TITUS
Rg-Veda: Rg-Veda-Samhita
Part No. 267
Previous part

Hymn: 33_(267) 
Verse: 1 
Halfverse: a    प्र पर्व॑तानामुश॒ती उ॒पस्था॒दश्वे॑ इव॒ विषि॑ते॒ हास॑माने ।
   प्र पर्व॑तानामुश॒ती उ॒पस्था॑द्
   प्र पर्व॑तानाम् उश॒ती उ॒पस्था॑त्
   प्र पर्व॑तानाम् उश॒ती उ॒पस्था॑द्

Halfverse: b    अश्वे॑ इव॒ विषि॑ते॒ हास॑माने ।
   अश्वे इव विषि॑ते हास॑माने ।
   अश्वे इव विषि॑ते हास॑माने ।

Halfverse: c    गावे॑व शु॒भ्रे मा॒तरा॑ रिहा॒णे विपा॑ट्छुतु॒द्री पय॑सा जवेते ।।
   गावे॑व शु॒भ्रे मा॒तरा॑ रिहा॒णे
   गावा इव शु॒भ्रे मा॒तरा रिहा॒णे
   गावे॑व शु॒भ्रे मा॒तरा रिहा॒णे

Halfverse: d    विपा॑ट्छुतु॒द्री पय॑सा जवेते ।।
   विपा॑ट् शुतु॒द्री पय॑सा जवेते ।।
   विपा॑ट् छुतु॒द्री पय॑सा जवेते ।।


Verse: 2 
Halfverse: a    इन्द्रे॑षिते प्रस॒वम्भिक्ष॑माणे॒ अछा॑ समु॒द्रं र॒थ्ये॑व याथः ।
   इन्द्रे॑षिते प्रस॒वम्भिक्ष॑माणे
   इन्द्रे॑षिते प्रस॒वम् भिक्ष॑माणे
   इन्द्रे॑षिते प्रस॒वम् भिक्ष॑माणे

Halfverse: b    अछा॑ समु॒द्रं र॒थ्ये॑व याथः ।
   अछ+ समु॒द्रम् र॒थ्या इव याथः ।
   अछा समु॒द्रं र॒थिये॑व याथः ।

Halfverse: c    स॑मारा॒णे ऊ॒र्मिभिः॒ पिन्व॑माने अ॒न्या वा॑म॒न्यामप्ये॑ति शुभ्रे ।।
   स॑मारा॒णे ऊ॒र्मिभिः॒ पिन्व॑माने
   समारा॒णे ऊ॒र्मिभिः पिन्व॑माने
   समारा॒णे ऊ॒र्मिभिः पिन्व॑माने

Halfverse: d    अ॒न्या वा॑म॒न्यामप्ये॑ति शुभ्रे ।।
   अ॒न्या वा॑म् अ॒न्याम् अपि एति शुभ्रे ।।
   अ॒न्या वा॑म् अ॒न्याम् अपि एति शुभ्रे ।।


Verse: 3 
Halfverse: a    अछा॒ सिन्धु॑म्मा॒तृत॑मामयासं॒ विपा॑शमु॒र्वीं सु॒भगा॑मगन्म ।
   अछा॒ सिन्धु॑म्मा॒तृत॑मामयासं
   अछ+ सिन्धु॑म् मा॒तृत॑माम् अयासम्
   अछा सिन्धु॑म् मा॒तृत॑माम् अयासं

Halfverse: b    विपा॑शमु॒र्वीं सु॒भगा॑मगन्म ।
   विपा॑शम् उ॒र्वीम् सु॒भगा॑म् अगन्म ।
   विपा॑शम् उ॒र्वीं सु॒भगा॑म् अगन्म ।

Halfverse: c    व॒त्समि॑व मा॒तरा॑ संरिहा॒णे स॑मा॒नं योनि॒मनु॑ सं॒चर॑न्ती ।।
   व॒त्समि॑व मा॒तरा॑ संरिहा॒णे
   व॒त्सम् इव मा॒तरा संरिहा॒णे
   व॒त्सम् इव मा॒तरा संरिहा॒णे

Halfverse: d    स॑मा॒नं योनि॒मनु॑ सं॒चर॑न्ती ।।
   स॑मा॒नम् योनि॑म् अनु सं॒चर॑न्ती ।।
   स॑मा॒नं योनि॑म् अनु सं॒चर॑न्ती ।।


Verse: 4 
Halfverse: a    ए॒ना व॒यम्पय॑सा॒ पिन्व॑माना॒ अनु॒ योनिं॑ दे॒वकृ॑तं॒ चर॑न्तीः ।
   ए॒ना व॒यम्पय॑सा॒ पिन्व॑माना
   ए॒ना व॒यम् पय॑सा पिन्व॑मानाः
   ए॒ना व॒यम् पय॑सा पिन्व॑माना

