TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 84

Hymn: 84
Verse: 1
Halfverse: a    असा॑वि॒ सोम॑ इन्द्र ते॒ शवि॑ष्ठ धृष्ण॒वा ग॑हि ।
   असा॑वि॒ सोम॑ इन्द्र ते
   असा॑वि सोमः इन्द्र ते
   असा॑वि सोम इन्द्र ते

Halfverse: b    शवि॑ष्ठ धृष्ण॒वा ग॑हि ।
   शवि॑ष्ठ धृष्णो आ ग॑हि ।
   शवि॑ष्ठ धृष्णव् आ ग॑हि ।

Halfverse: c    आ त्वा॑ पृणक्त्विन्द्रि॒यं रजः॒ सूर्यो॒ न र॒श्मिभिः॑ ।।
   आ त्वा॑ पृणक्त्विन्द्रि॒यं
   आ त्वा पृणक्तु इन्द्रि॒यम्
   आ त्वा पृणक्तु इन्द्रि॒यं

Halfverse: d    रजः॒ सूर्यो॒ न र॒श्मिभिः॑ ।।
   रजः सूर्यः न र॒श्मिभिः ।।
   रजः सूर्यो न र॒श्मिभिः ।।

Verse: 2
Halfverse: a    इन्द्र॒मिद्धरी॑ वह॒तो ऽप्र॑तिधृष्टशवसम् ।
   इन्द्र॒मिद्धरी॑ वह॒तो
   इन्द्र॑म् इत् हरी वहतः
   इन्द्र॑म् इद् धरी वहतो

Halfverse: b    ऽप्रतिधृष्टशवसम् ।
   अप्र॑तिधृष्टशवसम् ।
   अप्र॑तिधृष्टशवसम् ।

Halfverse: c    ऋषी॑णां च स्तु॒तीरुप॑ य॒ज्ञं च॒ मानु॑षाणाम् ।।
   ऋषी॑णां च स्तु॒तीरुप
   ऋषी॑णाम् च स्तु॒तीः उप
   ऋषी॑णां च स्तु॒तीर् उप

Halfverse: d    य॒ज्ञं च॒ मानु॑षाणाम् ।।
   य॒ज्ञम् च मानु॑षाणाम् ।।
   य॒ज्ञं च मानु॑षाणाअम् ।।

Verse: 3
Halfverse: a    आ ति॑ष्ठ वृत्रह॒न्रथं॑ यु॒क्ता ते॒ ब्रह्म॑णा॒ हरी॑ ।
   आ ति॑ष्ठ वृत्रह॒न्रथं
   आ ति॑ष्ठ वृत्रहन् रथ॑म्
   आ ति॑ष्ठ वृत्रहन् रथं

Halfverse: b    यु॒क्ता ते॒ ब्रह्म॑णा॒ हरी॑ ।
   यु॒क्ता ते ब्रह्म॑णा हरी ।
   यु॒क्ता ते ब्रह्म॑णा हरी ।

Halfverse: c    अ॑र्वा॒चीनं॒ सु ते॒ मनो॒ ग्रावा॑ कृणोतु व॒ग्नुना॑ ।।
   अ॑र्वा॒चीनं॒ सु ते॒ मनो
   अर्वा॒चीन॑म् सु ते मनः
   अर्वा॒चीनं सु ते मनो

Halfverse: d    ग्रावा॑ कृणोतु व॒ग्नुना॑ ।।
   ग्रावा कृणोतु व॒ग्नुना ।।
   ग्रावा कृणोतु व॒ग्नुना ।।

Verse: 4
Halfverse: a    इ॒ममि॑न्द्र सु॒तम्पि॑ब॒ ज्येष्ठ॒मम॑र्त्य॒म्मद॑म् ।
   इ॒ममि॑न्द्र सु॒तम्पि॑ब
   इ॒मम् इन्द्र सु॒तम् पिब
   इ॒मम् इन्द्र सु॒तम् पिब

Halfverse: b    ज्येष्ठ॒मम॑र्त्य॒म्मद॑म् ।
   ज्येष्ठ॑म् अम॑र्त्यम् मद॑म् ।
   ज्येष्ठ॑म् अम॑र्तियम् मद॑म् ।

