TITUS
Svan Prose Texts II (Lower Bal)
Part No. 135
Previous part

Text: 135 
Page of edition: 276 
Line of edition: 28 
CXXXV. ვადა̈შ ლედე


Line of edition: 29       იმეგ ა̈რიხ ეშხუ დი-გეზალ ი ჩვა̈რიხ. მადმაგვვშ ღალ ხაწვავ ი
Line of edition: 30    სურუ საბრალობ ხარს. მინე მაღვან-მაწვან ლასვ ეშხუ სემი მანა̈თია̈ნილ.
Line of edition: 31    აშხვ ლადეღ დიდ ხა̈ქვე გეზალს: -- დიაჯო, ადი იმთვალე
Line of edition: 32    ი ჰედ ა̈თკა̈რქისგ მოლა, მადეჲ ა̈ჲხელი მოლეგვეშ.

Line of edition: 33       გეზალდ ხა̈ქვე: -- ჲაღვე მჷხრიშდ ლევიზოღვ ოხმარე.
Line of edition: 34    მიჩა დიდ ლევიზ ოხმარე ი ალ ნაღვჟურ აჩად. სემი მანა̈თ შჷნ
Line of edition: 35    ლაირმ. ესხრი, ესხრი ი აშხვ ა̈დგის ხეწად, ერე ეშხუ მარე ბოგხენჩუ
Line of edition: 36    ფეკვნას აკვანა. ნაღვჟურდ ხა̈ქვე: -- ნომ' ათკვა̈რი ი აშხვ
Line of edition: 37    მანა̈თს ჯაჰვდი.

Page of edition: 277 
Line of edition: 1       ამ მარა ათხიდჷნ, ფეკვნა ნაღვჟურს ლახემ ი ა̈მიშ ნაფა̈სდ ეშხუ
Line of edition: 2    მანა̈თ ა̈ნკიდ. ნაღვჟურდ ფეკვნა ქორთ" ადიჲვ. მიჩა დი ლა̈ხჭედივ:
Line of edition: 3    -- დიაჯო, მა̈ ჩენნ, ა̈თკა̈რქ მაგვეშმოშა?

Line of edition: 4       გეზალდ ოსცა̈დ: -- ეშნუ მარე ფეკვნას აკვანჲ ბოგჩუ, მანა̈თ
Line of edition: 5    ლოხო ი ქა ლოხვბიშდ.

Line of edition: 6       დიდ ოსცა̈დ; -- დიაღო, მოლე ნა̈გ ხოჩა ლი ნა"არქვ ი ქორთე.
Line of edition: 7    მეჴდე. მჯხა̈რ ადა̈იდ ადი ი ა̈თკა̈რქისგიდ მოლაგვაშვ.

Line of edition: 8       მერმა ლადეღ ჟ"ანჷგან ი აჩადიდ ალ ნაღვჟურ. ხეწად, ერე ეშხუ
Line of edition: 9    მარე ციცვს აკვანა ბოგხენჩუ. ლა̈ხშჷმ ფვედიახენ: -- ჰა, მა̈დილ
Line of edition: 10    შერი, ნომ" "თკვა̈რი ი მი აშხვ მანა̈თს ჯაჰვდი ა̈მიშ ნაფა̈სდ.

Line of edition: 11       ამ მარა ათხიდჷნიდ, ციცვ ქა ლახემ ი ჯინემ მანა̈თ ახჴიდვნე
Line of edition: 12    ეჩა ნაფა̈სდ. ქორთე მეტხან ნაღვჟურს ლა̈ხჭედივიდ მიჩა დი:
Line of edition: 13    -- ა̈თკა̈რქ მოშმაგვეშა, დიაჯონ, ლა̈დი?

Line of edition: 14       გეზალდ ოსცა̈დ: -- ეშხუ მარე ბოგჩუ ციცვს აკვანა, მი მანა̈თ
Line of edition: 15    ლოხო ი ქორთ' ონჴუ, იშგენ ღალ მამაგვეშმოშ, გვიშგე თერაღო.

Line of edition: 16       -- ამჟი, დიაჯო, ქორთე მეჴდე მოლე მა̈გ ხოჩა ლი. მჷხა̈რ
Line of edition: 17    ადა̈იდ ადირ ი ადა̈იდ ა̈თკა̈რქისგ ნოლაგვაშვ.

