TITUS
Rg-Veda: Rg-Veda-Samhita
Part No. 907
Previous part

Hymn: 70_(896) 
Verse: 1 
Halfverse: a    इ॒माम्मे॑ अग्ने स॒मिधं॑ जुषस्वे॒ळस्प॒दे प्रति॑ हर्या घृ॒ताची॑म् ।
   इ॒माम्मे॑ अग्ने स॒मिधं॑ जुषस्व
   इ॒माम् मे अग्ने स॒मिध॑म् जुषस्व
   इ॒माम् मे अग्ने स॒मिधं जुषस्व

Halfverse: b     इ॒ळस्प॒दे प्रति॑ हर्या घृ॒ताची॑म् ।
   इ॒ळः प॒दे प्रति हर्य+ घृ॒ताची॑म् ।
   इ॒ळस् प॒दे प्रति हर्या घृ॒ताची॑म् ।

Halfverse: c    वर्ष्म॑न्पृथि॒व्याः सु॑दिन॒त्वे अह्ना॑मू॒र्ध्वो भ॑व सुक्रतो देवय॒ज्या ।।
   वर्ष्म॑न्पृथि॒व्याः सु॑दिन॒ त्वेअह्ना॑म्
   वर्ष्म॑न् पृथि॒व्याः सु॑दिन॒त्वे अह्ना॑म्
   वर्ष्म॑न् पृथि॒व्याः सु॑दिन॒त्वे अह्ना॑म्

Halfverse: d    ऊ॒र्ध्वो भ॑व सुक्रतो देवय॒ज्या ।।
   ऊ॒र्ध्वः भ॑व सुक्रतो देवय॒ज्या ।।
   ऊ॒र्ध्वो भ॑व सुक्रतो देवय॒ज्या ।।


Verse: 2 
Halfverse: a    आ दे॒वाना॑मग्र॒यावे॒ह या॑तु॒ नरा॒शंसो॑ वि॒श्वरू॑पेभि॒रश्वैः॑ ।
   आ दे॒वाना॑मग्र॒यावे॒ह या॑तु
   आ दे॒वाना॑म् अग्र॒यावा इ॒ह या॑तु
   आ दे॒वाना॑म् अग्र॒यावे॒ह या॑तु

Halfverse: b    नरा॒शंसो॑ वि॒श्वरू॑पेभि॒रश्वैः॑ ।
   नरा॒शंसः वि॒श्वरू॑पेभिः अश्वैः ।
   नरा॒शंसो वि॒श्वरू॑पेभिर् अश्वैः ।

Halfverse: c    ऋ॒तस्य॑ प॒था नम॑सा मि॒येधो॑ दे॒वेभ्यो॑ दे॒वत॑मः सुषूदत् ।।
   ऋ॒तस्य॑ प॒था नम॑सा मि॒येधो
   ऋ॒तस्य प॒था नम॑सा मि॒येधः
   ऋ॒तस्य प॒था नम॑सा मि॒येधो

Halfverse: d    दे॒वेभ्यो॑ दे॒वत॑मः सुषूदत् ।।
   दे॒वेभ्यः दे॒वत॑मः सुषूदत् ।।
   दे॒वेभि॑यो दे॒वत॑मः सुषूदत् ।।


Verse: 3 
Halfverse: a    श॑श्वत्त॒ममी॑ळते दू॒त्या॑य ह॒विष्म॑न्तो मनु॒ष्या॑सो अ॒ग्निम् ।
   श॑श्वत्त॒ममी॑ळते दू॒त्या॑य
   शश्वत्त॒मम् ईळते दू॒त्या॑य
   शश्वत्त॒मम् ईळते दू॒तिया॑य

Halfverse: b    ह॒विष्म॑न्तो मनु॒ष्या॑सो अ॒ग्निम् ।
   ह॒विष्म॑न्तः मनु॒ष्या॑सः अ॒ग्निम् ।
   ह॒विष्म॑न्तो मनु॒षिया॑सो अ॒ग्निम् ।

Halfverse: c    वहि॑ष्ठै॒रश्वैः॑ सु॒वृता॒ रथे॒ना दे॒वान्व॑क्षि॒ नि ष॑दे॒ह होता॑ ।।
   वहि॑ष्ठै॒रश्वैः॑ सु॒वृता॒ रथे॑न
   वहि॑ष्ठैः अश्वैः सु॒वृता रथे॑न
   वहि॑ष्ठैर् अश्वैः सु॒वृता रथे॑न

