TITUS
Svan Prose Texts II (Lower Bal)
Part No. 111
Previous part

Text: 111 
Page of edition: 220 
Line of edition: 18 
CXI. ზურუბხან


Line of edition: 19       იმეგ ა̈რი ეშხუ ზურალ ი ლჷცთე თვინგ ადაჲე. ლჷც ისგა
Line of edition: 20    ლოხვეგ თვინგ ი თვინგთეჲსგა ა̈ნთროლდ ადსკინე. ა̈ნთროლ ჩუ
Line of edition: 21    ლა̈ლემ. ეჩა ლიზებღა ჩვა̈დღანვა̈ნ. ეჩქანღვე ნაღვჟურ ა̈ხწესა̈ნ.
Line of edition: 22    ა̈ლი ეჯგვა̈რს იცხემ, ერე ლა̈იდ სურუ ხოჩამ ი ლითხვჯრ ა̈დბინე
Line of edition: 23    შიშდ.

Line of edition: 24       ეჩქად ი ეჩქად და̈ვ ა̈ხმითქვა̈ნ ა ზურალს. ა ნაღვჟურს ზურუბხან
Line of edition: 25    ხაშხა.

Line of edition: 26       ანჴა̈დ აშხვ ნებოზს ზურუბხან ქორთე ი ეშხუ ბეფშილდ კერა̈მჷყ
Line of edition: 27    იბურღვანელ მახე ნათავ. ლა̈ხჭედივ მიჩა დის:

Line of edition: 28       -- დია, მ' ესერ ლი ა̈ლი, იმხენ ესერ ოხჴიდა?

Line of edition: 29       -- ა̈ლი, დიაღო, მიჩეშჟი ესერი ამჟი ხა̈ყრა ი იღბა̈ლდ ესერ
Line of edition: 30    ამჟი ხა̈ღვენა.

Line of edition: 31       ზურუბხან ა̈ვა̈მიდ ხოჩამდ ხაშდბა ა̈მის. სერ ა̈ლი ჟი ხეჰელა̈ლ
Line of edition: 32    ლაცხაპს დანწარებილ, ეჩქას და̈ვ ხარგა̈დნა ა ზურალს:

Line of edition: 33       -- ოხსახთეოღვ მოლე მიჩა გეზალს, ოდო ლადეღშვ გარ ესერ
Line of edition: 34    ხარ მიჩაცახა̈ნ ლარდა ი ლეთშვ მადჷა.

Line of edition: 35       -- ჯინემ ' ესერ მ' ოხსახთას, ჯინემ ესეროღვ ა̈ნსკორე ა̈მიშ
Line of edition: 36    მჷღლა̈ტი, ოდო.

Line of edition: 37       -- ჲაღვ' ესერ ლეგმერდადოღვ ანსყე მიჩა თხვიმ.

Page of edition: 221 
Line of edition: 1       ანჴა̈დ ზურუბხან -- ლა̈თხვხრხენ ქორთე ი მიჩა დი ლეგმერდ'
Line of edition: 2    ესხვიდ.

Line of edition: 3       -- დია, მ' ესერ ხათჷმ?

Line of edition: 4       -- მ'სერ დერი იდგა̈რი ესერ.

Line of edition: 5       -- ღვე, და̈ს ესერ მაგვეშ ჟაგრა̈რ ოსთინაჲა მიჩეშდ?

Line of edition: 6       -- ეშხუ ესერ ზურალს ოსთონა ი იმგვა̈ლეგ ტვსბისგ' ესერ
Line of edition: 7    ტყა̈რ ყერს გეჭილდ ხაჭიმ ი ეჩ' ესერ ხარშვ ხარ ხოჩა.

Line of edition: 8       ანჷგა̈ნ მერმა ლადეღ ზურუბხან 'ი აჩა̈დ ა̈მიშ ლა̈თხეღითე ი
Line of edition: 9    ყერ ესერ ლჷმჩიგვნავნელი მიჩა გეჭილდა̈რს, ეჯაი ესერ ესჰია.
Line of edition: 10    ზურუბხანს მეძბარა̈რ ესერ ხა̈ნჴრინა. აშხვ თემიკვირ ესერ ხა̈შხენა,
Line of edition: 11    მერმა -- შდიმიკვირ. გეჭ ესერ ჟ'ოხორმა ზურუბხანს, ეჩქას ტყა̈რ
Line of edition: 12    ხამა̈რ მა̈გ ესერ ისგახშჷდახ ლაცრჷლათე. ზურუბხან თემიკვირს
Line of edition: 13    ი შდიმიკვირს ესერ ლახშჷმა. ლოხბინახ ესერ ეჯჲა̈რს ხამრე
Line of edition: 14    ლიჴეფ ი:

Line of edition: 15       -- ჰა, მა̈დილ ესერ ხერი, ნომოღვ ათცჷრჷლნე მინე თხვიმ,
Line of edition: 16    გეჭილდს ესერ მადეჲ მოლე ხოჩამ ესერი ლაპედნეხ.