Line of edition: 18       მერმა ლადეღ ჟ'ა̈დ ანჷგან ტკისდ ი აჩადიდ. ესხრი, ესხრი ი
Line of edition: 19    აშა̈ვ ა̈დგის ხეწად, ერე ეშხუ მარე ტყონშვ ესქინა იმთვალე.
Line of edition: 20    ათღვაჭ ა̈მის ალ ნაღვჟურ ი მა̈დილშვ ა̈თჴჷრან: -- ჰა, ნომა ხაჴჷდე,
Line of edition: 21    ნომ' ადგა̈რი ალ ჰერწემ ი აშხვ მანა̈თს ჯაჰვდი.

Line of edition: 22       ალ მარე ქა̈თყაჩ ჰერწმიშ ლადგა̈რის ი აშხვ მანა̈თს ქა̈ხბიშდივ.
Line of edition: 23    ჰერწემ ღოშგდ ანტახი ამ ნაღვჟურს ხა̈ქვე: -- ჟ'ა̈მფეთინენ ი
Line of edition: 24    ჩვა̈მჴერ ეჯაბასდთე ი მიშგვა ნა̈მშედრალერ საჩქვა̈რს ჯაჰვდი.

Line of edition: 25       ალ ნაღვჟურ ჟ'ა̈ხფეთინან ჰერწემს ი ჩოთჴერივ. ჩვიბ ჰერწმა̈რ
Line of edition: 26    აღჷრდახ ა̈მიშ ლაჴაფთე, მარე ჟიფშხენჩუ ნა̈ჴედვდ ღოშგდ ესჭონნე:
Line of edition: 27    -- ამნენ ლა̈დი ლირდე მასჩქვარე ი გვიშგეშხენ საჩქვა̈რ ა̈ხხელი.

Line of edition: 28       ჰერწმა̈რ ლა̈ხჭედივხ: -- იმღ' ესერ ა̈ხხელი?

Line of edition: 29       ეჲნემ ოსცა̈დ: -- დაგრ' ამქა̈დ აშხვ მარახენქა ი მიშგვა ლა̈მშედრალდ
Line of edition: 30    ვარჩხილ ა̈დჴიდ.

Line of edition: 31       ალჲა̈რ ლა̈ხჭედივხ ამ ნაღვჟურს: -- ჲაღვე მა̈ ჯიცხა საჩქვა̈რდ?

Line of edition: 32       ნაღვჟურდ ხა̈ქვე: -- მი ჯვედიახენ ნა̈მჴედვ ხვი, გვა̈მია̈შ ლიისგ
Line of edition: 33    დემემ მა̈მედა ი ემგვაშვ მაჰვდიდ ე, ისგე ვად ლამემდ საჩქვა̈რდ.

Line of edition: 34       ალჲა̈რდ ჟ'ა̈ნკიდხ მინე ვად ი ქა ლახემხ ა̈მის. ნა̈მშედრალ
Line of edition: 35    ჰერწემდ ჟ'ა̈ნფეთინე ი ჟ'ა̈ნტიხ ამაბასდთე. ამნემ ჩვადშგურანე
Line of edition: 36    ალ ნაღვჟურ: -- ალ ლედე ნა̈ს ხაწონა, ნოჲ ლა̈ხკვეშე ჲა̈ს.
Line of edition: 37    მჷხა̈რ ჰამს ჟ'ახიგნ დოსდ, ქა̈თბარენ, უშკთე ლა̈ხიდ ვად ი, მა̈
Line of edition: 38    ჯიცხონეს, ეჯი ესივდ.

Page of edition: 278 
Line of edition: 1       ნაღვჟურ აჩად მიჩა ქორთე. მიჩა დიდ ხა̈ქვე: -- დიაჯო, მაუსვახვ
Line of edition: 2    აჲრაგჷნ, ჰედ ა̈თკა̈რქ ღალ მაგვეშმოშა ლა̈დი?

Line of edition: 3       გეზალდ ოსცა̈დ: -- მადმაგვეშმოშ ღალ ოთკა̈რქ ლა̈დი.

