TITUS
Rg-Veda: Rg-Veda-Samhita
Part No. 71
Previous part

Hymn: 71 
Verse: 1 
Halfverse: a    उप॒ प्र जि॑न्वन्नुश॒तीरु॒शन्त॒म्पतिं॒ न नित्यं॒ जन॑यः॒ सनी॑ळाः ।
   उप॒ प्र जि॑न्वन्नुश॒तीरु॒शन्त॑म्
   उप प्र जि॑न्वन् उश॒तीः उ॒शन्त॑म्
   उप प्र जि॑न्वन्न् उश॒तीर् उ॒शन्त॑म्

Halfverse: b    पतिं॒ न नित्यं॒ जन॑यः॒ सनी॑ळाः ।
   पति॑म् न नित्य॑म् जन॑यः सनी॑ळाः ।
   पतिं न नित्यं जन॑यः सनी॑ळाः ।

Halfverse: c    स्वसा॑रः॒ श्यावी॒मरु॑षीमजुष्रञ्चि॒त्रमु॒छन्ती॑मु॒षसं॒ न गावः॑ ।।
   स्वसा॑रः॒ श्यावी॒मरु॑षीमजुष्रञ्
   स्वसा॑रः श्यावी॑म् अरु॑षीम् अजुष्रन्
   स्वसा॑रः श्यावी॑म् अरु॑षीम् अजुष्रञ्

Halfverse: d    चि॒त्रमु॒छन्ती॑मु॒षसं॒ न गावः॑ ।।
   चि॒त्रम् उ॒छन्ती॑म् उ॒षस॑म् न गावः ।।
   चि॒त्रम् उ॒छन्ती॑म् उ॒षसं न गावः ।।


Verse: 2 
Halfverse: a    वी॒ळु चि॑द्दृ॒ऴा पि॒तरो॑ न उ॒क्थैरद्रिं॑ रुज॒न्नङ्गि॑रसो॒ रवे॑ण ।
   वी॒ळु चि॑द्दृ॒ऴा पि॒तरो॑ न उ॒क्थैर्
   वी॒ळु चि॑त् दृ॒ऴा पि॒तरः नः उ॒क्थैः
   वी॒ळु चि॑द् दृ॒ऴा पि॒तरो न उ॒क्थैर्

Halfverse: b    अद्रिं॑ रुज॒न्नङ्गि॑रसो॒ रवे॑ण ।
   अद्रि॑म् रुजन् अङ्गि॑रसः रवे॑ण ।
   अद्रिं रुजन्न् अङ्गि॑रसो रवे॑ण ।

Halfverse: c    च॒क्रुर्दि॒वो बृ॑ह॒तो गा॒तुम॒स्मे अहः॒ स्व॑र्विविदुः के॒तुमु॒स्राः ।।
   च॒क्रुर्दि॒वो बृ॑ह॒तो गा॒तुम॒स्मे
   च॒क्रुः दि॒वः बृ॑ह॒तः गा॒तुम् अ॒स्मे
   च॒क्रुर् दि॒वो बृ॑ह॒तो गा॒तुम् अ॒स्मे

Halfverse: d    अहः॒ स्व॑र्विविदुः के॒तुमु॒स्राः ।।
   अह॑र् स्व॑र् विविदुः के॒तुम् उ॒स्राः ।।
   अहः सुव॑र् विविदुः के॒तुम् उ॒स्राः ।।


Verse: 3 
Halfverse: a    दध॑न्नृ॒तं ध॒नय॑न्नस्य धी॒तिमादिद॒र्यो दि॑धि॒ष्वो॒ विभृ॑त्राः ।
   दध॑न्नृ॒तं ध॒नय॑न्नस्य धी॒तिम्
   दध॑न् ऋ॒तम् ध॒नय॑न् अस्य धी॒तिम्
   दध॑न्न् ऋ॒तं ध॒नय॑न्न् अस्य धी॒तिम्

