TITUS
Rg-Veda: Rg-Veda-Samhita
Part No. 62
Previous part

Hymn: 62 
Verse: 1 
Halfverse: a    प्र म॑न्महे शवसा॒नाय॑ शू॒षमा॑ङ्गू॒षं गिर्व॑णसे अङ्गिर॒स्वत् ।
   प्र म॑न्महे शवसा॒नाय॑ शू॒षम्
   प्र म॑न्महे शवसा॒नाय शू॒षम्
   प्र म॑न्महे शवसा॒नाय शू॒षम्

Halfverse: b    आङ्गू॒षं गिर्व॑णसे अङ्गिर॒स्वत् ।
   आ॑ङ्गू॒षम् गिर्व॑णसे अङ्गिर॒स्वत् ।
   आ॑ङ्गू॒षं गिर्व॑णसे अङ्गिर॒स्वत् ।

Halfverse: c    सु॑वृ॒क्तिभि॑ स्तुव॒त ऋ॑ग्मि॒यायार्चा॑मा॒र्कं नरे॒ विश्रु॑ताय ।।
   सु॑वृ॒क्तिभि॑ स्तुव॒त ऋ॑ग्मि॒याय
   सुवृ॒क्तिभिः स्तुव॒ते ऋ॑ग्मि॒याय
   सुवृ॒क्तिभि स्तुव॒त ऋ॑ग्मि॒याय

Halfverse: d     अर्चा॑मा॒र्कं नरे॒ विश्रु॑ताय ।।
   अर्चा॑म अ॒र्कम् नरे विश्रु॑ताय ।।
   अर्चा॑म अ॒र्कं नरे विश्रु॑ताय ।।


Verse: 2 
Halfverse: a    प्र वो॑ म॒हे महि॒ नमो॑ भरध्वमाङ्गू॒ष्यं॑ शवसा॒नाय॒ साम॑ ।
   प्र वो॑ म॒हे महि॒ नमो॑ भरध्वम्
   प्र वः म॒हे महि नमः भरध्वम्
   प्र वो म॒हे महि नमो भरध्वम्

Halfverse: b    आङ्गू॒ष्यं॑ शवसा॒नाय॒ साम॑ ।
   आ॑ङ्गू॒ष्य॑म् शवसा॒नाय साम ।
   आ॑ङ्गू॒षियं शवसा॒नाय साम ।

Halfverse: c    येना॑ नः॒ पूर्वे॑ पि॒तरः॑ पद॒ज्ञा अर्च॑न्तो॒ अङ्गि॑रसो॒ गा अवि॑न्दन् ।।
   येना॑ नः॒ पूर्वे॑ पि॒तरः॑ पद॒ज्ञा
   येन+ नः पूर्वे पि॒तरः पद॒ज्ञाः
   येना नः पूर्वे पि॒तरः पद॒ज्ञा

Halfverse: d    अर्च॑न्तो॒ अङ्गि॑रसो॒ गा अवि॑न्दन् ।।
   अर्च॑न्तः अङ्गि॑रसः गाः अवि॑न्दन् ।।
   अर्च॑न्तो अङ्गि॑रसो गा अवि॑न्दन् ।।


Verse: 3 
Halfverse: a    इन्द्र॒स्याङ्गि॑रसां चे॒ष्टौ वि॒दत्स॒रमा॒ तन॑याय धा॒सिम् ।
   इन्द्र॒स्याङ्गि॑रसां चे॒ष्टौ
   इन्द्र॑स्य अङ्गि॑रसाम् च इ॒ष्टौ
   इन्द्र॑स्य . अङ्गि॑रसां च इ॒ष्टौ

Halfverse: b    वि॒दत्स॒रमा॒ तन॑याय धा॒सिम् ।
   वि॒दत् स॒रमा तन॑याय धा॒सिम् ।
   वि॒दत् स॒रमा तन॑याय धा॒सिम् ।

Halfverse: c    बृह॒स्पति॑र्भि॒नदद्रिं॑ वि॒दद्गाः समु॒स्रिया॑भिर्वावशन्त॒ नरः॑ ।।
   बृह॒स्पति॑र्भि॒नदद्रिं॑ वि॒दद्गाः
   बृह॒स्पतिः भि॒नत् अद्रि॑म् वि॒दत् गाः
   बृह॒स्पति॑र् भि॒नद् अद्रिं वि॒दद् गाः

Halfverse: d    समु॒स्रिया॑भिर्वावशन्त॒ नरः॑ ।।
   सम् उ॒स्रिया॑भिः वावशन्त नरः ।।
   सम् उ॒स्रिया॑भिर् वावशन्त नरः ।।