Halfverse: d     आ दे॒वान्व॑क्षि॒ नि ष॑दे॒ह होता॑ ।।
   आ दे॒वान् वक्षि नि स॑द इ॒ह होता ।।
   आ दे॒वान् वक्षि नि ष॑दे॒ह होता ।।


Verse: 4 
Halfverse: a    वि प्र॑थतां दे॒वजु॑ष्टं तिर॒श्चा दी॒र्घं द्रा॒घ्मा सु॑र॒भि भू॑त्व॒स्मे ।
   वि प्र॑थतां दे॒वजु॑ष्टं तिर॒श्चा
   वि प्र॑थताम् दे॒वजु॑ष्टम् तिर॒श्चा
   वि प्र॑थतां दे॒वजु॑ष्टं तिर॒श्चा

Halfverse: b    दी॒र्घं द्रा॒घ्मा सु॑र॒भि भू॑त्व॒स्मे ।
   दी॒र्घम् द्रा॒घ्मा सु॑र॒भि भू॑तु अ॒स्मे ।
   दी॒र्घं द्रा॒घ्मा सु॑र॒भि भू॑तु अ॒स्मे ।

Halfverse: c    अहे॑ळता॒ मन॑सा देव बर्हि॒रिन्द्र॑ज्येष्ठाँ उश॒तो य॑क्षि दे॒वान् ।।
   अहे॑ळता॒ मन॑सा देव बर्हिर्
   अहे॑ळता मन॑सा देव बर्हिः
   अहे॑ळता मन॑सा देव बर्हिर्

Halfverse: d    इन्द्र॑ज्येष्ठाँ उश॒तो य॑क्षि दे॒वान् ।।
   इन्द्र॑ज्येष्ठान् उश॒तः य॑क्षि दे॒वान् ।।
   इन्द्र॑ज्येष्ठाँ उश॒तो य॑क्षि दे॒वान् ।।


Verse: 5 
Halfverse: a    दि॒वो वा॒ सानु॑ स्पृ॒शता॒ वरी॑यः पृथि॒व्या वा॒ मात्र॑या॒ वि श्र॑यध्वम् ।
   दि॒वो वा॒ सानु॑ स्पृ॒शता॒ वरी॑यः
   दि॒वः वा सानु स्पृ॒शत+ वरी॑यः
   दि॒वो वा सानु स्पृ॒शता वरी॑यः

Halfverse: b    पृथि॒व्या वा॒ मात्र॑या॒ वि श्र॑यध्वम् ।
   पृ॑थि॒व्या वा मात्र॑या वि श्र॑यध्वम् ।
   पृ॑थि॒व्या वा मात्र॑या वि श्र॑यध्वम् ।

Halfverse: c    उ॑श॒तीर्द्वा॑रो महि॒ना म॒हद्भि॑र्दे॒वं रथं॑ रथ॒युर्धा॑रयध्वम् ।।
   उ॑श॒तीर्द्वा॑रो महि॒ना म॒हद्भि॑र्
   उश॒तीः द्वा॑रः महि॒ना म॒हद्भिः
   उश॒तीर् द्वारो महि॒ना म॒हद्भि॑र्

Halfverse: d    दे॒वं रथं॑ रथ॒युर्धा॑रयध्वम् ।।
   दे॒वम् रथ॑म् रथ॒युः धा॑रयध्वम् ।।
   दे॒वं रथं रथ॒युर् धारयध्वम् ।।


Verse: 6 
Halfverse: a    दे॒वी दि॒वो दु॑हि॒तरा॑ सुशि॒ल्पे उ॒षासा॒नक्ता॑ सदतां॒ नि योनौ॑ ।
   दे॒वी दि॒वो दु॑हि॒तरा॑ सुशि॒ल्पे
   दे॒वी दि॒वः दु॑हि॒तरा सुशि॒ल्पे
   दे॒वी दि॒वो दु॑हि॒तरा सुशि॒ल्पे

Halfverse: b    उ॒षासा॒नक्ता॑ सदतां॒ नि योनौ॑ ।
   उ॒षासा॒नक्ता सदताम् नि योनौ ।
   उ॒षासा॒नक्ता सदतां नि योनौ ।

