TITUS
Svan Prose Texts II (Lower Bal)
Part No. 132
Previous part

Text: 132 
Page of edition: 256 
Line of edition: 1 
ზღაპრები
Line of edition: 2 
CXXXII. ა̈მირმ


Line of edition: 3       არდა ეშხუ ხელწიფხ. ამ ხელწიფხს ხეჟხჷნ ივა ი ხორდა სემი
Line of edition: 4    ნაღვჟურგეზალ. აშხვ ხეჟხჷნ ვისიბ, მერმა ბა̈დრ ი მესმა ჩალა̈მკალა̈მ.
Line of edition: 5    ალ ლახვბა ლა̈იდ გუნ მეკვჰე ლასვხ ლიმხეღვაჟისგა. და̈ვ მა̈გ წჷსხა-ბალად
Line of edition: 6    ანკიდხ ი ნა̈თხვრა̈შ ლაღვშვ გარ არდახ. ქვეყანა მა̈გ ამჲა̈რს
Line of edition: 7    აფშდივ.

Line of edition: 8       აშხვ ლადეღ ალჲა̈რ ლა̈თხვართ' აჩადხ. აშხვ ზაგა̈რჟი ხეწადხ
Line of edition: 9    ჟი ლუგვრიზე ჴანვემ გვერა. ალ გვერე მა̈ ლეჟავ იკრანკელ, მა̈
Line of edition: 10    ლექვავ, მა̈ ჟიბავ ი მა̈ ჩუბავ, ეჯჟი ქა სიპ, ერე თეს ვენდ გარ ხა̈თხპინე
Line of edition: 11    მარე. ალჲა̈რს გვერემ ჟი ლირმიდ გვი ლახადხ, მარე ამნემ ბიქვშალ
Line of edition: 12    ლა̈ჲბინე ლისიპ. ბა̈დრიდ რა̈ქვე: -- ცჷჴმდა̈როღვ ა̈ხფიშვდხ ი ჰედ ესერ
Line of edition: 13    გვერა გიმჟი ესლა̈ჯნე, მადეჲ ლჷა̈რ ესერ ემაგვეშ ირდი ამ გვერაჲსგა,
Line of edition: 14    ეჰე ჩვ ესერ ადდაგრისგხ.

Line of edition: 15       ოხბინეხ ლიცჴომდ ი უზარად ხეფშვდეხ, მა̈ ღვენიბედ ხარხ,
Line of edition: 16    მარე ჩხირა̈რს გვერე ღოშგდ ხოკვფხე ი ლეთლად დემ ითლე
Line of edition: 17    ისგა̈სი. ამჟი ატყვიფხ ლა̈დიშ ლადეღ ჰამუნღვე ნებოზდ. ნებოზს
Line of edition: 18    ჭიშხ ლჷტყცა̈ნ, შია̈რ ჰა̈რი ქორთ' ანტახხ. ბა̈ზი ქორს მამაგვეშ
Line of edition: 19    ლა̈ჲკვიშხ, ჩვა̈რიხ უშკუშუნდ. მერმა ლადეღ ქაიდ ლა̈ხტახხ გვერემ
Line of edition: 20    ლა̈თხელის. გვერე ლჷშიდგმუნე აყვრა აშხვ ლამჷჟ ა̈დგის.
Line of edition: 21    ა̈ხჴვასგხ ისგა, -- ჟი როქვ ოლჷრმინედ, -- ი მოლე გარ ხოკლივხ
Line of edition: 22    გვერათეჲსგა, ეჯჟი ლიკვჩხელ ი ლიპრელიდ ა̈დბინე ი ისგა̈ხი მადე
Line of edition: 23    ლა̈ჲთილ. ამჟი ხემჷრმისგალხ სამ ლადეღ ქა ლუბუწე, მარე ჭირჷნქა
Line of edition: 24    მამაგვეზ ლა̈ხქამხ.

Line of edition: 25       მესმა ლეთ გვიმა̈კვშოვა̈რ ანტახხ ქორთე ი უშკუშუნდიდ ეს{ს}გურდახ
Line of edition: 26    კაღეშგიმ ლექვა. მინე მუ ლა̈ხჭედივ: -- მ' ესერ ამბა̈ვ
Line of edition: 27    ლი, იმნა̈რ ესერ ა̈რიხ ამჟი ხოლა გუჟი, ჰედი ნა̈თხვრ' ესერ იმღა
Line of edition: 28    დეშ ხოდგარახ ამ მჷიშ?

Line of edition: 29       გეზლირდ ქოხუმბავეხ მა̈გთან მინე მუს: იმჟი გვერა ხეწადხ,
Line of edition: 30    იმჟი ლირმიდ გვი ახად, მარე გვერა ჟი ლა̈რმი მადმა ხარ ი დეი
Line of edition: 31    ცჷჴემდს ირკინე ისგა̈ხი.

Line of edition: 32       ივად ხა̈ქვე: -- ეჯი ესერ ჲაღვე ა̈ნგლეზიშ გეზალ ლი ი ქვეყანაჟი
Line of edition: 33    ესერ ლი ჩუ ლჷდე ეჯღა, ერე ამსვალდდ როქვ ესსიპი. ეჯის
Page of edition: 257  Line of edition: 1    ამჟი ა̈დვილდ დეშ ხირმიდ. მი იმჟი ჯექინე, ეჯჟი ჩემინდ ი ალეს
Line of edition: 2    გვიშგე იღბა̈ლდ ესპჷდეს. იმგვა ალ გვერე ზი, ეჯ ლახვა̈შ ქომ ეშხუ
Line of edition: 3    მაზვაბ აღრი. ეჯის ხაჟხა იუ̂რდანიშ ლიც. მა̈ნკვი ამ მაზვაბთეჩუ
Line of edition: 4    აჩადდ, შჷნ ლახირმდ ალ აბრეშუმიშ ბა̈დ ი ჩოთეგდ მაზვბა̈შ
Line of edition: 5    ძგიდმჷყ.' ალ ბა̈დ მი მიშგვა პა̈პი ქრისდე ღერთემ ლამემ ი მიჩა
Line of edition: 6    ჭვადანდ გვერა ი მოლაფერიშდ ჟ'ახსახთედ, ერე ბა̈დ ლაღა̈ლთე
Line of edition: 7    ათუზად. ბა̈დს სგა̈თჷრმენეს, ეჩქას ვოდე ჲუ̂რდანიშ ლჷცშვ ჩვა̈დ
Line of edition: 8    ჟირენეს, ეჩქად სგა ნომეგ ა̈თბურგენედ, ოდო ქა̈სკნე ი ჩუ ჯამარცხეხ.
Line of edition: 9    ლჷც ჟ'ათბიდედ, ეჩქას ჩუ იყვედი გვერე, ჟ'ა̈ხკიდდ ი
Line of edition: 10    ქორთ' ანჭიდდ, მარე ქორთე ლიჴდა̈ლდ ჩუ ნომეგ ათფჷშგჷრად,
Line of edition: 11    ოდო ხოლამდ გვიჭდენი გვეშ.

Line of edition: 12       ალ ლახვბად ტკისდ ამჟი ჩემინხ, იმჟი მინე მუ ივად ადშგურანე.
Line of edition: 13    ნებოზს ჟ'ა̈ნირმხ, ჲუ̂რდანიშ ლიც ჟ'ათბიდხ, ლუგვრიზე გვერე ჟ'ა̈ნყვედან
Line of edition: 14    ი ქორთ' ანჴიდხ, მარე ეჯგვა̈რ ლასვ გვა̈მი, ერე სამ გჷმრა̈რდ სგა ვენდ
Line of edition: 15    გარ ანჴიდხ. მინე მუდ ღერმათ დიდა̈ბ ხა̈ქვე, ყორ ი ლაჴვრა ქოთდე:
Line of edition: 16    ქადუნკვილე, ჩვადფჷშგჷრე გვერე ი ამხენჟი ლეტვრე მუტვა̈რშალ ნაღვჟურდ
Line of edition: 17    ანსკინე. ამნემ ყორს ი ლაჴვრას ლა̈ჲბინე ლიზვრელ, მარე ალჲა̈რ ლახა
Line of edition: 18    ქა ლუჩვმინ ესხვიდხ, ჭერქა ლა̈ჲბინე ლიპორელ ი ამჟი უქვიცდ იპორალ
Line of edition: 19    აშხვ ლეთნილადეღნ. მერმა ლადეღ ჩვანჴად ი ყერბჩუ ესჷგან. ივად თხვიმ
Line of edition: 20    ოხნიკვ, ღერმათ დიდა̈ბ ხა̈ქვე ი ამჟი ქრისდე ღერმეთი ანჴად. ჟ'ა̈ნპირსდე ალ
Line of edition: 21    ბეფშ ი ა̈მირმ ათჟა̈ხ, ეჩქანღვე ჩვადმეზრე ალ ქორ ი აჩად. ივა
Line of edition: 22    ხელწიფხდ ი მიჩა გეზლირდი დიდა̈ბ ხა̈ქვეხ ქრისდე ღერმათ ი
Line of edition: 23    ა̈მიშ ნაზუნღვე ქაჩადხ ა̈მირმიშთე, ლიყჰა̈ლდ გვი ლახადხ ი ლიფრება̈ლ-
Line of edition: 24    ლიშდრა̈ლდ, მარე ამნემ ჩვესგენე ალჲა̈რ ი ხა̈ქვე: -- ჯი ესერ
Line of edition: 25    ჴანვემ ტუფთეჲსგაიდ მეტეხ ლი. სემი ლეთ ი ლადეღ ესერ ხარ
Line of edition: 26    ეჩეჲსგა ლერდე. ხჯჩამდ ჟი ნა̈შვმინუნღვ' ესერ ქა̈ნჴდენი ი მინეცახა̈ნ
Line of edition: 27    გარ ირდი.

