TITUS
Rg-Veda: Rg-Veda-Samhita
Part No. 80
Previous part

Hymn: 80 
Verse: 1 
Halfverse: a    इ॒त्था हि सोम॒ इन्मदे॑ ब्र॒ह्मा च॒कार॒ वर्ध॑नम् ।
   इ॒त्था हि सोम॒ इन्मदे
   इ॒त्था हि सोमे इत् मदे
   इ॒त्था हि सोम इन् मदे

Halfverse: b    ब्र॒ह्मा च॒कार॒ वर्ध॑नम् ।
   ब्र॒ह्मा च॒कार वर्ध॑नम् ।
   ब्र॒ह्मा च॒कार वर्ध॑नम् ।

Halfverse: c    शवि॑ष्ठ वज्रि॒न्नोज॑सा पृथि॒व्या निः श॑शा॒ अहि॒मर्च॒न्ननु॑ स्व॒राज्य॑म् ।।
   शवि॑ष्ठ वज्रि॒न्नोज॑सा
   शवि॑ष्ठ वज्रिन् ओज॑सा
   शवि॑ष्ठ वज्रिन् ओज॑सा

Halfverse: d    पृथि॒व्या निः श॑शा॒ अहि॑म्
   पृथि॒व्याः निः श॑शाः अहि॑म्
   पृथि॒व्या निः श॑शा अहि॑म्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 2 
Halfverse: a    स त्वा॑मद॒द्वृषा॒ मदः॒ सोमः॑ श्ये॒नाभृ॑तः सु॒तः ।
   स त्वा॑मद॒द्वृषा॒ मदः
   स त्वा अमदत् वृषा मदः
   स त्वा॑मदद् वृषा मदः

Halfverse: b    सोमः॑ श्ये॒नाभृ॑तः सु॒तः ।
   सोमः श्ये॒नाभृ॑तः सु॒तः ।
   सोमः श्ये॒नाभृ॑तः सु॒तः ।

Halfverse: c    येना॑ वृ॒त्रं निर॒द्भ्यो ज॒घन्थ॑ वज्रि॒न्नोज॒सार्च॒न्ननु॑ स्व॒राज्य॑म् ।।
   येना॑ वृ॒त्रं निर॒द्भ्यो
   येन+ वृ॒त्रम् निः अ॒द्भ्यः
   येना वृ॒त्रं निर् अद्भि॒यो

Halfverse: d    ज॒घन्थ॑ वज्रि॒न्नोज॑सा
   ज॒घन्थ वज्रिन् ओज॑सा
   ज॒घन्थ वज्रिन् ओज॑सा

Halfverse: e     अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 3 
Halfverse: a    प्रेह्य॒भी॑हि ।!। धृ॑ष्णु॒हि न ते॒ वज्रो॒ नि यं॑सते ।
   प्रेह्य॒भी॑हि ।!। धृ॑ष्णु॒हि
   प्र इ॑हि अ॒भि इ॑हि धृष्णु॒हि
   प्रेहि अ॒भी॑हि ।!। धृ॑ष्णु॒हि

Halfverse: b    न ते॒ वज्रो॒ नि यं॑सते ।
   न ते वज्रः नि यं॑सते ।
   न ते वज्रो नि यं॑सते ।

Halfverse: c    इन्द्र॑ नृ॒म्णं हि ते॒ शवो॒ हनो॑ वृ॒त्रं जया॑ अ॒पो ऽर्च॒न्ननु॑ स्व॒राज्य॑म् ।।
   इन्द्र॑ नृ॒म्णं हि ते॒ शवो
   इन्द्र नृ॒म्णम् हि ते शवः
   इन्द्र नृ॒म्णं हि ते शवो

Halfverse: d    हनो॑ वृ॒त्रं जया॑ अ॒पो
   हनः वृ॒त्रम् जयाः अ॒पः
   हनो वृ॒त्रं जया अ॒पो