Halfverse: c    शु॒क्रस्य॑ त्वा॒भ्य॑क्षर॒न्धारा॑ ऋ॒तस्य॒ साद॑ने ।।
   शु॒क्रस्य॑ त्वा॒भ्य॑क्षरन्
   शु॒क्रस्य त्वा अ॒भि अ॑क्षरन्
   शु॒क्रस्य त्वा॒भि अ॑क्षरन्

Halfverse: d    धारा॑ ऋ॒तस्य॒ साद॑ने ।।
   धाराः ऋ॒तस्य साद॑ने ।।
   धारा ऋ॒तस्य साद॑ने ।।

Verse: 5
Halfverse: a    इन्द्रा॑य नू॒नम॑र्चतो॒क्थानि॑ च ब्रवीतन ।
   इन्द्रा॑य नू॒नम॑र्चत
   इन्द्रा॑य नू॒नम् अर्चत
   इन्द्रा॑य नू॒नम् अर्चत

Halfverse: b     उ॒क्थानि॑ च ब्रवीतन ।
   उ॒क्थानि च ब्रवीतन ।
   उ॒क्थानि च ब्रवीतन ।

Halfverse: c    सु॒ता अ॑मत्सु॒रिन्द॑वो॒ ज्येष्ठं॑ नमस्यता॒ सहः॑ ।।
   सु॒ता अ॑मत्सु॒रिन्द॑वो
   सु॒ताः अ॑मत्सुः इन्द॑वः
   सु॒ता अ॑मत्सुर् इन्द॑वो

Halfverse: d    ज्येष्ठं॑ नमस्यता॒ सहः॑ ।।
   ज्येष्ठ॑म् नमस्यत+ सहः ।।
   ज्येष्ठं नमस्यता सहः ।।

Verse: 6
Halfverse: a    नकि॒ष्ट्वद्र॒थीत॑रो॒ हरी॒ यदि॑न्द्र॒ यछ॑से ।
   नकि॒ष्ट्वद्र॒थीत॑रो
   नकिः त्वत् र॒थीत॑रः
   नकि॑ष् टु॒वद् र॒थीत॑रो

Halfverse: b    हरी॒ यदि॑न्द्र॒ यछ॑से ।
   हरी यत् इन्द्र यछ॑से ।
   हरी यद् इन्द्र यछ॑से ।

Halfverse: c    नकि॒ष्ट्वानु॑ म॒ज्मना॒ नकिः॒ स्वश्व॑ आनशे ।।
   नकि॒ष्ट्वानु॑ म॒ज्मना
   नकिः त्वा अनु म॒ज्मना
   नकि॑ष् टु॒वानु म॒ज्मना

Halfverse: d    नकिः॒ स्वश्व॑ आनशे ।।
   नकिः स्वश्वः आनशे ।।
   नकिः सुअश्व आनशे ।।

Verse: 7
Halfverse: a    य एक॒ इद्वि॒दय॑ते॒ वसु॒ मर्ता॑य दा॒शुषे॑ ।
   य एक॒ इद्वि॒दय॑ते
   यः एकः इत् वि॒दय॑ते
   य एक इद् वि॒दय॑ते

Halfverse: b    वसु॒ मर्ता॑य दा॒शुषे॑ ।
   वसु मर्ता॑य दा॒शुषे ।
   वसु मर्ता॑य दा॒शुषे ।

Halfverse: c    ईशा॑नो॒ अप्र॑तिष्कुत॒ इन्द्रो॑ अ॒ङ्ग ।।
   ईशा॑नो॒ अप्र॑तिष्कुत
   ईशा॑नः अप्र॑तिष्कुतः
   ईशा॑नो अप्र॑तिष्कुत

