TITUS
Rg-Veda: Rg-Veda-Samhita
Part No. 263
Previous part

Hymn: 29_(263) 
Verse: 1 
Halfverse: a    अस्ती॒दम॑धि॒मन्थ॑न॒मस्ति॑ प्र॒जन॑नं कृ॒तम् ।
   अस्ती॒दम॑धि॒मन्थ॑नम्
   अस्ति इ॒दम् अधि॒मन्थ॑नम्
   अस्ती॒दम् अधि॒मन्थ॑नम्

Halfverse: b    अस्ति॑ प्र॒जन॑नं कृ॒तम् ।
   अस्ति प्र॒जन॑नम् कृ॒तम् ।
   अस्ति प्र॒जन॑नं कृ॒तम् ।

Halfverse: c    ए॒तां वि॒श्पत्नी॒मा भ॑रा॒ग्निम्म॑न्थाम पू॒र्वथा॑ ।।
   ए॒तां वि॒श्पत्नी॒मा भ॑र
   ए॒ताम् वि॒श्पत्नी॑म् आ भ॑र
   ए॒तां वि॒श्पत्नी॑म् आ भ॑र

Halfverse: d     अ॒ग्निम्म॑न्थाम पू॒र्वथा॑ ।।
   अ॒ग्निम् मन्थाम पू॒र्वथा ।।
   अ॒ग्निम् मन्थाम पू॒र्वथा ।।


Verse: 2 
Halfverse: a    अ॒रण्यो॒र्निहि॑तो जा॒तवे॑दा॒ गर्भ॑ इव॒ सुधि॑तो ग॒र्भिणी॑षु ।
   अ॒रण्यो॒र्निहि॑तो जा॒तवे॑दा
   अ॒रण्योः निहि॑तः जा॒तवे॑दाः
   अ॒रणि॑योर् निहि॑तो जा॒तवे॑दा

Halfverse: b    गर्भ॑ इव॒ सुधि॑तो ग॒र्भिणी॑षु ।
   गर्भः इव सुधि॑तः ग॒र्भिणी॑षु ।
   गर्भ इव सुधि॑तो ग॒र्भिणी॑षु ।

Halfverse: c    दि॒वेदि॑व॒ ईड्यो॑ जागृ॒वद्भि॑र्ह॒विष्म॑द्भिर्मनु॒ष्ये॑भिर॒ग्निः ।।
   दि॒वेदि॑व॒ ईड्यो॑ जागृ॒वद्भि॑र्
   दि॒वेदि॑वे ईड्यः जागृ॒वद्भिः
   दि॒वेदि॑व ईडि॑यो जागृ॒वद्भि॑र्

Halfverse: d    ह॒विष्म॑द्भिर्मनु॒ष्ये॑भिर॒ग्निः ।।
   ह॒विष्म॑द्भिः मनु॒ष्ये॑भिः अ॒ग्निः ।।
   ह॒विष्म॑द्भिर् मनु॒षिये॑भिर् अ॒ग्निः ।।


Verse: 3 
Halfverse: a    उ॑त्ता॒नाया॒मव॑ भरा चिकि॒त्वान्स॒द्यः प्रवी॑ता॒ वृष॑णं जजान ।
   उ॑त्ता॒नाया॒मव॑ भरा चिकि॒त्वान्
   उत्ता॒नाया॑म् अव भर+ चिकि॒त्वान्
   उत्ता॒नाया॑म् अव भरा चिकि॒त्वान्

Halfverse: b    स॒द्यः प्रवी॑ता॒ वृष॑णं जजान ।
   स॒द्यः प्रवी॑ता वृष॑णम् जजान ।
   स॒द्यः प्रवी॑ता वृष॑णं जजान ।

Halfverse: c    अ॑रु॒षस्तू॑पो॒ रुश॑दस्य॒ पाज॒ इळा॑यास्पु॒त्रो व॒युने॑ ऽजनिष्ट ।।
   अ॑रु॒षस्तू॑पो॒ रुश॑दस्य॒ पाज
   अरु॒षस्तू॑पः रुश॑त् अस्य पाजः
   अरु॒षस्तू॑पो रुश॑द् अस्य पाज

Halfverse: d    इळा॑यास्पु॒त्रो व॒युने॑ ऽजनिष्ट ।।
   इळा॑याः पु॒त्रः व॒युने अजनिष्ट ।।
   इळा॑यास् पु॒त्रो व॒युने ऽजनिष्ट ।।


