TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 261

Hymn: 27_(261)
Verse: 1
Halfverse: a    प्र वो॒ वाजा॑ अ॒भिद्य॑वो ह॒विष्म॑न्तो घृ॒ताच्या॑ ।
   प्र वो॒ वाजा॑ अ॒भिद्य॑वो
   प्र वः वाजाः अ॒भिद्य॑वः
   प्र वो वाजा अ॒भिद्य॑वो

Halfverse: b    ह॒विष्म॑न्तो घृ॒ताच्या॑ ।
   ह॒विष्म॑न्तः घृ॒ताच्या ।
   ह॒विष्म॑न्तो घृ॒ताचि॑या ।

Halfverse: c    दे॒वाञ्जि॑गाति सुम्न॒युः ।।
   दे॒वाञ्जि॑गाति सुम्न॒युः ।।
   दे॒वान् जिगाति सुम्न॒युः ।।
   दे॒वाञ् जिगाति सुम्न॒युः ।।

Verse: 2
Halfverse: a    ईळे॑ अ॒ग्निं वि॑प॒श्चितं॑ गि॒रा य॒ज्ञस्य॒ साध॑नम् ।
   ईळे॑ अ॒ग्निं वि॑प॒श्चितं
   ईळे अ॒ग्निम् विप॒श्चित॑म्
   ईळे अ॒ग्निं वि॑प॒श्चितं

Halfverse: b    गि॒रा य॒ज्ञस्य॒ साध॑नम् ।
   गि॒रा य॒ज्ञस्य साध॑नम् ।
   गि॒रा य॒ज्ञस्य साध॑नम् ।

Halfverse: c    श्रु॑ष्टी॒वानं॑ धि॒तावा॑नम् ।।
   श्रु॑ष्टी॒वानं॑ धि॒तावा॑नम् ।।
   श्रु॑ष्टी॒वान॑म् धि॒तावा॑नम् ।।
   श्रु॑ष्टी॒वानं धि॒तावा॑नम् ।।

Verse: 3
Halfverse: a    अग्ने॑ श॒केम॑ ते व॒यं यमं॑ दे॒वस्य॑ वा॒जिनः॑ ।
   अग्ने॑ श॒केम॑ ते व॒यं
   अग्ने श॒केम ते व॒यम्
   अग्ने श॒केम ते व॒यं

Halfverse: b    यमं॑ दे॒वस्य॑ वा॒जिनः॑ ।
   यम॑म् दे॒वस्य वा॒जिनः ।
   यमं दे॒वस्य वा॒जिनः ।

Halfverse: c    अति॒ द्वेषां॑सि तरेम ।।
   अति॒ द्वेषां॑सि तरेम ।।
   अति द्वेषां॑सि तरेम ।।
   अति द्वेषां॑सि तरेम ।।

Verse: 4
Halfverse: a    स॑मि॒ध्यमा॑नो अध्व॒रे॒ ऽग्निः पा॑व॒क ईड्यः॑ ।
   स॑मि॒ध्यमा॑नो अध्व॒रे
   समि॒ध्यमा॑नः अध्व॒रे
   स॑मि॒ध्यमा॑नो अध्व॒रे

Halfverse: b    ऽग्निः पा॑व॒क ईड्यः॑ ।
   अ॒ग्निः पा॑व॒कः ईड्यः ।
   अ॒ग्निः प॑वा॒क ईडि॑यः ।

Halfverse: c    शो॒चिष्के॑श॒स्तमी॑महे ।।
   शो॒चिष्के॑श॒स्तमी॑महे ।।
   शो॒चिष्के॑शः तम् ईमहे ।।
   शो॒चिष्के॑शस् तम् ईमहे ।।

Verse: 5
Halfverse: a    पृ॑थु॒पाजा॒ अम॑र्त्यो घृ॒तनि॑र्णि॒क्स्वा॑हुतः ।
   पृ॑थु॒पाजा॒ अम॑र्त्यो
   पृथु॒पाजाः अम॑र्त्यः
   पृथु॒पाजा अम॑र्तियो

Halfverse: b    घृ॒तनि॑र्णि॒क्स्वा॑हुतः ।
   घृ॒तनि॑र्णिक् स्वा॑हुतः ।
   घृ॒तनि॑र्णिक् सुआहुतः ।

Halfverse: c    अ॒ग्निर्य॒ज्ञस्य॑ हव्य॒वाट् ।।
   अ॒ग्निर्य॒ज्ञस्य॑ हव्य॒वाट् ।।
   अ॒ग्निः य॒ज्ञस्य हव्य॒वाट् ।।
   अ॒ग्निर् य॒ज्ञस्य हव्य॒वाट् ।।

