TITUS
Svan Prose Texts II (Lower Bal)
Part No. 134
Previous part

Text: 134 
Page of edition: 270 
Line of edition: 14 
CXXXIV. გვილბიდ


Line of edition: 15       იმეგ ა̈რიხ ეშხუ ხეხვ-ჭა̈შ ი ჩვა̈რიხ. მინე ლირდეს ჟეღ დემ
Line of edition: 16    ა̈ჰა̈ვივ, ეშხუ გეზალ მიჩა დრევჟი ქოღვ ახწესენანხ. ჩითე ლა̈ხკვაჰხ,
Line of edition: 17    ჩი ა̈ხშდაბხ, მარე ვოდედე აშხვ მელთერდ ვისგ ლახემ ი ა̈მიშ ეშხუ
Line of edition: 18    ნა̈ბიჴვ ხახვ ხამნე ი მერმე ნა̈ბიჴვ -- ჭაშვ, ეჩქად გეზალ მადე
Line of edition: 19    ა̈ხთენანხ.

Line of edition: 20       ჩხარა თეუნღვე ზურალს ნაღვჟურგეზალ ა̈ხთენან. ა̈მის ჟახარ
Line of edition: 21    გვილბიდ ათჟა̈ხხ. გვილბიდ ლეთიშდ ლა̈დი ხოშილ ნა̈ცხემვ ლასვ,
Line of edition: 22    ლა̈დიშდ ხოშილ -- მჷხა̈რ. ჟ'ა̈ნიცხ ი ლჷთნე მახეღვა̈ჟ ა̈ხფას. კესა̈რდ
Line of edition: 23    მიჩეშთე იჰერ ი თხვიმ ვა̈ზირდ ადგენე. ამნემ ეჯჟი ლახლატვნე
Line of edition: 24    თხვიმ კესა̈რს, ერე მერმე ვა̈ზრა̈რ დემნა̈რ ხებჟჷნ. ა̈ლი ამჲა̈რს
Line of edition: 25    ხასდიკხ ი რა̈ქვეხ: -- მოლ' ესეროღვ ოხგონვეხ გვილბიდს, ოდო
Line of edition: 26    ამჟი ესერ მინე ლირდეს მამა ხაყა.

Line of edition: 27       აშხვ ხოლემ მახალშვ გვეში ვა̈ზირდ სგა ლა̈ჲჴერნე მერმე ვა̈ზრა̈რ
Line of edition: 28    ი ისგაჩადხ კესა̈რიშთე. კესა̈რს ხა̈ქვე ამ ვა̈ზირდ: -- მიჩა ლაფშდი
Line of edition: 29    გვილბიდს ესერ ოხფაშდა ი: ლახ' ესერ ა̈ხკა̈ფი, მეშხე და̈ვა̈შ ხახვემ ვოქრეშ
Line of edition: 30    ლუსდგვა̈რს ესერ ემეჩუ ესდისგ.

Line of edition: 31       კესა̈რდ გვა̈ლბიდ ა̈ნჰერ ისგა ი ლა̈ხჭედივ: -- გვილბიდ, ტკისდ
Line of edition: 32    ესერ ოხფაშდაჲა და̈ვა̈შ ხახვემ ვოქრეშ ლუსდგვა̈რე ლიჴდე?

Line of edition: 33       -- მიჩ ესერ დემეგ ხოფშდა, მარე ეჯღაჲ-ეჯღაჲ მა̈ ვობა̈შ
Line of edition: 34    გარჯ ესერ ა̈მის ა̈ხკვედნი.