Halfverse: d    इन्द्रो॑ अ॒ङ्ग ।।
   इन्द्रः अ॒ङ्ग ।।
   इन्द्रो अ॒ङ्ग ।।

Verse: 8
Halfverse: a    क॒दा मर्त॑मरा॒धस॑म्प॒दा क्षुम्प॑मिव स्पुरत् ।
   क॒दा मर्त॑मरा॒धस॑म्
   क॒दा मर्त॑म् अरा॒धस॑म्
   क॒दा मर्त॑म् अरा॒धस॑म्

Halfverse: b    प॒दा क्षुम्प॑मिव स्पुरत् ।
   प॒दा क्षुम्प॑म् इव स्पुरत् ।
   प॒दा क्षुम्प॑म् इव स्पुरत् ।

Halfverse: c    क॒दा नः॑ शुश्रव॒द्गिर॒ इन्द्रो॑ अ॒ङ्ग ।।
   क॒दा नः॑ शुश्रव॒द्गिर
   क॒दा नः शुश्रवत् गिरः
   क॒दा नः शुश्रवद् गिर

Halfverse: d    इन्द्रो॑ अ॒ङ्ग ।।
   इन्द्रः अ॒ङ्ग ।।
   इन्द्रो अ॒ङ्ग ।।

Verse: 9
Halfverse: a    यश्चि॒द्धि त्वा॑ ब॒हुभ्य॒ आ सु॒तावाँ॑ आ॒विवा॑सति ।
   यश्चि॒द्धि त्वा॑ ब॒हुभ्य॒ आ
   यः चि॑त् हि त्वा ब॒हुभ्यः आ
   यश् चिद् धि त्वा ब॒हुभ्य आ

Halfverse: b    सु॒तावाँ॑ आ॒विवा॑सति ।
   सु॒तावा॑न् आ॒विवा॑सति ।
   सु॒तावाँ आ॒विवा॑सति ।

Halfverse: c    उ॒ग्रं तत्प॑त्यते॒ शव॒ इन्द्रो॑ अ॒ङ्ग ।।
   उ॒ग्रं तत्प॑त्यते॒ शव
   उ॒ग्रम् तत् पत्यते शवः
   उ॒ग्रं तत् पत्यते शव

Halfverse: d    इन्द्रो॑ अ॒ङ्ग ।।
   इन्द्रः अ॒ङ्ग ।।
   इन्द्रो अ॒ङ्ग ।।

Verse: 10
Halfverse: a    स्वा॒दोरि॒त्था वि॑षू॒वतो॒ मध्वः॑ पिबन्ति गौ॒र्यः॑ ।
   स्वा॒दोरि॒त्था वि॑षू॒वतो
   स्वा॒दोः इ॒त्था वि॑षू॒वतः
   स्वा॒दोर् इ॒त्था वि॑षू॒वतो

Halfverse: b    मध्वः॑ पिबन्ति गौ॒र्यः॑ ।
   मध्वः पिबन्ति गौ॒र्यः ।
   मध्वः पिबन्ति गौ॒रियः ।

Halfverse: c    या इन्द्रे॑ण स॒याव॑री॒र्वृष्णा॒ मद॑न्ति शो॒भसे॒ वस्वी॒रनु॑ स्व॒राज्य॑म् ।।
   या इन्द्रे॑ण स॒याव॑रीर्
   याः इन्द्रे॑ण स॒याव॑रीः
   या इन्द्रे॑ण स॒याव॑रीर्

Halfverse: d    वृष्णा॒ मद॑न्ति शो॒भसे
   वृष्णा मद॑न्ति शो॒भसे
   वृष्णा मद॑न्ति शो॒भसे

Halfverse: e    वस्वी॒रनु॑ स्व॒राज्य॑म् ।।
   वस्वीः अनु स्व॒राज्य॑म् ।।
   वस्वी॑र् अनु स्व॒राजि॑यम् ।।

Verse: 11
Halfverse: a    ता अ॑स्य पृशना॒युवः॒ सोमं॑ श्रीणन्ति॒ पृश्न॑यः ।
   ता अ॑स्य पृशना॒युवः
   ताः अ॑स्य पृशना॒युवः
   ता अ॑स्य पृशना॒युवः

Halfverse: b    सोमं॑ श्रीणन्ति॒ पृश्न॑यः ।
   सोम॑म् श्रीणन्ति पृश्न॑यः ।
   सोमं श्रीणन्ति पृश्न॑यः ।

