TITUS
Rg-Veda: Rg-Veda-Samhita
Part No. 83
Previous part

Hymn: 83 
Verse: 1 
Halfverse: a    अश्वा॑वति प्रथ॒मो गोषु॑ गछति सुप्रा॒वीरि॑न्द्र॒ मर्त्य॒स्तवो॒तिभिः॑ ।
   अश्वा॑वति प्रथ॒मो गोषु॑ गछति
   अश्वा॑वति प्रथ॒मः गोषु गछति
   अश्वा॑वति प्रथ॒मो गोषु गछति

Halfverse: b    सुप्रा॒वीरि॑न्द्र॒ मर्त्य॒स्तवो॒तिभिः॑ ।
   सु॑प्रा॒वीः इ॑न्द्र मर्त्यः तव ऊ॒तिभिः ।
   सु॑प्रा॒वीर् इन्द्र मर्ति॑यस् तवो॒तिभिः ।

Halfverse: c    तमित्पृ॑णक्षि॒ वसु॑ना॒ भवी॑यसा॒ सिन्धु॒मापो॒ यथा॒भितो॒ विचे॑तसः ।।
   तमित्पृ॑णक्षि॒ वसु॑ना॒ भवी॑यसा
   तम् इत् पृणक्षि वसु॑ना भवी॑यसा
   तम् इत् पृणक्षि वसु॑ना भवी॑यसा

Halfverse: d    सिन्धु॒मापो॒ यथा॒भितो॒ विचे॑तसः ।।
   सिन्धु॑म् आपः यथा अ॒भितः विचे॑तसः ।।
   सिन्धु॑म् आपो यथा॒भितो विचे॑तसः ।।


Verse: 2 
Halfverse: a    आपो॒ न दे॒वीरुप॑ यन्ति हो॒त्रिय॑म॒वः प॑श्यन्ति॒ वित॑तं॒ यथा॒ रजः॑ ।
   आपो॒ न दे॒वीरुप॑ यन्ति हो॒त्रिय॑म्
   आपः न दे॒वीः उप यन्ति हो॒त्रिय॑म्
   आपो न दे॒वीर् उप यन्ति हो॒त्रिय॑म्

Halfverse: b    अ॒वः प॑श्यन्ति॒ वित॑तं॒ यथा॒ रजः॑ ।
   अ॒वः प॑श्यन्ति वित॑तम् यथा रजः ।
   अ॒वः प॑श्यन्ति वित॑तं यथा रजः ।

Halfverse: c    प्रा॒चैर्दे॒वासः॒ प्र ण॑यन्ति देव॒युम्ब्र॑ह्म॒प्रियं॑ जोषयन्ते व॒रा इ॑व ।।
   प्रा॒चैर्दे॒वासः॒ प्र ण॑यन्ति देव॒युम्
   प्रा॒चैः दे॒वासः प्र न॑यन्ति देव॒युम्
   प्रा॒चैर् दे॒वासः प्र ण॑यन्ति देव॒युम्

Halfverse: d    ब्रह्म॒प्रियं॑ जोषयन्ते व॒रा इ॑व ।।
   ब्र॑ह्म॒प्रिय॑म् जोषयन्ते व॒राः इ॑व ।।
   ब्र॑ह्म॒प्रियं जोषयन्ते व॒रा इ॑व ।।


Verse: 3 
Halfverse: a    अधि॒ द्वयो॑रदधा उ॒क्थ्यं॒ वचो॑ य॒तस्रु॑चा मिथु॒ना या स॑प॒र्यतः॑ ।
   अधि॒ द्वयो॑रदधा उ॒क्थ्यं॒ वचो
   अधि द्वयोः अदधाः उ॒क्थ्य॑म् वचः
   अधि द्वयो॑र् अदधा उ॒क्थियं वचो

Halfverse: b    य॒तस्रु॑चा मिथु॒ना या स॑प॒र्यतः॑ ।
   य॒तस्रु॑चा मिथु॒ना या स॑प॒र्यतः ।
   य॒तस्रु॑चा मिथु॒ना या स॑प॒र्यतः ।

Halfverse: c    असं॑यत्तो व्र॒ते ते॑ क्षेति॒ पुष्य॑ति भ॒द्रा श॒क्तिर्यज॑मानाय सुन्व॒ते ।।
   असं॑यत्तो व्र॒ते ते॑ क्षेति॒ पुष्य॑ति
   असं॑यत्तः व्र॒ते ते क्षेति पुष्य॑ति
   असं॑यत्तो व्र॒ते ते क्षेति पुष्य॑ति

Halfverse: d    भ॒द्रा श॒क्तिर्यज॑मानाय सुन्व॒ते ।।
   भ॒द्रा श॒क्तिः यज॑मानाय सुन्व॒ते ।।
   भ॒द्रा श॒क्तिर् यज॑मानाय सुन्व॒ते ।।