Line of edition: 28       ივა ხელწიფხ ი მიჩა გეზლირდ ტკისდ ამჟი ჩემინხ. სამ ლეთ
Line of edition: 29    ი ლადეღუნვე გვერახენქა აქნჴად ი ეჯკა̈ლიბ ლი ლესგდი მახეღვა̈ჟ,
Line of edition: 30    ერე ლესგდიდ ლი ცოდ. ქა ლა̈ხცხორპან ლაყჰალდ ამ ბოფშარს,
Line of edition: 31    ივა ხელწიფხდ გეზალდ ლა̈ჲღვენე ა̈ნირმ ი მიჩა გეზლირდ
Line of edition: 32    ხოშილიდ ხალა̈ტ. აშხვ თევისგა ჲერვეშდ ლჷზა̈ მახეღვა̈ჟს ა̈თმაჯონან.
Line of edition: 33    ლა̈ღხვართე ოსჴერი მიჩა ლახვბას ჩი ლადეღ ი ნა̈თხვრა̈შ გარ
Line of edition: 34    ლაღვშვ ხორიხ მინე ქორშა̈რ.

Line of edition: 35       აშხვ ლადეღ, ლა̈თხვარხენ ლატახჟი, ლა̈შვმინად ჩვეც{ს}გურდახ.
Line of edition: 36    ა̈მირმ ლა̈ხჭედივ მიჩა ლახვბას: -- მ' ესერ ლი, მინე მუს ეშხუ გარ

Page of edition: 258 
Line of edition: 1       ესერ თე იმღა ხოსგურ? მ' ესერ ხა̄ყრა მერმა თვს, იმ ესერ ოხხიჰა,
Line of edition: 2    იმ ესერ ოთღა? ჩვ ესერ ემაგვეშ ხოხალხ ა̈მიშ ხვირი-მახალ
Line of edition: 3    ე, ნომოღვ ათჰემხ ი ქოღვ ხა̈ქვეხ.

Line of edition: 4       ბა̄დრიდ ოსცა̄დ: -- აშხვ ლადეღ ესერ ჩალა̄მკალა̄მ ლახჭედნა
Line of edition: 5    მინე ბაბას ა̈მიშ ბედჟი, მარე ეჯგვა̄რ ესერ მიჰმა̄ნ ოსგენა, ერე
Line of edition: 6    ეჩქანღვე და̄სმოშ ესერ ოთბედავახ ლიჭვდელ.

Line of edition: 7       -- ჲაღვე ა̄მირმ ნომოღვ მაჟხა, ალ გვეშ ჟი მადე ოხმეჴრა!
Line of edition: 8    ბა̄ზი ქორს უშხვა̄რთე ა̄ნუნჭურანხ, ლამბუალ ადსყეხ ათა̄ს
Line of edition: 9    გვაშვჟი ი ლიხჷრჯა̄ტიშ დრევჟი პმირმ პთჴჷრან მიჩა ბაბას; --
Line of edition: 10    ჯერი ი ემა ემა გეზალდ მაბურგა ე, აშხვ გვაშვ ჯეჭვდელ ი
Line of edition: 11    ნომ' ა̄მცუდე!

Line of edition: 12       -- იმნა̄რ ა̄ჯცვივი, ბაბა̄შ ლადეღ სი! ლიჭვდელღა მი და̄ს ხვცუალა
Line of edition: 13    ი სი იმღა ა̄ჯცვივი, გეზლირისგა მაშენ ლენწა̈მს ი იმედს?

Line of edition: 14       -- ჲაღვე, ბაბა, ათხელდი მეკვად ა̄მიშ ლიჭვდელ, მარე მორდა̄ბ მად.
Line of edition: 15    მა̈ ჯეყარ აშხვ თეს? ნამა̄რინ ლი ა იშგანშვ ნა̄ყრინ? ნამა̄რინ
Line of edition: 16    ემა ლი ეჰე, ქა ნექარ ისგვა გეზლირს ი მჷქაფს ქა ლოხტიხედ
Line of edition: 17    ისგვა ამგვა̄რ ჩქიმიშ მჷგნა, მადეჲ თხუმ ეჯღაჲ დემ ოთზა̄რისგდ
Line of edition: 18    ი ჴევცახა̄ნ შგურა̄რ დემ ოლსდენიდ.

Line of edition: 19       ა̄ლი ჟ'ა̄ნჰუნრე ივა ხელწიფხდ, სურუ ა̄ნხირნან, მარე ქა მამაგვეშ

Line of edition: 20       რა̈ქვე ი შიყ გარ ლახა̄სგ მიჩა გეზლირს.

Line of edition: 21       ა̄მირმდ ხა̄ქვე: -- მი ღევა̄რ ხვი ა̄მიშ ნაჭვდალერ, მარე ლახა
Line of edition: 22    ისგვა თემი გვაშვ მადმა მიცხრი, მადმა ჯა̄კვდენა მიშგუ თხვიმ
Line of edition: 23    გეზალდ ი მი მჷხა̄რ ხეკვეს ოჩვე მიშგვა შუკვს, ემეჩუ მერდე მადმა
Line of edition: 24    ხვი. ტკიც ლი, ჟ'ა̄მირდ სი ი ისგე ლიყველ მჲა̈ჲ გუნ გარჯ ა̄მერი,
Line of edition: 25    მარე ა̄ლჲა̄ჲ ტკიც ლი, ერე მიშგუ წა̈მ მუ სი მადმა ხი.
Line of edition: 26    ეჩქას ჟ'ა̄ნსპჷდ მიჩა გეზლირთე ივა ხელწიფხ ი ხა̄ქვე: -- ა̄მირმ,
Line of edition: 27    ისგუ ნაფა̄ს მი მამაგვეშ მაწვა, მიშგვა წა̈ვ გეზლირდ სი მიცხა
Line of edition: 28    ი ლეჰვმი მა̄ მერი, მარე მაგნებდ, ნომაგვეშიჯ ფეყერეხ მიშგვა
Line of edition: 29    თემი ბედშვ.

Line of edition: 30       -- ეჯღა შვა̈ბ გარ ხიყრ. ისგვა ბედჟი ლახა მა̈ ა̄ნრეკნი, ეჯღა
Line of edition: 31    შგურ დემის ხვეწდენიდ, მარე ნავყურებიღა ჩჲა̄გ შგურა̄რ ხეკვეს
Line of edition: 32    ხვარდედ, ფაყვა̄შ ჟიხი ლაგამ ხეკვეს მადმა ნადეს.

Line of edition: 33       -- ეზერ, ბაბაღო, ბა̈ზი ლამბვიედ, მჷხა̈რ აშხვ გვაშვ ლა̄ჲკა̄ცნე
Line of edition: 34    ი ქ'ემოშ ათსრულისგდ ეჰე, მა̈ სა̄ჭირო ირი, ჩიგვაშვ ქა ჯექინე.
Line of edition: 35    მერმა ლადეღ ივა ხელწიფხდ სგა̈დჰერ მიჩა გეზლირ ლა̈ვზირალდ
Line of edition: 36    ი ხა̈ქვე: -- ჲაღვე ჰაჯ ეჯღაჲ მად' ამკიდდ ი ეშდჲარვ თანღი ეჩხენჩუ
Line of edition: 37    ეშხუ მჷნწლა ა̈რი ი მერმა ღებ ლჷგ. მჷნწლა̈შ ლაღვ ი ლაღვბა̈შ

Page of edition: 259 
Line of edition: 1       თუ ისგ' ევოშ მიჴდედ ამთეჲსგ' ეჰე, ქა ჯეკვიშ მიშგვა თემი
Line of edition: 2    ამბა̈ვს.

