TITUS
Rg-Veda: Rg-Veda-Samhita
Part No. 58
Previous part

Hymn: 58 
Verse: 1 
Halfverse: a    नू चि॑त्सहो॒जा अ॒मृतो॒ नि तु॑न्दते॒ होता॒ यद्दू॒तो अभ॑वद्वि॒वस्व॑तः ।
   नू चि॑त्सहो॒जा अ॒मृतो॒ नि तु॑न्दते
   नु+ चि॑त् सहो॒जाः अ॒मृतः नि तु॑न्दते
   नू चि॑त् सहो॒जा अ॒मृतो नि तु॑न्दते

Halfverse: b    होता॒ यद्दू॒तो अभ॑वद्वि॒वस्व॑तः ।
   होता यत् दू॒तः अभ॑वत् वि॒वस्व॑तः ।
   होता यद् दू॒तो अभ॑वद् वि॒वस्व॑तः ।

Halfverse: c    वि साधि॑ष्ठेभिः प॒थिभी॒ रजो॑ मम॒ आ दे॒वता॑ता ह॒विषा॑ विवासति ।।
   वि साधि॑ष्ठेभिः प॒थिभी॒ रजो॑ मम
   वि साधि॑ष्ठेभिः प॒थिभिः रजः ममे
   वि साधि॑ष्ठेभिः प॒थिभी रजो मम

Halfverse: d    आ दे॒वता॑ता ह॒विषा॑ विवासति ।।
   आ दे॒वता॑ता ह॒विषा विवासति ।।
   आ दे॒वता॑ता ह॒विषा विवासति ।।


Verse: 2 
Halfverse: a    आ स्वमद्म॑ यु॒वमा॑ नोअ॒जर॑स्तृ॒ष्व॑वि॒ष्यन्न॑त॒सेषु॑ तिष्ठति ।
   आ स्वमद्म॑ यु॒वमा॑नो अ॒जर॑स्
   आ स्वम् अद्म यु॒वमा॑नः अ॒जरः
   आ सु॒वम् अद्म यु॒वमा॑नो अ॒जर॑स्

Halfverse: b    तृ॒ष्व॑वि॒ष्यन्न॑त॒सेषु॑ तिष्ठति ।
   तृ॒षु अ॑वि॒ष्यन् अत॒सेषु तिष्ठति ।
   तृ॒षु अ॑वि॒ष्यन्न् अत॒सेषु तिष्ठति ।

Halfverse: c    अत्यो॒ न पृ॒ष्ठम्प्रु॑षि॒तस्य॑ रोचते दि॒वो न सानु॑ स्त॒नय॑न्नचिक्रदत् ।।
   अत्यो॒ न पृ॒ष्ठम्प्रु॑षि॒तस्य॑ रोचते
   अत्यः न पृ॒ष्ठम् प्रुषि॒तस्य रोचते
   अत्यो न पृ॒ष्ठम् प्रुषि॒तस्य रोचते

Halfverse: d    दि॒वो न सानु॑ स्त॒नय॑न्नचिक्रदत् ।।
   दि॒वः न सानु स्त॒नय॑न् अचिक्रदत् ।।
   दि॒वो न सानु स्त॒नय॑न्न् अचिक्रदत् ।।


Verse: 3 
Halfverse: a    क्रा॒णा रु॒द्रेभि॒र्वसु॑भिः पु॒रोहि॑तो॒ होता॒ निष॑त्तो रयि॒षाळम॑र्त्यः ।
   क्रा॒णा रु॒द्रेभि॒र्वसु॑भिः पु॒रोहि॑तो
   क्रा॒णा रु॒द्रेभिः वसु॑भिः पु॒रोहि॑तः
   क्रा॒णा रु॒द्रेभि॑र् वसु॑भिः पु॒रोहि॑तो

Halfverse: b    होता॒ निष॑त्तो रयि॒षाळम॑र्त्यः ।
   होता निष॑त्तः रयि॒षाट् अम॑र्त्यः ।
   होता निष॑त्तो रयि॒षाळ् अम॑र्तियः ।

Halfverse: c    रथो॒ न वि॒क्ष्वृ॑ञ्जसा॒न आ॒युषु॒ व्या॑नु॒षग्वार्या॑ दे॒व ऋ॑ण्वति ।।
   रथो॒ न वि॒क्ष्वृ॑ञ्जसा॒न आ॒युषु
   रथः न वि॒क्षु ऋ॑ञ्जसा॒नः आ॒युषु
   रथो न वि॒क्षु ऋ॑ञ्जसा॒न आ॒युषु

