TITUS
Rg-Veda: Rg-Veda-Samhita
Part No. 928
Previous part

Hymn: 91_(917) 
Verse: 1 
Halfverse: a    सं जा॑गृ॒वद्भि॒र्जर॑माण इध्यते॒ दमे॒ दमू॑ना इ॒षय॑न्नि॒ळस्प॒दे ।
   सं जा॑गृ॒वद्भि॒र्जर॑माण इध्यते
   सम् जागृ॒वद्भिः जर॑माणः इध्यते
   सं जा॑गृ॒वद्भि॑र् जर॑माण इध्यते

Halfverse: b    दमे॒ दमू॑ना इ॒षय॑न्नि॒ळस्प॒दे ।
   दमे दमू॑नाः इ॒षय॑न् इ॒ळः प॒दे ।
   दमे दमू॑ना इ॒षय॑न्न् इ॒ळस् प॒दे ।

Halfverse: c    विश्व॑स्य॒ होता॑ ह॒विषो॒ वरे॑ण्यो वि॒भुर्वि॒भावा॑ सु॒षखा॑ सखीय॒ते ।।
   विश्व॑स्य॒ होता॑ ह॒विषो॒ वरे॑ण्यो
   विश्व॑स्य होता ह॒विषः वरे॑ण्यः
   विश्व॑स्य होता ह॒विषो वरे॑णियो

Halfverse: d    वि॒भुर्वि॒भावा॑ सु॒षखा॑ सखीय॒ते ।।
   वि॒भुः वि॒भावा सु॒षखा सखीय॒ते ।।
   वि॒भुर् वि॒भावा सु॒षखा सखीय॒ते ।।


Verse: 2 
Halfverse: a    स द॑र्शत॒श्रीरति॑थिर्गृ॒हेगृ॑हे॒ वने॑वने शिश्रिये तक्व॒वीरि॑व ।
   स द॑र्शत॒श्रीरति॑थिर्गृ॒हेगृ॑हे
   स द॑र्शत॒श्रीः अति॑थिः गृ॒हेगृ॑हे
   स द॑र्शत॒श्रीर् अति॑थिर् गृ॒हेगृ॑हे

Halfverse: b    वने॑वने शिश्रिये तक्व॒वीरि॑व ।
   वने॑वने शिश्रिये तक्व॒वीः इ॑व ।
   वने॑वने शिश्रिये तक्व॒वीर् इव ।

Halfverse: c    जनं॑जनं॒ जन्यो॒ नाति॑ मन्यते॒ विश॒ आ क्षे॑ति वि॒श्यो॒ विशं॑विशम् ।।
   जनं॑जनं॒ जन्यो॒ नाति॑ मन्यते
   जनं॑जनम् जन्यः न अति मन्यते
   जनं॑जनं जनि॑यो नाति मन्यते

Halfverse: d    विश॒ आ क्षे॑ति वि॒श्यो॒ विशं॑विशम् ।।
   विशः आ क्षे॑ति वि॒श्यः विशं॑विशम् ।।
   विश आ क्षे॑ति वि॒शियो विशं॑विशम् ।।


Verse: 3 
Halfverse: a    सु॒दक्षो॒ दक्षैः॒ क्रतु॑नासि सु॒क्रतु॒रग्ने॑ क॒विः काव्ये॑नासि विश्व॒वित् ।
   सु॒दक्षो॒ दक्षैः॒ क्रतु॑नासि सु॒क्रतु॑र्
   सु॒दक्षः दक्षैः क्रतु॑ना असि सु॒क्रतुः
   सु॒दक्षो दक्षैः क्रतु॑नासि सु॒क्रतु॑र्

Halfverse: b    अग्ने॑ क॒विः काव्ये॑नासि विश्व॒वित् ।
   अग्ने क॒विः काव्ये॑न असि विश्व॒वित् ।
   अग्ने क॒विः कावि॑येनासि विश्व॒वित् ।

