TITUS
Rg-Veda: Rg-Veda-Samhita
Part No. 277
Previous part

Hymn: 43_(277) 
Verse: 1 
Halfverse: a    आ या॑ह्य॒र्वाङुप॑ वन्धुरे॒ष्ठास्तवेदनु॑ प्र॒दिवः॑ सोम॒पेय॑म् ।
   आ या॑ह्य॒र्वाङुप॑ वन्धुरे॒ष्ठास्
   आ या॑हि अ॒र्वाङ् उप वन्धुरे॒ष्ठाः
   आ या॑हि अ॒र्वाङ् उप वन्धुरे॒ष्ठास्

Halfverse: b    तवेदनु॑ प्र॒दिवः॑ सोम॒पेय॑म् ।
   तव इत् अनु प्र॒दिवः सोम॒पेय॑म् ।
   तवेद् अनु प्र॒दिवः सोम॒पेय॑म् ।

Halfverse: c    प्रि॒या सखा॑या॒ वि मु॒चोप॑ ब॒र्हिस्त्वामि॒मे ह॑व्य॒वाहो॑ हवन्ते ।।
   प्रि॒या सखा॑या॒ वि मु॒चोप॑ ब॒र्हिस्
   प्रि॒या सखा॑या वि मु॑च उप ब॒र्हिः
   प्रि॒या सखा॑या वि मु॒चोप ब॒र्हिस्

Halfverse: d    त्वामि॒मे ह॑व्य॒वाहो॑ हवन्ते ।।
   त्वाम् इ॒मे ह॑व्य॒वाहः हवन्ते ।।
   तु॒वाम् इ॒मे ह॑व्य॒वाहो हवन्ते ।।


Verse: 2 
Halfverse: a    आ या॑हि पू॒र्वीरति॑ चर्ष॒णीराँ अ॒र्य आ॒शिष॒ उप॑ नो॒ हरि॑भ्याम् ।
   आ या॑हि पू॒र्वीरति॑ चर्ष॒णीराँ
   आ या॑हि पू॒र्वीः अति चर्ष॒णीः आ
   आ या॑हि पू॒र्वीर् अति चर्ष॒णीर् आँ

Halfverse: b    अ॒र्य आ॒शिष॒ उप॑ नो॒ हरि॑भ्याम् ।
   अ॒र्यः आ॒शिषः उप नः हरि॑भ्याम् ।
   अ॒र्य आ॒शिष उप नो हरि॑भ्याम् ।

Halfverse: c    इ॒मा हि त्वा॑ म॒तय॒ स्तोम॑तष्टा॒ इन्द्र॒ हव॑न्ते स॒ख्यं जु॑षा॒णाः ।।
   इ॒मा हि त्वा॑ म॒तय॒ स्तोम॑तष्टा
   इ॒माः हि त्वा म॒तयः स्तोम॑तष्टाः
   इ॒मा हि त्वा म॒तय स्तोम॑तष्टा

Halfverse: d    इन्द्र॒ हव॑न्ते स॒ख्यं जु॑षा॒णाः ।।
   इन्द्र हव॑न्ते स॒ख्यम् जुषा॒णाः ।।
   इन्द्र हव॑न्ते सखि॒यं जु॑षा॒णाः ।।


Verse: 3 
Halfverse: a    आ नो॑ य॒ज्ञं न॑मो॒वृधं॑ स॒जोषा॒ इन्द्र॑ देव॒ हरि॑भिर्याहि॒ तूय॑म् ।
   आ नो॑ य॒ज्ञं न॑मो॒वृधं॑ स॒जोषा
   आ नः य॒ज्ञम् नमो॒वृध॑म् स॒जोषाः
   आ नो य॒ज्ञं न॑मो॒वृधं स॒जोषा

Halfverse: b    इन्द्र॑ देव॒ हरि॑भिर्याहि॒ तूय॑म् ।
   इन्द्र देव हरि॑भिः याहि तूय॑म् ।
   इन्द्र देव हरि॑भिर् याहि तूय॑म् ।

