TITUS
Rg-Veda: Rg-Veda-Samhita
Part No. 269
Previous part

Hymn: 35_(269) 
Verse: 1 
Halfverse: a    तिष्ठा॒ हरी॒ रथ॒ आ यु॒ज्यमा॑ना या॒हि वा॒युर्न नि॒युतो॑ नो॒ अछ॑ ।
   तिष्ठा॒ हरी॒ रथ॒ आ यु॒ज्यमा॑ना
   तिष्ठ+ हरी रथे आ यु॒ज्यमा॑ना
   तिष्ठा हरी रथ आ यु॒ज्यमा॑ना

Halfverse: b    या॒हि वा॒युर्न नि॒युतो॑ नो॒ अछ॑ ।
   या॒हि वा॒युः न नि॒युतः नः अछ ।
   या॒हि वा॒युर् न नि॒युतो नो अछ ।

Halfverse: c    पिबा॒स्यन्धो॑ अ॒भिसृ॑ष्टो अ॒स्मे इन्द्र॒ स्वाहा॑ ररि॒मा ते॒ मदा॑य ।।
   पिबा॒स्यन्धो॑ अ॒भिसृ॑ष्टो अ॒स्मे
   पिबा॑सि अन्धः अ॒भिसृ॑ष्टः अ॒स्मे
   पिबा॑सि अन्धो अ॒भिसृ॑ष्टो अ॒स्मे

Halfverse: d    इन्द्र॒ स्वाहा॑ ररि॒मा ते॒ मदा॑य ।।
   इन्द्र स्वाहा ररि॒म+ ते मदा॑य ।।
   इन्द्र स्वाहा ररि॒मा ते मदा॑य ।।


Verse: 2 
Halfverse: a    उपा॑जि॒रा पु॑रुहू॒ताय॒ सप्ती॒ हरी॒ रथ॑स्य धू॒र्ष्वा यु॑नज्मि ।
   उपा॑जि॒रा पु॑रुहू॒ताय॒ सप्ती
   उप अजि॒रा पु॑रुहू॒ताय सप्ती
   उपा॑जि॒रा पु॑रुहू॒ताय सप्ती

Halfverse: b    हरी॒ रथ॑स्य धू॒र्ष्वा यु॑नज्मि ।
   हरी रथ॑स्य धू॒र्षु आ यु॑नज्मि ।
   हरी रथ॑स्य धू॒र्षु आ यु॑नज्मि ।

Halfverse: c    द्र॒वद्यथा॒ सम्भृ॑तं वि॒श्वत॑श्चि॒दुपे॒मं य॒ज्ञमा व॑हात॒ इन्द्र॑म् ।।
   द्र॒वद्यथा॒ सम्भृ॑तं वि॒श्वत॑श्चिद्
   द्र॒वत् यथा सम्भृ॑तम् वि॒श्वतः चित्
   द्र॒वद् यथा सम्भृ॑तं वि॒श्वत॑श् चिद्

Halfverse: d    उपे॒मं य॒ज्ञमा व॑हात॒ इन्द्र॑म् ।।
   उप इ॒मम् य॒ज्ञम् आ व॑हातः इन्द्र॑म् ।।
   उपे॒मं य॒ज्ञम् आ व॑हात इन्द्र॑म् ।।


Verse: 3 
Halfverse: a    उपो॑ नयस्व॒ वृष॑णा तपु॒ष्पोतेम॑व॒ त्वं वृ॑षभ स्वधावः ।
   उपो॑ नयस्व॒ वृष॑णा तपु॒ष्पा
   उप उ नयस्व वृष॑णा तपु॒ष्पा
   उपो नयस्व वृष॑णा तपु॒ष्पा

Halfverse: b     उ॒तेम॑व॒ त्वं वृ॑षभ स्वधावः ।
   उ॒त ई॑म् अव त्वम् वृषभ स्वधावः ।
   उ॒तेम् अव त्वं वृ॑षभ स्वधावः ।

Halfverse: c    ग्रसे॑ता॒मश्वा॒ वि मु॑चे॒ह शोणा॑ दि॒वेदि॑वे स॒दृशी॑रद्धि धा॒नाः ।।
   ग्रसे॑ता॒मश्वा॒ वि मु॑चे॒ह शोणा
   ग्रसे॑ताम् अश्वा वि मु॑च इ॒ह शोणा
   ग्रसे॑ताम् अश्वा वि मु॑चे॒ह शोणा

