TITUS
Rg-Veda: Rg-Veda-Samhita
Part No. 926
Previous part

Hymn: 89_(915) 
Verse: 1 
Halfverse: a    इन्द्रं॑ स्तवा॒ नृत॑मं॒ यस्य॑ म॒ह्ना वि॑बबा॒धे रो॑च॒ना वि ज्मो अन्ता॑न् ।
   इन्द्रं॑ स्तवा॒ नृत॑मं॒ यस्य॑ म॒ह्ना
   इन्द्र॑म् स्तवा ! नृत॑मम् यस्य म॒ह्ना
   इन्द्रं स्तवा नृत॑मं यस्य म॒ह्ना

Halfverse: b    वि॑बबा॒धे रो॑च॒ना वि ज्मो अन्ता॑न् ।
   वि॑बबा॒धे रो॑च॒ना वि ज्मः अन्ता॑न् ।
   वि॑बबा॒धे रो॑च॒ना वि ज्मो अन्ता॑न् ।

Halfverse: c    आ यः प॒प्रौ च॑र्षणी॒धृद्वरो॑भिः॒ प्र सिन्धु॑भ्यो रिरिचा॒नो म॑हि॒त्वा ।।
   आ यः प॒प्रौ च॑र्षणी॒धृद्वरो॑भिः
   आ यः प॒प्रौ च॑र्षणी॒धृत् वरो॑भिः
   आ यः प॒प्रौ च॑र्षणी॒धृद् वरो॑भिः

Halfverse: d    प्र सिन्धु॑भ्यो रिरिचा॒नो म॑हि॒त्वा ।।
   प्र सिन्धु॑भ्यः रिरिचा॒नः म॑हि॒त्वा ।।
   प्र सिन्धु॑भ्यो रिरिचा॒नो म॑हि॒त्वा ।।


Verse: 2 
Halfverse: a    स सूर्यः॒ पर्यु॒रू वरां॒स्येन्द्रो॑ ववृत्या॒द्रथ्ये॑व च॒क्रा ।
   स सूर्यः॒ पर्यु॒रू वरां॑स्य्
   स सूर्यः परि उ॒रु+ वरां॑सि
   स सूरि॑यः परि उ॒रू वरां॑सि

Halfverse: b    एन्द्रो॑ ववृत्या॒द्रथ्ये॑व च॒क्रा ।
   आ इन्द्रः ववृत्यात् रथ्या इव च॒क्रा ।
   एन्द्रो ववृत्याद् रथि॑येव च॒क्रा ।

Halfverse: c    अति॑ष्ठन्तमप॒स्यं॒ न सर्गं॑ कृ॒ष्णा तमां॑सि॒ त्विष्या॑ जघान ।।
   अति॑ष्ठन्तमप॒स्यं॒ न सर्गं
   अति॑ष्ठन्तम् अप॒स्य॑म् न सर्ग॑म्
   अति॑ष्ठन्तम् अप॒सियं न सर्गं

Halfverse: d    कृ॒ष्णा तमां॑सि॒ त्विष्या॑ जघान ।।
   कृ॒ष्णा तमां॑सि त्विष्या जघान ।।
   कृ॒ष्णा तमां॑सि त्विषि॑या जघान ।।


Verse: 3 
Halfverse: a    स॑मा॒नम॑स्मा॒ अन॑पावृदर्च क्ष्म॒या दि॒वो अस॑म॒म्ब्रह्म॒ नव्य॑म् ।
   स॑मा॒नम॑स्मा॒ अन॑पावृदर्च
   समा॒नम् अस्मै अन॑पावृत् अर्च
   समा॒नम् अस्मा अन॑पावृद् अर्च

Halfverse: b    क्ष्म॒या दि॒वो अस॑म॒म्ब्रह्म॒ नव्य॑म् ।
   क्ष्म॒या दि॒वः अस॑मम् ब्रह्म नव्य॑म् ।
   क्ष्म॒या दि॒वो अस॑मम् ब्रह्म नव्य॑म् ।