Halfverse: b    अनु॒ योनिं॑ दे॒वकृ॑तं॒ चर॑न्तीः ।
   अनु योनि॑म् दे॒वकृ॑तम् चर॑न्तीः ।
   अनु योनिं दे॒वकृ॑तं चर॑न्तीः ।

Halfverse: c    न वर्त॑वे प्रस॒वः सर्ग॑तक्तः किं॒युर्विप्रो॑ न॒द्यो॑ जोहवीति ।।
   न वर्त॑वे प्रस॒वः सर्ग॑तक्तः
   न वर्त॑वे प्रस॒वः सर्ग॑तक्तः
   न वर्त॑वे प्रस॒वः सर्ग॑तक्तः

Halfverse: d    किं॒युर्विप्रो॑ न॒द्यो॑ जोहवीति ।।
   किं॒युः विप्रः न॒द्यः जोहवीति ।।
   किं॒युर् विप्रो न॒दियो जोहवीति ।।


Verse: 5 
Halfverse: a    रम॑ध्वम्मे॒ वच॑से सो॒म्याय॒ ऋता॑वरी॒रुप॑ मुहू॒र्तमेवैः॑ ।
   रम॑ध्वम्मे॒ वच॑से सो॒म्याय
   रम॑ध्वम् मे वच॑से सो॒म्याय
   रम॑ध्वम् मे वच॑से सोमि॒याय

Halfverse: b    ऋता॑वरी॒रुप॑ मुहू॒र्तमेवैः॑ ।
   ऋता॑वरीः उप मुहू॒र्तम् एवैः ।
   ऋता॑वरीर् उप मुहू॒र्तम् एवैः ।

Halfverse: c    प्र सिन्धु॒मछा॑ बृह॒ती म॑नी॒षाव॒स्युर॑ह्वे कुशि॒कस्य॑ सू॒नुः ।।
   प्र सिन्धु॒मछा॑ बृह॒ती म॑नी॒षा
   प्र सिन्धु॑म् अछ+ बृह॒ती म॑नी॒षा
   प्र सिन्धु॑म् अछा बृह॒ती म॑नी॒षा

Halfverse: d     अ॑व॒स्युर॑ह्वे कुशि॒कस्य॑ सू॒नुः ।।
   अ॑व॒स्युः अ॑ह्वे कुशि॒कस्य सू॒नुः ।।
   अ॑व॒स्युर् अह्वे कुशि॒कस्य सू॒नुः ।।


Verse: 6 
Halfverse: a    इन्द्रो॑ अ॒स्माँ अ॑रद॒द्वज्र॑बाहु॒रपा॑हन्वृ॒त्रम्प॑रि॒धिं न॒दीना॑म् ।
   इन्द्रो॑ अ॒स्माँ अ॑रद॒द्वज्र॑बाहुर्
   इन्द्रः अ॒स्मान् अरदत् वज्र॑बाहुः
   इन्द्रो अ॒स्माँ अ॑रदद् वज्र॑बाहुर्

Halfverse: b    अपा॑हन्वृ॒त्रम्प॑रि॒धिं न॒दीना॑म् ।
   अप अहन् वृ॒त्रम् परि॒धिम् न॒दीना॑म् ।
   अपा॑हन् वृ॒त्रम् परि॒धिं न॒दीना॑म् ।

Halfverse: c    दे॒वो॑ ऽनयत्सवि॒ता सु॑पा॒णिस्तस्य॑ व॒यम्प्र॑स॒वे या॑म उ॒र्वीः ।।
   दे॒वो॑ ऽनयत्सवि॒ता सु॑पा॒णिस्
   दे॒वः अ॑नयत् सवि॒ता सु॑पा॒णिः
   दे॒वो अ॑नयत् सवि॒ता सु॑पा॒णिस्

Halfverse: d    तस्य॑ व॒यम्प्र॑स॒वे या॑म उ॒र्वीः ।।
   तस्य व॒यम् प्रस॒वे या॑मः उ॒र्वीः ।।
   तस्य व॒यम् प्रस॒वे या॑म उ॒र्वीः ।।


Verse: 7 
Halfverse: a    प्र॒वाच्यं॑ शश्व॒धा वी॒र्यं॒ तदिन्द्र॑स्य॒ कर्म॒ यदहिं॑ विवृ॒श्चत् ।
   प्र॒वाच्यं॑ शश्व॒धा वी॒र्यं॒ तद्
   प्र॒वाच्य॑म् शश्व॒धा वी॒र्य॑म् तत्
   प्र॒वाचि॑यं शश्व॒धा वी॒रियं तद्