Verse: 4 
Halfverse: a    इळा॑यास्त्वा प॒दे व॒यं नाभा॑ पृथि॒व्या अधि॑ ।
   इळा॑यास्त्वा प॒दे व॒यं
   इळा॑याः त्वा प॒दे व॒यम्
   इळा॑यास् त्वा प॒दे व॒यं

Halfverse: b    नाभा॑ पृथि॒व्या अधि॑ ।
   नाभा पृथि॒व्याः अधि ।
   नाभा पृथिवि॒या अधि ।

Halfverse: c    जात॑वेदो॒ नि धी॑म॒ह्यग्ने॑ ह॒व्याय॒ वोऴ॑वे ।।
   जात॑वेदो॒ नि धी॑मह्य्
   जात॑वेदः नि धी॑महि
   जात॑वेदो नि धी॑महि

Halfverse: d    अग्ने॑ ह॒व्याय॒ वोऴ॑वे ।।
   अग्ने ह॒व्याय वोऴ॑वे ।।
   अग्ने ह॒व्याय वोऴ॑वे ।।


Verse: 5 
Halfverse: a    मन्थ॑ता नरः क॒विमद्व॑यन्त॒म्प्रचे॑तसम॒मृतं॑ सु॒प्रती॑कम् ।
   मन्थ॑ता नरः क॒विमद्व॑यन्तम्
   मन्थ॑त+ नरः क॒विम् अद्व॑यन्तम्
   मन्थ॑ता नरः क॒विम् अद्व॑यन्तम्

Halfverse: b    प्रचे॑तसम॒मृतं॑ सु॒प्रती॑कम् ।
   प्रचे॑तसम् अ॒मृत॑म् सु॒प्रती॑कम् ।
   प्रचे॑तसम् अ॒मृतं सु॒प्रती॑कम् ।

Halfverse: c    य॒ज्ञस्य॑ के॒तुम्प्र॑थ॒मम्पु॒रस्ता॑द॒ग्निं न॑रो जनयता सु॒शेव॑म् ।।
   य॒ज्ञस्य॑ के॒तुम्प्र॑थ॒मम्पु॒रस्ता॑द्
   य॒ज्ञस्य के॒तुम् प्रथ॒मम् पु॒रस्ता॑त्
   य॒ज्ञस्य के॒तुम् प्रथ॒मम् पु॒रस्ता॑द्

Halfverse: d    अ॒ग्निं न॑रो जनयता सु॒शेव॑म् ।।
   अ॒ग्निम् नरः जनयत+ सु॒शेव॑म् ।।
   अ॒ग्निं न॑रो जनयता सु॒शेव॑म् ।।


Verse: 6 
Halfverse: a    यदी॒ मन्थ॑न्ति बा॒हुभि॒र्वि रो॑च॒ते ऽश्वो॒ न वा॒ज्य॑रु॒षो वने॒ष्वा ।
   यदी॒ मन्थ॑न्ति बा॒हुभि॒र्वि रो॑च॒ते
   यदि+ मन्थ॑न्ति बा॒हुभिः वि रो॑चते
   यदी मन्थ॑न्ति बा॒हुभि॑र् वि रो॑चते

Halfverse: b    ऽश्वो॒ न वा॒ज्य॑रु॒षो वने॒ष्वा ।
   अश्वः न वा॒जी अ॑रु॒षः वने॑षु आ ।
   अश्वो न वा॒जी अ॑रु॒षो वने॑षु आ ।

Halfverse: c    चि॒त्रो न याम॑न्न॒श्विनो॒रनि॑वृतः॒ परि॑ वृण॒क्त्यश्म॑न॒स्तृणा॒ दह॑न् ।।
   चि॒त्रो न याम॑न्न॒श्विनो॒रनि॑वृतः
   चि॒त्रः न याम॑न् अ॒श्विनोः अनि॑वृतः
   चि॒त्रो न याम॑न् अ॒श्विनो॑र् अनि॑वृतः

Halfverse: d    परि॑ वृण॒क्त्यश्म॑न॒स्तृणा॒ दह॑न् ।।
   परि वृणक्ति अश्म॑नः तृणा दह॑न् ।।
   परि वृणक्ति अश्म॑नस् तृणा दह॑न् ।।


Verse: 7 
Halfverse: a    जा॒तो अ॒ग्नी रो॑चते॒ चेकि॑तानो वा॒जी विप्रः॑ कविश॒स्तः सु॒दानुः॑ ।
   जा॒तो अ॒ग्नी रो॑चते॒ चेकि॑तानो
   जा॒तः अ॒ग्निः रो॑चते चेकि॑तानः
   जा॒तो अ॒ग्नी रो॑चते चेकि॑तानो

