TITUS
Rg-Veda: Rg-Veda-Samhita
Part No. 85
Previous part

Hymn: 85 
Verse: 1 
Halfverse: a    प्र ये शुम्भ॑न्ते॒ जन॑यो॒ न सप्त॑यो॒ याम॑न्रु॒द्रस्य॑ सू॒नवः॑ सु॒दंस॑सः ।
   प्र ये शुम्भ॑न्ते॒ जन॑यो॒ न सप्त॑यो
   प्र ये शुम्भ॑न्ते जन॑यः न सप्त॑यः
   प्र ये शुम्भ॑न्ते जन॑यो न सप्त॑यो

Halfverse: b    याम॑न्रु॒द्रस्य॑ सू॒नवः॑ सु॒दंस॑सः ।
   याम॑न् रु॒द्रस्य सू॒नवः सु॒दंस॑सः ।
   याम॑न् रु॒द्रस्य सू॒नवः सु॒दंस॑सः ।

Halfverse: c    रोद॑सी॒ हि म॒रुत॑श्चक्रि॒रे वृ॒धे मद॑न्ति वी॒रा वि॒दथे॑षु॒ घृष्व॑यः ।।
   रोद॑सी॒ हि म॒रुत॑श्चक्रि॒रे वृ॒धे
   रोद॑सी हि म॒रुतः चक्रि॒रे वृ॒धे
   रोद॑सी हि म॒रुत॑श् चक्रि॒रे वृ॒धे

Halfverse: d    मद॑न्ति वी॒रा वि॒दथे॑षु॒ घृष्व॑यः ।।
   मद॑न्ति वी॒राः वि॒दथे॑षु घृष्व॑यः ।।
   मद॑न्ति वी॒रा वि॒दथे॑षु घृष्व॑यः ।।


Verse: 2 
Halfverse: a    त उ॑क्षि॒तासो॑ महि॒मान॑माशत दि॒वि रु॒द्रासो॒ अधि॑ चक्रिरे॒ सदः॑ ।
   त उ॑क्षि॒तासो॑ महि॒मान॑माशत
   ते उ॑क्षि॒तासः महि॒मान॑म् आशत
   त उ॑क्षि॒तासो महि॒मान॑म् आशत

Halfverse: b    दि॒वि रु॒द्रासो॒ अधि॑ चक्रिरे॒ सदः॑ ।
   दि॒वि रु॒द्रासः अधि चक्रिरे सदः ।
   दि॒वि रु॒द्रासो अधि चक्रिरे सदः ।

Halfverse: c    अर्च॑न्तो अ॒र्कं ज॒नय॑न्त इन्द्रि॒यमधि॒ श्रियो॑ दधिरे॒ पृश्नि॑मातरः ।।
   अर्च॑न्तो अ॒र्कं ज॒नय॑न्त इन्द्रि॒यम्
   अर्च॑न्तः अ॒र्कम् ज॒नय॑न्तः इन्द्रि॒यम्
   अर्च॑न्तो अ॒र्कं ज॒नय॑न्त इन्द्रि॒यम्

Halfverse: d    अधि॒ श्रियो॑ दधिरे॒ पृश्नि॑मातरः ।।
   अधि श्रियः दधिरे पृश्नि॑मातरः ।।
   अधि श्रियो दधिरे पृश्नि॑मातरः ।।


Verse: 3 
Halfverse: a    गोमा॑तरो॒ यच्छु॒भय॑न्ते अ॒ञ्जिभि॑स्त॒नूषु॑ शु॒भ्रा द॑धिरे वि॒रुक्म॑तः ।
   गोमा॑तरो॒ यच्छु॒भय॑न्ते अ॒ञ्जिभि॑स्
   गोमा॑तरः यत् शु॒भय॑न्ते अ॒ञ्जिभिः
   गोमा॑तरो यच् छु॒भय॑न्ते अ॒ञ्जिभि॑स्

