TITUS
Rg-Veda: Rg-Veda-Samhita
Part No. 915
Previous part

Hymn: 78_(904) 
Verse: 1 
Halfverse: a    विप्रा॑सो॒ न मन्म॑भिः स्वा॒ध्यो॑ देवा॒व्यो॒ न य॒ज्ञैः स्वप्न॑सः ।
   विप्रा॑सो॒ न मन्म॑भिः स्वा॒ध्यो
   विप्रा॑सः न मन्म॑भिः स्वा॒ध्यः
   विप्रा॑सो न मन्म॑भिः सुआ॒धियो

Halfverse: b    देवा॒व्यो॒ न य॒ज्ञैः स्वप्न॑सः ।
   दे॑वा॒व्यः न य॒ज्ञैः स्वप्न॑सः ।
   दे॑वा॒वियो न य॒ज्ञैः सुअप्न॑सः ।

Halfverse: c    राजा॑नो॒ न चि॒त्राः सु॑सं॒दृशः॑ क्षिती॒नां न मर्या॑ अरे॒पसः॑ ।।
   राजा॑नो॒ न चि॒त्राः सु॑सं॒दृशः
   राजा॑नः न चि॒त्राः सु॑सं॒दृशः
   राजा॑नो न चि॒त्राः सु॑सं॒दृशः

Halfverse: d    क्षिती॒नां न मर्या॑ अरे॒पसः॑ ।।
   क्षि॑ती॒नाम् न मर्याः अरे॒पसः ।।
   क्षि॑ती॒नाअं न मर्या अरे॒पसः ।।


Verse: 2 
Halfverse: a    अ॒ग्निर्न ये भ्राज॑सा रु॒क्मव॑क्षसो॒ वाता॑सो॒ न स्व॒युजः॑ सद्यऊतयः ।
   अ॒ग्निर्न ये भ्राज॑सा रु॒क्मव॑क्षसो
   अ॒ग्निः न ये भ्राज॑सा रु॒क्मव॑क्षसः
   अ॒ग्निर् न ये भ्राज॑सा रु॒क्मव॑क्षसो

Halfverse: b    वाता॑सो॒ न स्व॒युजः॑ सद्यऊतयः ।
   वाता॑सः न स्व॒युजः सद्यऊतयः ।
   वाता॑सो न स्व॒युजः सद्यऊतयः ।

Halfverse: c    प्र॑ज्ञा॒तारो॒ न ज्येष्ठाः॑ सुनी॒तयः॑ सु॒शर्मा॑णो॒ न सोमा॑ ऋ॒तं य॒ते ।।
   प्र॑ज्ञा॒तारो॒ न ज्येष्ठाः॑ सुनी॒तयः
   प्रज्ञा॒तारः न ज्येष्ठाः सुनी॒तयः
   प्रज्ञा॒तारो न ज्ययि॑ष्ठाः सुनी॒तयः

Halfverse: d    सु॒शर्मा॑णो॒ न सोमा॑ ऋ॒तं य॒ते ।।
   सु॒शर्मा॑णः न सोमाः ऋ॒तम् य॒ते ।।
   सु॒शर्मा॑णो न सोमा ऋ॒तं य॒ते ।।


Verse: 3 
Halfverse: a    वाता॑सो॒ न ये धुन॑यो जिग॒त्नवो॑ ऽग्नी॒नां न जि॒ह्वा वि॑रो॒किणः॑ ।
   वाता॑सो॒ न ये धुन॑यो जिग॒त्नवो
   वाता॑सः न ये धुन॑यः जिग॒त्नवः
   वाता॑सो न ये धुन॑यो जिग॒त्नवो

Halfverse: b    ऽग्नी॒नां न जि॒ह्वा वि॑रो॒किणः॑ ।
   अ॑ग्नी॒नाम् न जि॒ह्वाः वि॑रो॒किणः ।
   अ॑ग्नी॒नाअं न जि॒ह्वा वि॑रो॒किणः ।