Line of edition: 17       ჩქვაჷლდ ესერ ლოხყვიფა ეშხუ კერილდს, ეჯი ესერ ლოჰოდა:
Line of edition: 18    -- ა̈ლი ესერ მიჩა წჷხი ლადეღ ჟ' ესეროღვ ოხსჷრგება.

Line of edition: 19       გეჭილდ ისგ' ესერ ოხჴიდა მიჩა დიეშთე" მერმა ლადეღ ომტეხ
Line of edition: 20    ესერიდ ლა̈თხვართე. ქორთე ნა̈ჴედვჟი მიჩა დი ხოლამდ ესერიდ
Line of edition: 21    ესხვია. ლახჭედნ' ესერ მიჩა დის:

Line of edition: 22       -- და̈რ ესერ ომჴედა ლა̈დი, მოლ' ოსთონასგვ ეჯი?

Line of edition: 23       -- ეშხუ ესერ ზურალ ომჴედელი ი იმგვალეგ ესერ და̈ვა̈რს
Line of edition: 24    სანაფ ხოგხ ი ეშხუ ფაყვ ეჯის ესერ ოხჴიდე, ეჯი ესერ ლი მიჩა
Line of edition: 25    მაშედ.

Line of edition: 26       ომჩედ მერმა ლადეღ სანაფიშ ლა̈ჴდათე. ხოყირ' ესერ და̈რკვიც
Line of edition: 27    ა და̈ვრე სანაფდ ი ჰედურდ ესერ მა̈გ ჩუქაქა ესდენა. ოთბინახ ესერ
Line of edition: 28    და̈ვა̈რს ლიყულელ, მა̈გ ესერ ქომჴედხ, ზურუბხანს ესერ
Line of edition: 29    ახშჷდახ ისგა ლადვა̈შითე. ზურუბხან ლახშჷმ' ესერიდ მიჩა თემიკვირს
Line of edition: 30    ი შდიმიკვირს, ლოხბინახ ესერ ალჲა̈რს და̈ვა̈რდ ლიჴეფ.

Line of edition: 31       -- ჰა, ხოჩ' ესერ ამსვალდ, ნომ' ესეროღვ ათცჷრჷლნე მინე
Line of edition: 32    თხვიმ ი, მ' ესერ ხაკუჩ, ეჯიოღვ ხა̈ქვე ი ეჯის ესერ ხეჩოხ.

Line of edition: 33       -- ლიხ ესერი აგრა̈ჲ და̈ვა̈რ, ოდო ეშხუ ფაყვ სანაფ ესერ ხარ
Line of edition: 34    ლეისგ, სერ მადმაგვეშ.

Line of edition: 35       თემიკვირ ი შდიმიკვირ ქოთყა̈ჩვნა ლაჴა̈ფს. ომჴედ ესერ ეშხუ
Line of edition: 36    და̈ვ ი კვერილდ ესერ ლოხჴიდა ყორქა, ეჯი ესერ ლოჰოდა:

Line of edition: 37       -- მიჩ' ესერ წჷხი ლადეღ ჟ' ესეროღვ ახმარგა ა̈ლი.

Page of edition: 222 
Line of edition: 1       ა სანაფ ქორთ' ოხჴიდა მიჩა დიეშ ლემნეჲაქდ. ჯი მერმა ლადეღ
Line of edition: 2    ლა̈თხვართეიდ ომტეხელი. ა, ქორთ' ომტეხ, ეჩქას ხოლამ დიდ ესხვია
Line of edition: 3    მიჩა დი.

Line of edition: 4       -- დია, მამ' ესერ ათსგუენაჲა, მიჩ ოხჴიდ' ეჯი?

Line of edition: 5       -- დემეგ ესერ, დია̈შ. იმგვალეგ ესერ ჰავლიშ მეგამჟი შაურდენს

Line of edition: 6       ხარ ლაპონტყ ი ეჩ' ესერ წინწლიშ ხარშვ ხარ ხოჩა, სერ
Line of edition: 7    მამაგვეშ.

Line of edition: 8       მერმა ლადეღ ომჩედ შაურდენიშ წინწილთე. ომჩედ ესერ ჰავლიშ
Line of edition: 9    მეგამთეჟი ჷი ი წინწილ ესერ ჩოხჴიდა ჯიკთეჩუ, ეჩქას გარ
Line of edition: 10    ესერ ოთბაჟახ შაურდენა̈რს. ახშჷდახ ესერ ისგა ეჩქას ლაცრჷლათე
Line of edition: 11    ი თემიკვირს ი შდიმიკვირსიდ ლახშჷმა. ალჲა̈რ სგაიდ
Line of edition: 12    ახშჷდახ ლაცრჷლათე შაურდენა̈რს.

Line of edition: 13       -- ჰა, ხოჩ' ესერ ამავალდ, ნომოღვ ათცჷრჷლნე მინე თხვიმ
Line of edition: 14    ი წინწილს ესერ დერი მოლე ხოჩამ ესერ ქაიდ ლაჰედნეხ.

Line of edition: 15       ეშხუ შაურდენს ესერ ღალიდ ლოხკიჩა ი ეჯი ესერ ლოჰოდა ქა:
Line of edition: 16    -- ა̈ლი ესერ მიჩა ჭირიშ მჷშდნ'ოღვ ლი.