Halfverse: c    प्रि॒या इन्द्र॑स्य धे॒नवो॒ वज्रं॑ हिन्वन्ति॒ साय॑कं॒ वस्वी॒रनु॑ स्व॒राज्य॑म् ।।
   प्रि॒या इन्द्र॑स्य धे॒नवो
   प्रि॒याः इन्द्र॑स्य धे॒नवः
   प्रि॒या इन्द्र॑स्य धे॒नवो

Halfverse: d    वज्रं॑ हिन्वन्ति॒ साय॑कं
   वज्र॑म् हिन्वन्ति साय॑कम्
   वज्रं हिन्वन्ति साय॑कं

Halfverse: e    वस्वी॒रनु॑ स्व॒राज्य॑म् ।।
   वस्वीः अनु स्व॒राज्य॑म् ।।
   वस्वी॑र् अनु स्व॒राजि॑यम् ।।

Verse: 12
Halfverse: a    ता अ॑स्य॒ नम॑सा॒ सहः॑ सप॒र्यन्ति॒ प्रचे॑तसः ।
   ता अ॑स्य॒ नम॑सा॒ सहः
   ताः अ॑स्य नम॑सा सहः
   ता अ॑स्य नम॑सा सहः

Halfverse: b    सप॒र्यन्ति॒ प्रचे॑तसः ।
   स॑प॒र्यन्ति प्रचे॑तसः ।
   स॑प॒र्यन्ति प्रचे॑तसः ।

Halfverse: c    व्र॒तान्य॑स्य सश्चिरे पु॒रूणि॑ पू॒र्वचि॑त्तये॒ वस्वी॒रनु॑ स्व॒राज्य॑म् ।।
   व्र॒तान्य॑स्य सश्चिरे
   व्र॒तानि अस्य सश्चिरे
   व्र॒तानि अस्य सश्चिरे

Halfverse: d    पु॒रूणि॑ पू॒र्वचि॑त्तये
   पु॒रूणि पू॒र्वचि॑त्तये
   पु॒रूणि पू॒र्वचि॑त्तये

Halfverse: e    वस्वी॒रनु॑ स्व॒राज्य॑म् ।।
   वस्वीः अनु स्व॒राज्य॑म् ।।
   वस्वी॑र् अनु स्व॒राजि॑यम् ।।

Verse: 13
Halfverse: a    इन्द्रो॑ दधी॒चो अ॒स्थभि॑र्वृ॒त्राण्यप्र॑तिष्कुतः ।
   इन्द्रो॑ दधी॒चो अ॒स्थभि॑र्
   इन्द्रः दधी॒चः अ॒स्थभिः
   इन्द्रो दधी॒चो अ॒स्थभि॑र्

Halfverse: b    वृ॒त्राण्यप्र॑तिष्कुतः ।
   वृ॒त्राणि अप्र॑तिष्कुतः ।
   वृ॒त्राणि अप्र॑तिष्कुतः ।

Halfverse: c    ज॒घान॑ नव॒तीर्नव॑ ।।
   ज॒घान॑ नव॒तीर्नव॑ ।।
   ज॒घान नव॒तीः नव ।।
   ज॒घान नव॒तीर् नव ।।

Verse: 14
Halfverse: a    इ॒छन्नश्व॑स्य॒ यच्छिरः॒ पर्व॑ते॒ष्वप॑श्रितम् ।
   इ॒छन्नश्व॑स्य॒ यच्छिरः
   इ॒छन् अश्व॑स्य यत् शिरः
   इ॒छन्न् अश्व॑स्य यच् छिरः

Halfverse: b    पर्व॑ते॒ष्वप॑श्रितम् ।
   पर्व॑तेषु अप॑श्रितम् ।
   पर्व॑तेषु अप॑श्रितम् ।

Halfverse: c    तद्वि॑दच्छर्य॒णाव॑ति ।।
   तद्वि॑दच्छर्य॒णाव॑ति ।।
   तत् विदत् शर्य॒णाव॑ति ।।
   तद् विदच् छर्य॒णाव॑ति ।।

