდსე ეჯა̈რს, დინად რა̈ქვე:
Line of edition: 4    -- მიჩ' ესერ ბაბ' ახღვიჭხ.

Line of edition: 5       -- მ' ესერ ხოჩა ღვე?

Line of edition: 6       -- გონა̈ბ ესერ ნომოღვ ხარ.

Line of edition: 7       ჩოხქა̈პხ რა̈შს, რა̈შ ეჯი ჯვინელ ლაჴვმიდ ესსიპე, ფუნთქვირ
Line of edition: 8    ხაგ ქა̈მშხენ, ეჯჟი, მიჩა თხვიმ -- მეჩი პაპდ ი ნაღვჟურ -- ლა̈ჲრა̈რდ.
Line of edition: 9    ამჟი ჴეცსი ლა̈ხჴედჷნ ამთელისგა ი ნაზვ ჩოთთვა̈ფ. პაპს ხეჭვდელ:

Line of edition: 10       -- და̈რ ესერ იმეგ ხოწვა ამექაჲა? -- პაპდ ა̈დჷმბაჟე გარ: -- ჯი ესერი
Line of edition: 11    ჩოლმეჩელი ი ა ლაჴვმიჲ ჩვათმეჩენა ი მიჩეშჷნქ' ესერ და̈რ ხოწვა.
Line of edition: 12    ჟ'ოშჭენ ათხე ჴეცდ, სგატა̈ხ მიჩა ხახვთელისგა.

Line of edition: 13       -- მ' ესერ ხოჩვმინა?

Line of edition: 14       -- იმ ესერ იჩმუდ, რა̈შიშ ესერ ნაზვ ჩვათთვეფა, ეჩეჩუ ესერ
Line of edition: 15    მეჩი პაპ ი ჯვინელ ლაჴვმიჷნქა მამაგვეშ ახხუა.

Line of edition: 16       -- ვოტ, ჯი ესერ მუქვნია, შიშდ წა̈მჟიოღვ. ოშჭენ ჟი ი ეჯა̈რ
Line of edition: 17    ისგოღვ ანჴიდ:

Line of edition: 18       ჟი ღალიდ ოშჭენ, ჲაღვე იმ იჩმუდ! ესხრი, ესხრი ი ამზუ ხა̈ნს
Line of edition: 19    ალჲა̈რ, მა̈ შომა, ამჟი ესპჷდხ ი აჩა̈დხ. ხაღვიჭ ა̈ლი. ისგოხკუდს',
Line of edition: 20    ეჩქას მიჩა თხვიმ ჯუდ ესსიპე, მიჩა ჭა̈შ ი რა̈შ -- ფეკვნოლდ. ა ჴეც
Line of edition: 21    ისგანჴა̈დ ამჲა̈რთელისგა. ამჲა̈რდ ლიჰევ ლოხბინეხ, ნაზვ ჩოთთვა̈ფ.

Line of edition: 22       ჟ'ოშჭენ, სგაჩა̈დ მიჩა ხახვთე ი:

Line of edition: 23       -- მ' ესერ ხოჩვმინა?

Line of edition: 24       -- ა' ესერ ი ნაზვ ესერ ჩვათთვეფა ი ეჩეჩუ ჯუ ი ფეკვნოლ
Line of edition: 25    ესერ ესხკიახ, ეჯჷნქა მამაგვეშ.

Line of edition: 26       -- ჲაღვე ათხ' ესერ ჯი ხეღვჭენი ი, იმუგვ ესერ ოთჩედნიხ,
Line of edition: 27    გუ ესერ ლაჰედნე.

Line of edition: 28       ჟ'ახსგურდა და̈ვა̈შ ხეხვ რა̈შს, ესხრი, მარე გიმ-მეგემს აქთუნე,
Line of edition: 29    ეჯჟი ლჷხრინად ხაღვიჭ. მიჩა გეზალ გუდიდ აჴა̈დ: -- ა, ვა̈ჲ,
Line of edition: 30    ვა̈ჲ, ათხე მიჩა დედ' ესერ ახღვიჭ!

