TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 74

Hymn: 74
Verse: 1
Halfverse: a    उ॑पप्र॒यन्तो॑ अध्व॒रम्मन्त्रं॑ वोचेमा॒ग्नये॑ ।
   उ॑पप्र॒यन्तो॑ अध्व॒रम्
   उपप्र॒यन्तः अध्व॒रम्
   उपप्र॒यन्तो अध्व॒रम्

Halfverse: b    मन्त्रं॑ वोचेमा॒ग्नये॑ ।
   मन्त्र॑म् वोचेम अ॒ग्नये ।
   मन्त्रं वोचेम अ॒ग्नये ।

Halfverse: c    आ॒रे अ॒स्मे च॑ शृण्व॒ते ।।
   आ॒रे अ॒स्मे च॑ शृण्व॒ते ।।
   आ॒रे अ॒स्मे च शृण्व॒ते ।।
   आ॒रे अ॒स्मे च शृण्व॒ते ।।

Verse: 2
Halfverse: a    यः स्नीहि॑तीषु पू॒र्व्यः सं॑जग्मा॒नासु॑ कृ॒ष्टिषु॑ ।
   यः स्नीहि॑तीषु पू॒र्व्यः
   यः स्नीहि॑तीषु पू॒र्व्यः
   यः स्नीहि॑तीषु पूर्वि॒यः

Halfverse: b    सं॑जग्मा॒नासु॑ कृ॒ष्टिषु॑ ।
   सं॑जग्मा॒नासु कृ॒ष्टिषु ।
   सं॑जग्मा॒नासु कृ॒ष्टिषु ।

Halfverse: c    अर॑क्षद्दा॒शुषे॒ गय॑म् ।।
   अर॑क्षद्दा॒शुषे॒ गय॑म् ।।
   अर॑क्षत् दा॒शुषे गय॑म् ।।
   अर॑क्षद् दा॒शुषे गय॑म् ।।

Verse: 3
Halfverse: a    उ॒त ब्रु॑वन्तु ज॒न्तव॒ उद॒ग्निर्वृ॑त्र॒हाज॑नि ।
   उ॒त ब्रु॑वन्तु ज॒न्तव
   उ॒त ब्रु॑वन्तु ज॒न्तवः
   उ॒त ब्रु॑वन्तु ज॒न्तव

Halfverse: b    उद॒ग्निर्वृ॑त्र॒हाज॑नि ।
   उत् अ॒ग्निः वृ॑त्र॒हा अ॑जनि ।
   उद् अ॒ग्निर् वृत्र॒हाज॑नि ।

Halfverse: c    ध॑नंज॒यो रणे॑रणे ।।
   ध॑नंज॒यो रणे॑रणे ।।
   ध॑नंज॒यः रणे॑रणे ।।
   ध॑नंज॒यो रणे॑रणे ।।

Verse: 4
Halfverse: a    यस्य॑ दू॒ तोअसि॒ क्षये॒ वेषि॑ ह॒व्यानि॑ वी॒तये॑ ।
   यस्य॑ दू॒तो असि॒ क्षये
   यस्य दू॒तः असि क्षये
   यस्य दू॒तो असि क्षये

Halfverse: b    वेषि॑ ह॒व्यानि॑ वी॒तये॑ ।
   वेषि ह॒व्यानि वी॒तये ।
   वेषि ह॒व्यानि वी॒तये ।

Halfverse: c    द॒स्मत्कृ॒णोष्य॑ध्व॒रम् ।।
   द॒स्मत्कृ॒णोष्य॑ध्व॒रम् ।।
   द॒स्मत् कृ॒णोषि अध्व॒रम् ।।
   द॒स्मत् कृ॒णोषि अध्व॒रम् ।।

Verse: 5
Halfverse: a    तमित्सु॑ह॒व्यम॑ङ्गिरः सुदे॒वं स॑हसो यहो ।
   तमित्सु॑ह॒व्यम॑ङ्गिरः
   तम् इत् सुह॒व्यम् अङ्गिरः
   तम् इत् सुह॒व्यम् अङ्गिरः

