TITUS
Rg-Veda: Rg-Veda-Samhita
Part No. 288
Previous part

Hymn: 54_(288) 
Verse: 1 
Halfverse: a    इ॒मम्म॒हे वि॑द॒थ्या॑य शू॒षं शश्व॒त्कृत्व॒ ईड्या॑य॒ प्र ज॑भ्रुः ।
   इ॒मम्म॒हे वि॑द॒थ्या॑य शू॒षं
   इ॒मम् म॒हे वि॑द॒थ्या॑य शू॒षम्
   इ॒मम् म॒हे वि॑द॒थिया॑य शू॒षं

Halfverse: b    शश्व॒त्कृत्व॒ ईड्या॑य॒ प्र ज॑भ्रुः ।
   शश्व॑त् कृत्वः ईड्या॑य प्र ज॑भ्रुः ।
   शश्व॑त् कृत्व ईडि॑याय प्र ज॑भ्रुः ।

Halfverse: c    शृ॒णोतु॑ नो॒ दम्ये॑भि॒रनी॑कैः शृ॒णोत्व॒ग्निर्दि॒व्यैरज॑स्रः ।।
   शृ॒णोतु॑ नो॒ दम्ये॑भि॒रनी॑कैः
   शृ॒णोतु नः दम्ये॑भिः अनी॑कैः
   शृ॒णोतु नो दमि॑येभिर् अनी॑कैः

Halfverse: d    शृ॒णोत्व॒ग्निर्दि॒व्यैरज॑स्रः ।।
   शृ॒णोतु अ॒ग्निः दि॒व्यैः अज॑स्रः ।।
   शृ॒णोतु अ॒ग्निर् दिवि॒यैर् अज॑स्रः ।।


Verse: 2 
Halfverse: a    महि॑ म॒हे दि॒वे अ॑र्चा पृथि॒व्यै कामो॑ म इ॒छञ्च॑रति प्रजा॒नन् ।
   महि॑ म॒हे दि॒वे अ॑र्चा पृथि॒व्यै
   महि म॒हे दि॒वे अ॑र्च+ पृथि॒व्यै
   महि म॒हे दि॒वे अ॑र्चा पृथि॒व्यै

Halfverse: b    कामो॑ म इ॒छञ्च॑रति प्रजा॒नन् ।
   कामः मे इ॒छन् चरति प्रजा॒नन् ।
   कामो म इ॒छञ् चरति प्रजा॒नन् ।

Halfverse: c    ययो॑र्ह॒ स्तोमे॑ वि॒दथे॑षु दे॒वाः स॑प॒र्यवो॑ मा॒दय॑न्ते॒ सचा॒योः ।।
   ययो॑र्ह॒ स्तोमे॑ वि॒दथे॑षु दे॒वाः
   ययोः ह स्तोमे वि॒दथे॑षु दे॒वाः
   ययो॑र् ह स्तोमे वि॒दथे॑षु दे॒वाः

Halfverse: d    स॑प॒र्यवो॑ मा॒दय॑न्ते॒ सचा॒योः ।।
   स॑प॒र्यवः मा॒दय॑न्ते सचा अ॒योः ! ।।
   स॑प॒र्यवो मा॒दय॑न्ते सचा॒योः ।।


Verse: 3 
Halfverse: a    यु॒वोरृ॒तं रो॑दसी स॒त्यम॑स्तु म॒हे षु णः॑ सुवि॒ताय॒ प्र भू॑तम् ।
   यु॒वोरृ॒तं रो॑दसी स॒त्यम॑स्तु
   यु॒वोः ऋ॒तम् रोदसी स॒त्यम् अस्तु
   यु॒वोर् ऋ॒तं रो॑दसी स॒त्यम् अस्तु

Halfverse: b    म॒हे षु णः॑ सुवि॒ताय॒ प्र भू॑तम् ।
   म॒हे सु नः सुवि॒ताय प्र भू॑तम् ।
   म॒हे षु णः सुवि॒ताय प्र भू॑तम् ।

