TITUS
Rg-Veda: Rg-Veda-Samhita
Part No. 916
Previous part

Hymn: 79_(905) 
Verse: 1 
Halfverse: a    अप॑श्यमस्य मह॒तो म॑हि॒त्वमम॑र्त्यस्य॒ मर्त्या॑सु वि॒क्षु ।
   अप॑श्यमस्य मह॒तो म॑हि॒त्वम्
   अप॑श्यम् अस्य मह॒तः म॑हि॒त्वम्
   अप॑श्यम् अस्य मह॒तो म॑हि॒त्वम्

Halfverse: b    अम॑र्त्यस्य॒ मर्त्या॑सु वि॒क्षु ।
   अम॑र्त्यस्य मर्त्या॑सु वि॒क्षु ।
   अम॑र्तियस्य मर्ति॑यासु वि॒क्षु ।

Halfverse: c    नाना॒ हनू॒ विभृ॑ते॒ सम्भ॑रेते॒ असि॑न्वती॒ बप्स॑ती॒ भूर्य॑त्तः ।।
   नाना॒ हनू॒ विभृ॑ते॒ सम्भ॑रेते
   नाना हनू विभृ॑ते सम् भरेते
   नाना हनू विभृ॑ते सम् भरेते

Halfverse: d    असि॑न्वती॒ बप्स॑ती॒ भूर्य॑त्तः ।।
   असि॑न्वती बप्स॑ती भूरि अत्तः ।।
   असि॑न्वती बप्स॑ती भूरि अत्तः ।।


Verse: 2 
Halfverse: a    गुहा॒ शिरो॒ निहि॑त॒मृध॑ग॒क्षी असि॑न्वन्नत्ति जि॒ह्वया॒ वना॑नि ।
   गुहा॒ शिरो॒ निहि॑त॒मृध॑ग॒क्षी
   गुहा शिरः निहि॑तम् ऋध॑क् अ॒क्षी
   गुहा शिरो निहि॑तम् ऋध॑ग् अ॒क्षी

Halfverse: b    असि॑न्वन्नत्ति जि॒ह्वया॒ वना॑नि ।
   असि॑न्वन् अत्ति जि॒ह्वया वना॑नि ।
   असि॑न्वन्न् अत्ति जि॒ह्वया वना॑नि ।

Halfverse: c    अत्रा॑ण्यस्मै प॒ड्भिः सम्भ॑रन्त्युत्ता॒नह॑स्ता॒ नम॒साधि॑ वि॒क्षु ।।
   अत्रा॑ण्यस्मै प॒ड्भिः सम्भ॑रन्त्य्
   अत्रा॑णि अस्मै प॒ड्भिः सम् भरन्ति
   अत्रा॑णि अस्मै प॒ड्भिः सम् भरन्ति

Halfverse: d    उत्ता॒नह॑स्ता॒ नम॒साधि॑ वि॒क्षु ।।
   उ॑त्ता॒नह॑स्ताः नम॑सा अधि वि॒क्षु ।।
   उ॑त्ता॒नह॑स्ता नम॒साधि वि॒क्षु ।।


Verse: 3 
Halfverse: a    प्र मा॒तुः प्र॑त॒रं गुह्य॑मि॒छन्कु॑मा॒रो न वी॒रुधः॑ सर्पदु॒र्वीः ।
   प्र मा॒तुः प्र॑त॒रं गुह्य॑मि॒छन्
   प्र मा॒तुः प्र॑त॒रम् गुह्य॑म् इ॒छन्
   प्र मा॒तुः प्र॑त॒रं गुहि॑यम् इ॒छन्

Halfverse: b    कुमा॒रो न वी॒रुधः॑ सर्पदु॒र्वीः ।
   कु॑मा॒रः न वी॒रुधः सर्पत् उ॒र्वीः ।
   कु॑मा॒रो न वी॒रुधः सर्पद् उ॒र्वीः ।

Halfverse: c    स॒सं न प॒क्वम॑विदच्छु॒चन्तं॑ रिरि॒ह्वांसं॑ रि॒प उ॒पस्थे॑ अ॒न्तः ।।
   स॒सं न प॒क्वम॑विदच्छु॒चन्तं
   स॒सम् न प॒क्वम् अविदत् शु॒चन्त॑म्
   स॒सं न प॒क्वम् अविदच् छु॒चन्तं

Halfverse: d    रिरि॒ह्वांसं॑ रि॒प उ॒पस्थे॑ अ॒न्तः ।।
   रि॑रि॒ह्वांस॑म् रि॒पः उ॒पस्थे अ॒न्तर् ।।
   रि॑रि॒ह्वांसं रि॒प उ॒पस्थे अ॒न्तः ।।


Verse: 4 
Halfverse: a    तद्वा॑मृ॒तं रो॑दसी॒ प्र ब्र॑वीमि॒ जाय॑मानो मा॒तरा॒ गर्भो॑ अत्ति ।
   तद्वा॑मृ॒तं रो॑दसी॒ प्र ब्र॑वीमि
   तत् वाम् ऋ॒तम् रोदसी प्र ब्र॑वीमि
   तद् वाम् ऋ॒तं रो॑दसी प्र ब्र॑वीमि

Halfverse: b    जाय॑मानो मा॒तरा॒ गर्भो॑ अत्ति ।
   जाय॑मानः मा॒तरा गर्भः अत्ति ।
   जाय॑मानो मा॒तरा गर्भो अत्ति ।