Halfverse: d    दि॒वेदि॑वे स॒दृशी॑रद्धि धा॒नाः ।।
   दि॒वेदि॑वे स॒दृशीः अद्धि धा॒नाः ।।
   दि॒वेदि॑वे स॒दृशी॑र् अद्धि धा॒नाः ।।


Verse: 4 
Halfverse: a    ब्रह्म॑णा ते ब्रह्म॒युजा॑ युनज्मि॒ हरी॒ सखा॑या सध॒माद॑ आ॒शू ।
   ब्रह्म॑णा ते ब्रह्म॒युजा॑ युनज्मि
   ब्रह्म॑णा ते ब्रह्म॒युजा युनज्मि
   ब्रह्म॑णा ते ब्रह्म॒युजा युनज्मि

Halfverse: b    हरी॒ सखा॑या सध॒माद॑ आ॒शू ।
   हरी सखा॑या सध॒मादे आ॒शू ।
   हरी सखा॑या सध॒माद आ॒शू ।

Halfverse: c    स्थि॒रं रथं॑ सु॒खमि॑न्द्राधि॒तिष्ठ॑न्प्रजा॒नन्वि॒द्वाँ उप॑ याहि॒ सोम॑म् ।।
   स्थि॒रं रथं॑ सु॒खमि॑न्द्राधि॒तिष्ठ॑न्
   स्थि॒रम् रथ॑म् सु॒खम् इन्द्र अधि॒तिष्ठ॑न्
   स्थि॒रं रथं सु॒खम् इन्द्राधि॒तिष्ठ॑न्

Halfverse: d    प्रजा॒नन्वि॒द्वाँ उप॑ याहि॒ सोम॑म् ।।
   प्र॑जा॒नन् वि॒द्वान् उप याहि सोम॑म् ।।
   प्र॑जा॒नन् वि॒द्वाँ उप याहि सोम॑म् ।।


Verse: 5 
Halfverse: a    मा ते॒ हरी॒ वृष॑णा वी॒तपृ॑ष्ठा॒ नि री॑रम॒न्यज॑मानासो अ॒न्ये ।
   मा ते॒ हरी॒ वृष॑णा वी॒तपृ॑ष्ठा
   मा ते हरी वृष॑णा वी॒तपृ॑ष्ठा
   मा ते हरी वृष॑णा वी॒तपृ॑ष्ठा

Halfverse: b    नि री॑रम॒न्यज॑मानासो अ॒न्ये ।
   नि री॑रमन् यज॑मानासः अ॒न्ये ।
   नि री॑रमन् यज॑मानासो अ॒न्ये ।

Halfverse: c    अ॒त्याया॑हि॒ शश्व॑तो व॒यं ते ऽरं॑ सु॒तेभिः॑ कृणवाम॒ सोमैः॑ ।।
   अ॒त्याया॑हि॒ शश्व॑तो व॒यं ते
   अ॒त्याया॑हि शश्व॑तः व॒यम् ते
   अ॒तिआया॑हि शश्व॑तो व॒यं ते

Halfverse: d    ऽरं सु॒तेभिः॑ कृणवाम॒ सोमैः॑ ।।
   अर॑म् सु॒तेभिः कृणवाम सोमैः ।।
   अरं सु॒तेभिः कृणवाम सोमैः ।।


Verse: 6 
Halfverse: a    तवा॒यं सोम॒स्त्वमेह्य॒र्वाङ्छ॑श्वत्त॒मं सु॒मना॑ अ॒स्य पा॑हि ।
   तवा॒यं सोम॒स्त्वमेह्य॒र्वाङ्
   तव अ॒यम् सोमः त्वम् आ इ॑हि अ॒र्वाङ्
   तवा॒यं सोम॑स् तु॒वम् एहि अ॒र्वाङ्

Halfverse: b    छश्वत्त॒मं सु॒मना॑ अ॒स्य पा॑हि ।
   श॑श्वत्त॒मम् सु॒मनाः अ॒स्य पा॑हि ।
   छ॑श्वत्त॒मं सु॒मना अ॒स्य पा॑हि ।