Halfverse: c    इ॒दं दि॒वे नमो॑ अग्ने पृथि॒व्यै स॑प॒र्यामि॒ प्रय॑सा॒ यामि॒ रत्न॑म् ।।
   इ॒दं दि॒वे नमो॑ अग्ने पृथि॒व्यै
   इ॒दम् दि॒वे नमः अग्ने पृथि॒व्यै
   इ॒दं दि॒वे नमो अग्ने पृथि॒व्यै

Halfverse: d    स॑प॒र्यामि॒ प्रय॑सा॒ यामि॒ रत्न॑म् ।।
   स॑प॒र्यामि प्रय॑सा यामि रत्न॑म् ।।
   स॑प॒र्यामि प्रय॑सा यामि रत्न॑म् ।।


Verse: 4 
Halfverse: a    उ॒तो हि वा॑म्पू॒र्व्या आ॑विवि॒द्र ऋता॑वरी रोदसी सत्य॒वाचः॑ ।
   उ॒तो हि वा॑म्पू॒र्व्या आ॑विवि॒द्र
   उ॒त उ हि वा॑म् पू॒र्व्याः आ॑विवि॒द्रे
   उ॒तो हि वा॑म् पूर्वि॒या आ॑विवि॒द्र

Halfverse: b    ऋता॑वरी रोदसी सत्य॒वाचः॑ ।
   ऋता॑वरी रोदसी सत्य॒वाचः ।
   ऋता॑वरी रोदसी सत्य॒वाचः ।

Halfverse: c    नर॑श्चिद्वां समि॒थे शूर॑सातौ ववन्दि॒रे पृ॑थिवि॒ वेवि॑दानाः ।।
   नर॑श्चिद्वां समि॒थे शूर॑सातौ
   नरः चित् वाम् समि॒थे शूर॑सातौ
   नर॑श् चिद् वां समि॒थे शूर॑सातौ

Halfverse: d    ववन्दि॒रे पृ॑थिवि॒ वेवि॑दानाः ।।
   व॑वन्दि॒रे पृ॑थिवि वेवि॑दानाः ।।
   व॑वन्दि॒रे पृ॑थिवि वेवि॑दानाः ।।


Verse: 5 
Halfverse: a    को अ॒द्धा वे॑द॒ क इ॒ह प्र वो॑चद्दे॒वाँ अछा॑ प॒थ्या॒ का समे॑ति ।
   को अ॒द्धा वे॑द॒ क इ॒ह प्र वो॑चद्
   कः अ॒द्धा वे॑द कः इ॒ह प्र वो॑चत्
   को अ॒द्धा वे॑द क इ॒ह प्र वो॑चद्

Halfverse: b    दे॒वाँ अछा॑ प॒थ्या॒ का समे॑ति ।
   दे॒वान् अछ+ प॒थ्या का सम् एति ।
   दे॒वाँ अछा प॒थिया का सम् एति ।

Halfverse: c    ददृ॑श्र एषामव॒मा सदां॑सि॒ परे॑षु॒ या गुह्ये॑षु व्र॒तेषु॑ ।।
   ददृ॑श्र एषामव॒मा सदां॑सि
   ददृ॑श्रे एषाम् अव॒मा सदां॑सि
   ददृ॑श्र एषाम् अव॒मा सदां॑सि

Halfverse: d    परे॑षु॒ या गुह्ये॑षु व्र॒तेषु॑ ।।
   परे॑षु या गुह्ये॑षु व्र॒तेषु ।।
   परे॑षु या गुहि॑येषु व्र॒तेषु ।।


Verse: 6 
Halfverse: a    क॒विर्नृ॒चक्षा॑ अ॒भि षी॑मचष्ट ऋ॒तस्य॒ योना॒ विघृ॑ते॒ मद॑न्ती ।
   क॒विर्नृ॒चक्षा॑ अ॒भि षी॑मचष्ट
   क॒विः नृ॒चक्षाः अ॒भि सी॑म् अचष्ट
   क॒विर् नृ॒चक्षा अ॒भि षी॑म् अचष्ट

Halfverse: b    ऋ॒तस्य॒ योना॒ विघृ॑ते॒ मद॑न्ती ।
   ऋ॒तस्य योना विघृ॑ते मद॑न्ती ।
   ऋ॒तस्य योना विघृ॑ते मद॑न्ती ।