Halfverse: e    ऽर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 4 
Halfverse: a    निरि॑न्द्र॒ भूम्या॒ अधि॑ वृ॒त्रं ज॑घन्थ॒ निर्दि॒वः ।
   निरि॑न्द्र॒ भूम्या॒ अधि
   निः इ॑न्द्र भूम्याः अधि
   निर् इन्द्र भूमि॑या अधि

Halfverse: b    वृ॒त्रं ज॑घन्थ॒ निर्दि॒वः ।
   वृ॒त्रम् जघन्थ निः दि॒वः ।
   वृ॒त्रं ज॑घन्थ निर् दि॒वः ।

Halfverse: c    सृ॒जा म॒रुत्व॑ती॒रव॑ जी॒वध॑न्या इ॒मा अ॒पो ऽर्च॒न्ननु॑ स्व॒राज्य॑म् ।।
   सृ॒जा म॒रुत्व॑ती॒रव
   सृ॒ज+ म॒रुत्व॑तीः अव
   सृ॒जा म॒रुत्व॑तीर् अव

Halfverse: d    जी॒वध॑न्या इ॒मा अ॒पो
   जी॒वध॑न्याः इ॒माः अ॒पः
   जी॒वध॑न्या इ॒मा अ॒पो

Halfverse: e    ऽर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 5 
Halfverse: a    इन्द्रो॑ वृ॒त्रस्य॒ दोध॑तः॒ सानुं॒ वज्रे॑ण हीळि॒तः ।
   इन्द्रो॑ वृ॒त्रस्य॒ दोध॑तः
   इन्द्रः वृ॒त्रस्य दोध॑तः
   इन्द्रो वृ॒त्रस्य दोध॑तः

Halfverse: b    सानुं॒ वज्रे॑ण हीळि॒तः ।
   सानु॑म् वज्रे॑ण हीळि॒तः ।
   सानुं वज्रे॑ण हीळि॒तः ।

Halfverse: c    अ॑भि॒क्रम्याव॑ जिघ्नते॒ ऽपः सर्मा॑य चो॒दय॒न्नर्च॒न्ननु॑ स्व॒राज्य॑म् ।।
   अ॑भि॒क्रम्याव॑ जिघ्नते
   अभि॒क्रम्य अव जिघ्नते
   अभि॒क्रम्याव जिघ्नते

Halfverse: d    ऽपः सर्मा॑य चो॒दय॑न्न्
   अ॒पः सर्मा॑य चो॒दय॑न्
   अ॒पः सर्मा॑य चो॒दय॑न्न्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 6 
Halfverse: a    अधि॒ सानौ॒ नि जि॑घ्नते॒ वज्रे॑ण श॒तप॑र्वणा ।
   अधि॒ सानौ॒ नि जि॑घ्नते
   अधि सानौ नि जि॑घ्नते
   अधि सानौ नि जि॑घ्नते

Halfverse: b    वज्रे॑ण श॒तप॑र्वणा ।
   वज्रे॑ण श॒तप॑र्वणा ।
   वज्रे॑ण श॒तप॑र्वणा ।

Halfverse: c    म॑न्दा॒न इन्द्रो॒ अन्ध॑सः॒ सखि॑भ्यो गा॒तुमि॑छ॒त्यर्च॒न्ननु॑ स्व॒राज्य॑म् ।।
   म॑न्दा॒न इन्द्रो॒ अन्ध॑सः
   मन्दा॒नः इन्द्रः अन्ध॑सः
   मन्दा॒न इन्द्रो अन्ध॑सः

Halfverse: d    सखि॑भ्यो गा॒तुमि॑छत्य्
   सखि॑भ्यः गा॒तुम् इछति
   सखि॑भ्यो गा॒तुम् इछति

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 7 
Halfverse: a    इन्द्र॒ तुभ्य॒मिद॑द्रि॒वो ऽनु॑त्तं वज्रिन्वी॒र्य॑म् ।
   इन्द्र॒ तुभ्य॒मिद॑द्रि॒वो
   इन्द्र तुभ्य॑म् इत् अद्रिवः
   इन्द्र तुभ्य॑म् इद् अद्रिवो