Line of edition: 35       ანჷგან გვილბიდ ი ესხრი, ესხრი. ჲარვ ნესყემ ბოგს ქა̈თბაჴ ი
Line of edition: 36    მესმაუნღვე აშხვ მეშხა ლარათე ლა̈წვე ა̈ხსყან. გვილბიდს ხესმან,
Line of edition: 37    ერე მეშხე და̈ვ მეშხა ლარემ თხუმ იზგა. ჩიხენ ოხციქვარე, ჩიხენ
Page of edition: 271  Line of edition: 1    ახჴვესგინალ, მარე ვოქრეშ ლულსდვიგვ და̈ვა̈შ ხეხვ ჯი გარ ყორქა
Line of edition: 2    ქა დეშ ა̈ნკვა̈რ. მეშხე და̈ვ ეჯა̈ლიბ ყრანგალ ლასვ, ერე გვილბიდ
Line of edition: 3    აშხვ ნა̈პუდ დეშ ა̈თხერივ. სერ ჩვა̈თპაჟ ნენჩაჲსგა ი ლეჰჷრმაშთე
Line of edition: 4    ა̈თჴვასგ მა̈ჲდანისგა ი ვოქრეშ ლუსდგვა̈რ თე რა̈კზუ ხა̈ნს ჭკვა̈პდ
Line of edition: 5    ლახგენე ძირისგა ი ჯინემ აშგარ ცხჷლ ათღანე მა̈ჲდანქა. და̈ვა̈შ
Line of edition: 6    ხახვემ უჟისგა ესკილ მჷცხიდ ი მიჩა ჭა̈შ ჟ'ოხპარ. კვა̈რი (\ მჷხირ)
Line of edition: 7    ანტვარე, ლახემ გვი ი მიჩა ხახვ ლუსდგვა̈რ ქა ლუქცურე ხარ.
Line of edition: 8    ქა̈ხყუბან ყორქა ი ხაღვიჭ ნაზვს. გვილბიდ, მა̈ ღულა̈ ხოგ, ესქინე.
Line of edition: 9    ლა̈დი-ბა̈ზი ხეჰელივ, ეჯჟი გვილბიდდ ნესყემ ბოგთეჲსგა ადჰიე ი
Line of edition: 10    ამექა აშგარ წვისდ ა̈ნკიდ მერმათე ი და̈ვს ღოშგდ ლეჭენი ხად
Line of edition: 11    ჰა̈რიდ.

Line of edition: 12       კესა̈რ ი ვა̈ზირ-ნა̈ზირ ფიკვიდ გარ ასადხ გვილბიდა̈შ ნალმა̈რგიშვ.
Line of edition: 13    ათხე კესა̈რდ ვობა̈შშვ ხოშილიდ ლჷგენ ათდე გვილბიდს ი
Line of edition: 14    ვა̈ზრა̈რ ლა̈იდ ხოშილიდ ლასკორათ' აშყადხ. ვორგვილ ვა̈ზირ
Line of edition: 15    კესა̈რიშთეჲსგაიდ ოთჟოღ მერმე ვა̈ზრა̈რს ი ხა̈ქვე: -- მიჩა გვილბიდს
Line of edition: 16    ესერ ოხფაშდა ი: ლახ' ესერ ა̈ხკა̈ფი, და̈ვა̈შ ხახვემ ვოქრეშ ლუსვა̈რსი
Line of edition: 17    ემეჩუ ესდისგ.

Line of edition: 18       კესა̈რდ გვილბიდ იჰერ ი ლა̈ხჭედივ: -- ტკისდ ესერ ლია, გვილგბიდ,
Line of edition: 19    ერე ლა̈ვა̈შ ხახვემ ვორქეშ ლიჴდე ლოხფაშდა?

Line of edition: 20       -- მიჩ ესერ დემეგ ხოფშდა ა̈ლი, მარე ეჯღაჲ-ეჯღაჲ მა̈ ვობა̈შ
Line of edition: 21    ესერ გარჯ ა̈მის ა̈ხკვედნი ჩუ ლჷწხან.

Line of edition: 22       გვილბიდ სგაიდ ლა̈ხტახ და̈ვს. ჩიქი აშხვხენ ოხციქვარე, ღვე
Line of edition: 23    მერმახენ. და̈ვ ქა̈ხყუბან ყორქა ი კაჰდა შჷნ ხუღვანდა, ეჯჟი ნენჩათ'
Line of edition: 24    აჩად ზაქვემ ლამარათე. გვილბიდ ყორისგა ა̈დსგიდივ ი და̈ვა̈შ ხახვ
Line of edition: 25    ჩუ ხევჟა. ლა̈ჲყვიფ [გვილბიდდ] ა̈მიშ ჭაშვემ ხანჯა̈რ ვერჩხხენჟი,
Line of edition: 26    ოხსვილ და̈ვა̈შ ხახვ ი ტა̈ნ აშხვთ' ესდან ი თხვიმ მერმათე.
Line of edition: 27    ვოქრეშ ლუსვა̈რ ჟ'ახქუცურე ი ანქინე ლა̈შდობნათე. ამჟი და̈ვდი
Line of edition: 28    ა̈დბა̈ჟ ი ეჯგვა̈რ ანსყე ყულმაყულ ი ტურშუნ-ბურგუნ, ერე ლენზერ
Line of edition: 29    ი ლეღვმერ ნენჩა ქანა̈შ ნა̈ჴჩოლდ ადგენე, მარე გვილბიდ ქაიდ
Line of edition: 30    ოთჩად ნესყემ ბოგქა ი ქორთე შვიდებდიდ ანტახ. ათხე სერ
Line of edition: 31    ლა̈იდ სურუიდ ლჷგენ ა̈თდან გვილბიდს. ვა̈ზირ-ნა̈ზირდ ლალხორალიდ
Line of edition: 32    ადსყეხ გვილბიდა̈შ ბედჟი. ვოღურცუზ ვა̈ზირ სგებინიდ
Line of edition: 33    ოსჟოღ ვა̈ზრა̈რს კესა̈რიშთეჲსგა გვილბიდა̈შ ლა̈ნმღვლად ი ხა̈ქვე:
Line of edition: 34    -- გვილბიდს ესერ ოხფაშდა ი და̈ვა̈შ ვოქრეშ ჩა̈ნგილდს ესერი
Line of edition: 35    ამეჩუ ესდისგ, ლახ' ა̈ხკა̈ფი.