Halfverse: c    नाना॑ चक्राते॒ सद॑नं॒ यथा॒ वेः स॑मा॒नेन॒ क्रतु॑ना संविदा॒ने ।।
   नाना॑ चक्राते॒ सद॑नं॒ यथा॒ वेः
   नाना चक्राते सद॑नम् यथा वेः
   नाना चक्राते सद॑नं यथा वेः

Halfverse: d    स॑मा॒नेन॒ क्रतु॑ना संविदा॒ने ।।
   स॑मा॒नेन क्रतु॑ना संविदा॒ने ।।
   स॑मा॒नेन क्रतु॑ना संविदा॒ने ।।


Verse: 7 
Halfverse: a    स॑मा॒न्या वियु॑ते दूरेअन्ते ध्रु॒वे प॒दे त॑स्थतुर्जाग॒रूके॑ ।
   स॑मा॒न्या वियु॑ते दूरेअन्ते
   समा॒न्या वियु॑ते दूरेअन्ते
   समानि॒या वियु॑ते दूरेअन्ते

Halfverse: b    ध्रु॒वे प॒दे त॑स्थतुर्जाग॒रूके॑ ।
   ध्रु॒वे प॒दे त॑स्थतुः जाग॒रूके ।
   ध्रु॒वे प॒दे त॑स्थतुर् जाग॒रूके ।

Halfverse: c    उ॒त स्वसा॑रा युव॒ती भव॑न्ती॒ आदु॑ ब्रुवाते मिथु॒नानि॒ नाम॑ ।।
   उ॒त स्वसा॑रा युव॒ती भव॑न्ती
   उ॒त स्वसा॑रा युव॒ती भव॑न्ती
   उ॒त स्वसा॑रा युव॒ती भव॑न्ती

Halfverse: d    आदु॑ ब्रुवाते मिथु॒नानि॒ नाम॑ ।।
   आत् उ ब्रुवाते मिथु॒नानि नाम ।।
   आद् उ ब्रुवाते मिथु॒नानि नाम ।।


Verse: 8 
Halfverse: a    विश्वेदे॒ते जनि॑मा॒ सं वि॑विक्तो म॒हो दे॒वान्बिभ्र॑ती॒ न व्य॑थेते ।
   विश्वेदे॒ते जनि॑मा॒ सं वि॑विक्तो
   विश्वा इत् ए॒ते जनि॑म+ सम् विविक्तः
   विश्वेद् ए॒ते जनि॑मा सं वि॑विक्तो

Halfverse: b    म॒हो दे॒वान्बिभ्र॑ती॒ न व्य॑थेते ।
   म॒हः दे॒वान् बिभ्र॑ती न व्य॑थेते ।
   म॒हो दे॒वान् बिभ्र॑ती न व्य॑थेते ।

Halfverse: c    एज॑द्ध्रु॒वम्प॑त्यते॒ विश्व॒मेकं॒ चर॑त्पत॒त्रि विषु॑णं॒ वि जा॒तम् ।।
   एज॑द्ध्रु॒वम्प॑त्यते॒ विश्व॒मेकं
   एज॑त् ध्रु॒वम् पत्यते विश्व॑म् एक॑म्
   एज॑द् ध्रु॒वम् पत्यते विश्व॑म् एकं

Halfverse: d    चर॑त्पत॒त्रि विषु॑णं॒ वि जा॒तम् ।।
   चर॑त् पत॒त्रि विषु॑णम् वि जा॒तम् ।।
   चर॑त् पत॒त्रि विषु॑णं वि जा॒तम् ।।


Verse: 9 
Halfverse: a    सना॑ पुरा॒णमध्ये॑म्या॒रान्म॒हः पि॒तुर्ज॑नि॒तुर्जा॒मि तन्नः॑ ।
   सना॑ पुरा॒णमध्ये॑म्या॒रान्
   सना पुरा॒णम् अधि एमि आ॒रात्
   सना पुरा॒णम् अधि एमि आ॒रान्

Halfverse: b    म॒हः पि॒तुर्ज॑नि॒तुर्जा॒मि तन्नः॑ ।
   म॒हः पि॒तुः ज॑नि॒तुः जा॒मि तत् नः ।
   म॒हः पि॒तुर् जनि॒तुर् जा॒मि तन् नः ।