Halfverse: b    वा॒जी विप्रः॑ कविश॒स्तः सु॒दानुः॑ ।
   वा॒जी विप्रः कविश॒स्तः सु॒दानुः ।
   वा॒जी विप्रः कविश॒स्तः सु॒दानुः ।

Halfverse: c    यं दे॒वास॒ ईड्यं॑ विश्व॒विदं॑ हव्य॒वाह॒मद॑धुरध्व॒रेषु॑ ।।
   यं दे॒वास॒ ईड्यं॑ विश्व॒विदं
   यम् दे॒वासः ईड्य॑म् विश्व॒विद॑म्
   यं दे॒वास ईडि॑यं विश्व॒विदं

Halfverse: d    हव्य॒वाह॒मद॑धुरध्व॒रेषु॑ ।।
   ह॑व्य॒वाह॑म् अद॑धुः अध्व॒रेषु ।।
   ह॑व्य॒वाह॑म् अद॑धुर् अध्व॒रेषु ।।


Verse: 8 
Halfverse: a    सीद॑ होतः॒ स्व उ॑ लो॒के चि॑कि॒त्वान्सा॒दया॑ य॒ज्ञं सु॑कृ॒तस्य॒ योनौ॑ ।
   सीद॑ होतः॒ स्व उ॑ लो॒के चि॑कि॒त्वान्
   सीद होतर् स्वे उ॑लो॒के ! चि॑कि॒त्वान्
   सीद होतः स्व उ॑लो॒के चि॑कि॒त्वान्

Halfverse: b    सा॒दया॑ य॒ज्ञं सु॑कृ॒तस्य॒ योनौ॑ ।
   सा॒दय+ य॒ज्ञम् सुकृ॒तस्य योनौ ।
   सा॒दया य॒ज्ञं सु॑कृ॒तस्य योनौ ।

Halfverse: c    दे॑वा॒वीर्दे॒वान्ह॒विषा॑ यजा॒स्यग्ने॑ बृ॒हद्यज॑माने॒ वयो॑ धाः ।।
   दे॑वा॒वीर्दे॒वान्ह॒विषा॑ यजास्य्
   देवा॒वीः दे॒वान् ह॒विषा यजासि
   देवा॒वीर् दे॒वान् ह॒विषा यजासि

Halfverse: d    अग्ने॑ बृ॒हद्यज॑माने॒ वयो॑ धाः ।।
   अग्ने बृ॒हत् यज॑माने वयः धाः ।।
   अग्ने बृ॒हद् यज॑माने वयो धाः ।।


Verse: 9 
Halfverse: a    कृ॒णोत॑ धू॒मं वृष॑णं सखा॒यो ऽस्रे॑धन्त इतन॒ वाज॒मछ॑ ।
   कृ॒णोत॑ धू॒मं वृष॑णं सखा॒यो
   कृ॒णोत धू॒मम् वृष॑णम् सखायः
   कृ॒णोत धू॒मं वृष॑णं सखायो

Halfverse: b    ऽस्रेधन्त इतन॒ वाज॒मछ॑ ।
   अस्रे॑धन्तः इतन वाज॑म् अछ ।
   अस्रे॑धन्त इतन वाज॑म् अछ ।

Halfverse: c    अ॒यम॒ग्निः पृ॑तना॒षाट्सु॒वीरो॒ येन॑ दे॒वासो॒ अस॑हन्त॒ दस्यू॑न् ।।
   अ॒यम॒ग्निः पृ॑तना॒षाट्सु॒वीरो
   अ॒यम् अ॒ग्निः पृ॑तना॒षाट् सु॒वीरः
   अ॒यम् अ॒ग्निः पृ॑तना॒षाट् सु॒वीरो

Halfverse: d    येन॑ दे॒वासो॒ अस॑हन्त॒ दस्यू॑न् ।।
   येन दे॒वासः अस॑हन्त दस्यू॑न् ।।
   येन दे॒वासो अस॑हन्त दस्यू॑न् ।।


Verse: 10 
Halfverse: a    अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः ।
   अ॒यं ते॒ योनि॑रृ॒त्वियो
   अ॒यम् ते योनिः ऋ॒त्वियः
   अ॒यं ते योनि॑र् ऋ॒त्वियो

Halfverse: b    यतो॑ जा॒तो अरो॑चथाः ।
   यतः जा॒तः अरो॑चथाः ।
   यतो जा॒तो अरो॑चथाः ।