Line of edition: 4       დიდ ჩოთჯჷრვე. ჩვა̈დბურან ი ჩვადყურდახ. ჰამს დოსდ ჟ'ნჷგან
Line of edition: 5    ნაღვჟურ, ქა̈დბარან, ვად უშკთე ლა̈ჲდე ი ესვა̈დ ხოჩა ქორ ი
Line of edition: 6    ლარდოლ. ეჯგვა̈რ ესჷგანხ მიჩა ნავად ა̈დგიჟი ქორ ი ლარდოლ,
Line of edition: 7    ერე ნახუნსერ წეს დე ლასვ. მერმა ჰამს ესვა̈დ ი -- მაჩენ ესერ
Line of edition: 8    ზურალ იმგვ' არდეს, ეჯი ესეროღვ ლახჴედა ლეჲხურიდ. -- ლა̈ჲსგიდივ
Line of edition: 9    ქა ი ეჯგვა̈რ ლჷგან მიჩა სგებინჩუ სიმაქ, ერე მჷჟ ი დოშდულს
Line of edition: 10    ხეტაკალ. მესმა ჰამს ესვა̈დ ხოჩა ლეზებ-ლეთრე ი სტოლტაბგიშ
Line of edition: 11    მოწყობილობ ჩი ლაღდიშდ. ეჯგვა̈რ ესჷგან ამჲა̈რე ლარდაჲსგა
Line of edition: 12    სტოლ-ტაბა̈გ ი ლეზებ-ლეთრე, ერე კესარშერ ღოშგიმხენ
Line of edition: 13    ლა̈ჲსგიდნე.

Line of edition: 14       ჩვა̈რიხ ამჟი ალჲა̈რ ი ალ ზურალდ ლა̈ჲსკორე: იმხენ ესერ ხეკვეს
Line of edition: 15    ოხღვანდეს ამ მიჩა ჭაშვ ამზუ ქონება უჭირ-უმშავდ? ჟ'ოხნაზვე'
Line of edition: 16    ერე ა̈მის ვადა̈შ ლედე ხუღვანდა ი ლეთშვ უშკთე იდასგვ.

Line of edition: 17       აშხვ ლეთ ჭაშვ ჩვა̈თუჟდა, ეჩქას ნეფხვნა ლექვა ლჷყა̈ლ თუთინ
Line of edition: 18    ესპუსნე ი ამნემ ეჯგვა̈რ ესჩეჩხვნე, ერე ვად ლარდა̈შ ეჩხე კუთხისგა
Line of edition: 19    გარ ხოვახ. ჟ'ესფხეჭ ა̈მის ამ ზურალდ, ქა̈დბარან, უშკთ'
Line of edition: 20    ა̈დდე ი ესვა̈დ: -- იმხვახენ ესერ ომჴედ, ეჩეჩუოღვ ესგენე. -- ალ
Line of edition: 21    ზურალ ტკისდ მიჩა სა̈ხელწიფვ ესჷგან ი ამ ვადშვ ლა̈იდ სურუ
Line of edition: 22    ხოჩა ლირდ' ა̈ნსყე.

Line of edition: 23       ა̈ხეჲცხჷნ მერმა ლადეღ ამ ნაღვჟურს ი დეჲ ვად წვანდა ი დეჲ
Line of edition: 24    მიჩა ხეხვ. მასა̈რდ ა̈ნწუხვავან ი ხჷრშ ქჷმრა̈რ ოხშჷდ. ა̈მის ფეკვნილ
Line of edition: 25    ი ციცულდ ხეწადხ ი ხა̈ქვეხ: -- მ' ესერ ლახკვეჰა ამგვა̈რ
Line of edition: 26    ლესდიკ?

Line of edition: 27       -- იმჟი ესერ მა̈? მიჩა ხახვ ვად ოთხვაჲა ი ჯი ში ჰა̈რიდ
Line of edition: 28    ოსცვირა.

Line of edition: 29       -- ჰა, ეჯღა ნომ' ამფეშე, ეჯის ნა̈ ისგა ხვიტხედ.

