TITUS
Rg-Veda: Rg-Veda-Samhita
Part No. 265
Previous part

Hymn: 31_(265) 
Verse: 1 
Halfverse: a    शास॒द्वह्नि॑र्दुहि॒तुर्न॒प्त्यं॑ गाद्वि॒द्वाँ ऋ॒तस्य॒ दीधि॑तिं सप॒र्यन् ।
   शास॒द्वह्नि॑र्दुहि॒तुर्न॒प्त्यं॑ गाद्
   शास॑त् वह्निः दुहि॒तुः न॒प्त्य॑म् गात्
   शास॑द् वह्नि॑र् दुहि॒तुर् न॒प्तियं गाद्

Halfverse: b    वि॒द्वाँ ऋ॒तस्य॒ दीधि॑तिं सप॒र्यन् ।
   वि॒द्वान् ऋ॒तस्य दीधि॑तिम् सप॒र्यन् ।
   वि॒द्वाँ ऋ॒तस्य दीधि॑तिं सप॒र्यन् ।

Halfverse: c    पि॒ता यत्र॑ दुहि॒तुः सेक॑मृ॒ञ्जन्सं श॒ग्म्ये॑न॒ मन॑सा दध॒न्वे ।।
   पि॒ता यत्र॑ दुहि॒तुः सेक॑मृ॒ञ्जन्
   पि॒ता यत्र दुहि॒तुः सेक॑म् ऋ॒ञ्जन्
   पि॒ता यत्र दुहि॒तुः सेक॑म् ऋ॒ञ्जन्

Halfverse: d    सं श॒ग्म्ये॑न॒ मन॑सा दध॒न्वे ।।
   सम् श॒ग्म्ये॑न मन॑सा दध॒न्वे ।।
   सं श॒ग्मिये॑न मन॑सा दध॒न्वे ।।


Verse: 2 
Halfverse: a    न जा॒मये॒ तान्वो॑ रि॒क्थमा॑रैक्च॒कार॒ गर्भं॑ सनि॒तुर्नि॒धान॑म् ।
   न जा॒मये॒ तान्वो॑ रि॒क्थमा॑रैक्
   न जा॒मये तान्वः रि॒क्थम् आरैक्
   न जा॒मये तानु॑वो रि॒क्थम् आरैक्

Halfverse: b    च॒कार॒ गर्भं॑ सनि॒तुर्नि॒धान॑म् ।
   च॒कार गर्भ॑म् सनि॒तुः नि॒धान॑म् ।
   च॒कार गर्भं सनि॒तुर् नि॒धान॑म् ।

Halfverse: c    यदी॑ मा॒तरो॑ ज॒नय॑न्त॒ वह्नि॑म॒न्यः क॒र्ता सु॒कृतो॑र॒न्य ऋ॒न्धन् ।।
   यदी॑ मा॒तरो॑ ज॒नय॑न्त॒ वह्नि॑म्
   यदि+ मा॒तरः ज॒नय॑न्त वह्नि॑म्
   यदी मा॒तरो ज॒नय॑न्त वह्नि॑म्

Halfverse: d    अ॒न्यः क॒र्ता सु॒कृतो॑र॒न्य ऋ॒न्धन् ।।
   अ॒न्यः क॒र्ता सु॒कृतोः अ॒न्यः ऋ॒न्धन् ।।
   अ॒न्यः क॒र्ता सु॒कृतो॑र् अ॒न्य ऋ॒न्धन् ।।


Verse: 3 
Halfverse: a    अ॒ग्निर्ज॑ज्ञे जु॒ह्वा॒ रेज॑मानो म॒हस्पु॒त्राँ अ॑रु॒षस्य॑ प्र॒यक्षे॑ ।
   अ॒ग्निर्ज॑ज्ञे जु॒ह्वा॒ रेज॑मानो
   अ॒ग्निः ज॑ज्ञे जु॒ह्वा रेज॑मानः
   अ॒ग्निर् जज्ञे जु॒हुवा रेज॑मानो

Halfverse: b    म॒हस्पु॒त्राँ अ॑रु॒षस्य॑ प्र॒यक्षे॑ ।
   म॒हः पु॒त्रान् अरु॒षस्य प्र॒यक्षे ।
   म॒हस् पु॒त्राँ अ॑रु॒षस्य प्र॒यक्षे ।

