TITUS
Rg-Veda: Rg-Veda-Samhita
Part No. 908
Previous part

Hymn: 71_(897) 
Verse: 1 
Halfverse: a    बृह॑स्पते प्रथ॒मं वा॒चो अग्रं॒ यत्प्रैर॑त नाम॒धेयं॒ दधा॑नाः ।
   बृह॑स्पते प्रथ॒मं वा॒चो अग्रं
   बृह॑स्पते प्रथ॒मम् वा॒चः अग्र॑म्
   बृह॑स्पते प्रथ॒मं वा॒चो अग्रं

Halfverse: b    यत्प्रैर॑त नाम॒धेयं॒ दधा॑नाः ।
   यत् प्र ऐर॑त नाम॒धेय॑म् दधा॑नाः ।
   यत् प्रैर॑त नाम॒धेयं दधा॑नाः ।

Halfverse: c    यदे॑षां॒ श्रेष्ठं॒ यद॑रि॒प्रमासी॑त्प्रे॒णा तदे॑षां॒ निहि॑तं॒ गुहा॒विः ।।
   यदे॑षां॒ श्रेष्ठं॒ यद॑रि॒प्रमासी॑त्
   यत् एषाम् श्रेष्ठ॑म् यत् अरि॒प्रम् आसी॑त्
   यद् एषां श्रेष्ठं यद् अरि॒प्रम् आसी॑त्

Halfverse: d    प्रे॒णा तदे॑षां॒ निहि॑तं॒ गुहा॒विः ।।
   प्रे॒णा तत् एषाम् निहि॑तम् गुहा आ॒विः ।।
   प्रे॒णा तद् एषां निहि॑तं गुहा॒विः ।।


Verse: 2 
Halfverse: a    सक्तु॑मिव॒ तित॑उना पु॒नन्तो॒ यत्र॒ धीरा॒ मन॑सा॒ वाच॒मक्र॑त ।
   सक्तु॑मिव॒ तित॑उना पु॒नन्तो
   सक्तु॑म् इव तित॑उना पु॒नन्तः
   सक्तु॑म् इव तित॑उना पु॒नन्तो

Halfverse: b    यत्र॒ धीरा॒ मन॑सा॒ वाच॒मक्र॑त ।
   यत्र धीराः मन॑सा वाच॑म् अक्र॑त ।
   यत्र धीरा मन॑सा वाच॑म् अक्र॑त ।

Halfverse: c    अत्रा॒ सखा॑यः स॒ख्यानि॑ जानते भ॒द्रैषां॑ ल॒क्ष्मीर्निहि॒ताधि॑ वा॒चि ।।
   अत्रा॒ सखा॑यः स॒ख्यानि॑ जानते
   अत्र+ सखा॑यः स॒ख्यानि जानते
   अत्रा सखा॑यः सखि॒यानि जानते

Halfverse: d    भ॒द्रैषां॑ ल॒क्ष्मीर्निहि॒ताधि॑ वा॒चि ।।
   भ॒द्रा ए॑षाम् ल॒क्ष्मीः निहि॑ता अधि वा॒चि ।।
   भ॒द्रैषां ल॒क्ष्मीर् निहि॒ताधि वा॒चि ।।


Verse: 3 
Halfverse: a    य॒ज्ञेन॑ वा॒चः प॑द॒वीय॑माय॒न्तामन्व॑विन्द॒न्नृषि॑षु॒ प्रवि॑ष्टाम् ।
   य॒ज्ञेन॑ वा॒चः प॑द॒वीय॑मायन्
   य॒ज्ञेन वा॒चः प॑द॒वीय॑म् आयन्
   य॒ज्ञेन वा॒चः प॑द॒वीय॑म् आयन्

Halfverse: b    तामन्व॑विन्द॒न्नृषि॑षु॒ प्रवि॑ष्टाम् ।
   ताम् अनु अविन्दन् ऋषि॑षु प्रवि॑ष्टाम् ।
   ताम् अन्व् अविन्दन्न् ऋषि॑षु प्रवि॑ष्टाम् ।