Halfverse: c    तं जा॒नन्न॑ग्न॒ आ सी॒दाथा॑ नो वर्धया॒ गिरः॑ ।।
   तं जा॒नन्न॑ग्न॒ आ सी॑द
   तम् जा॒नन् अग्ने आ सी॑द
   तं जा॒नन्न् अग्न आ सी॑द

Halfverse: d     अथा॑ नो वर्धया॒ गिरः॑ ।।
   अथ+ नः वर्धय+ गिरः ।।
   अथा नो वर्धया गिरः ।।


Verse: 11 
Halfverse: a    तनू॒नपा॑दुच्यते॒ गर्भ॑ आसु॒रो नरा॒शंसो॑ भवति॒ यद्वि॒जाय॑ते ।
   तनू॒नपा॑दुच्यते॒ गर्भ॑ आसु॒रो
   तनू॒नपा॑त् उच्यते गर्भः आसु॒रः
   तनू॒नपा॑द् उच्यते गर्भ आसु॒रो

Halfverse: b    नरा॒शंसो॑ भवति॒ यद्वि॒जाय॑ते ।
   नरा॒शंसः भवति यत् वि॒जाय॑ते ।
   नरा॒शंसो भवति यद् वि॒जाय॑ते ।

Halfverse: c    मा॑त॒रिश्वा॒ यदमि॑मीत मा॒तरि॒ वात॑स्य॒ सर्गो॑ अभव॒त्सरी॑मणि ।।
   मा॑त॒रिश्वा॒ यदमि॑मीत मा॒तरि
   मात॒रिश्वा यत् अमि॑मीत मा॒तरि
   मात॒रिश्वा यद् अमि॑मीत मा॒तरि

Halfverse: d    वात॑स्य॒ सर्गो॑ अभव॒त्सरी॑मणि ।।
   वात॑स्य सर्गः अभवत् सरी॑मणि ।।
   वात॑स्य सर्गो अभवत् सरी॑मणि ।।


Verse: 12 
Halfverse: a    सु॑नि॒र्मथा॒ निर्म॑थितः सुनि॒धा निहि॑तः क॒विः ।
   सु॑नि॒र्मथा॒ निर्म॑थितः
   सुनि॒र्मथा निर्म॑थितः
   सुनि॒र्मथा निर्म॑थितः

Halfverse: b    सुनि॒धा निहि॑तः क॒विः ।
   सु॑नि॒धा निहि॑तः क॒विः ।
   सु॑नि॒धा निहि॑तः क॒विः ।

Halfverse: c    अग्ने॑ स्वध्व॒रा कृ॑णु दे॒वान्दे॑वय॒ते य॑ज ।।
   अग्ने॑ स्वध्व॒रा कृ॑णु
   अग्ने स्वध्व॒रा कृ॑णु
   अग्ने सुअध्व॒रा कृ॑णु

Halfverse: d    दे॒वान्दे॑वय॒ते य॑ज ।।
   दे॒वान् देवय॒ते य॑ज ।।
   दे॒वान् देवय॒ते य॑ज ।।


Verse: 13 
Halfverse: a    अजी॑जनन्न॒मृत॒म्मर्त्या॑सो ऽस्रे॒माणं॑ त॒रणिं॑ वी॒ळुज॑म्भम् ।
   अजी॑जनन्न॒मृत॒म्मर्त्या॑सो
   अजी॑जनन् अ॒मृत॑म् मर्त्या॑सः
   अजी॑जनन्न् अ॒मृत॑म् मर्ति॑यासो

Halfverse: b    ऽस्रे॒माणं॑ त॒रणिं॑ वी॒ळुज॑म्भम् ।
   अ॑स्रे॒माण॑म् त॒रणि॑म् वी॒ळुज॑म्भम् ।
   अ॑स्रे॒माणं त॒रणिं वी॒ळुज॑म्भम् ।

Halfverse: c    दश॒ स्वसा॑रो अ॒ग्रुवः॑ समी॒चीः पुमां॑सं जा॒तम॒भि सं र॑भन्ते ।।
   दश॒ स्वसा॑रो अ॒ग्रुवः॑ समी॒चीः
   दश स्वसा॑रः अ॒ग्रुवः समी॒चीः
   दश स्वसा॑रो अ॒ग्रुवः समी॒चीः

Halfverse: d    पुमां॑सं जा॒तम॒भि सं र॑भन्ते ।।
   पुमां॑सम् जा॒तम् अ॒भि सम् रभन्ते ।।
   पुमां॑सं जा॒तम् अ॒भि सं र॑भन्ते ।।