Line of edition: 36       კესა̈რდ გვილბიდიდ ა̈ნჰერ: -- გვილბიდ, ტკისდ ესერ
Line of edition: 37    ოხფაშდაჲა მეშხა და̈ვა̈შ ჩა̈ნგიშ ლიჴდე?

Page of edition: 272 
Line of edition: 1       -- მიჩ ესერ დემეგ ხოფშდა, მარე ა̈მიცა̈ლ გარ გარჯ
Line of edition: 2    ესემა̈ ირი?

Line of edition: 3       ესხრიიდ გვილბიდ ი ნებოზს გვიანდ ლაჴვრაჲსგ' ოხციქვარე
Line of edition: 4    და̈ვ ხახვემ ურწყვ ლი ი ჩა̈რჩ ლარტყვთეჩუ ხეჰელი. კაკა̈შ ნა̈ყროლ
Line of edition: 5    ტჷტა̈შ ლაფთვიდ ხუღვე. ვოქრეშ ჩა̈ნგილდ კა̈ცნა̈შჟი ხორკჷნ, და̈ვს
Line of edition: 6    ამხავ შიყ ხოსგან.

Line of edition: 7       გვილბიდდ ნენჩაჲსგა ეშხუ მაჯვდე ხვატ ა̈ნქა̈ჩ, ა̈მის ფოცხ ლახა̈ბ.
Line of edition: 8    ა̈ლი მა̈ჲდანისგ' ადქვიჭე, ჩა̈ნგს ლოხრეკ ისგა ი მა̈ჲდანქა
Line of edition: 9    აშგარ ცხჷლ ახკიდვნე. და̈ვდ ქა̈დბა̈ჟ ა̈მიშ ფჷრცხჷნ ი ქაიდ ა̈ხღვაჭ,
Line of edition: 10    მარე გვილბიდ ქაიდ ოთჩაშ ნესყემ ბოგქა ი ათხეი შვიდებდ ოხსად
Line of edition: 11    მეშხა და̈ვს.

Line of edition: 12       ათხე სერ გვილბიდა̈შ გარ თხვიმ ხუღვეხ ლერგა̈დიდ ამ კესრიშ
Line of edition: 13    სა̈ხელწიფისგა. ვა̈ზრა̈რს მაურცეფშვ გვი ხეხიპენალხ. გვილბიდს
Line of edition: 14    და̈შ ლიმარვს ლეთნილადეღნ ხექმენი გარ.

Line of edition: 15       ვორგვილ ვა̈ზირ ისგაიდ ოსჟოღ კესა̈რთეჲსგა ი ხა̈ქვე: -- გვილბიდს
Line of edition: 16    ესერ ოხფაშდა ი: და̈ვს ესერ ვოქრეშ ყვიმბ ხაგ გვიჯჟი,
Line of edition: 17    ეჯის ესერ ემეჩუ ესდისგ, ლახ' ა̈ხკა̈ფი.

Line of edition: 18       კესა̈რდ გვილბიდიდ ა̈ნჰერ.

Line of edition: 19       -- ტკისდ ესერ ამჟი ლჷმა̈რა, და̈ვა̈შ ესერ ვოქრეშ ყვიმბიშ
Line of edition: 20    ლიჴდე ოხფაშდაჲა?

Line of edition: 21       -- მიჩ ესერ დემეგ ხოფშდა, მარე ეღღაჲ-ეჯღაჲ მა̈ გარჯ ესერ
Line of edition: 22    ირი ეჩა ლიჴდე?

Line of edition: 23       გვილბიდდ ჩა̈რჩ ა̈ნგენე. მოშდ ა̈ნრექვან ი ლანგზარს ათაგან.
Line of edition: 24    ა̈თხეშ დრევჟი მერმახენ ა̈ხცად და̈ვა̈შ ლა̈ზგა-ლარდას ი ყორისგა
Line of edition: 25    ლა̈ხშჷმ და̈ვს. და̈ვდ ისგა ხა̈წეჰ ი აქა̈ნი ოხკიდხ უშხვა̈რ. გვილბიდ
Line of edition: 26    ლა̈ხჭედივ და̈ვს:

Line of edition: 27       -- მაგვა̈რდ ესერ ა̈რი?