Halfverse: b    ऽनुत्तं वज्रिन्वी॒र्य॑म् ।
   अनु॑त्तम् वज्रिन् वी॒र्य॑म् ।
   अनु॑त्तं वज्रि* वी॒रिय॑म् ।

Halfverse: c    यद्ध॒ त्यम्मा॒यिन॑म्मृ॒गं तमु॒ त्वम्मा॒यया॑वधी॒रर्च॒न्ननु॑ स्व॒राज्य॑म् ।।
   यद्ध॒ त्यम्मा॒यिन॑म्मृ॒गं
   यत् ह त्यम् मा॒यिन॑म् मृ॒गम्
   यद् ध त्यम् मा॒यिन॑म् मृ॒गं

Halfverse: d    तमु॒ त्वम्मा॒यया॑वधीर्
   तम् उ त्वम् मा॒यया अवधीः
   तम् उ त्वम् मा॒यया॑वधीर्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 8 
Halfverse: a    वि ते॒ वज्रा॑सो अस्थिरन्नव॒तिं ना॒व्या॒ अनु॑ ।
   वि ते॒ वज्रा॑सो अस्थिरन्
   वि ते वज्रा॑सः अस्थिरन्
   वि ते वज्रा॑सो अस्थिरन्

Halfverse: b    नव॒तिं ना॒व्या॒ अनु॑ ।
   न॑व॒तिम् ना॒व्याः अनु ।
   न॑व॒तिं ना॒विया अनु ।

Halfverse: c    म॒हत्त॑ इन्द्र वी॒र्य॑म्बा॒ह्वोस्ते॒ बलं॑ हि॒तमर्च॒न्ननु॑ स्व॒राज्य॑म् ।।
   म॒हत्त॑ इन्द्र वी॒र्य॑म्
   म॒हत् ते इन्द्र वी॒र्य॑म्
   म॒हत् त इन्द्र वी॒रिय॑म्

Halfverse: d    बा॒ह्वोस्ते॒ बलं॑ हि॒तम्
   बा॒ह्वोः ते बल॑म् हि॒तम्
   बाहु॒वोस् ते बलं हि॒तम्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 9 
Halfverse: a    स॒हस्रं॑ सा॒कम॑र्चत॒ परि॑ ष्टोभत विंश॒तिः ।
   स॒हस्रं॑ सा॒कम॑र्चत
   स॒हस्र॑म् सा॒कम् अर्चत
   स॒हस्रं सा॒कम् अर्चत

Halfverse: b    परि॑ ष्टोभत विंश॒तिः ।
   परि स्तोभत विंश॒तिः ।
   परि ष्टोभत विंश॒तिः ।

Halfverse: c    श॒तैन॒मन्व॑नोनवु॒रिन्द्रा॑य॒ ब्रह्मोद्य॑त॒मर्च॒न्ननु॑ स्व॒राज्य॑म् ।।
   श॒तैन॒मन्व॑नोनवुर्
   श॒ता ए॑नम् अनु अनोनवुः
   श॒तैन॑म् अन्व् अनोनवुर्

Halfverse: d    इन्द्रा॑य॒ ब्रह्मोद्य॑तम्
   इन्द्रा॑य ब्रह्म उद्य॑तम्
   इन्द्रा॑य ब्रह्म उद्य॑तम्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 10 
Halfverse: a    इन्द्रो॑ वृ॒त्रस्य॒ तवि॑षीं॒ निर॑ह॒न्सह॑सा॒ सहः॑ ।
   इन्द्रो॑ वृ॒त्रस्य॒ तवि॑षीं
   इन्द्रः वृ॒त्रस्य तवि॑षीम्
   इन्द्रो वृ॒त्रस्य तवि॑षीं

Halfverse: b    निर॑ह॒न्सह॑सा॒ सहः॑ ।
   निः अ॑हन् सह॑सा सहः ।
   निर् अहन् सह॑सा सहः ।