Halfverse: b    त॒नूषु॑ शु॒भ्रा द॑धिरे वि॒रुक्म॑तः ।
   त॒नूषु शु॒भ्राः द॑धिरे वि॒रुक्म॑तः ।
   त॒नूषु शु॒भ्रा द॑धिरे वि॒रुक्म॑तः ।

Halfverse: c    बाध॑न्ते॒ विश्व॑मभिमा॒तिन॒मप॒ वर्त्मा॑न्येषा॒मनु॑ रीयते घृ॒तम् ।।
   बाध॑न्ते॒ विश्व॑मभिमा॒तिन॒मप
   बाध॑न्ते विश्व॑म् अभिमा॒तिन॑म् अप
   बाध॑न्ते विश्व॑म् अभिमा॒तिन॑म् अप

Halfverse: d    वर्त्मा॑न्येषा॒मनु॑ रीयते घृ॒तम् ।।
   वर्त्मा॑नि एषाम् अनु रीयते घृ॒तम् ।।
   वर्त्मा॑नि एषाम् अनु रीयते घृ॒तम् ।।


Verse: 4 
Halfverse: a    वि ये भ्राज॑न्ते॒ सुम॑खास ऋ॒ष्टिभिः॑ प्रच्या॒वय॑न्तो॒ अच्यु॑ता चि॒दोज॑सा ।
   वि ये भ्राज॑न्ते॒ सुम॑खास ऋ॒ष्टिभिः
   वि ये भ्राज॑न्ते सुम॑खासः ऋ॒ष्टिभिः
   वि ये भ्राज॑न्ते सुम॑खास ऋ॒ष्टिभिः

Halfverse: b    प्रच्या॒वय॑न्तो॒ अच्यु॑ता चि॒दोज॑सा ।
   प्र॑च्या॒वय॑न्तः अच्यु॑ता चित् ओज॑सा ।
   प्र॑च्या॒वय॑न्तो अच्यु॑ता चिद् ओज॑सा ।

Halfverse: c    म॑नो॒जुवो॒ यन्म॑रुतो॒ रथे॒ष्वा वृष॑व्रातासः॒ पृष॑ती॒रयु॑ग्ध्वम् ।।
   म॑नो॒जुवो॒ यन्म॑रुतो॒ रथे॒ष्वा
   म॑नो॒जुवः यत् मरुतः रथे॑षु आ
   म॑नो॒जुवो यन् मरुतो रथे॑षु आ

Halfverse: d    वृष॑व्रातासः॒ पृष॑ती॒रयु॑ग्ध्वम् ।।
   वृष॑व्रातासः पृष॑तीः अयु॑ग्ध्वम् ।।
   वृष॑व्रातासः पृष॑तीर् अयु॑ग्धुवम् ।।


Verse: 5 
Halfverse: a    प्र यद्रथे॑षु॒ पृष॑ती॒रयु॑ग्ध्वं॒ वाजे॒ अद्रि॑म्मरुतो रं॒हय॑न्तः ।
   प्र यद्रथे॑षु॒ पृष॑ती॒रयु॑ग्ध्वं
   प्र यत् रथे॑षु पृष॑तीः अयु॑ग्ध्वम्
   प्र यद् रथे॑षु पृष॑तीर् अयु॑ग्ध्वं

Halfverse: b    वाजे॒ अद्रि॑म्मरुतो रं॒हय॑न्तः ।
   वाजे अद्रि॑म् मरुतः रं॒हय॑न्तः ।
   वाजे अद्रि॑म् मरुतो रं॒हय॑न्तः ।

Halfverse: c    उ॒तारु॒षस्य॒ वि ष्य॑न्ति॒ धारा॒श्चर्मे॑वो॒दभि॒र्व्यु॑न्दन्ति॒ भूम॑ ।।
   उ॒तारु॒षस्य॒ वि ष्य॑न्ति॒ धारा॑श्
   उ॒त अ॑रु॒षस्य वि स्य॑न्ति धाराः
   उ॒तारु॒षस्य वि षि॑यन्ति धारा॑श्