Line of edition: 28       -- მაგვა̈რდ ესერ ირდი? ეშხუ ჲეშმა̈ მარ' ესერ ახმითქვენა ი
Line of edition: 29    მიჩა ლიზგე-ლირდ' ესერ ლჷცდ ხოყირა.

Line of edition: 30       -- ჰჷ, მიჩ ესერ მა̈ ლემშერა̈ლ ხეღვენი მიჩეშცა̈ლ. ახმითქვენ'
Line of edition: 31    ესერ ეშხუ მა̈რე ი ხეხვ ი გეზლირ სგვა̈ზდ ესერ ოთგენა. ჩუ ესერ
Line of edition: 32    მა̈ ხა̈ღვენა, მა̈გ ქოთღა ი ათხე ლაშგვმა̈ნიშვ გარ ესერ ხოგ ქვინ.

Line of edition: 33       და̈ვდ გვილბიდ დეშ ათირ ი ჩვა̈რიხ ბა̈იშ ლეთ.

Line of edition: 34       მერმა ლადეღ ჰამხენ ლამშა̈ჲს ლოხმარჯვე გვილბიდდ ი ისგლადღიშ
Line of edition: 35    ვანაქა ლა̈შვმინათე ანჴადხ. გვილბიდდ ხა̈ქვე და̈ვს: -- ხვიბდა̈ჯო,
Line of edition: 36    მაზუ ხანს ესერ ხეკვეს ხაგენეხ მინე ლა̈ჲხვაღა ჩა̈რჩ, ქ' ესერ
Line of edition: 37    დო იწბურეხ.

Page of edition: 273 
Line of edition: 1       და̈ვს ათხიდჷნ ი შიშდ ლაწბურალს ოხოგანხ. მა̈ნკვი და̈ვ ესგურდჲ
Line of edition: 2    ლაწბურალს. აწბურე ე გვიჯთეჟი ჟიი ადჰიე ი
Line of edition: 3    მიჩა ალსმიშ ხანჯრილ ლა̈ჲყვიფ. ლახჭემ ა̈ლი ი ვოქრვშ ყვიმბ
Line of edition: 4    შია̈რისგა ლა̈ხსად. და̈ვს მასტუნშვ ბაჟ ქოხკად ი ყერბ ლექვა ხოვახ.
Line of edition: 5    გვილბიდ ა̈ნქინე, ა̈ნქინე, ნესყვმ ბოგქა აშგარიდ ცხჷლ ათღანე.
Line of edition: 6    კესა̈რ ი მიჩა ვა̈ზირ-ნა̈ზირ ლჷმბაჟე გარიდ ასადხ.

Line of edition: 7       ვა̈ზრა̈რდ ანჷლხორეხიდ გვილბიდა̈შ ხოლა ი კესა̈რსიდ ხა̈ქვეხ:
Line of edition: 8    -- გვილბიდს ესერ ოხფაშდა ი: მიჩ ესერ ლახ ა̈ხკა̈ფი, მეშხა და̈ვს
Line of edition: 9    ესერი ემეჩუ ესგენისგ.

Line of edition: 10       კესა̈რდ შიშდიდ გვილბიდ ა̈ნჰერ. გვილბიდი ანჴად. კესა̈რ ლა̈ხჭედივ:

Line of edition: 11       -- ტკისდ ესერ ოხფაშდაჲა, გვილბიდ, მეშხა და̈ვა̈შ ლჷარდ
Line of edition: 12    ლიჴდე?

Line of edition: 13       -- მიჩ ესერ ა̈ლი დემეგ ხოფშდა, მარე ეჯღაჲ-ეჯღაჲ მა̈ ვობა̈შ
Line of edition: 14    გარჯ ა̈მის ესერ ა̈ხკვედნი?

Line of edition: 15       გვილბიდ მახადიდ ა̈ნრექვან, ამ ლერქვა̈რდ ეჯჟი ესსიპეხ, ერე -
Line of edition: 16    გვილბიდთე დემშვმოშ ხად ლათარ. ესხრი ი და̈ვა̈შ ლა̈ზგა-ლარდას
Line of edition: 17    მოშ ფოყხენიდ ა̈ხცად. სგა ლა̈ხმუშგვრან ა̈მის ბა̈ზი ი და̈ვს.
Line of edition: 18    ნა̈შდობად ლა̈ხჭედივ, და̈ვდ მიჩა გაქირება მა̈გ ქოხფმბავე. გვილბიდდ
Line of edition: 19    ოსცა̈დ ი:

Line of edition: 20       -- მიჩეშცა̈ლ ესერ ლემშერა̈ლ მიჩ იმხენ ხეღვენი, ჟი ესერ
Line of edition: 21    ოხხვიტა აშხვ ჲეშმა̈ მარილს. ლა̈დი ესერ ლიმხუბჟი ხემშგვა̈რ ი
Line of edition: 22    მჷხა̈რ მოლაუსვახვიშს ესჟრ ხოსხა̈თი.