Halfverse: c    म॒हान्गर्भो॒ मह्या जा॒तमे॑षाम्म॒ही प्र॒वृद्धर्य॑श्वस्य य॒ज्ञैः ।।
   म॒हान्गर्भो॒ मह्या जा॒तमे॑षाम्
   म॒हान् गर्भः महि आ जा॒तम् एषाम्
   म॒हान् गर्भो महि आ जा॒तम् एषाम्

Halfverse: d    म॒ही प्र॒वृद्धर्य॑श्वस्य य॒ज्ञैः ।।
   म॒ही प्र॒वृत् हर्य॑श्वस्य य॒ज्ञैः ।।
   म॒ही प्र॒वृद् धरिअ॑श्वस्य य॒ज्ञैः ।।


Verse: 4 
Halfverse: a    अ॒भि जैत्री॑रसचन्त स्पृधा॒नम्महि॒ ज्योति॒स्तम॑सो॒ निर॑जानन् ।
   अ॒भि जैत्री॑रसचन्त स्पृधा॒नम्
   अ॒भि जैत्रीः असचन्त स्पृधा॒नम्
   अ॒भि जैत्री॑र् असचन्त स्पृधा॒नम्

Halfverse: b    महि॒ ज्योति॒स्तम॑सो॒ निर॑जानन् ।
   महि ज्योतिः तम॑सः निः अ॑जानन् ।
   महि ज्योति॑स् तम॑सो निर् अजानन् ।

Halfverse: c    तं जा॑न॒तीः प्रत्युदा॑यन्नु॒षासः॒ पति॒र्गवा॑मभव॒देक॒ इन्द्रः॑ ।।
   तं जा॑न॒तीः प्रत्युदा॑यन्नु॒षासः
   तम् जान॒तीः प्रति उत् आयन् उ॒षासः
   तं जा॑न॒तीः प्रत्य् उद् आयन्न् उ॒षासः

Halfverse: d    पति॒र्गवा॑मभव॒देक॒ इन्द्रः॑ ।।
   पतिः गवा॑म् अभवत् एकः इन्द्रः ।।
   पति॑र् गवा॑म् अभवद् एक इन्द्रः ।।


Verse: 5 
Halfverse: a    वी॒ळौ स॒तीर॒भि धीरा॑ अतृन्दन्प्रा॒चाहि॑न्व॒न्मन॑सा स॒प्त विप्राः॑ ।
   वी॒ळौ स॒तीर॒भि धीरा॑ अतृन्दन्
   वी॒ळौ स॒तीः अ॒भि धीराः अतृन्दन्
   वी॒ळौ स॒तीर् अ॒भि धीरा अतृन्दन्

Halfverse: b    प्रा॒चाहि॑न्व॒न्मन॑सा स॒प्त विप्राः॑ ।
   प्रा॒चा अ॑हिन्वन् मन॑सा स॒प्त विप्राः ।
   प्रा॒चाहि॑न्वन् मन॑सा स॒प्त विप्राः ।

Halfverse: c    विश्वा॑मविन्दन्प॒थ्या॑मृ॒तस्य॑ प्रजा॒नन्नित्ता नम॒सा वि॑वेश ।।
   विश्वा॑मविन्दन्प॒थ्या॑मृ॒तस्य
   विश्वा॑म् अविन्दन् प॒थ्या॑म् ऋ॒तस्य
   विश्वा॑म् अविन्दन् प॒थिया॑म् ऋ॒तस्य

Halfverse: d    प्रजा॒नन्नित्ता नम॒सा वि॑वेश ।।
   प्र॑जा॒नन् इत् ता नम॑सा आ वि॑वेश ।।
   प्र॑जा॒नन्न् इत् ता नम॒सा वि॑वेश ।।


Verse: 6 
Halfverse: a    वि॒दद्यदी॑ स॒रमा॑ रु॒ग्णमद्रे॒र्महि॒ पाथः॑ पू॒र्व्यं स॒ध्र्य॑क्कः ।
   वि॒दद्यदी॑ स॒रमा॑ रु॒ग्णमद्रे॑र्
   वि॒दत् यदि+ स॒रमा रु॒ग्णम् अद्रेः
   वि॒दद् यदी स॒रमा रु॒ग्णम् अद्रे॑र्

