TITUS Texts: Rg-Veda: Rg-Veda-Samhita

TITUS
Rg-Veda: Rg-Veda-Samhita
Part No. 934

Hymn: 97_(923)
Verse: 1
Halfverse: a    या ओष॑धीः॒ पूर्वा॑ जा॒ता दे॒वेभ्य॑स्त्रियु॒गम्पु॒रा ।
   या ओष॑धीः॒ पूर्वा॑ जा॒ता
   याः ओष॑धीः पूर्वाः जा॒ताः
   या ओष॑धीः पूर्वा जा॒ता

Halfverse: b    दे॒वेभ्य॑स्त्रियु॒गम्पु॒रा ।
   दे॒वेभ्यः त्रियु॒गम् पु॒रा ।
   दे॒वेभ्य॑स् त्रियु॒गम् पु॒रा ।

Halfverse: c    मनै॒ नु ब॒भ्रूणा॑म॒हं श॒तं धामा॑नि स॒प्त च॑ ।।
   मनै॒ नु ब॒भ्रूणा॑म॒हं
   मनै नु ब॒भ्रूणा॑म् अ॒हम्
   मनै नु ब॒भ्रूणा॑म् अ॒हं

Halfverse: d    श॒तं धामा॑नि स॒प्त च॑ ।।
   श॒तम् धामा॑नि स॒प्त च ।।
   श॒तं धामा॑नि स॒प्त च ।।

Verse: 2
Halfverse: a    श॒तं वो॑ अम्ब॒ धामा॑नि स॒हस्र॑मु॒त वो॒ रुहः॑ ।
   श॒तं वो॑ अम्ब॒ धामा॑नि
   श॒तम् वः अम्ब धामा॑नि
   श॒तं वो अम्ब धामा॑नि

Halfverse: b    स॒हस्र॑मु॒त वो॒ रुहः॑ ।
   स॒हस्र॑म् उ॒त वः रुहः ।
   स॒हस्र॑म् उ॒त वो रुहः ।

Halfverse: c    अधा॑ शतक्रत्वो यू॒यमि॒मम्मे॑ अग॒दं कृ॑त ।।
   अधा॑ शतक्रत्वो यू॒यम्
   अध+ शतक्रत्वः यू॒यम्
   अधा शतक्रत्वो यू॒यम्

Halfverse: d    इ॒मम्मे॑ अग॒दं कृ॑त ।।
   इ॒मम् मे अग॒दम् कृत ।।
   इ॒मम् मे अग॒दं कृ॑त ।।

Verse: 3
Halfverse: a    ओष॑धीः॒ प्रति॑ मोदध्व॒म्पुष्प॑वतीः प्र॒सूव॑रीः ।
   ओष॑धीः॒ प्रति॑ मोदध्वम्
   ओष॑धीः प्रति मोदध्वम्
   ओष॑धीः प्रति मोदध्वम्

Halfverse: b    पुष्प॑वतीः प्र॒सूव॑रीः ।
   पुष्प॑वतीः प्र॒सूव॑रीः ।
   पुष्प॑वतीः प्र॒सूव॑रीः ।

Halfverse: c    अश्वा॑ इव स॒जित्व॑रीर्वी॒रुधः॑ पारयि॒ष्ण्वः॑ ।।
   अश्वा॑ इव स॒जित्व॑रीर्
   अश्वाः इव स॒जित्व॑रीः
   अश्वा इव स॒जित्व॑रीर्

Halfverse: d    वी॒रुधः॑ पारयि॒ष्ण्वः॑ ।।
   वी॒रुधः पारयि॒ष्ण्वः ।।
   वी॒रुधः पारयि॒ष्णुवः ।।

Verse: 4
Halfverse: a    ओष॑धी॒रिति॑ मातर॒स्तद्वो॑ देवी॒रुप॑ ब्रुवे ।
   ओष॑धी॒रिति॑ मातरस्
   ओष॑धीः इति मातरः
   ओष॑धीर् इति मातरस्

Halfverse: b    तद्वो॑ देवी॒रुप॑ ब्रुवे ।
   तत् वः देवीः उप ब्रुवे ।
   तद् वो देवीर् उप ब्रुवे ।

Halfverse: c    स॒नेय॒मश्वं॒ गां वास॑ आ॒त्मानं॒ तव॑ पूरुष ।।
   स॒नेय॒मश्वं॒ गां वास
   स॒नेय॑म् अश्व॑म् गाम् वासः
   स॒नेय॑म् अश्वं गां वास

Halfverse: d    आ॒त्मानं॒ तव॑ पूरुष ।।
   आ॒त्मान॑म् तव पूरुष ।।
   आ॒त्मानं तव पूरुष ।।