Halfverse: c    आ वां॑ दे॒वास॑ उशती उ॒शन्त॑ उ॒रौ सी॑दन्तु सुभगे उ॒पस्थे॑ ।।
   आ वां॑ दे॒वास॑ उशती उ॒शन्त
   आ वा॑म् दे॒वासः उशती उ॒शन्तः
   आ वां दे॒वास उशती उ॒शन्त

Halfverse: d    उ॒रौ सी॑दन्तु सुभगे उ॒पस्थे॑ ।।
   उ॒रौ सी॑दन्तु सुभगे उ॒पस्थे ।।
   उ॒रौ सी॑दन्तु सुभगे उ॒पस्थे ।।


Verse: 7 
Halfverse: a    ऊ॒र्ध्वो ग्रावा॑ बृ॒हद॒ग्निः समि॑द्धः प्रि॒या धामा॒न्यदि॑तेरु॒पस्थे॑ ।
   ऊ॒र्ध्वो ग्रावा॑ बृ॒हद॒ग्निः समि॑द्धः
   ऊ॒र्ध्वः ग्रावा बृ॒हत् अ॒ग्निः समि॑द्धः
   ऊ॒र्ध्वो ग्रावा बृ॒हद् अ॒ग्निः समि॑द्धः

Halfverse: b    प्रि॒या धामा॒न्यदि॑तेरु॒पस्थे॑ ।
   प्रि॒या धामा॑नि अदि॑तेः उ॒पस्थे ।
   प्रि॒या धामा॑नि अदि॑तेर् उ॒पस्थे ।

Halfverse: c    पु॒रोहि॑तावृत्विजा य॒ज्ञे अ॒स्मिन्वि॒दुष्ट॑रा॒ द्रवि॑ण॒मा य॑जेथाम् ।।
   पु॒रोहि॑तावृत्विजा य॒ज्ञे अ॒स्मिन्
   पु॒रोहि॑तौ ऋत्विजा य॒ज्ञे अ॒स्मिन्
   पु॒रोहि॑ताव् ऋत्विजा य॒ज्ञे अ॒स्मिन्

Halfverse: d    वि॒दुष्ट॑रा॒ द्रवि॑ण॒मा य॑जेथाम् ।।
   वि॒दुष्ट॑रा द्रवि॑णम् आ य॑जेथाम् ।।
   वि॒दुष्ट॑रा द्रवि॑णम् आ य॑जेथाम् ।।


Verse: 8 
Halfverse: a    तिस्रो॑ देवीर्ब॒र्हिरि॒दं वरी॑य॒ आ सी॑दत चकृ॒मा वः॑ स्यो॒नम् ।
   तिस्रो॑ देवीर्ब॒र्हिरि॒दं वरी॑य
   तिस्रः देवीः ब॒र्हिः इ॒दम् वरी॑यः
   तिस्रो देवीर् ब॒र्हिर् इ॒दं वरी॑य

Halfverse: b    आ सी॑दत चकृ॒मा वः॑ स्यो॒नम् ।
   आ सी॑दत चकृ॒म+ वः स्यो॒नम् ।
   आ सी॑दत चकृ॒मा वः सियो॒नम् ।

Halfverse: c    म॑नु॒ष्वद्य॒ज्ञं सुधि॑ता ह॒वींषीळा॑ दे॒वी घृ॒तप॑दी जुषन्त ।।
   म॑नु॒ष्वद्य॒ज्ञं सुधि॑ता ह॒वींषि
   मनु॒ष्वत् य॒ज्ञम् सुधि॑ता ह॒वींषि
   मनु॒ष्वद् य॒ज्ञं सुधि॑ता ह॒वींषि

Halfverse: d     इळा॑ दे॒वी घृ॒तप॑दी जुषन्त ।।
   इळा दे॒वी घृ॒तप॑दी जुषन्त ।।
   इळा दे॒वी घृ॒तप॑दी जुषन्त ।।


Verse: 9 
Halfverse: a    देव॑ त्वष्ट॒र्यद्ध॑ चारु॒त्वमान॒ड्यदङ्गि॑रसा॒मभ॑वः सचा॒भूः ।
   देव॑ त्वष्ट॒र्यद्ध॑ चारु॒त्वमान॑ड्
   देव त्वष्टर् यत् ह चारु॒त्वम् आन॑ट्
   देव त्वष्टर् यद् ध चारु॒त्वम् आन॑ड्