Halfverse: c    दे॒वासो॒ यत्र॑ पनि॒तार॒ एवै॑रु॒रौ प॒थि व्यु॑ते त॒स्थुर॒न्तः ।।
   दे॒वासो॒ यत्र॑ पनि॒तार॒ एवै॑र्
   दे॒वासः यत्र पनि॒तारः एवैः
   दे॒वासो यत्र पनि॒तार एवै॑र्

Halfverse: d    उ॒रौ प॒थि व्यु॑ते त॒स्थुर॒न्तः ।।
   उ॒रौ प॒थि व्यु॑ते त॒स्थुः अ॒न्तर् ।।
   उ॒रौ प॒थि विउ॑ते त॒स्थुर् अ॒न्तः ।।


Verse: 10 
Halfverse: a    इ॒मं स्तोमं॑ रोदसी॒ प्र ब्र॑वीम्यृदू॒दराः॑ शृणवन्नग्निजि॒ह्वाः ।
   इ॒मं स्तोमं॑ रोदसी॒ प्र ब्र॑वीम्य्
   इ॒मम् स्तोम॑म् रोदसी प्र ब्र॑वीमि
   इ॒मं स्तोमं रोदसी प्र ब्र॑वीमि

Halfverse: b    ऋदू॒दराः॑ शृणवन्नग्निजि॒ह्वाः ।
   ऋ॑दू॒दराः शृणवन् अग्निजि॒ह्वाः ।
   ऋ॑दू॒दराः शृणवन्न् अग्निजि॒ह्वाः ।

Halfverse: c    मि॒त्रः स॒म्राजो॒ वरु॑णो॒ युवा॑न आदि॒त्यासः॑ क॒वयः॑ पप्रथा॒नाः ।।
   मि॒त्रः स॒म्राजो॒ वरु॑णो॒ युवा॑न
   मि॒त्रः स॒म्राजः वरु॑णः युवा॑नः
   मि॒त्रः स॒म्राजो वरु॑णो युवा॑न

Halfverse: d    आदि॒त्यासः॑ क॒वयः॑ पप्रथा॒नाः ।।
   आ॑दि॒त्यासः क॒वयः पप्रथा॒नाः ।।
   आ॑दि॒त्यासः क॒वयः पप्रथा॒नाः ।।


Verse: 11 
Halfverse: a    हिर॑ण्यपाणिः सवि॒ता सु॑जि॒ह्वस्त्रिरा दि॒वो वि॒दथे॒ पत्य॑मानः ।
   हिर॑ण्यपाणिः सवि॒ता सु॑जि॒ह्वस्
   हिर॑ण्यपाणिः सवि॒ता सु॑जि॒ह्वः
   हिर॑ण्यपाणिः सवि॒ता सु॑जि॒ह्वस्

Halfverse: b    त्रिरा दि॒वो वि॒दथे॒ पत्य॑मानः ।
   त्रिः आ दि॒वः वि॒दथे पत्य॑मानः ।
   त्रिर् आ दि॒वो वि॒दथे पत्य॑मानः ।

Halfverse: c    दे॒वेषु॑ च सवितः॒ श्लोक॒मश्रे॒राद॒स्मभ्य॒मा सु॑व स॒र्वता॑तिम् ।।
   दे॒वेषु॑ च सवितः॒ श्लोक॒मश्रे॑र्
   दे॒वेषु च सवितर् श्लोक॑म् अश्रेः
   दे॒वेषु च सवितः श्लोक॑म् अश्रे॑र्

Halfverse: d    आद॒स्मभ्य॒मा सु॑व स॒र्वता॑तिम् ।।
   आत् अ॒स्मभ्य॑म् आ सु॑व स॒र्वता॑तिम् ।।
   आद् अ॒स्मभ्य॑म् आ सु॑व स॒र्वता॑तिम् ।।


