TITUS
Rg-Veda: Rg-Veda-Samhita
Part No. 932
Previous part

Hymn: 95_(921) 
Verse: 1 
Halfverse: a    ह॒ये जाये॒ मन॑सा॒ तिष्ठ॑ घोरे॒ वचां॑सि मि॒श्रा कृ॑णवावहै॒ नु ।
   ह॒ये जाये॒ मन॑सा॒ तिष्ठ॑ घोरे
   ह॒ये जाये मन॑सा तिष्ठ घोरे
   ह॒ये जाये मन॑सा तिष्ठ घोरे

Halfverse: b    वचां॑सि मि॒श्रा कृ॑णवावहै॒ नु ।
   वचां॑सि मि॒श्रा कृ॑णवावहै नु ।
   वचां॑सि मि॒श्रा कृ॑णवावहै नु ।

Halfverse: c    न नौ॒ मन्त्रा॒ अनु॑दितास ए॒ते मय॑स्कर॒न्पर॑तरे च॒नाह॑न् ।।
   न नौ॒ मन्त्रा॒ अनु॑दितास ए॒ते
   न नौ मन्त्राः अनु॑दितासः ए॒ते
   न नौ मन्त्रा अनु॑दितास ए॒ते

Halfverse: d    मय॑स्कर॒न्पर॑तरे च॒नाह॑न् ।।
   मयः करन् पर॑तरे च॒न अह॑न् ।।
   मय॑स् करन् पर॑तरे च॒नाह॑न् ।।


Verse: 2 
Halfverse: a    किमे॒ता वा॒चा कृ॑णवा॒ तवा॒हम्प्राक्र॑मिषमु॒षसा॑मग्रि॒येव॑ ।
   किमे॒ता वा॒चा कृ॑णवा॒ तवा॒हम्
   किम् ए॒ता वा॒चा कृ॑णवा ! तव अ॒हम्
   किम् ए॒ता वा॒चा कृ॑णवा तवा॒हम्

Halfverse: b    प्राक्र॑मिषमु॒षसा॑मग्रि॒येव॑ ।
   प्र अ॑क्रमिषम् उ॒षसा॑म् अग्रि॒या इ॑व ।
   प्राक्र॑मिषम् उ॒षसा॑म् अग्रि॒येव ।

Halfverse: c    पुरू॑रवः॒ पुन॒रस्त॒म्परे॑हि दुराप॒ना वात॑ इवा॒हम॑स्मि ।।
   पुरू॑रवः॒ पुन॒रस्त॒म्परे॑हि
   पुरू॑रवः पुन॑र् अस्त॑म् परा इहि
   पुरू॑रवः पुन॑र् अस्त॑म् परे॑हि

Halfverse: d    दुराप॒ना वात॑ इवा॒हम॑स्मि ।।
   दु॑राप॒ना वातः इव अ॒हम् अस्मि ।।
   दु॑राप॒ना वात इवा॒हम् अस्मि ।।


Verse: 3 
Halfverse: a    इषु॒र्न श्रि॒य इ॑षु॒धेर॑स॒ना गो॒षाः श॑त॒सा न रंहिः॑ ।
   इषु॒र्न श्रि॒य इ॑षु॒धेर्
   इषुः न श्रि॒ये इ॑षु॒धेः
   इषु॑र् न श्रि॒य इ॑षु॒धेर्

Halfverse: b    अस॒ना गो॒षाः श॑त॒सा न रंहिः॑ ।
   अ॑स॒ना गो॒षाः श॑त॒साः न रंहिः ।
   अ॑स॒ना गो॒षाः श॑त॒सा न रंहिः ।

Halfverse: c    अ॒वीरे॒ क्रतौ॒ वि द॑विद्युत॒न्नोरा॒ न मा॒युं चि॑तयन्त॒ धुन॑यः ।।
   अ॒वीरे॒ क्रतौ॒ वि द॑विद्युत॒न्न
   अ॒वीरे क्रतौ वि द॑विद्युतन् ! न
   अ॒वीरे क्रतौ वि द॑विद्युतन् न

Halfverse: d     उरा॒ न मा॒युं चि॑तयन्त॒ धुन॑यः ।।
   उरा न मा॒युम् चितयन्त धुन॑यः ।।
   उरा न मा॒युं चि॑तयन्त धुन॑यः ।।