Halfverse: b    महि॒ पाथः॑ पू॒र्व्यं स॒ध्र्य॑क्कः ।
   महि पाथः पू॒र्व्यम् स॒ध्र्य॑क् कर् ।
   महि पाथः पूर्वि॒यं सध्रिअक् कः ।

Halfverse: c    अग्रं॑ नयत्सु॒पद्यक्ष॑राणा॒मछा॒ रव॑म्प्रथ॒मा जा॑न॒ती गा॑त् ।।
   अग्रं॑ नयत्सु॒पद्यक्ष॑राणाम्
   अग्र॑म् नयत् सु॒पदी अक्ष॑राणाम्
   अग्रं नयत् सु॒पदि अक्ष॑राणाम्

Halfverse: d    अछा॒ रव॑म्प्रथ॒मा जा॑न॒ती गा॑त् ।।
   अछ+ रव॑म् प्रथ॒मा जा॑न॒ती गा॑त् ।।
   अछा रव॑म् प्रथ॒मा जा॑न॒ती गा॑त् ।।


Verse: 7 
Halfverse: a    अग॑छदु॒ विप्र॑तमः सखी॒यन्नसू॑दयत्सु॒कृते॒ गर्भ॒मद्रिः॑ ।
   अग॑छदु॒ विप्र॑तमः सखी॒यन्न्
   अग॑छत् उ विप्र॑तमः सखी॒यन्
   अग॑छद् उ विप्र॑तमः सखी॒यन्न्

Halfverse: b    असू॑दयत्सु॒कृते॒ गर्भ॒मद्रिः॑ ।
   असू॑दयत् सु॒कृते गर्भ॑म् अद्रिः ।
   असू॑दयत् सु॒कृते गर्भ॑म् अद्रिः ।

Halfverse: c    स॒सान॒ मर्यो॒ युव॑भिर्मख॒स्यन्नथा॑भव॒दङ्गि॑राः स॒द्यो अर्च॑न् ।।
   स॒सान॒ मर्यो॒ युव॑भिर्मख॒स्यन्न्
   स॒सान मर्यः युव॑भिः मख॒स्यन्
   स॒सान मर्यो युव॑भिर् मख॒स्यन्न्

Halfverse: d    अथा॑भव॒दङ्गि॑राः स॒द्यो अर्च॑न् ।।
   अथ अभवत् अङ्गि॑राः स॒द्यः अर्च॑न् ।।
   अथा॑भवद् अङ्गि॑राः स॒द्यो अर्च॑न् ।।


Verse: 8 
Halfverse: a    स॒तःस॑तः प्रति॒मान॑म्पुरो॒भूर्विश्वा॑ वेद॒ जनि॑मा॒ हन्ति॒ शुष्ण॑म् ।
   स॒तःस॑तः प्रति॒मान॑म्पुरो॒भूर्
   स॒तःस॑तः प्रति॒मान॑म् पुरो॒भूः
   स॒तःस॑तः प्रति॒मान॑म् पुरो॒भूर्

Halfverse: b    विश्वा॑ वेद॒ जनि॑मा॒ हन्ति॒ शुष्ण॑म् ।
   विश्वा वेद जनि॑म+ हन्ति शुष्ण॑म् ।
   विश्वा वेद जनि॑मा हन्ति शुष्ण॑म् ।

Halfverse: c    प्र णो॑ दि॒वः प॑द॒वीर्ग॒व्युरर्च॒न्सखा॒ सखीँ॑रमुञ्च॒न्निर॑व॒द्यात् ।।
   प्र णो॑ दि॒वः प॑द॒वीर्ग॒व्युरर्च॑न्
   प्र नः दि॒वः प॑द॒वीः ग॒व्युः अर्च॑न्
   प्र णो दि॒वः प॑द॒वीर् ग॒व्युर् अर्च॑न्

Halfverse: d    सखा॒ सखीँ॑रमुञ्च॒न्निर॑व॒द्यात् ।।
   सखा सखी॑न् अमुञ्चत् निः अ॑व॒द्यात् ।।
   सखा सखीँ॑र् अमुञ्चन् निर् अव॒द्यात् ।।