Halfverse: c    तामा॒भृत्या॒ व्य॑दधुः पुरु॒त्रा तां स॒प्त रे॒भा अ॒भि सं न॑वन्ते ।।
   तामा॒भृत्या॒ व्य॑दधुः पुरु॒त्रा
   ताम् आ॒भृत्य+ वि अ॑दधुः पुरु॒त्रा
   ताम् आ॒भृत्या वि अ॑दधुः पुरु॒त्रा

Halfverse: d    तां स॒प्त रे॒भा अ॒भि सं न॑वन्ते ।।
   ताम् स॒प्त रे॒भाः अ॒भि सम् नवन्ते ।।
   तां स॒प्त रे॒भा अ॒भि सं न॑वन्ते ।।


Verse: 4 
Halfverse: a    उ॒त त्वः॒ पश्य॒न्न द॑दर्श॒ वाच॑मु॒त त्वः॑ शृ॒ण्वन्न शृ॑णोत्येनाम् ।
   उ॒त त्वः॒ पश्य॒न्न द॑दर्श॒ वाच॑म्
   उ॒त त्वः पश्य॑न् न द॑दर्श वाच॑म्
   उ॒त त्वः पश्य॑न् न द॑दर्श वाच॑म्

Halfverse: b    उ॒त त्वः॑ शृ॒ण्वन्न शृ॑णोत्येनाम् ।
   उ॒त त्वः शृ॒ण्वन् न शृ॑णोति एनाम् ।
   उ॒त त्वः शृ॒ण्वन् न शृ॑णोति एनाम् ।

Halfverse: c    उ॒तो त्व॑स्मै त॒न्वं॒ वि स॑स्रे जा॒येव॒ पत्य॑ उश॒ती सु॒वासाः॑ ।।
   उ॒तो त्व॑स्मै त॒न्वं॒ वि स॑स्रे
   उ॒त उ त्वस्मै त॒न्व॑म् वि स॑स्रे
   उ॒तो तु॑वस्मै त॒नुवं वि स॑स्रे

Halfverse: d    जा॒येव॒ पत्य॑ उश॒ती सु॒वासाः॑ ।।
   जा॒या इ॑व पत्ये उश॒ती सु॒वासाः ।।
   जा॒येव पत्य उश॒ती सु॒वासाः ।।


Verse: 5 
Halfverse: a    उ॒त त्वं॑ स॒ख्ये स्थि॒रपी॑तमाहु॒र्नैनं॑ हिन्व॒न्त्यपि॒ वाजि॑नेषु ।
   उ॒त त्वं॑ स॒ख्ये स्थि॒रपी॑तमाहुर्
   उ॒त त्व॑म् स॒ख्ये स्थि॒रपी॑तम् आहुः
   उ॒त त्वं स॒ख्ये स्थि॒रपी॑तम् आहुर्

Halfverse: b    नैनं॑ हिन्व॒न्त्यपि॒ वाजि॑नेषु ।
   न ए॑नम् हिन्वन्ति अपि वाजि॑नेषु ।
   नैनं हिन्वन्ति अपि वाजि॑नेषु ।

Halfverse: c    अधे॑न्वा चरति मा॒ययै॒ष वाचं॑ शुश्रु॒वाँ अ॑प॒लाम॑पु॒ष्पाम् ।।
   अधे॑न्वा चरति मा॒ययै॒ष
   अधे॑न्वा चरति मा॒यया ए॒ष
   अधे॑नुवा चरति मा॒ययै॒ष

Halfverse: d    वाचं॑ शुश्रु॒वाँ अ॑प॒लाम॑पु॒ष्पाम् ।।
   वाच॑म् शुश्रु॒वान् अप॒लाम् अपु॒ष्पाम् ।।
   वाचं शुश्रु॒वाँ अ॑प॒लाम् अपु॒ष्पाम् ।।


Verse: 6 
Halfverse: a    यस्ति॒त्याज॑ सचि॒विदं॒ सखा॑यं॒ न तस्य॑ वा॒च्यपि॑ भा॒गो अ॑स्ति ।
   यस्ति॒त्याज॑ सचि॒विदं॒ सखा॑यं
   यः ति॒त्याज सचि॒विद॑म् सखा॑यम्
   यस् ति॒त्याज सचि॒विदं सखा॑यं

