TITUS
Rg-Veda: Rg-Veda-Samhita
Part No. 920
Previous part

Hymn: 83_(909) 
Verse: 1 
Halfverse: a    यस्ते॑ म॒न्यो ऽवि॑धद्वज्र सायक॒ सह॒ ओजः॑ पुष्यति॒ विश्व॑मानु॒षक् ।
   यस्ते॑ म॒न्यो ऽवि॑धद्वज्र सायक
   यः ते मन्यो अवि॑धत् वज्र सायक
   यस् ते मन्यो अवि॑धद् वज्र सायक

Halfverse: b    सह॒ ओजः॑ पुष्यति॒ विश्व॑मानु॒षक् ।
   सहः ओजः पुष्यति विश्व॑म् आनु॒षक् ।
   सह ओजः पुष्यति विश्व॑म् आनु॒षक् ।

Halfverse: c    सा॒ह्याम॒ दास॒मार्यं॒ त्वया॑ यु॒जा सह॑स्कृतेन॒ सह॑सा॒ सह॑स्वता ।।
   सा॒ह्याम॒ दास॒मार्यं॒ त्वया॑ यु॒जा
   सा॒ह्याम दास॑म् आर्य॑म् त्वया यु॒जा
   सा॒ह्याम दास॑म् आरि॑यं त्वया यु॒जा

Halfverse: d    सह॑स्कृतेन॒ सह॑सा॒ सह॑स्वता ।।
   सह॑स्कृतेन सह॑सा सह॑स्वता ।।
   सह॑स्कृतेन सह॑सा सह॑स्वता ।।


Verse: 2 
Halfverse: a    म॒न्युरिन्द्रो॑ म॒न्युरे॒वास॑ दे॒वो म॒न्युर्होता॒ वरु॑णो जा॒तवे॑दाः ।
   म॒न्युरिन्द्रो॑ म॒न्युरे॒वास॑ दे॒वो
   म॒न्युः इन्द्रः म॒न्युः ए॒व आ॑स दे॒वः
   म॒न्युर् इन्द्रो म॒न्युर् ए॒वास दे॒वो

Halfverse: b    म॒न्युर्होता॒ वरु॑णो जा॒तवे॑दाः ।
   म॒न्युः होता वरु॑णः जा॒तवे॑दाः ।
   म॒न्युर् होता वरु॑णो जा॒तवे॑दाः ।

Halfverse: c    म॒न्युं विश॑ ईळते॒ मानु॑षी॒र्याः पा॒हि नो॑ मन्यो॒ तप॑सा स॒जोषाः॑ ।।
   म॒न्युं विश॑ ईळते॒ मानु॑षी॒र्याः
   म॒न्युम् विशः ईळते मानु॑षीः याः
   म॒न्युं विश ईळते मानु॑षीर् याः

Halfverse: d    पा॒हि नो॑ मन्यो॒ तप॑सा स॒जोषाः॑ ।।
   पा॒हि नः मन्यो तप॑सा स॒जोषाः ।।
   पा॒हि नो मन्यो तप॑सा स॒जोषाः ।।


Verse: 3 
Halfverse: a    अ॒भी॑हि मन्यो त॒वस॒स्तवी॑या॒न्तप॑सा यु॒जा वि ज॑हि॒ शत्रू॑न् ।
   अ॒भी॑हि मन्यो त॒वस॒स्तवी॑यान्
   अ॒भि इ॑हि मन्यो त॒वसः तवी॑यान्
   अ॒भी॑हि मन्यो त॒वस॑स् तवी॑यान्

Halfverse: b    तप॑सा यु॒जा वि ज॑हि॒ शत्रू॑न् ।
   तप॑सा यु॒जा वि ज॑हि शत्रू॑न् ।
   तप॑सा यु॒जा वि ज॑हि शत्रू॑न् ।

Halfverse: c    अ॑मित्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्वं नः॑ ।।
   अ॑मित्र॒हा वृ॑त्र॒हा द॑स्यु॒हा च
   अमित्र॒हा वृ॑त्र॒हा द॑स्यु॒हा च
   अमित्र॒हा वृ॑त्र॒हा द॑स्यु॒हा च

Halfverse: d    विश्वा॒ वसू॒न्या भ॑रा॒ त्वं नः॑ ।।
   विश्वा वसू॑नि आ भ॑र+ त्वम् नः ।।
   विश्वा वसू॑नि आ भ॑रा तु॒वं नः ।।


Verse: 4 
Halfverse: a    त्वं हि म॑न्यो अ॒भिभू॑त्योजाः स्वय॒म्भूर्भामो॑ अभिमातिषा॒हः ।
   त्वं हि म॑न्यो अ॒भिभू॑त्योजाः
   त्वम् हि म॑न्यो अ॒भिभू॑त्योजाः
   तु॒वं हि म॑न्यो अ॒भिभू॑तियोजाः

Halfverse: b    स्वय॒म्भूर्भामो॑ अभिमातिषा॒हः ।
   स्व॑य॒म्भूः भामः अभिमातिषा॒हः ।
   स्व॑य॒म्भूर् भामो अभिमातिषा॒हः ।