Verse: 9 
Halfverse: a    नि ग॑व्य॒ता मन॑सा सेदुर॒र्कैः कृ॑ण्वा॒नासो॑ अमृत॒त्वाय॑ गा॒तुम् ।
   नि ग॑व्य॒ता मन॑सा सेदुर॒र्कैः
   नि ग॑व्य॒ता मन॑सा सेदुः अ॒र्कैः
   नि ग॑व्य॒ता मन॑सा सेदुर् अ॒र्कैः

Halfverse: b    कृ॑ण्वा॒नासो॑ अमृत॒त्वाय॑ गा॒तुम् ।
   कृ॑ण्वा॒नासः अमृत॒त्वाय गा॒तुम् ।
   कृ॑ण्वा॒नासो अमृत॒त्वाय गा॒तुम् ।

Halfverse: c    इ॒दं चि॒न्नु सद॑न॒म्भूर्ये॑षां॒ येन॒ मासाँ॒ असि॑षासन्नृ॒तेन॑ ।।
   इ॒दं चि॒न्नु सद॑न॒म्भूर्ये॑षां
   इ॒दम् चित् नु सद॑नम् भूरि एषाम्
   इ॒दं चि॑न् नु सद॑नम् भूरि एषां

Halfverse: d    येन॒ मासाँ॒ असि॑षासन्नृ॒तेन॑ ।।
   येन मासा॑न् असि॑षासन् ऋ॒तेन ।।
   येन मासाँ असि॑षासन्न् ऋ॒तेन ।।


Verse: 10 
Halfverse: a    स॒म्पश्य॑माना अमदन्न॒भि स्वम्पयः॑ प्र॒त्नस्य॒ रेत॑सो॒ दुघा॑नाः ।
   स॒म्पश्य॑माना अमदन्न॒भि स्वम्
   स॒म्पश्य॑मानाः अमदन् अ॒भि स्वम्
   स॒म्पश्य॑माना अमदन्न् अ॒भि स्वम्

Halfverse: b    पयः॑ प्र॒त्नस्य॒ रेत॑सो॒ दुघा॑नाः ।
   पयः प्र॒त्नस्य रेत॑सः दुघा॑नाः ।
   पयः प्र॒त्नस्य रेत॑सो दुघा॑नाः ।

Halfverse: c    वि रोद॑सी अतप॒द्घोष॑ एषां जा॒ते नि॒ष्ठामद॑धु॒र्गोषु॑ वी॒रान् ।।
   वि रोद॑सी अतप॒द्घो षए॑षां
   वि रोद॑सी अतपत् घोषः एषाम्
   वि रोद॑सी अतपद् घोष एषां

Halfverse: d    जा॒ते नि॒ष्ठामद॑धु॒र्गोषु॑ वी॒रान् ।।
   जा॒ते नि॒ष्ठाम् अद॑धुः गोषु वी॒रान् ।।
   जा॒ते नि॒ष्ठाम् अद॑धुर् गोषु वी॒रान् ।।


Verse: 11 
Halfverse: a    स जा॒तेभि॑र्वृत्र॒हा सेदु॑ ह॒व्यैरुदु॒स्रिया॑ असृज॒दिन्द्रो॑ अ॒र्कैः ।
   स जा॒तेभि॑र्वृत्र॒हा सेदु॑ ह॒व्यैर्
   स जा॒तेभिः वृत्र॒हा स इत् उ ह॒व्यैः
   स जा॒तेभि॑र् वृत्र॒हा सेद् उ ह॒व्यैर्

Halfverse: b    उदु॒स्रिया॑ असृज॒दिन्द्रो॑ अ॒र्कैः ।
   उत् उ॒स्रियाः असृजत् इन्द्रः अ॒र्कैः ।
   उद् उ॒स्रिया असृजद् इन्द्रो अ॒र्कैः ।

Halfverse: c    उ॑रू॒च्य॑स्मै घृ॒तव॒द्भर॑न्ती॒ मधु॒ स्वाद्म॑ दुदुहे॒ जेन्या॒ गौः ।।
   उ॑रू॒च्य॑स्मै घृ॒तव॒द्भर॑न्ती
   उरू॒ची अ॑स्मै घृ॒तव॑त् भर॑न्ती
   उरू॒चि अ॑स्मै घृ॒तव॑द् भर॑न्ती

