TITUS
Rg-Veda: Rg-Veda-Samhita
Part No. 54
Previous part

Hymn: 54 
Verse: 1 
Halfverse: a    मा नो॑ अ॒स्मिन्म॑घवन्पृ॒त्स्वंह॑सि न॒हि ते॒ अन्तः॒ शव॑सः परी॒णशे॑ ।
   मा नो॑ अ॒स्मिन्म॑घवन्पृ॒त्स्वंह॑सि
   मा नः अ॒स्मिन् मघवन् पृ॒त्सु अंह॑सि
   मा नो अ॒स्मिन् मघवन् पृ॒त्सु अंह॑सि

Halfverse: b    न॒हि ते॒ अन्तः॒ शव॑सः परी॒णशे॑ ।
   न॒हि ते अन्तः शव॑सः परी॒णशे ।
   न॒हि ते अन्तः शव॑सः परी॒णशे ।

Halfverse: c    अक्र॑न्दयो न॒द्यो॒ रोरु॑व॒द्वना॑ क॒था न क्षो॒णीर्भि॒यसा॒ समा॑रत ।।
   अक्र॑न्दयो न॒द्यो॒ रोरु॑व॒द्वना
   अक्र॑न्दयः न॒द्यः रोरु॑वत् वना
   अक्र॑न्दयो न॒दियो रोरु॑वद् वना

Halfverse: d    क॒था न क्षो॒णीर्भि॒यसा॒ समा॑रत ।।
   क॒था न क्षो॒णीः भि॒यसा सम् आरत ।।
   क॒था न क्षो॒णीर् भि॒यसा सम् आरत ।।


Verse: 2 
Halfverse: a    अर्चा॑ श॒क्राय॑ शा॒किने॒ शची॑वते शृ॒ण्वन्त॒मिन्द्र॑म्म॒हय॑न्न॒भि ष्टु॑हि ।
   अर्चा॑ श॒क्राय॑ शा॒किने॒ शची॑वते
   अर्च+ श॒क्राय शा॒किने शची॑वते
   अर्चा श॒क्राय शा॒किने शची॑वते

Halfverse: b    शृ॒ण्वन्त॒मिन्द्र॑म्म॒हय॑न्न॒भि ष्टु॑हि ।
   शृ॒ण्वन्त॑म् इन्द्र॑म् म॒हय॑न् अ॒भि स्तु॑हि ।
   शृ॒ण्वन्त॑म् इन्द्र॑म् म॒हय॑न्न् अ॒भि ष्टु॑हि ।

Halfverse: c    यो धृ॒ष्णुना॒ शव॑सा॒ रोद॑सी उ॒भे वृषा॑ वृष॒त्वा वृ॑ष॒भो न्यृ॒ञ्जते॑ ।।
   यो धृ॒ष्णुना॒ शव॑सा॒ रोद॑सी उ॒भे
   यः धृ॒ष्णुना शव॑सा रोद॑सी उ॒भे
   यो धृ॒ष्णुना शव॑सा रोद॑सी उ॒भे

Halfverse: d    वृषा॑ वृष॒त्वा वृ॑ष॒भो न्यृ॒ञ्जते॑ ।।
   वृषा वृष॒त्वा वृ॑ष॒भः न्यृ॒ञ्जते ।।
   वृषा वृष॒त्वा वृ॑ष॒भो निऋ॒ञ्जते ।।


Verse: 3 
Halfverse: a    अर्चा॑ दि॒वे बृ॑ह॒ते शू॒ष्यं॒ वचः॒ स्वक्ष॑त्रं॒ यस्य॑ धृष॒तो धृ॒षन्मनः॑ ।
   अर्चा॑ दि॒वे बृ॑ह॒ते शू॒ष्यं॒ वचः
   अर्च+ दि॒वे बृ॑ह॒ते शू॒ष्य॑म् वचः
   अर्चा दि॒वे बृ॑ह॒ते शू॒षियं वचः

Halfverse: b    स्वक्ष॑त्रं॒ यस्य॑ धृष॒तो धृ॒षन्मनः॑ ।
   स्वक्ष॑त्रम् यस्य धृष॒तः धृ॒षत् मनः ।
   स्वक्ष॑त्रं यस्य धृष॒तो धृ॒षन् मनः ।

