TITUS
Rg-Veda: Rg-Veda-Samhita
Part No. 912
Previous part

Hymn: 75_(901) 
Verse: 1 
Halfverse: a    प्र सु व॑ आपो महि॒मान॑मुत्त॒मं का॒रुर्वो॑चाति॒ सद॑ने वि॒वस्व॑तः ।
   प्र सु व॑ आपो महि॒मान॑मुत्त॒मं
   प्र सु वः आपः महि॒मान॑म् उत्त॒मम्
   प्र सु व आपो महि॒मान॑म् उत्त॒मं

Halfverse: b    का॒रुर्वो॑चाति॒ सद॑ने वि॒वस्व॑तः ।
   का॒रुः वो॑चाति सद॑ने वि॒वस्व॑तः ।
   का॒रुर् वोचाति सद॑ने वि॒वस्व॑तः ।

Halfverse: c    प्र स॒प्तस॑प्त त्रे॒धा हि च॑क्र॒मुः प्र सृत्व॑रीणा॒मति॒ सिन्धु॒रोज॑सा ।।
   प्र स॒प्तस॑प्त त्रे॒धा हि च॑क्र॒मुः
   प्र स॒प्तस॑प्त त्रे॒धा हि च॑क्र॒मुः
   प्र स॒प्तस॑प्त त्रेए॒धा हि च॑क्र॒मुः

Halfverse: d    प्र सृत्व॑रीणा॒मति॒ सिन्धु॒रोज॑सा ।।
   प्र सृत्व॑रीणाम् अति सिन्धुः ओज॑सा ।।
   प्र सृत्व॑रीणाम् अति सिन्धु॑र् ओज॑सा ।।


Verse: 2 
Halfverse: a    प्र ते॑ ऽरद॒द्वरु॑णो॒ यात॑वे प॒थः सिन्धो॒ यद्वाजाँ॑ अ॒भ्यद्र॑व॒स्त्वम् ।
   प्र ते॑ ऽरद॒द्वरु॑णो॒ यात॑वे प॒थः
   प्र ते अरदत् वरु॑णः यात॑वे प॒थः
   प्र ते ऽरदद् वरु॑णो यात॑वे प॒थः

Halfverse: b    सिन्धो॒ यद्वाजाँ॑ अ॒भ्यद्र॑व॒स्त्वम् ।
   सिन्धो यत् वाजा॑न् अ॒भि अद्र॑वः त्वम् ।
   सिन्धो यद् वाजाँ अ॒भि अद्र॑वस् तु॒वम् ।

Halfverse: c    भूम्या॒ अधि॑ प्र॒वता॑ यासि॒ सानु॑ना॒ यदे॑षा॒मग्रं॒ जग॑तामिर॒ज्यसि॑ ।।
   भूम्या॒ अधि॑ प्र॒वता॑ यासि॒ सानु॑ना
   भूम्याः अधि प्र॒वता यासि सानु॑ना
   भूम्या अधि प्र॒वता यासि सानु॑ना

Halfverse: d    यदे॑षा॒मग्रं॒ जग॑तामिर॒ज्यसि॑ ।।
   यत् एषाम् अग्र॑म् जग॑ताम् इर॒ज्यसि ।।
   यद् एषाम् अग्रं जग॑ताम् इर॒ज्यसि ।।


Verse: 3 
Halfverse: a    दि॒वि स्व॒नो य॑तते॒ भूम्यो॒पर्य॑न॒न्तं शुष्म॒मुदि॑यर्ति भा॒नुना॑ ।
   दि॒वि स्व॒नो य॑तते॒ भूम्यो॒पर्य्
   दि॒वि स्व॒नः य॑तते भूम्या उ॒परि
   दि॒वि स्व॒नो य॑तते भूमि॑यो॒परि

Halfverse: b    अन॒न्तं शुष्म॒मुदि॑यर्ति भा॒नुना॑ ।
   अ॑न॒न्तम् शुष्म॑म् उत् इयर्ति भा॒नुना ।
   अ॑न॒न्तं शुष्म॑म् उद् इयर्ति भा॒नुना ।

Halfverse: c    अ॒भ्रादि॑व॒ प्र स्त॑नयन्ति वृ॒ष्टयः॒ सिन्धु॒र्यदेति॑ वृष॒भो न रोरु॑वत् ।।
   अ॒भ्रादि॑व॒ प्र स्त॑नयन्ति वृ॒ष्टयः
   अ॒भ्रात् इव प्र स्त॑नयन्ति वृ॒ष्टयः
   अ॒भ्राद् इव प्र स्त॑नयन्ति वृ॒ष्टयः