Verse: 4 
Halfverse: a    सा वसु॒ दध॑ती॒ श्वशु॑राय॒ वय॒ उषो॒ यदि॒ वष्ट्यन्ति॑गृहात् ।
   सा वसु॒ दध॑ती॒ श्वशु॑राय
   सा वसु दध॑ती श्वशु॑राय
   सा वसु दध॑ती श्वशु॑राय

Halfverse: b    वय॒ उषो॒ यदि॒ वष्ट्यन्ति॑गृहात् ।
   वयः उषः यदि वष्टि अन्ति॑गृहात् ।
   वय उषो यदि वष्ट्य् अन्ति॑गृहात् ।

Halfverse: c    अस्तं॑ ननक्षे॒ यस्मि॑ञ्चा॒कन्दिवा॒ नक्तं॑ श्नथि॒ता वै॑त॒सेन॑ ।।
   अस्तं॑ ननक्षे॒ यस्मि॑ञ्चा॒कन्
   अस्त॑म् ननक्षे यस्मि॑न् चा॒कन्
   अस्तं ननक्षे यस्मि॑ञ् चा॒कन्

Halfverse: d    दिवा॒ नक्तं॑ श्नथि॒ता वै॑त॒सेन॑ ।।
   दिवा नक्त॑म् श्नथि॒ता वै॑त॒सेन ।।
   दिवा नक्तं श्नथि॒ता वै॑त॒सेन ।।


Verse: 5 
Halfverse: a    त्रिः स्म॒ माह्नः॑ श्नथयो वैत॒सेनो॒त स्म॒ मे ऽव्य॑त्यै पृणासि ।
   त्रिः स्म॒ माह्नः॑ श्नथयो वैत॒सेन
   त्रिः स्म मा अह्नः श्नथयः वैत॒सेन
   त्रिः स्म माह्नः श्नथयो वैत॒सेन

Halfverse: b     ॑उ॒त स्म॒ मे ऽव्य॑त्यै पृणासि ।
   उ॒त स्म मे अव्य॑त्यै पृणासि ।
   उ॒त स्म मे अवि॑यत्यै पृणासि ।

Halfverse: c    पुरू॑र॒वो ऽनु॑ ते॒ केत॑मायं॒ राजा॑ मे वीर त॒न्व॒स्तदा॑सीः ।।
   पुरू॑र॒वो ऽनु॑ ते॒ केत॑मायं
   पुरू॑रवः अनु ते केत॑म् आयम्
   पुरू॑रवो अनु ते केत॑म् आयं

Halfverse: d    राजा॑ मे वीर त॒न्व॒स्तदा॑सीः ।।
   राजा मे वीर त॒न्वः तत् आसीः ।।
   राजा मे वीर त॒नुव॑स् तद् आसीः ।।


Verse: 6 
Halfverse: a    या सु॑जू॒र्णिः श्रेणिः॑ सुम्नआपिर्ह्र॒देच॑क्षु॒र्न ग्र॒न्थिनी॑ चर॒ण्युः ।
   या सु॑जू॒र्णिः श्रेणिः॑ सुम्नआपिर्
   या सु॑जू॒र्णिः श्रेणिः सुम्नआपिः
   या सु॑जू॒र्णिः श्रयि॑णिः सुम्नआपिर्

Halfverse: b    ह्र॒देच॑क्षु॒र्न ग्र॒न्थिनी॑ चर॒ण्युः ।
   ह्र॒देच॑क्षुः न ग्र॒न्थिनी चर॒ण्युः ।
   ह्र॒देच॑क्षुर् न ग्र॒न्थिनी चर॒ण्युः ।

Halfverse: c    ता अ॒ञ्जयो॑ ऽरु॒णयो॒ न स॑स्रुः श्रि॒ये गावो॒ न धे॒नवो॑ ऽनवन्त ।।
   ता अ॒ञ्जयो॑ ऽरु॒णयो॒ न स॑स्रुः
   ताः अ॒ञ्जयः अरु॒णयः न स॑स्रुः
   ता अ॒ञ्जयो अरु॒णयो न स॑स्रुः

Halfverse: d    श्रि॒ये गावो॒ न धे॒नवो॑ ऽनवन्त ।।
   श्रि॒ये गावः न धे॒नवः अनवन्त ।।
   श्रि॒ये गावो न धे॒नवो ऽनवन्त ।।


