TITUS
Rg-Veda: Rg-Veda-Samhita
Part No. 73
Previous part

Hymn: 73 
Verse: 1 
Halfverse: a    र॒यिर्न यः पि॑तृवि॒त्तो व॑यो॒धाः सु॒प्रणी॑तिश्चिकि॒तुषो॒ न शासुः॑ ।
   र॒यिर्न यः पि॑तृवि॒त्तो व॑यो॒धाः
   र॒यिः न यः पि॑तृवि॒त्तः व॑यो॒धाः
   र॒यिर् न यः पि॑तृवि॒त्तो व॑यो॒धाः

Halfverse: b    सु॒प्रणी॑तिश्चिकि॒तुषो॒ न शासुः॑ ।
   सु॒प्रणी॑तिः चिकि॒तुषः न शासुः ।
   सु॒प्रणी॑तिश् चिकि॒तुषो न शासुः ।

Halfverse: c    स्यो॑न॒शीरति॑थि॒र्न प्री॑णा॒नो होते॑व॒ सद्म॑ विध॒तो वि ता॑रीत् ।।
   स्यो॑न॒शीर् ।!। अति॑थि॒र्न प्री॑णा॒नो
   स्यो॑न॒शीः अति॑थिः न प्री॑णा॒नः
   सि॑योन॒शीर् अति॑थिर् न प्रि॑णा॒नो*

Halfverse: d    होते॑व॒ सद्म॑ विध॒तो वि ता॑रीत् ।।
   होता इव सद्म विध॒तः वि ता॑रीत् ।।
   होते॑व सद्म विध॒तो वि ता॑रीत् ।।


Verse: 2 
Halfverse: a    दे॒वो न यः स॑वि॒ता स॒त्यम॑न्मा॒ क्रत्वा॑ नि॒पाति॑ वृ॒जना॑नि॒ विश्वा॑ ।
   दे॒वो न यः स॑वि॒ता स॒त्यम॑न्मा
   दे॒वः न यः स॑वि॒ता स॒त्यम॑न्मा
   दे॒वो न यः स॑वि॒ता स॒त्यम॑न्मा

Halfverse: b    क्रत्वा॑ नि॒पाति॑ वृ॒जना॑नि॒ विश्वा॑ ।
   क्रत्वा नि॒पाति वृ॒जना॑नि विश्वा ।
   क्रत्वा नि॒पाति वृ॒जना॑नि विश्वा ।

Halfverse: c    पु॑रुप्रश॒स्तो अ॒मति॒र्न स॒त्य आ॒त्मेव॒ शेवो॑ दिधि॒षाय्यो॑ भूत् ।।
   पु॑रुप्रश॒स्तो अ॒मति॒र्न स॒त्य
   पु॑रुप्रश॒स्तः अ॒मतिः न स॒त्यः
   पु॑रुप्रश॒स्तो अ॒मति॑र् न स॒त्य

Halfverse: d    आ॒त्मेव॒ शेवो॑ दिधि॒षाय्यो॑ भूत् ।।
   आ॒त्मा इ॑व शेवः दिधि॒षाय्यः भूत् ।।
   आ॒त्मेव शेवो दिधि॒षायि॑यो भूत् ।।


Verse: 3 
Halfverse: a    दे॒वो न यः पृ॑थि॒वीं वि॒श्वधा॑या उप॒क्षेति॑ हि॒तमि॑त्रो॒ न राजा॑ ।
   दे॒वो न यः पृ॑थि॒वीं वि॒श्वधा॑या
   दे॒वः न यः पृ॑थि॒वीम् वि॒श्वधा॑याः
   दे॒वो न यः पृ॑थि॒वीं वि॒श्वधा॑या

Halfverse: b    उप॒क्षेति॑ हि॒तमि॑त्रो॒ न राजा॑ ।
   उ॑प॒क्षेति हि॒तमि॑त्रः न राजा ।
   उ॑प॒क्षेति हि॒तमि॑त्रो न राजा ।

Halfverse: c    पु॑रः॒सदः॑ शर्म॒सदो॒ न वी॒रा अ॑नव॒द्या पति॑जुष्टेव॒ नारी॑ ।।
   पु॑रः॒सदः॑ शर्म॒सदो॒ न वी॒रा
   पु॑रः॒सदः शर्म॒सदः न वी॒राः
   पु॑रः॒सदः शर्म॒सदो न वी॒रा

Halfverse: d    अ॑नव॒द्या पति॑जुष्टेव॒ नारी॑ ।।
   अ॑नव॒द्या पति॑जुष्टा इव नारी ।।
   अ॑नव॒द्या पति॑जुष्टेव नारी ।।


Verse: 4 
Halfverse: a    तं त्वा॒ नरो॒ दम॒ आ नित्य॑मि॒द्धमग्ने॒ सच॑न्त क्षि॒तिषु॑ ध्रु॒वासु॑ ।
   तं त्वा॒ नरो॒ दम॒ आ नित्य॑मि॒द्धम्
   तम् त्वा नरः दमे आ नित्य॑म् इ॒द्धम्
   तं त्वा नरो दम आ नित्य॑म् इ॒द्धम्