Halfverse: c    म॒हत्तद॑स्य॒ पौंस्यं॑ वृ॒त्रं ज॑घ॒न्वाँ अ॑सृज॒दर्च॒न्ननु॑ स्व॒राज्य॑म् ।।
   म॒हत्तद॑स्य॒ पौंस्यं
   म॒हत् तत् अस्य पौंस्य॑म्
   म॒हत् तद् अस्य पौंसि॑यं

Halfverse: d    वृ॒त्रं ज॑घ॒न्वाँ अ॑सृजद्
   वृ॒त्रम् जघ॒न्वान् असृजत्
   वृ॒त्रं ज॑घ॒न्वाँ अ॑सृजद्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 11 
Halfverse: a    इ॒मे चि॒त्तव॑ म॒न्यवे॒ वेपे॑ते भि॒यसा॑ म॒ही ।
   इ॒मे चि॒त्तव॑ म॒न्यवे
   इ॒मे चि॑त् तव म॒न्यवे
   इ॒मे चि॑त् तव म॒न्यवे

Halfverse: b    वेपे॑ते भि॒यसा॑ म॒ही ।
   वेपे॑ते भि॒यसा म॒ही ।
   वेपे॑ते भि॒यसा म॒ही ।

Halfverse: c    यदि॑न्द्र वज्रि॒न्नोज॑सा वृ॒त्रम्म॒रुत्वाँ॒ अव॑धी॒रर्च॒न्ननु॑ स्व॒राज्य॑म् ।।
   यदि॑न्द्र वज्रि॒न्नोज॑सा
   यत् इन्द्र वज्रिन् ओज॑सा
   यद् इन्द्र वज्रिन् ओज॑सा

Halfverse: d    वृ॒त्रम्म॒रुत्वाँ॒ अव॑धीर्
   वृ॒त्रम् म॒रुत्वा॑न् अव॑धीः
   वृ॒त्रम् म॒रुत्वाँ अव॑धीर्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 12 
Halfverse: a    न वेप॑सा॒ न त॑न्य॒तेन्द्रं॑ वृ॒त्रो वि बी॑भयत् ।
   न वेप॑सा॒ न त॑न्य॒ता
   न वेप॑सा न त॑न्य॒ता
   न वेप॑सा न त॑न्य॒ता

Halfverse: b     इन्द्रं॑ वृ॒त्रो वि बी॑भयत् ।
   इन्द्र॑म् वृ॒त्रः वि बी॑भयत् ।
   इन्द्रं वृ॒त्रो वि बी॑भयत् ।

Halfverse: c    अ॒भ्ये॑नं॒ वज्र॑ आय॒सः स॒हस्र॑भृष्टिराय॒तार्च॒न्ननु॑ स्व॒राज्य॑म् ।।
   अ॒भ्ये॑नं॒ वज्र॑ आय॒सः
   अ॒भि ए॑नम् वज्रः आय॒सः
   अ॑भ्य् ए॑नं वज्र आय॒सः

Halfverse: d    स॒हस्र॑भृष्टिरायत
   स॒हस्र॑भृष्टिः आयत
   स॒हस्र॑भृष्टिर् आयत

Halfverse: e     अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 13 
Halfverse: a    यद्वृ॒त्रं तव॑ चा॒शनिं॒ वज्रे॑ण स॒मयो॑धयः ।
   यद्वृ॒त्रं तव॑ चा॒शनिं
   यत् वृ॒त्रम् तव च अ॒शनि॑म्
   यद् वृ॒त्रं तव चा॒शनिं

Halfverse: b    वज्रे॑ण स॒मयो॑धयः ।
   वज्रे॑ण स॒मयो॑धयः ।
   वज्रे॑ण स॒मयो॑धयः ।

Halfverse: c    अहि॑मिन्द्र॒ जिघां॑सतो दि॒वि ते॑ बद्बधे॒ शवो ऽर्च॒न्ननु॑ स्व॒राज्य॑म् ।।
   अहि॑मिन्द्र॒ जिघां॑सतो
   अहि॑म् इन्द्र जिघां॑सतः
   अहि॑म् इन्द्र जिघां॑सतो

Halfverse: d    दि॒वि ते॑ बद्बधे॒ शवो
   दि॒वि ते बद्बधे शवः
   दि॒वि ते बद्बधे शवो