Halfverse: b    आदिद॒र्यो दि॑धि॒ष्वो॒ विभृ॑त्राः ।
   आत् इत् अ॒र्यः दि॑धि॒ष्वः विभृ॑त्राः ।
   आद् इद् अ॒र्यो दि॑धि॒षुवो विभृ॑त्राः ।

Halfverse: c    अतृ॑ष्यन्तीर॒पसो॑ य॒न्त्यछा॑ दे॒वाञ्जन्म॒ प्रय॑सा व॒र्धय॑न्तीः ।।
   अतृ॑ष्यन्तीर॒पसो॑ य॒न्त्यछा
   अतृ॑ष्यन्तीः अ॒पसः यन्ति अछ+
   अतृ॑ष्यन्तीर् अ॒पसो यन्ति अछा

Halfverse: d    दे॒वाञ्जन्म॒ प्रय॑सा व॒र्धय॑न्तीः ।।
   दे॒वान् जन्म प्रय॑सा व॒र्धय॑न्तीः ।।
   दे॒वाञ् जन्म प्रय॑सा व॒र्धय॑न्तीः ।।


Verse: 4 
Halfverse: a    मथी॒द्यदीं॒ विभृ॑तो मात॒रिश्वा॑ गृ॒हेगृ॑हे श्ये॒तो जेन्यो॒ भूत् ।
   मथी॒द्यदीं॒ विभृ॑तो मात॒रिश्वा
   मथी॑त् यत् ईम् विभृ॑तः मात॒रिश्वा
   मथी॑द् यद् ईं विभृ॑तो मात॒रिश्वा

Halfverse: b    गृ॒हेगृ॑हे श्ये॒तो जेन्यो॒ भूत् ।
   गृ॒हेगृ॑हे श्ये॒तः जेन्यः भूत् ।
   गृ॒हेगृ॑हे . श्ये॒तो जेनि॑यो भूत् ।

Halfverse: c    आदीं॒ राज्ञे॒ न सही॑यसे॒ सचा॒ सन्ना दू॒त्य॒म्भृग॑वाणो विवाय ।।
   आदीं॒ राज्ञे॒ न सही॑यसे॒ सचा॒ सन्न्
   आत् ईम् राज्ञे न सही॑यसे सचा सन्
   आद् ईं राज्ञे न सह्य॑से* सचा सन्न्

Halfverse: d    आ दू॒त्य॒म्भृग॑वाणो विवाय ।।
   आ दू॒त्य॑म् भृग॑वाणः विवाय ।।
   आ दू॒तिय॑म् भृग॑वाणो विवाय ।।


Verse: 5 
Halfverse: a    म॒हे यत्पि॒त्र ईं॒ रसं॑ दि॒वे करव॑ त्सरत्पृश॒न्य॑श्चिकि॒त्वान् ।
   म॒हे यत्पि॒त्र ईं॒ रसं॑ दि॒वे कर्
   म॒हे यत् पि॒त्रे ई॑म् रस॑म् दि॒वे कर्
   म॒हे यत् पि॒त्र ईं रसं दि॒वे कर्

Halfverse: b    अव॑ त्सरत्पृश॒न्य॑श्चिकि॒त्वान् ।
   अव त्सरत् पृश॒न्यः चिकि॒त्वान् ।
   अव त्सरत् पृश॒निय॑श् चिकि॒त्वान् ।

Halfverse: c    सृ॒जदस्ता॑ धृष॒ता दि॒द्युम॑स्मै॒ स्वायां॑ दे॒वो दु॑हि॒तरि॒ त्विषिं॑ धात् ।।
   सृ॒जदस्ता॑ धृष॒ता दि॒द्युम॑स्मै
   सृ॒जत् अस्ता धृष॒ता दि॒द्युम् अस्मै
   सृ॒जद् अस्ता धृष॒ता दि॒द्युम् अस्मै