Line of edition: 17       ა̈ლი ქორთეიდ ოხჴიდ მიჩა დის. მერმა ლადეღ ჯი ლა̈თხვართეიდ
Line of edition: 18    აჩა̈დ. ა̈მიშ ქორთე ლიტხა̈ლდ და̈ვდ ოსთონეიდ ა ზურალს:

Line of edition: 19       -- მჷხა̈რ ესერ გვა̈მიდოღვ ნამთილი ა̈ნჴიდ ი გემთე ლიზიოღვ
Line of edition: 20    ხა̈ქვე ი გვიოღვ ლახემ, მა̈ ხოსდეს, ეჯის. ღვე ჯი ესერ გემიშ
Line of edition: 21    ყორჟი დოლბიშ შირად ა̈დსიპი ი ჟ' ესერ ხოვხენი ი ჩვ ესერ ადლჷტნისგ.

Line of edition: 22       ა̈ლი, ქორს ხა̈რდენა, ეჯ ნაღვჟურულს ქა ხასმოლმა ი გემთე
Line of edition: 23    ლაზჟი ზურუბხანს ჭაჭა̈რ ლექვა ლახფორცხენა. ეჩქას და̈ვს დეშ
Line of edition: 24    ოთსერა მიჩა გეზალ ი მამაგვეშმოშ ხოყრა ზურუბხანიშდ.

Line of edition: 25       და̈ვს ადა̈იდ ოსთონა ა ზურალდ: -- მურყვამთეჟი ესეროღვ
Line of edition: 26    აჩა̈დ ი ეჩხენქა გვიოღვ ლახემ მინე ცხეკს, ა̈ღვრას ი ჩიგვაშვ.

Line of edition: 27       ეშთეჟი ჟ' ესერ ომჩედ ზურუბხან. ლოხტჷბნ' ესერ და̈ვს მურყვმა̈შ
Line of edition: 28    ყორდ ქ' ესერ ოხთჷქა, ლოხფულ' ესერ ი ზუღვაჲსგ' ოსგა
Line of edition: 29    ალ მურყვამ.

Line of edition: 30       მერმა ლადეღ მიჩა თემიკვირ ი შდიმიკვირ წკულიხ ი
Line of edition: 31    სიპს ესერ კჷრკა̈ნდ. ომჩედხ ესერ მურყვმა̈შ ლაწვ' ა̈დგითე.
Line of edition: 32    ზურუბხანს ესერ ლა̈წიკვა̈რი ხარენა მურყვმა̈შ გალვა̈ნხენქა ი
Line of edition: 33    ლახშჷმ' ესერ მიჩა მეძბარა̈რს: -- დეშ ესერ ხა̈მედახა, ლაყვრა̈შ
Line of edition: 34    თხუმქა ლათთუნ ზი, ეჩა ქა ლიჴდე ამთექა?

Line of edition: 35       ოთქინახ ესერ ეჯჲა̈რს ი ოხჴიდახ ესერ შიშდ.
Line of edition: 36    -- ლა̈ხჭედივხ ესეროღვ ჩქვაჷლდს: მ' ესეროღვ ხემედჷნეს?
Line of edition: 37    ჩქვაჷლდს ესერ ხოქვა:

Page of edition: 223 
Line of edition: 1       -- ჯი ესერ ა̈რწვენი ქა ი მურყვამს ესერ ა̈თრეკი ისგა ი კა-

Line of edition: 2       და̈რისგ' ესერ ესგემ.

Line of edition: 3       -- კვერილდს ესეროღვ ლა̈ხჭედივხ: მ' ესეროღვ ხემედიჷნეს?

Line of edition: 4       კვერილდს ესერ ხოქვა ი: -- იმგვ' ესერ ხეცხენი, ეჩეჲსგა
Line of edition: 5    ყორჷლდს ესერ ლახყენისგ, ეჯი ესერ ხა̈მედა.
Line of edition: 6    -- ჲაღვ' ესერ ღალიდსოღვ ლა̈ხჭედივხ, მ' ესერ ხემედი
Line of edition: 7    მიჩ, ეჯი.

Line of edition: 8       ღალიდს ესერ ხოქვა: -- მურყვამს ესერ აშხვხენჟი ჟ'ა̈თჭემნი,
Line of edition: 9    მერმახენჩუ ჩვა̈ნტხენი. ჭირს ესერ ი ხლინს ჩი ხლინდ ოთსიპისგ.

Line of edition: 10       ამჟი ჩემინხ. ზურუბხან ხოჩა შვიდებდ ჩვანტა̈ხ მურყვამხენჩუ,
Line of edition: 11    და̈ვ ჩვადგა̈რ ი ხოჩა ლირდ' ა̈დჴიდ.

Line of edition: 12       ვოდ ეჯჲა̈რს ლეწედ, ეჩქადოღვ ლა̈რიდ.


Line of edition: 13 
ღეშდერი. კაკუ ჩხვვმიანი. მ.ქალდანი. 22.VIII.1956



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.