Verse: 4 
Halfverse: a    आदङ्गि॑राः प्रथ॒मं द॑धिरे॒ वय॑ इ॒द्धाग्न॑यः॒ शम्या॒ ये सु॑कृ॒त्यया॑ ।
   आदङ्गि॑राः प्रथ॒मं द॑धिरे॒ वय
   आत् अङ्गि॑राः प्रथ॒मम् दधिरे वयः
   आद् अङ्गि॑राः प्रथ॒मं द॑धिरे वय

Halfverse: b    इ॒द्धाग्न॑यः॒ शम्या॒ ये सु॑कृ॒त्यया॑ ।
   इ॒द्धाग्न॑यः शम्या ये सु॑कृ॒त्यया ।
   इ॒द्धाग्न॑यः शमि॑या ये सु॑कृ॒त्यया ।

Halfverse: c    सर्व॑म्प॒णेः सम॑विन्दन्त॒ भोज॑न॒मश्वा॑वन्तं॒ गोम॑न्त॒मा प॒शुं नरः॑ ।।
   सर्व॑म्प॒णेः सम॑विन्दन्त॒ भोज॑नम्
   सर्व॑म् प॒णेः सम् अविन्दन्त भोज॑नम्
   सर्व॑म् प॒णेः सम् अविन्दन्त भोज॑नम्

Halfverse: d    अश्वा॑वन्तं॒ गोम॑न्त॒मा प॒शुं नरः॑ ।।
   अश्वा॑वन्तम् गोम॑न्तम् आ प॒शुम् नरः ।।
   अश्वा॑वन्तं गोम॑न्तम् आ प॒शुं नरः ।।


Verse: 5 
Halfverse: a    य॒ज्ञैरथ॑र्वा प्रथ॒मः प॒थस्त॑ते॒ ततः॒ सूर्यो॑ व्रत॒पा वे॒न आज॑नि ।
   य॒ज्ञैरथ॑र्वा प्रथ॒मः प॒थस्त॑ते
   य॒ज्ञैः अथ॑र्वा प्रथ॒मः प॒थः त॑ते
   य॒ज्ञैर् अथ॑र्वा प्रथ॒मः प॒थस् तते

Halfverse: b    ततः॒ सूर्यो॑ व्रत॒पा वे॒न आज॑नि ।
   ततः सूर्यः व्रत॒पाः वे॒नः आ अ॑जनि ।
   ततः सूर्यो व्रत॒पा वे॒न आज॑नि ।

Halfverse: c    आ गा आ॑जदु॒शना॑ का॒व्यः सचा॑ य॒मस्य॑ जा॒तम॒मृतं॑ यजामहे ।।
   आ गा आ॑जदु॒शना॑ का॒व्यः सचा
   आ गाः आ॑जत् उ॒शना का॒व्यः सचा
   आ गा आ॑जद् उ॒शना कावि॒यः सचा

Halfverse: d    य॒मस्य॑ जा॒तम॒मृतं॑ यजामहे ।।
   य॒मस्य जा॒तम् अ॒मृत॑म् यजामहे ।।
   य॒मस्य जा॒तम् अ॒मृतं यजामहे ।।


Verse: 6 
Halfverse: a    ब॒र्हिर्वा॒ यत्स्व॑प॒त्याय॑ वृ॒ज्यते॒ ऽर्को वा॒ श्लोक॑मा॒घोष॑ते दि॒वि ।
   ब॒र्हिर्वा॒ यत्स्व॑प॒त्याय॑ वृ॒ज्यते
   ब॒र्हिः वा यत् स्वप॒त्याय वृ॒ज्यते
   ब॒र्हिर् वा यत् सुअप॒त्याय वृ॒ज्यते

Halfverse: b    ऽर्को वा॒ श्लोक॑मा॒घोष॑ते दि॒वि ।
   अ॒र्कः वा श्लोक॑म् आ॒घोष॑ते दि॒वि ।
   अ॒र्को वा . श्लोक॑म् आ॒घोष॑ते दि॒वि ।

Halfverse: c    ग्रावा॒ यत्र॒ वद॑ति का॒रुरु॒क्थ्य॒स्तस्येदिन्द्रो॑ अभिपि॒त्वेषु॑ रण्यति ।।
   ग्रावा॒ यत्र॒ वद॑ति का॒रुरु॒क्थ्य॑स्
   ग्रावा यत्र वद॑ति का॒रुः उ॒क्थ्यः
   ग्रावा यत्र वद॑ति का॒रुर् उ॒क्थिय॑स्

Halfverse: d    तस्येदिन्द्रो॑ अभिपि॒त्वेषु॑ रण्यति ।।
   तस्य इत् इन्द्रः अभिपि॒त्वेषु रण्यति ।।
   तस्येद् इन्द्रो अभिपि॒त्वेषु रण्यति ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.