Line of edition: 23       და̈ვდ დეჲ ათხემოშ ათირ გვილბიდ ი ბა̈ზი ისგაიდ ლა̈ჲმუშგვრე.
Line of edition: 24    მერმა ლადეღ ჰამხენ და̈ვსიდ ლოხმარჯვე ლამშა̈ჲს. ისგლადღიშ
Line of edition: 25    ლა̈შვმინაჟი გვილბიდ ლა̈ხჭედივ და̈ვს: -- დოსდ ესერ ლიკლაველ
Line of edition: 26    ლი ი ითქიშ შედ კიბდონა̈რ ესერ უმარა ხა̈რენა. ჩოღვ ადილწხ ი
Line of edition: 27    ლიკლაველისგ' ესერ მადე ხერი ლეფანთუნელ.

Line of edition: 28       და̈ვდ ა̈დხიდე ა̈ლი ი კიბდონრე ლალწის ოხოგანხ. და̈ვ ისგაადგენე
Line of edition: 29    კიბდენთეჲსგა? გვილბიდ ჷლწივ ქა̈მშხენ. ხოჩამდ ნა̈ლწეუნღვე
Line of edition: 30    გვილბიდდ ხა̈ქვე: -- ათხ' ესერ ლაფრის ჟი ხალფა̈რი, ჟი ესერ
Line of edition: 31    იცვემ ი ყერბ გჷრკა̈ნდ სუმინ ქ' ესერ ჴიდე ი, ლჷლწ ესერ ჩუ დემ
Line of edition: 32    ა̈დტყჷცჷრი ე, ხოჩა ლჷლწ ესერ ირი, მადეჲ მახად ესერ ადჷლწინეხ.

Line of edition: 33       -- ლა̈ჲდ ესერ ხოჩა ირი, -- და̈ვდ ოსცა̈დ.
Line of edition: 34    გვილბიდდ ჟ'ესლაფრე ლაფრი, ქანთჷრჷლე ლჷჴმაშდ პრატა̈რშვ
Line of edition: 35    ი აშგარ ცხჷლ ახკიდვნე. მოლე ხა̈ნუნღვე და̈ვ ლა̈ხქედივ: -- ათხ'

Line of edition: 36       ესერ იმეგუთ ა̈რიხმ?

Line of edition: 37       -- ათხ' ესერ კაღეშგიმჩუ ა̈რიხ.

Page of edition: 274 
Line of edition: 1       მოლვ ხა̈ნუნღვე და̈ვ ადა̈ჲდ ლა̈ხჭედივ: -- ათხ" ესერ იმჟგუთ
Line of edition: 2    არის?

Line of edition: 3       -- ათხ' ესერ კა̈ცხა̈შჩუ ა̈რიხ.

Line of edition: 4       დრევ ი ვანაუნღვე და̈ვდ ადა̈ჲდ ა̈დჭოდრელე: -- ათხ" ესერ იმე-
Line of edition: 5    გუთ ა̈რიხ?

Line of edition: 6       -- ათხ' ესერ ნესყემ ბოგქ' ესხრიხ ი ნომეგოღვ ა̈დქუთნალ,
Line of edition: 7    ოდო ნენსგა მანრრაფჩუ ესერ შყედნიხ.

Line of edition: 8       და̈ვდ მაყალშვ ლირკუნ' ა̈დბინე ი კესრიშ ყორთეჲსგა კჷკჷ მადე
Line of edition: 9    რა̈ქვე. ამეჩუ კესა̈რ ი მიჩა ვა̈ზირ-ნა̈ზირ მა̈გ ა̈მიშ ლა̈სგდითე ლი ქა
Line of edition: 10    მეჴდე. გვილბიდდ კიბდენ ჟ'ახკჷმრავნე. და̈ვს მინე თევშვ ქა ხეწადხ
Line of edition: 11    ი ეჩქანღვე ჟ'ადიჲე ალ კიბდენ კჷნჯბიშ თხუმთეჟი, ანკჷრანკე ამხენქა
Line of edition: 12    ალ კიბდენ ქა ი და̈ვ ნა̈რხდ ადჷგან. კესა̈რდ ათხეუნღვე ხოშილიდ
Line of edition: 13    ლგგენ ათდე გვილბიდს.