Line of edition: 3       ათაგანხ მერმა ლადეღ ლახვბა ლა̄თხვართე. ესხრიხ, ესხრიხ ი
Line of edition: 4    აშხვ ზაუნღვე ვა̄ჲ-ბედოშ ქა ვენდ ადჰიეხ მჷნწლა̄შ ლარდა ქვეყანათე,
Line of edition: 5    მარე მჷნწლა ეჯგვა̄რ ლასვ სვრილ, ერე შვიმ დემთე ხად.
Line of edition: 6    ალჲა̈რს ქაჲ ხეწად ი ადქუთნე ღალოლ ი ეჯგვა̄რ ბიქვ ადგენე, ერე
Line of edition: 7    ფისიბ, ბა̄დრ ი ჩალა̄მკალა̄მ ჟი ლა̄ჲკიდ ი ჩხარა თანღი ეჩხენჩუ
Line of edition: 8    ადჰარე. ა̄მირმდ ქუთულა̄რთეჩუ ოთ{ვ}ესვ სკელა̄რ ი ა̄მის მამაგვეშმოშ
Line of edition: 9    ხა̄ყერ. ნჷნწლად ღალა̄რ ჩვადგენე, ჩვა̄დშიდგმუნან, ეჩქას
Line of edition: 10    ოთშგაბ ქა ა̄მირნ, ლა̄ჲყვიფ ლარტყვხენჟი დიეშ ჴადვხენქა ნა̄ყენვ
Line of edition: 11    ვეფხიშ ჰა̄კვედ ი, ვოდედე ღალოლე მახად ლიქვთუნეს ი ბიქვიშ
Line of edition: 12    ლისგვრეს ა̄დბინასგვ, ეჩქად ჩიქი ეშხუ ღალ' ათქვიც, ღვე მერმე'
Line of edition: 13    ლვე ლა̄ჲყვიფ დაშდნა̄ ი ჩვადჲასურე ასვნიასვნ. ეჩქად ი ეჩქად მიჩა
Line of edition: 14    ლახვბადი ანჰიეხ ჩხარა თანღი ენხენჩუხენ. ათხე აჩადხ ღებიშ
Line of edition: 15    ლათხელითე. ესხრიხ, ვსხრიხ ი აშხფნღვე აშხვ მინდერისგა ხეწადხ
Line of edition: 16    ხოშა ქორცა̄ლ ღებს. ამხენქ' ანღჷრდახ მარაცა̄ლ სვრილ ლაღვბა̄შ
Line of edition: 17    მერა̄რ. ეჯგვა̄რს იკადვხ ბჟჷლმაბჟჷლს, ერე აშხვ ლადღიშ ლა̄ზნათე
Line of edition: 18    ისმივ მინე ჰერ ი ფედილთე ლიზალდ ჩვაყვგახ მარა. ა̄მირმდ მიჩა
Line of edition: 19    ლახვბას მჷნწლა̈შ ნადგარვთექა ოთთონე: -- ღალოლსოღვ ახქუცუ-
Line of edition: 20    რეხ შდჷმრა̄რე ნა̄ცყერუნ ი ქ' ესერ დემ ა̈ნყუგიხ.

Line of edition: 21       ჩალა̄მკალა̄მ, ბა̈დრ ი ვისპ ტკისდ ქაჩადხ მჷნწლა̄თექა, ღალემ
Line of edition: 22    ნა̈ქვცა̄რ ა̄დცჷყერეხ შდჷმრა̄რ ლექვა ი ა̄მირმსი ოხჴიდხ შდჷმემ
Line of edition: 23    ნა̄ცყერუნცა̄ლ. ა̈მირმდ ხა̄ქვე: -- შდგმრე ნა̄ცყერუნღვ' ესერ უშხვა̄რ
Line of edition: 24    დემგვაშვმოშ ოთცხირნეხ რაგა̄დშვ, მარე შია̄რშვ ესეროღვ ხა̄ბჟინახ
Line of edition: 25    უშხვრეშიშ გვაშვ.

Line of edition: 26       აჩადხ ამჟი ი ლა̄ჲბინეხ ლიშია̄ლ. ქორცა̄ლ ღებხენქა მეგრე მანგრა̈რე
Line of edition: 27    მაჟონ მერა̈რ ანღჷრდახ ი გუნ ნამთილის ხოჴდახ, ა̈მირმ ვეფხიშ
Line of edition: 28    ჰა̄კვედშვ სგვიზა, მიჩა ლახვბა მინე-მინე დაშდნა̄უშვ ი ღოშგიმ ვა̄ჲ-ბედოშ,
Line of edition: 29    იმჟი დორ ხადხ, ჟ'ახწინდახ, მერა̄რ ჩვაჭკიჟხ ი სარა̄ჯ
Line of edition: 30    მინდერისგა ლახა̄გხ ჰინკარ-ჰინკარდ. ა̄ნკჷმრეხ მა̄ფშა̄რ ი მა̄ჲდა̈რ
Line of edition: 31    ლახვბად, მარე ამანდ ხოჩამ იმ ა̈ნკჷმრასგვხ. ჩუ ნა̄ბიზუნღვე
Line of edition: 32    ჟ'ახა̄ცვხ კაბურჯა̄რ ლჷჭკერ მერა̄რს ალ სარა̄ჯ, მინდ მჷნწლა̄შ
Line of edition: 33    ლეღვ ა̄ნიცვხ ი სამ ზაუნღვე ვენდ გარ ანჰიეხ მინე ქორთეჲსგა.

Line of edition: 34       ბაბა ივას გუნ ათხიდჷნ მიჩა გეზლირ შშვიდებდ ლიტეხ.
Line of edition: 35    ლა̈ხედალ აჩვმინ სურუ ხოჩა. ლა̄ხედალუნღვე გეზლირ ლა̄ვზირალთ'
Line of edition: 36    ა̈დჰერ ი გუნ მა̈ხჲად ხა̄ქვ', ერე ამკა̄ლიბ ლამარგ გეზლირ ა̄ხთენან.
Line of edition: 37    ათხ' ესერ' ქოხუმბა̄ვისგ მიჩა თემი გვაშვ:
Page of edition: 260  Line of edition: 1    -- ალ თვი ი ალ მჷნწლა̈შ ლეღვ მიშგუ ლეზებ ლასვ, მარე და̈ვდ
Line of edition: 2    მა̈ყმა̈ყიშ სიმაქგეზალდ, ფისე ეჩა ლითავა̈ლსოღვ ხაბა ი, ლელატდ
Line of edition: 3    ლიგნე მა̈ჰერ, ეჯი მი მადე ჩვემნ. ეჯნემ ესნა̈რი მიჩო მუ ანუნძღულე:
Line of edition: 4    მი ესერ მიჩეშდ ამკა̈ლიბ ი ეჯკა̈ლიბ შგვირ მიყრა, მი ესერ
Line of edition: 5    მოლე ხოლა ნიშა̈ნურ ჩუ მუცვრ' ეჰე, თხუმ ესერ კოჯს ხა̈ხპე ი
Line of edition: 6    ლა̈ზგა-ლარდასი ხოლემ ჰარა̈კდ ცვირე.

Line of edition: 7       ა̈ლიმა̈გ ნანძღულ და̈ვ მა̈ყმა̈ყდ ჩიქი თვი ი მჷნწლ, ა̈მღე, ღვე
Line of edition: 8    მიშგუ ლიმახვ ა̈დბინე. ლა̈თხვარჟი ნა̈ ჲორი გარ ლოხხვიდდ უშხვა̈რ,
Line of edition: 9    ჟ'ამწინდა, თე ქ'ა̈მკიდ, მიჩა გეზალს ოთჴიდ ი ეჯის როქვ
Line of edition: 10    ხოზ ათხეჲ ვოქრეშ სა̈ინჟი. იმქას მაჟარ ხა̈ჴდოლნა, ლა̈შდრალდ.
Line of edition: 11    ლჷმკიდვნელი თრა̈ვ, დეჲშაფერიშ ეჯი!

Line of edition: 12       და̈ვ მა̈ყმა̈ყიშ ლინწირ ამჟი ა̈დვილ ნომა ჯიხალხ. ქორდ ი მურყვამდ
Line of edition: 13    გჷრკა̈ნდ ხოცხიპ: ჩიქი გველერშა̈პიშ, ღვე ბერჟემ სალდა̈თიშ
Line of edition: 14    ი მაშენ ისგა̈ხი ლჷფეთე ჟეღრე ჯა̈რ. ეჯჷნქა და̈ვ მა̈ყმა̈ყს ყიაჟი
Line of edition: 15    ჲელა̈შ მჷლა̈მ ოხვეზი ი ლა̈შიალჟი აშ ხა̈ბდე ჰელს მეშიალას, სგებდ
Line of edition: 16    დოლბიშ შირა ხოჟღვინა ლა̈შიალდ, მეშიალას ფილიკდ ა̈გნე
Line of edition: 17    ეჲნოშვ. მარე სგა̈ ჴერჴ ჯარხ ლეჴმა̈რი, ეჩა ლინწირ ემა ჯაკუხ
Line of edition: 18    ეჰე, აი, მა̈ ჯარხ ლეჩემ: თვით თულუყვ ბამბ' ათხაჲედ, თვით ლჷზიჰ
Line of edition: 19    გიცა̈რ ა̈თჟეღნედ ი ეჯის ქა̈მინჩუ სა̈ჭირო ჯარხ ეშხუ ჟა̈ჴ გვეში
Line of edition: 20    წელიშ ნ... ქადრინედ, მა̈ნკვი გველერშა̈პიშ ჯა̈რ ჯარს ლეჭკჟე,
Line of edition: 21    ღვე ბერჟემ მარემ ჯა̈რ, ეჩქანღვე ჟეღა̈რ ა̈ჲშგებნიხ, ეჩქას გიცრა̈რ
Line of edition: 22    ლოხშიდდ ი ეჯჲა̈რე ლაღვემ ლაზობს ქა ლა̈ხსედნიხ, ეჩქად სგა̈
Line of edition: 23    და̈ვ მა̈ყმა̈ყს ხეკვეს ახშჷდედ. და̈ვს სგებდ ჲელა̈შ მჷლა̈მ ხეჟღვინი,
Line of edition: 24    სგა̈ წელიშ ნ.. ლახბიდდ ი ეჯი ისგა ხატსუნე ჰელს. დოლბიშ
Line of edition: 25    შირას ბამბა̈შვ გვეში თულყვა̈რს ხოხლინად ი აშხუნღვე ეჯჲა̈ჲ
Line of edition: 26    ჩვა̈გნე ლიშია̈ლს. ექას და̈ვს ისგა ხა̈ფხეჭდ ჩუ ლა̈დისგთე ი, მა̈
Line of edition: 27    ლა̈თიალს ჯადეხ, ჴამშა. ნომ' ათზარად. ჩვა̈თდად, ეჩქას ყიაჟი კალდიმ
Line of edition: 28    ესბეკდ ი ქახა̈ქუნედ, იმგვა ხოშხვნენეხ მიშგუ თე, ეჯი.