Verse: 4 
Halfverse: a    स सु॒ष्टुभा॒ स स्तु॒भा स॒प्त विप्रैः॑ स्व॒रेणाद्रिं॑ स्व॒र्यो॒ नव॑ग्वैः ।
   स सु॒ष्टुभा॒ स स्तु॒भा स॒प्त विप्रैः
   स सु॒ष्टुभा स स्तु॒भा स॒प्त विप्रैः
   स सु॒ष्टुभा स स्तु॒भा स॒प्त विप्रैः

Halfverse: b    स्व॒रेणाद्रिं॑ स्व॒र्यो॒ नव॑ग्वैः ।
   स्व॒रेण अद्रि॑म् स्व॒र्यः नव॑ग्वैः ।
   स्व॒रेण अद्रिं स्व॒रियो नव॑ग्वैः ।

Halfverse: c    स॑र॒ण्युभिः॑ पलि॒गमि॑न्द्र शक्र व॒लं रवे॑ण दरयो॒ दश॑ग्वैः ।।
   स॑र॒ण्युभिः॑ पलि॒गमि॑न्द्र शक्र
   सर॒ण्युभिः पलि॒गम् इन्द्र शक्र
   सर॒ण्युभिः पलि॒गम् इन्द्र शक्र

Halfverse: d    व॒लं रवे॑ण दरयो॒ दश॑ग्वैः ।।
   व॒लम् रवे॑ण दरयः दश॑ग्वैः ।।
   व॒लं रवे॑ण दरयो दश॑ग्वैः ।।


Verse: 5 
Halfverse: a    गृ॑णा॒नो अङ्गि॑रोभिर्दस्म॒ वि व॑रु॒षसा॒ सूर्ये॑ण॒ गोभि॒रन्धः॑ ।
   गृ॑णा॒नो अङ्गि॑रोभिर्दस्म॒ वि व॑र्
   गृणा॒नः अङ्गि॑रोभिः दस्म वि व॑र्
   गृणा॒नो अङ्गि॑रोभिर् दस्म वि व॑र्

Halfverse: b    उ॒षसा॒ सूर्ये॑ण॒ गोभि॒रन्धः॑ ।
   उ॒षसा सूर्ये॑ण गोभिः अन्धः ।
   उ॒षसा सूरि॑येण गोभि॑र् अन्धः ।

Halfverse: c    वि भूम्या॑ अप्रथय इन्द्र॒ सानु॑ दि॒वो रज॒ उप॑रमस्तभायः ।।
   वि भूम्या॑ अप्रथय इन्द्र॒ सानु
   वि भूम्याः अप्रथयः इन्द्र सानु
   वि भूम्या अप्रथय इन्द्र सानु

Halfverse: d    दि॒वो रज॒ उप॑रमस्तभायः ।।
   दि॒वः रजः उप॑रम् अस्तभायः ।।
   दि॒वो रज उप॑रम् अस्तभायः ।।


Verse: 6 
Halfverse: a    तदु॒ प्रय॑क्षतममस्य॒ कर्म॑ द॒स्मस्य॒ चारु॑तममस्ति॒ दंसः॑ ।
   तदु॒ प्रय॑क्षतममस्य॒ कर्म
   तत् उ प्रय॑क्षतमम् अस्य कर्म
   तद् उ प्रय॑क्षतमम् अस्य कर्म

Halfverse: b    द॒स्मस्य॒ चारु॑तममस्ति॒ दंसः॑ ।
   द॒स्मस्य चारु॑तमम् अस्ति दंसः ।
   द॒स्मस्य चारु॑तमम् अस्ति दंसः ।

Halfverse: c    उ॑पह्व॒रे यदुप॑रा॒ अपि॑न्व॒न्मध्व॑र्णसो न॒द्य॒श्चत॑स्रः ।।
   उ॑पह्व॒रे यदुप॑रा॒ अपि॑न्वन्
   उपह्व॒रे यत् उप॑राः अपि॑न्वत्
   उपह्व॒रे यद् उप॑रा अपि॑न्वन्

Halfverse: d    मध्व॑र्णसो न॒द्य॒श्चत॑स्रः ।।
   मध्व॑र्णसः न॒द्यः चत॑स्रः ।।
   मधुअ॑र्णसो न॒दिय॑श् चत॑स्रः ।।


Verse: 7 
Halfverse: a    द्वि॒ता वि व॑व्रे स॒नजा॒ सनी॑ळे अ॒यास्य॒ स्तव॑मानेभिर॒र्कैः ।
   द्वि॒ता वि व॑व्रे स॒नजा॒ सनी॑ळे
   द्वि॒ता वि व॑व्रे स॒नजा सनी॑ळे
   द्वि॒ता वि व॑व्रे स॒नजा सनी॑ळे

Halfverse: b    अ॒यास्य॒ स्तव॑मानेभिर॒र्कैः ।
   अ॒यास्यः स्तव॑मानेभिः अ॒र्कैः ।
   अ॒यासि॑य स्तव॑मानेभिर् अ॒र्कैः ।

