TITUS
Rg-Veda: Rg-Veda-Samhita
Part No. 927
Previous part

Hymn: 90_(916) 
Verse: 1 
Halfverse: a    स॒हस्र॑शीर्षा॒ पुरु॑षः सहस्रा॒क्षः स॒हस्र॑पात् ।
   स॒हस्र॑शीर्षा॒ पुरु॑षः
   स॒हस्र॑शीर्षा पुरु॑षः
   स॒हस्र॑शीर्षा पुरु॑षः

Halfverse: b    सहस्रा॒क्षः स॒हस्र॑पात् ।
   स॑हस्रा॒क्षः स॒हस्र॑पात् ।
   स॑हस्रा॒क्षः स॒हस्र॑पात् ।

Halfverse: c    स भूमिं॑ वि॒श्वतो॑ वृ॒त्वात्य॑तिष्ठद्दशाङ्गु॒लम् ।।
   स भूमिं॑ वि॒श्वतो॑ वृ॒त्वा
   स भूमि॑म् वि॒श्वतः वृ॒त्वा
   स भूमिं वि॒श्वतो वृ॒त्वा

Halfverse: d     अत्य॑तिष्ठद्दशाङ्गु॒लम् ।।
   अति अतिष्ठत् दशाङ्गु॒लम् ।।
   अत्य् अतिष्ठद् दशाङ्गु॒लम् ।।


Verse: 2 
Halfverse: a    पुरु॑ष ए॒वेदं सर्वं॒ यद्भू॒तं यच्च॒ भव्य॑म् ।
   पुरु॑ष ए॒वेदं सर्वं
   पुरु॑षः ए॒व इ॒दम् सर्व॑म्
   पुरु॑ष ए॒वेदं सर्वं

Halfverse: b    यद्भू॒तं यच्च॒ भव्य॑म् ।
   यत् भू॒तम् यत् च भव्य॑म् ।
   यद् भू॒तं यच् च भवि॑यम् ।

Halfverse: c    उ॒तामृ॑त॒त्वस्येशा॑नो॒ यदन्ने॑नाति॒रोह॑ति ।।
   उ॒तामृ॑त॒त्वस्येशा॑नो
   उ॒त अ॑मृत॒त्वस्य ईशा॑नः
   उ॒तामृ॑त॒त्वस्येशा॑नो

Halfverse: d    यदन्ने॑नाति॒रोह॑ति ।।
   यत् अन्ने॑न अति॒रोह॑ति ।।
   यद् अन्ने॑नाति॒रोह॑ति ।।


Verse: 3 
Halfverse: a    ए॒तावा॑नस्य महि॒मातो॒ ज्यायां॑श्च॒ पूरु॑षः ।
   ए॒तावा॑नस्य महि॒मा
   ए॒तावा॑न् अस्य महि॒मा
   ए॒तावा॑न् अस्य महि॒मा

Halfverse: b     अतो॒ ज्यायां॑श्च॒ पूरु॑षः ।
   अतः ज्याया॑न् च पूरु॑षः ।
   अतो ज्यायां॑श् च पूरु॑षः ।

Halfverse: c    पादो॑ ऽस्य॒ विश्वा॑ भू॒तानि॑ त्रि॒पाद॑स्या॒मृतं॑ दि॒वि ।।
   पादो॑ ऽस्य॒ विश्वा॑ भू॒तानि
   पादः अस्य विश्वा भू॒तानि
   पादो ऽस्य विश्वा भू॒तानि

Halfverse: d    त्रि॒पाद॑स्या॒मृतं॑ दि॒वि ।।
   त्रि॒पात् अस्य अ॒मृत॑म् दि॒वि ।।
   त्रि॒पाद् अस्या॒मृतं दि॒वि ।।