Line of edition: 29       ა̈ლი ქაჲ ოხუმბავე ი ალჲა̈რდ ლიმარელ ლა̈ჲბინეხ. ჟ'ა̈ნიცვხ
Line of edition: 30    თვით თულუყვ ბამბა̈, თვით ლჷზჰენ გიცა̈რ, ეშხუ ჟა̈ჴ წელიშ ნ...
Line of edition: 31    ი ესხრიხ, ესხრიხ, მარე ფოყ ესსიპჷდხ. ეჯგვა̈რ ნენჩათ' ა̈თჴედჷნხ,
Line of edition: 32    ერე დეცთეშჷნქა ლა̈წვე დემთე ლი, იმთე დო ხარხ ლეზი, ჟი დეშ
Line of edition: 33    იმჴერიხ. ა̈მირმ ჩექს ესაგან მიჩა პა̈პი ქრისდეშ ლაჴჷრალს: -- მა̈დილ
Line of edition: 34    ესერ ხერი ი ლოხჟინდ' ოღვ მიჩა ლჷპრისდე, ნომ'ოღვ ა̈დსერ
Line of edition: 35    ამ ნენჩაჲსგა გვაშურ ლეთვა̈შიდ.

Line of edition: 36       პა̈პიშხენ ჰერ ახსჷმდ: -- ქრისდეშ თა̈ჲსდებს ესერ ხენთხლალოღვ
Line of edition: 37    ლეკვშად, ოდო სამ ნა̈კვიშუნღვ' ესერ მიჩ მამაგვეშ ხა̈მედა.
Line of edition: 38    ათხე ა̈მისოღვ ა̈თჭამხ, -- ი მიჩა პა̈პიდ მუგულდ ოხუზე შუკვა̈შ
Page of edition: 261  Line of edition: 1    მუთვრიდ. ხოჟეღ ალ მუგვ ლახვბას სგებინ. ესჭიმხ ალჲა̈რ. ესზრიხ,
Line of edition: 2    ესხრიხ ი აშხუნღვე ჩვაშდახ ნენჩა ი ხოშა ნაკ ა̈დგი ანწვანდა.
Line of edition: 3    ამეჩუ მუგულდ ჩვესკიჰან ი ქანწვანდა და̈ვ მა̈ყმა̈ყიშ ლა̈ზგა-ლარდა.
Line of edition: 4    აჩადხ ისგა̈ხი ი ანწვანდ გჷრკა̈ნდ მეცხპე გველერშა̈პიშ ჯა̈რ. ა̈მირმდ
Line of edition: 5    ხა̈ქვე მიჩა ლახვბას: -- ათხე მინოღვ ა̈ნმარგხ. სგოღვ ხოვახხ მინე
Line of edition: 6    ხანგრა̈რშვ ი, შომ' ესერ გაჭირებათ' ა̈შყდენიხ, ჯი ესერი გა̈ნხენჩუ
Line of edition: 7    ლა̈ხგენი.

Line of edition: 8       ხოვახხ ალჲა̈რ ქა გველერშაპა̈რს ი სამ ლეთ ი ლადეღ უქვიცდ
Line of edition: 9    ჭკიჟახ ი ღოშგიმ ჩვაჭკიჟხ, მარ' ეჯჟი ლა̈ხჴადხ მინი, ერე აშ
Line of edition: 10    ესთქაშხ გიმჟი. ქაჩად ა̈მირმ, ჟ'ანჰედვრე ი ჯი ბერჟემ მარემ ჯა̈რს
Line of edition: 11    ა̈ხშგაბ. ხეშია̈ლ, ხეშია̈ლ, მარე ბერეჟ დემგვაშვ ნახა იხნი ისგა̈ხი ი
Line of edition: 12    ამირმს გარჯობ ოხჴად. მანდრენამდ ხუღვანდ გვეშ, ეჯჟი ლა̈ხშყად
Line of edition: 13    მიჩა ვეფხიშ ჰა̈კვედ, ლა̈ჲყვიფ ჟი ი ა̈მის ქაჲ ხეწადხ ბერჟემ მაროლ
Line of edition: 14    ი აშ ა̈დკიჰანხ, ესნა̈რი ა̈მიშ ლიწედ ლჷყა̈ჯ ხა̈რენახ.

Line of edition: 15       ათხ' ესხრიხ, ესხრიხ ი აჩადხ და̈ვ მა̈ყმა̈ყიშ ფედილთე. ა̈ნმეჴრე
Line of edition: 16    ამნემ ა̈მირმიშ ი მიჩა ლახვბა̈შ ლიჴედ ი ოხსჷსნე გველერშაპა̈რ,
Line of edition: 17    მარე ალჲა̈რ მეჭკჟე ლიხ; ოხსჷსნე ბერჟემ მაროლ ი' ალჲა̈რი მეჭკჟე
Line of edition: 18    ლიხ: ოხსჷსნე ჟეღა̈რ, ალჲა̈რ ქოხშგაბხ, მარე ჩალა̈მკალა̈მდ გიცრიშ
Line of edition: 19    ლეღვ ოსჰარე ი მინს ქა̈თყაჩხ, ა̈მის ლოხბინეხ ლიზებ. და̈ვ ჩუ ღეთ ა̈დსოყან
Line of edition: 20    ამჲა̈რე ხჷრშვ ი ა̈მირმს ხა̈ქვე: -- ეჯღაჲ ესერ მად' ოლგენელი ამნურ ი
Line of edition: 21    ათხ' ესერ ჯი ხოწენისგ ხოჩა ლადეღს.

Line of edition: 22       ა̈მირმდ ოსცა̈დ: -- მიჩა ბაბა̈შ ესერ თე ქოღვ ლახტიხ, ოდო
Line of edition: 23    ახჴედ' ესერ მეშხე ლადეღ.

Line of edition: 24       და̈ვდ ოსცა̈დ: -- მიჩა ბაბა̈შ ესერ თეს მადეჲ, მიჩ ესერი ჟ'ახძგუბურისგ
Line of edition: 25    თერა̈რს; ეჩქანღვე ჩვ ესერ ადხუჭკნისგ მიჩ ი მიჩა
Line of edition: 26    ლახვბილა̈რს მჷნწლჷდა̈რშალ. ეჯის გარ ესერ დემიდ ა̈თჯჷრვი ი
Line of edition: 27    მიჩა ბაბა̈შ მერმა თესი მიჩა დინაგეზალს ესერ ოხჴიდე ლა̈შდრალდ,
Line of edition: 28    ლა̈ზგა-ლარდას ესერ ჟ'ოხხვიტე, გა̈ტდ ოთგენისგ.

Line of edition: 29       -- ეჯის ესერ უშხვა̈რ ახთენისგხ, -- ოსცა̈დ ა̈მირმდ ი უშხვა̈რ
Line of edition: 30    ხა̈ფხეჭხ. იბურგელხ, იბურგელხ. ტურშუნ-ბურგუნ ჩუ ლჷგ ლა̈დიშ
Line of edition: 31    ლადეღ ი აშხუნღვე ხაჴიდ ა̈მირმდ ხირკ, ა̈ნსვილ ხოშა უსვახვიშ
Line of edition: 32    და̈ვ მა̈ყმა̈ყ ფოყ ჟიქაქა ი ეჯგვა̈რ ათღანდა დრიზ გიმ ლეჟ', ერე
Line of edition: 33    დეცეგიმდ ლიქვთუნ' ა̈დბინე. ა̈მირმდ კიკბერ ახბეკ: -- ქოღვ ხა̈ქვე,
Line of edition: 34    მიჩა ბაბა̈შ თე იმეგ ხოზ, ოდო ახჴედ' ესერ ხოლა მეშხე ურშვლია̈ნ
Line of edition: 35    და̈ვს ღოშგმე ლადეღ!