Halfverse: b    इन्द्र॑स्य॒ कर्म॒ यदहिं॑ विवृ॒श्चत् ।
   इन्द्र॑स्य कर्म यत् अहि॑म् विवृ॒श्चत् ।
   इन्द्र॑स्य कर्म यद् अहिं विवृ॒श्चत् ।

Halfverse: c    वि वज्रे॑ण परि॒षदो॑ जघा॒नाय॒न्नापो ऽय॑नमि॒छमा॑नाः ।।
   वि वज्रे॑ण परि॒षदो॑ जघान
   वि वज्रे॑ण परि॒षदः जघान
   वि वज्रे॑ण परि॒षदो जघान

Halfverse: d     आय॒न्नापो ऽय॑नमि॒छमा॑नाः ।।
   आय॑न् आपः अय॑नम् इ॒छमा॑नाः ।।
   आय॑न्न् आपो अय॑नम् इ॒छमा॑नाः ।।


Verse: 8 
Halfverse: a    ए॒तद्वचो॑ जरित॒र्मापि॑ मृष्ठा॒ आ यत्ते॒ घोषा॒नुत्त॑रा यु॒गानि॑ ।
   ए॒तद्वचो॑ जरित॒र्मापि॑ मृष्ठा
   ए॒तत् वचः जरितर् मा अपि मृष्ठाः
   ए॒तद् वचो जरितर् मापि मृष्ठा

Halfverse: b    आ यत्ते॒ घोषा॒नुत्त॑रा यु॒गानि॑ ।
   आ यत् ते घोषा॑न् उत्त॑रा यु॒गानि ।
   आ यत् ते घोषा॑न् उत्त॑रा यु॒गानि ।

Halfverse: c    उ॒क्थेषु॑ कारो॒ प्रति॑ नो जुषस्व॒ मा नो॒ नि कः॑ पुरुष॒त्रा नम॑स्ते ।।
   उ॒क्थेषु॑ कारो॒ प्रति॑ नो जुषस्व
   उ॒क्थेषु कारो प्रति नः जुषस्व
   उ॒क्थेषु कारो प्रति नो जुषस्व

Halfverse: d    मा नो॒ नि कः॑ पुरुष॒त्रा नम॑स्ते ।।
   मा नः नि क॑र् पुरुष॒त्रा नमः ते ।।
   मा नो नि कः पुरुष॒त्रा नम॑स् ते ।।


Verse: 9 
Halfverse: a    ओ षु स्व॑सारः का॒रवे॑ शृणोत य॒यौ वो॑ दू॒रादन॑सा॒ रथे॑न ।
   ओ षु स्व॑सारः का॒रवे॑ शृणोत
   आ उ सु स्व॑सारः का॒रवे शृणोत
   ओ षु स्व॑सारः का॒रवे शृणोत

Halfverse: b    य॒यौ वो॑ दू॒रादन॑सा॒ रथे॑न ।
   य॒यौ वः दू॒रात् अन॑सा रथे॑न ।
   य॒यौ वो दू॒राद् अन॑सा रथे॑न ।

Halfverse: c    नि षू न॑मध्व॒म्भव॑ता सुपा॒रा अ॑धोअ॒क्षाः सि॑न्धवः स्रो॒त्याभिः॑ ।।
   नि षू न॑मध्व॒म्भव॑ता सुपा॒रा
   नि सु+ न॑मध्वम् भव॑त+ सुपा॒राः
   नि षू न॑मध्वम् भव॑ता सुपा॒रा

Halfverse: d    अ॑धोअ॒क्षाः सि॑न्धवः स्रो॒त्याभिः॑ ।।
   अ॑धोअ॒क्षाः सि॑न्धवः स्रो॒त्याभिः ।।
   अ॑धोअ॒क्षाः सि॑न्धवः स्रोति॒याभिः ।।


Verse: 10 
Halfverse: a    आ ते॑ कारो शृणवामा॒ वचां॑सि य॒याथ॑ दू॒रादन॑सा॒ रथे॑न ।
   आ ते॑ कारो शृणवामा॒ वचां॑सि
   आ ते कारो शृणवाम+ वचां॑सि
   आ ते कारो शृणवामा वचां॑सि

Halfverse: b    य॒याथ॑ दू॒रादन॑सा॒ रथे॑न ।
   य॒याथ दू॒रात् अन॑सा रथे॑न ।
   य॒याथ दू॒राद् अन॑सा रथे॑न ।

Halfverse: c    नि ते॑ नंसै पीप्या॒नेव॒ योषा॒ मर्या॑येव क॒न्या॑ शश्व॒चै ते॑ ।।
   नि ते॑ नंसै पीप्या॒नेव॒ योषा
   नि ते नंसै पीप्या॒ना इ॑व योषा
   नि ते नंसै पीपिया॒नेव योषा