Verse: 12 
Halfverse: a    सु॒कृत्सु॑पा॒णिः स्ववाँ॑ ऋ॒तावा॑ दे॒वस्त्वष्टाव॑से॒ तानि॑ नो धात् ।
   सु॒कृत्सु॑पा॒णिः स्ववाँ॑ ऋ॒तावा
   सु॒कृत् सुपा॒णिः स्ववा॑न् ऋ॒तावा
   सु॒कृत् सुपा॒णिः सुअवाँ ऋ॒तावा

Halfverse: b    दे॒वस्त्वष्टाव॑से॒ तानि॑ नो धात् ।
   दे॒वः त्वष्टा अव॑से तानि नः धात् ।
   दे॒वस् त्वष्टा अव॑से तानि नो धात् ।

Halfverse: c    पू॑ष॒ण्वन्त॑ ऋभवो मादयध्वमू॒र्ध्वग्रा॑वाणो अध्व॒रम॑तष्ट ।।
   पू॑ष॒ण्वन्त॑ ऋभवो मादयध्वम्
   पूष॒ण्वन्तः ऋभवः मादयध्वम्
   पूष॒ण्वन्त ऋभवो मादयध्वम्

Halfverse: d    ऊ॒र्ध्वग्रा॑वाणो अध्व॒रम॑तष्ट ।।
   ऊ॒र्ध्वग्रा॑वाणः अध्व॒रम् अतष्ट ।।
   ऊ॒र्ध्वग्रा॑वाणो अध्व॒रम् अतष्ट ।।


Verse: 13 
Halfverse: a    वि॒द्युद्र॑था म॒रुत॑ ऋष्टि॒मन्तो॑ दि॒वो मर्या॑ ऋ॒तजा॑ता अ॒यासः॑ ।
   वि॒द्युद्र॑था म॒रुत॑ ऋष्टि॒मन्तो
   वि॒द्युद्र॑थाः म॒रुतः ऋष्टि॒मन्तः
   वि॒द्युद्र॑था म॒रुत ऋष्टि॒मन्तो

Halfverse: b    दि॒वो मर्या॑ ऋ॒तजा॑ता अ॒यासः॑ ।
   दि॒वः मर्याः ऋ॒तजा॑ताः अ॒यासः ।
   दि॒वो मर्या ऋ॒तजा॑ता अ॒यासः ।

Halfverse: c    सर॑स्वती शृणवन्य॒ज्ञिया॑सो॒ धाता॑ र॒यिं स॒हवी॑रं तुरासः ।।
   सर॑स्वती शृणवन्य॒ज्ञिया॑सो
   सर॑स्वती शृणवन् य॒ज्ञिया॑सः
   सर॑स्वती शृणवन् य॒ज्ञिया॑सो

Halfverse: d    धाता॑ र॒यिं स॒हवी॑रं तुरासः ।।
   धात+ र॒यिम् स॒हवी॑रम् तुरासः ।।
   धाता र॒यिं स॒हवी॑रं तुरासः ।।


Verse: 14 
Halfverse: a    विष्णुं॒ स्तोमा॑सः पुरुद॒स्मम॒र्का भग॑स्येव का॒रिणो॒ याम॑नि ग्मन् ।
   विष्णुं॒ स्तोमा॑सः पुरुद॒स्मम॒र्का
   विष्णु॑म् स्तोमा॑सः पुरुद॒स्मम् अ॒र्काः
   विष्णुं स्तोमा॑सः पुरुद॒स्मम् अ॒र्का

Halfverse: b    भग॑स्येव का॒रिणो॒ याम॑नि ग्मन् ।
   भग॑स्य इव का॒रिणः याम॑नि ग्मन् ।
   भग॑स्येव का॒रिणो याम॑नि ग्मन् ।

Halfverse: c    उ॑रुक्र॒मः क॑कु॒हो यस्य॑ पू॒र्वीर्न म॑र्धन्ति युव॒तयो॒ जनि॑त्रीः ।।
   उ॑रुक्र॒मः क॑कु॒हो यस्य॑ पू॒र्वीर्
   उरुक्र॒मः क॑कु॒हः यस्य पू॒र्वीः
   उ॑रुक्र॒मः क॑कु॒हो यस्य पू॒र्वीर्