Line of edition: 36       და̈ვდ ქა ლახთონე მიჩა ბაბა̈შ თე: -- ეჯი ესერ მიჩა დინაგეზალს
Line of edition: 37    ხოზ ვოქრეშ 'სა̈ინჟი, მარე მიჩა დინაგეზლა̈შ ლინწირ ესერ
Line of edition: 38    გარჯ ა̈თხერი. აშ ქ' ესერ ემოშ ოთღას ეჰე, ეჩა ლაჭონა̈ლი ლაკვცა̈ნი
Page of edition: 262  Line of edition: 1    ესეროღვი ქადაე, ოდო ეჯნურ უსჷრგებ ესერ ლი მიჩეშვ.
Line of edition: 2    ლაკვცა̈ნი სა̈ინსოღვ ლახჭემ ჩუქაქა ი თ' ესერ ჟი ხეფცხენი სა̈ინს.
Line of edition: 3    ეჩქანღვე სგოღვ ლოხსგურე მიჩა ბაბას ი ქა̈მშხენ ლაკვცა̈ნიოღვიდ
Line of edition: 4    ლახჭემ, თ' ესერ მა̈შომა̈ჲშშალ ლა̈ხტეხნი.

Line of edition: 5       ა̈ლი ქაჲ ა̈დლიე ი ა̈მირმდ ლა̈ჲშგვინ კალდიმ ი თხუმა̈რ
Line of edition: 6    ჟ'ახქუცურე.

Line of edition: 7       ესხრი, ესხრი ი სგა̈თჴედჷნ და̈ვა̈შ სიმაქგეზალთეჲსგა. ალ სიმაქს
Line of edition: 8    ვოქრეშ სა̈ინჟი ხოსდა ტკისდ ალ თე ი ხეშდრალ ხოხვრა ბეფშილდა̈რშალ.
Line of edition: 9    ეჯგვა̈რს ადღჷვა თე, ერე ეჩხავ-ამხავ ლეტვრა მუტვა̈რშალ ანარჰა.
Line of edition: 10    ხეწად ალ სიმაქ მიჩეშთეჲსგა მეჴედ ა̈მირმს, ჟ'ოხპარ, მიჩა
Line of edition: 11    დაშდნა̈ შჷნ ლაირმ ი ხია̈რ ღეთ შერ ოხჴიდ ა̈მირმს, მარე
Line of edition: 12    ღოშგმეპილიშ გაჭირებაჟი ლა̈ხშყად ვეფხიშ ჰა̈კვედ, ლა̈ჲყვიფ
Line of edition: 13    ლალჷრტყახენჟი, ხაჴიდ ჭჷშხა̈რქა ი ფურსგვინდ ლახგენე ფხურსკვა̈რ.
Line of edition: 14    სიმაქ ლჷქა̈ჩ ნენზშალ ა̈ხსგან ი ა̈მირმიშ სგებინ ლეჟა ხოვახ.

Line of edition: 15       ა̈მირმდ კალდიმ ესბეკ ყიაჟი ი ოსთუმუნე: -- ამ წა̈მჟიოღვ ლახემ
Line of edition: 16    მიჩა ბაბა̈შ თე ი ლაკვცა̈ნი, ოდო ახჴედ' ესერ ღოშგმობ!

Line of edition: 17       სიმაქდ ოსცა̈დ: -- ქრისდეშ თა̈ჲსდებ ქ' ესეროღვ ლახემ, ერე
Line of edition: 18    ჩუ დემის ადგა̈რი, მადეჲ კჷკჷა̈შ ესერ მუქვისგ მადე ლი ი ჩოღვ
Line of edition: 19    ადგა̈რ. ლჷდგა̈რს ესერ ემგვაშმოშ ახა̈ქვინისგ ეჰე, ქ' ესერ დემ
Line of edition: 20    ხეწდენია.

Line of edition: 21       ა̈მირმს მა̈ ხეკვეს ხოჩვმინენს ი ქა ლახემ ქრისდეშ თა̈ჲსდებ.
Line of edition: 22    სიმაქდ ქა ხა̈ქვე: -- ამ ი ამ ა̈დგის ესერ ზი ლაკვცა̈ნი ი ვოქრეშ
Line of edition: 23    სა̈ინშვ მიჩა ბაბა̈შ თე.

Line of edition: 24       ა̈ლი მა̈გ ჩვა̈ცხირ, ექას ა̈მირმდ კალდიმ ხა̈ტკეჩ კინჩხქა და̈ვა̈შ
Line of edition: 25    ვობურ სიმაქგეზალს ი ქვინ ჟ'ოხქვიც, მარე ა̈მირმს ქრისდეშ თა̈ჲსდებ
Line of edition: 26    ოთკვაშ. სერ ჟ'ა̈ნკიდხ მინე ბაბა̈შ თე ი ლაკვცა̈ნი ი ქახაგანხ მინე ქორთე.
Line of edition: 27    ესხრიხ, ესხრიხ ი სამ ზაუნღვე სგა ვენდ გარ ანჰიეხ.
Line of edition: 28    ახადხ ლა̈წვე მინე ლა̈ზგა-ლარდათე ი მა̈გთან ჩუ ლჷღფჷრე
Line of edition: 29    ლი. ხამბაჟხ: -- მა̈ როქვ ირი? ქორს როქვ ხონსრა ნომ'
Line of edition: 30    ოლჩემნელასუნ!

Line of edition: 31       ა̈ზვისგა მინე ფა̈მლი ესხვიდხ ი ა̈მის ლა̈ხქედივხ: -- მ' ესერ
Line of edition: 32    ამბა̈ვ ლი: იმღ' ესერ ლი ლა̈ზგა-ლარდა მეშხად ლჷღფჷრე?

Line of edition: 33       -- იმღ' ესერ ი მინე მუს ესერ მინ ლჷდგა̈რ ხა̈ხლენა, ლახა
Line of edition: 34    ამზუ ხა̈ნს ქორთ' ესერ დეშ ომტეხელიხ.

Line of edition: 35       აჩადხ ალჲა̈რ ქორთეჲსგა, ხეწად ამჲა̈რს მინე ბაბა ივა ი ჩუ
Line of edition: 36    ღეთ ა̈დსოყან მა̈ხჲადშვ. ლაყჰალს ქახჴიჩ მა̈გთან. ივა ხელწიფხს
Line of edition: 37    ეჯგვა̈რ ოხგენა ჩა̈რჩ, ერე ლაყვრად ხემა̈რგ ლერშიშ მჷქაფდ. გეზლირდ
Line of edition: 38    ქაბა̈რხ, ქადწაბურეხ, ხოჩამდ ადშდაბვნეხ, თე სგა ლახტიხხ,
Page of edition: 263  Line of edition: 1    ქა̈მშხენ ლაკვცა̈ნი ლახჭენხ ი მა̈შომა̈ჲშდ ხოჩილიდ ლა̈წვე
Line of edition: 2    ა̈ხსყან.

Line of edition: 3       ივა ხელწიფხდ თელ მიჩა სა̈ხელწიფხს ხა̈წეჰ. ჩიქი გეზლირიშ
Line of edition: 4    შვიდებდ ლიტხა̈ლ აჩვმინ, ხჷნსგა ზავ ჩუ ლიფხეჟიშ ნა̈ბ და̈ს ლახემ
Line of edition: 5    ლა̈ქეიფხენქა, ღვე მიჩა თემი ლიტხემ ლა̈ხედალ ა̈დჴიდ. მერმე
Line of edition: 6    ხჷნსგა ზა̈ ა̈მის ა̈ხკვად ი ჩუ ლიყრულა̈ლიშ ნა̈ბ დეჲ ათხე ჲა̈ს ლახემ.
Line of edition: 7    ხარხ ამჟი ხოჩა ლარდა ივა ხელწიფხს ი მიჩა გეზლირს.

Line of edition: 8       აშხუნღვე ქეიფ ქა̈დლიან. ა̈მირმს ახჟანდა ამჟი ლირდე ი მიჩა
Line of edition: 9    ბაბას ხა̈ქვე: -- ათხ' ესერ მიჩ ლეჰია̈ლ ხარ ლა̈ზელალთე ი ნომ'
Line of edition: 10    ესეროღვ ოხდირვანეხ. გეზლირს ესერ ემა ხა̈მბე, მაჴვმა̈რ ესერ
Line of edition: 11    ირი, მადეჲ ჯი გარ ესერი დემის ა̈თვფენი ქვეყანაჲსგა.

Line of edition: 12       ივა ხელწიფხს მამ' ათჩონ ა̈მიშ ლიქვისგ, მარე მა̈ ხეკვეს ხოჩვმინან
Line of edition: 13    ი ქაფიშვდ ა̈მირმ ი მიჩა ლახვბა ლა̈ზელალთე. შუკვა̈შდ ი
Line of edition: 14    ჲა̈რა̈ღიშდ სა̈ჭირო მა̈ ხადხ, მამაგვეშ ათკა̈ლნე, ჩივშვ ლჷხაზჷრ'
Line of edition: 15    აფიშვდ. ლაზჟი ა̈თჴჷრან: -- უშხვრეშიშ სეროღვ ხადხ ი ჯიი ნომოღვ
Line of edition: 16    ა̈დიშდჷნეხ, დრევნიდრევნ ქორა̈შ ამბა̈ვს ესეროღვი იგღებივხ,
Line of edition: 17    მადილ ესერ ხერიხ!