Line of edition: 14       ვორგვილ ვა̈ზირდ ისგაიდ ლა̈ჲჴერნე მიჩ აფხნეგა̈რ ი კესა̈რსიდ
Line of edition: 15    ლახაგანხ ყორს გვილბიდა̈შ ლა̈ნძღვლას ი ხა̈ქვე: -- გვილბიდს ესერ
Line of edition: 16    ოხფაშდა ი: აშხვ ლეთჟი ესერ სამ აშირ სიმაქს მჷრაგად ა̈სყი.

Line of edition: 17       კესა̈რდ გვილბიდიდ ა̈ნჰერ ი ლა̈ხჭედივ: -- ტკისდ ესერ ლია,
Line of edition: 18    გვილბიდ, ერე აშხვ ლეთჟი სამ' აშირ სიმაქს მჷრაგად ა̈სყი?

Line of edition: 19       -- მიჩ ესერ დეჲ ა̈ლი ხოფშდა, მარე ჩუ ლჷწხან ვა̈ ვობა̈შ
Line of edition: 20    გარჯ ესერ ა̈მის ა̈ხკვედნი?

Line of edition: 21       ჟ'ა̈ნზერ სა̈ხელწიფისგა სემ' აშირ სიმაქ ი ისგოხჴიდხ გვილბიდს.
Line of edition: 22    ჩხარა თევუნღვე სამ' აშირ ნაღვჟურგეზალ ხორდა გვილბიდს.
Line of edition: 23    ათხე ლა̈ნძღვლას მახადიდ ლახაგანხ კესა̈რს: -- გვილბიდს
Line of edition: 24    ესერ ოხფაშდა ი: მიჩ ესერ ა̈ხკა̈ფი, ვა̈ლყიშ ქა მეკვჰე ტყა̈რ ჭა̈გს
Line of edition: 25    ემეჩუ ესერ ესგენისგ.

Line of edition: 26       კესა̈რდ გვილბიდიდ იჰერ ი ლა̈ხჭედივ: -- ტკისდ ესერ ონფაშდა
Line of edition: 27    ტყა̈რ ჭა̈გიშ ლიჴდეა?

Line of edition: 28       -- მიჩ ესერ დეჲ ა̈ლი ხოფშდა, მარე ლჷწხან მა̈ გარჯ ესერ
Line of edition: 29    ა̈ლი ირი.

Line of edition: 30       გვილბიდ ჟ'ა̈ნმურჯვინან. ეშხუ ფუთ ჯიმ ი ხაბნა̈შ გვერე ქაფდ
Line of edition: 31    ლა̈იცვ ი ესხრი, ესხრი. ჩხარა თანღის ქა̈თბაჴ ი ვა̈ლყისგა აშხვ
Line of edition: 32    მაზვბულს ათასდ. ხაბნა̈შ გვერე ლჷჴმაშდ ჟ'ესშკა̈დ ამ მაზვაბს,
Line of edition: 33    ჟიქა ჯიმ ესჴუინე ი ჯი გა̈ნხენჩუ მეგამჟი ა̈თპაჟ. დრევ ი ვანაუნღვე
Line of edition: 34    ვა̈ლყიშ ჭა̈გდ ანსკინე. ამთეჲსგა ლჷცემ ლათრათე, მარე ლჷცემ
Line of edition: 35    მჷქაფდ ამეჩუ ჯიმ ახხვიდ. ა̈ლი ლა̈ჲლა̈ჴვ ი ჟი ნა̈ბიზუნღვე ვოშთხვშიდ
Line of edition: 36    ატახ. მოლე გარ ხა̈ნ აჩად ი ჭა̈გ ლაღარზალშვ ანტახ,
Line of edition: 37    ჯიმ მახადიდ ლა̈ჲლა̈ჴვ ი რა̈ქვე: -- ჲა̈რ ბედნიერ ესერ ლი, ქოღვ
Line of edition: 38    ლა̈ხწვენან!

Page of edition: 275 
Line of edition: 1       -- ა̈ღვირ ესერ ისგოღვ ლა̈ჲდე ი ქ' ესერი ხეწვენი ი ლჷც ესერი
Line of edition: 2    ჩუ ხათრე.

Line of edition: 3       ვა̈ლყიშ ჭა̈გდ ა̈დვა̈შგდე ა̈ღვრიშ ლიდისგ ი აშგარ ცხჷლ ათღანე.
Line of edition: 4    ჩითე ა̈დღარზალ, ვა̈ლყისგა ა̈დგი დემეგ აცვირ უთხელალად, მარე
Line of edition: 5    ეშხუ წიქვ ლიც დეშ ა̈ნთხე. იყმი ლჷცემ მაფჷრშვ.

