TITUS
Rg-Veda: Rg-Veda-Samhita
Part No. 273
Previous part

Hymn: 39_(273) 
Verse: 1 
Halfverse: a    इन्द्र॑म्म॒तिर्हृ॒द आ व॒च्यमा॒नाछा॒ पतिं॒ स्तोम॑तष्टा जिगाति ।
   इन्द्र॑म्म॒तिर्हृ॒द आ व॒च्यमा॑ना
   इन्द्र॑म् म॒तिः हृ॒दः आ व॒च्यमा॑ना
   इन्द्र॑म् म॒तिर् हृ॒द आ व॒च्यमा॑ना

Halfverse: b     अछा॒ पतिं॒ स्तोम॑तष्टा जिगाति ।
   अछ+ पति॑म् स्तोम॑तष्टा जिगाति ।
   अछा पतिं स्तोम॑तष्टा जिगाति ।

Halfverse: c    या जागृ॑विर्वि॒दथे॑ श॒स्यमा॒नेन्द्र॒ यत्ते॒ जाय॑ते वि॒द्धि तस्य॑ ।।
   या जागृ॑विर्वि॒दथे॑ श॒स्यमा॑ना
   या जागृ॑विः वि॒दथे श॒स्यमा॑ना
   या जागृ॑विर् वि॒दथे श॒स्यमा॑ना

Halfverse: d     इन्द्र॒ यत्ते॒ जाय॑ते वि॒द्धि तस्य॑ ।।
   इन्द्र यत् ते जाय॑ते वि॒द्धि तस्य ।।
   इन्द्र यत् ते जाय॑ते वि॒द्धि तस्य ।।


Verse: 2 
Halfverse: a    दि॒वश्चि॒दा पू॒र्व्या जाय॑माना॒ वि जागृ॑विर्वि॒दथे॑ श॒स्यमा॑ना ।
   दि॒वश्चि॒दा पू॒र्व्या जाय॑माना
   दि॒वः चि॑त् आ पू॒र्व्या जाय॑माना
   दि॒वश् चिद् आ पू॑र्वि॒या जाय॑माना

Halfverse: b    वि जागृ॑विर्वि॒दथे॑ श॒स्यमा॑ना ।
   वि जागृ॑विः वि॒दथे श॒स्यमा॑ना ।
   वि जागृ॑विर् वि॒दथे श॒स्यमा॑ना ।

Halfverse: c    भ॒द्रा वस्त्रा॒ण्यर्जु॑ना॒ वसा॑ना॒ सेयम॒स्मे स॑न॒जा पित्र्या॒ धीः ।।
   भ॒द्रा वस्त्रा॒ण्यर्जु॑ना॒ वसा॑ना
   भ॒द्रा वस्त्रा॑णि अर्जु॑ना वसा॑ना
   भ॒द्रा वस्त्रा॑णि अर्जु॑ना वसा॑ना

Halfverse: d    सेयम॒स्मे स॑न॒जा पित्र्या॒ धीः ।।
   सा इ॒यम् अ॒स्मे स॑न॒जा पित्र्या धीः ।।
   सेयम् अ॒स्मे स॑न॒जा पित्रि॑या धीः ।।


Verse: 3 
Halfverse: a    य॒मा चि॒दत्र॑ यम॒सूर॑सूत जि॒ह्वाया॒ अग्र॒म्पत॒दा ह्यस्था॑त् ।
   य॒मा चि॒दत्र॑ यम॒सूर॑सूत
   य॒मा चि॑त् अत्र यम॒सूः अ॑सूत
   य॒मा चि॑द् अत्र यम॒सूर् असूत

Halfverse: b    जि॒ह्वाया॒ अग्र॒म्पत॒दा ह्यस्था॑त् ।
   जि॒ह्वायाः अग्र॑म् पत॑त् आ हि अस्था॑त् ।
   जि॒ह्वाया अग्र॑म् पत॑द् आ हि अस्था॑त् ।

Halfverse: c    वपूं॑षि जा॒ता मि॑थु॒ना स॑चेते तमो॒हना॒ तपु॑षो बु॒ध्न एता॑ ।।
   वपूं॑षि जा॒ता मि॑थु॒ना स॑चेते
   वपूं॑षि जा॒ता मि॑थु॒ना स॑चेते
   वपूं॑षि जा॒ता मि॑थु॒ना स॑चेते