Verse: 5
Halfverse: a    अ॑श्व॒त्थे वो॑ नि॒षद॑नम्प॒र्णे वो॑ वस॒तिष्कृ॒ता ।
   अ॑श्व॒त्थे वो॑ नि॒षद॑नम्
   अश्व॒त्थे वः नि॒षद॑नम्
   अश्व॒त्थे वो नि॒षद॑नम्

Halfverse: b    प॒र्णे वो॑ वस॒तिष्कृ॒ता ।
   प॒र्णे वः वस॒तिः कृ॒ता ।
   प॒र्णे वो वस॒तिष् कृ॒ता ।

Halfverse: c    गो॒भाज॒ इत्किला॑सथ॒ यत्स॒नव॑थ॒ पूरु॑षम् ।।
   गो॒भाज॒ इत्किला॑सथ
   गो॒भाजः इत् किल असथ
   गो॒भाज इत् किला॑सथ

Halfverse: d    यत्स॒नव॑थ॒ पूरु॑षम् ।।
   यत् स॒नव॑थ पूरु॑षम् ।।
   यत् स॒नव॑थ पूरु॑षम् ।।

Verse: 6
Halfverse: a    यत्रौष॑धीः स॒मग्म॑त॒ राजा॑नः॒ समि॑ताविव ।
   यत्रौष॑धीः स॒मग्म॑त
   यत्र ओष॑धीः स॒मग्म॑त
   यत्रौष॑धीः स॒मग्म॑त

Halfverse: b    राजा॑नः॒ समि॑ताविव ।
   राजा॑नः समि॑तौ इव ।
   राजा॑नः समि॑ताव् इव ।

Halfverse: c    विप्रः॒ स उ॑च्यते भि॒षग्र॑क्षो॒हामी॑व॒चात॑नः ।।
   विप्रः॒ स उ॑च्यते भि॒षग्
   विप्रः सः ।!। उ॑च्यते भि॒षक्
   विप्रः स उ॑च्यते भि॒षग्

Halfverse: d    रक्षो॒हामी॑व॒चात॑नः ।।
   र॑क्षो॒हा अ॑मीव॒चात॑नः ।।
   र॑क्षो॒हामी॑व॒चात॑नः ।।

Verse: 7
Halfverse: a    अ॑श्वाव॒तीं सो॑माव॒तीमू॒र्जय॑न्ती॒मुदो॑जसं ।.। ।
   अ॑श्वाव॒तीं सो॑माव॒तीम्
   अश्वाव॒तीम् सोमाव॒तीम्
   अश्वाव॒तीं सो॑माव॒तीम्

Halfverse: b    ऊ॒र्जय॑न्ती॒मुदो॑जसं ।
   ऊ॒र्जय॑न्तीम् उदो॑जसम् ।
   ऊ॒र्जय॑न्तीम् उदो॑जसम् ।

Halfverse: c    आवि॑त्सि॒ सर्वा॒ ओष॑धीर॒स्मा अ॑रि॒ष्टता॑तये ।।
   आवि॑त्सि॒ सर्वा॒ ओष॑धीर्
   आ अ॑वित्सि सर्वाः ओष॑धीः
   आवि॑त्सि सर्वा ओष॑धीर्

Halfverse: d    अ॒स्मा अ॑रि॒ष्टता॑तये ।।
   अ॒स्मै अ॑रि॒ष्टता॑तये ।।
   अ॒स्मा अ॑रि॒ष्टता॑तये ।।

Verse: 8
Halfverse: a    उच्छुष्मा॒ ओष॑धीनां॒ गावो॑ गो॒ष्ठादि॑वेरते ।
   उच्छुष्मा॒ ओष॑धीनां
   उत् शुष्माः ओष॑धीनाम्
   उच् छुष्मा ओष॑धीनाअं

Halfverse: b    गावो॑ गो॒ष्ठादि॑वेरते ।
   गावः गो॒ष्ठात् इव ईरते ।
   गावो गो॒ष्ठाद् इवेरते ।

Halfverse: c    धनं॑ सनि॒ष्यन्ती॑नामा॒त्मानं॒ तव॑ पूरुष ।।
   धनं॑ सनि॒ष्यन्ती॑नाम्
   धन॑म् सनि॒ष्यन्ती॑नाम्
   धनं सनि॒ष्यन्ती॑नाअम्

Halfverse: d    आ॒त्मानं॒ तव॑ पूरुष ।।
   आ॒त्मान॑म् तव पूरुष ।।
   आ॒त्मानं तव पूरुष ।।

Verse: 9
Halfverse: a    इष्कृ॑ति॒र्नाम॑ वो मा॒ताथो॑ यू॒यं स्थ॒ निष्कृ॑तीः ।
   इष्कृ॑ति॒र्नाम॑ वो मा॒ता
   इष्कृ॑तिः नाम वः मा॒ता
   इष्कृ॑तिर् नाम वो मा॒ता

