TITUS
Rg-Veda: Rg-Veda-Samhita
Part No. 913
Previous part

Hymn: 76_(902) 
Verse: 1 
Halfverse: a    आ व॑ ऋञ्जस ऊ॒र्जां व्यु॑ष्टि॒ष्विन्द्र॑म्म॒रुतो॒ रोद॑सी अनक्तन ।
   आ व॑ ऋञ्जस ऊ॒र्जां व्यु॑ष्टिष्व्
   आ वः ऋञ्जसे ऊ॒र्जाम् व्यु॑ष्टिषु
   आ व ऋञ्जस ऊ॒र्जाअं विउ॑ष्टिषु

Halfverse: b    इन्द्र॑म्म॒रुतो॒ रोद॑सी अनक्तन ।
   इन्द्र॑म् म॒रुतः रोद॑सी अनक्तन ।
   इन्द्र॑म् म॒रुतो रोद॑सी अनक्तन ।

Halfverse: c    उ॒भे यथा॑ नो॒ अह॑नी सचा॒भुवा॒ सदः॑सदो वरिव॒स्यात॑ उ॒द्भिदा॑ ।।
   उ॒भे यथा॑ नो॒ अह॑नी सचा॒भुवा
   उ॒भे यथा नः अह॑नी सचा॒भुवा
   उ॒भे यथा नो अह॑नी सचा॒भुवा

Halfverse: d    सदः॑सदो वरिव॒स्यात॑ उ॒द्भिदा॑ ।।
   सदः॑सदः वरिव॒स्यातः उ॒द्भिदा ।।
   सदः॑सदो वरिव॒स्यात उ॒द्भिदा ।।


Verse: 2 
Halfverse: a    तदु॒ श्रेष्ठं॒ सव॑नं सुनोत॒नात्यो॒ न हस्त॑यतो॒ अद्रिः॑ सो॒तरि॑ ।
   तदु॒ श्रेष्ठं॒ सव॑नं सुनोतन
   तत् उ श्रेष्ठ॑म् सव॑नम् सुनोतन
   तद् उ श्रयि॑ष्ठं सव॑नं सुनोतन

Halfverse: b     अत्यो॒ न हस्त॑यतो॒ अद्रिः॑ सो॒तरि॑ ।
   अत्यः न हस्त॑यतः अद्रिः सो॒तरि ।
   अत्यो न हस्त॑यतो अद्रिः सो॒तरि ।

Halfverse: c    वि॒दद्ध्य॒र्यो अ॒भिभू॑ति॒ पौंस्य॑म्म॒हो रा॒ये चि॑त्तरुते॒ यदर्व॑तः ।।
   वि॒दद्ध्य॒र्यो अ॒भिभू॑ति॒ पौंस्य॑म्
   वि॒दत् हि अ॒र्यः अ॒भिभू॑ति पौंस्य॑म्
   वि॒दद् धि अ॒र्यो अ॒भिभू॑ति पौंसि॑यम्

Halfverse: d    म॒हो रा॒ये चि॑त्तरुते॒ यदर्व॑तः ।।
   म॒हः रा॒ये चि॑त् तरुते यत् अर्व॑तः ।।
   म॒हो रा॒ये चि॑त् तरुते यद् अर्व॑तः ।।


Verse: 3 
Halfverse: a    तदिद्ध्य॑स्य॒ सव॑नं वि॒वेर॒पो यथा॑ पु॒रा मन॑वे गा॒तुमश्रे॑त् ।
   तदिद्ध्य॑स्य॒ सव॑नं वि॒वेर॒पो
   तत् इत् हि अ॑स्य सव॑नम् वि॒वेः अ॒पः
   तद् इद् धि अ॑स्य सव॑नं वि॒वेर् अ॒पो

Halfverse: b    यथा॑ पु॒रा मन॑वे गा॒तुमश्रे॑त् ।
   यथा पु॒रा मन॑वे गा॒तुम् अश्रे॑त् ।
   यथा पु॒रा मन॑वे गा॒तुम् अश्रे॑त् ।