Halfverse: c    वि यः पृ॒ष्ठेव॒ जनि॑मान्य॒र्य इन्द्र॑श्चि॒काय॒ न सखा॑यमी॒षे ।।
   वि यः पृ॒ष्ठेव॒ जनि॑मान्य॒र्य
   वि यः पृ॒ष्ठा इ॑व जनि॑मानि अ॒र्यः
   वि यः पृ॒ष्ठेव जनि॑मानि अ॒र्य

Halfverse: d    इन्द्र॑श्चि॒काय॒ न सखा॑यमी॒षे ।।
   इन्द्रः चि॒काय न सखा॑यम् ई॒षे ।।
   इन्द्र॑श् चि॒काय न सखा॑यम् ई॒षे ।।


Verse: 4 
Halfverse: a    इन्द्रा॑य॒ गिरो॒ अनि॑शितसर्गा अ॒पः प्रेर॑यं॒ सग॑रस्य बु॒ध्नात् ।
   इन्द्रा॑य॒ गिरो॒ अनि॑शितसर्गा
   इन्द्रा॑य गिरः अनि॑शितसर्गाः
   इन्द्रा॑य गिरो अनि॑शितसर्गा

Halfverse: b    अ॒पः प्रेर॑यं॒ सग॑रस्य बु॒ध्नात् ।
   अ॒पः प्र ई॑रयम् सग॑रस्य बु॒ध्नात् ।
   अ॒पः प्रेर॑यं सग॑रस्य बु॒ध्नात् ।

Halfverse: c    यो अक्षे॑णेव च॒क्रिया॒ शची॑भि॒र्विष्व॑क्त॒स्तम्भ॑ पृथि॒वीमु॒त द्याम् ।।
   यो अक्षे॑णेव च॒क्रिया॒ शची॑भिर्
   यः अक्षे॑ण इव च॒क्रिया शची॑भिः
   यो अक्षे॑णेव च॒क्रिया शची॑भिर्

Halfverse: d    विष्व॑क्त॒स्तम्भ॑ पृथि॒वीमु॒त द्याम् ।।
   विष्व॑क् त॒स्तम्भ पृथि॒वीम् उ॒त द्याम् ।।
   विष्व॑क् त॒स्तम्भ पृथि॒वीम् उ॒त द्याम् ।।


Verse: 5 
Halfverse: a    आपा॑न्तमन्युस्तृ॒पल॑प्रभर्मा॒ धुनिः॒ शिमी॑वा॒ञ्छरु॑माँ ऋजी॒षी ।
   आपा॑न्तमन्युस्तृ॒पल॑प्रभर्मा
   आपा॑न्तमन्युः तृ॒पल॑प्रभर्मा
   आपा॑न्तमन्युस् तृ॒पल॑प्रभर्मा

Halfverse: b    धुनिः॒ शिमी॑वा॒ञ्छरु॑माँ ऋजी॒षी ।
   धुनिः शिमी॑वान् शरु॑मान् ऋजी॒षी ।
   धुनिः शिमी॑वाञ् छरु॑माँ ऋजी॒षी ।

Halfverse: c    सोमो॒ विश्वा॑न्यत॒सा वना॑नि॒ नार्वागिन्द्र॑म्प्रति॒माना॑नि देभुः ।।
   सोमो॒ विश्वा॑न्यत॒सा वना॑नि
   सोमः विश्वा॑नि अत॒सा वना॑नि
   सोमो विश्वा॑नि अत॒सा वना॑नि

Halfverse: d    नार्वागिन्द्र॑म्प्रति॒माना॑नि देभुः ।।
   न अ॒र्वाक् इन्द्र॑म् प्रति॒माना॑नि देभुः ।।
   नार्वाग् इन्द्र॑म् प्रति॒माना॑नि देभुः ।।


Verse: 6 
Halfverse: a    न यस्य॒ द्यावा॑पृथि॒वी न धन्व॒ नान्तरि॑क्षं॒ नाद्र॑यः॒ सोमो॑ अक्षाः ।
   न यस्य॒ द्यावा॑पृथि॒वी न धन्व
   न यस्य द्यावा॑पृथि॒वी न धन्व
   न यस्य द्यावा॑पृथि॒वी न धन्व