Verse: 7 
Halfverse: a    सम॑स्मि॒ञ्जाय॑मान आसत॒ ग्ना उ॒तेम॑वर्धन्न॒द्यः॒ स्वगू॑र्ताः ।
   सम॑स्मि॒ञ्जाय॑मान आसत॒ ग्ना
   सम् अस्मिन् जाय॑माने आसत ग्नाः
   सम् अस्मिञ् जाय॑मान आसत ग्ना

Halfverse: b    उ॒तेम॑वर्धन्न॒द्यः॒ स्वगू॑र्ताः ।
   उ॒त ई॑म् अवर्धन् न॒द्यः स्वगू॑र्ताः ।
   उ॒तेम् अवर्धन् न॒दियः स्वगू॑र्ताः ।

Halfverse: c    म॒हे यत्त्वा॑ पुरूरवो॒ रणा॒याव॑र्धयन्दस्यु॒हत्या॑य दे॒वाः ।।
   म॒हे यत्त्वा॑ पुरूरवो॒ रणा॑य
   म॒हे यत् त्वा पुरूरवः रणा॑य
   म॒हे यत् त्वा पुरूरवो रणा॑य

Halfverse: d     अव॑र्धयन्दस्यु॒हत्या॑य दे॒वाः ।।
   अव॑र्धयन् दस्यु॒हत्या॑य दे॒वाः ।।
   अव॑र्धयन् दस्यु॒हत्या॑य दे॒वाः ।।


Verse: 8 
Halfverse: a    सचा॒ यदा॑सु॒ जह॑ती॒ष्वत्क॒ममा॑नुषीषु॒ मानु॑षो नि॒षेवे॑ ।
   सचा॒ यदा॑सु॒ जह॑ती॒ष्वत्क॑म्
   सचा यत् आसु जह॑तीषु अत्क॑म्
   सचा यद् आसु जह॑तीषु अत्क॑म्

Halfverse: b    अमा॑नुषीषु॒ मानु॑षो नि॒षेवे॑ ।
   अमा॑नुषीषु मानु॑षः नि॒षेवे ।
   अमा॑नुषीषु मानु॑षो नि॒षेवे ।

Halfverse: c    अप॑ स्म॒ मत्त॒रस॑न्ती॒ न भु॒ज्युस्ता अ॑त्रसन्रथ॒स्पृशो॒ नाश्वाः॑ ।।
   अप॑ स्म॒ मत्त॒रस॑न्ती॒ न भु॒ज्युस्
   अप स्म मत् त॒रस॑न्ती न भु॒ज्युः
   अप स्म मत् त॒रस॑न्ती न भु॒ज्युस्

Halfverse: d    ता अ॑त्रसन्रथ॒स्पृशो॒ नाश्वाः॑ ।।
   ताः अ॑त्रसन् रथ॒स्पृशः न अश्वाः ।।
   ता अ॑त्रसन् रथ॒स्पृशो न अश्वाः ।।


Verse: 9 
Halfverse: a    यदा॑सु॒ मर्तो॑ अ॒मृता॑सु नि॒स्पृक्सं क्षो॒णीभिः॒ क्रतु॑भि॒र्न पृ॒ङ्क्ते ।
   यदा॑सु॒ मर्तो॑ अ॒मृता॑सु नि॒स्पृक्
   यत् आसु मर्तः अ॒मृता॑सु नि॒स्पृक्
   यद् आसु मर्तो अ॒मृता॑सु नि॒स्पृक्

Halfverse: b    सं क्षो॒णीभिः॒ क्रतु॑भि॒र्न पृ॒ङ्क्ते ।
   सम् क्षो॒णीभिः क्रतु॑भिः न पृ॒ङ्क्ते ।
   सं क्षो॒णीभिः ? क्रतु॑भिर् न पृ॒ङ्क्ते ।

Halfverse: c    ता आ॒तयो॒ न त॒न्वः॑ शुम्भत॒ स्वा अश्वा॑सो॒ न क्री॒ळयो॒ दन्द॑शानाः ।।
   ता आ॒तयो॒ न त॒न्वः॑ शुम्भत॒ स्वा
   ताः आ॒तयः न त॒न्वः शुम्भत स्वाः
   ता आ॒तयो न त॒न्वः शुम्भत स्वा

Halfverse: d    अश्वा॑सो॒ न क्री॒ळयो॒ दन्द॑शानाः ।।
   अश्वा॑सः न क्री॒ळयः दन्द॑शानाः ।।
   अश्वा॑सो न क्री॒ळयो दन्द॑शानाः ।।


