TITUS
Rg-Veda: Rg-Veda-Samhita
Part No. 63
Previous part

Hymn: 63 
Verse: 1 
Halfverse: a    त्वम्म॒हाँ इ॑न्द्र॒ यो ह॒ शुष्मै॒र्द्यावा॑ जज्ञा॒नः पृ॑थि॒वी अमे॑ धाः ।
   त्वम्म॒हाँ इ॑न्द्र॒ यो ह॒ शुष्मै॑र्
   त्वम् म॒हान् इन्द्र यः ह शुष्मैः
   तु॒वम् म॒हाँ इ॑न्दर यो ह शुष्मै॑र्

Halfverse: b    द्यावा॑ जज्ञा॒नः पृ॑थि॒वी अमे॑ धाः ।
   द्यावा जज्ञा॒नः पृ॑थि॒वी अमे धाः ।
   द्यावा जज्ञा॒नः पृ॑थि॒वी अमे धाः ।

Halfverse: c    यद्ध॑ ते॒ विश्वा॑ गि॒रय॑श्चि॒दभ्वा॑ भि॒या दृ॒ऴासः॑ कि॒रणा॒ नैज॑न् ।।
   यद्ध॑ ते॒ विश्वा॑ गि॒रय॑श्चि॒दभ्वा
   यत् ह ते विश्वा गि॒रयः चित् अभ्वा
   यद् ध ते विश्वा गि॒रय॑श् चिद् अभ्वा

Halfverse: d    भि॒या दृ॒ऴासः॑ कि॒रणा॒ नैज॑न् ।।
   भि॒या दृ॒ऴासः कि॒रणाः न एज॑न् ! ।।
   भि॒या दृ॒ऴासः कि॒रणा न ऐज॑न् ।।


Verse: 2 
Halfverse: a    आ यद्धरी॑ इन्द्र॒ विव्र॑ता॒ वेरा ते॒ वज्रं॑ जरि॒ता बा॒ह्वोर्धा॑त् ।
   आ यद्धरी॑ इन्द्र॒ विव्र॑ता॒ वेर्
   आ यत् हरी इन्द्र विव्र॑ता वेः
   आ यद् धरी इन्दर विव्र॑ता वेर्

Halfverse: b    आ ते॒ वज्रं॑ जरि॒ता बा॒ह्वोर्धा॑त् ।
   आ ते वज्र॑म् जरि॒ता बा॒ह्वोः धा॑त् ।
   आ ते वज्रं जरि॒ता बा॑हु॒वोर् धात् ।

Halfverse: c    येना॑विहर्यतक्रतो अ॒मित्रा॒न्पुर॑ इ॒ष्णासि॑ पुरुहूत पू॒र्वीः ।।
   येना॑विहर्यतक्रतो अ॒मित्रा॑न्
   येन अविहर्यतक्रतो अ॒मित्रा॑न्
   येना॑विहर्यतक्रतो अ॒मित्रा॑न्

Halfverse: d    पुर॑ इ॒ष्णासि॑ पुरुहूत पू॒र्वीः ।।
   पुरः इ॒ष्णासि पुरुहूत पू॒र्वीः ।।
   पुर इ॒ष्णासि पुरुहूत पू॒र्वीः ।।


Verse: 3 
Halfverse: a    त्वं स॒त्य इ॑न्द्र धृ॒ष्णुरे॒तान्त्वमृ॑भु॒क्षा नर्य॒स्त्वं षाट् ।
   त्वं स॒त्य इ॑न्द्र धृ॒ष्णुरे॒तान्
   त्वम् स॒त्यः इ॑न्द्र धृ॒ष्णुः ए॒तान्
   तु॒वं स॒त्य इ॑न्दर धृ॒ष्णुर् ए॒तान्

Halfverse: b    त्वमृ॑भु॒क्षा नर्य॒स्त्वं षाट् ।
   त्वम् ऋभु॒क्षाः नर्यः त्वम् षाट् ।
   तु॒वम् ऋभु॒क्षा नरि॑यस् तु॒वं षाट् ।

Halfverse: c    त्वं शुष्णं॑ वृ॒जने॑ पृ॒क्ष आ॒णौ यूने॒ कुत्सा॑य द्यु॒मते॒ सचा॑हन् ।।
   त्वं शुष्णं॑ वृ॒जने॑ पृ॒क्ष आ॒णौ
   त्वम् शुष्ण॑म् वृ॒जने पृ॒क्षे आ॒णौ
   तु॒वं शुष्णं वृ॒जने पृ॒क्ष आ॒णौ