Halfverse: b    नान्तरि॑क्षं॒ नाद्र॑यः॒ सोमो॑ अक्षाः ।
   न अ॒न्तरि॑क्षम् न अद्र॑यः सोमः अक्षार् ।
   नान्तरि॑क्षं नाद्र॑यः सोमो अक्षाः ।

Halfverse: c    यद॑स्य म॒न्युर॑धिनी॒यमा॑नः शृ॒णाति॑ वी॒ळु रु॒जति॑ स्थि॒राणि॑ ।।
   यद॑स्य म॒न्युर॑धिनी॒यमा॑नः
   यत् अस्य म॒न्युः अ॑धिनी॒यमा॑नः
   यद् अस्य म॒न्युर् अधिनी॒यमा॑नः

Halfverse: d    शृ॒णाति॑ वी॒ळु रु॒जति॑ स्थि॒राणि॑ ।।
   शृ॒णाति वी॒ळु रु॒जति स्थि॒राणि ।।
   शृ॒णाति वी॒ळु रु॒जति स्थि॒राणि ।।


Verse: 7 
Halfverse: a    ज॒घान॑ वृ॒त्रं स्वधि॑ति॒र्वने॑व रु॒रोज॒ पुरो॒ अर॑द॒न्न सिन्धू॑न् ।
   ज॒घान॑ वृ॒त्रं स्वधि॑ति॒र्वने॑व
   ज॒घान वृ॒त्रम् स्वधि॑तिः वना इव
   ज॒घान वृ॒त्रं स्वधि॑तिर् वने॑व

Halfverse: b    रु॒रोज॒ पुरो॒ अर॑द॒न्न सिन्धू॑न् ।
   रु॒रोज पुरः अर॑दत् न सिन्धू॑न् ।
   रु॒रोज पुरो अर॑दन् न सिन्धू॑न् ।

Halfverse: c    बि॒भेद॑ गि॒रिं नव॒मिन्न कु॒म्भमा गा इन्द्रो॑ अकृणुत स्व॒युग्भिः॑ ।।
   बि॒भेद॑ गि॒रिं नव॒मिन्न कु॒म्भम्
   बि॒भेद गि॒रिम् नव॑म् इत् न कु॒म्भम्
   बि॒भेद गि॒रिं नव॑म् इन् न कु॒म्भम्

Halfverse: d    आ गा इन्द्रो॑ अकृणुत स्व॒युग्भिः॑ ।।
   आ गाः इन्द्रः अकृणुत स्व॒युग्भिः ।।
   आ गा इन्द्रो अकृणुत स्व॒युग्भिः ।।


Verse: 8 
Halfverse: a    त्वं ह॒ त्यदृ॑ण॒या इ॑न्द्र॒ धीरो॒ ऽसिर्न पर्व॑ वृजि॒ना शृ॑णासि ।
   त्वं ह॒ त्यदृ॑ण॒या इ॑न्द्र॒ धीरो
   त्वम् ह त्यत् ऋण॒याः इ॑न्द्र धीरः
   तु॒वं ह त्यद् ऋण॒या इ॑न्द्र धीरो

Halfverse: b    ऽसिर्न पर्व॑ वृजि॒ना शृ॑णासि ।
   अ॒सिः न पर्व वृजि॒ना शृ॑णासि ।
   अ॒सिर् न पर्व वृजि॒ना शृ॑णासि ।

Halfverse: c    प्र ये मि॒त्रस्य॒ वरु॑णस्य॒ धाम॒ युजं॒ न जना॑ मि॒नन्ति॑ मि॒त्रम् ।।
   प्र ये मि॒त्रस्य॒ वरु॑णस्य॒ धाम
   प्र ये मि॒त्रस्य वरु॑णस्य धाम
   प्र ये मि॒त्रस्य वरु॑णस्य धाम