Line of edition: 6       დრჷვ ი ხა̈ნუნღვე ვა̈ლყიშ ჭა̈გ ისგაიდ ლა̈ხტახ მაზვაბს ი რა̈ქვე:
Line of edition: 7    -- მა̈ ტა̈რ ბედნიერ სგეჯი, ქა ლა̈მწვენენ ი ა̈ღვირს ესერ ისგა
Line of edition: 8    იდისგ.

Line of edition: 9       -- ჰინგირ ჟ' ესეროღვ ესიგ ი ქ' ესერი ხეწვენი ი ჩვ ესერი
Line of edition: 10    ათვინე.

Line of edition: 11       -- ჰინგირ ლიგემ ა̈დვა̈შგდეიდ ი ღარზიდ ა̈ნკიდ ტყა̈რ ჭა̈გდ.
Line of edition: 12    ა̈დღარზალ, მარე ლჷცენ კუკუმ დემეგმოშ ა̈ნთხე ი ისგაიდ ლა̈ხტახ.

Line of edition: 13       -- ქა ლა̈მწვენენ, ჲერვა ბედნიერ სგეჯი, ი ჰინგირსი ჟი ხვიგემ.

Line of edition: 14       -- ლარტყა̈რ ქამთჷრჷლნავინ ი ქაი ჯეწვენი ი ჩუი ჯათვნვე.

Line of edition: 15       ა̈ლი ა̈დვა̈შგდეიდ ვა̈ლყიშ ჭა̈გდ. მურტკვიდ ა̈ნკიდ ი თე ლა̈წვესიდ
Line of edition: 16    ათვაფ, მარე შიშდიდ ანტახ ი ხა̈ქვე: -- ქა ლა̈მწვენენ ი
Line of edition: 17    ლარტყა̈რსი ქა ჯათრჷლნე.

Line of edition: 18       -- ჟი ლა̈მსგვირ ი ქაი ჯეწვენი ი ჩუი ჯათვნე.
Line of edition: 19    ვა̈ლყიშ ჭა̈გდ ა̈ლი ლა̈იდ ხოშ' ა̈დვა̈შგდე, ღარზ ა̈ნკიდ ი ათვაფიდ,
Line of edition: 20    მარე ანტა̈ხიდ.

Line of edition: 21       -- ჰა, მა̈ ტა̈რ ბედნიერ სგეჯი, ქა ლა̈მწვენენ ი ჟი ჯისგვრე.

Line of edition: 22       გვილბიდ ჩვანჴად, ა̈ღვირ ისგოთდე, ჰინგირ ჟ'ესა̈გ, ლარტყა̈რ
Line of edition: 23    ქოხთჷრჷლე, ლიც ლახა̈შ ი ჟი ლახსგურდა. ჭა̈გდ ხა̈ქვვ: -- ათხვ
Line of edition: 24    ჩვ ესეროღვ ოხქახ, ოდო ჟიბავ დჟცს ესერ ხა̈ბჭკვე.

Line of edition: 25       -- ეჩქას ესერ ჯი ჩუქა ლეჟა ლა̈ხფერცხი.

Line of edition: 26       -- ეჩქას ჩუბავ გიმს ესერ ესბიჭკვე.

Line of edition: 27       -- ჯი ჟიქა ლეჟ' ესერ ლა̈ხფერცხი.

Line of edition: 28       ვა̈ლყიშ ჭა̈გდ ტკისდი ჩითე ლახტის გვილბიდ, მარვ მადმაგვეშ-
Line of edition: 29    მოშ ხა̈ყერ. ეჩქას ესთჷრტჷნე ვა̈ლყიშ ჭა̈გდ ი სემ' აშირ გეზალ
Line of edition: 30    გა̈ნხენჩუ ლახაგან, ესშვეპ გვილბიდდ ი სჟმ" ა̈შირ ნაღვჟურ გეზალ
Line of edition: 31    გა̈ნხვნჩუ ლახაგანხ თა̈ვითალჟი მა̈გ ჩაჟა̈რს ახსგურე, თხუმ ჯინემ
Line of edition: 32    ოსჟედ ი არა თანღის ქაჩადხ. მეჲჩხრე თანღია̈შ ხანსარჟი ლა̈ჲშვემხ
Line of edition: 33    ი გვილბიდს ეშხუ ბანდვ ყვარლიდ ლახაგან გა̈ნხენჩუ. ამნემ ხა̈ქვე
Line of edition: 34    გვილბიდს ი: -- ვორგვილ ვა̈ზირს ესერ ვობა̈შ ხოლა ოხგონვა
Line of edition: 35    მიჩეშდ, მარე ლა̈დიდ ესერ მამაგვეშმოშ ხოყრა ი ათხ' ესერ ხოლამ
Line of edition: 36    ხედრა̈ლ, მარე ჯიმ ესეროღვ ხამნე ი ჩვიბ ლა̈კვჰალს ეს-რ
Line of edition: 37    ჲდსყენჟხ, ეჩქას მიჩ ესვროღვ ახსგურდა.