Verse: 4 
Halfverse: a    त्रि॒पादू॒र्ध्व उऐ॒त्पुरु॑षः॒ पादो॑ ऽस्ये॒हाभ॑व॒त्पुनः॑ ।
   त्रि॒पादू॒र्ध्व उऐ॒त्पुरु॑षः
   त्रि॒पात् ऊ॒र्ध्वः उत् ऐत् पुरु॑षः
   त्रि॒पाद् ऊ॒र्ध्व उद् ऐत् पुरु॑षः

Halfverse: b    पादो॑ ऽस्ये॒हाभ॑व॒त्पुनः॑ ।
   पादः अस्य इ॒ह अ॑भवत् पुन॑र् ।
   पादो ऽस्ये॒हाभ॑वत् पुनः ।

Halfverse: c    ततो॒ विष्व॒ङ्व्य॑क्रामत्साशनानश॒ने अ॒भि ।।
   ततो॒ विष्व॒ङ्व्य॑क्रामत्
   ततः विष्व॑ङ् वि अ॑क्रामत्
   ततो विष्व॑ङ् वि अ॑क्रामत्

Halfverse: d    साशनानश॒ने अ॒भि ।।
   सा॑शनानश॒ने अ॒भि ।।
   सा॑शनानश॒ने अ॒भि ।।


Verse: 5 
Halfverse: a    तस्मा॑द्वि॒राळ॑जायत वि॒राजो॒ अधि॒ पूरु॑षः ।
   तस्मा॑द्वि॒राळ॑जायत
   तस्मा॑त् वि॒राट् अजायत
   तस्मा॑द् वि॒राळ् अजायत

Halfverse: b    वि॒राजो॒ अधि॒ पूरु॑षः ।
   वि॒राजः अधि पूरु॑षः ।
   वि॒राजो अधि पूरु॑षः ।

Halfverse: c    स जा॒तो अत्य॑रिच्यत प॒श्चाद्भूमि॒मथो॑ पु॒रः ।।
   स जा॒तो अत्य॑रिच्यत
   स जा॒तः अति अरिच्यत
   स जा॒तो अत्य् अरिच्यत

Halfverse: d    प॒श्चाद्भूमि॒मथो॑ पु॒रः ।।
   प॒श्चात् भूमि॑म् अथ उ पु॒रः ।।
   प॒श्चाद् भूमि॑म् अथो पु॒रः ।।


Verse: 6 
Halfverse: a    यत्पुरु॑षेण ह॒विषा॑ दे॒वा य॒ज्ञमत॑न्वत ।
   यत्पुरु॑षेण ह॒विषा
   यत् पुरु॑षेण ह॒विषा
   यत् पुरु॑षेण ह॒विषा

Halfverse: b    दे॒वा य॒ज्ञमत॑न्वत ।
   दे॒वाः य॒ज्ञम् अत॑न्वत ।
   दे॒वा य॒ज्ञम् अत॑न्वत ।

Halfverse: c    व॑स॒न्तो अ॑स्यासी॒दाज्यं॑ ग्री॒ष्म इ॒ध्मः श॒रद्ध॒विः ।।
   व॑स॒न्तो अ॑स्यासी॒दाज्यं
   वस॒न्तः अ॑स्य आसीत् आज्य॑म्
   वस॒न्तो अ॑स्यासीद् आज्यं

Halfverse: d    ग्री॒ष्म इ॒ध्मः श॒रद्ध॒विः ।।
   ग्री॒ष्मः इ॒ध्मः श॒रत् ह॒विः ।।
   ग्री॒ष्म इ॒ध्मः श॒रद् ध॒विः ।।


Verse: 7 
Halfverse: a    तं य॒ज्ञम्ब॒र्हिषि॒ प्रौक्ष॒न्पुरु॑षं जा॒तम॑ग्र॒तः ।
   तं य॒ज्ञम्ब॒र्हिषि॒ प्रौक्ष॑न्
   तम् य॒ज्ञम् ब॒र्हिषि प्र औ॑क्षन्
   तं य॒ज्ञम् ब॒र्हिषि प्रौक्ष॑न्

