TITUS
Rg-Veda: Rg-Veda-Samhita
Part No. 70
Previous part

Hymn: 70 
Verse: 1 
Halfverse: a    व॒नेम॑ पू॒र्वीर॒र्यो म॑नी॒षा अ॒ग्निः सु॒शोको॒ विश्वा॑न्यश्याः ।
   व॒नेम॑ पू॒र्वीर॒र्यो म॑नी॒षा
   व॒नेम पू॒र्वीः अ॒र्यः म॑नी॒षा
   व॒नेम पू॒र्वीर् अ॒र्यो म॑नी॒षा

Halfverse: b    अ॒ग्निः सु॒शोको॒ विश्वा॑न्यश्याः ।
   अ॒ग्निः सु॒शोकः विश्वा॑नि अश्याः ।
   अ॒ग्निः सु॒शोको विश्वा॑नि अश्याः ।


Verse: 2 
Halfverse: a    आ दैव्या॑नि व्र॒ता चि॑कि॒त्वाना मानु॑षस्य॒ जन॑स्य॒ जन्म॑ ।।
   आ दैव्या॑नि व्र॒ता चि॑कि॒त्वान्
   आ दैव्या॑नि व्र॒ता चि॑कि॒त्वान्
   आ दैवि॑यानि व्र॒ता चि॑कि॒त्वान्

Halfverse: b    आ मानु॑षस्य॒ जन॑स्य॒ जन्म॑ ।।
   आ मानु॑षस्य जन॑स्य जन्म ।।
   आ मानु॑षस्य जन॑स्य जन्म ।।


Verse: 3 
Halfverse: a    गर्भो॒ यो अ॒पां गर्भो॒ वना॑नां॒ गर्भ॑श्च स्था॒तां गर्भ॑श्च॒रथा॑म् ।
   गर्भो॒ यो अ॒पां गर्भो॒ वना॑नां
   गर्भः यः अ॒पाम् गर्भः वना॑नाम्
   गर्भो यो अ॒पां गर्भो वना॑नां

Halfverse: b    गर्भ॑श्च स्था॒तां गर्भ॑श्च॒रथा॑म् ।
   गर्भः च स्था॒ताम् गर्भः च॒रथा॑म् ।
   गर्भ॑श् च स्था॒तां गर्भ॑श् च॒रथा॑म् ।


Verse: 4 
Halfverse: a    अद्रौ॑ चिदस्मा अ॒न्तर्दु॑रो॒णे वि॒शां न विश्वो॑ अ॒मृतः॑ स्वा॒धीः ।।
   अद्रौ॑ चिदस्मा अ॒न्तर्दु॑रो॒णे
   अद्रौ चित् अस्मै अ॒न्तर् दुरो॒णे
   अद्रौ चिद् अस्मा अ॒न्तर् दुरो॒णे

Halfverse: b    वि॒शां न विश्वो॑ अ॒मृतः॑ स्वा॒धीः ।।
   वि॒शाम् न विश्वः अ॒मृतः स्वा॒धीः ।।
   वि॒शां न विश्वो अ॒मृतः स्वा॒धीः ।।


Verse: 5 
Halfverse: a    स हि क्ष॒पावाँ॑ अ॒ग्नी र॑यी॒णां दाश॒द्यो अ॑स्मा॒ अरं॑ सू॒क्तैः ।
   स हि क्ष॒पावाँ॑ अ॒ग्नी र॑यी॒णां
   स हि क्ष॒पावा॑न् अ॒ग्निः र॑यी॒णाम्
   स हि क्ष॒पावाँ अ॒ग्नी र॑यी॒णां

Halfverse: b    दाश॒द्यो अ॑स्मा॒ अरं॑ सू॒क्तैः ।
   दाश॑त् यः अ॑स्मै अर॑म् सू॒क्तैः ।
   दाश॑द् यो अ॑स्मा अरं सुउ॒क्तैः ।


Verse: 6 
Halfverse: a    ए॒ता चि॑कित्वो॒ भूमा॒ नि पा॑हि दे॒वानां॒ जन्म॒ मर्तां॑श्च वि॒द्वान् ।।
   ए॒ता चि॑कित्वो॒ भूमा॒ नि पा॑हि
   ए॒ता चि॑कित्वः भूम+ नि पा॑हि
   ए॒ता चि॑कित्वो भूमा नि पा॑हि