Halfverse: d    न म॑र्धन्ति युव॒तयो॒ जनि॑त्रीः ।।
   न म॑र्धन्ति युव॒तयः जनि॑त्रीः ।।
   न म॑र्धन्ति युव॒तयो जनि॑त्रीः ।।


Verse: 15 
Halfverse: a    इन्द्रो॒ विश्वै॑र्वी॒र्यैः॒ पत्य॑मान उ॒भे आ प॑प्रौ॒ रोद॑सी महि॒त्वा ।
   इन्द्रो॒ विश्वै॑र्वी॒र्यैः॒ पत्य॑मान
   इन्द्रः विश्वैः वी॒र्यैः पत्य॑मानः
   इन्द्रो विश्वै॑र् वी॒रियैः पत्य॑मान

Halfverse: b    उ॒भे आ प॑प्रौ॒ रोद॑सी महि॒त्वा ।
   उ॒भे आ प॑प्रौ रोद॑सी महि॒त्वा ।
   उ॒भे आ प॑प्रौ रोद॑सी महि॒त्वा ।

Halfverse: c    पु॑रंद॒रो वृ॑त्र॒हा धृ॒ष्णुषे॑णः सं॒गृभ्या॑ न॒ आ भ॑रा॒ भूरि॑ प॒श्वः ।।
   पु॑रंद॒रो वृ॑त्र॒हा धृ॒ष्णुषे॑णः
   पुरंद॒रः वृ॑त्र॒हा धृ॒ष्णुषे॑णः
   पुरंद॒रो वृ॑त्र॒हा धृ॒ष्णुषे॑णः

Halfverse: d    सं॒गृभ्या॑ न॒ आ भ॑रा॒ भूरि॑ प॒श्वः ।।
   सं॒गृभ्य+ नः आ भ॑र+ भूरि प॒श्वः ।।
   सं॒गृभ्या न आ भ॑रा भूरि प॒श्वः ।।


Verse: 16 
Halfverse: a    नास॑त्या मे पि॒तरा॑ बन्धु॒पृछा॑ सजा॒त्य॑म॒श्विनो॒श्चारु॒ नाम॑ ।
   नास॑त्या मे पि॒तरा॑ बन्धु॒पृछा
   नास॑त्या मे पि॒तरा बन्धु॒पृछा
   नास॑त्या मे पि॒तरा बन्धु॒पृछा

Halfverse: b    सजा॒त्य॑म॒श्विनो॒श्चारु॒ नाम॑ ।
   स॑जा॒त्य॑म् अ॒श्विनोः चारु नाम ।
   स॑जा॒तिय॑म् अ॒श्विनो॑श् चारु नाम ।

Halfverse: c    यु॒वं हि स्थो र॑यि॒दौ नो॑ रयी॒णां दा॒त्रं र॑क्षेथे॒ अक॑वै॒रद॑ब्धा ।।
   यु॒वं हि स्थो र॑यि॒दौ नो॑ रयी॒णां
   यु॒वम् हि स्थः र॑यि॒दौ नः रयी॒णाम्
   यु॒वं हि स्थो र॑यि॒दौ नो रयी॒णां

Halfverse: d    दा॒त्रं र॑क्षेथे॒ अक॑वै॒रद॑ब्धा ।।
   दा॒त्रम् रक्षेथे अक॑वैः अद॑ब्धा ।।
   दा॒त्रं र॑क्षेथे अक॑वैर् अद॑ब्धा ।।


Verse: 17 
Halfverse: a    म॒हत्तद्वः॑ कवय॒श्चारु॒ नाम॒ यद्ध॑ देवा॒ भव॑थ॒ विश्व॒ इन्द्रे॑ ।
   म॒हत्तद्वः॑ कवय॒श्चारु॒ नाम
   म॒हत् तत् वः कवयः चारु नाम
   म॒हत् तद् वः कवयश् चारु नाम

Halfverse: b    यद्ध॑ देवा॒ भव॑थ॒ विश्व॒ इन्द्रे॑ ।
   यत् ह देवाः भव॑थ विश्वे इन्द्रे ।
   यद् ध देवा भव॑थ विश्व इन्द्रे ।