Halfverse: d    मधु॒ स्वाद्म॑ दुदुहे॒ जेन्या॒ गौः ।।
   मधु स्वाद्म दुदुहे जेन्या गौः ।।
   मधु स्वाद्म दुदुहे जेनि॑या गौः ।।


Verse: 12 
Halfverse: a    पि॒त्रे चि॑च्चक्रुः॒ सद॑नं॒ सम॑स्मै॒ महि॒ त्विषी॑मत्सु॒कृतो॒ वि हि ख्यन् ।
   पि॒त्रे चि॑च्चक्रुः॒ सद॑नं॒ सम॑स्मै
   पि॒त्रे चि॑त् चक्रुः सद॑नम् सम् अस्मै
   पि॒त्रे चि॑च् चक्रुः सद॑नं सम् अस्मै

Halfverse: b    महि॒ त्विषी॑मत्सु॒कृतो॒ वि हि ख्यन् ।
   महि त्विषी॑मत् सु॒कृतः वि हि ख्यन् ।
   महि त्विषी॑मत् सु॒कृतो वि हि ख्यन् ।

Halfverse: c    वि॑ष्क॒भ्नन्त॒ स्कम्भ॑नेना॒ जनि॑त्री॒ आसी॑ना ऊ॒र्ध्वं र॑भ॒सं वि मि॑न्वन् ।।
   वि॑ष्क॒भ्नन्त॒ स्कम्भ॑नेना॒ जनि॑त्री
   विष्क॒भ्नन्तः स्कम्भ॑नेन+ जनि॑त्री
   विष्क॒भ्नन्त स्कम्भ॑नेना जनि॑त्री

Halfverse: d    आसी॑ना ऊ॒र्ध्वं र॑भ॒सं वि मि॑न्वन् ।।
   आसी॑नाः ऊ॒र्ध्वम् रभ॒सम् वि मि॑न्वन् ।।
   आसी॑ना ऊ॒र्ध्वं र॑भ॒सं वि मि॑न्वन् ।।


Verse: 13 
Halfverse: a    म॒ही यदि॑ धि॒षणा॑ शि॒श्नथे॒ धात्स॑द्यो॒वृधं॑ वि॒भ्वं॒ रोद॑स्योः ।
   म॒ही यदि॑ धि॒षणा॑ शि॒श्नथे॒ धात्
   म॒ही यदि धि॒षणा शि॒श्नथे धात्
   म॒ही यदि धि॒षणा शि॒श्नथे धात्

Halfverse: b    सद्यो॒वृधं॑ वि॒भ्वं॒ रोद॑स्योः ।
   स॑द्यो॒वृध॑म् वि॒भ्व॑म् रोद॑स्योः ।
   स॑द्यो॒वृधं वि॒भुवं रोद॑सीयोः % ।

Halfverse: c    गिरो॒ यस्मि॑न्ननव॒द्याः स॑मी॒चीर्विश्वा॒ इन्द्रा॑य॒ तवि॑षी॒रनु॑त्ताः ।।
   गिरो॒ यस्मि॑न्ननव॒द्याः स॑मी॒चीर्
   गिरः यस्मि॑न् अनव॒द्याः स॑मी॒चीः
   गिरो यस्मि॑न्न् अनव॒द्याः स॑मी॒चीर्

Halfverse: d    विश्वा॒ इन्द्रा॑य॒ तवि॑षी॒रनु॑त्ताः ।।
   विश्वाः इन्द्रा॑य तवि॑षीः अनु॑त्ताः ।।
   विश्वा इन्द्रा॑य तवि॑षीर् अनु॑त्ताः ।।


Verse: 14 
Halfverse: a    मह्या ते॑ स॒ख्यं व॑श्मि श॒क्तीरा वृ॑त्र॒घ्ने नि॒युतो॑ यन्ति पू॒र्वीः ।
   मह्या ते॑ स॒ख्यं व॑श्मि श॒क्तीर्
   महि आ ते स॒ख्यम् वश्मि श॒क्तीः
   महि आ ते सखि॒यं व॑श्मि श॒क्तीर्