Halfverse: d    स्वायां॑ दे॒वो दु॑हि॒तरि॒ त्विषिं॑ धात् ।।
   स्वाया॑म् दे॒वः दु॑हि॒तरि त्विषि॑म् धात् ।।
   स्वायां दे॒वो दु॑हि॒तरि त्विषिं धात् ।।


Verse: 6 
Halfverse: a    स्व आ यस्तुभ्यं॒ दम॒ आ वि॒भाति॒ नमो॑ वा॒ दाशा॑दुश॒तो अनु॒ द्यून् ।
   स्व आ यस्तुभ्यं॒ दम॒ आ वि॒भाति
   स्वे आ यः तुभ्य॑म् दमे आ वि॒भाति
   स्व आ यस् तुभ्यं दम आ वि॒भाति

Halfverse: b    नमो॑ वा॒ दाशा॑दुश॒तो अनु॒ द्यून् ।
   नमः वा दाशा॑त् उश॒तः अनु द्यून् ।
   नमो वा दाशा॑द् उश॒तो अनु द्यून् ।

Halfverse: c    वर्धो॑ अग्ने॒ वयो॑ अस्य द्वि॒बर्हा॒ यास॑द्रा॒या स॒रथं॒ यं जु॒नासि॑ ।।
   वर्धो॑ अग्ने॒ वयो॑ अस्य द्वि॒बर्हा
   वर्ध उ अग्ने वयः अस्य द्वि॒बर्हाः
   वर्धो अग्ने वयो अस्य द्वि॒बर्हा

Halfverse: d    यास॑द्रा॒या स॒रथं॒ यं जु॒नासि॑ ।।
   यास॑त् रा॒या स॒रथ॑म् यम् जु॒नासि ।।
   यास॑द् रा॒या स॒रथं यं जु॒नासि ।।


Verse: 7 
Halfverse: a    अ॒ग्निं विश्वा॑ अ॒भि पृक्षः॑ सचन्ते समु॒द्रं न स्र॒वतः॑ स॒प्त य॒ह्वीः ।
   अ॒ग्निं विश्वा॑ अ॒भि ।!। पृक्षः॑ सचन्ते
   अ॒ग्निम् विश्वाः अ॒भि पृक्षः सचन्ते
   अ॒ग्निं विश्वा अ॒भि पृक्षः सचन्ते

Halfverse: b    समु॒द्रं न स्र॒वतः॑ स॒प्त य॒ह्वीः ।
   स॑मु॒द्रम् न स्र॒वतः स॒प्त य॒ह्वीः ।
   स॑मु॒द्रं न स्र॒वतः स॒प्त य॒ह्वीः ।

Halfverse: c    न जा॒मिभि॒र्वि चि॑किते॒ वयो॑ नो वि॒दा दे॒वेषु॒ प्रम॑तिं चिकि॒त्वान् ।।
   न जा॒मिभि॒र्वि चि॑किते॒ वयो॑ नो
   न जा॒मिभिः वि चि॑किते वयः नः
   न जा॒मिभि॑र् वि चि॑किते वयो नो

Halfverse: d    वि॒दा दे॒वेषु॒ प्रम॑तिं चिकि॒त्वान् ।।
   वि॒दाः दे॒वेषु प्रम॑तिम् चिकि॒त्वान् ।।
   वि॒दा दे॒वेषु प्रम॑तिं चिकि॒त्वान् ।।


Verse: 8 
Halfverse: a    आ यदि॒षे नृ॒पतिं॒ तेज॒ आन॒ट्छुचि॒ रेतो॒ निषि॑क्तं॒ द्यौर॒भीके॑ ।
   आ यदि॒षे नृ॒पतिं॒ तेज॒ आन॑ट्
   आ यत् इ॒षे नृ॒पति॑म् तेजः आन॑ट्
   आ यद् इ॒षे नृ॒पतिं तेज आन॑ट्