Halfverse: e    ऽर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 14 
Halfverse: a    अ॑भिष्ट॒ने ते॑ अद्रिवो॒ यत्स्था जग॑च्च रेजते ।
   अ॑भिष्ट॒ने ते॑ अद्रिवो
   अभिष्ट॒ने ते अद्रिवः
   अभिष्ट॒ने ते अद्रिवो

Halfverse: b    यत्स्था जग॑च्च रेजते ।
   यत् स्थाः जग॑त् च रेजते ।
   यत् स्था जग॑च् च रेजते ।

Halfverse: c    त्वष्टा॑ चि॒त्तव॑ म॒न्यव॒ इन्द्र॑ वेवि॒ज्यते॑ भि॒यार्च॒न्ननु॑ स्व॒राज्य॑म् ।।
   त्वष्टा॑ चि॒त्तव॑ म॒न्यव
   त्वष्टा चित् तव म॒न्यवे
   त्वष्टा चित् तव म॒न्यव

Halfverse: d    इन्द्र॑ वेवि॒ज्यते॑ भि॒या
   इन्द्र वेवि॒ज्यते भि॒या
   इन्द्र वेवि॒ज्यते भि॒या

Halfverse: e     अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 15 
Halfverse: a    न॒हि नु याद॑धी॒मसीन्द्रं॒ को वी॒र्या॑ प॒रः ।
   न॒हि नु याद॑धी॒मसि
   न॒हि नु यात् अधी॒मसि
   न॒हि नु याद् अधी॒मसि

Halfverse: b     इन्द्रं॒ को वी॒र्या॑ प॒रः ।
   इन्द्र॑म् कः वी॒र्या प॒रः ।
   इन्द्रं को वी॒रिया प॒रः ।

Halfverse: c    तस्मि॑न्नृ॒म्णमु॒त क्रतुं॑ दे॒वा ओजां॑सि॒ सं द॑धु॒रर्च॒न्ननु॑ स्व॒राज्य॑म् ।।
   तस्मि॑न्नृ॒म्णमु॒त क्रतुं
   तस्मि॑न् नृ॒म्णम् उ॒त क्रतु॑म्
   तस्मि॑न् नृ॒म्णम् उ॒त क्रतुं

Halfverse: d    दे॒वा ओजां॑सि॒ सं द॑धुर्
   दे॒वाः ओजां॑सि सम् दधुः
   दे॒वा ओजां॑सि सं द॑धुर्

Halfverse: e    अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Verse: 16 
Halfverse: a    यामथ॑र्वा॒ मनु॑ष्पि॒ता द॒ध्यङ्धिय॒मत्न॑त ।
   यामथ॑र्वा॒ मनु॑ष्पि॒ता
   याम् अथ॑र्वा मनुः पि॒ता
   याम् अथ॑र्वा मनु॑ष् पि॒ता

Halfverse: b    द॒ध्यङ्धिय॒मत्न॑त ।
   द॒ध्यङ् धिय॑म् अत्न॑त ।
   द॒धिअङ् धिय॑म् अत्न॑त ।

Halfverse: c    तस्मि॒न्ब्रह्मा॑णि पू॒र्वथेन्द्र॑ उ॒क्था सम॑ग्म॒तार्च॒न्ननु॑ स्व॒राज्य॑म् ।।
   तस्मि॒न्ब्रह्मा॑णि पू॒र्वथा
   तस्मि॑न् ब्रह्मा॑णि पू॒र्वथा
   तस्मि॑न् ब्रह्मा॑णि पू॒र्वथा

Halfverse: d     इन्द्र॑ उ॒क्था सम॑ग्मत
   इन्द्रे उ॒क्था सम् अग्मत
   इन्द्र उ॒क्था सम् अग्मत

Halfverse: e     अर्च॒न्ननु॑ स्व॒राज्य॑म् ।।
   अर्च॑न् अनु स्व॒राज्य॑म् ।।
   अर्च॑न्न् अनु स्व॒राजि॑यम् ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.