Halfverse: c    वसु॒र्वसू॑नां क्षयसि॒ त्वमेक॒ इद्द्यावा॑ च॒ यानि॑ पृथि॒वी च॒ पुष्य॑तः ।।
   वसु॒र्वसू॑नां क्षयसि॒ त्वमेक॒ इद्
   वसुः वसू॑नाम् क्षयसि त्वम् एकः इत्
   वसु॑र् वसू॑नां क्षयसि त्वम् एक इद्

Halfverse: d    द्यावा॑ च॒ यानि॑ पृथि॒वी च॒ पुष्य॑तः ।।
   द्यावा च यानि पृथि॒वी च पुष्य॑तः ।।
   द्यावा च यानि पृथि॒वी च पुष्य॑तः ।।


Verse: 4 
Halfverse: a    प्र॑जा॒नन्न॑ग्ने॒ तव॒ योनि॑मृ॒त्विय॒मिळा॑यास्प॒दे घृ॒तव॑न्त॒मास॑दः ।
   प्र॑जा॒नन्न॑ग्ने॒ तव॒ योनि॑मृ॒त्विय॑म्
   प्रजा॒नन् अग्ने तव योनि॑म् ऋ॒त्विय॑म्
   प्रजा॒नन्न् अग्ने तव योनि॑म् ऋ॒त्विय॑म्

Halfverse: b    इळा॑यास्प॒दे घृ॒तव॑न्त॒मास॑दः ।
   इळा॑याः प॒दे घृ॒तव॑न्तम् आ अ॑सदः ।
   इळा॑यास् प॒दे घृ॒तव॑न्तम् आस॑दः ।

Halfverse: c    आ ते॑ चिकित्र उ॒षसा॑मि॒वेत॑यो ऽरे॒पसः॒ सूर्य॑स्येव र॒श्मयः॑ ।।
   आ ते॑ चिकित्र उ॒षसा॑मि॒वेत॑यो
   आ ते चिकित्रे उ॒षसा॑म् इव एत॑यः
   आ ते चिकित्र उ॒षसा॑म् इ॒वेत॑यो

Halfverse: d    ऽरे॒पसः॒ सूर्य॑स्येव र॒श्मयः॑ ।।
   अ॑रे॒पसः सूर्य॑स्य इव र॒श्मयः ।।
   अ॑रे॒पसः सूरि॑यस्येव र॒श्मयः ।।


Verse: 5 
Halfverse: a    तव॒ श्रियो॑ व॒र्ष्य॑स्येव वि॒द्युत॑श्चि॒त्राश्चि॑कित्र उ॒षसां॒ न के॒तवः॑ ।
   तव॒ श्रियो॑ व॒र्ष्य॑स्येव वि॒द्युत॑श्
   तव श्रियः व॒र्ष्य॑स्य इव वि॒द्युतः
   तव श्रियो व॒र्षिय॑स्येव वि॒द्युत॑श्

Halfverse: b    चि॒त्राश्चि॑कित्र उ॒षसां॒ न के॒तवः॑ ।
   चि॒त्राः चि॑कित्रे उ॒षसा॑म् न के॒तवः ।
   चि॒त्राश् चिकित्र उ॒षसां न के॒तवः ।

Halfverse: c    यदोष॑धीर॒भिसृ॑ष्टो॒ वना॑नि च॒ परि॑ स्व॒यं चि॑नु॒षे अन्न॑मा॒स्ये॑ ।।
   यदोष॑धीर॒भिसृ॑ष्टो॒ वना॑नि च
   यत् ओष॑धीः अ॒भिसृ॑ष्टः वना॑नि च
   यद् ओष॑धीर् अ॒भिसृ॑ष्टो वना॑नि च

Halfverse: d    परि॑ स्व॒यं चि॑नु॒षे अन्न॑मा॒स्ये॑ ।।
   परि स्व॒यम् चिनु॒षे अन्न॑म् आ॒स्ये ।।
   परि स्व॒यं चि॑नु॒षे अन्न॑म् आ॒सिये ।।