Halfverse: b    पुरु॑षं जा॒तम॑ग्र॒तः ।
   पुरु॑षम् जा॒तम् अग्र॒तः ।
   पुरु॑षं जा॒तम् अग्र॒तः ।

Halfverse: c    तेन॑ दे॒वा अ॑यजन्त सा॒ध्या ऋष॑यश्च॒ ये ।।
   तेन॑ दे॒वा अ॑यजन्त
   तेन दे॒वाः अ॑यजन्त
   तेन दे॒वा अ॑यजन्त

Halfverse: d    सा॒ध्या ऋष॑यश्च॒ ये ।।
   सा॒ध्याः ऋष॑यः च ये ।।
   सा॑धि॒या ऋष॑यश् च ये ।।


Verse: 8 
Halfverse: a    तस्मा॑द्य॒ज्ञात्स॑र्व॒हुतः॒ सम्भृ॑तम्पृषदा॒ज्यम् ।
   तस्मा॑द्य॒ज्ञात्स॑र्व॒हुतः
   तस्मा॑त् य॒ज्ञात् सर्व॒हुतः
   तस्मा॑द् य॒ज्ञात् सर्व॒हुतः

Halfverse: b    सम्भृ॑तम्पृषदा॒ज्यम् ।
   सम्भृ॑तम् पृषदा॒ज्यम् ।
   सम्भृ॑तम् पृषदाजि॒यम् ।

Halfverse: c    प॒शून्तांश्च॑क्रे वाय॒व्या॑नार॒ण्यान्ग्रा॒म्याश्च॒ ये ।।
   प॒शून्तांश्च॑क्रे वाय॒व्या॑न्
   प॒शून् तान् चक्रे वाय॒व्या॑न्
   प॒शून् तांश् चक्रे वाय॒व्या॑न्

Halfverse: d    आर॒ण्यान्ग्रा॒म्याश्च॒ ये ।।
   आ॑र॒ण्यान् ग्रा॒म्याः च ये ।।
   आ॑र॒ण्यान् ग्रामि॒याश् च ये ।।


Verse: 9 
Halfverse: a    तस्मा॑द्य॒ज्ञात्स॑र्व॒हुत॒ ऋचः॒ सामा॑नि जज्ञिरे ।
   तस्मा॑द्य॒ज्ञात्स॑र्व॒हुत
   तस्मा॑त् य॒ज्ञात् सर्व॒हुतः
   तस्मा॑द् य॒ज्ञात् सर्व॒हुत

Halfverse: b    ऋचः॒ सामा॑नि जज्ञिरे ।
   ऋचः सामा॑नि जज्ञिरे ।
   ऋचः सामा॑नि जज्ञिरे ।

Halfverse: c    छन्दां॑सि जज्ञिरे॒ तस्मा॒द्यजु॒स्तस्मा॑दजायत ।।
   छन्दां॑सि जज्ञिरे॒ तस्मा॑द्
   छन्दां॑सि जज्ञिरे तस्मा॑त्
   छन्दां॑सि जज्ञिरे तस्मा॑द्

Halfverse: d    यजु॒स्तस्मा॑दजायत ।।
   यजुः तस्मा॑त् अजायत ।।
   यजु॑स् तस्मा॑द् अजायत ।।


Verse: 10 
Halfverse: a    तस्मा॒दश्वा॑ अजायन्त॒ ये के चो॑भ॒याद॑तः ।
   तस्मा॒दश्वा॑ अजायन्त
   तस्मा॑त् अश्वाः अजायन्त
   तस्मा॑द् अश्वा अजायन्त

Halfverse: b    ये के चो॑भ॒याद॑तः ।
   ये के च उभ॒याद॑तः ।
   ये के च उभ॒याद॑तः ।

Halfverse: c    गावो॑ ह जज्ञिरे॒ तस्मा॒त्तस्मा॑ज्जा ताअजा॒वयः॑ ।।
   गावो॑ ह जज्ञिरे॒ तस्मा॑त्
   गावः ह जज्ञिरे तस्मा॑त्
   गावो ह जज्ञिरे तस्मा॑त्