Halfverse: c    गोअ॑र्णसि त्वा॒ष्ट्रे अश्व॑निर्णिजि॒ प्रेम॑ध्व॒रेष्व॑ध्व॒राँ अ॑शिश्रयुः ।।
   गोअ॑र्णसि त्वा॒ष्ट्रे अश्व॑निर्णिजि
   गोअर्णसि त्वा॒ष्ट्रे अश्व॑निर्णिजि
   गोअर्णसि त्वाष्ट॒रे अश्व॑निर्णिजि

Halfverse: d    प्रेम॑ध्व॒रेष्व॑ध्व॒राँ अ॑शिश्रयुः ।।
   प्र ई॑म् अध्व॒रेषु अध्व॒रान् अशिश्रयुः ।।
   प्रेम् अध्व॒रेषु अध्व॒राँ अ॑शिश्रयुः ।।


Verse: 4 
Halfverse: a    अप॑ हत र॒क्षसो॑ भङ्गु॒राव॑त स्कभा॒यत॒ निरृ॑तिं॒ सेध॒ताम॑तिम् ।
   अप॑ हत र॒क्षसो॑ भङ्गु॒राव॑त
   अप हत र॒क्षसः भङ्गु॒राव॑तः
   अप हत र॒क्षसो भङ्गु॒राव॑त

Halfverse: b    स्कभा॒यत॒ निरृ॑तिं॒ सेध॒ताम॑तिम् ।
   स्क॑भा॒यत निरृ॑तिम् सेध॑त अम॑तिम् ।
   स्क॑भा॒यत निरृ॑तिं सेध॒ताम॑तिम् ।

Halfverse: c    आ नो॑ र॒यिं सर्व॑वीरं सुनोतन देवा॒व्य॑म्भरत॒ श्लोक॑मद्रयः ।।
   आ नो॑ र॒यिं सर्व॑वीरं सुनोतन
   आ नः र॒यिम् सर्व॑वीरम् सुनोतन
   आ नो र॒यिं सर्व॑वीरं सुनोतन

Halfverse: d    देवा॒व्य॑म्भरत॒ श्लोक॑मद्रयः ।।
   दे॑वा॒व्य॑म् भरत श्लोक॑म् अद्रयः ।।
   दे॑वा॒विय॑म् भरत श्लोक॑म् अद्रयः ।।


Verse: 5 
Halfverse: a    दि॒वश्चि॒दा वो ऽम॑वत्तरेभ्यो वि॒भ्वना॑ चिदा॒श्व॑पस्तरेभ्यः ।
   दि॒वश्चि॒दा वो ऽम॑वत्तरेभ्यो
   दि॒वः चि॑त् आ वः अम॑वत्तरेभ्यः
   दि॒वश् चिद् आ वो अम॑वत्तरेभियो

Halfverse: b    वि॒भ्वना॑ चिदा॒श्व॑पस्तरेभ्यः ।
   वि॒भ्वना चित् आ॒श्व॑पस्तरेभ्यः ।
   वि॒भ्वना चिद् आशुअपस्तरेभियः ।

Halfverse: c    वा॒योश्चि॒दा सोम॑रभस्तरेभ्यो॒ ऽग्नेश्चि॑दर्च पितु॒कृत्त॑रेभ्यः ।।
   वा॒योश्चि॒दा सोम॑रभस्तरेभ्यो
   वा॒योः चि॑त् आ सोम॑रभस्तरेभ्यः
   वा॒योश् चिद् आ सोम॑रभस्तरेभियो

Halfverse: d    ऽग्नेश्चि॑दर्च पितु॒कृत्त॑रेभ्यः ।।
   अ॒ग्नेः चि॑त् अर्च पितु॒कृत्त॑रेभ्यः ।।
   अ॒ग्नेश् चिद् अर्च पितु॒कृत्त॑रेभियः ।।


Verse: 6 
Halfverse: a    भु॒रन्तु॑ नो य॒शसः॒ सोत्वन्ध॑सो॒ ग्रावा॑णो वा॒चा दि॒विता॑ दि॒वित्म॑ता ।
   भु॒रन्तु॑ नो य॒शसः॒ सोत्वन्ध॑सो
   भु॒रन्तु नः य॒शसः सोतु अन्ध॑सः
   भु॒रन्तु नो य॒शसः सोतु अन्ध॑सो