Line of edition: 18       აჩადხ ამჟი ალჲა̈რ ი ესხრიხ, ესხრიხ. ამსვალდა̈შ მავინს: და̈ვს,
Line of edition: 19    გველერშა̈პს, ქა̈ჯს ი ამკა̈ლიბს ქა იმ ხედივხ, ჩიგვაშვ მჷჭა̈ნჭკვიდ
Line of edition: 20    სგვიზახ, ლჷა̈რს დემგვაშვ ცვირახ.

Line of edition: 21       აშხვ ლადეღ ლახვბა ითხვარხ აშხვ ლა̈კვცური ლეჟა, მარე ვობა̈შ
Line of edition: 22    მამაგვეშ ხეკარქხ. აშხონღვე ხეწადხ მჷჟლაჰვართ', ერე კჷლთხი
Line of edition: 23    ზაგა̈რს ვერთქ ოხვეზივ. ა̈მირმდ რა̈ქვე: -- მინ ესეროღვ ლიხ ლჷჭა̈თ,
Line of edition: 24    ალ ვერთქიშ გვეშ ჟი მად' ა̈ნგაღბახ.

Line of edition: 25       ესხრიხ, ესხრიხ ი მერმა ისგლადეღქა ჟ'ადჰიეხ ამ ზაგა̈რთეჟი.
Line of edition: 26    ამეჩუ ეშხუ მელგიმ ბა̈ჩ ხალჯა, ა̈მიშ ჩუქა ცხურუა̈რქა ლაჴვფუნოშ
Line of edition: 27    აღრი ეჯგვა̈რ ა̈თუ ვერთქ, ერე სგა̈ხი ლათალ დემეგ ხარ. ჩიხენ
Line of edition: 28    ახსიპჷდხ ამ ბაჩვ, ჩიხენ ოხციქვარეხ, მარე სგა ლაზ დემეგიმეგ ლი.
Line of edition: 29    ა̈ხბურგანხ ქა ლაკრა̈ნკითე ი ხობიდხ ი ხოჯვირიხ, მა̈ ლა̈თიალს
Line of edition: 30    ხარს, მარე ძჷძჷ დემთემოშ ხა̈ყერხ. აშხუნღვე სგოთფხირჭეხ ჩუქაჲსგა
Line of edition: 31    ი მარემ ლასკჷდცა̈ლ ყორ ლოხცვიბხ. ეგვა̈რ ანსკინე ჰელდ
Line of edition: 32    ამ ყორქ', ერე ხია̈რილდა̈შ ღეთ მა̈გ გვა̈სპდ ადგენე. ხა̈ცხრუნიხ
Line of edition: 33    ისგანჩუშ გვაშვდი, მარე სგა და̈რმოშ ა̈ბედა̈ვიხ. ანჴად ა̈მირმ, ქა̈მშხენ
Line of edition: 34    ლჷლა̈მბ ღა̈რთ ლა̈ჲჭენ ი სგადსკინე ამ ბაჩვ ჩუქაჲსგა. ღა̈რთ
Line of edition: 35    ჩვა̈დშიხან, მარე ტანვემ ლიშხა̈ლ ჩიქდ მერმა კუთხ ლაღა̈ლთ' ოთჩად
Line of edition: 36    ა̈თუს. ამეჩუ ახსჷმჷდ ზურალა̈შ ლიგვნი ი ლილჭა̈ლ. ათჷმბაჟჷნ: --
Line of edition: 37    მა̈ როქვ ირი? -- ლა̈ჲსგიდივ მერმა კუთხთე ი ამეჩუ
Line of edition: 38    აყვრვხ სემი სიმაქა̈რ. მა̈ ეშხუ ილჭა̈ლხ, მა̈ მერმე, მა̈ მესმე. ა̈მირმს
Page of edition: 264  Line of edition: 1    ხეწადხ, ეჩქას ჩვაქვიცხ ლილჭა̈ლ ი ხა̈ქვეხ ა̈მის: -- იმღ' ესერ ომჴედელი
Line of edition: 2    ამთეჲსგა, თხვიმ ესვრ ახსისგაჲა?

Line of edition: 3       ა̈მირმდ ხა̈ქვე: -- მ' ესერ ამბა̈ვ ლი, ჲა̈რ ესერ ხაფსვდახ ამგვა̈რ
Line of edition: 4    ლემყა̈ლვ მინ საბლუს?

Line of edition: 5       -- ხემ' ესერ ჲა̈რ, მა̈ყმა̈ყ და̈ვა̈შ მუხვბა ესერ ოხცხვაპა მინ, შუკვს
Line of edition: 6    ჟ' ესერ ახფეშა, ამთეჲსგ' ესერ ოხგენა მინ ი ჯი ესერ ჩვიბ აყვრე
Line of edition: 7    ლა̈შვმინას.

Line of edition: 8       ა̈დსგიდივ ტკისდ ა̈მირმ ჴურუჩუ ი და̈ვ ჩვაყვრე ი ივჟე გიმ ლეჟა,
Line of edition: 9    გა̈ნხენჩუ ლემესგ ხოშვ ი ამხენჟი აღრი ამგვა̈რ ლჷჴმა̈შ ჲელა̈შ
Line of edition: 10    მჷლა̈მ.

Line of edition: 11       ა̈მირმ ლა̈ხჭედივ სიმქა̈რს: -- მინ ესერ ჲა̈რ ლიხ?

Line of edition: 12       ალჲა̈რდ ოსცა̈დხ: -- მინ ესერ ამ ი ამ ხელწიფხიშ გეზლირ ლიხ.

Line of edition: 13       ადსკინე ამთეჩუ ა̈მირმდ, ანჲეცხვნე და̈ვ ჟი, ხა̈ფხეჭხ უშხვა̈რ,
Line of edition: 14    იბურგელხ, იბურგელხ ი აშხვ ნაგზა ლეჟა-ლექვა უქვიცდ იბურგალხ
Line of edition: 15    გარ, მარე ჟი დეხდამოშ ხა̈წრახ. გაჭირება ლადეღ ლა̈ჲყვიფ
Line of edition: 16    ლალჷრტყა̈ხენჟი ვეფხიშ ჰა̈კვედ, ხაჴიდ ნენსგა სკელა̈რქა ი სკელა̈რ
Line of edition: 17    ყა̈ლდ ლახგენე. ჩიქი ეშხუ თხვიმ ახქვიც, ღვე მერმე, ღვე მესმე,...
Line of edition: 18    ღვე მეჲრე ი მეჩხრემ ლიქვცა̈ლდ და̈ვდ ქრისდეშ თა̈ჲსდებ ახჴიდვნე
Line of edition: 19    ი ხა̈ქვე: -- ალ თხვიმოღვ ეჯღაჲ ნომ' ახქვიც ი ჯი ესერ ლემასგვ
Line of edition: 20    ხაჰვდი ივალადღიშდ. ამ ლემასგვჟი ესერ დია̈რს ი იშგან ლეზობ
Line of edition: 21    იმარუნიხ ი ამსვალდა̈შ გვეშ ესერ ათა̈ს ნაზიმშვ სგებდ ადრინე.
Line of edition: 22    ლემესგ ამ შედთეჲსგ'ოღვ ესდე ი ჩვ ესერ დემის ოთდეგნი.

Line of edition: 23       ა̈ლი ი ა̈ლი მა̈გ ქოთცხირ და̈ვდ ა̈მირმს, ეჩქას ა̈ნსვილ ა̈მირმდ
Line of edition: 24    მიჩა დაშდნა̈ ი მეჩხრე თხვიმი გა̈ნთ' ოსდე და̈ვ-თრა̈ვს. მერმე ღალ
Line of edition: 25    ქრისდეშ თა̈ჲსდებ ამეჩუ ოთკვაშ ა̈მირმს. ამხენჟი ჟ'ანჴაფ, სიმაქა̈რ
Line of edition: 26    ქა̈ნჴერნე, ლემესგ შჷნ ლაირმ მიჩა შედშვ, ი ამეჩუ მიჩა ლახვბად
Line of edition: 27    ლაყჰალს მა̈გ ღეთ ქახცჷლჷრეხ. ა̈ნჭინდახ, -- ა̈მირმ ლჷა̈რ როქვ
Line of edition: 28    მამა ირი ლა̈იდ, -- ი ეჩა მჷქაფდ სემი ამსვალდა̈შ (ჲ სიმქა̈შ) ქვინ
Line of edition: 29    ა̈ნტიხ და̈ვა̈შ ჴარჴხენჟი.

Line of edition: 30       ა̈მირმდ ხა̈ქვე მიჩა ლახვბას: -- ალჲა̈რ ესერ ამ ი ამ მეფემ გეზლირ
Line of edition: 31    ლიხ, ჩივშვ მინე ტოველ ესერ ლიხ ი ლა̈ჲხვადოღვ
Line of edition: 32    ესყედინხ.