Halfverse: c    वर्म॑ण्वन्तो॒ न यो॒धाः शिमी॑वन्तः पितॄ॒णां न शंसाः॑ सुरा॒तयः॑ ।।
   वर्म॑ण्वन्तो॒ न यो॒धाः शिमी॑वन्तः
   वर्म॑ण्वन्तः न यो॒धाः शिमी॑वन्तः
   वर्म॑ण्वन्तो न यो॒धाः शिमी॑वन्तः

Halfverse: d    पितॄ॒णां न शंसाः॑ सुरा॒तयः॑ ।।
   पि॑तॄ॒णाम् न शंसाः सुरा॒तयः ।।
   पि॑तॄ॒णाअं न शंसाः सुरा॒तयः ।।


Verse: 4 
Halfverse: a    रथा॑नां॒ न ये॒ ऽराः सना॑भयो जिगी॒वांसो॒ न शूरा॑ अ॒भिद्य॑वः ।
   रथा॑नां॒ न ये॒ ऽराः सना॑भयो
   रथा॑नाम् न ये अ॒राः सना॑भयः
   रथा॑नाअं न ये ऽराः सना॑भयो

Halfverse: b    जिगी॒वांसो॒ न शूरा॑ अ॒भिद्य॑वः ।
   जि॑गी॒वांसः न शूराः अ॒भिद्य॑वः ।
   जि॑गी॒वांसो न शूरा अ॒भिद्य॑वः ।

Halfverse: c    व॑रे॒यवो॒ न मर्या॑ घृत॒प्रुषो॑ ऽभिस्व॒र्तारो॑ अ॒र्कं न सु॒ष्टुभः॑ ।।
   व॑रे॒यवो॒ न मर्या॑ घृत॒प्रुषो
   वरे॒यवः न मर्याः घृत॒प्रुषः
   वरे॒यवो न मर्या घृत॒प्रुषो

Halfverse: d    ऽभिस्व॒र्तारो॑ अ॒र्कं न सु॒ष्टुभः॑ ।।
   अ॑भिस्व॒र्तारः अ॒र्कम् न सु॒ष्टुभः ।।
   अ॑भिस्व॒र्तारो अ॒र्कं न सु॒ष्टुभः ।।


Verse: 5 
Halfverse: a    अश्वा॑सो॒ न ये ज्येष्ठा॑स आ॒शवो॑ दिधि॒षवो॒ न र॒थ्यः॑ सु॒दान॑वः ।
   अश्वा॑सो॒ न ये ज्येष्ठा॑स आ॒शवो
   अश्वा॑सः न ये ज्येष्ठा॑सः आ॒शवः
   अश्वा॑सो न ये ज्ययि॑ष्ठास आ॒शवो

Halfverse: b    दिधि॒षवो॒ न र॒थ्यः॑ सु॒दान॑वः ।
   दि॑धि॒षवः न र॒थ्यः सु॒दान॑वः ।
   दि॑धि॒षवो न र॒थियः सु॒दान॑वः ।

Halfverse: c    आपो॒ न नि॒म्नैरु॒दभि॑र्जिग॒त्नवो॑ वि॒श्वरू॑पा॒ अङ्गि॑रसो॒ न साम॑भिः ।।
   आपो॒ न नि॒म्नैरु॒दभि॑र्जिग॒त्नवो
   आपः न नि॒म्नैः उ॒दभिः जिग॒त्नवः
   आपो न नि॒म्नैर् उ॒दभि॑र् जिग॒त्नवो

Halfverse: d    वि॒श्वरू॑पा॒ अङ्गि॑रसो॒ न साम॑भिः ।।
   वि॒श्वरू॑पाः अङ्गि॑रसः न साम॑भिः ।।
   वि॒श्वरू॑पा अङ्गि॑रसो न साम॑भिः ।।


Verse: 6 
Halfverse: a    ग्रावा॑णो॒ न सू॒रयः॒ सिन्धु॑मातर आदर्दि॒रासो॒ अद्र॑यो॒ न वि॒श्वहा॑ ।
   ग्रावा॑णो॒ न सू॒रयः॒ सिन्धु॑मातर
   ग्रावा॑णः न सू॒रयः सिन्धु॑मातरः
   ग्रावा॑णो न सू॒रयः सिन्धु॑मातर