Halfverse: d    युजं॒ न जना॑ मि॒नन्ति॑ मि॒त्रम् ।।
   युज॑म् न जनाः मि॒नन्ति मि॒त्रम् ।।
   युजं न जना मि॒नन्ति मि॒त्रम् ।।


Verse: 9 
Halfverse: a    प्र ये मि॒त्रम्प्रार्य॒मणं॑ दु॒रेवाः॒ प्र सं॒गिरः॒ प्र वरु॑णम्मि॒नन्ति॑ ।
   प्र ये मि॒त्रम्प्रार्य॒मणं॑ दु॒रेवाः
   प्र ये मि॒त्रम् प्र अ॑र्य॒मण॑म् दु॒रेवाः
   प्र ये मि॒त्रम् प्रार्य॒मणं दु॒रेवाः

Halfverse: b    प्र सं॒गिरः॒ प्र वरु॑णम्मि॒नन्ति॑ ।
   प्र सं॒गिरः प्र वरु॑णम् मि॒नन्ति ।
   प्र सं॒गिरः प्र वरु॑णम् मि॒नन्ति ।

Halfverse: c    न्य॒मित्रे॑षु व॒धमि॑न्द्र॒ तुम्रं॒ वृष॒न्वृषा॑णमरु॒षं शि॑शीहि ।।
   न्य॒मित्रे॑षु व॒धमि॑न्द्र॒ तुम्रं
   नि अ॒मित्रे॑षु व॒धम् इन्द्र तुम्र॑म्
   नि अ॒मित्रे॑षु व॒धम् इन्द्र तुम्रं

Halfverse: d    वृष॒न्वृषा॑णमरु॒षं शि॑शीहि ।।
   वृष॑न् वृषा॑णम् अरु॒षम् शिशीहि ।।
   वृष॑न् वृषा॑णम् अरु॒षं शि॑शीहि ।।


Verse: 10 
Halfverse: a    इन्द्रो॑ दि॒व इन्द्र॑ ईशे पृथि॒व्या इन्द्रो॑ अ॒पामिन्द्र॒ इत्पर्व॑तानाम् ।
   इन्द्रो॑ दि॒व इन्द्र॑ ईशे पृथि॒व्या
   इन्द्रः दि॒वः इन्द्रः ईशे पृथि॒व्याः
   इन्द्रो दि॒व इन्द्र ईशे पृथि॒व्या

Halfverse: b    इन्द्रो॑ अ॒पामिन्द्र॒ इत्पर्व॑तानाम् ।
   इन्द्रः अ॒पाम् इन्द्रः इत् पर्व॑तानाम् ।
   इन्द्रो अ॒पाम् इन्द्र इत् पर्व॑तानाम् ।

Halfverse: c    इन्द्रो॑ वृ॒धामिन्द्र॒ इन्मेधि॑राणा॒मिन्द्रः॒ क्षेमे॒ योगे॒ हव्य॒ इन्द्रः॑ ।।
   इन्द्रो॑ वृ॒धामिन्द्र॒ इन्मेधि॑राणाम्
   इन्द्रः वृ॒धाम् इन्द्रः इत् मेधि॑राणाम्
   इन्द्रो वृ॒धाम् इन्द्र इन् मेधि॑राणाम्

Halfverse: d    इन्द्रः॒ क्षेमे॒ योगे॒ हव्य॒ इन्द्रः॑ ।।
   इन्द्रः क्षेमे योगे हव्यः इन्द्रः ।।
   इन्द्रः क्षेमे योगे हवि॑य इन्द्रः ।।


Verse: 11 
Halfverse: a    प्राक्तुभ्य॒ इन्द्रः॒ प्र वृ॒धो अह॑भ्यः॒ प्रान्तरि॑क्षा॒त्प्र स॑मु॒द्रस्य॑ धा॒सेः ।
   प्राक्तुभ्य॒ इन्द्रः॒ प्र वृ॒धो अह॑भ्यः
   प्र अ॒क्तुभ्यः इन्द्रः प्र वृ॒धः अह॑भ्यः
   प्राक्तुभ्य इन्द्रः प्र वृ॒धो अह॑भ्यः