Line of edition: 30       ა̈ნმარანხ ჟი ა̈ლჲა̈რ ი ესხრიხ, ესხრიხ. ზუღვაქა ფეკვნა ციცვდ
Line of edition: 31    ა̈ნფეთინე ი მერმათე აშგარ წვისდ ახკიდვნე. ამეჩუ ფეკვნას ხა̈ქვე:
Line of edition: 32    "სი ჩვემღელ მიშგვა ლიჴდა̈ლდ ი მი ლებოზ ჯიჴდე, ხვიბდა̈ღო!"
Line of edition: 33    აჩად ციცულდ ი ამ ზურალა̈შ ლარდათეჲსგ' აჩად. ამეჩუ
Line of edition: 34    ქეიფ ხარ ლა̈დი ამ ზურალს. ქვეყნიშ სიმაქ ი ღვაჟმარე მა̈გ ჟი
Line of edition: 35    ლგნყორე სგა ხასგურხ ქა მეფხჟე, ხოჩერებოშ ჟი გვეში სტოლ-ტაბა̈გს.
Line of edition: 36    ციცულდ ტაბა̈გ ჩუქაქა იხვრელივ ლებოზ ი ჯჲა̈ჲ ჩვა̈დბიზან
Line of edition: 37    ი მიჩა ხვიბი ფეკვნასი მასა̈რდ ოთჴიდ.

Page of edition: 279 
Line of edition: 1       ისგლეთიშ ვანაქა მექეიფა ჩვადვყურდახ, სტოლ-ტაბა̈გ ი ლეზებლეთრე
Line of edition: 2    შდუგვა̈რს ი მინე ნა̈თი-ნა̈თსავას ესსადხ. ოხღალბე ციცულდდ
Line of edition: 3    შდუგვრე მახვშის ი აშხვ ნა̈სკინჟი ჭაჭა̈რ ლექვა ხა̈ბეთქ.
Line of edition: 4    მახვში შდუგვ, რაგა̈დ მა̈ ხაკუ, მასა̈რდ მიჰმა̈ნთეჲსგ' აშყად ი ა̈თჴჷრან
Line of edition: 5    ციცულდს, ერე: -- ნომოღვ ა̈დსერ ი, მ' ესერ ხეცხენი, ეჯის
Line of edition: 6    ესერ ხოსკეთი აშხვ გვაშვ.

Line of edition: 7       ციცვდ ხა̈ქვე: -- მიჩ' ესერ პატრონ ზურალს ეშდჲორი ლჷკილ
Line of edition: 8    კიბდენისგა ვადა̈შ ლედე ხოზ, ეჯის ესერ ემოშ ხოჴდე, ქა ფიშვდე,
Line of edition: 9    მადე ი მიჩ ი მიჩა ნა̈თი-ნა̈თსა̈ვს ბოლეკდ ესერ კიდე, მიჩა ჩა̈გიშ
Line of edition: 10    სევღო.

Line of edition: 11       ა̈ნუნჭურე ამ შდუგვდ მიჩა ნა̈თი-ნა̈თსა̈ვ აშხვ ა̈დგის ი კრებ'
Line of edition: 12    აჩვინ. კრებად ქახქვიც, ერე ეშდჲორი ლჷკილ კიბდენხენქა
Line of edition: 13    ვადა̈შ ლედე ხეკვეს ქანჴჷდეხ. ჲა̈რდ მა̈ რა̈ქვეხ, ჲა̈რდ მა̈. ღოშგიმ
Line of edition: 14    ოხოგანხ ლაჭკვრას ი ლეჰჷრმაშთე სგადჰიეხ ვადთეჲსგა ი ქოხჴიდხ
Line of edition: 15    ციცულდს.

Line of edition: 16       ჟეღილდ ლა̈ხჭედივ: -- ოხჴიდ' ესერ მა̈ჲა?

Line of edition: 17       -- ი' ესერ.

Line of edition: 18       -- ჲაღვე ქა ლამო!

Line of edition: 19       -- სი ხოლა გუმი ხი, ზუღვაქ' ემაგვეშ ა̈ჲრეკნი ეჰე, ჰერს ა̈ხკედ
Line of edition: 20    ი ჩვა̈ჲშყედნი.

Line of edition: 21       მარე ჟეღილდდ ეჯღაჲ მად' ოთჯჷრვე ი ქა ლა̈ხბიშდივ. ციცულდდ
Line of edition: 22    ჟ'ა̈ნფეთინე ი ესხრიხ ზუღვაქა. შუკვს ჟეღილდს კალმახ თხრაკ
Line of edition: 23    პილა̈რქა, ესჰევ ი ლედე აშ ლა̈ჰკიჰან (\ ლა̈ხკიჰან) შია̈რისგა.
Line of edition: 24    ქაჩადხ მერმათე ი ციცულდ ლა̈ხჭედივ: -- ანჴჷ მოშა, ხვიბიჯო,
Line of edition: 25    ლედე?