Halfverse: b    आदर्दि॒रासो॒ अद्र॑यो॒ न वि॒श्वहा॑ ।
   आ॑दर्दि॒रासः अद्र॑यः न वि॒श्वहा ।
   आ॑दर्दि॒रासो अद्र॑यो न वि॒श्वहा ।

Halfverse: c    शि॒शूला॒ न क्री॒ळयः॑ सुमा॒तरो॑ महाग्रा॒मो न याम॑न्नु॒त त्वि॒षा ।।
   शि॒शूला॒ न क्री॒ळयः॑ सुमा॒तरो
   शि॒शूलाः न क्री॒ळयः सुमा॒तरः
   शि॒शूला न क्री॒ळयः सुमा॒तरो

Halfverse: d    महाग्रा॒मो न याम॑न्नु॒त त्वि॒षा ।।
   म॑हाग्रा॒मः न याम॑न् उ॒त त्वि॒षा ।।
   म॑हाग्रा॒मो न याम॑न्न् उ॒त त्वि॒षा ।।


Verse: 7 
Halfverse: a    उ॒षसां॒ न के॒तवो॑ ऽध्वर॒श्रियः॑ शुभं॒यवो॒ नाञ्जिभि॒र्व्य॑श्वितन् ।
   उ॒षसां॒ न के॒तवो॑ ऽध्वर॒श्रियः
   उ॒षसा॑म् न के॒तवः अध्वर॒श्रियः
   उ॒षसां न के॒तवो अध्वर॒श्रियः

Halfverse: b    शुभं॒यवो॒ नाञ्जिभि॒र्व्य॑श्वितन् ।
   शु॑भं॒यवः न अ॒ञ्जिभिः वि अ॑श्वितन् ।
   शु॑भं॒यवो न अ॒ञ्जिभि॑र् वि अ॑श्वितन् ।

Halfverse: c    सिन्ध॑वो॒ न य॒यियो॒ भ्राज॑दृष्टयः परा॒वतो॒ न योज॑नानि ममिरे ।।
   सिन्ध॑वो॒ न य॒यियो॒ भ्राज॑दृष्टयः
   सिन्ध॑वः न य॒यियः भ्राज॑दृष्टयः
   सिन्ध॑वो न य॒यियो भ्राज॑दृष्टयः

Halfverse: d    परा॒वतो॒ न योज॑नानि ममिरे ।।
   प॑रा॒वतः न योज॑नानि ममिरे ।।
   प॑रा॒वतो न योज॑नानि ममिरे ।।


Verse: 8 
Halfverse: a    सु॑भा॒गान्नो॑ देवाः कृणुता सु॒रत्ना॑न॒स्मान्स्तो॒तॄन्म॑रुतो वावृधा॒नाः ।
   सु॑भा॒गान्नो॑ देवाः कृणुता सु॒रत्ना॑न्
   सुभा॒गान् नः देवाः कृणुत+ सु॒रत्ना॑न्
   सुभा॒गान् नो देवाः कृणुता सु॒रत्ना॑न्

Halfverse: b    अ॒स्मान्स्तो॒तॄन्म॑रुतो वावृधा॒नाः ।
   अ॒स्मान् स्तो॒तॄन् मरुतः वावृधा॒नाः ।
   अ॒स्मान् स्तो॒तॄन् मरुतो वावृधा॒नाः ।

Halfverse: c    अधि॑ स्तो॒त्रस्य॑ स॒ख्यस्य॑ गात स॒नाद्धि वो॑ रत्न॒धेया॑नि॒ सन्ति॑ ।।
   अधि॑ स्तो॒त्रस्य॑ स॒ख्यस्य॑ गात
   अधि स्तो॒त्रस्य स॒ख्यस्य गात
   अधि स्तो॒त्रस्य सखि॒यस्य गात

Halfverse: d    स॒नाद्धि वो॑ रत्न॒धेया॑नि॒ सन्ति॑ ।।
   स॒नात् हि वः रत्न॒धेया॑नि सन्ति ।।
   स॒नाद् धि वो रत्न॒धेया॑नि सन्ति ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.