Halfverse: b    प्रान्तरि॑क्षा॒त्प्र स॑मु॒द्रस्य॑ धा॒सेः ।
   प्र अ॒न्तरि॑क्षात् प्र स॑मु॒द्रस्य धा॒सेः ।
   प्रान्तरि॑क्षात् प्र स॑मु॒द्रस्य धा॒सेः ।

Halfverse: c    प्र वात॑स्य॒ प्रथ॑सः॒ प्र ज्मो अन्ता॒त्प्र सिन्धु॑भ्यो रिरिचे॒ प्र क्षि॒तिभ्यः॑ ।।
   प्र वात॑स्य॒ प्रथ॑सः॒ प्र ज्मो अन्ता॑त्
   प्र वात॑स्य प्रथ॑सः प्र ज्मः अन्ता॑त्
   प्र वात॑स्य प्रथ॑सः प्र ज्मो अन्ता॑त्

Halfverse: d    प्र सिन्धु॑भ्यो रिरिचे॒ प्र क्षि॒तिभ्यः॑ ।।
   प्र सिन्धु॑भ्यः रिरिचे प्र क्षि॒तिभ्यः ।।
   प्र सिन्धु॑भ्यो रिरिचे प्र क्षि॒तिभ्यः ।।


Verse: 12 
Halfverse: a    प्र शोशु॑चत्या उ॒षसो॒ न के॒तुर॑सि॒न्वा ते॑ वर्ततामिन्द्र हे॒तिः ।
   प्र शोशु॑चत्या उ॒षसो॒ न के॒तुर्
   प्र शोशु॑चत्याः उ॒षसः न के॒तुः
   प्र शोशु॑चत्या उ॒षसो न के॒तुर्

Halfverse: b    असि॒न्वा ते॑ वर्ततामिन्द्र हे॒तिः ।
   अ॑सि॒न्वा ते वर्तताम् इन्द्र हे॒तिः ।
   अ॑सि॒न्वा ते वर्तताम् इन्द्र हे॒तिः ।

Halfverse: c    अश्मे॑व विध्य दि॒व आ सृ॑जा॒नस्तपि॑ष्ठेन॒ हेष॑सा॒ द्रोघ॑मित्रान् ।।
   अश्मे॑व विध्य दि॒व आ सृ॑जा॒नस्
   अश्मा इव विध्य दि॒वः आ सृ॑जा॒नः
   अश्मे॑व विध्य दि॒व आ सृ॑जा॒नस्

Halfverse: d    तपि॑ष्ठेन॒ हेष॑सा॒ द्रोघ॑मित्रान् ।।
   तपि॑ष्ठेन हेष॑सा द्रोघ॑मित्रान् ।।
   तपि॑ष्ठेन हेष॑सा द्रोघ॑मित्रान् ।।


Verse: 13 
Halfverse: a    अन्वह॒ मासा॒ अन्विद्वना॒न्यन्वोष॑धी॒रनु॒ पर्व॑तासः ।
   अन्वह॒ मासा॒ अन्विद्वना॑न्य्
   अनु अह मासाः अनु इत् वना॑नि
   अन्व् अह मासा अनु इद् वना॑नि

Halfverse: b    अन्वोष॑धी॒रनु॒ पर्व॑तासः ।
   अनु ओष॑धीः अनु पर्व॑तासः ।
   अनु ओष॑धीर् अनु पर्व॑तासः ।

Halfverse: c    अन्विन्द्रं॒ रोद॑सी वावशा॒ने अन्वापो॑ अजिहत॒ जाय॑मानम् ।।
   अन्विन्द्रं॒ रोद॑सी वावशा॒ने
   अनु इन्द्र॑म् रोद॑सी वावशा॒ने
   अनु इन्द्रं रोद॑सी वावशा॒ने