Halfverse: d    सिन्धु॒र्यदेति॑ वृष॒भो न रोरु॑वत् ।।
   सिन्धुः यत् एति वृष॒भः न रोरु॑वत् ।।
   सिन्धु॑र् यद् एति वृष॒भो न रोरु॑वत् ।।


Verse: 4 
Halfverse: a    अ॒भि त्वा॑ सिन्धो॒ शिशु॒मिन्न मा॒तरो॑ वा॒श्रा अ॑र्षन्ति॒ पय॑सेव धे॒नवः॑ ।
   अ॒भि त्वा॑ सिन्धो॒ शिशु॒मिन्न मा॒तरो
   अ॒भि त्वा सिन्धो शिशु॑म् इत् न मा॒तरः
   अ॒भि त्वा सिन्धो शिशु॑म् इन् न मा॒तरो

Halfverse: b    वा॒श्रा अ॑र्षन्ति॒ पय॑सेव धे॒नवः॑ ।
   वा॒श्राः अ॑र्षन्ति पय॑सा इव धे॒नवः ।
   वा॒श्रा अ॑र्षन्ति पय॑सेव धे॒नवः ।

Halfverse: c    राजे॑व॒ युध्वा॑ नयसि॒ त्वमित्सिचौ॒ यदा॑सा॒मग्र॑म्प्र॒वता॒मिन॑क्षसि ।।
   राजे॑व॒ युध्वा॑ नयसि॒ त्वमित्सिचौ
   राजा इव युध्वा नयसि त्वम् इत् सिचौ
   राजे॑व युध्वा नयसि त्वम् इत् सिचौ

Halfverse: d    यदा॑सा॒मग्र॑म्प्र॒वता॒मिन॑क्षसि ।।
   यत् आसाम् अग्र॑म् प्र॒वता॑म् इन॑क्षसि ।।
   यद् आसाम् अग्र॑म् प्र॒वता॑म् इन॑क्षसि ।।


Verse: 5 
Halfverse: a    इ॒मम्मे॑ गङ्गे यमुने सरस्वति॒ शुतु॑द्रि॒ स्तोमं॑ सचता॒ परु॒ष्ण्या ।
   इ॒मम्मे॑ गङ्गे यमुने सरस्वति
   इ॒मम् मे गङ्गे यमुने सरस्वति
   इ॒मम् मे गङ्गे यमुने सरस्वति

Halfverse: b    शुतु॑द्रि॒ स्तोमं॑ सचता॒ परु॒ष्ण्या ।
   शुतु॑द्रि स्तोम॑म् सचत+ परु॑ष्णि आ ।
   शुतु॑द्रि स्तोमं सचता परु॑ष्णि आ ।

Halfverse: c    अ॑सि॒क्न्या म॑रुद्वृधे वि॒तस्त॒यार्जी॑कीये शृणु॒ह्या सु॒षोम॑या ।।
   अ॑सि॒क्न्या म॑रुद्वृधे वि॒तस्त॑या
   असि॒क्न्या म॑रुद्वृधे वि॒तस्त॑या
   असिक्नि॒या म॑रुद्वृधे वि॒तस्त॑या

Halfverse: d     आर्जी॑कीये शृणु॒ह्या सु॒षोम॑या ।।
   आर्जी॑कीये शृणु॒हि आ सु॒षोम॑या ।।
   आर्जी॑कीये शृणुहि आ सु॒षोम॑या ।।


Verse: 6 
Halfverse: a    तृ॒ष्टाम॑या प्रथ॒मं यात॑वे स॒जूः सु॒सर्त्वा॑ र॒सया॑ श्वे॒त्या त्या ।
   तृ॒ष्टाम॑या प्रथ॒मं यात॑वे स॒जूः
   तृ॒ष्टाम॑या प्रथ॒मम् यात॑वे स॒जूः
   तृ॒ष्टाम॑या प्रथ॒मं यात॑वे स॒जूः

Halfverse: b    सु॒सर्त्वा॑ ।!। र॒सया॑ श्वे॒त्या त्या ।
   सु॒सर्त्वा र॒सया श्वे॒त्या त्या ।
   सु॒सर्तु॑वा र॒सया श्वेति॒या ति॒या ।

Halfverse: c    त्वं सि॑न्धो॒ कुभ॑या गोम॒तीं क्रुमु॑म्मेह॒त्न्वा स॒रथं॒ याभि॒रीय॑से ।।
   त्वं सि॑न्धो॒ कुभ॑या गोम॒तीं क्रुमु॑म्
   त्वम् सिन्धो कुभ॑या गोम॒तीम् क्रुमु॑म्
   तु॒वं सि॑न्धो कुभ॑या गोम॒तीं क्रुमु॑म्