Halfverse: b    आ वृ॑त्र॒घ्ने नि॒युतो॑ यन्ति पू॒र्वीः ।
   आ वृ॑त्र॒घ्ने नि॒युतः यन्ति पू॒र्वीः ।
   आ वृ॑त्र॒घ्ने नि॒युतो यन्ति पू॒र्वीः ।

Halfverse: c    महि॑ स्तो॒त्रमव॒ आग॑न्म सू॒रेर॒स्माकं॒ सु म॑घवन्बोधि गो॒पाः ।।
   महि॑ स्तो॒त्रमव॒ आग॑न्म सू॒रेर्
   महि स्तो॒त्रम् अवः आ अ॑गन्म सू॒रेः
   महि स्तो॒त्रम् अव आग॑न्म सू॒रेर्

Halfverse: d    अ॒स्माकं॒ सु म॑घवन्बोधि गो॒पाः ।।
   अ॒स्माक॑म् सु म॑घवन् बोधि गो॒पाः ।।
   अ॒स्माकं सु म॑घवन् बोधि गो॒पाः ।।


Verse: 15 
Halfverse: a    महि॒ क्षेत्र॑म्पु॒रु श्च॒न्द्रं वि॑वि॒द्वानादित्सखि॑भ्यश्च॒रथं॒ सऐ॑रत् ।
   महि॒ क्षेत्र॑म्पु॒रु श्च॒न्द्रं वि॑वि॒द्वान्
   महि क्षेत्र॑म् पु॒रु श्च॒न्द्रम् विवि॒द्वान्
   महि क्षेत्र॑म् पु॒रु श्च॒न्द्रं वि॑वि॒द्वान्

Halfverse: b    आदित्सखि॑भ्यश्च॒रथं॒ सऐ॑रत् ।
   आत् इत् सखि॑भ्यः च॒रथ॑म् सम् ऐरत् ।
   आद् इत् सखि॑भ्यश् च॒रथं सम् ऐरत् ।

Halfverse: c    इन्द्रो॒ नृभि॑रजन॒द्दीद्या॑नः सा॒कं सूर्य॑मु॒षसं॑ गा॒तुम॒ग्निम् ।।
   इन्द्रो॒ नृभि॑रजन॒द्दीद्या॑नः
   इन्द्रः नृभिः अजनत् दीद्या॑नः
   इन्द्रो नृभि॑र् अजनद् दीदि॑यानः

Halfverse: d    सा॒कं सूर्य॑मु॒षसं॑ गा॒तुम॒ग्निम् ।।
   सा॒कम् सूर्य॑म् उ॒षस॑म् गा॒तुम् अ॒ग्निम् ।।
   सा॒कं सूर्य॑म् उ॒षसं गा॒तुम् अ॒ग्निम् ।।


Verse: 16 
Halfverse: a    अ॒पश्चि॑दे॒ष वि॒भ्वो॒ दमू॑नाः॒ प्र स॒ध्रीची॑रसृजद्वि॒श्वश्च॑न्द्राः ।
   अ॒पश्चि॑दे॒ष वि॒भ्वो॒ दमू॑नाः
   अ॒पः चि॑त् ए॒ष वि॒भ्वः दमू॑नाः
   अ॒पश् चिद् ए॒ष वि॒भुवो दमू॑नाः

Halfverse: b    प्र स॒ध्रीची॑रसृजद्वि॒श्वश्च॑न्द्राः ।
   प्र स॒ध्रीचीः असृजत् वि॒श्वश्च॑न्द्राः ।
   प्र स॒ध्रीची॑र् असृजद् वि॒श्वश्च॑न्द्राः ।

Halfverse: c    मध्वः॑ पुना॒नाः क॒विभिः॑ प॒वित्रै॒र्द्युभि॑र्हिन्वन्त्य॒क्तुभि॒र्धनु॑त्रीः ।।
   मध्वः॑ पुना॒नाः क॒विभिः॑ प॒वित्रै॑र्
   मध्वः पुना॒नाः क॒विभिः प॒वित्रैः
   मध्वः पुना॒नाः क॒विभिः प॒वित्रै॑र्

Halfverse: d    द्युभि॑र्हिन्वन्त्य॒क्तुभि॒र्धनु॑त्रीः ।।
   द्युभिः हिन्वन्ति अ॒क्तुभिः धनु॑त्रीः ।।
   द्युभि॑र् हिन्वन्ति अ॒क्तुभि॑र् धनु॑त्रीः ।।