Halfverse: d    चर्मे॑वो॒दभि॒र्व्यु॑न्दन्ति॒ भूम॑ ।।
   चर्म इव उ॒दभिः वि उ॑न्दन्ति भूम ।।
   चर्मे॑वो॒दभि॑र् वि उ॑न्दन्ति भूम ।।


Verse: 6 
Halfverse: a    आ वो॑ वहन्तु॒ सप्त॑यो रघु॒ष्यदो॑ रघु॒पत्वा॑नः॒ प्र जि॑गात बा॒हुभिः॑ ।
   आ वो॑ वहन्तु॒ सप्त॑यो रघु॒ष्यदो
   आ वः वहन्तु सप्त॑यः रघु॒ष्यदः
   आ वो वहन्तु सप्त॑यो रघु॒ष्यदो

Halfverse: b    रघु॒पत्वा॑नः॒ प्र जि॑गात बा॒हुभिः॑ ।
   र॑घु॒पत्वा॑नः प्र जि॑गात बा॒हुभिः ।
   र॑घु॒पत्वा॑नः प्र जि॑गात बा॒हुभिः ।

Halfverse: c    सीद॒ता ब॒र्हिरु॒रु वः॒ सद॑स्कृ॒तम्मा॒दय॑ध्वम्मरुतो॒ मध्वो॒ अन्ध॑सः ।।
   सीद॒ता ब॒र्हिरु॒रु वः॒ सद॑स्कृ॒तम्
   सीद॑त आ ब॒र्हिः उ॒रु वः सदः कृ॒तम्
   सीद॒ता ब॒र्हिर् उ॒रु वः सद॑स् कृ॒तम्

Halfverse: d    मा॒दय॑ध्वम्मरुतो॒ म ध्वोअन्ध॑सः ।।
   मा॒दय॑ध्वम् मरुतः मध्वः अन्ध॑सः ।।
   मा॒दय॑ध्वम् मरुतो मध्वो अन्ध॑सः ।।


Verse: 7 
Halfverse: a    ते॑ ऽवर्धन्त॒ स्वत॑वसो महित्व॒ना नाकं॑ त॒स्थुरु॒रु च॑क्रिरे॒ सदः॑ ।
   ते॑ ऽवर्धन्त॒ स्वत॑वसो महित्व॒ना
   ते अ॑वर्धन्त स्वत॑वसः महित्व॒ना
   ते ऽव॑र्धन्त स्वत॑वसो महित्व॒ना

Halfverse: b     आ नाकं॑ त॒स्थुरु॒रु च॑क्रिरे॒ सदः॑ ।
   आ नाक॑म् त॒स्थुः उ॒रु च॑क्रिरे सदः ।
   आ नाकं त॒स्थुर् उ॒रु च॑क्रिरे सदः ।

Halfverse: c    विष्णु॒र्यद्धाव॒द्वृष॑णम्मद॒च्युतं॒ वयो॒ न सी॑द॒न्नधि॑ ब॒र्हिषि॑ प्रि॒ये ।।
   विष्णु॒र्यद्धाव॒द्वृष॑णम्मद॒च्युतं
   विष्णुः यत् ह आव॑त् वृष॑णम् मद॒च्युत॑म्
   विष्णु॑र् यद् धाव॑द् वृष॑णम् मद॒च्युतं

Halfverse: d    वयो॒ न सी॑द॒न्नधि॑ ब॒र्हिषि॑ प्रि॒ये ।।
   वयः न सी॑दन् अधि ब॒र्हिषि प्रि॒ये ।।
   वयो न सी॑दन्न् अधि ब॒र्हिषि प्रि॒ये ।।