Verse: 6 
Halfverse: a    तमोष॑धीर्दधिरे॒ गर्भ॑मृ॒त्वियं॒ तमापो॑ अ॒ग्निं ज॑नयन्त मा॒तरः॑ ।
   तमोष॑धीर्दधिरे॒ गर्भ॑मृ॒त्वियं
   तम् ओष॑धीः दधिरे गर्भ॑म् ऋ॒त्विय॑म्
   तम् ओष॑धीर् दधिरे गर्भ॑म् ऋ॒त्वियं

Halfverse: b    तमापो॑ अ॒ग्निं ज॑नयन्त मा॒तरः॑ ।
   तम् आपः अ॒ग्निम् जनयन्त मा॒तरः ।
   तम् आपो अ॒ग्निं ज॑नयन्त मा॒तरः ।

Halfverse: c    तमित्स॑मा॒नं व॒निन॑श्च वी॒रुधो॒ ऽन्तर्व॑तीश्च॒ सुव॑ते च वि॒श्वहा॑ ।।
   तमित्स॑मा॒नं व॒निन॑श्च वी॒रुधो
   तम् इत् समा॒नम् व॒निनः च वी॒रुधः
   तम् इत् समा॒नं व॒निन॑श् च वी॒रुधो

Halfverse: d    ऽन्तर्व॑तीश्च॒ सुव॑ते च वि॒श्वहा॑ ।।
   अ॒न्तर्व॑तीः च सुव॑ते च वि॒श्वहा ।।
   अ॒न्तर्व॑तीश् च सुव॑ते च वि॒श्वहा ।।


Verse: 7 
Halfverse: a    वातो॑पधूत इषि॒तो वशाँ॒ अनु॑ तृ॒षु यदन्ना॒ वेवि॑षद्वि॒तिष्ठ॑से ।
   वातो॑पधूत इषि॒तो वशाँ॒ अनु
   वातो॑पधूतः इषि॒तः वशा॑न् अनु
   वातो॑पधूत इषि॒तो वशाँ अनु

Halfverse: b    तृ॒षु यदन्ना॒ वेवि॑षद्वि॒तिष्ठ॑से ।
   तृ॒षु यत् अन्ना वेवि॑षत् वि॒तिष्ठ॑से ।
   तृ॒षु यद् अन्ना वेवि॑षद् वि॒तिष्ठ॑से ।

Halfverse: c    आ ते॑ यतन्ते र॒थ्यो॒ यथा॒ पृथ॒क्छर्धां॑स्यग्ने अ॒जरा॑णि॒ धक्ष॑तः ।।
   आ ते॑ यतन्ते र॒थ्यो॒ यथा॒ पृथ॑क्
   आ ते यतन्ते र॒थ्यः यथा पृथ॑क्
   आ ते यतन्ते र॒थियो यथा पृथ॑क्

Halfverse: d    छर्धां॑स्यग्ने अ॒जरा॑णि॒ धक्ष॑तः ।।
   शर्धां॑सि अग्ने अ॒जरा॑णि धक्ष॑तः ।।
   छर्धां॑सि अग्ने अ॒जरा॑णि धक्ष॑तः ।।


Verse: 8 
Halfverse: a    मे॑धाका॒रं वि॒दथ॑स्य प्र॒साध॑नम॒ग्निं होता॑रम्परि॒भूत॑मम्म॒तिम् ।
   मे॑धाका॒रं वि॒दथ॑स्य प्र॒साध॑नम्
   मेधाका॒रम् वि॒दथ॑स्य प्र॒साध॑नम्
   मेधाका॒रं वि॒दथ॑स्य प्र॒साध॑नम्

Halfverse: b    अ॒ग्निं होता॑रम्परि॒भूत॑मम्म॒तिम् ।
   अ॒ग्निम् होता॑रम् परि॒भूत॑मम् म॒तिम् ।
   अ॒ग्निं होता॑रम् परि॒भूत॑मम् म॒तिम् ।