Halfverse: b     अथो॑ यू॒यं स्थ॒ निष्कृ॑तीः ।
   अथ उ यू॒यम् स्थ निष्कृ॑तीः ।
   अथो यू॒यं स्थ निष्कृ॑तीः ।

Halfverse: c    सी॒राः प॑त॒त्रिणी॑ स्थन॒ यदा॒मय॑ति॒ निष्कृ॑थ ।।
   सी॒राः प॑त॒त्रिणी॑ ।!। स्थ॑न
   सी॒राः प॑त॒त्रिणीः स्थन
   सी॒राः प॑त॒त्रिणी स्थन

Halfverse: d    यदा॒मय॑ति॒ निष्कृ॑थ ।।
   यत् आ॒मय॑ति निः कृ॑थ ।।
   यद् आ॒मय॑ति निष् कृथ ।।

Verse: 10
Halfverse: a    अति॒ विश्वाः॑ परि॒ष्ठा स्ते॒न इ॑व व्र॒जम॑क्रमुः ।
   अति॒ विश्वाः॑ परि॒ष्ठा
   अति विश्वाः परि॒ष्ठाः
   अति विश्वाः परि॒ष्ठा

Halfverse: b    स्ते॒न इ॑व व्र॒जम॑क्रमुः ।
   स्ते॒नः इ॑व व्र॒जम् अक्रमुः ।
   स्ते॒न ऽव % व्र॒जम् अक्रमुः ।

Halfverse: c    ओष॑धीः॒ प्राचु॑च्यवु॒र्यत्किं च॑ त॒न्वो॒ रपः॑ ।।
   ओष॑धीः॒ प्राचु॑च्यवुर्
   ओष॑धीः प्र अ॑चुच्यवुः
   ओष॑धीः प्र अ॑चुच्यवुर्

Halfverse: d    यत्किं च॑ त॒न्वो॒ रपः॑ ।।
   यत् किम् च त॒न्वः रपः ।।
   यत् किं च त॒नुवो रपः ।।

Verse: 11
Halfverse: a    यदि॒मा वा॒जय॑न्न॒हमोष॑धी॒र्हस्त॑ आद॒धे ।
   यदि॒मा वा॒जय॑न्न॒हम्
   यत् इ॒माः वा॒जय॑न् अ॒हम्
   यद् इ॒मा वा॒जय॑न्न् अ॒हम्

Halfverse: b    ओष॑धी॒र्हस्त॑ आद॒धे ।
   ओष॑धीः हस्ते आद॒धे ।
   ओष॑धीर् हस्त आद॒धे ।

Halfverse: c    आ॒त्मा यक्ष्म॑स्य नश्यति पु॒रा जी॑व॒गृभो॑ यथा ।।
   आ॒त्मा यक्ष्म॑स्य नश्यति
   आ॒त्मा यक्ष्म॑स्य नश्यति
   आ॒त्मा यक्ष्म॑स्य नश्यति

Halfverse: d    पु॒रा जी॑व॒गृभो॑ यथा ।।
   पु॒रा जी॑व॒गृभः यथा ।।
   पु॒रा जी॑व॒गृभो यथा ।।

Verse: 12
Halfverse: a    यस्यौ॑षधीः प्र॒सर्प॒थाङ्ग॑म्ङ्ग॒म्परु॑ष्परुः ।
   यस्यौ॑षधीः प्र॒सर्प॑थ
   यस्य ओषधीः प्र॒सर्प॑थ
   यस्यौ॑षधीः प्र॒सर्प॑थ

Halfverse: b     अङ्ग॑म्ङ्गम् ।!। परु॑ष्परुः ।
   अङ्ग॑म्ङ्गम् परु॑ष्परुः ।
   अङ्ग॑म्ङ्गम् परु॑ष्परुः ।

Halfverse: c    ततो॒ यक्ष्मं॒ वि बा॑धध्व उ॒ग्रो म॑ध्यम॒शीरि॑व ।।
   ततो॒ यक्ष्मं॒ वि बा॑धध्व
   ततः यक्ष्म॑म् वि बा॑धध्वे
   ततो यक्ष्मं वि बा॑धध्व

Halfverse: d    उ॒ग्रो म॑ध्यम॒शीरि॑व ।।
   उ॒ग्रः म॑ध्यम॒शीः इ॑व ।।
   उ॒ग्रो म॑ध्यम॒शीर् इव ।।

Verse: 13
Halfverse: a    सा॒कं य॑क्ष्म॒ प्र प॑त॒ चाषे॑ण किकिदी॒विना॑ ।
   सा॒कं य॑क्ष्म॒ प्र प॑त
   सा॒कम् यक्ष्म प्र प॑त
   सा॒कं य॑क्ष्म प्र प॑त