Halfverse: c    अ॒हं हि त्वा॑ म॒तिभि॒र्जोह॑वीमि घृ॒तप्र॑याः सध॒मादे॒ मधू॑नाम् ।।
   अ॒हं हि त्वा॑ म॒तिभि॒र्जोह॑वीमि
   अ॒हम् हि त्वा म॒तिभिः जोह॑वीमि
   अ॒हं हि त्वा म॒तिभि॑र् जोह॑वीमि

Halfverse: d    घृ॒तप्र॑याः सध॒मादे॒ मधू॑नाम् ।।
   घृ॒तप्र॑याः सध॒मादे मधू॑नाम् ।।
   घृ॒तप्र॑याः सध॒मादे मधू॑नाम् ।।


Verse: 4 
Halfverse: a    आ च॒ त्वामे॒ता वृष॑णा॒ वहा॑तो॒ हरी॒ सखा॑या सु॒धुरा॒ स्वङ्गा॑ ।
   आ च॒ त्वामे॒ता वृष॑णा॒ वहा॑तो
   आ च त्वाम् ए॒ता वृष॑णा वहा॑तः
   आ च त्वाम् ए॒ता वृष॑णा वहा॑तो

Halfverse: b    हरी॒ सखा॑या सु॒धुरा॒ स्वङ्गा॑ ।
   हरी सखा॑या सु॒धुरा स्वङ्गा ।
   हरी सखा॑या सु॒धुरा सुअङ्गा ।

Halfverse: c    धा॒नाव॒दिन्द्रः॒ सव॑नं जुषा॒णः सखा॒ सख्युः॑ शृणव॒द्वन्द॑नानि ।।
   धा॒नाव॒दिन्द्रः॒ सव॑नं जुषा॒णः
   धा॒नाव॑त् इन्द्रः सव॑नम् जुषा॒णः
   धा॒नाव॑द् इन्द्रः सव॑नं जुषा॒णः

Halfverse: d    सखा॒ सख्युः॑ शृणव॒द्वन्द॑नानि ।।
   सखा सख्युः शृणवत् वन्द॑नानि ।।
   सखा सख्युः शृणवद् वन्द॑नानि ।।


Verse: 5 
Halfverse: a    कु॒विन्मा॑ गो॒पां कर॑से॒ जन॑स्य कु॒विद्राजा॑नम्मघवन्नृजीषिन् ।
   कु॒विन्मा॑ गो॒पां कर॑से॒ जन॑स्य
   कु॒वित् मा गो॒पाम् कर॑से जन॑स्य
   कु॒विन् मा गो॒पां कर॑से जन॑स्य

Halfverse: b    कु॒विद्राजा॑नम्मघवन्नृजीषिन् ।
   कु॒वित् राजा॑नम् मघवन् ऋजीषिन् ।
   कु॒विद् राजा॑नम् मघवन्न् ऋजीषिन् ।

Halfverse: c    कु॒विन्म॒ ऋषि॑म्पपि॒वांसं॑ सु॒तस्य॑ कु॒विन्मे॒ वस्वो॑ अ॒मृत॑स्य॒ शिक्षाः॑ ।।
   कु॒विन्म॒ ऋषि॑म्पपि॒वांसं॑ सु॒तस्य
   कु॒वित् मा ऋषि॑म् पपि॒वांस॑म् सु॒तस्य
   कु॒विन् म ऋषि॑म् पपि॒वांसं सु॒तस्य

Halfverse: d    कु॒विन्मे॒ वस्वो॑ अ॒मृत॑स्य॒ शिक्षाः॑ ।।
   कु॒वित् मे वस्वः अ॒मृत॑स्य शिक्षाः ।।
   कु॒विन् मे वस्वो अ॒मृत॑स्य शिक्षाः ।।