Verse: 10 
Halfverse: a    वि॒द्युन्न या पत॑न्ती॒ दवि॑द्यो॒द्भर॑न्ती मे॒ अप्या॒ काम्या॑नि ।
   वि॒द्युन्न या पत॑न्ती॒ दवि॑द्योद्
   वि॒द्युत् न या पत॑न्ती दवि॑द्योत्
   वि॒द्युन् न ? या पत॑न्ती दवि॑द्योद्

Halfverse: b    भर॑न्ती मे॒ अप्या॒ काम्या॑नि ।
   भर॑न्ती मे अप्या काम्या॑नि ।
   भर॑न्ती मे अपि॑या कामि॑यानि ।

Halfverse: c    जनि॑ष्टो अ॒पो नर्यः॒ सुजा॑तः॒ प्रोर्वशी॑ तिरत दी॒र्घमायुः॑ ।।
   जनि॑ष्टो अ॒पो नर्यः॒ सुजा॑तः
   जनि॑ष्ट उ अ॒पः नर्यः सुजा॑तः
   जनि॑ष्टो अ॒पो नरि॑यः सुजा॑तः

Halfverse: d    प्रोर्वशी॑ तिरत दी॒र्घमायुः॑ ।।
   प्र उ॒र्वशी तिरत दी॒र्घम् आयुः ।।
   प्र उर्वशी तिरत दी॒र्घम् आयुः ।।


Verse: 11 
Halfverse: a    ज॑ज्ञि॒ष इ॒त्था गो॒पीथ्या॑य॒ हि द॒धाथ॒ तत्पु॑रूरवो म॒ ओजः॑ ।
   ज॑ज्ञि॒ष इ॒त्था गो॒पीथ्या॑य॒ हि
   ज॑ज्ञि॒षे इ॒त्था गो॒पीथ्या॑य हि
   ज॑ज्ञि॒ष इ॒त्था गोओ॒पीथि॑याय हि

Halfverse: b    द॒धाथ॒ तत्पु॑रूरवो म॒ ओजः॑ ।
   द॒धाथ तत् पुरूरवः मे ओजः ।
   द॒धाथ तत् पुरूरवो म ओजः ।

Halfverse: c    अशा॑सं त्वा वि॒दुषी॒ सस्मि॒न्नह॒न्न म॒ आशृ॑णोः॒ किम॒भुग्व॑दासि ।।
   अशा॑सं त्वा वि॒दुषी॒ सस्मि॒न्नह॑न्
   अशा॑सम् त्वा वि॒दुषी सस्मि॑न् अह॑न्
   अशा॑सं त्वा वि॒दुषी सस्मि॑न् अह॑न्

Halfverse: d    न म॒ आशृ॑णोः॒ किम॒भुग्व॑दासि ।।
   न मे आ अ॑शृणोः किम् अ॒भुक् वदासि ।।
   न म आशृ॑णोः किम् अ॒भुग् वदासि ।।


Verse: 12 
Halfverse: a    क॒दा सू॒नुः पि॒तरं॑ जा॒त इ॑छाच्च॒क्रन्नाश्रु॑ वर्तयद्विजा॒नन् ।
   क॒दा सू॒नुः पि॒तरं॑ जा॒त इ॑छाच्
   क॒दा सू॒नुः पि॒तर॑म् जा॒तः इ॑छात्
   क॒दा सू॒नुः पि॒तरं जा॒त इ॑छाच्

Halfverse: b    च॒क्रन्नाश्रु॑ वर्तयद्विजा॒नन् ।
   च॒क्रम् ! न अश्रु वर्तयत् विजा॒नन् ।
   च॒क्रन् न अश्रु वर्तयद् विजा॒नन् ।

Halfverse: c    को दम्प॑ती॒ सम॑नसा॒ वि यू॑यो॒दध॒ यद॒ग्निः श्वशु॑रेषु॒ दीद॑यत् ।।
   को दम्प॑ती॒ सम॑नसा॒ वि यू॑योद्
   कः दम्प॑ती सम॑नसा वि यू॑योत्
   को दम्प॑ती सम॑नसा वि यू॑योद्

Halfverse: d    अध॒ यद॒ग्निः श्वशु॑रेषु॒ दीद॑यत् ।।
   अध यत् अ॒ग्निः श्वशु॑रेषु दीद॑यत् ।।
   अध यद् अ॒ग्निः श्वशु॑रेषु दीद॑यत् ।।


