TITUS
Rg-Veda: Rg-Veda-Samhita
Part No. 257
Previous part

Hymn: 23_(257) 
Verse: 1 
Halfverse: a    निर्म॑थितः॒ सुधि॑त॒ आ स॒धस्थे॒ युवा॑ क॒विर॑ध्व॒रस्य॑ प्रणे॒ता ।
   निर्म॑थितः॒ सुधि॑त॒ आ स॒धस्थे
   निर्म॑थितः सुधि॑तः आ स॒धस्थे
   निर्म॑थितः सुधि॑त आ स॒धस्थे

Halfverse: b    युवा॑ क॒विर॑ध्व॒रस्य॑ प्रणे॒ता ।
   युवा क॒विः अ॑ध्व॒रस्य प्रणे॒ता ।
   युवा क॒विर् अध्व॒रस्य प्रणे॒ता ।

Halfverse: c    जूर्य॑त्स्व॒ग्निर॒जरो॒ वने॒ष्वत्रा॑ दधे अ॒मृतं॑ जा॒तवे॑दाः ।।
   जूर्य॑त्स्व॒ग्निर॒जरो॒ वने॑ष्व्
   जूर्य॑त्सु अ॒ग्निः अ॒जरः वने॑षु
   जूर्य॑त्सु अ॒ग्निर् अ॒जरो वने॑षु

Halfverse: d    अत्रा॑ दधे अ॒मृतं॑ जा॒तवे॑दाः ।।
   अत्र+ दधे अ॒मृत॑म् जा॒तवे॑दाः ।।
   अत्रा दधे अ॒मृतं जा॒तवे॑दाः ।।


Verse: 2 
Halfverse: a    अम॑न्थिष्टा॒म्भार॑ता रे॒वद॒ग्निं दे॒वश्र॑वा दे॒ववा॑तः सु॒दक्ष॑म् ।
   अम॑न्थिष्टा॒म्भार॑ता रे॒वद॒ग्निं
   अम॑न्थिष्टाम् भार॑ता रे॒वत् अ॒ग्निम्
   अम॑न्थिष्टाम् भार॑ता रे॒वद् अ॒ग्निं

Halfverse: b    दे॒वश्र॑वा दे॒ववा॑तः सु॒दक्ष॑म् ।
   दे॒वश्र॑वाः दे॒ववा॑तः सु॒दक्ष॑म् ।
   दे॒वश्र॑वा दे॒ववा॑तः सु॒दक्ष॑म् ।

Halfverse: c    अग्ने॒ वि प॑श्य बृह॒ताभि रा॒येषां नो॑ ने॒ता भ॑वता॒दनु॒ द्यून् ।।
   अग्ने॒ वि प॑श्य बृह॒ताभि रा॒या
   अग्ने वि प॑श्य बृह॒ता अ॒भि रा॒या
   अग्ने वि प॑श्य बृह॒ताभि रा॒या

Halfverse: d     इ॒षां नो॑ ने॒ता भ॑वता॒दनु॒ द्यून् ।।
   इ॒षाम् नः ने॒ता भ॑वतात् अनु द्यून् ।।
   इ॒षां नो ने॒ता भ॑वताद् अनु द्यून् ।।


Verse: 3 
Halfverse: a    दश॒ क्षिपः॑ पू॒र्व्यं सी॑मजीजन॒न्सुजा॑तम्मा॒तृषु॑ प्रि॒यम् ।
   दश॒ क्षिपः॑ पू॒र्व्यं सी॑मजीजनन्
   दश क्षिपः पू॒र्व्यम् सीम् अजीजनन्
   दश क्षिपः पूर्वि॒यं सी॑म् अजीजनन्

Halfverse: b    सुजा॑तम्मा॒तृषु॑ प्रि॒यम् ।
   सुजा॑तम् मा॒तृषु प्रि॒यम् ।
   सुजा॑तम् मा॒तृषु प्रि॒यम् ।

Halfverse: c    अ॒ग्निं स्तु॑हि दैववा॒तं दे॑वश्रवो॒ यो जना॑ना॒मस॑द्व॒शी ।।
   अ॒ग्निं स्तु॑हि दैववा॒तं दे॑वश्रवो
   अ॒ग्निम् स्तुहि दैववा॒तम् देवश्रवः
   अ॒ग्निं स्तु॑हि दैववा॒तं दे॑वश्रवो

Halfverse: d    यो जना॑ना॒मस॑द्व॒शी ।।
   यः जना॑नाम् अस॑त् व॒शी ।।
   यो जना॑नाम् अस॑द् व॒शी ।।


Verse: 4 
Halfverse: a    नि त्वा॑ दधे॒ वर॒ आ पृ॑थि॒व्या इळा॑यास्प॒दे सु॑दिन॒त्वे अह्ना॑म् ।
   नि त्वा॑ दधे॒ वर॒ आ पृ॑थि॒व्या
   नि त्वा दधे वरे आ पृ॑थि॒व्याः
   नि त्वा दधे ? वर आ पृ॑थि॒व्या

Halfverse: b    इळा॑यास्प॒दे सु॑दिन॒त्वे अह्ना॑म् ।
   इळा॑याः प॒दे सु॑दिन॒त्वे अह्ना॑म् ।
   इळा॑यास् प॒दे सु॑दिन॒त्वे अह्ना॑म् ।

Halfverse: c    दृ॒षद्व॑त्या॒म्मानु॑ष आप॒यायां॒ सर॑स्वत्यां रे॒वद॑ग्ने दिदीहि ।।
   दृ॒षद्व॑त्या॒म्मानु॑ष आप॒यायां
   दृ॒षद्व॑त्याम् मानु॑षे आप॒याया॑म्
   दृ॒षद्व॑त्याम् मानु॑ष आप॒यायां

Halfverse: d    सर॑स्वत्यां रे॒वद॑ग्ने दिदीहि ।।
   सर॑स्वत्याम् रे॒वत् अग्ने दिदीहि ।।
   सर॑स्वत्यां रे॒वद् अग्ने दिदीहि ।।


Verse: 5 
Halfverse: a    इळा॑मग्ने पुरु॒दँसं॑ स॒निं गोः श॑श्वत्त॒मं हव॑मानाय साध ।
   इळा॑मग्ने पुरु॒दँसं॑ स॒निं गोः
   इळा॑म् अग्ने पुरु॒दंस॑म् स॒निम् गोः
   इळा॑म् अग्ने पुरु॒दंसं स॒निं गोः

Halfverse: b    श॑श्वत्त॒मं हव॑मानाय साध ।
   श॑श्वत्त॒मम् हव॑मानाय साध ।
   श॑श्वत्त॒मं हव॑मानाय साध ।

Halfverse: c    स्यान्नः॑ सू॒नुस्तन॑यो वि॒जावाग्ने॒ सा ते॑ सुम॒तिर्भू॑त्व॒स्मे ।।
   स्यान्नः॑ सू॒नुस्तन॑यो वि॒जावा
   स्यात् नः सू॒नुः तन॑यः वि॒जावा
   सि॒यान् नः सू॒नुस् तन॑यो वि॒जावा

Halfverse: d     अग्ने॒ सा ते॑ सुम॒तिर्भू॑त्व॒स्मे ।।
   अग्ने सा ते सुम॒तिः भू॑तु अ॒स्मे ।।
   अग्ने सा ते सुम॒तिर् भूतु अ॒स्मे ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.