Halfverse: c    नाहं दे॒वस्य॒ मर्त्य॑श्चिकेता॒ग्निर॒ङ्ग विचे॑ताः॒ स प्रचे॑ताः ।।
   नाहं दे॒वस्य॒ मर्त्य॑श्चिकेत
   न अ॒हम् दे॒वस्य मर्त्यः चिकेत
   नाहं दे॒वस्य मर्ति॑यश् चिकेत

Halfverse: d     अ॒ग्निर॒ङ्ग विचे॑ताः॒ स प्रचे॑ताः ।।
   अ॒ग्निः अ॒ङ्ग विचे॑ताः स प्रचे॑ताः ।।
   अ॒ग्निर् अ॒ङ्ग विचे॑ताः स प्रचे॑ताः ।।


Verse: 5 
Halfverse: a    यो अ॒ स्माअन्नं॑ तृ॒ष्वा॒दधा॒त्याज्यै॑र्घृ॒तैर्जु॒होति॒ पुष्य॑ति ।
   यो अ॑स्मा॒ अन्नं॑ तृ॒ष्वा॒दधा॑त्य्
   यः अ॑स्मै अन्न॑म् तृ॒षु आ॒दधा॑ति
   यो अ॑स्मा अन्नं तृ॒षु आ॒दधा॑ति

Halfverse: b    आज्यै॑र्घृ॒तैर्जु॒होति॒ पुष्य॑ति ।
   आज्यैः घृ॒तैः जु॒होति पुष्य॑ति ।
   आजि॑यैर् घृ॒तैर् जु॒होति पुष्य॑ति ।

Halfverse: c    तस्मै॑ स॒हस्र॑म॒क्षभि॒र्वि च॒क्षे ऽग्ने॑ वि॒श्वतः॑ प्र॒त्यङ्ङ॑सि॒ त्वम् ।।
   तस्मै॑ स॒हस्र॑म॒क्षभि॒र्वि च॒क्षे
   तस्मै स॒हस्र॑म् अ॒क्षभिः वि च॑क्षे
   तस्मै स॒हस्र॑म् अ॒क्षभि॑र् वि च॑क्षे

Halfverse: d    ऽग्ने वि॒श्वतः॑ प्र॒त्यङ्ङ॑सि॒ त्वम् ।।
   अग्ने वि॒श्वतः प्र॒त्यङ् असि त्वम् ।।
   अग्ने वि॒श्वतः प्र॒तिअङ्ङ् असि त्वम् ।।


Verse: 6 
Halfverse: a    किं दे॒वेषु॒ त्यज॒ एन॑श्चक॒र्थाग्ने॑ पृ॒छामि॒ नु त्वामवि॑द्वान् ।
   किं दे॒वेषु॒ त्यज॒ एन॑श्चकर्थ
   किम् दे॒वेषु त्यजः एनः चकर्थ
   किं दे॒वेषु त्यज एन॑श् चकर्थ

Halfverse: b     अग्ने॑ पृ॒छामि॒ नु त्वामवि॑द्वान् ।
   अग्ने पृ॒छामि नु त्वाम् अवि॑द्वान् ।
   अग्ने पृ॒छामि नु तु॒वाम् अवि॑द्वान् ।

Halfverse: c    अक्री॑ळ॒न्क्रीळ॒न्हरि॒रत्त॑वे॒ ऽदन्वि प॑र्व॒शश्च॑कर्त॒ गामि॑वा॒सिः ।।
   अक्री॑ळ॒न्क्रीळ॒न्हरि॒रत्त॑वे॒ ऽदन्
   अक्री॑ळन् क्रीळ॑न् हरिः अत्त॑वे अ॒दन्
   अक्री॑ळन् क्रीळ॑न् हरि॑र् अत्त॑वे ऽदन्

Halfverse: d    वि प॑र्व॒शश्च॑कर्त॒ गामि॑वा॒सिः ।।
   वि प॑र्व॒शः च॑कर्त गाम् इव अ॒सिः ।।
   वि प॑र्व॒शश् चकर्त गाम् इवा॒सिः ।।


Verse: 7 
Halfverse: a    विषू॑चो॒ अश्वा॑न्युयुजे वने॒जा ऋजी॑तिभी रश॒नाभि॑र्गृभी॒तान् ।
   विषू॑चो॒ अश्वा॑न्युयुजे वने॒जा
   विषू॑चः अश्वा॑न् युयुजे वने॒जाः
   विषू॑चो अश्वा॑न् युयुजे वने॒जा

Halfverse: b    ऋजी॑तिभी रश॒नाभि॑र्गृभी॒तान् ।
   ऋजी॑तिभिः रश॒नाभिः गृभी॒तान् ।
   ऋजी॑तिभी रश॒नाभि॑र् गृभी॒तान् ।

Halfverse: c    च॑क्ष॒दे मि॒त्रो वसु॑भिः॒ सुजा॑तः॒ समा॑नृधे॒ पर्व॑भिर्वावृधा॒नः ।।
   च॑क्ष॒दे मि॒त्रो वसु॑भिः॒ सुजा॑तः
   चक्ष॒दे मि॒त्रः वसु॑भिः सुजा॑तः
   चक्ष॒दे मि॒त्रो वसु॑भिः सुजा॑तः

Halfverse: d    समा॑नृधे॒ पर्व॑भिर्वावृधा॒नः ।।
   सम् आनृधे पर्व॑भिः वावृधा॒नः ।।
   सम् आनृधे पर्व॑भिर् वावृधा॒नः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.