Halfverse: b    न तस्य॑ वा॒च्यपि॑ भा॒गो अ॑स्ति ।
   न तस्य वा॒चि अपि भा॒गः अ॑स्ति ।
   न तस्य वा॒चि अपि भा॒गो अ॑स्ति ।

Halfverse: c    यदीं॑ शृ॒णोत्यल॑कं शृणोति न॒हि प्र॒वेद॑ सुकृ॒तस्य॒ पन्था॑म् ।।
   यदीं॑ शृ॒णोत्यल॑कं शृणोति
   यत् ईम् शृ॒णोति अल॑कम् शृणोति
   यद् ईं शृ॒णोति अल॑कं शृणोति

Halfverse: d    न॒हि प्र॒वेद॑ सुकृ॒तस्य॒ पन्था॑म् ।।
   न॒हि प्र॒वेद सुकृ॒तस्य पन्था॑म् ।।
   न॒हि प्र॒वेद सुकृ॒तस्य पन्था॑म् ।।


Verse: 7 
Halfverse: a    अ॑क्ष॒ण्वन्तः॒ कर्ण॑वन्तः॒ सखा॑यो मनोज॒वेष्वस॑मा बभूवुः ।
   अ॑क्ष॒ण्वन्तः॒ कर्ण॑वन्तः॒ सखा॑यो
   अक्ष॒ण्वन्तः कर्ण॑वन्तः सखा॑यः
   अक्ष॒ण्वन्तः कर्ण॑वन्तः सखा॑यो

Halfverse: b    मनोज॒वेष्वस॑मा बभूवुः ।
   म॑नोज॒वेषु अस॑माः बभूवुः ।
   म॑नोज॒वेषु अस॑मा बभूवुः ।

Halfverse: c    आ॑द॒घ्नास॑ उपक॒क्षास॑ उ त्वे ह्र॒दा इ॑व॒ स्नात्वा॑ उ त्वे ददृश्रे ।।
   आ॑द॒घ्नास॑ उपक॒क्षास॑ उ त्वे
   आद॒घ्नासः उपक॒क्षासः उ त्वे
   आद॒घ्नास उपक॒क्षास उ त्वे

Halfverse: d    ह्र॒दा इ॑व॒ स्नात्वा॑ उ त्वे ददृश्रे ।।
   ह्र॒दाः इ॑व स्नात्वाः उ त्वे ददृश्रे ।।
   ह्र॒दा इ॑व स्नात्वा उ त्वे ददृश्रे ।।


Verse: 8 
Halfverse: a    हृ॒दा त॒ष्टेषु॒ मन॑सो ज॒वेषु॒ यद्ब्रा॑ह्म॒णाः सं॒यज॑न्ते॒ सखा॑यः ।
   हृ॒दा त॒ष्टेषु॒ मन॑सो ज॒वेषु
   हृ॒दा त॒ष्टेषु मन॑सः ज॒वेषु
   हृ॒दा त॒ष्टेषु मन॑सो ज॒वेषु

Halfverse: b    यद्ब्रा॑ह्म॒णाः सं॒यज॑न्ते॒ सखा॑यः ।
   यत् ब्राह्म॒णाः सं॒यज॑न्ते सखा॑यः ।
   यद् ब्राह्म॒णाः सं॒यज॑न्ते सखा॑यः ।

Halfverse: c    अत्राह॑ त्वं॒ वि ज॑हुर्वे॒द्याभि॒रोह॑ब्रह्माणो॒ वि च॑रन्त्यु त्वे ।।
   अत्राह॑ त्वं॒ वि ज॑हुर्वे॒द्याभि॑र्
   अत्र अह त्वम् वि ज॑हुः वे॒द्याभिः
   अत्राह त्वं वि ज॑हुर् वेदि॒याभि॑र्

Halfverse: d    ओह॑ब्रह्माणो॒ वि च॑रन्त्यु त्वे ।।
   ओह॑ब्रह्माणः वि च॑रन्ति उ त्वे ।।
   ओह॑ब्रह्माणो वि च॑रन्ति उ त्वे ।।


Verse: 9 
Halfverse: a    इ॒मे ये नार्वाङ्न प॒रश्चर॑न्ति॒ न ब्रा॑ह्म॒णासो॒ न सु॒तेक॑रासः ।
   इ॒मे ये नार्वाङ्न प॒रश्चर॑न्ति
   इ॒मे ये न अ॒र्वाक् न प॒रः चर॑न्ति
   इ॒मे ये नार्वाङ् न प॒रश् चर॑न्ति