Halfverse: c    भगो॒ न मेने॑ पर॒मे व्यो॑म॒न्नधा॑रय॒द्रोद॑सी सु॒दंसाः॑ ।।
   भगो॒ न मेने॑ पर॒मे व्यो॑मन्न्
   भगः न मेने पर॒मे व्यो॑मन्
   भगो न मेने पर॒मे विओ॑मन्न्

Halfverse: d    अधा॑रय॒द्रोद॑सी सु॒दंसाः॑ ।।
   अधा॑रयत् रोद॑सी सु॒दंसाः ।।
   अधा॑रयद् . रोद॑सी सु॒दंसाः ।।


Verse: 8 
Halfverse: a    स॒नाद्दिव॒म्परि॒ भूमा॒ विरू॑पे पुन॒र्भुवा॑ युव॒ती स्वेभि॒रेवैः॑ ।
   स॒नाद्दिव॒म्परि॒ भूमा॒ विरू॑पे
   स॒नात् दिव॑म् परि भूम+ विरू॑पे
   स॒नाद् दिव॑म् परि भूमा विरू॑पे

Halfverse: b    पुन॒र्भुवा॑ युव॒ती स्वेभि॒रेवैः॑ ।
   पु॑न॒र्भुवा युव॒ती स्वेभिः एवैः ।
   पु॑न॒र्भुवा युव॒ती स्वेभि॑र् एवैः ।

Halfverse: c    कृ॒ष्णेभि॑र॒क्तोषा रुश॑द्भि॒र्वपु॑र्भि॒रा च॑रतो अ॒न्यान्या॑ ।।
   कृ॒ष्णेभि॑र॒क्तोषा रुश॑द्भिर्
   कृ॒ष्णेभिः अ॒क्ता उ॒षाः रुश॑द्भिः
   कृ॒ष्णेभि॑र् अ॒क्ता उ॒षा रुश॑द्भिर्

Halfverse: d    वपु॑र्भि॒रा च॑रतो अ॒न्यान्या॑ ।।
   वपु॑र्भिः आ च॑रतः अ॒न्यान्या ।।
   वपु॑र्भिर् आ च॑रतो अ॒न्याअन्या ।।


Verse: 9 
Halfverse: a    सने॑मि स॒ख्यं स्व॑प॒स्यमा॑नः सू॒नुर्दा॑धार॒ शव॑सा सु॒दंसाः॑ ।
   सने॑मि स॒ख्यं स्व॑प॒स्यमा॑नः
   सने॑मि स॒ख्यम् स्वप॒स्यमा॑नः
   सने॑मि स॒ख्यं सुअ॑प॒स्यमा॑नः

Halfverse: b    सू॒नुर्दा॑धार॒ शव॑सा सु॒दंसाः॑ ।
   सू॒नुः दा॑धार शव॑सा सु॒दंसाः ।
   सू॒नुर् दाधार शव॑सा सु॒दंसाः ।

Halfverse: c    आ॒मासु॑ चिद्दधिषे प॒क्वम॒न्तः पयः॑ कृ॒ष्णासु॒ रुश॒द्रोहि॑णीषु ।।
   आ॒मासु॑ चिद्दधिषे प॒क्वम॒न्तः
   आ॒मासु चित् दधिषे प॒क्वम् अ॒न्तर्
   आ॒मासु चिद् दधिषे प॒क्वम् अ॒न्तः

Halfverse: d    पयः॑ कृ॒ष्णासु॒ रुश॒द्रोहि॑णीषु ।।
   पयः कृ॒ष्णासु रुश॑त् रोहि॑णीषु ।।
   पयः कृ॒ष्णासु रुश॑द् रोहि॑णीषु ।।


Verse: 10 
Halfverse: a    स॒नात्सनी॑ळा अ॒वनी॑रवा॒ता व्र॒ता र॑क्ष न्तेअ॒मृताः॒ सहो॑भिः ।
   स॒नात्सनी॑ळा अ॒वनी॑रवा॒ता
   स॒नात् सनी॑ळाः अ॒वनीः अवा॒ताः
   स॒नात् सनी॑ळा अ॒वनी॑र् अवा॒ता

Halfverse: b    व्र॒ता र॑क्षन्ते अ॒मृताः॒ सहो॑भिः ।
   व्र॒ता र॑क्षन्ते अ॒मृताः सहो॑भिः ।
   व्र॒ता र॑क्षन्ते अ॒मृताः सहो॑भिः ।

Halfverse: c    पु॒रू स॒हस्रा॒ जन॑यो॒ न पत्नी॑र्दुव॒स्यन्ति॒ स्वसा॑रो॒ अह्र॑याणम् ।।
   पु॒रू स॒हस्रा॒ जन॑यो॒ न पत्नी॑र्
   पु॒रु+ स॒हस्रा जन॑यः न पत्नीः
   पु॒रू स॒हस्रा जन॑यो न पत्नी॑र्