Halfverse: c    अ॒स्मिन्य॒ज्ञे ब॒र्हिष्या नि॒षद्या॑ दधि॒ष्वेमं ज॒ठर॒ इन्दु॑मिन्द्र ।।
   अ॒स्मिन्य॒ज्ञे ब॒र्हिष्या नि॒षद्या
   अ॒स्मिन् य॒ज्ञे ब॒र्हिषि आ नि॒षद्य+
   अ॒स्मिन् य॒ज्ञे ब॒र्हिषि आ नि॒षद्या

Halfverse: d    दधि॒ष्वेमं ज॒ठर॒ इन्दु॑मिन्द्र ।।
   द॑धि॒ष्व इ॒मम् ज॒ठरे इन्दु॑म् इन्द्र ।।
   द॑धि॒ष्वेमं ज॒ठर इन्दु॑म् इन्द्र ।।


Verse: 7 
Halfverse: a    स्ती॒र्णं ते॑ ब॒र्हिः सु॒त इ॑न्द्र॒ सोमः॑ कृ॒ता धा॒ना अत्त॑वे ते॒ हरि॑भ्याम् ।
   स्ती॒र्णं ते॑ ब॒र्हिः सु॒त इ॑न्द्र॒ सोमः
   स्ती॒र्णम् ते ब॒र्हिः सु॒तः इ॑न्द्र सोमः
   स्ती॒र्णं ते ब॒र्हिः सु॒त इ॑न्द्र सोमः

Halfverse: b    कृ॒ता धा॒ना अत्त॑वे ते॒ हरि॑भ्याम् ।
   कृ॒ताः धा॒नाः अत्त॑वे ते हरि॑भ्याम् ।
   कृ॒ता धा॒ना अत्त॑वे ते हरि॑भ्याम् ।

Halfverse: c    तदो॑कसे पुरु॒शाका॑य॒ वृष्णे॑ म॒रुत्व॑ते॒ तुभ्यं॑ रा॒ता ह॒वींषि॑ ।।
   तदो॑कसे पुरु॒शाका॑य॒ वृष्णे
   तदो॑कसे पुरु॒शाका॑य वृष्णे
   तदो॑कसे पुरु॒शाका॑य वृष्णे

Halfverse: d    म॒रुत्व॑ते॒ तुभ्यं॑ रा॒ता ह॒वींषि॑ ।।
   म॒रुत्व॑ते तुभ्य॑म् रा॒ता ह॒वींषि ।।
   म॒रुत्व॑ते तुभ्यं रा॒ता ह॒वींषि ।।


Verse: 8 
Halfverse: a    इ॒मं नरः॒ पर्व॑ता॒स्तुभ्य॒मापः॒ समि॑न्द्र॒ गोभि॒र्मधु॑मन्तमक्रन् ।
   इ॒मं नरः॒ पर्व॑ता॒स्तुभ्य॒मापः
   इ॒मम् नरः पर्व॑ताः तुभ्य॑म् आपः
   इ॒मं नरः पर्व॑तास् तुभ्य॑म् आपः

Halfverse: b    समि॑न्द्र॒ गोभि॒र्मधु॑मन्तमक्रन् ।
   सम् इन्द्र गोभिः मधु॑मन्तम् अक्रन् ।
   सम् इन्द्र गोभि॑र् मधु॑मन्तम् अक्रन् ।

Halfverse: c    तस्या॒गत्या॑ सु॒मना॑ ऋष्व पाहि प्रजा॒नन्वि॒द्वान्प॒थ्या॒ अनु॒ स्वाः ।।
   तस्या॒गत्या॑ सु॒मना॑ ऋष्व पाहि
   तस्य आ॒गत्य+ सु॒मनाः ऋष्व पाहि
   तस्या॒गत्या सु॒मना ऋष्व पाहि

Halfverse: d    प्रजा॒नन्वि॒द्वान्प॒थ्या॒ अनु॒ स्वाः ।।
   प्र॑जा॒नन् वि॒द्वान् प॒थ्याः अनु स्वाः ।।
   प्र॑जा॒नन् वि॒द्वान् प॒थिया अनु स्वाः ।।