Halfverse: d    यूने॒ कुत्सा॑य द्यु॒मते॒ सचा॑हन् ।।
   यूने कुत्सा॑य द्यु॒मते सचा हन् ! ।।
   यूने कुत्सा॑य द्यु॒मते सचा॑हन् ।।


Verse: 4 
Halfverse: a    त्वं ह॒ त्यदि॑न्द्र चोदीः॒ सखा॑ वृ॒त्रं यद्व॑ज्रिन्वृषकर्मन्नु॒भ्नाः ।
   त्वं ह॒ त्यदि॑न्द्र चोदीः॒ सखा
   त्वम् ह त्यत् इन्द्र चोदीः सखा
   तु॒वं ह त्यद् इन्दर चोदीः सखा

Halfverse: b    वृ॒त्रं यद्व॑ज्रिन्वृषकर्मन्नु॒भ्नाः ।
   वृ॒त्रम् यत् वज्रिन् वृषकर्मन् उ॒भ्नाः ।
   वृ॒त्रं यद् वज्रिन् वृषकर्मन् उ॒भ्नाः ।

Halfverse: c    यद्ध॑ शूर वृषमणः परा॒चैर्वि दस्यूँ॒र्योना॒वकृ॑तो वृथा॒षाट् ।।
   यद्ध॑ शूर वृषमणः परा॒चैर्
   यत् ह शूर वृषमणः परा॒चैः
   यद् ध शूर वृषमणः परा॒चैर्

Halfverse: d    वि दस्यूँ॒र्योना॒वकृ॑तो वृथा॒षाट् ।।
   वि दस्यू॑न् योनौ अकृ॑तः वृथा॒षाट् ।।
   वि दस्यूँ॑र् योना॑व् अकृ॑तो वृथा॒षाट् ।।


Verse: 5 
Halfverse: a    त्वं ह॒ त्यदि॒न्द्रारि॑षण्यन्दृ॒ऴस्य॑ चि॒न्मर्ता॑ना॒मजु॑ष्टौ ।
   त्वं ह॒ त्यदि॒न्द्रारि॑षण्यन्
   त्वम् ह त्यत् इन्द्र अरि॑षण्यन्
   तु॒वं ह त्यद् इन्दर अरि॑षण्यन्

Halfverse: b    दृ॒ऴस्य॑ चि॒न्मर्ता॑ना॒मजु॑ष्टौ ।
   दृ॒ऴस्य चित् मर्ता॑नाम् अजु॑ष्टौ ।
   दृ॒ऴस्य चिन् मर्तिआ॑नाम्* अजु॑ष्टौ ।

Halfverse: c    व्य॒स्मदा काष्ठा॒ अर्व॑ते वर्घ॒नेव॑ वज्रिञ्छ्नथिह्य॒मित्रा॑न् ।।
   व्य॒स्मदा काष्ठा॒ अर्व॑ते वर्
   वि अ॒स्मत् आ काष्ठाः अर्व॑ते वर्
   वि अ॒स्मद् आ काष्ठा अर्व॑ते वर्

Halfverse: d    घ॒नेव॑ वज्रिञ्छ्नथिह्य॒मित्रा॑न् ।।
   घ॒ना इ॑व वज्रिन् श्नथिहि अ॒मित्रा॑न् ।।
   घ॒नेव वज्रिञ् छ्नथिहि अ॒मित्रा॑न् ।।


Verse: 6 
Halfverse: a    त्वां ह॒ त्यदि॒न्द्रार्ण॑सातौ॒ स्व॑र्मीऴे॒ नर॑ आ॒जा ह॑वन्ते ।
   त्वां ह॒ त्यदि॒न्द्रार्ण॑सातौ
   त्वाम् ह त्यत् इन्द्र अर्ण॑सातौ
   तु॒वां ह त्यद् इन्दर अर्ण॑सातौ

Halfverse: b    स्व॑र्मीऴे॒ नर॑ आ॒जा ह॑वन्ते ।
   स्व॑र्मीऴे नरः आ॒जा ह॑वन्ते ।
   सुव॑र्मीऴे नर आ॒जा ह॑वन्ते ।

Halfverse: c    तव॑ स्वधाव इ॒यमा स॑म॒र्य ऊ॒तिर्वाजे॑ष्वत॒साय्या॑ भूत् ।।
   तव॑ स्वधाव इ॒यमा स॑म॒र्य
   तव स्वधावः इ॒यम् आ स॑म॒र्ये
   तव स्वधाव इ॒यम् आ स॑म॒र्य

Halfverse: d    ऊ॒तिर्वाजे॑ष्वत॒साय्या॑ भूत् ।।
   ऊ॒तिः वाजे॑षु अत॒साय्या भूत् ।।
   ऊ॒तिर् वाजे॑षु अत॒सायि॑या भूत् ।।