Halfverse: c    बृ॒हच्छ्र॑वा॒ असु॑रो ब॒र्हणा॑ कृ॒तः पु॒रो हरि॑भ्यां वृष॒भो रथो॒ हि षः ।।
   बृ॒हच्छ्र॑वा॒ असु॑रो ब॒र्हणा॑ कृ॒तः
   बृ॒हच्छ्र॑वाः असु॑रः ब॒र्हणा कृ॒तः
   बृ॒हच्छ्र॑वा असु॑रो ब॒र्हणा कृ॒तः

Halfverse: d    पु॒रो हरि॑भ्यां वृष॒भो रथो॒ हि षः ।।
   पु॒रः हरि॑भ्याम् वृष॒भः रथः हि सः ।।
   पु॒रो हरि॑भ्यां वृष॒भो रथो हि षः ।।


Verse: 4 
Halfverse: a    त्वं दि॒वो बृ॑ह॒तः सानु॑ कोप॒यो ऽव॒ त्मना॑ धृष॒ता शम्ब॑रम्भिनत् ।
   त्वं दि॒वो बृ॑ह॒तः सानु॑ कोप॒यो
   त्वम् दि॒वः बृ॑ह॒तः सानु कोपयः
   तु॒वं दि॒वो बृ॑ह॒तः सानु कोपयो

Halfverse: b    ऽव॒ त्मना॑ धृष॒ता शम्ब॑रम्भिनत् ।
   अव त्मना धृष॒ता शम्ब॑रम् भिनत् ।
   अव त्मना धृष॒ता शम्ब॑रम् भिनत् ।

Halfverse: c    यन्मा॒यिनो॑ व्र॒न्दिनो॑ म॒न्दिना॑ धृ॒षच्छि॒तां गभ॑स्तिम॒शनि॑म्पृत॒न्यसि॑ ।।
   यन्मा॒यिनो॑ व्र॒न्दिनो॑ म॒न्दिना॑ धृ॒षच्
   यत् मा॒यिनः व्र॒न्दिनः म॒न्दिना धृ॒षत्
   यन् मा॒यिनो व्र॒न्दिनो म॒न्दिना धृ॒षच्

Halfverse: d    छि॒तां गभ॑स्तिम॒शनि॑म्पृत॒न्यसि॑ ।।
   शि॒ताम् गभ॑स्तिम् अ॒शनि॑म् पृत॒न्यसि ।।
   छि॒तां गभ॑स्तिम् अ॒शनि॑म् पृत॒न्यसि ।।


Verse: 5 
Halfverse: a    नि यद्वृ॒णक्षि॑ श्वस॒नस्य॑ मू॒र्धनि॒ शुष्ण॑स्य चिद्व्र॒न्दिनो॒ रोरु॑व॒द्वना॑ ।
   नि यद्वृ॒णक्षि॑ श्वस॒नस्य॑ मू॒र्धनि
   नि यत् वृ॒णक्षि श्वस॒नस्य मू॒र्धनि
   नि यद् वृ॒णक्षि श्वस॒नस्य मू॒र्धनि

Halfverse: b    शुष्ण॑स्य चिद्व्र॒न्दिनो॒ रोरु॑व॒द्वना॑ ।
   शुष्ण॑स्य चित् व्र॒न्दिनः रोरु॑वत् वना ।
   शुष्ण॑स्य चिद् व्र॒न्दिनो रोरु॑वद् वना ।

Halfverse: c    प्रा॒चीने॑न॒ मन॑सा ब॒र्हणा॑वता॒ यद॒द्या चि॑त्कृ॒णवः॒ कस्त्वा॒ परि॑ ।।
   प्रा॒चीने॑न॒ मन॑सा ब॒र्हणा॑वता
   प्रा॒चीने॑न मन॑सा ब॒र्हणा॑वता
   प्रा॒चीने॑न मन॑सा ब॒र्हणा॑वता

Halfverse: d    यद॒द्या चि॑त्कृ॒णवः॒ कस्त्वा॒ परि॑ ।।
   यत् अ॒द्य+ चि॑त् कृ॒णवः कः त्वा परि ।।
   यद् अ॒द्या चि॑त् कृ॒णवः कस् तुवा परि ।।


Verse: 6 
Halfverse: a    त्वमा॑विथ॒ नर्यं॑ तु॒र्वशं॒ यदुं॒ त्वं तु॒र्वीतिं॑ व॒य्यं॑ शतक्रतो ।
   त्वमा॑विथ॒ नर्यं॑ तु॒र्वशं॒ यदुं
   त्वम् आविथ नर्य॑म् तु॒र्वश॑म् यदु॑म्
   त्वम् आविथ नरि॑यं तु॒र्वशं यदुं