Halfverse: b    दे॒वानां॒ जन्म॒ मर्तां॑श्च वि॒द्वान् ।।
   दे॒वाना॑म् जन्म मर्ता॑न् च वि॒द्वान् ।।
   दे॒वानां जन्म मर्तां॑श् च वि॒द्वान् ।।


Verse: 7 
Halfverse: a    वर्धा॒न्यम्पू॒र्वीः क्ष॒पो विरू॑पा स्था॒तुश्च॒रथ॑म् ।!। ऋ॒तप्र॑वीतम् ।
   वर्धा॒न्यम्पू॒र्वीः क्ष॒पो विरू॑पा
   वर्धा॑न् यम् पू॒र्वीः क्ष॒पः विरू॑पाः
   वर्धा॑न् यम् पू॒र्वीः क्ष॒पो विरू॑पा

Halfverse: b    स्था॒तुश्च॒रथ॑म् ।!। ऋ॒तप्र॑वीतम् ।
   स्था॒तुः च॒रथ॑म् ! ऋ॒तप्र॑वीतम् ।
   स्था॒तुश् च॒रथ॑म् ।!। ऋ॒तप्र॑वीतम् ।


Verse: 8 
Halfverse: a    अरा॑धि॒ होता॒ स्व॒र्निष॑त्तः कृ॒ण्वन्विश्वा॒न्यपां॑सि स॒त्या ।।
   अरा॑धि॒ होता॒ स्व॒र्निष॑त्तः
   अरा॑धि होता स्व॑र् निष॑त्तः
   अरा॑धि होता सुव॑र् निष॑त्तः

Halfverse: b    कृ॒ण्वन्विश्वा॒न्यपां॑सि स॒त्या ।।
   कृ॒ण्वन् विश्वा॑नि अपां॑सि स॒त्या ।।
   कृ॒ण्वन् विश्वा॑नि अपां॑सि स॒त्या ।।


Verse: 9 
Halfverse: a    गोषु॒ प्रश॑स्तिं॒ वने॑षु धिषे॒ भर॑न्त॒ विश्वे॑ ब॒लिं स्व॑र्णः ।
   गोषु॒ प्रश॑स्तिं॒ वने॑षु धिषे
   गोषु प्रश॑स्तिम् वने॑षु धिषे
   गोषु प्रश॑स्तिं वने॑षु धिषे

Halfverse: b    भर॑न्त॒ विश्वे॑ ब॒लिं स्व॑र्णः ।
   भर॑न्त विश्वे ब॒लिम् स्व॑र् नः ।
   भर॑न्त विश्वे ब॒लिं सुव॑र् णः ।


Verse: 10 
Halfverse: a    वि त्वा॒ नरः॑ पुरु॒त्रा स॑पर्यन्पि॒तुर्न जिव्रे॒र्वि वेदो॑ भरन्त ।।
   वि त्वा॒ नरः॑ पुरु॒त्रा स॑पर्यन्
   वि त्वा नरः पुरु॒त्रा स॑पर्यन्
   वि त्वा नरः पुरु॒त्रा स॑पर्यन्

Halfverse: b    पि॒तुर्न जिव्रे॒र्वि वेदो॑ भरन्त ।।
   पि॒तुः न जिव्रेः वि वेदः भरन्त ।।
   पि॒तुर् न जिव्रे॑र् वि वेदो भरन्त ।।


Verse: 11 
Halfverse: a    सा॒धुर्न गृ॒ध्नुरस्ते॑व॒ शूरो॒ याते॑व भी॒मस्त्वे॒षः स॒मत्सु॑ ।।
   सा॒धुर्न गृ॒ध्नुरस्ते॑व॒ शूरो
   सा॒धुः न गृ॒ध्नुः अस्ता इव शूरः
   सा॒धुर् न गृ॒ध्नुर् अस्ते ऽव शूरो

Halfverse: b    याते॑व भी॒मस्त्वे॒षः स॒मत्सु॑ ।
   याता इव भी॒मः त्वे॒षः स॒मत्सु ।।
   याते ऽव भी॒मस् त्वे॒षः स॒मत्सु ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.