Verse: 6
Halfverse: a    तं स॒बाधो॑ य॒तस्रु॑च इ॒त्था धि॒या य॒ज्ञव॑न्तः ।
   तं स॒बाधो॑ य॒तस्रु॑च
   तम् स॒बाधः य॒तस्रु॑चः
   तं स॒बाधो य॒तस्रु॑च

Halfverse: b    इ॒त्था धि॒या य॒ज्ञव॑न्तः ।
   इ॒त्था धि॒या य॒ज्ञव॑न्तः ।
   इ॒त्था धि॒या य॒ज्ञव॑न्तः ।

Halfverse: c    आ च॑क्रुर॒ग्निमू॒तये॑ ।।
   आ च॑क्रुर॒ग्निमू॒तये॑ ।।
   आ च॑क्रुः अ॒ग्निम् ऊ॒तये ।।
   आ च॑क्रुर् अ॒ग्निम् ऊ॒तये ।।

Verse: 7
Halfverse: a    होता॑ दे॒वो अम॑र्त्यः पु॒रस्ता॑देति मा॒यया॑ ।
   होता॑ दे॒वो अम॑र्त्यः
   होता दे॒वः अम॑र्त्यः
   होता दे॒वो अम॑र्तियः

Halfverse: b    पु॒रस्ता॑देति मा॒यया॑ ।
   पु॒रस्ता॑त् एति मा॒यया ।
   पु॒रस्ता॑द् एति मा॒यया ।

Halfverse: c    वि॒दथा॑नि प्रचो॒दय॑न् ।।
   वि॒दथा॑नि प्रचो॒दय॑न् ।।
   वि॒दथा॑नि प्रचो॒दय॑न् ।।
   वि॒दथा॑नि प्रचो॒दय॑न् ।।

Verse: 8
Halfverse: a    वा॒जी वाजे॑षु धीयते ऽध्व॒रेषु॒ प्र णी॑यते ।
   वा॒जी वाजे॑षु धीयते
   वा॒जी वाजे॑षु धीयते
   वा॒जी वाजे॑षु धीयते

Halfverse: b    ऽध्व॒रेषु॒ प्र णी॑यते ।
   अ॑ध्व॒रेषु प्र नी॑यते ।
   अ॑ध्व॒रेषु प्र णी॑यते ।

Halfverse: c    विप्रो॑ य॒ज्ञस्य॒ साध॑नः ।।
   विप्रो॑ य॒ज्ञस्य॒ साध॑नः ।।
   विप्रः य॒ज्ञस्य साध॑नः ।।
   विप्रो य॒ज्ञस्य साध॑नः ।।

Verse: 9
Halfverse: a    धि॒या च॑क्रे॒ वरे॑ण्यो भू॒तानां॒ गर्भ॒मा द॑धे ।
   धि॒या च॑क्रे॒ वरे॑ण्यो
   धि॒या च॑क्रे वरे॑ण्यः
   धि॒या च॑क्रे वरे॑णियो

Halfverse: b    भू॒तानां॒ गर्भ॒मा द॑धे ।
   भू॒ताना॑म् गर्भ॑म् आ द॑धे ।
   भू॒तानां गर्भ॑म् आ द॑धे ।

Halfverse: c    दक्ष॑स्य पि॒तरं॒ तना॑ ।।
   दक्ष॑स्य पि॒तरं॒ तना॑ ।।
   दक्ष॑स्य पि॒तर॑म् तना ।।
   दक्ष॑स्य पि॒तरं तना ।।

Verse: 10
Halfverse: a    नि त्वा॑ दधे॒ वरे॑ण्यं॒ दक्ष॑स्ये॒ळा स॑हस्कृत ।
   नि त्वा॑ दधे॒ वरे॑ण्यं
   नि त्वा दधे वरे॑ण्यम्
   नि त्वा दधे वरे॑णियं

Halfverse: b    दक्ष॑स्ये॒ळा स॑हस्कृत ।
   दक्ष॑स्य इ॒ळा स॑हस्कृत ।
   दक्ष॑स्ये॒ळा स॑हस्कृत ।

Halfverse: c    अग्ने॑ सुदी॒तिमु॒शिज॑म् ।।
   अग्ने॑ सुदी॒तिमु॒शिज॑म् ।।
   अग्ने सुदी॒तिम् उ॒शिज॑म् ।।
   अग्ने सुदी॒तिम् उ॒शिज॑म् ।।