Halfverse: d    मर्या॑येव क॒न्या॑ शश्व॒चै ते॑ ।।
   मर्या॑य इव क॒न्या शश्व॒चै ते ।।
   मर्या॑येव क॒निया शश्व॒चै ते ।।


Verse: 11 
Halfverse: a    यद॒ङ्ग त्वा॑ भर॒ताः सं॒तरे॑युर्ग॒व्यन्ग्राम॑ इषि॒त इन्द्र॑जूतः ।
   यद॒ङ्ग त्वा॑ भर॒ताः सं॒तरे॑युर्
   यत् अ॒ङ्ग त्वा भर॒ताः सं॒तरे॑युः
   यद् अ॒ङ्ग त्वा भर॒ताः सं॒तरे॑युर्

Halfverse: b    ग॒व्यन्ग्राम॑ इषि॒त इन्द्र॑जूतः ।
   ग॒व्यन् ग्रामः इषि॒तः इन्द्र॑जूतः ।
   ग॒व्यन् ग्राम इषि॒त इन्द्र॑जूतः ।

Halfverse: c    अर्षा॒दह॑ प्रस॒वः सर्ग॑तक्त॒ आ वो॑ वृणे सुम॒तिं य॒ज्ञिया॑नाम् ।।
   अर्षा॒दह॑ प्रस॒वः सर्ग॑तक्त
   अर्षा॑त् अह प्रस॒वः सर्ग॑तक्तः
   अर्षा॑द् अह प्रस॒वः सर्ग॑तक्त

Halfverse: d    आ वो॑ वृणे सुम॒तिं य॒ज्ञिया॑नाम् ।।
   आ वः वृणे सुम॒तिम् य॒ज्ञिया॑नाम् ।।
   आ वो वृणे सुम॒तिं य॒ज्ञिया॑नाम् ।।


Verse: 12 
Halfverse: a    अता॑रिषुर्भर॒ता ग॒व्यवः॒ समभ॑क्त॒ विप्रः॑ सुम॒तिं न॒दीना॑म् ।
   अता॑रिषुर्भर॒ता ग॒व्यवः॒ सम्
   अता॑रिषुः भर॒ताः ग॒व्यवः सम्
   अता॑रिषुर् भर॒ता ग॒व्यवः सम्

Halfverse: b    अभ॑क्त॒ विप्रः॑ सुम॒तिं न॒दीना॑म् ।
   अभ॑क्त विप्रः सुम॒तिम् न॒दीना॑म् ।
   अभ॑क्त विप्रः सुम॒तिं न॒दीना॑म् ।

Halfverse: c    प्र पि॑न्वध्वमि॒षय॑न्तीः सु॒राधा॒ आ व॒क्षणाः॑ पृ॒णध्वं॑ या॒त शीभ॑म् ।।
   प्र पि॑न्वध्वमि॒षय॑न्तीः सु॒राधा
   प्र पि॑न्वध्वम् इ॒षय॑न्तीः सु॒राधाः
   प्र पि॑न्वध्वम् इ॒षय॑न्तीः सु॒राधा

Halfverse: d    आ व॒क्षणाः॑ पृ॒णध्वं॑ या॒त शीभ॑म् ।।
   आ व॒क्षणाः पृ॒णध्व॑म् या॒त शीभ॑म् ।।
   आ व॒क्षणाः पृ॒णध्वं या॒त शीभ॑म् ।।


Verse: 13 
Halfverse: a    उद्व॑ ऊ॒र्मिः शम्या॑ ह॒न्त्वापो॒ योक्त्रा॑णि मुञ्चत ।
   उद्व॑ ऊ॒र्मिः शम्या॑ हन्त्व्
   उत् वः ऊ॒र्मिः शम्याः हन्तु
   उद् व ऊ॒र्मिः शम्या हन्तु

Halfverse: b    आपो॒ योक्त्रा॑णि मुञ्चत ।
   आपः योक्त्रा॑णि मुञ्चत ।
   आपो योक्त्रा॑णि मुञ्चत ।

Halfverse: c    मादु॑ष्कृतौ॒ व्ये॑नसा॒घ्न्यौ शून॒मार॑ताम् ।।
   मादु॑ष्कृतौ॒ व्ये॑नसा
   मा अदु॑ष्कृतौ व्ये॑नसा
   मादु॑ष्कृतौ विएनसा

Halfverse: d     अ॒घ्न्यौ शून॒मार॑ताम् ।।
   अ॒घ्न्यौ शून॑म् आ अ॑रताम् ।।
   अ॑घ्नि॒यौ शून॑म् आर॑ताम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.