TITUS
Svan Prose Texts II (Lower Bal)
Part No. 133
Previous part

Text: 133 
Page of edition: 267 
Line of edition: 34 
CXXXIII. ჷრჟი მარე


Line of edition: 35       იმეგ ა̈რიხ სემი ლახვბა ი ჩვა̈რიხ. მინე მუდ ლაქნოვალჟი ჩვადშგურანე:
Line of edition: 36    ჷრჟი მარ' ესეროღვ ნომეგ ესაგანხ მესგვრად.

Line of edition: 37       მუ ჩვადგან. ხოჩა ლაგვან' ათყერხ ი ხოშა მუხვბემ ხა̈ქვე: -- ჯი
Line of edition: 38    ესერ ლა̈ქმათე ღჷრი ი მიჩა ლიტხა̈ლდ ჟ'ოღვ ა̈ნნაჟრეხ მოლოვშვ.

Page of edition: 268 
Line of edition: 1       ესხრი, ესხრი ი ლახხვიდ ეშხუ ჷრჟი მარე. ა̈ლი ლა̈ხჭედივ:
Line of edition: 2    -- იმთ' ესერ ესხრი?

Line of edition: 3       -- ლა̈ქმათ' ესერ.

Line of edition: 4       -- ჲაღვე მიჩ ესეროღვ ხონჴრივ დაჴრე ანდავდ. აშხვ ზავ ესერ
Line of edition: 5    ხელდღი ი ხოჩა ნა̈ქიმვს ესერ ადა̈ისგ.

Line of edition: 6       -- ეზერ ესერ.

Line of edition: 7       ჷრჟი მარემ ქორთ' ა̈დჴერნე ხოშა მუხვბე ი დაჴა̈რ ლახემ ლალ.
Line of edition: 8    დაღთე: -- ეჯჟი ესეროღვ ადბიზე, ერე ნებოზს დაჴა̈რ თხუმ ხონკვადეხ,
Line of edition: 9    მადეჲ თხუმ ესერ ჟი ხა̈ქვცე.

Line of edition: 10       ხოშა მუხვბემ ადაჲე დაჴა̈რ ი ეჯგვა̈რდ ესბიზე ტკისდ, ერე
Line of edition: 11    ჴადა̈რ ქა ვენდ გარ ოსთირივხ, მარე დაჴა̈რ თხუმ იმჟი ხენკუნივხ
Line of edition: 12    ი ჷრჟი მარემ თხვიმ ჟ'ანქვიც ანდავს.

Line of edition: 13       აჩად ხა̈ნ. ათხე ნენსგა̈შ მუხვბე აჩად მაშენ მუხვბემ ლა̈თხელითე.
Line of edition: 14    ლახხვიდიდ ჷრჟი მარე ი ხა̈ქვე: -- იმთ' ესერ ესხრი?

Line of edition: 15       -- ლა̈ქმათ' ესერ ი მუხვბემ ლა̈თხელითე.

Line of edition: 16       -- ჲაღვე მიჩოღვ ოთჴერივ, ანდავ ესერ ხაწჷხ.

Line of edition: 17       ჩვა̈დრიგვანხ ი ჷრჟი მარემ ა̈მისი ამჟი ხა̈ყერ.

Line of edition: 18       ანჷგან მაჰრენ მუხვბე ი აჩად მიჩა ლახვბა̈შ ლა̈თხელითე. ლახხვიდ
Line of edition: 19    ჷრჟი მარე. ნაღვჟურ გუდ აჴად, ერე მიჩა ლახვბა ა̈მიშ ნაღლატვ ლასვხ,
Line of edition: 20    გუჲსგ' ესსკორე: "ათხე მიჩ ესეროღვ ხა̈ხვიე". ჷრჟი

Line of edition: 21       მარე ლა̈ხჭედივ: -- იმთ' ესერ ესხრი?

Line of edition: 22       -- ლა̈ქმათ' ესერ.

Line of edition: 23       -- ჲაღვე მიჩ ესეროღვ ოთჴერივ.

Line of edition: 24       -- ეზერ ესერ.

Line of edition: 25       აჩადხ ი ამჟი ა̈დრიგვანხ: ბეფშს ხარ დაჴა̈რ ი მანგა̈რ ლელდეღ
Line of edition: 26    ზავემ ი ზავემ ნენსგა. ლელდეღს ხეკვეს ნომაგვეშ ათკა̈ლიდეს ი
Line of edition: 27    ჷრჟი მარე იმ ხექინე, ეჩა მუსრული ლი. ხედა უშხვა̈რ ჟი ესხირნიხ,
Line of edition: 28    ეჯი მერმემ ხეკვეს ჩუ ადგა̈რის.