Line of edition: 33       ალჲა̈რს ლა̈იდი სურუ ათხიდჷნხ ა̈მიშ ლიქვისგ, ეჯგვა̈რ ლასვხ
Line of edition: 34    თვალა̈შ ალ სიმაქა̈რ. ჩვესყედინხ ლა̈ჲხვად მაშენემ მაშენე, ნენსგა̈შდ
Line of edition: 35    ნენსგა̈შ ი მაჰრენემ მაჰრენე. აღრიხ ლჷხჲადე, აღრიხ ი აშხვ ა̈დგის
Line of edition: 36    აშხვ ხოლა მეშხე დედბვრს კალვ ხარ ქა მექვცე ბოფშრე თხუმა̈რშვ,
Line of edition: 37    კვურდ ისგა ხობ ლუვღუნე ჴანა̈რ, ჟი ხასგურ კეურჟი ი ლაღრალ.
Line of edition: 38    ლაღრალშვ "კლა̈ვი. ანსკინე ამთეჲსგი ა̈მირმდ ი, -- ხემ' ესერ, ერე
Page of edition: 265  Line of edition: 1    ბოფშრე თხუმა̈რს აკლა̈ვი, მეშხე ვობურ დედბერილ?! -- ხა̈ფხეჭ
Line of edition: 2    ფა̈თვა̈რს ი ყიაჟი ხანჯა̈რ ესბეკ: -- ათხ' ესეროღვ ოთცხირ, მ'ამბავ
Line of edition: 3    ლი, ოდო ახჴედ' ესერ ღოშგმე ლადეღ:

Line of edition: 4       დედბერდ ქრისდეშ თა̈ჲსდებ ახჴიდვნ', ერე: -- ჩვ ესერ დემის
Line of edition: 5    ადგა̈რი ე, ჩიგვაშვ ესერ ქა ხოცხრი.

Line of edition: 6       დედბერდ ხა̈ქვე: -- ამ ბოფშრე თხუმა̈რ ესერ მა̈ყმა̈ყ და̈ვა̈შ მუხვბა
Line of edition: 7    ქეშეკ და̈ვს ლოჰოდა ლეკლა̈ვიდ. მიჩ ესერ მუხვბ' ოთდაგრა, მარე
Line of edition: 8    ქეშეკ და̈ვს ესერ მიჩა ბაბა ავა̈შ სა̈ხელწიფხ ნა̈კლავდ ოთგენა. მიჩ
Line of edition: 9    ესერ მა̈ყმა̈ყ და̈ვა̈შ ლა̈ზგა-ლარდ' ოხხვიტა, ეჯნა̈ნიდ ქეშეკ და̈ვს
Line of edition: 10    ესერ მიჩა ბაბა ივა̈შ ხვეტ' ოთდა გუთე. ეშხუ კალვ ესერ ჩუ ლჷკლავე
Line of edition: 11    ხარს, ეჩა ვეჴ მიჩა ბაბა̈შდ ესერ ლოხშიდახ ი ეჯი ესერ ათხე
Line of edition: 12    ჩუ ლუსოყე ლი, იმ დო იჩო მამა ხოხალ. ამ ბოფშრე ნა̈კლავ ვეჴს
Line of edition: 13    მერმადიდ ლახ ლოხვშიდად, სგა̈ ი ისგე სა̈ხელწიფხიშ მერდე ამსვალდ
Line of edition: 14    მა̈გ ბა̈ჩვდ ხისპივდ. ათხე ისგე ბაბა ჩუ ლუსოყე ეჯხელიხ,
Line of edition: 15    მარ' ეჯის ჲუ̂რდანიშ ლიც ესწჷფხნედ ი შიშდ ჟი იჰდური.

Line of edition: 16       ა̈ლი ქა̈დლიე დედბერდ ი ა̈მირმდ ა̈მისი ჟ'ახქვიც კინჩხ. მესმე
Line of edition: 17    თა̈ჲსდებ ათხ' ოთკვაშ ა̈მირმს. ათხ' ა̈მირმდ ხა̈ქვე მიჩა ლახვბას:

Line of edition: 18       -- სგა̈ ლჷჲახვდ ანღრიდ, თამა̈შდ გარ ანჴადდ ლა̈შვჷინა-ლა̈შვმინოშ,
Line of edition: 19    მი სგებინ ეჲჟეღნე, ქორთე ხონკი ოდვრინე, ჟ'ოხვმა̈რისგ
Line of edition: 20    ჩიგვაშვ, გვიშგე ბაბასი ჟ'ოსჰელი ი ჟ'ოჰედვრისგ.

Line of edition: 21       -- ეზერ ირი ლა̈იდი, სი გარ მეზიდ ნაგნებ, ოდო, -- ოსცა̈დხ
Line of edition: 22    ლახვბად ი ა̈მირმ სგებდ აფიშვდხ.

Line of edition: 23       -- მიშგუ გონა̈ბ ნომა გარ ჯარს სგა̈ ი ლჷნთხლად ი ლუშვმინად
Line of edition: 24    გარ ანჴადდ.

Line of edition: 25       ა̈მირმდ აყირ. ქათასდ ჲუ̂რდანიშ ლჷც, ჟ'ა̈ნზერ, შედ შჷნ
Line of edition: 26    ლაირმ ი ესხრი, ესხრი. აშხუნღვე სგა̈თჴედჷნ ქორთეჲსგა, მარ'
Line of edition: 27    ამეჩუ მა̈გთან ჟი ლუჟვმ' ესხვიდ. მიჩა ბაბა ლექვერიშ შირაცა̈ლ
Line of edition: 28    დოლებს ჟ'აკვანა მურყვმა̈შ აშხვ ფოყხენჟი ი მერმახენჩუ ჩვაკვანა.
Line of edition: 29    ჩუქა ჭაჭა̈რს ხოხლინა ი ეჲნოშ ირმივ. მა̈გ ტვრამდ ხაგან საბრალს.
Line of edition: 30    ლერექვ ისგა ლჷკინტლავე ხად მა̈გთან, ლესგდიდ ლასვ
Line of edition: 31    ლა̈სსგა̈რ. ა̈ხჴვასგ ამთეჲსგ' ა̈მირმ, ლახწჷფხნე ჲჭრდანიშ ლიც ი
Line of edition: 32    მიჩა ბაბად თერა̈რ გარ ლა̈ჲბურგვინე: -- 'აჰ, მავსვახვიშ ხა̈ნს ესერ
Line of edition: 33    ხავჟუნენა!

Line of edition: 34       ა̈მირმდ ქოთცხირ მა̈გთან, -- მ'ოსტყვიფა ქეშეკ და̈ვს მიჩეშდ ი
Line of edition: 35    მიჩა სა̈ხელწიფხდ. ქოხუმბავე, ქეშეკ და̈ვს იმჟი ახწინდა, ამ ი ამ
Line of edition: 36    ხელწიფხიშ გეზლირ იმჟი ოთღე ი ათხე ქორა̈შ ლადაწყას ოხოგანს.
Line of edition: 37    ჩვადშდაბვნეხ ხოჩამდ, ივა ხელწიფხ ქაბა̈რ, ქადწაბურე.
Line of edition: 38    ჟ'ანრექვე, იმჟი ხელწიფხს ხესგუვუდ ი ხა̈ქვ', ერე: -- ათხ' ესერ
Page of edition: 266  Line of edition: 1    ლა̈ქვერწილდ ლიხ მემარელ. მიჩა ლახვბას ესერ ლა̈ჲხვ' ახყახ
Line of edition: 2    სამ ჩი.

Line of edition: 3       ივა ხელწიფხს სურუ ათხიდჷნ ა̈ლი მა̈გ. მიჩა სა̈ხელწიფხს უშხუდ
Line of edition: 4    ხა̈წეჰ ი ეჯგვა̈რ ანსყე ქვერწილ, ერე ივასიდამას ამანდ ხოჩილ ქვერწილ
Line of edition: 5    და̈ს ხეწვენივ. ა̈მირმ, მიჩა ლახვბა ი ლა̈თლეღრა მიჟ ი დოშდულშალ
Line of edition: 6    ანარჰახ ი ჯიმ ი დია̈რშალ ხოსყივხ უშხვა̈რ. ამხავ ხა̈წეჰხ
Line of edition: 7    ორომ მეფეს, ამ სიმაქრე მუს. ა̈ლი მა̈ხჲადშვ დეცს
Line of edition: 8    ხებაკ ი ამეჩუშ ქვერწლობა̈შ ნა̈ლჲასგუნღვე ქა ხა̈წეჰ ჩი მიჩა
Line of edition: 9    სა̈ხელწიფხთე. ლა̈იდ ხოჩა დრევ ი ლირდე ეჩეჩუ ატყვიფხ. ამ
Line of edition: 10    სა̈ხელწიფხიშ გჷმრა̈რ ი მაბურგოლ ჩუ მ'არდახ, ჩჲემ ადკუჰურეხ
Line of edition: 11    მინე ჴერჴ ი ჴამშა ა̈მირმიშცახა̈ნ, მარე ა̈მირმდ ჩი თხვიმ
Line of edition: 12    ახნიკვნე. ღოშგიმ მესმე სა̈ხელწიფხიშ ხელწიფხდ, მიჩა გეზლირდ ი
Line of edition: 13    გჷმრა̈რდ ანჰიეხ ამთეჲსგა". ამ ხელწიფხს ხორი ეშხუ მაბურგა. ეჩა
Line of edition: 14    მონწირ ჩიქი ქა მამაგვეშ ლჷთნელი. ა̈მირმს ლახკაფხვნეხ: "ქ' ესეროღვ
Line of edition: 15    ა̈ხტაკალ ამ მაბურგას". ა̈მირმს მადმა ხა̈სიამჷდ სერ ჩიცახა̈ნ
Line of edition: 16    ლიტაკელ ი ვარ ღეთ რა̈ქვე, მარე ალ გჷმრ ქანჴად, ჩვესჷგან
Line of edition: 17    ლარაჲსგა ი ა̈მირმიშ ლიჴედ იჰერ. ღვე რა̈ქვე: -- ა̈მირმს ესერ ათლა
Line of edition: 18    ჩიქი მახეღვა̈ჟ მამა ხეწვენი ი დოღვ' ესერ გვი სურუ ჟიხი ხად
Line of edition: 19    მეჩდე, მარე ჯი ესერ ჭკუას ახთენისგ.