Halfverse: d    व्या॑नु॒षग्वार्या॑ दे॒व ऋ॑ण्वति ।।
   वि आ॑नु॒षक् वार्या दे॒वः ऋ॑ण्वति ।।
   वि आ॑नु॒षग् वारि॑या दे॒व ऋ॑ण्वति ।।


Verse: 4 
Halfverse: a    वि वात॑जूतो अत॒सेषु॑ तिष्ठते॒ वृथा॑ जु॒हूभिः॒ सृण्या॑ तुवि॒ष्वणिः॑ ।
   वि वात॑जूतो अत॒सेषु॑ तिष्ठते
   वि वात॑जूतः अत॒सेषु तिष्ठते
   वि वात॑जूतो अत॒सेषु तिष्ठते

Halfverse: b    वृथा॑ जु॒हूभिः॒ सृण्या॑ तुवि॒ष्वणिः॑ ।
   वृथा जु॒हूभिः सृण्या तुवि॒ष्वणिः ।
   वृथा जु॒हूभिः सृणि॑या तुवि॒ष्वणिः ।

Halfverse: c    तृ॒षु यद॑ग्ने व॒निनो॑ वृषा॒यसे॑ कृ॒ष्णं त॒ एम॒ रुश॑दूर्मे अजर ।।
   तृ॒षु यद॑ग्ने व॒निनो॑ वृषा॒यसे
   तृ॒षु यत् अग्ने व॒निनः वृषा॒यसे
   तृ॒षु यद् अग्ने व॒निनो वृषा॒यसे

Halfverse: d    कृ॒ष्णं त॒ एम॒ रुश॑दूर्मे अजर ।।
   कृ॒ष्णम् ते एम रुश॑दूर्मे अजर ।।
   कृ॒ष्णं त एम रुश॑दूर्मे अजर ।।


Verse: 5 
Halfverse: a    तपु॑र्जम्भो॒ वन॒ आ वात॑चोदितो यू॒थे न सा॒ह्वाँ अव॑ वाति॒ वंस॑गः ।
   तपु॑र्जम्भो॒ वन॒ आ वात॑चोदितो
   तपु॑र्जम्भः वने आ वात॑चोदितः
   तपु॑र्जम्भो वन आ वात॑चोदितो

Halfverse: b    यू॒थे न सा॒ह्वाँ अव॑ वाति॒ वंस॑गः ।
   यू॒थे न सा॒ह्वान् अव वाति वंस॑गः ।
   यू॒थे न सा॒ह्वाँ अव वाति वंस॑गः ।

Halfverse: c    अ॑भि॒व्रज॒न्नक्षि॑त॒म्पाज॑सा॒ रज॑ स्था॒तुश्च॒रथ॑म्भयते पत॒त्रिणः॑ ।।
   अ॑भि॒व्रज॒न्नक्षि॑त॒म्पाज॑सा॒ रज
   अभि॒व्रज॑न् अक्षि॑तम् पाज॑सा रजः
   अभि॒व्रज॑न्न् अक्षि॑तम् पाज॑सा रज

Halfverse: d    स्था॒तुश्च॒रथ॑म्भयते पत॒त्रिणः॑ ।।
   स्था॒तुः च॒रथ॑म् भयते पत॒त्रिणः ।।
   स्था॒तुश् च॒रथ॑म् भयते पत॒त्रिणः ।।


Verse: 6 
Halfverse: a    द॒धुष्ट्वा॒ भृग॑वो॒ मानु॑षे॒ष्वा र॒यिं न चारुं॑ सु॒हवं॒ जने॑भ्यः ।
   द॒धुष्ट्वा॒ भृग॑वो॒ मानु॑षे॒ष्वा
   द॒धुः त्वा भृग॑वः मानु॑षेषु आ
   द॒धुष् ट्वा . भृग॑वो मानु॑षेष्व् आ

Halfverse: b    र॒यिं न चारुं॑ सु॒हवं॒ जने॑भ्यः ।
   र॒यिम् न चारु॑म् सु॒हव॑म् जने॑भ्यः ।
   र॒यिं न चारुं सु॒हवं जने॑भ्यः ।

Halfverse: c    होता॑रमग्ने॒ अति॑थिं॒ वरे॑ण्यम्मि॒त्रं न शेवं॑ दि॒व्याय॒ जन्म॑ने ।।
   होता॑रमग्ने॒ अति॑थिं॒ वरे॑ण्यम्
   होता॑रम् अग्ने अति॑थिम् वरे॑ण्यम्
   होता॑रम् अग्ने अति॑थिं वरे॑ण्यम्