Verse: 13 
Halfverse: a    प्रति॑ ब्रवाणि व॒र्तय॑ते॒ अश्रु॑ च॒क्रन्न क्र॑न्ददा॒ध्ये॑ शि॒वायै॑ ।
   प्रति॑ ब्रवाणि व॒र्तय॑ते॒ अश्रु
   प्रति ब्रवाणि व॒र्तय॑ते अश्रु
   प्रति ब्रवाणि व॒र्तय॑ते अश्रु

Halfverse: b    च॒क्रन्न क्र॑न्ददा॒ध्ये॑ शि॒वायै॑ ।
   च॒क्रम् ! न क्र॑न्दत् आ॒ध्ये शि॒वायै ।
   च॒क्रन् न क्र॑न्दद् आ॒धिये शि॒वायै ।

Halfverse: c    प्र तत्ते॑ हिनवा॒ यत्ते॑ अ॒स्मे परे॒ह्यस्तं॑ न॒हि मू॑र॒ मापः॑ ।।
   प्र तत्ते॑ हिनवा॒ यत्ते॑ अ॒स्मे
   प्र तत् ते हिनवा ! यत् ते अ॒स्मे
   प्र तत् ते ? हिनवा यत् ते अ॒स्मे

Halfverse: d    परे॒ह्यस्तं॑ न॒हि मू॑र॒ मापः॑ ।।
   परा इहि अस्त॑म् न॒हि मू॑र मा आपः ।।
   परे॑हि अस्तं न॒हि मू॑र मापः ।।


Verse: 14 
Halfverse: a    सु॑दे॒वो अ॒द्य प्र॒पते॒दना॑वृत्परा॒वत॑म्पर॒मां गन्त॒वा उ॑ ।
   सु॑दे॒वो अ॒द्य प्र॒पते॒दना॑वृत्
   सुदे॒वः अ॒द्य प्र॒पते॑त् अना॑वृत्
   सुदे॒वो अ॒द्य प्र॒पते॑द् अना॑वृत्

Halfverse: b    परा॒वत॑म्पर॒मां गन्त॒वा उ॑ ।
   प॑रा॒वत॑म् पर॒माम् गन्त॒वै उ ।
   प॑रा॒वत॑म् पर॒मां गन्त॒वा उ ।

Halfverse: c    अधा॒ शयी॑त॒ निरृ॑तेरु॒पस्थे ऽधै॑नं॒ वृका॑ रभ॒सासो॑ अ॒द्युः ।।
   अधा॒ शयी॑त॒ निरृ॑तेरु॒पस्थे
   अध+ शयी॑त निरृ॑तेः उ॒पस्थे
   अधा शयी॑त निरृ॑तेर् उ॒पस्थे

Halfverse: d    ऽधैनं॒ वृका॑ रभ॒सासो॑ अ॒द्युः ।।
   अध एनम् वृकाः रभ॒सासः अ॒द्युः ।।
   अधै॑नं वृका रभ॒सासो अ॒द्युः ।।


Verse: 15 
Halfverse: a    पुरू॑रवो॒ मा मृ॑था॒ मा प्र प॑प्तो॒ मा त्वा॒ वृका॑सो॒ अशि॑वास उ क्षन् ।
   पुरू॑रवो॒ मा मृ॑था॒ मा प्र प॑प्तो
   पुरू॑रवः मा मृ॑थाः मा प्र प॑प्तः
   पुरू॑रवो मा मृ॑था मा प्र प॑प्तो

Halfverse: b    मा त्वा॒ वृका॑सो॒ अशि॑वास उ क्षन् ।
   मा त्वा वृका॑सः अशि॑वासः उ क्षन् ।
   मा त्वा वृका॑सो अशि॑वास उ क्षन् ।

Halfverse: c    न वै स्त्रैणा॑नि स॒ख्यानि॑ सन्ति सालावृ॒काणां॒ हृद॑यान्ये॒ता ।।
   न वै स्त्रैणा॑नि स॒ख्यानि॑ सन्ति
   न वै स्त्रैणा॑नि स॒ख्यानि सन्ति
   न वै स्त्रैणा॑नि सखि॒यानि सन्ति

Halfverse: d    सालावृ॒काणां॒ हृद॑यान्ये॒ता ।।
   सा॑लावृ॒काणा॑म् हृद॑यानि ए॒ता ।।
   सा॑लावृ॒काणां हृद॑यानि ए॒ता ।।