Line of edition: 20       ეჩქას ქანჴად ა̈მირმი ი ჩვესჷგან ლარაჲსგა. ანქინე ე მაბურგად
Line of edition: 21    ი მიჩა ჲა̈რა̈ღშვ სგა ხოვახ ა̈მირმს ი, ჲესვა ა̈მიშ ლიბურგელ ჟი
Line of edition: 22    ხოსგდინან, მა̈გ ა̈ნჭინდ', ერე ნა̈რხდ ესერ ადგენისგ ათხე ა̈მირმს,
Line of edition: 23    მარე მევარ გარ ხეძგრჷნ ი ძჷძჷ დემთემოშ ხა̈ყერ ა̈მირმს. ლა̈ხტახიდ
Line of edition: 24    მერმან ი მესმან აშხვ ა̈დგის მეგნე ა̈მირმს, მარე დეჲ ათხემოშ
Line of edition: 25    ხა̈ყერ მაგვეშ. ა̈ნხირნან ჟი ი კალდიმშვ ლოხბინე ლიშდაკელ
Line of edition: 26    თხუმ ი ბარჯა̈რჟი ა̈მირმს. ა̈მირმ ათხე გარ ა̈ჩხირნან ამსვალდთე,
Line of edition: 27    ხა̈ფხეჭ მეჴრას, ა̈ნსვილ ქა ი ეჯგვა̈რ ათღანე დრიზ გიმ
Line of edition: 28    ლეჟ', ერე ნაპჷრტელა̈რდ ეჩხავ-ამხავ ადსკინეხ.

Line of edition: 29       ა̈მირმს ამეჩუ ხახვდ ოსყედნეხ ეშხუ ხელწიფხიშ ჰასვიშ, ჟახად
Line of edition: 30    ყამარ. ამგვა̈რ სიმაქ, ქამიზა̈ლშალ ლუმღვაჲე, მუჟღურშალ გვეში,
Line of edition: 31    მჷჟშალ მჷნარჰე, მერმე მამა ხეჩჷდ ა̈ლიმა̈გ სიმაქისგა. ა̈მის მახეიდ
Line of edition: 32    ქვერწილ ათყერხ. ჩვა̈რიხ ამჟი ვობა̈შ ხა̈ნს: ა̈მირმ, მიჩა ბაბა,
Line of edition: 33    ლახვხა, ხეხვ ი ლა̈თლეღრა, ქა მამაგვეშ ხაკლიხ ნა̈პვრა̈შ ლჷჯათექა, მარე
Line of edition: 34    აშხუნღვე ჟ'ახჟანდ ამგვა̈რ ლირდეს ი ა̈მირმდ ლიკვარელ ლა̈ჲბინე.
Line of edition: 35    მეკვჰე მაბურგა ი გჷმრ ჩუ იმგვ' არდა, ჩი ჯი ხეტაკალ.
Line of edition: 36    ი, ხეკვად ა მადე ხეკვად, მა̈გ შია̈რისგა ხედგა̈რივ. მიჩა მონწირ
Line of edition: 37    მამაგვეშ ა̈ნთენან.

Page of edition: 267 
Line of edition: 1       აშხვ ლადეღ მინე სგებინ ლექვ' ანჴად მიჩა პა̈პი ქრისდე. ა̈მირმ
Line of edition: 2    სგებინ ესხვიდ ი ა̈თჴჷრან: -- გიმჟი მერდ' ესერ მამაგვეშმოშ ხა̈წრე
Line of edition: 3    ი ეშხუ ჯი ესეროღვი ქა̈ხტაკალ.
Line of edition: 4    ქრისდედ ოსცა̈დ: -- ამეჩუ ესერ შგვირ ლი, დეშ ხებურგელ ი
Line of edition: 5    ძგიდ ლაღა̈ლთ'ოღვ აჩადხ აღვე.

Line of edition: 6       ესხრიხ, ესხრიხ ი ა̈თჴედჷნხ აშხვ მაკლათხე კჷნჯბიშ ნაკთეჟი ი
Line of edition: 7    ამეჩუ ხა̈ქვეიდ პა̈პიდ: -- ალ ფაუს ესერ ხოსვემ კჷნჯა̈ბჩუ ი ჟ' ესერ
Line of edition: 8    ემოშ ხა̈ყვფ' ეჰე, ქ' ესერ ხებურგელ.

Line of edition: 9       -- ეზერ ესერ, -- ოსცა̈დ ა̈მირმდ.

Line of edition: 10       ოთესვ ჩუ ფაუ ი ა̈ხბურგან ა̈მის ა̈მირმ. ოხძჷნძჷლი, ოხპჷნხჷლი
Line of edition: 11    ი აშხუნღვე ჟ'ახყვიფ. ოთესვიდ მახად ი ა̈მირმდ ჟჲა̈დ ახყვიფ. პა̈პის
Line of edition: 12    ხა̈ქვე: -- იმ ესერ ხა̈შდრა̈ლნე? ე 'სერ ხებურგელ, ქოღვ ა̈ხბურგალ,
Line of edition: 13    მადეჲ ხეყაჩოღვ!

Line of edition: 14       პა̈პიდ ოსცა̈დ: -- ეშხუ ჩვოღვიდ ადკუჰურე ი ეჩქანღვე, მ' ესერ
Line of edition: 15    ხოცხონეს, ეჯიოღვ ჩემინ.

Line of edition: 16       ათჴალე ალ ფაუ კოჯჩუ ი: -- თელ ქვეყანას ესეროღვ ათსგურენახ მიჩა
Line of edition: 17    წუსხუნდა̈რ!

Line of edition: 18       ფაუდ ტკისდ თელ ქვეყანას ათბგურე მიჩა წუსხუნდა̈რ. ხობიდ
Line of edition: 19    ა̈მირმ, ხობიდ, მარე ძჷძჷს დემთემოშ ხეჩო. აშხვ ზავ ლეჟა-ლექვა
Line of edition: 20    ხია̈რ ლა̈ყვფათ' ათგენე ლაგას, მარე ამ დრევჟი ფაუა̈შ თხუმჟი
Line of edition: 21    ეშხუ ნა̈პრულდ ესგენე მიჩა პა̈პიდ, ა̈მირმს ხოშა კვერ ლახემ შია̈რისგა,
Line of edition: 22    ოხსვილ ნა̈პვრს, ნა̈პვრ ჟ'ოხპარ, კვერ ფაუს ხოვახ ი ლა̈გნათეიდ ატახ.
Line of edition: 23    პა̈პიდ ჟ'ესა̈ბ ა̈მირმ ამ ფაუჟი ი ყარვილდ ყურჩა̈
Line of edition: 24    ლოხჴერნე. ყურჩა̈ ა̈მირმიშ ლაბამ ნაჭას ხელოკე ი ლა̈ქვცალთე
Line of edition: 25    როქვ ხა̈ყვრუნ', ეჩქას დეშდშია მჷშა̈ მჷშკდა̈რე ნამშავ ა̈მიშ ლაჭრიდ
Line of edition: 26    როქვ ისპი მა̈გ ი ნაჭა̈ მახად როქვიდ ისპი. ა̈მირმ ფაუს
Line of edition: 27    ოხგჷნცჷლი ზავ ლეჟა-ლექვა, მარე ლა̈ყვფალთე ხარ, ეჯჟი ნა̈პვრიდ
Line of edition: 28    ხეგნი ფაუა̈შ თხუმჟი, ა̈მირმ კვერსიდ ხოსვილი, ნა̈პვრ ქა იქდენი,
Line of edition: 29    კვერ ფაუს ხოვხენი ი ნარდვთეიდ ტეხნი. ამღა ა̈მირმს ხჷრშვ გვი
Line of edition: 30    როქვ ხეხეპურა̈ლ.

Line of edition: 31       რაგდიხ, ერე ა̈მირმს ესერ ჟი ნომოღვ ოხქვიც, ოდო აშხვ
Line of edition: 32    ესერ მჷშკიდს ი ჯღირვა̈ ლჷთეს დემის ცვირე ქვეყანაჟი.


Line of edition: 33 
მერაბ ქალდანი. ჯუხვლანი. m.kaldani.11.VIII.1949



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.