Halfverse: d    तमो॒हना॒ तपु॑षो बु॒ध्न एता॑ ।।
   त॑मो॒हना तपु॑षः बु॒ध्ने एता ।।
   त॑मो॒हना तपु॑षो बु॒ध्न एता ।।


Verse: 4 
Halfverse: a    नकि॑रेषां निन्दि॒ता मर्त्ये॑षु॒ ये अ॒स्माक॑म्पि॒तरो॒ गोषु॑ यो॒धाः ।
   नकि॑रेषां निन्दि॒ता मर्त्ये॑षु
   नकिः एषाम् निन्दि॒ता मर्त्ये॑षु
   नकि॑र् एषां निन्दि॒ता मर्ति॑येषु

Halfverse: b    ये अ॒स्माक॑म्पि॒तरो॒ गोषु॑ यो॒धाः ।
   ये अ॒स्माक॑म् पि॒तरः गोषु यो॒धाः ।
   ये अ॒स्माक॑म् पि॒तरो गोषु यो॒धाः ।

Halfverse: c    इन्द्र॑ एषां दृंहि॒ता माहि॑नावा॒नुद्गो॒त्राणि॑ ससृजे दं॒सना॑वान् ।।
   इन्द्र॑ एषां दृंहि॒ता माहि॑नावान्
   इन्द्रः एषाम् दृंहि॒ता माहि॑नावान्
   इन्द्र एषां दृंहि॒ता माहि॑नावान्

Halfverse: d    उद्गो॒त्राणि॑ ससृजे दं॒सना॑वान् ।।
   उत् गो॒त्राणि ससृजे दं॒सना॑वान् ।।
   उद् गो॒त्राणि ससृजे दं॒सना॑वान् ।।


Verse: 5 
Halfverse: a    सखा॑ ह॒ यत्र॒ सखि॑भि॒र्नव॑ग्वैरभि॒ज्ञ्वा सत्व॑भि॒र्गा अ॑नु॒ग्मन् ।
   सखा॑ ह॒ यत्र॒ सखि॑भि॒र्नव॑ग्वैर्
   सखा ह यत्र सखि॑भिः नव॑ग्वैः
   सखा ह यत्र सखि॑भिर् नव॑ग्वैर्

Halfverse: b    अभि॒ज्ञ्वा सत्व॑भि॒र्गा अ॑नु॒ग्मन् ।
   अ॑भि॒ज्ञु आ सत्व॑भिः गाः अ॑नु॒ग्मन् ।
   अ॑भि॒ज्ञु आ सत्व॑भिर् गा अ॑नु॒ग्मन् ।

Halfverse: c    स॒त्यं तदिन्द्रो॑ द॒शभि॒र्दश॑ग्वैः॒ सूर्यं॑ विवेद॒ तम॑सि क्षि॒यन्त॑म् ।।
   स॒त्यं तदिन्द्रो॑ द॒शभि॒र्दश॑ग्वैः
   स॒त्यम् तत् इन्द्रः द॒शभिः दश॑ग्वैः
   स॒त्यं तद् इन्द्रो द॒शभि॑र् दश॑ग्वैः

Halfverse: d    सूर्यं॑ विवेद॒ तम॑सि क्षि॒यन्त॑म् ।।
   सूर्य॑म् विवेद तम॑सि क्षि॒यन्त॑म् ।।
   सूर्यं विवेद तम॑सि क्षि॒यन्त॑म् ।।


Verse: 6 
Halfverse: a    इन्द्रो॒ मधु॒ सम्भृ॑तमु॒स्रिया॑याम्प॒द्वद्वि॑वेद श॒पव॒न्नमे॒ गोः ।
   इन्द्रो॒ मधु॒ सम्भृ॑तमु॒स्रिया॑याम्
   इन्द्रः मधु सम्भृ॑तम् उ॒स्रिया॑याम्
   इन्द्रो मधु सम्भृ॑तम् उ॒स्रिया॑याम्

Halfverse: b    प॒द्वद्वि॑वेद श॒पव॒न्नमे॒ गोः ।
   प॒द्वत् विवेद श॒पव॑त् नमे गोः ।
   प॒द्वद् विवेद श॒पव॑न् नमे गोः ।

Halfverse: c    गुहा॑ हि॒तं गुह्यं॑ गू॒ऴम॒प्सु हस्ते॑ दधे॒ दक्षि॑णे॒ दक्षि॑णावान् ।।
   गुहा॑ हि॒तं गुह्यं॑ गू॒ऴम॒प्सु
   गुहा हि॒तम् गुह्य॑म् गू॒ऴम् अ॒प्सु
   गुहा हि॒तं गुहि॑यं गू॒ऴम् अ॒प्सु