Halfverse: b    अग्ने॒ सच॑न्त क्षि॒तिषु॑ ध्रु॒वासु॑ ।
   अग्ने सच॑न्त क्षि॒तिषु ध्रु॒वासु ।
   अग्ने सच॑न्त क्षि॒तिषु ध्रु॒वासु ।

Halfverse: c    अधि॑ द्यु॒म्नं नि द॑धु॒र्भूर्य॑स्मि॒न्भवा॑ वि॒श्वायु॑र्ध॒रुणो॑ रयी॒णाम् ।।
   अधि॑ द्यु॒म्नं नि द॑धु॒र्भूर्य॑स्मिन्
   अधि द्यु॒म्नम् नि द॑धुः भूरि अस्मिन्
   अधि द्यु॒म्नं नि द॑धुर् भूरि अस्मिन्

Halfverse: d    भवा॑ वि॒श्वायु॑र्ध॒रुणो॑ रयी॒णाम् ।।
   भव+ वि॒श्वायुः ध॒रुणः रयी॒णाम् ।।
   भवा वि॒श्वायु॑र् ध॒रुणो रयी॒णाम् ।।


Verse: 5 
Halfverse: a    वि पृक्षो॑ अग्ने म॒घवा॑नो अश्यु॒र्वि सू॒रयो॒ दद॑तो॒ विश्व॒मायुः॑ ।
   वि पृक्षो॑ अग्ने म॒घवा॑नो अश्युर्
   वि पृक्षः अग्ने म॒घवा॑नः अश्युः
   वि पृक्षो अग्ने म॒घवा॑नो अश्युर्

Halfverse: b    वि सू॒रयो॒ दद॑तो॒ विश्व॒मायुः॑ ।
   वि सू॒रयः दद॑तः विश्व॑म् आयुः ।
   वि सू॒रयो दद॑तो विश्व॑म् आयुः ।

Halfverse: c    स॒नेम॒ वाजं॑ समि॒थेष्व॒र्यो भा॒गं दे॒वेषु॒ श्रव॑से॒ दधा॑नाः ।।
   स॒नेम॒ वाजं॑ समि॒थेष्व॒र्यो
   स॒नेम वाज॑म् समि॒थेषु अ॒र्यः
   स॒नेम वाजं समि॒थेषु अ॒र्यो

Halfverse: d    भा॒गं दे॒वेषु॒ श्रव॑से॒ दधा॑नाः ।।
   भा॒गम् दे॒वेषु श्रव॑से दधा॑नाः ।।
   भा॒गं दे॒वेषु श्रव॑से दधा॑नाः ।।


Verse: 6 
Halfverse: a    ऋ॒तस्य॒ हि धे॒नवो॑ वावशा॒नाः स्मदू॑ध्नीः पी॒पय॑न्त॒ द्युभ॑क्ताः ।
   ऋ॒तस्य॒ हि धे॒नवो॑ वावशा॒नाः
   ऋ॒तस्य हि धे॒नवः वावशा॒नाः
   ऋ॒तस्य हि धे॒नवो वावशा॒नाः

Halfverse: b    स्मदू॑ध्नीः पी॒पय॑न्त॒ द्युभ॑क्ताः ।
   स्मदू॑ध्नीः पी॒पय॑न्त द्युभ॑क्ताः ।
   सु॒मदू॑ध्नीः* पी॒पय॑न्त द्युभ॑क्ताः ।

Halfverse: c    प॑रा॒वतः॑ सुम॒तिम्भिक्ष॑माणा॒ वि सिन्ध॑वः स॒मया॑ सस्रु॒रद्रि॑म् ।।
   प॑रा॒वतः॑ सुम॒तिम्भिक्ष॑माणा
   परा॒वतः सुम॒तिम् भिक्ष॑माणाः
   परा॒वतः सुम॒तिम् भिक्ष॑माणा

Halfverse: d    वि सिन्ध॑वः स॒मया॑ सस्रु॒रद्रि॑म् ।।
   वि सिन्ध॑वः स॒मया सस्रुः अद्रि॑म् ।।
   वि सिन्ध॑वः स॒मया सस्रुर् अद्रि॑म् ।।


Verse: 7 
Halfverse: a    त्वे अ॑ग्ने सुम॒तिम्भिक्ष॑माणा दि॒वि श्रवो॑ दधिरे य॒ज्ञिया॑सः ।
   त्वे अ॑ग्ने सुम॒तिम्भिक्ष॑माणा
   त्वे अ॑ग्ने सुम॒तिम् भिक्ष॑माणाः
   तु॒वे अ॑ग्ने सुम॒तिम् भिक्ष॑माणा

Halfverse: b    दि॒वि श्रवो॑ दधिरे य॒ज्ञिया॑सः ।
   दि॒वि श्रवः दधिरे य॒ज्ञिया॑सः ।
   दि॒वि श्रवो दधिरे य॒ज्ञिया॑सः ।