Halfverse: c    तमिदर्भे॑ ह॒विष्या स॑मा॒नमित्तमिन्म॒हे वृ॑णते॒ नान्यं त्वत् ।।
   तमिदर्भे॑ ह॒विष्या स॑मा॒नमित्
   तम् इत् अर्भे ह॒विषि आ स॑मा॒नम् इत्
   तम् इद् अर्भे ह॒विषि आ स॑मा॒नम् इत्

Halfverse: d    तमिन्म॒हे वृ॑णते॒ नान्यं त्वत् ।।
   तम् इत् म॒हे वृ॑णते न अ॒न्यम् त्वत् ।।
   तम् इन् म॒हे वृ॑णते नानि॒यं तु॒वत् ।।


Verse: 9 
Halfverse: a    त्वामिदत्र॑ वृणते त्वा॒यवो॒ होता॑रमग्ने वि॒दथे॑षु वे॒धसः॑ ।
   त्वामिदत्र॑ वृणते त्वा॒यवो
   त्वाम् इत् अत्र वृणते त्वा॒यवः
   तु॒वाम् इद् अत्र वृणते तुवा॒यवो

Halfverse: b    होता॑रमग्ने वि॒दथे॑षु वे॒धसः॑ ।
   होता॑रम् अग्ने वि॒दथे॑षु वे॒धसः ।
   होता॑रम् अग्ने वि॒दथे॑षु वे॒धसः ।

Halfverse: c    यद्दे॑व॒यन्तो॒ दध॑ति॒ प्रयाँ॑सि ते ह॒विष्म॑न्तो॒ मन॑वो वृ॒क्तब॑र्हिषः ।।
   यद्दे॑व॒यन्तो॒ दध॑ति॒ प्रयाँ॑सि ते
   यत् देव॒यन्तः दध॑ति प्रयां॑सि ते
   यद् देव॒यन्तो दध॑ति प्रयां॑सि ते

Halfverse: d    ह॒विष्म॑न्तो॒ मन॑वो वृ॒क्तब॑र्हिषः ।।
   ह॒विष्म॑न्तः मन॑वः वृ॒क्तब॑र्हिषः ।।
   ह॒विष्म॑न्तो मन॑वो वृ॒क्तब॑र्हिषः ।।


Verse: 10 
Halfverse: a    तवा॑ग्ने हो॒त्रं तव॑ पो॒त्रमृ॒त्वियं॒ तव॑ ने॒ष्ट्रं त्वम॒ग्निदृ॑ताय॒तः ।
   तवा॑ग्ने हो॒त्रं तव॑ पो॒त्रमृ॒त्वियं
   तव अग्ने हो॒त्रम् तव पो॒त्रम् ऋ॒त्विय॑म्
   तवा॑ग्ने हो॒त्रं तव पो॒त्रम् ऋ॒त्वियं

Halfverse: b    तव॑ ने॒ष्ट्रं त्वम॒ग्निदृ॑ताय॒तः ।
   तव ने॒ष्ट्रम् त्वम् अ॒ग्नित् ऋताय॒तः ।
   तव ने॒ष्ट्रं तु॒वम् अ॒ग्निद् ऋताय॒तः ।

Halfverse: c    तव॑ प्रशा॒स्त्रं त्वम॑ध्वरीयसि ब्र॒ह्मा चासि॑ गृ॒हप॑तिश्च नो॒ दमे॑ ।।
   तव॑ प्रशा॒स्त्रं त्वम॑ध्वरीयसि
   तव प्रशा॒स्त्रम् त्वम् अध्वरीयसि
   तव प्रशा॒स्त्रं तु॒वम् अध्वरीयसि

Halfverse: d    ब्र॒ह्मा चासि॑ गृ॒हप॑तिश्च नो॒ दमे॑ ।।
   ब्र॒ह्मा च असि गृ॒हप॑तिः च नः दमे ।।
   ब्र॒ह्मा चासि गृ॒हप॑तिश् च नो दमे ।।