Halfverse: b    न ब्रा॑ह्म॒णासो॒ न सु॒तेक॑रासः ।
   न ब्रा॑ह्म॒णासः न सु॒तेक॑रासः ।
   न ब्रा॑ह्म॒णासो न सु॒तेक॑रासः ।

Halfverse: c    त ए॒ते वाच॑मभि॒पद्य॑ पा॒पया॑ सि॒रीस्तन्त्रं॑ तन्वते॒ अप्र॑जज्ञयः ।।
   त ए॒ते वाच॑मभि॒पद्य॑ पा॒पया
   ते ए॒ते वाच॑म् अभि॒पद्य पा॒पया
   त ए॒ते वाच॑म् अभि॒पद्य पा॒पया

Halfverse: d    सि॒रीस्तन्त्रं॑ तन्वते॒ अप्र॑जज्ञयः ।।
   सि॒रीः तन्त्र॑म् तन्वते अप्र॑जज्ञयः ।।
   सि॒रीस् तन्त्रं तन्वते अप्र॑जज्ञयः ।।


Verse: 10 
Halfverse: a    सर्वे॑ नन्दन्ति य॒शसाग॑तेन सभासा॒हेन॒ सख्या॒ सखा॑यः ।
   सर्वे॑ नन्दन्ति य॒शसाग॑तेन
   सर्वे नन्दन्ति य॒शसा आग॑तेन
   सर्वे नन्दन्ति य॒शसाग॑तेन

Halfverse: b    सभासा॒हेन॒ सख्या॒ सखा॑यः ।
   स॑भासा॒हेन सख्या सखा॑यः ।
   स॑भासा॒हेन सखि॑या सखा॑यः ।

Halfverse: c    कि॑ल्बिष॒स्पृत्पि॑तु॒षणि॒र्ह्ये॑षा॒मरं॑ हि॒तो भव॑ति॒ वाजि॑नाय ।।
   कि॑ल्बिष॒स्पृत्पि॑तु॒षणि॒र्ह्ये॑षाम्
   किल्बिष॒स्पृत् पितु॒षणिः हि ए॑षाम्
   किल्बिष॒स्पृत् पितु॒षणि॑र् हि ए॑षाम्

Halfverse: d    अरं॑ हि॒तो भव॑ति॒ वाजि॑नाय ।।
   अर॑म् हि॒तः भव॑ति वाजि॑नाय ।।
   अरं हि॒तो भव॑ति वाजि॑नाय ।।


Verse: 11 
Halfverse: a    ऋ॒चां त्वः॒ पोष॑मास्ते पुपु॒ष्वान्गा॑य॒त्रं त्वो॑ गायति॒ शक्व॑रीषु ।
   ऋ॒चां त्वः॒ पोष॑मास्ते पुपु॒ष्वान्
   ऋ॒चाम् त्वः पोष॑म् आस्ते पुपु॒ष्वान्
   ऋ॒चां तु॑वः पोष॑म् आस्ते पुपु॒ष्वान्

Halfverse: b    गाय॒त्रं त्वो॑ गायति॒ शक्व॑रीषु ।
   गा॑य॒त्रम् त्वः गायति शक्व॑रीषु ।
   गा॑य॒त्रं त्वो गायति शक्व॑रीषु ।

Halfverse: c    ब्र॒ह्मा त्वो॒ वद॑ति जातवि॒द्यां य॒ज्ञस्य॒ मात्रां॒ वि मि॑मीत उ त्वः ।।
   ब्र॒ह्मा त्वो॒ वद॑ति जातवि॒द्यां
   ब्र॒ह्मा त्वः वद॑ति जातवि॒द्याम्
   ब्र॒ह्मा तु॑वो वद॑ति जातवि॒द्यां

Halfverse: d    य॒ज्ञस्य॒ मात्रां॒ वि मि॑मीत उ त्वः ।।
   य॒ज्ञस्य मात्रा॑म् वि मि॑मीते उ त्वः ।।
   य॒ज्ञस्य मात्रां वि मि॑मीत उ त्वः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.