Line of edition: 29       ქირა ხოჩა ხარ ლეჰვდი.

Line of edition: 30       მა̈ნკვიშ ლადეღ დაჴა̈რ ლახემ ჷრჟი მარემ ი ჩუ ადშგურანე:

Line of edition: 31       -- ეჯჟი ესეროღვ ადბიზე, ერე ნებოზს თხუმ ხონკვადეხ.

Line of edition: 32       -- ეზერ ესერ.

Line of edition: 33       ამ ნაღვჟურდ დაჴა̈რ ჰამუნღვე ნებოზდ კოჯა̈რჟი ადრეკლე ი
Line of edition: 34    მა̈იდშვ ღეთ აჭკიჟ. ნებოზს სგებნე ფოლა̈რ ქახკუფალე საბლუ
Line of edition: 35    დაჴა̈რს ი ლაკლი-ლაკლიშვ ი თხუმემ "ლა̈ნკოშვ" ქა ლუჰორყე
Line of edition: 36    დაჴა̈რ ლახგენე ქორს.

Line of edition: 37       ჷრჟი მარა ხია̈რ გვი ჩოთხაპ, დაჴა̈რს ხეწად ეჩქას, მარე ქა
Line of edition: 38    დეშ ლა̈ჲთენე:

Page of edition: 269 
Line of edition: 1       -- დე მ' ესერ ხოჩვმინა?

Line of edition: 2       -- მამაგვეშ ესერ, მიჩ ესერ ოთშგურანა: თხუმ ესეროღვ ხონკვახ
Line of edition: 3    ი ტკისდ თხუმ ესერ ხონკვეხ. ხახჷრ' ესერა? -- ლა̈ხჭედივ ნაღვ.
Line of edition: 4    ჟურ მიჩა ფუსდს.

Line of edition: 5       -- დემეგ ესერ, --ოსცა̈დ ხჷრშვ გვი მეხპე ჷრჟი მარემ.

Line of edition: 6       მერმა ლადეღ ფურა̈რ ი ჩაჟა̈რ ლახემ ლათვნათე: -- ეჯგვა̈რდ
Line of edition: 7    ესეროღვ ადთუნალ; ერე იცვნალდეხ, მადეჲ თხუმ ესერ ჟი
Line of edition: 8    ხა̈ქვცე.

Line of edition: 9       -- ეზერ ესერ.
Line of edition: 10    ამნემ ლჷცემ წიქვ მადე ლახა̈შ ვეთხვმალს ი პილა̈რ ჩი ქახკუ- -0
Line of edition: 11    პერე. ჷრჟი მარე ქა ლა̈ხზოზ.

Line of edition: 12       -- ჯი მარე, მ' ესერ ხოჩვმინა?

Line of edition: 13       -- იმ ესერ იჩმუღ? მიჩ ესერ ოთშგურანა, იცვნალხოღვ ი იც-
Line of edition: 14    ვნა̈ლხ ესერ. ღვე მა̈, ხახჷრ' ესერა? -- ლა̈ხჭედივ ნაღვჟურ.

Line of edition: 15       -- დემეგ ესერ, -- ოსცა̈დ ფუსდდ, მარე გუჲსგა ხჷრშვ ბეჭკვნივ,
Line of edition: 16    ეჯგვა̈რ ხახჷრჷნ.

Line of edition: 17       ანჴად ლუშნუ ნამშა̈ჲშ ლითელ ი მესგვრე ჰამუნღვე ნებოზდ ჩუ
Line of edition: 18    გარ აყვრე. ფუსდს გვი ხოხპენი ხჷრშვ, მარე ქა ლა̈თნა მადმა ხარ,
Line of edition: 19    პირობა̈რს ჟი დეშ აჟვმე.

Line of edition: 20       აშხუნღვე ლა̈ხშყად ი მიჩა მეჩი დი ბელყეჩთეჟი ადუზე ჷრჟი
Line of edition: 21    მარემ ი: -- გიგუშალ ესეროღვ ა̈დშჷმ, ღვე მესგვრ' ესერ ქა̈დღირეხ.