Verse: 9 
Halfverse: a    याँ आभ॑जो म॒रुत॑ इन्द्र॒ सोमे॒ ये त्वामव॑र्ध॒न्नभ॑वन्ग॒णस्ते॑ ।
   याँ आभ॑जो म॒रुत॑ इन्द्र॒ सोमे
   यान् आ अभ॑जः म॒रुतः इन्द्र सोमे
   याँ आभ॑जो म॒रुत इन्द्र सोमे

Halfverse: b    ये त्वामव॑र्ध॒न्नभ॑वन्ग॒णस्ते॑ ।
   ये त्वाम् अव॑र्धन् अभ॑वन् ग॒णः ते ।
   ये त्वाम् अव॑र्धन्न् अभ॑वन् ग॒णस् ते ।

Halfverse: c    तेभि॑रे॒तं स॒जोषा॑ वावशा॒नो॒ ऽग्नेः पि॑ब जि॒ह्वया॒ सोम॑मिन्द्र ।।
   तेभि॑रे॒तं स॒जोषा॑ वावशा॒नो
   तेभिः ए॒तम् स॒जोषाः वावशा॒नः
   तेभि॑र् ए॒तं स॒जोषा वावशा॒नो

Halfverse: d    ऽग्नेः पि॑ब जि॒ह्वया॒ सोम॑मिन्द्र ।।
   अ॒ग्नेः पि॑ब जि॒ह्वया सोम॑म् इन्द्र ।।
   अ॒ग्नेः पि॑ब जि॒ह्वया सोम॑म् इन्द्र ।।


Verse: 10 
Halfverse: a    इन्द्र॒ पिब॑ स्व॒धया॑ चित्सु॒तस्या॒ग्नेर्वा॑ पाहि जि॒ह्वया॑ यजत्र ।
   इन्द्र॒ पिब॑ स्व॒धया॑ चित्सु॒तस्य
   इन्द्र पिब स्व॒धया चित् सु॒तस्य
   इन्द्र पिब स्व॒धया चित् सु॒तस्य

Halfverse: b     ॑अ॒ग्नेर्वा॑ पाहि जि॒ह्वया॑ यजत्र ।
   अ॒ग्नेः वा पाहि जि॒ह्वया यजत्र ।
   अ॒ग्नेर् वा पाहि जि॒ह्वया यजत्र ।

Halfverse: c    अ॑ध्व॒र्योर्वा॒ प्रय॑तं शक्र॒ हस्ता॒द्धोतु॑र्वा य॒ज्ञं ह॒विषो॑ जुषस्व ।।
   अ॑ध्व॒र्योर्वा॒ प्रय॑तं शक्र॒ हस्ता॑द्
   अध्व॒र्योः वा प्रय॑तम् शक्र हस्ता॑त्
   अध्व॒र्योर् वा प्रय॑तं शक्र हस्ता॑द्

Halfverse: d    धोतु॑र्वा य॒ज्ञं ह॒विषो॑ जुषस्व ।।
   होतुः वा य॒ज्ञम् ह॒विषः जुषस्व ।।
   धोतु॑र् वा य॒ज्ञं ह॒विषो जुषस्व ।।


Verse: 11 
Halfverse: a    शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
   शु॒नं हु॑वेम म॒घवा॑न॒मिन्द्र॑म्
   शु॒नम् हुवेम म॒घवा॑नम् इन्द्र॑म्
   शु॒नं हु॑वेम म॒घवा॑नम् इन्द्र॑म्

Halfverse: b    अ॒स्मिन्भरे॒ नृत॑मं॒ वाज॑सातौ ।
   अ॒स्मिन् भरे नृत॑मम् वाज॑सातौ ।
   अ॒स्मिन् भरे नृत॑मं वाज॑सातौ ।

Halfverse: c    शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ।।
   शृ॒ण्वन्त॑मु॒ग्रमू॒तये॑ स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु

Halfverse: d    घ्नन्तं॑ वृ॒त्राणि॑ सं॒जितं॒ धना॑नाम् ।।
   घ्नन्त॑म् वृ॒त्राणि सं॒जित॑म् धना॑नाम् ।।
   घ्नन्तं वृ॒त्राणि सं॒जितं धना॑नाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.