Halfverse: c    सख॑ ऋ॒भुभिः॑ पुरुहूत प्रि॒येभि॑रि॒मां धियं॑ सा॒तये॑ तक्षता नः ।।
   सख॑ ऋ॒भुभिः॑ पुरुहूत प्रि॒येभि॑र्
   सखा ऋ॒भुभिः पुरुहूत प्रि॒येभिः
   सख र्भुभिः पुरुहूत प्रि॒येभि॑र्

Halfverse: d    इ॒मां धियं॑ सा॒तये॑ तक्षता नः ।।
   इ॒माम् धिय॑म् सा॒तये तक्षत+ नः ।।
   इ॒मां धियं सा॒तये तक्षता नः ।।


Verse: 18 
Halfverse: a    अ॑र्य॒मा णो॒ अदि॑तिर्य॒ज्ञिया॒सो ऽद॑ब्धानि॒ वरु॑णस्य व्र॒तानि॑ ।
   अ॑र्य॒मा णो॒ अदि॑तिर्य॒ज्ञिया॒सो
   अ॑र्य॒मा नः अदि॑तिः य॒ज्ञिया॑सः
   अर्य॒मा णो अदि॑तिर् य॒ज्ञिया॑सो

Halfverse: b    ऽदब्धानि॒ वरु॑णस्य व्र॒तानि॑ ।
   अद॑ब्धानि वरु॑णस्य व्र॒तानि ।
   अद॑ब्धानि वरु॑णस्य व्र॒तानि ।

Halfverse: c    यु॒योत॑ नो अनप॒त्यानि॒ गन्तोः॑ प्र॒जावा॑न्नः पशु॒माँ अ॑स्तु गा॒तुः ।।
   यु॒योत॑ नो अनप॒त्यानि॒ गन्तोः
   यु॒योत नः अनप॒त्यानि गन्तोः
   यु॒योत नो अनप॒त्यानि गन्तोः

Halfverse: d    प्र॒जावा॑न्नः पशु॒माँ अ॑स्तु गा॒तुः ।।
   प्र॒जावा॑न् नः पशु॒मान् अस्तु गा॒तुः ।।
   प्र॒जावा॑न् नः पशु॒माँ अ॑स्तु गा॒तुः ।।


Verse: 19 
Halfverse: a    दे॒वानां॑ दू॒तः पु॑रु॒ध प्रसू॒तो ऽना॑गान्नो वोचतु स॒र्वता॑ता ।
   दे॒वानां॑ दू॒तः पु॑रु॒ध प्रसू॒तो
   दे॒वाना॑म् दू॒तः पु॑रु॒ध प्रसू॑तः
   दे॒वानां दू॒तः पु॑रु॒ध प्रसू॑तो

Halfverse: b    ऽनागान्नो वोचतु स॒र्वता॑ता ।
   अना॑गान् नः वोचतु स॒र्वता॑ता ।
   अना॑गान् नो वोचतु स॒र्वता॑ता ।

Halfverse: c    शृ॒णोतु॑ नः पृथि॒वी द्यौरु॒तापः॒ सूर्यो॒ नक्ष॑त्रैरु॒र्व॒न्तरि॑क्षम् ।।
   शृ॒णोतु॑ नः पृथि॒वी द्यौरु॒तापः
   शृ॒णोतु नः पृथि॒वी द्यौः उ॒त आपः
   शृ॒णोतु नः पृथि॒वी द्यौर् उ॒तापः

Halfverse: d    सूर्यो॒ नक्ष॑त्रैरु॒र्व॒न्तरि॑क्षम् ।।
   सूर्यः नक्ष॑त्रैः उ॒रु अ॒न्तरि॑क्षम् ।।
   सूर्यो नक्ष॑त्रैर् उ॒रु अ॒न्तरि॑क्षम् ।।


Verse: 20 
Halfverse: a    शृ॒ण्वन्तु॑ नो॒ वृष॑णः॒ पर्व॑तासो ध्रु॒वक्षे॑मास॒ इळ॑या॒ मद॑न्तः ।
   शृ॒ण्वन्तु॑ नो॒ वृष॑णः॒ पर्व॑तासो
   शृ॒ण्वन्तु नः वृष॑णः पर्व॑तासः
   शृ॒ण्वन्तु नो वृष॑णः पर्व॑तासो