Verse: 8 
Halfverse: a    शूरा॑ इ॒वेद्युयु॑धयो॒ न जग्म॑यः श्रव॒स्यवो॒ न पृत॑नासु येतिरे ।
   शूरा॑ इ॒वेद्युयु॑धयो॒ न जग्म॑यः
   शूराः इव इत् युयु॑धयः न जग्म॑यः
   शूरा इ॒वेद् युयु॑धयो न जग्म॑यः

Halfverse: b    श्रव॒स्यवो॒ न पृत॑नासु येतिरे ।
   श्र॑व॒स्यवः न पृत॑नासु येतिरे ।
   श्र॑व॒स्यवो न पृत॑नासु येतिरे ।

Halfverse: c    भय॑न्ते॒ विश्वा॒ भुव॑ना म॒रुद्भ्यो॒ राजा॑न इव त्वे॒षसं॑दृशो॒ नरः॑ ।।
   भय॑न्ते॒ विश्वा॒ भुव॑ना म॒रुद्भ्यो
   भय॑न्ते विश्वा भुव॑ना म॒रुद्भ्यः
   भय॑न्ते विश्वा भुव॑ना म॒रुद्भि॑यो

Halfverse: d    राजा॑न इव त्वे॒षसं॑दृशो॒ नरः॑ ।।
   राजा॑नः इव त्वे॒षसं॑दृशः नरः ।।
   राजा॑न इव त्वे॒षसं॑दृशो नरः ।।


Verse: 9 
Halfverse: a    त्वष्टा॒ यद्वज्रं॒ सुकृ॑तं हिर॒ण्ययं॑ स॒हस्र॑भृष्टिं॒ स्वपा॒ अव॑र्तयत् ।
   त्वष्टा॒ यद्वज्रं॒ सुकृ॑तं हिर॒ण्ययं
   त्वष्टा यत् वज्र॑म् सुकृ॑तम् हिर॒ण्यय॑म्
   त्वष्टा यद् वज्रं सुकृ॑तं हिर॒ण्ययं

Halfverse: b    स॒हस्र॑भृष्टिं॒ स्वपा॒ अव॑र्तयत् ।
   स॒हस्र॑भृष्टिम् स्वपाः अव॑र्तयत् ।
   स॒हस्र॑भृष्टिं सुअपा अव॑र्तयत् ।

Halfverse: c    ध॒त्त इन्द्रो॒ नर्यपां॑सि॒ कर्त॒वे ऽह॑न्वृ॒त्रं निर॒पाऔ॑ब्जदर्ण॒वम् ।।
   ध॒त्त इन्द्रो॒ नर्यपां॑सि॒ कर्त॒वे
   ध॒त्ते इन्द्रः नरि अपां॑सि कर्त॑वे
   ध॒त्त इन्द्रो नरि अपां॑सि कर्त॑वे

Halfverse: d    ऽहन्वृ॒त्रं निर॒पाऔ॑ब्जदर्ण॒वम् ।।
   अह॑न् वृ॒त्रम् निः अ॒पाम् औब्जत् अर्ण॒वम् ।।
   अह॑न् वृ॒त्रं निर् अ॒पाम् औब्जद् अर्ण॒वम् ।।


Verse: 10 
Halfverse: a    ऊ॒र्ध्वं नु॑नुद्रे ऽव॒तं त ओज॑सा दादृहा॒णं चि॑द्बिभिदु॒र्वि पर्व॑तम् ।
   ऊ॒र्ध्वं नु॑नुद्रे ऽव॒तं त ओज॑सा
   ऊ॒र्ध्वम् नुनुद्रे अव॒तम् ते ओज॑सा
   ऊ॒र्ध्वं नु॑नुद्रे अव॒तं त ओज॑सा

Halfverse: b    दादृहा॒णं चि॑द्बिभिदु॒र्वि पर्व॑तम् ।
   दा॑दृहा॒णम् चित् बिभिदुः वि पर्व॑तम् ।
   दा॑दृहा॒णं चि॑द् बिभिदुर् वि पर्व॑तम् ।