Verse: 15
Halfverse: a    अत्राह॒ गोर॑मन्वत॒ नाम॒ त्वष्टु॑रपी॒च्य॑म् ।
   अत्राह॒ गोर॑मन्वत
   अत्र अह गोः अ॑मन्वत
   अत्राह गोर् अमन्वत

Halfverse: b    नाम॒ त्वष्टु॑रपी॒च्य॑म् ।
   नाम त्वष्टुः अपी॒च्य॑म् ।
   नाम त्वष्टु॑र् अपी॒चिय॑म् ।

Halfverse: c    इ॒त्था च॒न्द्रम॑सो गृ॒हे ।।
   इ॒त्था च॒न्द्रम॑सो गृ॒हे ।।
   इ॒त्था च॒न्द्रम॑सः गृ॒हे ।।
   इ॒त्था च॒न्द्रम॑सो गृ॒हे ।।

Verse: 16
Halfverse: a    को अ॒द्य यु॑ङ्क्ते धु॒रि गा ऋ॒तस्य॒ शिमी॑वतो भा॒मिनो॑ दुर्हृणा॒यून् ।
   को अ॒द्य यु॑ङ्क्ते धु॒रि गा ऋ॒तस्य
   कः अ॒द्य यु॑ङ्क्ते धु॒रि गाः ऋ॒तस्य
   को अ॒द्य यु॑ङ्क्ते धु॒रि गा ऋ॒तस्य

Halfverse: b    शिमी॑वतो भा॒मिनो॑ दुर्हृणा॒यून् ।
   शिमी॑वतः भा॒मिनः दुर्हृणा॒यून् ।
   शिमी॑वतो भा॒मिनो दुर्हृणा॒यून् ।

Halfverse: c    आ॒सन्नि॑षून्हृ॒त्स्वसो॑ मयो॒भून्य ए॑षाम्भृ॒त्यामृ॒णध॒त्स जी॑वात् ।।
   आ॒सन्नि॑षून्हृ॒त्स्वसो॑ मयो॒भून्
   आ॒सन्नि॑षून् हृ॒त्स्वसः मयो॒भून्
   आ॒सन्नि॑षून् हृत्सु॒वसो मयो॒भून्

Halfverse: d    य ए॑षाम्भृ॒त्यामृ॒णध॒त्स जी॑वात् ।।
   यः ए॑षाम् भृ॒त्याम् ऋ॒णध॑त् स जी॑वात् ।।
   य ए॑षाम् भृ॒त्याम् ऋ॒णध॑त् स जी॑वात् ।।

Verse: 17
Halfverse: a    क ई॑षते तु॒ज्यते॒ को बि॑भाय॒ को मं॑सते॒ सन्त॒मिन्द्रं॒ को अन्ति॑ ।
   क ई॑षते तु॒ज्यते॒ को बि॑भाय
   कः ई॑षते तु॒ज्यते कः बि॑भाय
   क ई॑षते तु॒ज्यते को बि॑भाय

Halfverse: b    को मं॑सते॒ सन्त॒मिन्द्रं॒ को अन्ति॑ ।
   कः मं॑सते सन्त॑म् इन्द्र॑म् कः अन्ति ।
   को मं॑सते सन्त॑म् इन्द्रं को अन्ति ।

Halfverse: c    कस्तो॒काय॒ क इभा॑यो॒त रा॒ये ऽधि॑ ब्रवत्त॒न्वे॒ को जना॑य ।।
   कस्तो॒काय॒ क इभा॑यो॒त रा॒ये
   कः तो॒काय कः इभा॑य उ॒त रा॒ये
   कस् तो॒काय क इभा॑यो॒त रा॒ये

Halfverse: d    ऽधि॑ ब्रवत्त॒न्वे॒ को जना॑य ।।
   अधि ब्रवत् त॒न्वे कः जना॑य ।।
   अधि ब्रवत् त॒नुवे को जना॑य ।।