Verse: 11
Halfverse: a    अ॒ग्निं य॒न्तुर॑म॒प्तुर॑मृ॒तस्य॒ योगे॑ व॒नुषः॑ ।
   अ॒ग्निं य॒न्तुर॑म॒प्तुर॑म्
   अ॒ग्निम् य॒न्तुर॑म् अ॒प्तुर॑म्
   अ॒ग्निं य॒न्तुर॑म् अ॒प्तुर॑म्

Halfverse: b    ऋ॒तस्य॒ योगे॑ व॒नुषः॑ ।
   ऋ॒तस्य योगे व॒नुषः ।
   ऋ॒तस्य योगे व॒नुषः ।

Halfverse: c    विप्रा॒ वाजैः॒ समि॑न्धते ।।
   विप्रा॒ वाजैः॒ समि॑न्धते ।।
   विप्राः वाजैः सम् इन्धते ।।
   विप्रा वाजैः सम् इन्धते ।।

Verse: 12
Halfverse: a    ऊ॒र्जो नपा॑तमध्व॒रे दी॑दि॒वांस॒मुप॒ द्यवि॑ ।
   ऊ॒र्जो नपा॑तमध्व॒रे
   ऊ॒र्जः नपा॑तम् अध्व॒रे
   ऊ॒र्जो नपा॑तम् अध्व॒रे

Halfverse: b    दी॑दि॒वांस॒मुप॒ द्यवि॑ ।
   दी॑दि॒वांस॑म् उप द्यवि ।
   दी॑दि॒वांस॑म् उप द्यवि ।

Halfverse: c    अ॒ग्निमी॑ळे क॒विक्र॑तुम् ।।
   अ॒ग्निमी॑ळे क॒विक्र॑तुम् ।।
   अ॒ग्निम् ईळे क॒विक्र॑तुम् ।।
   अ॒ग्निम् ईळे क॒विक्र॑तुम् ।।

Verse: 13
Halfverse: a    ई॒ळेन्यो॑ नम॒स्य॑स्ति॒रस्तमां॑सि दर्श॒तः ।
   ई॒ळेन्यो॑ नम॒स्य॑स्
   ई॒ळेन्यः नम॒स्यः
   ई॒ळेनि॑यो नम॒सिय॑स्

Halfverse: b    ति॒रस्तमां॑सि दर्श॒तः ।
   ति॒रः तमां॑सि दर्श॒तः ।
   ति॒रस् तमां॑सि दर्श॒तः ।

Halfverse: c    सम॒ग्निरि॑ध्यते॒ वृषा॑ ।।
   सम॒ग्निरि॑ध्यते॒ वृषा॑ ।।
   सम् अ॒ग्निः इ॑ध्यते वृषा ।।
   सम् अ॒ग्निर् इध्यते वृषा ।।

Verse: 14
Halfverse: a    वृषो॑ अ॒ग्निः समि॑ध्य॒ते ऽश्वो॒ न दे॑व॒वाह॑नः ।
   वृषो॑ अ॒ग्निः समि॑ध्य॒ते
   वृषा उ अ॒ग्निः सम् इध्यते
   वृषो अ॒ग्निः सम् इध्यते

Halfverse: b    ऽश्वो॒ न दे॑व॒वाह॑नः ।
   अश्वः न दे॑व॒वाह॑नः ।
   अश्वो न दे॑व॒वाह॑नः ।

Halfverse: c    तं ह॒विष्म॑न्त ईळते ।।
   तं ह॒विष्म॑न्त ईळते ।।
   तम् ह॒विष्म॑न्तः ईळते ।।
   तं ह॒विष्म॑न्त ईळते ।।

Verse: 15
Halfverse: a    वृष॑णं त्वा व॒यं वृ॑ष॒न्वृष॑णः॒ समि॑धीमहि ।
   वृष॑णं त्वा व॒यं वृ॑षन्
   वृष॑णम् त्वा व॒यम् वृषन्
   वृष॑णं त्वा व॒यं वृ॑षन्

Halfverse: b    वृष॑णः॒ समि॑धीमहि ।
   वृष॑णः सम् इधीमहि ।
   वृष॑णः सम् इधीमहि ।

Halfverse: c    अग्ने॒ दीद्य॑तम्बृ॒हत् ।।
   अग्ने॒ दीद्य॑तम्बृ॒हत् ।।
   अग्ने दीद्य॑तम् बृ॒हत् ।।
   अग्ने दीदि॑यतम् बृ॒हत् ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.