Line of edition: 31       ზუღვა̈შ ნა̈კვილ ტობს ათასდხ მინ. რა̈შ, ჭა̈შ ი მიჩა თხვიმ მა̈გ
Line of edition: 32    წყა̈რშინდა̈რდ ესსიპე, ისგადსკინეხ ტობთელისგა, ამჟი ა მიჩა დედესი
Line of edition: 33    ლა̈ხჴედჷნ აშთელისგა.

Line of edition: 34       -- ჰატ, იმუგვ ესერ ოთჩედნიხ! ა ხოლა რა̈შ, ტობ ჟ' ესეროღვ
Line of edition: 35    ა̈ნჷნწჷრე:

Line of edition: 36       ამჟი ჷთრე რა̈შ, ჷთრე ი ლა̈ფკვალთე ახყა̈რვნე, ეჩქას ჟ'ანპა̈რხ
Line of edition: 37    ალჲა̈რ ი ჟი ესხრიხ დეცთე.

Line of edition: 38       -- ა, ხოლა რა̈შ, ჟ' ესეროღვ ანპა̈რ ი ისგ' ესეროღვ ლა̈ჰიდხ!

Page of edition: 218 
Line of edition: 1       -- მ' ესერ ლა̈ჰიდეს, ტობდ ესერ ჟ'ოსბიჭკვა!

Line of edition: 2       -- ეჯობ ესერ მადმა ლი! -- ი ხატყვეფ რა̈შს.

Line of edition: 3       ამჟი ჟ'ომპერელი რა̈შ ი ოლმა̈ზლი დეცთე. ამ ჩიქდ რა̈შს
Line of edition: 4    ჩვათქვეცა ჯა̈რღვ ი ჩომშყედელი, ა და̈ვა̈შ ხეხვ ა̈ლი ჩუქალისა
Line of edition: 5    ლახნახეხა. რა̈ში ჩოლდაგა̈რლი ი ეჯა̈ი.

Line of edition: 6       ალჲა̈რ ჩომტეხელიხ ი, მა̈ შომა, ამჟი ოლსიპელიხ. ლახსგურენახ
Line of edition: 7    ჟი რა̈შს ი ოთყჷრახ ნაღვჟურიშ ქორთე. მიჩა დი ი მუ ი ლახვბა
Line of edition: 8    მა̈გ აშ ლჷმა̈რდელიხ ი ეშთელისგა ახჴედჷნენახ ისგა, ა̈ზვლისგა
Line of edition: 9    ჩვახქეხახ ი

Line of edition: 10       -- ათხე ისგ' ესეროღვ აჩა̈დ ჯი ქორთე! -- დინას ხოქვა მიჩ
Line of edition: 11    ჭაშვდ.

Line of edition: 12       სგაჩა̈დ ი ალჲა̈რს ჩუ მამა ხაჯრავახ, ერე ჯი ირი იინე გეზალ
Line of edition: 13    მიჩა ლახვბა ი მიჩო მუ ჩა̈რჩს ხონხახ ჩუ, ეჯზუ ფა̈თვ ხაგხ. ანჴა̈დ
Line of edition: 14    ი ფა̈თვ ქათწაბურნე ეჯჲა̈რხ ი ჯი ქანჴა̈დ მიჩა ხახვთე ი ქოხუმბავე
Line of edition: 15    ა̈მის ქორა̈შ გვეშ. მიჩა ხეხვ ისგა̈დჴერნე ქორთე. ალჲა̈რს ჩუ
Line of edition: 16    მადე ხაჯრავახ, ამგვა̈ ხახვ ა̈ნჴდა ეჯი. ესჭა̈მ ათხე ა სიმაქ, ალჲა̈რ
Line of edition: 17    მა̈გ გა̈ნხენჩუ ლა̈ჲსგურე, ეჯჟი, მა̈ ხეყა̈რ, ა̈ლი მა̈გ ქოხუმბავე
Line of edition: 18    ამნემ. ათხე სერ სგა̈დჯჷრვეხ ი ქვერწილს ახადხ. ჰარა̈კ ესერ
Line of edition: 19    ნა̈პვრა̈შ ლჷჯე მადმაიდ ხა̈კლინახ.

Line of edition: 20       ეჩგიშ ხოჩა ამეგ ი ამგიშ ხოლა ეჩეგ.


Line of edition: 21 
ლამხერი. ალექსანდრე ნარსავიძე. მ.ქალდანი. 20.VIII.1956 c̣.



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.