Verse: 18
Halfverse: a    को अ॒ग्निमी॑ट्टे ह॒विषा॑ घृ॒तेन॑ स्रु॒चा य॑जाता ऋ॒तुभि॑र्ध्रु॒वेभिः॑ ।
   को अ॒ग्निमी॑ट्टे ह॒विषा॑ घृ॒तेन
   कः अ॒ग्निम् ईट्टे ह॒विषा घृ॒तेन
   को अ॒ग्निम् ईट्टे ह॒विषा घृ॒तेन

Halfverse: b    स्रु॒चा य॑जाता ऋ॒तुभि॑र्ध्रु॒वेभिः॑ ।
   स्रु॒चा य॑जातै ऋ॒तुभिः ध्रु॒वेभिः ।
   स्रु॒चा य॑जाता ऋ॒तुभि॑र् ध्रु॒वेभिः ।

Halfverse: c    कस्मै॑ दे॒वा आ व॑हाना॒शु होम॒ को मं॑सते वी॒तिहो॑त्रः सुदे॒वः ।।
   कस्मै॑ दे॒वा आ व॑हाना॒शु होम
   कस्मै दे॒वाः आ व॑हान् आ॒शु होम
   कस्मै दे॒वा आ व॑हान् आ॒शु होम

Halfverse: d    को मं॑सते वी॒तिहो॑त्रः सुदे॒वः ।।
   कः मं॑सते वी॒तिहो॑त्रः सुदे॒वः ।।
   को मं॑सते वी॒तिहो॑त्रः सुदे॒वः ।।

Verse: 19
Halfverse: a    त्वम॒ङ्ग प्र शं॑सिषो दे॒वः श॑विष्ठ॒ मर्त्य॑म् ।
   त्वम॒ङ्ग प्र शं॑सिषो
   त्वम् अ॒ङ्ग प्र शं॑सिषः
   तु॒वम् अ॒ङ्ग प्र शं॑सिषो

Halfverse: b    दे॒वः श॑विष्ठ॒ मर्त्य॑म् ।
   दे॒वः श॑विष्ठ मर्त्य॑म् ।
   दे॒वः श॑विष्ठ मर्ति॑यम् ।

Halfverse: c    न त्वद॒न्यो म॑घवन्नस्ति मर्डि॒तेन्द्र॒ ब्रवी॑मि ते॒ वचः॑ ।।
   न त्वद॒न्यो म॑घवन्नस्ति मर्डि॒ता
   न त्वत् अ॒न्यः म॑घवन् अस्ति मर्डि॒ता
   न त्वद् अ॒न्यो म॑घवन्न् अस्ति मर्डि॒ता

Halfverse: d     इन्द्र॒ ब्रवी॑मि ते॒ वचः॑ ।।
   इन्द्र ब्रवी॑मि ते वचः ।।
   इन्द्र ब्रवी॑मि ते वचः ।।

Verse: 20
Halfverse: a    मा ते॒ राधां॑सि॒ मा त॑ ऊ॒तयो॑ वसो॒ ऽस्मान्कदा॑ च॒ना द॑भन् ।
   मा ते॒ राधां॑सि॒ मा त॑ ऊ॒तयो॑ वसो
   मा ते राधां॑सि मा ते ऊ॒तयः वसो
   मा ते राधां॑सि मा त ऊ॒तयो वसो

Halfverse: b    ऽस्मान्कदा॑ च॒ना द॑भन् ।
   अ॒स्मान् कदा च॒न+ द॑भन् ।
   अ॒स्मान् कदा च॒ना द॑भन् ।

Halfverse: c    विश्वा॑ च न उपमिमी॒हि मा॑नुष॒ वसू॑नि चर्ष॒णिभ्य॒ आ ।।
   विश्वा॑ च न उपमिमी॒हि मा॑नुष
   विश्वा च नः उपमिमी॒हि मा॑नुष
   विश्वा च न उपमिमी॒हि मा॑नुष

Halfverse: d    वसू॑नि चर्ष॒णिभ्य॒ आ ।।
   वसू॑नि चर्ष॒णिभ्यः आ ।।
   वसू॑नि चर्ष॒णिभ्य आ ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.