Halfverse: b    त्वं तु॒र्वीतिं॑ व॒य्यं॑ शतक्रतो ।
   त्वम् तु॒र्वीति॑म् व॒य्य॑म् शतक्रतो ।
   तु॒वं तु॒र्वीतिं व॒यियं शतक्रतो ।

Halfverse: c    त्वं रथ॒मेत॑शं॒ कृत्व्ये॒ धने॒ त्वम्पुरो॑ नव॒तिं द॑म्भयो॒ नव॑ ।।
   त्वं रथ॒मेत॑शं॒ कृत्व्ये॒ धने
   त्वम् रथ॑म् एत॑शम् कृत्व्ये धने
   तु॒वं रथ॑म् एत॑शं कृत्वि॑ये धने

Halfverse: d    त्वम्पुरो॑ नव॒तिं द॑म्भयो॒ नव॑ ।।
   त्वम् पुरः नव॒तिम् दम्भयः नव ।।
   तु॒वम् पुरो नव॒तिं द॑म्भयो नव ।।


Verse: 7 
Halfverse: a    स घा॒ राजा॒ सत्प॑तिः शूशुव॒ज्जनो॑ रा॒तह॑व्यः॒ प्रति॒ यः शास॒मिन्व॑ति ।
   स घा॒ राजा॒ सत्प॑तिः शूशुव॒ज्जनो
   स घ+ राजा सत्प॑तिः शूशुवत् जनः
   स घा राजा सत्प॑तिः शूशुवज् जनो

Halfverse: b    रा॒तह॑व्यः॒ प्रति॒ यः शास॒मिन्व॑ति ।
   रा॒तह॑व्यः प्रति यः शास॑म् इन्व॑ति ।
   रा॒तह॑व्यः प्रति यः शास॑म् इन्व॑ति ।

Halfverse: c    उ॒क्था वा॒ यो अ॑भिगृ॒णाति॒ राध॑सा॒ दानु॑रस्मा॒ उप॑रा पिन्वते दि॒वः ।।
   उ॒क्था वा॒ यो अ॑भिगृ॒णाति॒ राध॑सा
   उ॒क्था वा यः अ॑भिगृ॒णाति राध॑सा
   उ॒क्था वा यो अ॑भिगृ॒णाति राध॑सा

Halfverse: d    दानु॑रस्मा॒ उप॑रा पिन्वते दि॒वः ।।
   दानुः अस्मै उप॑रा पिन्वते दि॒वः ।।
   दानु॑र् अस्मा उप॑रा पिन्वते दि॒वः ।।


Verse: 8 
Halfverse: a    अस॑मं क्ष॒त्रमस॑मा मनी॒षा प्र सो॑म॒पा अप॑सा सन्तु॒ नेमे॑ ।
   अस॑मं क्ष॒त्रमस॑मा मनी॒षा
   अस॑मम् क्ष॒त्रम् अस॑मा मनी॒षा
   अस॑मं क्ष॒त्रम् अस॑मा मनी॒षा

Halfverse: b    प्र सो॑म॒पा अप॑सा सन्तु॒ नेमे॑ ।
   प्र सो॑म॒पाः अप॑सा सन्तु नेमे ।
   प्र सो॑म॒पा अप॑सा सन्तु नेमे ।

Halfverse: c    ये त॑ इन्द्र द॒दुषो॑ व॒र्धय॑न्ति॒ महि॑ क्ष॒त्रं स्थवि॑रं॒ वृष्ण्यं॑ च ।।
   ये त॑ इन्द्र द॒दुषो॑ व॒र्धय॑न्ति
   ये ते इन्द्र द॒दुषः व॒र्धय॑न्ति
   ये त इन्द्र द॒दुषो व॒र्धय॑न्ति

Halfverse: d    महि॑ क्ष॒त्रं स्थवि॑रं॒ वृष्ण्यं॑ च ।।
   महि क्ष॒त्रम् स्थवि॑रम् वृष्ण्य॑म् च ।।
   महि क्ष॒त्रं स्थवि॑रं वृष्णि॑यं च ।।


Verse: 9 
Halfverse: a    तुभ्येदे॒ते ब॑हु॒ला अद्रि॑दुग्धाश्चमू॒षद॑श्चम॒सा इ॑न्द्र॒पानाः॑ ।
   तुभ्येदे॒ते ब॑हु॒ला अद्रि॑दुग्धाश्
   तुभ्य इत् ए॒ते ब॑हु॒लाः अद्रि॑दुग्धाः
   तुभ्येद् ए॒ते ब॑हु॒ला अद्रि॑दुग्धाश्