Verse: 11 
Halfverse: a    यस्तुभ्य॑मग्ने अ॒मृता॑य॒ मर्त्यः॑ स॒मिधा॒ दाश॑दु॒त वा॑ ह॒विष्कृ॑ति ।
   यस्तुभ्य॑मग्ने अ॒मृता॑य॒ मर्त्यः
   यः तुभ्य॑म् अग्ने अ॒मृता॑य मर्त्यः
   यस् तुभ्य॑म् अग्ने अ॒मृता॑य मर्ति॑यः

Halfverse: b    स॒मिधा॒ दाश॑दु॒त वा॑ ह॒विष्कृ॑ति ।
   स॒मिधा दाश॑त् उ॒त वा ह॒विष्कृ॑ति ।
   स॒मिधा दाश॑द् उ॒त वा ह॒विष्कृ॑ति ।

Halfverse: c    तस्य॒ होता॑ भवसि॒ यासि॑ दू॒त्य॒मुप॑ ब्रूषे॒ यज॑स्यध्वरी॒यसि॑ ।।
   तस्य॒ होता॑ भवसि॒ यासि॑ दू॒त्य॑म्
   तस्य होता भवसि यासि दू॒त्य॑म्
   तस्य होता भवसि यासि दू॒तिय॑म्

Halfverse: d    उप॑ ब्रूषे॒ यज॑स्यध्वरी॒यसि॑ ।।
   उप ब्रूषे यज॑सि अध्वरी॒यसि ।।
   उप ब्रूषे यज॑सि अध्वरी॒यसि ।।


Verse: 12 
Halfverse: a    इ॒मा अ॑स्मै म॒तयो॒ वाचो॑ अ॒स्मदाँ ऋचो॒ गिरः॑ सुष्टु॒तयः॒ सम॑ग्मत ।
   इ॒मा अ॑स्मै म॒तयो॒ वाचो॑ अ॒स्मदाँ
   इ॒माः अ॑स्मै म॒तयः वाचः अ॒स्मत् आ
   इ॒मा अ॑स्मै म॒तयो वाचो अ॒स्मद् आँ

Halfverse: b    ऋचो॒ गिरः॑ सुष्टु॒तयः॒ सम॑ग्मत ।
   ऋचः गिरः सुष्टु॒तयः सम् अग्मत ।
   ऋचो गिरः सुष्टु॒तयः सम् अग्मत ।

Halfverse: c    व॑सू॒यवो॒ वस॑वे जा॒तवे॑दसे वृ॒द्धासु॑ चि॒द्वर्ध॑नो॒ यासु॑ चा॒कन॑त् ।।
   व॑सू॒यवो॒ वस॑वे जा॒तवे॑दसे
   वसू॒यवः वस॑वे जा॒तवे॑दसे
   वसू॒यवो वस॑वे जा॒तवे॑दसे

Halfverse: d    वृ॒द्धासु॑ चि॒द्वर्ध॑नो॒ यासु॑ चा॒कन॑त् ।।
   वृ॒द्धासु चित् वर्ध॑नः यासु चा॒कन॑त् ।।
   वृ॒द्धासु चिद् वर्ध॑नो यासु चा॒कन॑त् ।।


Verse: 13 
Halfverse: a    इ॒माम्प्र॒त्नाय॑ सुष्टु॒तिं नवी॑यसीं वो॒चेय॑मस्मा उश॒ते शृ॒णोतु॑ नः ।
   इ॒माम्प्र॒त्नाय॑ सुष्टु॒तिं नवी॑यसीं
   इ॒माम् प्र॒त्नाय सुष्टु॒तिम् नवी॑यसीम्
   इ॒माम् प्र॒त्नाय सुष्टु॒तिं नवी॑यसीं

Halfverse: b    वो॒चेय॑मस्मा उश॒ते शृ॒णोतु॑ नः ।
   वो॒चेय॑म् अस्मै उश॒ते शृ॒णोतु नः ।
   वो॒चेय॑म् अस्मा उश॒ते शृ॒णोतु नः ।