Halfverse: c    नक्ता॑ च च॒क्रुरु॒षसा॒ विरू॑पे कृ॒ष्णं च॒ वर्ण॑मरु॒णं च॒ सं धुः॑ ।।
   नक्ता॑ च च॒क्रुरु॒षसा॒ विरू॑पे
   नक्ता च च॒क्रुः उ॒षसा विरू॑पे
   नक्ता च च॒क्रुर् उ॒षसा विरू॑पे

Halfverse: d    कृ॒ष्णं च॒ वर्ण॑मरु॒णं च॒ सं धुः॑ ।।
   कृ॒ष्णम् च वर्ण॑म् अरु॒णम् च सम् धुः ।।
   कृ॒ष्णं च वर्ण॑म् अरु॒णं च सं धुः ।।


Verse: 8 
Halfverse: a    यान्रा॒ये मर्ता॒न्सुषू॑दो अग्ने॒ ते स्या॑म म॒घवा॑नो व॒यं च॑ ।
   यान्रा॒ये मर्ता॒न्सुषू॑दो अग्ने
   यान् रा॒ये मर्ता॑न् सुषू॑दः अग्ने
   यान् रा॒ये मर्ता॑न् सुषू॑दो अग्ने

Halfverse: b    ते स्या॑म म॒घवा॑नो व॒यं च॑ ।
   ते स्या॑म म॒घवा॑नः व॒यम् च ।
   ते सि॑याम म॒घवा॑नो व॒यं च ।

Halfverse: c    छा॒येव॒ विश्व॒म्भुव॑नं सिसक्ष्यापप्रि॒वान्रोद॑सी अ॒न्तरि॑क्षम् ।।
   छा॒येव॒ विश्व॒म्भुव॑नं सिसक्ष्य्
   छा॒या इ॑व विश्व॑म् भुव॑नम् सिसक्षि
   छा॒येव विश्व॑म् भुव॑नं सिसक्षि

Halfverse: d    आपप्रि॒वान्रोद॑सी अ॒न्तरि॑क्षम् ।।
   आ॑पप्रि॒वान् रोद॑सी अ॒न्तरि॑क्षम् ।।
   आ॑पप्रि॒वान् रोद॑सी अ॒न्तरि॑क्षम् ।।


Verse: 9 
Halfverse: a    अर्व॑द्भिरग्ने॒ अर्व॑तो॒ नृभि॒र्नॄन्वी॒रैर्वी॒रान्व॑नुयामा॒ त्वोताः॑ ।
   अर्व॑द्भिरग्ने॒ अर्व॑तो॒ नृभि॒र्नॄन्
   अर्व॑द्भिः अग्ने अर्व॑तः नृभिः नॄन्
   अर्व॑द्भिर् अग्ने अर्व॑तो नृभि॑र् नॄन्

Halfverse: b    वी॒रैर्वी॒रान्व॑नुयामा॒ त्वोताः॑ ।
   वी॒रैः वी॒रान् वनुयाम+ त्वोताः ।
   वी॒रैर् वी॒रान् वनुयामा तु॒वोताः ।

Halfverse: c    ई॑शा॒नासः॑ पितृवि॒त्तस्य॑ रा॒यो वि सू॒रयः॑ श॒तहि॑मा नो अश्युः ।।
   ई॑शा॒नासः॑ पितृवि॒त्तस्य॑ रा॒यो
   ई॑शा॒नासः पितृवि॒त्तस्य रा॒यः
   ई॑शा॒नासः पितृवि॒त्तस्य रा॒यो

Halfverse: d    वि सू॒रयः॑ श॒तहि॑मा नो अश्युः ।।
   वि सू॒रयः श॒तहि॑माः नः अश्युः ।।
   वि सू॒रयः श॒तहि॑मा नो अश्युः ।।


Verse: 10 
Halfverse: a    ए॒ता ते॑ अग्न उ॒चथा॑नि वेधो॒ जुष्टा॑नि सन्तु॒ मन॑से हृ॒दे च॑ ।
   ए॒ता ते॑ अग्न उ॒चथा॑नि वेधो
   ए॒ता ते अग्ने उ॒चथा॑नि वेधः
   ए॒ता ते अग्न उ॒चथा॑नि वेधो

Halfverse: b    जुष्टा॑नि सन्तु॒ मन॑से हृ॒दे च॑ ।
   जुष्टा॑नि सन्तु मन॑से हृ॒दे च ।
   जुष्टा॑नि सन्तु मन॑से हृ॒दे च ।

Halfverse: c    श॒केम॑ रा॒यः सु॒धुरो॒ यमं॒ ते ऽधि॒ श्रवो॑ दे॒वभ॑क्तं॒ दधा॑नाः ।।
   श॒केम॑ रा॒यः सु॒धुरो॒ यमं॒ ते
   श॒केम रा॒यः सु॒धुरः यम॑म् ते
   श॒केम रा॒यः सु॒धुरो यमं ते

Halfverse: d    ऽधि॒ श्रवो॑ दे॒वभ॑क्तं॒ दधा॑नाः ।।
   अधि श्रवः दे॒वभ॑क्तम् दधा॑नाः ।।
   अधि श्रवो दे॒वभ॑क्तं दधा॑नाः ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.