Halfverse: d    हस्ते॑ दधे॒ दक्षि॑णे॒ दक्षि॑णावान् ।।
   हस्ते दधे दक्षि॑णे दक्षि॑णावान् ।।
   हस्ते दधे दक्षि॑णे दक्षि॑णावान् ।।


Verse: 7 
Halfverse: a    ज्योति॑र्वृणीत॒ तम॑सो विजा॒नन्ना॒रे स्या॑म दुरि॒ताद॒भीके॑ ।
   ज्योति॑र्वृणीत॒ तम॑सो विजा॒नन्न्
   ज्योतिः वृणीत तम॑सः विजा॒नन्
   ज्योति॑र् वृणीत तम॑सो विजा॒नन्न्

Halfverse: b    आ॒रे स्या॑म दुरि॒ताद॒भीके॑ ।
   आ॒रे स्या॑म दुरि॒तात् अ॒भीके ।
   आ॒रे सि॑याम दुरि॒ताद् अ॒भीके ।

Halfverse: c    इ॒मा गिरः॑ सोमपाः सोमवृद्ध जु॒षस्वे॑न्द्र पुरु॒तम॑स्य का॒रोः ।।
   इ॒मा गिरः॑ सोमपाः सोमवृद्ध
   इ॒माः गिरः सोमपाः सोमवृद्ध
   इ॒मा गिरः सोमपाः सोमवृद्ध

Halfverse: d    जु॒षस्वे॑न्द्र पुरु॒तम॑स्य का॒रोः ।।
   जु॒षस्व इन्द्र पुरु॒तम॑स्य का॒रोः ।।
   जु॒षस्वे॑न्द्र पुरु॒तम॑स्य का॒रोः ।।


Verse: 8 
Halfverse: a    ज्योति॑र्य॒ज्ञाय॒ रोद॑सी॒ अनु॑ ष्यादा॒रे स्या॑म दुरि॒तस्य॒ भूरेः॑ ।
   ज्योति॑र्य॒ज्ञाय॒ रोद॑सी॒ अनु॑ ष्याद्
   ज्योतिः य॒ज्ञाय रोद॑सी अनु स्यात्
   ज्योति॑र् य॒ज्ञाय रोद॑सी अनु ष्याद्

Halfverse: b    आ॒रे स्या॑म दुरि॒तस्य॒ भूरेः॑ ।
   आ॒रे स्या॑म दुरि॒तस्य भूरेः ।
   आ॒रे सि॑याम दुरि॒तस्य भूरेः ।

Halfverse: c    भूरि॑ चि॒द्धि तु॑ज॒तो मर्त्य॑स्य सुपा॒रासो॑ वसवो ब॒र्हणा॑वत् ।।
   भूरि॑ चि॒द्धि तु॑ज॒तो मर्त्य॑स्य
   भूरि चित् हि तु॑ज॒तः मर्त्य॑स्य
   भूरि चिद् धि तु॑ज॒तो मर्ति॑यस्य

Halfverse: d    सुपा॒रासो॑ वसवो ब॒र्हणा॑वत् ।।
   सु॑पा॒रासः वसवः ब॒र्हणा॑वत् ।।
   सु॑पा॒रासो वसवो ब॒र्हणा॑वत् ।।


Verse: 9 
Halfverse: a    शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
   शु॒नं हु॑वेम म॒घवा॑न॒मिन्द्र॑म्
   शु॒नम् हुवेम म॒घवा॑नम् इन्द्र॑म्
   शु॒नं हु॑वेम म॒घवा॑नम् इन्द्र॑म्

Halfverse: b    अ॒स्मिन्भरे॒ नृत॑मं॒ वाज॑सातौ ।
   अ॒स्मिन् भरे नृत॑मम् वाज॑सातौ ।
   अ॒स्मिन् भरे नृत॑मं वाज॑सातौ ।

Halfverse: c    शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ।।
   शृ॒ण्वन्त॑मु॒ग्रमू॒तये॑ स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु

Halfverse: d    घ्नन्तं॑ वृ॒त्राणि॑ सं॒जितं॒ धना॑नाम् ।।
   घ्नन्त॑म् वृ॒त्राणि सं॒जित॑म् धना॑नाम् ।।
   घ्नन्तं वृ॒त्राणि सं॒जितं धना॑नाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.