Halfverse: b    छुचि॒ रेतो॒ निषि॑क्तं॒ द्यौर॒भीके॑ ।
   शुचि रेतः निषि॑क्तम् द्यौः अ॒भीके ।
   छुचि रेतो निषि॑क्तं द्यौर् अ॒भीके ।

Halfverse: c    अ॒ग्निः शर्ध॑मनव॒द्यं युवा॑नं स्वा॒ध्यं॑ जनयत्सू॒दय॑च्च ।।
   अ॒ग्निः शर्ध॑मनव॒द्यं युवा॑नं
   अ॒ग्निः शर्ध॑म् अनव॒द्यम् युवा॑नम्
   अ॒ग्निः शर्ध॑म् अनव॒द्यं युवा॑नं

Halfverse: d    स्वा॒ध्यं॑ जनयत्सू॒दय॑च्च ।।
   स्वा॒ध्य॑म् जनयत् सू॒दय॑त् च ।।
   सुआ॒धियं जनयत् सू॒दय॑च् च ।।


Verse: 9 
Halfverse: a    मनो॒ न यो ऽध्व॑नः स॒द्य एत्येकः॑ स॒त्रा सूरो॒ वस्व॑ ईशे ।
   मनो॒ न यो ऽध्व॑नः स॒द्य एत्य्
   मनः न यः अध्व॑नः स॒द्यः एति
   मनो न यो अध्व॑नः स॒द्य एति

Halfverse: b    एकः॑ स॒त्रा सूरो॒ वस्व॑ ईशे ।
   एकः स॒त्रा सूरः वस्वः ईशे ।
   एकः स॒त्रा सूउरो वस्व ईशे ।

Halfverse: c    राजा॑ना मि॒त्रावरु॑णा सुपा॒णी गोषु॑ प्रि॒यम॒मृतं॒ रक्ष॑माणा ।।
   राजा॑ना मि॒त्रावरु॑णा सुपा॒णी
   राजा॑ना मि॒त्रावरु॑णा सुपा॒णी
   राजा॑ना मि॒त्रावरु॑णा सुपा॒णी

Halfverse: d    गोषु॑ प्रि॒यम॒मृतं॒ रक्ष॑माणा ।।
   गोषु प्रि॒यम् अ॒मृत॑म् रक्ष॑माणा ।।
   गोषु प्रि॒यम् अ॒मृतं रक्ष॑माणा ।।


Verse: 10 
Halfverse: a    मा नो॑ अग्ने स॒ख्या पित्र्या॑णि॒ प्र म॑र्षिष्ठा अ॒भि वि॒दुष्क॒विः सन् ।
   मा नो॑ अग्ने स॒ख्या पित्र्या॑णि
   मा नः अग्ने स॒ख्या पित्र्या॑णि
   मा नो अग्ने सखि॒या पित्रि॑याणि

Halfverse: b    प्र म॑र्षिष्ठा अ॒भि वि॒दुष्क॒विः सन् ।
   प्र म॑र्षिष्ठाः अ॒भि वि॒दुः क॒विः सन् ।
   प्र म॑र्षिष्ठा अ॒भि वि॒दुष् क॒विः सन् ।

Halfverse: c    नभो॒ न रू॒पं ज॑रि॒मा मि॑नाति पु॒रा तस्या॑ अ॒भिश॑स्ते॒रधी॑हि ।।
   नभो॒ न रू॒पं ज॑रि॒मा मि॑नाति
   नभः न रू॒पम् जरि॒मा मि॑नाति
   नभो न रू॒पं ज॑रि॒मा मि॑नाति

Halfverse: d    पु॒रा तस्या॑ अ॒भिश॑स्ते॒रधी॑हि ।।
   पु॒रा तस्याः अ॒भिश॑स्तेः अधि इहि ।।
   पु॒रा तस्या अ॒भिश॑स्तेर् अधी॑हि ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.