Line of edition: 22       აჩად საბრალ დადა ბელყეჩთეჟი ი ჰამუნღვე ნებოზდ "გიგუ,
Line of edition: 23    გიგუ" ს ტულივ.

Line of edition: 24       -- იმხენ ესერ ა̈ნჴდენივ, ღერმეთ ისგუ ყერღო, ამ მუჟღურ
Line of edition: 25    გიგუ?! თეფოღვ ოხჴიდხ ი ჯი ესერ ხოწა ა̈მის.

Line of edition: 26       ა̈ნკიდ თეფ, ა̈ხჴვასგ ლეჟრი დადას ი ლჷშგრ' ესდე. ჷრჟი მა-
Line of edition: 27    რემ ი მიჩა ხახვემ უშხვა̈რ ხა̈ქვეხ: -- ა̈დქა̈ბხ ესეროღვ ამხენქა.

Line of edition: 28       ანმარეხ ეშხუ ძაძრა ლევიზ ი თხვიმ - ლჷთლჷრე ჩვესიგხ, მერმა
Line of edition: 29    ძაძრათე ლერშ-ლერექვ ესდეხ ი მინ ჩვა̈დუჟდახ. ლეთშვ უშდილ
Line of edition: 30    ჟ'ანჷგან ბეფშ, ლევიზ ქანჰარე, ძაძრა შიხშვ ანგვერშლე, ჟიქაქა
Line of edition: 31    დირა̈რ ესდე, მერმა ძაძრათე ჯი აჩად ი ხოღლი. ჰამს ურჰად
Line of edition: 32    ა̈ნიცვხ თვით ძაძრა ჷრჟი მარემ ი მიჩა ხახეემ ი ათაგანხ შუკვს.
Line of edition: 33    ესხრიხ, ესხრიხ ი აშხვ ხოშა კოჯა̈შ ფოქთეჲსგ' ა̈თჴედჷნხ.

Line of edition: 34       -- ათხ' ესერ ახა̈ჲდჷნა, -- ხა̈ქვე ჷრჟი მარემ მიჩა ხახვ ი ძაძრას
Line of edition: 35    ლიფშგე ლოხბინე.

Line of edition: 36       -- ოჰ, ათხ' ესერ მიჩი სურუ ხა̈იდ ი ხაფიშ სერ, -- რა̈ქვე ამ
Line of edition: 37    ნაღვჟურდ ი ძაძრახენჷი ლა̈ხყვაფ.

Page of edition: 270 
Line of edition: 1       -- ვა̈ჲ ესერ მინე ლირდეს! -- რა̈ქვეხ ხეხვ.ჭა̈შდ ი უდჲარად
Line of edition: 2    ადყურდახ, ძგიდხენ ნაღვჟურ ადყვინეხ, -- ქ' ესერ ადკვანეხ, ჩვა̈დუჟნი
Line of edition: 3    ეჩქას, -- მარე მა̈ფშარუს შიშდ ჩვა̈თუჟახ. ნაღვჟურ ჟ'ანჷგან
Line of edition: 4    ი ჭვედხენ აჩად, ძგიდხენ ზურალ ადყვინე. ისგლეთქა ა̈ხეჲცხჷნ
Line of edition: 5    მარა, ხაჴიდ ტოტა̈რ ი ხოშა კოჯქ' ადკვა̈რ მიჩა ხეხვ. ღოშგიმ
Line of edition: 6    ნაღვჟურს ლოხბინე ლიჲცხუნე: -- ჰა, ჟ'ოღვ ანჷგან, ჯი ზურალ,
Line of edition: 7    ჭირ ესერ ქოთღირახ, ღჷრდახ ესეროღვ ქორთე!
Line of edition: 8    -- ოჰ, ჯი მარე, მ' ესერ ხოჩვმინა, ხეხვ ესერ ოთკვარაჲა
Line of edition: 9    კოჯა̈რქა?!

Line of edition: 10       ქაჲ ხასჷმდ მიჩა მჷღლა̈ტია̈შ ჰერ ი გუდ აჴად, ერე მიჩა ხეხვ
Line of edition: 11    ოთკვარა. ოხპარ ჷრჟი მარე ი კოჯქა ადსკინე, მინე ქორ ი მაღვან
Line of edition: 12    ა̈გ ხოხვრა მუხვბა ესსად.


Line of edition: 13 
დომენტი ანსიანი. ხერხვაში. მ.ქალდანი. 6.VIII.1950



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.