Halfverse: b    सुदे॒वं स॑हसो यहो ।
   सु॑दे॒वम् सहसः यहो ।
   सु॑दे॒वं स॑हसो यहो ।

Halfverse: c    जना॑ आहुः सुब॒र्हिष॑म् ।।
   जना॑ आहुः सुब॒र्हिष॑म् ।।
   जनाः आहुः सुब॒र्हिष॑म् ।।
   जना आहुः सुब॒र्हिष॑म् ।।

Verse: 6
Halfverse: a    आ च॒ वहा॑सि॒ ताँ इ॒ह दे॒वाँ उप॒ प्रश॑स्तये ।
   आ च॒ वहा॑सि॒ ताँ इ॒ह
   आ च वहा॑सि तान् इ॒ह
   आ च वहा॑सि ताँ इ॒ह

Halfverse: b    दे॒वाँ उप॒ प्रश॑स्तये ।
   दे॒वान् उप प्रश॑स्तये ।
   दे॒वाँ उप प्रश॑स्तये ।

Halfverse: c    ह॒व्या सु॑श्चन्द्र वी॒तये॑ ।।
   ह॒व्या सु॑श्चन्द्र वी॒तये॑ ।।
   ह॒व्या सु॑श्चन्द्र वी॒तये ।।
   ह॒व्या सु॑श्चन्द्र वी॒तये ।।

Verse: 7
Halfverse: a    न योरु॑प॒ब्दिरश्व्यः॑ शृ॒ण्वे रथ॑स्य॒ कच्च॒न ।
   न योरु॑प॒ब्दिरश्व्यः
   न योः उ॑प॒ब्दिः अश्व्यः
   न योर् उप॒ब्दिर् अश्वि॑यः

Halfverse: b    शृ॒ण्वे रथ॑स्य॒ कच्च॒न ।
   शृ॒ण्वे रथ॑स्य कत् च॒न ।
   शृ॒ण्वे रथ॑स्य कच् च॒न ।

Halfverse: c    यद॑ग्ने॒ यासि॑ दू॒त्य॑म् ।।
   यद॑ग्ने॒ यासि॑ दू॒त्य॑म् ।।
   यत् अग्ने यासि दू॒त्य॑म् ।।
   यद् अग्ने यासि दू॒तिय॑म् ।।

Verse: 8
Halfverse: a    त्वोतो॑ वा॒ज्यह्र॑यो॒ ऽभि पूर्व॑स्मा॒दप॑रः ।
   त्वोतो॑ वा॒ज्यह्र॑यो
   त्वोतः वा॒जी अह्र॑यः
   तु॒वोतो वा॒जी अह्र॑यो

Halfverse: b    ऽभि पूर्व॑स्मा॒दप॑रः ।
   अ॒भि पूर्व॑स्मात् अप॑रः ।
   अ॒भि पूर्व॑स्माद् अप॑रः ।

Halfverse: c    प्र दा॒श्वाँ अ॑ग्ने अस्थात् ।।
   प्र दा॒श्वाँ अ॑ग्ने अस्थात् ।।
   प्र दा॒श्वान् अग्ने अस्थात् ।।
   प्र दा॒श्वाँ अ॑ग्ने अस्थाअत् ।।

Verse: 9
Halfverse: a    उ॒त द्यु॒मत्सु॒वीर्य॑म्बृ॒हद॑ग्ने विवाससि ।
   उ॒त द्यु॒मत्सु॒वीर्य॑म्
   उ॒त द्यु॒मत् सु॒वीर्य॑म्
   उ॒त द्यु॒मत् सु॒वीरि॑यम्

Halfverse: b    बृ॒हद॑ग्ने विवाससि ।
   बृ॒हत् अग्ने विवाससि ।
   बृ॒हद् अग्ने विवाससि ।

Halfverse: c    दे॒वेभ्यो॑ देव दा॒शुषे॑ ।।
   दे॒वेभ्यो॑ देव दा॒शुषे॑ ।।
   दे॒वेभ्यः देव दा॒शुषे ।।
   दे॒वेभ्यो देव दा॒शुषे ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.