Halfverse: d    तस्मा॑ज्जा॒ता अ॑जा॒वयः॑ ।।
   तस्मा॑त् जा॒ताः अ॑जा॒वयः ।।
   तस्मा॑ज् जा॒ता अ॑जा॒वयः ।।


Verse: 11 
Halfverse: a    यत्पुरु॑षं॒ व्यद॑धुः कति॒धा व्य॑कल्पयन् ।
   यत्पुरु॑षं॒ व्यद॑धुः
   यत् पुरु॑षम् वि अद॑धुः
   यत् पुरु॑षं वि अद॑धुः

Halfverse: b    कति॒धा व्य॑कल्पयन् ।
   क॑ति॒धा वि अ॑कल्पयन् ।
   क॑ति॒धा वि अ॑कल्पयन् ।

Halfverse: c    मुखं॒ किम॑स्य॒ कौ बा॒हू का ऊ॒रू पादा॑ उच्येते ।।
   मुखं॒ किम॑स्य॒ कौ बा॒हू
   मुख॑म् किम् अस्य कौ बा॒हू
   मुखं किम् अस्य कौ बा॒हू

Halfverse: d    का ऊ॒रू पादा॑ उच्येते ।।
   कौ ऊ॒रू पादौ उच्येते ।।
   का ऊ॒रू पादा उच्येते ।।


Verse: 12 
Halfverse: a    ब्रा॑ह्म॒णो॑ ऽस्य॒ मुख॑मासीद्बा॒हू रा॑ज॒न्यः॑ कृ॒तः ।
   ब्रा॑ह्म॒णो॑ ऽस्य॒ मुख॑मासीद्
   ब्राह्म॒णः अ॑स्य मुख॑म् आसीत्
   ब्राह्म॒णो ऽस्य मुख॑म् आसीद्

Halfverse: b    बा॒हू रा॑ज॒न्यः॑ कृ॒तः ।
   बा॒हू रा॑ज॒न्यः कृ॒तः ।
   बा॒हू रा॑ज॒नियः कृ॒तः ।

Halfverse: c    ऊ॒रू तद॑स्य॒ यद्वैश्यः॑ प॒द्भ्यां शू॒द्रो अ॑जायत ।।
   ऊ॒रू तद॑स्य॒ यद्वैश्यः
   ऊ॒रू तत् अस्य यत् वैश्यः
   ऊ॒रू तद् अस्य यद् वैश्यः

Halfverse: d    प॒द्भ्यां शू॒द्रो अ॑जायत ।।
   प॒द्भ्याम् शू॒द्रः अ॑जायत ।।
   प॒द्भ्यां शू॒द्रो अ॑जायत ।।


Verse: 13 
Halfverse: a    च॒न्द्रमा॒ मन॑सो जा॒तश्चक्षोः॒ सूर्यो॑ अजायत ।
   च॒न्द्रमा॒ मन॑सो जा॒तश्
   च॒न्द्रमाः मन॑सः जा॒तः
   च॒न्द्रमा मन॑सो जा॒तश्

Halfverse: b    चक्षोः॒ सूर्यो॑ अजायत ।
   चक्षोः सूर्यः अजायत ।
   चक्षोः सूर्यो अजायत ।

Halfverse: c    मुखा॒दिन्द्र॑श्चा॒ग्निश्च॑ प्रा॒णाद्वा॒युर॑जायत ।।
   मुखा॒दिन्द्र॑श्चा॒ग्निश्च
   मुखा॑त् इन्द्रः च अ॒ग्निः च
   मुखा॑द् इन्द्र॑श् च अ॒ग्निश् च

Halfverse: d    प्रा॒णाद्वा॒युर॑जायत ।।
   प्रा॒णात् वा॒युः अ॑जायत ।।
   प्रा॒णाद् वा॒युर् अजायत ।।