Verse: 17 
Halfverse: a    अनु॑ कृ॒ष्णे वसु॑धिती जिहाते उ॒भे सूर्य॑स्य मं॒हना॒ यज॑त्रे ।
   अनु॑ कृ॒ष्णे वसु॑धिती जिहाते
   अनु कृ॒ष्णे वसु॑धिती जिहाते
   अनु कृ॒ष्णे वसु॑धिती जिहाते

Halfverse: b    उ॒भे सूर्य॑स्य मं॒हना॒ यज॑त्रे ।
   उ॒भे सूर्य॑स्य मं॒हना यज॑त्रे ।
   उ॒भे सूर्य॑स्य मं॒हना यज॑त्रे ।

Halfverse: c    परि॒ यत्ते॑ महि॒मानं॑ वृ॒जध्यै॒ सखा॑य इन्द्र॒ काम्या॑ ऋजि॒प्याः ।।
   परि॒ यत्ते॑ महि॒मानं॑ वृ॒जध्यै
   परि यत् ते महि॒मान॑म् वृ॒जध्यै
   परि यत् ते महि॒मानं वृ॒जध्यै

Halfverse: d    सखा॑य इन्द्र॒ काम्या॑ ऋजि॒प्याः ।।
   सखा॑यः इन्द्र काम्याः ऋजि॒प्याः ।।
   सखा॑य इन्द्र कामि॑या ऋजि॒प्याः ।।


Verse: 18 
Halfverse: a    पति॑र्भव वृत्रहन्सू॒नृता॑नां गि॒रां वि॒श्वायु॑र्वृष॒भो व॑यो॒धाः ।
   पति॑र्भव वृत्रहन्सू॒नृता॑नां
   पतिः भव वृत्रहन् सू॒नृता॑नाम्
   पति॑र् भव वृत्रहन् सू॒नृता॑नां

Halfverse: b    गि॒रां वि॒श्वायु॑र्वृष॒भो व॑यो॒धाः ।
   गि॒राम् वि॒श्वायुः वृष॒भः व॑यो॒धाः ।
   गि॒रां वि॒श्वायु॑र् वृष॒भो व॑यो॒धाः ।

Halfverse: c    आ नो॑ गहि स॒ख्येभिः॑ शि॒वेभि॑र्म॒हान्म॒हीभि॑रू॒तिभिः॑ सर॒ण्यन् ।।
   आ नो॑ गहि स॒ख्येभिः॑ शि॒वेभि॑र्
   आ नः गहि स॒ख्येभिः शि॒वेभिः
   आ नो गहि सखि॒येभिः शि॒वेभि॑र्

Halfverse: d    म॒हान्म॒हीभि॑रू॒तिभिः॑ सर॒ण्यन् ।।
   म॒हान् म॒हीभिः ऊ॒तिभिः सर॒ण्यन् ।।
   म॒हान् म॒हीभि॑र् ऊ॒तिभिः सर॒ण्यन् ।।


Verse: 19 
Halfverse: a    तम॑ङ्गिर॒स्वन्नम॑सा सप॒र्यन्नव्यं॑ कृणोमि॒ सन्य॑से पुरा॒जाम् ।
   तम॑ङ्गिर॒स्वन्नम॑सा सप॒र्यन्
   तम् अङ्गिर॒स्वत् नम॑सा सप॒र्यन्
   तम् अङ्गिर॒स्वन् नम॑सा सप॒र्यन्

Halfverse: b    नव्यं॑ कृणोमि॒ सन्य॑से पुरा॒जाम् ।
   नव्य॑म् कृणोमि सन्य॑से पुरा॒जाम् ।
   नव्यं कृणोमि सन्य॑से पुरा॒जाम् ।

Halfverse: c    द्रुहो॒ वि या॑हि बहु॒ला अदे॑वीः॒ स्व॑श्च नो मघवन्सा॒तये॑ धाः ।।
   द्रुहो॒ वि या॑हि बहु॒ला अदे॑वीः
   द्रुहः वि या॑हि बहु॒लाः अदे॑वीः
   द्रुहो वि या॑हि बहु॒ला अदे॑वीः