Verse: 16 
Halfverse: a    यद्विरू॒पाच॑र॒म्मर्त्ये॒ष्वव॑सं॒ रात्रीः॑ श॒रद॒श्चत॑स्रः ।
   यद्विरू॒पाच॑र॒म्मर्त्ये॑ष्व्
   यत् विरू॑पा अच॑रम् मर्त्ये॑षु
   यद् विरू॑पा अच॑रम् मर्ति॑येषु

Halfverse: b    अव॑सं॒ रात्रीः॑ श॒रद॒श्चत॑स्रः ।
   अव॑सम् रात्रीः श॒रदः चत॑स्रः ।
   अव॑सं रात्रीः श॒रद॑श् चत॑स्रः ।

Halfverse: c    घृ॒तस्य॑ स्तो॒कं स॒कृदह्न॑ आश्नां॒ तादे॒वेदं ता॑तृपा॒णा च॑रामि ।।
   घृ॒तस्य॑ स्तो॒कं स॒कृदह्न॑ आश्नां
   घृ॒तस्य स्तो॒कम् स॒कृत् अह्नः आश्नाम्
   घृ॒तस्य स्तो॒कं स॒कृद् अह्न आश्नां

Halfverse: d    तादे॒वेदं ता॑तृपा॒णा च॑रामि ।।
   तात् ए॒व इ॒दम् तातृपा॒णा च॑रामि ।।
   ताद् ए॒वेदं ता॑तृपा॒णा च॑रामि ।।


Verse: 17 
Halfverse: a    अ॑न्तरिक्ष॒प्रां रज॑सो वि॒मानी॒मुप॑ शिक्षाम्यु॒र्वशीं॒ वसि॑ष्ठः ।
   अ॑न्तरिक्ष॒प्रां रज॑सो वि॒मानी॑म्
   अन्तरिक्ष॒प्राम् रज॑सः वि॒मानी॑म्
   अन्तरिक्ष॒प्रां रज॑सो वि॒मानी॑म्

Halfverse: b    उप॑ शिक्षाम्यु॒र्वशीं॒ वसि॑ष्ठः ।
   उप शिक्षामि उ॒र्वशी॑म् वसि॑ष्ठः ।
   उप शिक्षामि उ॒र्वशीं वसि॑ष्ठः ।

Halfverse: c    उप॑ त्वा रा॒तिः सु॑कृ॒तस्य॒ तिष्ठा॒न्नि व॑र्तस्व॒ हृद॑यं तप्यते मे ।।
   उप॑ त्वा रा॒तिः सु॑कृ॒तस्य॒ तिष्ठा॑न्
   उप त्वा रा॒तिः सु॑कृ॒तस्य तिष्ठा॑त्
   उप त्वा रा॒तिः सु॑कृ॒तस्य तिष्ठा॑न्

Halfverse: d    नि व॑र्तस्व॒ हृद॑यं तप्यते मे ।।
   नि व॑र्तस्व हृद॑यम् तप्यते मे ।।
   नि व॑र्तस्व हृद॑यं तप्यते मे ।।


Verse: 18 
Halfverse: a    इति॑ त्वा दे॒वा इ॒म आ॑हुऐळ॒ यथे॑मे॒तद्भव॑सि मृ॒त्युब॑न्धुः ।
   इति॑ त्वा दे॒वा इ॒म आ॑हुऐळ
   इति त्वा दे॒वाः इ॒मे आ॑हुः ऐळ
   इति त्वा दे॒वा इ॒म आ॑हुर् ऐळ

Halfverse: b    यथे॑मे॒तद्भव॑सि मृ॒त्युब॑न्धुः ।
   यथा ईम् ए॒तत् भव॑सि मृ॒त्युब॑न्धुः ।
   यथे॑म् ए॒तद् भव॑सि मृ॒त्युब॑न्धुः ।

Halfverse: c    प्र॒जा ते॑ दे॒वान्ह॒विषा॑ यजाति स्व॒र्ग उ॒ त्वमपि॑ मादयासे ।।
   प्र॒जा ते॑ दे॒वान्ह॒विषा॑ यजाति
   प्र॒जा ते दे॒वान् ह॒विषा यजाति
   प्र॒जा ते दे॒वान् ह॒विषा यजाति

Halfverse: d    स्व॒र्ग उ॒ त्वमपि॑ मादयासे ।।
   स्व॒र्गे उ त्वम् अपि मादयासे ।।
   सु॑व॒र्ग उ त्वम् अपि मादयासे ।।



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.