Halfverse: d    अन्वापो॑ अजिहत॒ जाय॑मानम् ।।
   अनु आपः अजिहत जाय॑मानम् ।।
   अन्व् आपो अजिहत जाय॑मानम् ।।


Verse: 14 
Halfverse: a    कर्हि॑ स्वि॒त्सा त॑ इन्द्र चे॒त्यास॑द॒घस्य॒ यद्भि॒नदो॒ रक्ष॒ एष॑त् ।
   कर्हि॑ स्वि॒त्सा त॑ इन्द्र चे॒त्यास॑द्
   कर्हि स्वित् सा ते इन्द्र चे॒त्या अ॑सत्
   कर्हि स्वित् सा त इन्द्र चेति॒यास॑द्

Halfverse: b    अ॒घस्य॒ यद्भि॒नदो॒ रक्ष॒ एष॑त् ।
   अ॒घस्य यत् भि॒नदः रक्षः एष॑त् ।
   अ॒घस्य यद् भि॒नदो रक्ष एष॑त् ।

Halfverse: c    मि॑त्र॒क्रुवो॒ यच्छस॑ने॒ न गावः॑ पृथि॒व्या आ॒पृग॑मु॒या शय॑न्ते ।।
   मि॑त्र॒क्रुवो॒ यच्छस॑ने॒ न गावः
   मित्र॒क्रुवः यत् शस॑ने न गावः
   मित्र॒क्रुवो यच् छस॑ने न गावः

Halfverse: d    पृथि॒व्या आ॒पृग॑मु॒या शय॑न्ते ।।
   पृ॑थि॒व्याः आ॒पृक् अमु॒या शय॑न्ते ।।
   पृ॑थि॒व्या आ॒पृग् अमु॒या शय॑न्ते ।।


Verse: 15 
Halfverse: a    श॑त्रू॒यन्तो॑ अ॒भि ये न॑स्तत॒स्रे महि॒ व्राध॑न्त ओग॒णास॑ इन्द्र ।
   श॑त्रू॒यन्तो॑ अ॒भि ये न॑स्तत॒स्रे
   श॑त्रू॒यन्तः अ॒भि ये नः तत॒स्रे
   श॑त्रू॒यन्तो अ॒भि ये न॑स् तत॒स्रे

Halfverse: b    महि॒ व्राध॑न्त ओग॒णास॑ इन्द्र ।
   महि व्राध॑न्तः ओग॒णासः इन्द्र ।
   महि व्राध॑न्त ओग॒णास इन्द्र ।

Halfverse: c    अ॒न्धेना॒मित्रा॒स्तम॑सा सचन्तां सुज्यो॒तिषो॑ अ॒क्तव॒स्ताँ अ॒भि ष्युः॑ ।।
   अ॒न्धेना॒मित्रा॒स्तम॑सा सचन्तां
   अ॒न्धेन अ॒मित्राः तम॑सा सचन्ताम्
   अ॒न्धेना॒मित्रा॑स् तम॑सा सचन्तां

Halfverse: d    सुज्यो॒तिषो॑ अ॒क्तव॒स्ताँ अ॒भि ष्युः॑ ।।
   सु॑ज्यो॒तिषः अ॒क्तवः तान् अ॒भि स्युः ।।
   सु॑ज्यो॒तिषो अ॒क्तव॑स् ताँ अ॒भि ष्युः ।।


Verse: 16 
Halfverse: a    पु॒रूणि॒ हि त्वा॒ सव॑ना॒ जना॑ना॒म्ब्रह्मा॑णि॒ मन्द॑न्गृण॒तामृषी॑णाम् ।
   पु॒रूणि॒ हि त्वा॒ सव॑ना॒ जना॑नाम्
   पु॒रूणि हि त्वा सव॑ना जना॑नाम्
   पु॒रूणि हि त्वा सव॑ना जना॑नाम्

Halfverse: b    ब्रह्मा॑णि॒ मन्द॑न्गृण॒तामृषी॑णाम् ।
   ब्रह्मा॑णि मन्द॑न् गृण॒ताम् ऋषी॑णाम् ।
   ब्रह्मा॑णि मन्द॑न् गृण॒ताम् ऋषी॑णाम् ।