Halfverse: c    धम॑न्तो वा॒णम्म॒रुतः॑ सु॒दान॑वो॒ मदे॒ सोम॑स्य॒ रण्या॑नि चक्रिरे ।।
   धम॑न्तो वा॒णम्म॒रुतः॑ सु॒दान॑वो
   धम॑न्तः वा॒णम् म॒रुतः सु॒दान॑वः
   धम॑न्तो वा॒णम् म॒रुतः सु॒दान॑वो

Halfverse: d    मदे॒ सोम॑स्य॒ रण्या॑नि चक्रिरे ।।
   मदे सोम॑स्य रण्या॑नि चक्रिरे ।।
   मदे सोम॑स्य रणि॑यानि चक्रिरे ।।


Verse: 11 
Halfverse: a    जि॒ह्मं नु॑नुद्रे ऽव॒तं तया॑ दि॒शासि॑ञ्च॒न्नुत्सं॒ गोत॑माय तृ॒ष्णजे॑ ।
   जि॒ह्मं नु॑नुद्रे ऽव॒तं तया॑ दि॒शा
   जि॒ह्मम् नुनुद्रे अव॒तम् तया दि॒शा
   जि॒ह्मं नु॑नुद्रे अव॒तं तया दि॒शा

Halfverse: b     अ॑सिञ्च॒न्नुत्सं॒ गोत॑माय तृ॒ष्णजे॑ ।
   अ॑सिञ्चन् उत्स॑म् गोत॑माय तृ॒ष्णजे ।
   असि॑ञ्चन्न् उत्सं गोत॑माय तृ॒ष्णजे ।

Halfverse: c    आ ग॑छन्ती॒मव॑सा चि॒त्रभा॑नवः॒ कामं॒ विप्र॑स्य तर्पयन्त॒ धाम॑भिः ।।
   आ ग॑छन्ती॒मव॑सा चि॒त्रभा॑नवः
   आ ग॑छन्ति ईम् अव॑सा चि॒त्रभा॑नवः
   आ ग॑छन्तीम् अव॑सा चि॒त्रभा॑नवः

Halfverse: d    कामं॒ विप्र॑स्य तर्पयन्त॒ धाम॑भिः ।।
   काम॑म् विप्र॑स्य तर्पयन्त धाम॑भिः ।।
   कामं विप्र॑स्य तर्पयन्त धाम॑भिः ।।


Verse: 12 
Halfverse: a    या वः॒ शर्म॑ शशमा॒नाय॒ सन्ति॑ त्रि॒धातू॑नि दा॒शुषे॑ यछ॒ताधि॑ ।
   या वः॒ शर्म॑ शशमा॒नाय॒ सन्ति
   या वः शर्म शशमा॒नाय सन्ति
   या वः शर्म शशमा॒नाय सन्ति

Halfverse: b    त्रि॒धातू॑नि दा॒शुषे॑ यछ॒ताधि॑ ।
   त्रि॒धातू॑नि दा॒शुषे यछत अधि ।
   त्रि॒धातू॑नि दा॒शुषे यछ॒ताधि ।

Halfverse: c    अ॒स्मभ्यं॒ तानि॑ मरुतो॒ वि य॑न्त र॒यिं नो॑ धत्त वृषणः सु॒वीर॑म् ।।
   अ॒स्मभ्यं॒ तानि॑ मरुतो॒ वि य॑न्त
   अ॒स्मभ्य॑म् तानि मरुतः वि य॑न्त
   अ॒स्मभ्यं तानि मरुतो वि य॑न्त

Halfverse: d    र॒यिं नो॑ धत्त वृषणः सु॒वीर॑म् ।।
   र॒यिम् नः धत्त वृषणः सु॒वीर॑म् ।।
   र॒यिं नो धत्त वृषणः सु॒वीर॑म् ।।


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.