Verse: 14 
Halfverse: a    नाभ्या॑ आसीद॒न्तरि॑क्षं शी॒र्ष्णो द्यौः सम॑वर्तत ।
   नाभ्या॑ आसीद॒न्तरि॑क्षं
   नाभ्याः आसीत् अ॒न्तरि॑क्षम्
   नाभ्या आसीद् अ॒न्तरि॑क्षं

Halfverse: b    शी॒र्ष्णो द्यौः सम॑वर्तत ।
   शी॒र्ष्णः द्यौः सम् अवर्तत ।
   शी॒र्ष्णो द्यौः सम् अवर्तत ।

Halfverse: c    प॒द्भ्याम्भूमि॒र्दिशः॒ श्रोत्रा॒त्तथा॑ लो॒काँ अ॑कल्पयन् ।।
   प॒द्भ्याम्भूमि॒र्दिशः॒ श्रोत्रा॑त्
   प॒द्भ्याम् भूमिः दिशः श्रोत्रा॑त्
   प॒द्भ्याम् भूमि॑र् दिशः श्रोत्रा॑त्

Halfverse: d    तथा॑ लो॒काँ अ॑कल्पयन् ।।
   तथा लो॒कान् अकल्पयन् ।।
   तथा लो॒काँ अ॑कल्पयन् ।।


Verse: 15 
Halfverse: a    स॒प्तास्या॑सन्परि॒धय॒स्त्रिः स॒प्त स॒मिधः॑ कृ॒ताः ।
   स॒प्तास्या॑सन्परि॒धय॑स्
   स॒प्त अ॑स्य आसन् परि॒धयः
   स॒प्तास्या॑सन् परि॒धय॑स्

Halfverse: b    त्रिः स॒प्त स॒मिधः॑ कृ॒ताः ।
   त्रिः स॒प्त स॒मिधः कृ॒ताः ।
   त्रिः स॒प्त स॒मिधः कृ॒ताः ।

Halfverse: c    दे॒वा यद्य॒ज्ञं त॑न्वा॒ना अब॑ध्न॒न्पुरु॑षम्प॒शुम् ।।
   दे॒वा यद्य॒ज्ञं त॑न्वा॒ना
   दे॒वाः यत् य॒ज्ञम् तन्वा॒नाः
   दे॒वा यद् य॒ज्ञं त॑न्वा॒ना

Halfverse: d    अब॑ध्न॒न्पुरु॑षम्प॒शुम् ।।
   अब॑ध्नन् पुरु॑षम् प॒शुम् ।।
   अब॑ध्नन् पुरु॑षम् प॒शुम् ।।


Verse: 16 
Halfverse: a    य॒ज्ञेन॑ य॒ज्ञम॑यजन्त दे॒वास्तानि॒ धर्मा॑णि प्रथ॒मान्या॑सन् ।
   य॒ज्ञेन॑ य॒ज्ञम॑यजन्त दे॒वास्
   य॒ज्ञेन य॒ज्ञम् अयजन्त दे॒वाः
   य॒ज्ञेन य॒ज्ञम् अयजन्त दे॒वास्

Halfverse: b    तानि॒ धर्मा॑णि प्रथ॒मान्या॑सन् ।
   तानि धर्मा॑णि प्रथ॒मानि आसन् ।
   तानि धर्मा॑णि प्रथ॒मानि आसन् ।

Halfverse: c    ते ह॒ नाक॑म्महि॒मानः॑ सचन्त॒ यत्र॒ पूर्वे॑ सा॒ध्याः सन्ति॑ दे॒वाः ।।
   ते ह॒ नाक॑म्महि॒मानः॑ सचन्त
   ते ह नाक॑म् महि॒मानः सचन्त
   ते ह नाक॑म् महि॒मानः सचन्त

Halfverse: d    यत्र॒ पूर्वे॑ सा॒ध्याः सन्ति॑ दे॒वाः ।।
   यत्र पूर्वे सा॒ध्याः सन्ति दे॒वाः ।।
   यत्र पूर्वे साधि॒याः सन्ति दे॒वाः ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.