Verse: 6 
Halfverse: a    आ त्वा॑ बृ॒हन्तो॒ हर॑यो युजा॒ना अ॒र्वागि॑न्द्र सध॒मादो॑ वहन्तु ।
   आ त्वा॑ बृ॒हन्तो॒ हर॑यो युजा॒ना
   आ त्वा बृ॒हन्तः हर॑यः युजा॒नाः
   आ त्वा बृ॒हन्तो हर॑यो युजा॒ना

Halfverse: b    अ॒र्वागि॑न्द्र सध॒मादो॑ वहन्तु ।
   अ॒र्वाक् इन्द्र सध॒मादः वहन्तु ।
   अ॒र्वाग् इन्द्र सध॒मादो वहन्तु ।

Halfverse: c    प्र ये द्वि॒ता दि॒व ऋ॒ञ्जन्त्याताः॒ सुस॑म्मृष्टासो वृष॒भस्य॑ मू॒राः ।।
   प्र ये द्वि॒ता दि॒व ऋ॒ञ्जन्त्याताः
   प्र ये द्वि॒ता दि॒वः ऋ॒ञ्जन्ति आताः
   प्र ये द्वि॒ता दि॒व ऋ॒ञ्जन्ति आताः

Halfverse: d    सुस॑म्मृष्टासो वृष॒भस्य॑ मू॒राः ।।
   सुस॑म्मृष्टासः वृष॒भस्य मू॒राः ।।
   सुस॑म्मृष्टासो वृष॒भस्य मू॒राः ।।


Verse: 7 
Halfverse: a    इन्द्र॒ पिब॒ वृष॑धूतस्य॒ वृष्ण॒ आ यं ते॑ श्ये॒न उ॑श॒ते ज॒भार॑ ।
   इन्द्र॒ पिब॒ वृष॑धूतस्य॒ वृष्ण
   इन्द्र पिब वृष॑धूतस्य वृष्णः
   इन्द्र पिब वृष॑धूतस्य वृष्ण

Halfverse: b    आ यं ते॑ श्ये॒न उ॑श॒ते ज॒भार॑ ।
   आ यम् ते श्ये॒नः उ॑श॒ते ज॒भार ।
   आ यं ते श्ये॒न उ॑श॒ते ज॒भार ।

Halfverse: c    यस्य॒ मदे॑ च्या॒वय॑सि॒ प्र कृ॒ष्टीर्यस्य॒ मदे॒ अप॑ गो॒त्रा व॒वर्थ॑ ।।
   यस्य॒ मदे॑ च्या॒वय॑सि॒ प्र कृ॒ष्टीर्
   यस्य मदे च्या॒वय॑सि प्र कृ॒ष्टीः
   यस्य मदे च्या॒वय॑सि प्र कृ॒ष्टीर्

Halfverse: d    यस्य॒ मदे॒ अप॑ गो॒त्रा व॒वर्थ॑ ।।
   यस्य मदे अप गो॒त्रा व॒वर्थ ।।
   यस्य मदे अप गो॒त्रा व॒वर्थ ।।


Verse: 8 
Halfverse: a    शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
   शु॒नं हु॑वेम म॒घवा॑न॒मिन्द्र॑म्
   शु॒नम् हुवेम म॒घवा॑नम् इन्द्र॑म्
   शु॒नं हु॑वेम म॒घवा॑नम् इन्द्र॑म्

Halfverse: b    अ॒स्मिन्भरे॒ नृत॑मं॒ वाज॑सातौ ।
   अ॒स्मिन् भरे नृत॑मम् वाज॑सातौ ।
   अ॒स्मिन् भरे नृत॑मं वाज॑सातौ ।

Halfverse: c    शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ।।
   शृ॒ण्वन्त॑मु॒ग्रमू॒तये॑ स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु

Halfverse: d    घ्नन्तं॑ वृ॒त्राणि॑ सं॒जितं॒ धना॑नाम् ।।
   घ्नन्त॑म् वृ॒त्राणि सं॒जित॑म् धना॑नाम् ।।
   घ्नन्तं वृ॒त्राणि सं॒जितं धना॑नाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.