Halfverse: b    यदङ्गि॑रसा॒मभ॑वः सचा॒भूः ।
   यत् अङ्गि॑रसाम् अभ॑वः सचा॒भूः ।
   यद् अङ्गि॑रसाम् अभ॑वः सचा॒भूः ।

Halfverse: c    स दे॒वाना॒म्पाथ॒ उप॒ प्र वि॒द्वाँ उ॒शन्य॑क्षि द्रविणोदः सु॒रत्नः॑ ।।
   स दे॒वाना॒म्पाथ॒ उप॒ प्र वि॒द्वाँ
   स दे॒वाना॑म् पाथः उप प्र वि॒द्वान्
   स दे॒वाना॑म् पाथ उप प्र वि॒द्वाँ

Halfverse: d    उ॒शन्य॑क्षि द्रविणोदः सु॒रत्नः॑ ।।
   उ॒शन् यक्षि द्रविणोदः सु॒रत्नः ।।
   उ॒शन् यक्षि द्रविणोदः सु॒रत्नः ।।


Verse: 10 
Halfverse: a    वन॑स्पते रश॒नया॑ नि॒यूया॑ दे॒वाना॒म्पाथ॒ उप॑ वक्षि वि॒द्वान् ।
   वन॑स्पते रश॒नया॑ नि॒यूया
   वन॑स्पते रश॒नया नि॒यूय+
   वन॑स्पते रश॒नया नि॒यूया

Halfverse: b    दे॒वाना॒म्पाथ॒ उप॑ वक्षि वि॒द्वान् ।
   दे॒वाना॑म् पाथः उप वक्षि वि॒द्वान् ।
   दे॒वाना॑म् पाथ उप वक्षि वि॒द्वान् ।

Halfverse: c    स्वदा॑ति दे॒वः कृ॒णव॑द्ध॒वींष्यव॑तां॒ द्यावा॑पृथि॒वी हव॑म्मे ।।
   स्वदा॑ति दे॒वः कृ॒णव॑द्ध॒वींष्य्
   स्वदा॑ति दे॒वः कृ॒णव॑त् ह॒वींषि
   स्वदा॑ति दे॒वः कृ॒णव॑द् ध॒वींषि

Halfverse: d    अव॑तां॒ द्यावा॑पृथि॒वी हव॑म्मे ।।
   अव॑ताम् द्यावा॑पृथि॒वी हव॑म् मे ।।
   अव॑तां द्यावा॑पृथि॒वी हव॑म् मे ।।


Verse: 11 
Halfverse: a    आग्ने॑ वह॒ वरु॑णमि॒ष्टये॑ न॒ इन्द्रं॑ दि॒वो म॒रुतो॑ अ॒न्तरि॑क्षात् ।
   आग्ने॑ वह॒ वरु॑णमि॒ष्टये॑ न
   आ अ॑ग्ने वह वरु॑णम् इ॒ष्टये नः
   आग्ने वह वरु॑णम् इ॒ष्टये न

Halfverse: b    इन्द्रं॑ दि॒वो म॒रुतो॑ अ॒न्तरि॑क्षात् ।
   इन्द्र॑म् दि॒वः म॒रुतः अ॒न्तरि॑क्षात् ।
   इन्द्रं दि॒वो म॒रुतो अ॒न्तरि॑क्षात् ।

Halfverse: c    सीद॑न्तु ब॒र्हिर्विश्व॒ आ यज॑त्राः॒ स्वाहा॑ दे॒वा अ॒मृता॑ मादयन्ताम् ।।
   सीद॑न्तु ब॒र्हिर्विश्व॒ आ यज॑त्राः
   सीद॑न्तु ब॒र्हिः विश्वे आ यज॑त्राः
   सीद॑न्तु ब॒र्हिर् विश्व आ यज॑त्राः

Halfverse: d    स्वाहा॑ दे॒वा अ॒मृता॑ मादयन्ताम् ।।
   स्वाहा दे॒वाः अ॒मृताः मादयन्ताम् ।।
   स्वाहा दे॒वा अ॒मृता मादयन्ताम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.