Halfverse: d    दुव॒स्यन्ति॒ स्वसा॑रो॒ अह्र॑याणम् ।।
   दु॑व॒स्यन्ति स्वसा॑रः अह्र॑याणम् ।।
   दु॑व॒स्यन्ति स्वसा॑रो अह्र॑याणम् ।।


Verse: 11 
Halfverse: a    स॑ना॒युवो॒ नम॑सा॒ न व्योअ॒र्कैर्व॑सू॒यवो॑ म॒तयो॑ दस्म दद्रुः ।
   स॑ना॒युवो॒ नम॑सा॒ नव्यो॑ अ॒र्कैर्
   सना॒युवः नम॑सा नव्यः अ॒र्कैः
   स॑ना॒युवो नम॑सा नव्यो अ॒र्कैर्

Halfverse: b    वसू॒यवो॑ म॒तयो॑ दस्म दद्रुः ।
   व॑सू॒यवः म॒तयः दस्म दद्रुः ।
   व॑सू॒यवो म॒तयो दस्म दद्रुः ।

Halfverse: c    पतिं॒ न पत्नी॑रुश॒तीरु॒शन्तं॑ स्पृ॒शन्ति॑ त्वा शवसावन्मनी॒षाः ।।
   पतिं॒ न पत्नी॑रुश॒तीरु॒शन्तं
   पति॑म् न पत्नीः उश॒तीः उ॒शन्त॑म्
   पतिं न पत्नी॑र् उश॒तीर् उ॒शन्तं

Halfverse: d    स्पृ॒शन्ति॑ त्वा शवसावन्मनी॒षाः ।।
   स्पृ॒शन्ति त्वा शवसावन् मनी॒षाः ।।
   स्पृ॒शन्ति त्वा शवसावन् मनी॒षाः ।।


Verse: 12 
Halfverse: a    स॒नादे॒व तव॒ रायो॒ गभ॑स्तौ॒ न क्षीय॑न्ते॒ नोप॑ दस्यन्ति दस्म ।
   स॒नादे॒व तव॒ रायो॒ गभ॑स्तौ
   स॒नात् ए॒व तव रायः गभ॑स्तौ
   स॒नाद् ए॒व तव रायो गभ॑स्तौ

Halfverse: b    न क्षीय॑न्ते॒ नोप॑ दस्यन्ति दस्म ।
   न क्षीय॑न्ते न उप दस्यन्ति दस्म ।
   न क्षीय॑न्ते नोप दस्यन्ति दस्म ।

Halfverse: c    द्यु॒माँ अ॑सि॒ क्रतु॑माँ इन्द्र॒ धीरः॒ शिक्षा॑ शचीव॒स्तव॑ नः॒ शची॑भिः ।।
   द्यु॒माँ अ॑सि॒ क्रतु॑माँ इन्द्र॒ धीरः
   द्यु॒मान् असि क्रतु॑मान् इन्द्र धीरः
   द्यु॒माँ अ॑सि क्रतु॑माँ इन्द्र धीरः

Halfverse: d    शिक्षा॑ शचीव॒स्तव॑ नः॒ शची॑भिः ।।
   शिक्ष+ शचीवः तव नः शची॑भिः ।।
   शिक्षा शचीवस् तव नः शची॑भिः ।।


Verse: 13 
Halfverse: a    स॑नाय॒ते गोत॑म इन्द्र॒ नव्य॒मत॑क्ष॒द्ब्रह्म॑ हरि॒योज॑नाय ।
   स॑नाय॒ते गोत॑म इन्द्र॒ नव्य॑म्
   सनाय॒ते गोत॑मः इन्द्र नव्य॑म्
   सनाय॒ते गोत॑म इन्द्र नव्य॑म्

Halfverse: b    अत॑क्ष॒द्ब्रह्म॑ हरि॒योज॑नाय ।
   अत॑क्षत् ब्रह्म हरि॒योज॑नाय ।
   अत॑क्षद् ब्रह्म हरि॒योज॑नाय ।

Halfverse: c    सु॑नी॒थाय॑ नः शवसान नो॒धाः प्रा॒तर्म॒क्षू धि॒याव॑सुर्जगम्यात् ।।
   सु॑नी॒थाय॑ नः शवसान नो॒धाः
   सु॑नी॒थाय नः शवसान नो॒धाः
   सु॑नी॒थाय नः शवसान नो॒धाः

Halfverse: d    प्रा॒तर्म॒क्षू धि॒याव॑सुर्जगम्यात् ।।
   प्रा॒तर् म॒क्षु+ धि॒याव॑सुः जगम्यात् ।।
   प्रा॒तर् म॒क्षू धि॒याव॑सुर् जगम्यात् ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.