Halfverse: b    ध्रु॒वक्षे॑मास॒ इळ॑या॒ मद॑न्तः ।
   ध्रु॒वक्षे॑मासः इळ॑या मद॑न्तः ।
   ध्रु॒वक्षे॑मास इळ॑या मद॑न्तः ।

Halfverse: c    आ॑दि॒त्यैर्नो॒ अदि॑तिः शृणोतु॒ यछ॑न्तु नो म॒रुतः॒ शर्म॑ भ॒द्रम् ।।
   आ॑दि॒त्यैर्नो॒ अदि॑तिः शृणोतु
   आदि॒त्यैः नः अदि॑तिः शृणोतु
   आदिति॒यैर् नो अदि॑तिः शृणोतु

Halfverse: d    यछ॑न्तु नो म॒रुतः॒ शर्म॑ भ॒द्रम् ।।
   यछ॑न्तु नः म॒रुतः शर्म भ॒द्रम् ।।
   यछ॑न्तु नो म॒रुतः शर्म भ॒द्रम् ।।


Verse: 21 
Halfverse: a    सदा॑ सु॒गः पि॑तु॒माँ अ॑स्तु॒ पन्था॒ मध्वा॑ देवा॒ ओष॑धीः॒ सम्पि॑पृक्त ।
   सदा॑ सु॒गः पि॑तु॒माँ अ॑स्तु॒ पन्था
   सदा सु॒गः पि॑तु॒मान् अस्तु पन्थाः
   सदा सु॒गः पि॑तु॒माँ अ॑स्तु पन्था

Halfverse: b    मध्वा॑ देवा॒ ओष॑धीः॒ सम्पि॑पृक्त ।
   मध्वा देवाः ओष॑धीः सम् पिपृक्त ।
   मध्वा देवा ओष॑धीः सम् पिपृक्त ।

Halfverse: c    भगो॑ मे अग्ने स॒ख्ये न मृ॑ध्या॒ उद्रा॒यो अ॑श्यां॒ सद॑नम्पुरु॒क्षोः ।।
   भगो॑ मे अग्ने स॒ख्ये न मृ॑ध्या
   भगः मे अग्ने स॒ख्ये न मृ॑ध्याः
   भगो मे अग्ने सखि॒ये न मृ॑ध्या

Halfverse: d    उद्रा॒यो अ॑श्यां॒ सद॑नम्पुरु॒क्षोः ।।
   उत् रा॒यः अ॑श्याम् सद॑नम् पुरु॒क्षोः ।।
   उद् रा॒यो अ॑श्यां सद॑नम् पुरु॒क्षोः ।।


Verse: 22 
Halfverse: a    स्वद॑स्व ह॒व्या समिषो॑ दिदीह्यस्म॒द्र्य॒क्सम्मि॑मीहि॒ श्रवां॑सि ।
   स्वद॑स्व ह॒व्या समिषो॑ दिदीह्य्
   स्वद॑स्व ह॒व्या सम् इषः दिदीहि
   स्वद॑स्व ह॒व्या सम् इषो दिदीहि

Halfverse: b    अस्म॒द्र्य॒क्सम्मि॑मीहि॒ श्रवां॑सि ।
   अ॑स्म॒द्र्य॑क् सम् मिमीहि श्रवां॑सि ।
   अ॑स्मद्रिअक् सम् मिमीहि श्रवां॑सि ।

Halfverse: c    विश्वाँ॑ अग्ने पृ॒त्सु ताञ्जे॑षि॒ शत्रू॒नहा॒ विश्वा॑ सु॒मना॑ दीदिही नः ।।
   विश्वाँ॑ अग्ने पृ॒त्सु ताञ्जे॑षि॒ शत्रू॑न्
   विश्वा॑न् अग्ने पृ॒त्सु तान् जेषि शत्रू॑न्
   विश्वाँ अग्ने पृ॒त्सु ताञ् जेषि शत्रू॑न्

Halfverse: d    अहा॒ विश्वा॑ सु॒मना॑ दीदिही नः ।।
   अहा विश्वा सु॒मनाः दीदिहि+ नः ।।
   अहा विश्वा सु॒मना दीदिही नः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.