Halfverse: d    स्व॑श्च नो मघवन्सा॒तये॑ धाः ।।
   स्व॑र् च नः मघवन् सा॒तये धाः ।।
   सुव॑श् च नो मघवन् सा॒तये धाः ।।


Verse: 20 
Halfverse: a    मिहः॑ पाव॒काः प्रत॑ता अभूवन्स्व॒स्ति नः॑ पिपृहि पा॒रमा॑साम् ।
   मिहः॑ पाव॒काः प्रत॑ता अभूवन्
   मिहः पाव॒काः प्रत॑ताः अभूवन्
   मिहः पवा॒काः प्रत॑ता अभूवन्

Halfverse: b    स्व॒स्ति नः॑ पिपृहि पा॒रमा॑साम् ।
   स्व॒स्ति नः पिपृहि पा॒रम् आसाम् ।
   सुअ॒स्ति नः पिपृहि पा॒रम् आसाम् ।

Halfverse: c    इन्द्र॒ त्वं र॑थि॒रः पा॑हि नो रि॒षो म॒क्षूम॑क्षू कृणुहि गो॒जितो॑ नः ।।
   इन्द्र॒ त्वं र॑थि॒रः पा॑हि नो रि॒षो
   इन्द्र त्वम् रथि॒रः पा॑हि नः रि॒षः
   इन्द्र त्वं र॑थि॒रः पा॑हि नो रि॒षो

Halfverse: d    म॒क्षूम॑क्षू कृणुहि गो॒जितो॑ नः ।।
   म॒क्षूम॑क्षु+ कृणुहि गो॒जितः नः ।।
   म॒क्षूम॑क्षू कृणुहि गो॒जितो नः ।।


Verse: 21 
Halfverse: a    अदे॑दिष्ट वृत्र॒हा गोप॑ति॒र्गा अ॒न्तः कृ॒ष्णाँ अ॑रु॒षैर्धाम॑भिर्गात् ।
   अदे॑दिष्ट वृत्र॒हा गोप॑ति॒र्गा
   अदे॑दिष्ट वृत्र॒हा गोप॑तिः गाः
   अदे॑दिष्ट वृत्र॒हा गोप॑तिर् गा

Halfverse: b    अ॒न्तः कृ॒ष्णाँ अ॑रु॒षैर्धाम॑भिर्गात् ।
   अ॒न्तर् कृ॒ष्णान् अरु॒षैः धाम॑भिः गात् ।
   अ॒न्तः कृ॒ष्णाँ अ॑रु॒षैर् धाम॑भिर् गात् ।

Halfverse: c    प्र सू॒नृता॑ दि॒शमा॑न ऋ॒तेन॒ दुर॑श्च॒ विश्वा॑ अवृणो॒दप॒ स्वाः ।।
   प्र सू॒नृता॑ दि॒शमा॑न ऋ॒तेन
   प्र सू॒नृताः दि॒शमा॑नः ऋ॒तेन
   प्र सू॒नृता दि॒शमा॑न ऋ॒तेन

Halfverse: d    दुर॑श्च॒ विश्वा॑ अवृणो॒दप॒ स्वाः ।।
   दुरः च विश्वाः अवृणोत् अप स्वाः ।।
   दुर॑श् च विश्वा अवृणोद् अप स्वाः ।।


Verse: 22 
Halfverse: a    शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
   शु॒नं हु॑वेम म॒घवा॑न॒मिन्द्र॑म्
   शु॒नम् हुवेम म॒घवा॑नम् इन्द्र॑म्
   शु॒नं हु॑वेम म॒घवा॑नम् इन्द्र॑म्

Halfverse: b    अ॒स्मिन्भरे॒ नृत॑मं॒ वाज॑सातौ ।
   अ॒स्मिन् भरे नृत॑मम् वाज॑सातौ ।
   अ॒स्मिन् भरे नृत॑मं वाज॑सातौ ।

Halfverse: c    शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ।।
   शृ॒ण्वन्त॑मु॒ग्रमू॒तये॑ स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु

Halfverse: d    घ्नन्तं॑ वृ॒त्राणि॑ सं॒जितं॒ धना॑नाम् ।।
   घ्नन्त॑म् वृ॒त्राणि सं॒जित॑म् धना॑नाम् ।।
   घ्नन्तं वृ॒त्राणि सं॒जितं धना॑नाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.