Halfverse: c    वि॒श्वच॑र्षणिः॒ सहु॑रिः॒ सहा॑वान॒स्मास्वोजः॒ पृत॑नासु धेहि ।।
   वि॒श्वच॑र्षणिः॒ सहु॑रिः॒ सहा॑वान्
   वि॒श्वच॑र्षणिः सहु॑रिः सहा॑वान्
   वि॒श्वच॑र्षणिः सहु॑रिः सहा॑वान्

Halfverse: d    अ॒स्मास्वोजः॒ पृत॑नासु धेहि ।।
   अ॒स्मासु ओजः पृत॑नासु धेहि ।।
   अ॒स्मासु ओजः पृत॑नासु धेहि ।।


Verse: 5 
Halfverse: a    अ॑भा॒गः सन्नप॒ परे॑तो अस्मि॒ तव॒ क्रत्वा॑ तवि॒षस्य॑ प्रचेतः ।
   अ॑भा॒गः सन्नप॒ परे॑तो अस्मि
   अभा॒गः सन् अप परे॑तः अस्मि
   अभा॒गः सन्न् अप परे॑तो अस्मि

Halfverse: b    तव॒ क्रत्वा॑ तवि॒षस्य॑ प्रचेतः ।
   तव क्रत्वा तवि॒षस्य प्रचेतः ।
   तव क्रत्वा तवि॒षस्य प्रचेतः ।

Halfverse: c    तं त्वा॑ मन्यो अक्र॒तुर्जि॑हीळा॒हं स्वा त॒नूर्ब॑ल॒देया॑य॒ मेहि॑ ।।
   तं त्वा॑ मन्यो अक्र॒तुर्जि॑हीळा॒हं
   तम् त्वा मन्यो अक्र॒तुः जि॑हीळ अ॒हम्
   तं त्वा मन्यो अक्र॒तुर् जिहीळा॒हं

Halfverse: d    स्वा त॒नूर्ब॑ल॒देया॑य॒ मेहि॑ ।।
   स्वा त॒नूः ब॑ल॒देया॑य मा आ इ॑हि ।।
   सु॒वा त॒नूर् बल॒देया॑य मेहि ।।


Verse: 6 
Halfverse: a    अ॒यं ते॑ अ॒स्म्युप॒ मेह्य॒र्वाङ्प्र॑तीची॒नः स॑हुरे विश्वधायः ।
   अ॒यं ते॑ अ॒स्म्युप॒ मेह्य॒र्वाङ्
   अ॒यम् ते अस्मि उप मा आ इ॑हि अ॒र्वाङ्
   अ॒यं ते अस्मि उप मेहि अ॒र्वाङ्

Halfverse: b    प्रतीची॒नः स॑हुरे विश्वधायः ।
   प्र॑तीची॒नः स॑हुरे विश्वधायः ।
   प्र॑तीची॒नः स॑हुरे विश्वधायः ।

Halfverse: c    मन्यो॑ वज्रिन्न॒भि मामा व॑वृत्स्व॒ हना॑व॒ दस्यूँ॑रु॒त बो॑ध्या॒पेः ।।
   मन्यो॑ वज्रिन्न॒भि मामा व॑वृत्स्व
   मन्यो वज्रिन् अ॒भि माम् आ व॑वृत्स्व
   मन्यो वज्रिन्न् अ॒भि माम् आ व॑वृत्स्व

Halfverse: d    हना॑व॒ दस्यूँ॑रु॒त बो॑ध्या॒पेः ।।
   हना॑व दस्यू॑न् उ॒त बो॑धि आ॒पेः ।।
   हना॑व दस्यूँ॑र् उ॒त बो॑धि आ॒पेः ।।


Verse: 7 
Halfverse: a    अ॒भि प्रेहि॑ दक्षिण॒तो भ॑वा॒ मे ऽधा॑ वृ॒त्राणि॑ जङ्घनाव॒ भूरि॑ ।
   अ॒भि प्रेहि॑ दक्षिण॒तो भ॑वा॒ मे
   अ॒भि प्र इ॑हि दक्षिण॒तः भ॑व+ मे
   अ॒भि प्रेहि दक्षिण॒तो भ॑वा मे

Halfverse: b    ऽधा वृ॒त्राणि॑ जङ्घनाव॒ भूरि॑ ।
   अध+ वृ॒त्राणि जङ्घनाव भूरि ।
   अधा वृ॒त्राणि जङ्घनाव भूरि ।

Halfverse: c    जु॒होमि॑ ते ध॒रुण॒म्मध्वो॒ अग्र॑मु॒भा उ॑पां॒शु प्र॑थ॒मा पि॑बाव ।।
   जु॒होमि॑ ते ध॒रुण॒म्मध्वो॒ अग्र॑म्
   जु॒होमि ते ध॒रुण॑म् मध्वः अग्र॑म्
   जु॒होमि ते ध॒रुण॑म् मध्वो अग्र॑म्

Halfverse: d    उ॒भा उ॑पां॒शु प्र॑थ॒मा पि॑बाव ।।
   उ॒भौ उ॑पां॒शु प्र॑थ॒मा पि॑बाव ।।
   उ॒भा उ॑पां॒शु प्र॑थ॒मा पि॑बाव ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.