Line of edition: 26       -- დეშ ღალ, გვიშგე თერაღო. ისგ ზუღვაჲსგა კალმახ მეძგრჷნ
Line of edition: 27    პილა̈რქა ი აშ ლამბაქე შია̈რისგა.

Line of edition: 28       -- ქა მადე ჯექარა? აშ მიხალდა, ხვიბდა̈ღო, ერე ლაგას დეშ
Line of edition: 29    ხა̈გენ ი ათხე ამჟი ჯადეს.

Line of edition: 30       ესსგიდარეხ ალჲა̈რდ ი ზუღვა̈შ ძგიდს მჷკჷლმახას ხეწადხ. აჩად
Line of edition: 31    ციცულდ ი ალჲა̈რს ა̈თჴჷრან, ერე ფოცხოღვ ათყიდხ ეშხუ. მჷკჷლმა̈ხიდ
Line of edition: 32    ჩვათყიდ ეშხუ ფოცხ. ლა̈ჲბინე ლიკჷლმა̈ხი ი ეშხუ კალმახ
Line of edition: 33    შიშდ ლა̈ხჷრმან მიჩა ფოცხ. ლა̈ჲბინე ლიკჷლმა̈ხი ი ეშხუ კალმახ
Line of edition: 34    შიშდ ლა̈ხჷრმან მიჩა ფოცხს. კალმახ ა̈თჴჷრან: -- ჰა, მა̈დილ ჯერი,
Line of edition: 35    ნომ' ა̈მსერი ი იმგვალეშ ა̈ჯმა̈რგი.

Line of edition: 36       -- ჰა, ვადა̈შ ლედ' ა̈ნშყად ნენსგა ზუღვაჩუ ი ეჯის ჟ'ე მითხი,
Line of edition: 37    ქა ჯუფშვდე.

Line of edition: 38       კალმახდ იმედ ხა̈ქვე ი ციცვდი ქაფიშვდ. მოლე გარ ხა̈ნ აჩად
Line of edition: 39    ი მინე ლედე ქა ლოხშიბ ამ კალმახდ ი ხოჩა პა̈ტიოსა̈ნდ შია̈რისგა

Page of edition: 280 
Line of edition: 1       ლახბერვე. ა̈დბუწანხ ქა ი ესხრიხ, ესხრიხ ი სგადჰიეხ მინე ქორთე
Line of edition: 2    ამეჩუ ვად ქა ლახემხ მინე ფუსდს ი მა̈ხჲადშვ ამნემ დეცთეჟი ა̈დიცხ.

Line of edition: 3       მერმა ლადეღ ჟ'ანჷგან ლედემ ფუსდ, ქა̈დბარან, ვად უშკთ'
Line of edition: 4    ა̈დდე ი ა̈მიშ მეღეშგ ზურალ ესვა̈დ. ზურალ გა̈ნხენჩუ ლახაგან.
Line of edition: 5    ესვა̈დ რა̈შ ი ამ რა̈შს ლახსგურე ალ ზურალ, რა̈შს ხა̈ქვე: -- ალელიას
Line of edition: 6    ესეროღვ აჩად ი გალელიას ესეროღვ ანტახ!

Line of edition: 7       ზურალს ხა̈ქვე: -- ღევა̈რ ესერ ემა ლესეს, ჯიჯულდ გარ ესეროღვ
Line of edition: 8    ომტვხვლი, მადეჲ ხოჩამდ ესეროღვ ა̈რი.

Line of edition: 9       რა̈შ აჩად ი ანტახ. ამ ზურალა̈შ ლჷჰნე ჰაგულდა̈რ გარ ა̈ნტიხ.
Line of edition: 10    მერმა ლადეღ ესვა̈დ: -- მაჩენ ესერ წესიერ ზურალ იმგვ' არდეს,
Line of edition: 11    ვჯი ესეროღვ ლაჰოდენა!

Line of edition: 12       ალ ვად ქა ხეჰჯინან ი ხოჩა ლიზგე-ლირდე ა̈დჴიდხ.


Line of edition: 13 
დათა გვარმიანი. კურხვაიში. მ.ქალდანი. 20.VIII.1949



Next part


This text is part of the TITUS edition of Svan Prose Texts II (Lower Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.