Halfverse: b    ग्रावा॑णो वा॒चा दि॒विता॑ दि॒वित्म॑ता ।
   ग्रावा॑णः वा॒चा दि॒विता दि॒वित्म॑ता ।
   ग्रावा॑णो वा॒चा दि॒विता दि॒वित्म॑ता ।

Halfverse: c    नरो॒ यत्र॑ दुह॒ते काम्य॒म्मध्वा॑घो॒षय॑न्तो अ॒भितो॑ मिथ॒स्तुरः॑ ।।
   नरो॒ यत्र॑ दुह॒ते काम्य॒म्मध्व्
   नरः यत्र दुह॒ते काम्य॑म् मधु
   नरो यत्र दुह॒ते कामि॑यम् मधु

Halfverse: d    आघो॒षय॑न्तो अ॒भितो॑ मिथ॒स्तुरः॑ ।।
   आ॑घो॒षय॑न्तः अ॒भितः मिथ॒स्तुरः ।।
   आ॑घो॒षय॑न्तो अ॒भितो मिथ॒स्तुरः ।।


Verse: 7 
Halfverse: a    सु॒न्वन्ति॒ सोमं॑ रथि॒रासो॒ अद्र॑यो॒ निर॑स्य॒ रसं॑ ग॒विषो॑ दुहन्ति॒ ते ।
   सु॒न्वन्ति॒ सोमं॑ रथि॒रासो॒ अद्र॑यो
   सु॒न्वन्ति सोम॑म् रथि॒रासः अद्र॑यः
   सु॒न्वन्ति सोमं रथि॒रासो अद्र॑यो

Halfverse: b    निर॑स्य॒ रसं॑ ग॒विषो॑ दुहन्ति॒ ते ।
   निः अ॑स्य रस॑म् ग॒विषः दुहन्ति ते ।
   निर् अस्य रसं ग॒विषो दुहन्ति ते ।

Halfverse: c    दु॒हन्त्यूध॑रुप॒सेच॑नाय॒ कं नरो॑ ह॒व्या न म॑र्जयन्त आ॒सभिः॑ ।।
   दु॒हन्त्यूध॑रुप॒सेच॑नाय॒ कं
   दु॒हन्ति ऊध॑र् उप॒सेच॑नाय कम्
   दु॒हन्ति ऊध॑र् उप॒सेच॑नाय कं

Halfverse: d    नरो॑ ह॒व्या न म॑र्जयन्त आ॒सभिः॑ ।।
   नरः ह॒व्या न म॑र्जयन्ते आ॒सभिः ।।
   नरो ह॒व्या न म॑र्जयन्त आ॒सभिः ।।


Verse: 8 
Halfverse: a    ए॒ते न॑रः॒ स्वप॑सो अभूतन॒ य इन्द्रा॑य सुनु॒थ सोम॑मद्रयः ।
   ए॒ते न॑रः॒ स्वप॑सो अभूतन
   ए॒ते न॑रः स्वप॑सः अभूतन
   ए॒ते न॑रः सुअप॑सो अभूतन

Halfverse: b    य इन्द्रा॑य सुनु॒थ सोम॑मद्रयः ।
   ये इन्द्रा॑य सुनु॒थ सोम॑म् अद्रयः ।
   य इन्द्रा॑य सुनु॒थ सोम॑म् अद्रयः ।

Halfverse: c    वा॒मंवा॑मं वो दि॒व्याय॒ धाम्ने॒ वसु॑वसु वः॒ पार्थि॑वाय सुन्व॒ते ।।
   वा॒मंवा॑मं वो दि॒व्याय॒ धाम्ने
   वा॒मंवा॑मम् वः दि॒व्याय धाम्ने
   वा॒मंवा॑मं वो दिवि॒याय धाम॑ने

Halfverse: d    वसु॑वसु वः॒ पार्थि॑वाय सुन्व॒ते ।।
   वसु॑वसु वः पार्थि॑वाय सुन्व॒ते ।।
   वसु॑वसु वः पार्थि॑वाय सुन्व॒ते ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.