Page of edition: 276 
Line of edition: 1       გვილბიდდ ჯიმ ხამნე ა̈მის ი ამნემ ლა̈ჲბინე ხანსრიშ ლიზებ ი
Line of edition: 2    ჟი ღეთ ესბაჭკვ. მერმა ლადეღ გვილბიდ ყორს ლახაგან კესა̈რს.

Line of edition: 3       ვორგვილ ვა̈ზირდ ისგაიდ ლა̈ჲჴჟრნე მიჩ" აფხნეგა̈რ ი კესა̈რს
Line of edition: 4    ხა̈ქვე: -- გვილბიდს ესერ ოხთონა მინეშდ მიჩეშთე ი: მაფუა ზა̈მ-
Line of edition: 5    თეჲსგ" ვსეროღვ ათსკინავნედ ჩაჟა̈რს ი ლტრ ესვრ ხედა ა̈ნტჩენიდ,
Line of edition: 6    ლიფუსდ ესვრ ეჯის ეჲსედნიხ.

Line of edition: 7       კესა̈რს მაყალშვ ფა̈თვ მა̈გ კაჩ ოთაგან, მარე ვარ დეშ ხა̈ქვე.
Line of edition: 8    გვილბიდ ა̈ნჰერ ი ხა̈ქვე: -- ტკისდ ჯი ესერ იჰრია ლატაკალთე?

Line of edition: 9       გვილბიდდ თხვიმ ღეთ ა̈დვვიშ: -- მიჩ ესერ ლეშყადდი მადმა
Line of edition: 10    ხა̈შყდა, მარე ეჯღაჲ-ეჯღაჲ ამჟი ესერ ე ხოცხა ე, მა̈ ესერ ვობა̈შ
Line of edition: 11    გარჯ ირი ა̈მიშ ლიჩემი?

Line of edition: 12       გვილბიდ ჟ'ახსგურდა მიჩა ბანდვ ყვარლიდს, კესა̈რდ ჟ'ახსგურე
Line of edition: 13    აშხვ ჩაჟვ ვორგვილ ვა̈ზირი. ა̈ლი მაყალშვ ქა̈დქჷშპნან ი ნაშთხვერს
Line of edition: 14    ა̈თმაჯონან. "ქათალს როქვ ოხფხირჭა, ოხფხირჭა ი მიჩა ლა̈ზჰენი
Line of edition: 15    გა̈ჩ ოხფხირჭა", ეჯჟი ამ ვა̈ზირს ხეყარ.

Line of edition: 16       კესა̈რდ ა̈მის ლოხთონე მა̈ნკვი მაფუა ზა̈მთეჲსგა. ამხენჩუ
Line of edition: 17    ისგათსკინავნე მიჩა ჩაჟვ ი ეჩხენჟი ჯიფვა̈რ გარ ანტახხ. ვა̈ზირს კესა̈რ
Line of edition: 18    ლა̈ხჭამ ი ამხენჩუშ ნა̈სკინვდ მერმახენჟი ჯიჯვა̈რდ გარ ლაჲქვიჭეხ
Line of edition: 19    თხვიმ. ჩიდ ღოშგიმ გვილბიდდ ლახგენე მიჩა ბალდა̈ ყვარლიდ ი
Line of edition: 20    ამნემ ნინჩვ ადქვიჭე მაფუათეჲსგა ი ხანსარ მა̈გ ზა̈მთეჲსგა
Line of edition: 21    ესჴუფნე ი მაფუა ჩვადქეჲნე. ადსკინე ამხენჩუ ი მერმახენჟი მა̈
Line of edition: 22    შომა̈ჲშშალ ანტახხ ჯი ი გვილბიდ. გვილბიდს ჩექს ესშყადხ მიჩა
Line of edition: 23    ხოლემ მუსკორა. ჯინემ კესრიშ ტა̈ხდ ისგა ლა̈ჲბერვე ი მიჩა ხოლვემ
Line of edition: 24    მუგნოვა ქა̈დღირ ი საბრალს ი ჲერდგვილს ჩი ხოჩა ლიზგელირდ
Line of edition: 25    ოხსყე.

Line of edition: 26       ეჩგიშ ხოჩა ამეჩუ ი ამგიშ ხოლა ეჩეჩუ.


Line of edition: 27 
მერაბ ქალდანი. ლაწომბა. მ.ქალდამი. 19.VIII.1937



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.