Verse: 7 
Halfverse: a    त्वं ह॒ त्यदि॑न्द्र स॒प्त युध्य॒न्पुरो॑ वज्रिन्पुरु॒कुत्सा॑य दर्दः ।
   त्वं ह॒ त्यदि॑न्द्र स॒प्त युध्य॑न्
   त्वम् ह त्यत् इन्द्र स॒प्त युध्य॑न्
   तु॒वं ह त्यद् इन्दर स॒प्त युध्य॑न्

Halfverse: b    पुरो॑ वज्रिन्पुरु॒कुत्सा॑य दर्दः ।
   पुरः वज्रिन् पुरु॒कुत्सा॑य दर्दर् ।
   पुरो वज्रिन् पुरु॒कुत्सा॑य दर्दः ।

Halfverse: c    ब॒र्हिर्न यत्सु॒दासे॒ वृथा॒ वर्गं॒हो रा॑ज॒न्वरि॑वः पू॒रवे॑ कः ।।
   ब॒र्हिर्न यत्सु॒दासे॒ वृथा॒ वर्ग्
   ब॒र्हिः न यत् सु॒दासे वृथा वर्क्
   ब॒र्हिर् न यत् . सु॒दासे वृथा वर्ग्

Halfverse: d    अं॒हो रा॑ज॒न्वरि॑वः पू॒रवे॑ कः ।।
   अं॒होः रा॑जन् वरि॑वः पू॒रवे कर् ।।
   अं॒हो रा॑जन् वरि॑वः पू॒रवे कः ।।


Verse: 8 
Halfverse: a    त्वं त्यां न॑ इन्द्र देव चि॒त्रामिष॒मापो॒ न पी॑पयः॒ परि॑ज्मन् ।
   त्वं त्यां न॑ इन्द्र देव चि॒त्राम्
   त्वम् त्याम् नः इन्द्र देव चि॒त्राम्
   तु॒वं त्यां न इन्दर देव चि॒त्राम्

Halfverse: b    इष॒मापो॒ न पी॑पयः॒ परि॑ज्मन् ।
   इष॑म् आपः न पी॑पयः परि॑ज्मन् ।
   इष॑म् आपो न पी॑पयः परि॑ज्मन् ।

Halfverse: c    यया॑ शूर॒ प्रत्य॒स्मभ्यं॒ यंसि॒ त्मन॒मूर्जं॒ न वि॒श्वध॒ क्षर॑ध्यै ।।
   यया॑ शूर॒ प्रत्य॒स्मभ्यं॒ यंसि
   यया शूर प्रति अ॒स्मभ्य॑म् यंसि
   यया शूर प्रति अ॒स्मभ्य* यंसि

Halfverse: d    त्मन॒मूर्जं॒ न वि॒श्वध॒ क्षर॑ध्यै ।।
   त्मन॑म् ऊर्ज॑म् न वि॒श्वध क्षर॑ध्यै ।।
   त्मन॑म् ऊर्जं न वि॒श्वध क्षर॑ध्यै ।।


Verse: 9 
Halfverse: a    अका॑रि त इन्द्र॒ गोत॑मेभि॒र्ब्रह्मा॒ण्योक्ता॒ नम॑सा॒ हरि॑भ्याम् ।
   अका॑रि त इन्द्र॒ गोत॑मेभिर्
   अका॑रि ते इन्द्र गोत॑मेभिः
   अका॑रि त इन्दर गोत॑मेभिर्

Halfverse: b    ब्रह्मा॒ण्योक्ता॒ नम॑सा॒ हरि॑भ्याम् ।
   ब्रह्मा॑णि ओक्ता नम॑सा हरि॑भ्याम् ।
   ब्रह्मा॑णि ओक्ता नम॑सा हरि॑भ्याम् ।

Halfverse: c    सु॒पेश॑सं॒ वाज॒मा भ॑रा नः प्रा॒तर्म॒क्षू धि॒याव॑सुर्जगम्यात् ।।
   सु॒पेश॑सं॒ वाज॒मा भ॑रा नः
   सु॒पेश॑सम् वाज॑म् आ भ॑र+ नः
   सु॒पेश॑सं . वाज॑म् आ भ॑रा नः

Halfverse: d    प्रा॒तर्म॒क्षू धि॒याव॑सुर्जगम्यात् ।।
   प्रा॒तर् म॒क्षु+ धि॒याव॑सुः जगम्यात् ।।
   प्रा॒तर् म॒क्षू धि॒याव॑सुर् जगम्यात् ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.