Halfverse: d    मि॒त्रं न शेवं॑ दि॒व्याय॒ जन्म॑ने ।।
   मि॒त्रम् न शेव॑म् दि॒व्याय जन्म॑ने ।।
   मि॒त्रं न शेवं दिवि॒याय जन्म॑ने ।।


Verse: 7 
Halfverse: a    होता॑रं स॒प्त जु॒ह्वो॒ यजि॑ष्ठं॒ यं वा॒घतो॑ वृ॒णते॑ अध्व॒रेषु॑ ।
   होता॑रं स॒प्त जु॒ह्वो॒ यजि॑ष्ठं
   होता॑रम् स॒प्त जु॒ह्वः यजि॑ष्ठम्
   होता॑रं स॒प्त जु॒हुवो यजि॑ष्ठं

Halfverse: b    यं वा॒घतो॑ वृ॒णते॑ अध्व॒रेषु॑ ।
   यम् वा॒घतः वृ॒णते अध्व॒रेषु ।
   यं वा॒घतो वृ॒णते अध्व॒रेषु ।

Halfverse: c    अ॒ग्निं विश्वे॑षामर॒तिं वसू॑नां सप॒र्यामि॒ प्रय॑सा॒ यामि॒ रत्न॑म् ।।
   अ॒ग्निं विश्वे॑षामर॒तिं वसू॑नां
   अ॒ग्निम् विश्वे॑षाम् अर॒तिम् वसू॑नाम्
   अ॒ग्निं विश्वे॑षाम् अर॒तिं वसू॑नां

Halfverse: d    सप॒र्यामि॒ प्रय॑सा॒ यामि॒ रत्न॑म् ।।
   स॑प॒र्यामि प्रय॑सा यामि रत्न॑म् ।।
   स॑प॒र्यामि प्रय॑सा यामि रत्न॑म् ।।


Verse: 8 
Halfverse: a    अछि॑द्रा सूनो सहसो नो अ॒द्य स्तो॒तृभ्यो॑ मित्रमहः॒ शर्म॑ यछ ।
   अछि॑द्रा सूनो सहसो नो अ॒द्य
   अछि॑द्रा सूनो सहसः नः अ॒द्य
   अछि॑द्रा सूनो सहसो नो अ॒द्य

Halfverse: b    स्तो॒तृभ्यो॑ मित्रमहः॒ शर्म॑ यछ ।
   स्तो॒तृभ्यः मित्रमहः शर्म यछ ।
   स्तो॒तृभ्यो मित्रमहः शर्म यछ ।

Halfverse: c    अग्ने॑ गृ॒णन्त॒मंह॑स उरु॒ष्योर्जो॑ नपात्पू॒र्भिराय॑सीभिः ।।
   अग्ने॑ गृ॒णन्त॒मंह॑स उरुष्य
   अग्ने गृ॒णन्त॑म् अंह॑सः उरुष्य
   अग्ने गृ॒णन्त॑म् अंह॑स उरुष्य

Halfverse: d     ऊर्जो॑ नपात्पू॒र्भिराय॑सीभिः ।।
   ऊर्जः नपात् पू॒र्भिः आय॑सीभिः ।।
   ऊर्जो नपात् . पू॒र्भिर् आय॑सीभिः ।।


Verse: 9 
Halfverse: a    भवा॒ वरू॑थं गृण॒ते वि॑भावो॒ भवा॑ मघवन्म॒घव॑द्भ्यः॒ शर्म॑ ।
   भवा॒ वरू॑थं गृण॒ते वि॑भावो
   भव+ वरू॑थम् गृण॒ते वि॑भावः
   भवा वरू॑थं गृण॒ते वि॑भावो

Halfverse: b    भवा॑ मघवन्म॒घव॑द्भ्यः॒ शर्म॑ ।
   भव+ मघवन् म॒घव॑द्भ्यः शर्म ।
   भवा मघवन् म॒घव॑द्भ्यः शर्म ।

Halfverse: c    उ॑रु॒ष्याग्ने॒ अंह॑सो गृ॒णन्त॑म्प्रा॒तर्म॒क्षू धि॒याव॑सुर्जगम्यात् ।।
   उ॑रु॒ष्याग्ने॒ अंह॑सो गृ॒णन्त॑म्
   उरु॒ष्य अ॑ग्ने अंह॑सः गृ॒णन्त॑म्
   उरु॒ष्य अ॑ग्ने अंह॑सो गृ॒णन्त॑म्

Halfverse: d    प्रा॒तर्म॒क्षू धि॒याव॑सुर्जगम्यात् ।।
   प्रा॒तर् म॒क्षु+ धि॒याव॑सुः जगम्यात् ।।
   प्रा॒तर् म॒क्षू धि॒याव॑सुर् जगम्यात् ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.