Halfverse: c    इ॒मामा॒घोष॒न्नव॑सा॒ सहू॑तिं ति॒रो विश्वाँ॒ अर्च॑तो याह्य॒र्वाङ् ।।
   इ॒मामा॒घोष॒न्नव॑सा॒ सहू॑तिं
   इ॒माम् आ॒घोष॑न् अव॑सा सहू॑तिम्
   इ॒माम् आ॒घोष॑न्न् अव॑सा सहू॑तिं

Halfverse: d    ति॒रो विश्वाँ॒ अर्च॑तो याह्य॒र्वाङ् ।।
   ति॒रः विश्वा॑न् अर्च॑तः याहि अ॒र्वाङ् ।।
   ति॒रो विश्वाँ अर्च॑तो याहि अ॒र्वाङ् ।।


Verse: 17 
Halfverse: a    ए॒वा ते॑ व॒यमि॑न्द्र भुञ्जती॒नां वि॒द्याम॑ सुमती॒नां नवा॑नाम् ।
   ए॒वा ते॑ व॒यमि॑न्द्र भुञ्जती॒नां
   ए॒व+ ते व॒यम् इन्द्र भुञ्जती॒नाम्
   ए॒वा ते व॒यम् इन्द्र भुञ्जती॒नां

Halfverse: b    वि॒द्याम॑ सुमती॒नां नवा॑नाम् ।
   वि॒द्याम सुमती॒नाम् नवा॑नाम् ।
   वि॒द्याम ? सुमती॒नां नवा॑नाम् ।

Halfverse: c    वि॒द्याम॒ वस्तो॒रव॑सा गृ॒णन्तो॑ वि॒श्वामि॑त्रा उ॒त त॑ इन्द्र नू॒नम् ।।
   वि॒द्याम॒ वस्तो॒रव॑सा गृ॒णन्तो
   वि॒द्याम वस्तोः अव॑सा गृ॒णन्तः
   वि॒द्याम वस्तो॑र् अव॑सा गृ॒णन्तो

Halfverse: d    वि॒श्वामि॑त्रा उ॒त त॑ इन्द्र नू॒नम् ।।
   वि॒श्वामि॑त्राः उ॒त ते इन्द्र नू॒नम् ।।
   वि॒श्वामि॑त्रा उ॒त त इन्द्र नू॒नम् ।।


Verse: 18 
Halfverse: a    शु॒नं हु॑वेम म॒घवा॑न॒मिन्द्र॑म॒स्मिन्भरे॒ नृत॑मं॒ वाज॑सातौ ।
   शु॒नं हु॑वेम म॒घवा॑न॒मिन्द्र॑म्
   शु॒नम् हुवेम म॒घवा॑नम् इन्द्र॑म्
   शु॒नं हु॑वेम म॒घवा॑नम् इन्द्र॑म्

Halfverse: b    अ॒स्मिन्भरे॒ नृत॑मं॒ वाज॑सातौ ।
   अ॒स्मिन् भरे नृत॑मम् वाज॑सातौ ।
   अ॒स्मिन् भरे नृत॑मं वाज॑सातौ ।

Halfverse: c    शृ॒ण्वन्त॑मु॒ग्रमू॒तये॑ स॒मत्सु॒ घ्नन्तं॑ वृ॒त्राणि॑ सं॒जितं॒ धना॑नाम् ।।
   शृ॒ण्वन्त॑मु॒ग्रमू॒तये॑ स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु
   शृ॒ण्वन्त॑म् उ॒ग्रम् ऊ॒तये स॒मत्सु

Halfverse: d    घ्नन्तं॑ वृ॒त्राणि॑ सं॒जितं॒ धना॑नाम् ।।
   घ्नन्त॑म् वृ॒त्राणि सं॒जित॑म् धना॑नाम् ।।
   घ्नन्तं वृ॒त्राणि सं॒जितं धना॑नाम् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.