Halfverse: d    मेह॒त्न्वा स॒रथं॒ याभि॒रीय॑से ।।
   मे॑ह॒त्न्वा स॒रथ॑म् याभिः ईय॑से ।।
   मे॑हत्नु॒वा स॒रथं याभि॑र् ईय॑से ।।


Verse: 7 
Halfverse: a    ऋजी॒त्येनी॒ रुश॑ती महि॒त्वा परि॒ ज्रयां॑सि भरते॒ रजां॑सि ।
   ऋजी॒त्येनी॒ रुश॑ती महि॒त्वा
   ऋजी॑ती एनी रुश॑ती महि॒त्वा
   ऋजी॑ति एनी रुश॑ती महि॒त्वा

Halfverse: b    परि॒ ज्रयां॑सि भरते॒ रजां॑सि ।
   परि ज्रयां॑सि भरते रजां॑सि ।
   परि ज्रयां॑सि भरते रजां॑सि ।

Halfverse: c    अद॑ब्धा॒ सिन्धु॑र॒पसा॑म॒पस्त॒माश्वा॒ न चि॒त्रा वपु॑षीव दर्श॒ता ।।
   अद॑ब्धा॒ सिन्धु॑र॒पसा॑म॒पस्त॑मा
   अद॑ब्धा सिन्धुः अ॒पसा॑म् अ॒पस्त॑मा
   अद॑ब्धा सिन्धु॑र् अ॒पसा॑म् अ॒पस्त॑मा

Halfverse: d     अश्वा॒ न चि॒त्रा वपु॑षीव दर्श॒ता ।।
   अश्वा न चि॒त्रा वपु॑षी इव दर्श॒ता ।।
   अश्वा न चि॒त्रा वपु॑षीव दर्श॒ता ।।


Verse: 8 
Halfverse: a    स्वश्वा॒ सिन्धुः॑ सु॒रथा॑ सु॒वासा॑ हिर॒ण्ययी॒ सुकृ॑ता वा॒जिनी॑वती ।
   स्वश्वा॒ सिन्धुः॑ सु॒रथा॑ सु॒वासा
   स्वश्वा सिन्धुः सु॒रथा सु॒वासाः
   सुअश्वा सिन्धुः सु॒रथा सु॒वासा

Halfverse: b    हिर॒ण्ययी॒ सुकृ॑ता वा॒जिनी॑वती ।
   हि॑र॒ण्ययी सुकृ॑ता वा॒जिनी॑वती ।
   हि॑र॒ण्ययी सुकृ॑ता वा॒जिनी॑वती ।

Halfverse: c    ऊर्णा॑वती युव॒तिः सी॒लमा॑वत्यु॒ताधि॑ वस्ते सु॒भगा॑ मधु॒वृध॑म् ।।
   ऊर्णा॑वती युव॒तिः सी॒लमा॑वत्य्
   ऊर्णा॑वती युव॒तिः सी॒लमा॑वती
   ऊर्णा॑वती युव॒तिः सी॒लमा॑वती

Halfverse: d    उ॒ताधि॑ वस्ते सु॒भगा॑ मधु॒वृध॑म् ।।
   उ॒त अधि वस्ते सु॒भगा मधु॒वृध॑म् ।।
   उ॒ताधि वस्ते सु॒भगा मधु॒वृध॑म् ।।


Verse: 9 
Halfverse: a    सु॒खं रथं॑ युयुजे॒ सिन्धु॑र॒श्विनं॒ तेन॒ वाजं॑ सनिषद॒स्मिन्ना॒जौ ।
   सु॒खं रथं॑ युयुजे॒ सिन्धु॑र॒श्विनं
   सु॒खम् रथ॑म् युयुजे सिन्धुः अ॒श्विन॑म्
   सु॒खं रथं युयुजे सिन्धु॑र् अ॒श्विनं

Halfverse: b    तेन॒ वाजं॑ सनिषद॒स्मिन्ना॒जौ ।
   तेन वाज॑म् सनिषत् अ॒स्मिन् आ॒जौ ।
   तेन वाजं सनिषद् अ॒स्मिन् आ॒जौ ।

Halfverse: c    म॒हान्ह्य॑स्य महि॒मा प॑न॒स्यते ऽद॑ब्धस्य॒ स्वय॑शसो विर॒प्शिनः॑ ।।
   म॒हान्ह्य॑स्य महि॒मा प॑न॒स्यते
   म॒हान् हि अ॑स्य महि॒मा प॑न॒स्यते
   म॒हान् हि अ॑स्य महि॒मा प॑न॒स्यते

Halfverse: d    ऽदब्धस्य॒ स्वय॑शसो विर॒प्शिनः॑ ।।
   अद॑ब्धस्य स्वय॑शसः विर॒प्शिनः ।।
   अद॑ब्धस्य स्वय॑शसो विर॒प्शिनः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.