Halfverse: b    चमू॒षद॑श्चम॒सा इ॑न्द्र॒पानाः॑ ।
   च॑मू॒षदः चम॒साः इ॑न्द्र॒पानाः ।
   च॑मू॒षद॑श् चम॒सा इ॑न्द्र॒पानाः ।

Halfverse: c    व्य॑श्नुहि त॒र्पया॒ काम॑मेषा॒मथा॒ मनो॑ वसु॒देया॑य कृष्व ।।
   व्य॑श्नुहि त॒र्पया॒ काम॑मेषाम्
   वि अ॑श्नुहि त॒र्पय+ काम॑म् एषाम्
   वि अ॑श्नुहि त॒र्पया काम॑म् एषाम्

Halfverse: d    अथा॒ मनो॑ वसु॒देया॑य कृष्व ।।
   अथ+ मनः वसु॒देया॑य कृष्व ।।
   अथा मनो वसु॒देया॑य कृष्व ।।


Verse: 10 
Halfverse: a    अ॒पाम॑तिष्ठद्ध॒रुण॑ह्वरं॒ तमो॒ ऽन्तर्वृ॒त्रस्य॑ ज॒ठरे॑षु॒ पर्व॑तः ।
   अ॒पाम॑तिष्ठद्ध॒रुण॑ह्वरं॒ तमो
   अ॒पाम् अतिष्ठत् ध॒रुण॑ह्वरम् तमः
   अ॒पाम् अतिष्ठद् ध॒रुण॑ह्वरं तमो

Halfverse: b    ऽन्तर्वृ॒त्रस्य॑ ज॒ठरे॑षु॒ पर्व॑तः ।
   अ॒न्तर् वृ॒त्रस्य ज॒ठरे॑षु पर्व॑तः ।
   अ॒न्तर् वृ॒त्रस्य ज॒ठरे॑षु पर्व॑तः ।

Halfverse: c    अ॒भीमिन्द्रो॑ न॒द्यो॑ व॒व्रिणा॑ हि॒ता विश्वा॑ अनु॒ष्ठाः प्र॑व॒णेषु॑ जिघ्नते ।।
   अ॒भीमिन्द्रो॑ न॒द्यो॑ व॒व्रिणा॑ हि॒ता
   अ॒भि ई॑म् इन्द्रः न॒द्यः व॒व्रिणा हि॒ताः
   अ॒भीम् इन्द्रो न॒दियो व॒व्रिणा हि॒ता

Halfverse: d    विश्वा॑ अनु॒ष्ठाः प्र॑व॒णेषु॑ जिघ्नते ।।
   विश्वाः अनु॒ष्ठाः प्र॑व॒णेषु जिघ्नते ।।
   विश्वा अनु॒ष्ठाः प्र॑व॒णेषु जिघ्नते ।।


Verse: 11 
Halfverse: a    स शेवृ॑ध॒मधि॑ धा द्यु॒म्नम॒स्मे महि॑ क्ष॒त्रं ज॑ना॒षाळि॑न्द्र॒ तव्य॑म् ।
   स शेवृ॑ध॒मधि॑ धा द्यु॒म्नम॒स्मे
   स शेवृ॑धम् अधि धाः द्यु॒म्नम् अ॒स्मे
   स शेवृ॑धम् अधि धा द्यु॒म्नम् अ॒स्मे

Halfverse: b    महि॑ क्ष॒त्रं ज॑ना॒षाळि॑न्द्र॒ तव्य॑म् ।
   महि क्ष॒त्रम् जना॒षाट् इन्द्र तव्य॑म् ।
   महि क्ष॒त्रं ज॑ना॒षाळ् इन्द्र तव्य॑म् ।

Halfverse: c    रक्षा॑ च नो म॒घोनः॑ पा॒हि सू॒रीन्रा॒ये च॑ नः स्वप॒त्या इ॒षे धाः॑ ।।
   रक्षा॑ च नो म॒घोनः॑ पा॒हि सू॒रीन्
   रक्ष+ च नः म॒घोनः पा॒हि सू॒रीन्
   रक्षा च नो म॒घोनः पा॒हि सू॒रीन्

Halfverse: d    रा॒ये च॑ नः स्वप॒त्या इ॒षे धाः॑ ।।
   रा॒ये च नः स्वप॒त्यै इ॒षे धाः ।।
   रा॒ये च नः सुअप॒त्या इ॒षे धाः ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.