Halfverse: c    भू॒या अन्त॑रा हृ॒द्य॑स्य नि॒स्पृशे॑ जा॒येव॒ पत्य॑ उश॒ती सु॒वासाः॑ ।।
   भू॒या अन्त॑रा हृ॒द्य॑स्य नि॒स्पृशे
   भू॒याः अन्त॑रा हृ॒दि अ॑स्य नि॒स्पृशे
   भू॒या अन्त॑रा हृ॒दि अ॑स्य नि॒स्पृशे

Halfverse: d    जा॒येव॒ पत्य॑ उश॒ती सु॒वासाः॑ ।।
   जा॒या इ॑व पत्ये उश॒ती सु॒वासाः ।।
   जा॒येव पत्य उश॒ती सु॒वासाः ।।


Verse: 14 
Halfverse: a    यस्मि॒न्नश्वा॑स ऋष॒भास॑ उ॒क्षणो॑ व॒शा मे॒षा अ॑वसृ॒ष्टास॒ आहु॑ताः ।
   यस्मि॒न्नश्वा॑स ऋष॒भास॑ उ॒क्षणो
   यस्मि॑न् अश्वा॑सः ऋष॒भासः उ॒क्षणः
   यस्मि॑न्न् अश्वा॑स ऋष॒भास उ॒क्षणो

Halfverse: b    व॒शा मे॒षा अ॑वसृ॒ष्टास॒ आहु॑ताः ।
   व॒शाः मे॒षाः अ॑वसृ॒ष्टासः आहु॑ताः ।
   व॒शा मे॒षा अ॑वसृ॒ष्टास आहु॑ताः ।

Halfverse: c    की॑लाल॒पे सोम॑पृष्ठाय वे॒धसे॑ हृ॒दा म॒तिं ज॑नये॒ चारु॑म॒ग्नये॑ ।।
   की॑लाल॒पे सोम॑पृष्ठाय वे॒धसे
   कीलाल॒पे सोम॑पृष्ठाय वे॒धसे
   कीलाल॒पे सोम॑पृष्ठाय वे॒धसे

Halfverse: d    हृ॒दा म॒तिं ज॑नये॒ चारु॑म॒ग्नये॑ ।।
   हृ॒दा म॒तिम् जनये चारु॑म् अ॒ग्नये ।।
   हृ॒दा म॒तिं ज॑नये चारु॑म् अ॒ग्नये ।।


Verse: 15 
Halfverse: a    अहा॑व्यग्ने ह॒विरा॒स्ये॑ ते स्रु॒ची॑व घृ॒तं च॒म्वी॑व॒ सोमः॑ ।
   अहा॑व्यग्ने ह॒विरा॒स्ये॑ ते
   अहा॑वि अग्ने ह॒विः आ॒स्ये ते
   अहा॑वि अग्ने ह॒विर् आ॒सिये ते

Halfverse: b    स्रु॒ची॑व घृ॒तं च॒म्वी॑व॒ सोमः॑ ।
   स्रु॒चि इ॑व घृ॒तम् च॒म्वि इव सोमः ।
   स्रु॒ची॑व घृ॒तं च॒मुवी॑व सोमः ।

Halfverse: c    वा॑ज॒सनिं॑ र॒यिम॒स्मे सु॒वीर॑म्प्रश॒स्तं धे॑हि य॒शस॑म्बृ॒हन्त॑म् ।।
   वा॑ज॒सनिं॑ र॒यिम॒स्मे सु॒वीर॑म्
   वाज॒सनि॑म् र॒यिम् अ॒स्मे सु॒वीर॑म्
   वाज॒सनिं र॒यिम् अ॒स्मे सु॒वीर॑म्

Halfverse: d    प्रश॒स्तं धे॑हि य॒शस॑म्बृ॒हन्त॑म् ।।
   प्र॑श॒स्तम् धेहि य॒शस॑म् बृ॒हन्त॑म् ।।
   प्र॑श॒स्तं धे॑हि य॒शस॑म् बृ॒हन्त॑म् ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.