Verse: 14 
Halfverse: a    प्र स॒प्तहो॑ता सन॒काद॑रोचत मा॒तुरु॒पस्थे॒ यदशो॑च॒दूध॑नि ।
   प्र स॒प्तहो॑ता सन॒काद॑रोचत
   प्र स॒प्तहो॑ता सन॒कात् अरोचत
   प्र स॒प्तहो॑ता सन॒काद् अरोचत

Halfverse: b    मा॒तुरु॒पस्थे॒ यदशो॑च॒दूध॑नि ।
   मा॒तुः उ॒पस्थे यत् अशो॑चत् ऊध॑नि ।
   मा॒तुर् उ॒पस्थे यद् अशो॑चद् ऊध॑नि ।

Halfverse: c    न नि मि॑षति सु॒रणो॑ दि॒वेदि॑वे॒ यदसु॑रस्य ज॒ठरा॒दजा॑यत ।।
   न नि मि॑षति सु॒रणो॑ दि॒वेदि॑वे
   न नि मि॑षति सु॒रणः दि॒वेदि॑वे
   न नि मि॑षति सु॒रणो दि॒वेदि॑वे

Halfverse: d    यदसु॑रस्य ज॒ठरा॒दजा॑यत ।।
   यत् असु॑रस्य ज॒ठरा॑त् अजा॑यत ।।
   यद् असु॑रस्य ज॒ठरा॑द् अजा॑यत ।।


Verse: 15 
Halfverse: a    अ॑मित्रा॒युधो॑ म॒रुता॑मिव प्र॒याः प्र॑थम॒जा ब्रह्म॑णो॒ विश्व॒मिद्वि॑दुः ।
   अ॑मित्रा॒युधो॑ म॒रुता॑मिव प्र॒याः
   अ॑मित्रा॒युधः म॒रुता॑म् इव प्र॒याः
   अ॑मित्रा॒युधो म॒रुता॑म् इव प्र॒याः

Halfverse: b    प्र॑थम॒जा ब्रह्म॑णो॒ विश्व॒मिद्वि॑दुः ।
   प्र॑थम॒जाः ब्रह्म॑णः विश्व॑म् इत् विदुः ।
   प्र॑थम॒जा ब्रह्म॑णो विश्व॑म् इद् विदुः ।

Halfverse: c    द्यु॒म्नव॒द्ब्रह्म॑ कुशि॒कास॒ एरि॑र॒ एक॑एको॒ दमे॑ अ॒ग्निं समी॑धिरे ।।
   द्यु॒म्नव॒द्ब्रह्म॑ कुशि॒कास॒ एरि॑र
   द्यु॒म्नव॑त् ब्रह्म कुशि॒कासः आ ई॑रिरे
   द्यु॒म्नव॑द् ब्रह्म कुशि॒कास एरि॑र

Halfverse: d    एक॑एको॒ दमे॑ अ॒ग्निं समी॑धिरे ।।
   एक॑एकः दमे अ॒ग्निम् सम् ईधिरे ।।
   एक॑एको दमे अ॒ग्निं सम् ईधिरे ।।


Verse: 16 
Halfverse: a    यद॒द्य त्वा॑ प्रय॒ति य॒ज्ञे अ॒स्मिन्होत॑श्चिकि॒त्वो ऽवृ॑णीमही॒ह ।
   यद॒द्य त्वा॑ प्रय॒ति य॒ज्ञे अ॒स्मिन्
   यत् अ॒द्य त्वा प्रय॒ति य॒ज्ञे अ॒स्मिन्
   यद् अ॒द्य त्वा प्रय॒ति य॒ज्ञे अ॒स्मिन्

Halfverse: b    होत॑श्चिकि॒त्वो ऽवृ॑णीमही॒ह ।
   होत॑र् चिकित्वः अवृ॑णीमहि इ॒ह ।
   होत॑श् चिकित्वो अवृ॑णीमही॒ह ।

Halfverse: c    ध्रु॒वम॑या ध्रु॒वमु॒ताश॑मिष्ठाः प्रजा॒नन्वि॒द्वाँ उप॑ याहि॒ सोम॑म् ।।
   ध्रु॒वम॑या ध्रु॒वमु॒ताश॑मिष्ठाः
   ध्रु॒वम् अयाः ध्रु॒वम् उ॒त अ॑शमिष्ठाः
   ध्रु॒वम् अया ध्रु॒वम् उ॒ताश॑मिष्ठाः

Halfverse: d    प्रजा॒नन्वि॒द्वाँ उप॑ याहि॒ सोम॑म् ।।
   प्र॑जा॒नन् वि॒द्वान् उप याहि सोम॑म् ।।
   प्र॑जा॒नन् वि॒द्वाँ उप याहि सोम॑म् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.