Halfverse: b    चाषे॑ण किकिदी॒विना॑ ।
   चाषे॑ण किकिदी॒विना ।
   चाषे॑ण किकिदी॒विना ।

Halfverse: c    सा॒कं वात॑स्य॒ ध्राज्या॑ सा॒कं न॑श्य नि॒हाक॑या ।।
   सा॒कं वात॑स्य॒ ध्राज्या
   सा॒कम् वात॑स्य ध्राज्या
   सा॒कं वात॑स्य ध्राजि॑या

Halfverse: d    सा॒कं न॑श्य नि॒हाक॑या ।।
   सा॒कम् नश्य नि॒हाक॑या ।।
   सा॒कं न॑श्य नि॒हाक॑या ।।

Verse: 14
Halfverse: a    अ॒न्या वो॑ अ॒न्याम॑वत्व॒न्यान्यस्या॒ उपा॑वत ।
   अ॒न्या वो॑ अ॒न्याम॑वत्व्
   अ॒न्या वः अ॒न्याम् अवतु
   अ॒न्या वो अ॒न्याम् अवतु

Halfverse: b    अ॒न्यान्यस्या॒ उपा॑वत ।
   अ॒न्या अ॒न्यस्यै ! उप अवत ।
   अ॒न्यान्यस्या उपा॑वत ।

Halfverse: c    ताः सर्वाः॑ संविदा॒ना इ॒दम्मे॒ प्राव॑ता॒ वचः॑ ।।
   ताः सर्वाः॑ संविदा॒ना
   ताः सर्वाः संविदा॒नाः
   ताः सर्वाः संविदा॒ना

Halfverse: d    इ॒दम्मे॒ प्राव॑ता॒ वचः॑ ।।
   इ॒दम् मे प्र अ॑वत+ वचः ।।
   इ॒दम् मे प्राव॑ता वचः ।।

Verse: 15
Halfverse: a    याः प॒लिनी॒र्या अ॑प॒ला अ॑पु॒ष्पा याश्च॑ पु॒ष्पिणीः॑ ।
   याः प॒लिनी॒र्या अ॑प॒ला
   याः प॒लिनीः याः अ॑प॒लाः
   याः प॒लिनी॑र् या अ॑प॒ला

Halfverse: b    अ॑पु॒ष्पा याश्च॑ पु॒ष्पिणीः॑ ।
   अ॑पु॒ष्पाः याः च पु॒ष्पिणीः ।
   अ॑पु॒ष्पा याश् च पु॒ष्पिणीः ।

Halfverse: c    बृह॒स्पति॑प्रसूता॒स्ता नो॑ मुञ्च॒न्त्वंह॑सः ।।
   बृह॒स्पति॑प्रसूतास्
   बृह॒स्पति॑प्रसूताः
   बृह॒स्पति॑प्रसूतास्

Halfverse: d    ता नो॑ मुञ्च॒न्त्वंह॑सः ।।
   ताः नः मुञ्चन्तु अंह॑सः ।।
   ता नो मुञ्चन्तु अंह॑सः ।।

Verse: 16
Halfverse: a    मु॒ञ्चन्तु॑ मा शप॒थ्या॒दथो॑ वरु॒ण्या॑दु॒त ।
   मु॒ञ्चन्तु॑ मा शप॒थ्या॑द्
   मु॒ञ्चन्तु मा शप॒थ्या॑त्
   मु॒ञ्चन्तु मा शप॒थिया॑द्

Halfverse: b    अथो॑ वरु॒ण्या॑दु॒त ।
   अथ उ वरु॒ण्या॑त् उ॒त ।
   अथो वरु॒णिया॑द् उ॒त ।

Halfverse: c    अथो॑ य॒मस्य॒ पड्बी॑शा॒त्सर्व॑स्माद्देवकिल्बि॒षात् ।।
   अथो॑ य॒मस्य॒ पड्बी॑शात्
   अथ उ य॒मस्य पड्बी॑शात्
   अथो य॒मस्य पड्बी॑शात्

Halfverse: d    सर्व॑स्माद्देवकिल्बि॒षात् ।।
   सर्व॑स्मात् देवकिल्बि॒षात् ।।
   सर्व॑स्माद् देवकिल्बि॒षात् ।।

Verse: 17
Halfverse: a    अ॑व॒पत॑न्तीरवदन्दि॒व ओष॑धय॒स्परि॑ ।
   अ॑व॒पत॑न्तीरवदन्
   अव॒पत॑न्तीः अवदन्
   अव॒पत॑न्तीर् अवदन्

Halfverse: b    दि॒व ओष॑धय॒स्परि॑ ।
   दि॒वः ओष॑धयः परि ।
   दि॒व ओष॑धयस् परि ।

Halfverse: c    यं जी॒वम॒श्नवा॑महै॒ न स रि॑ष्याति॒ पूरु॑षः ।।
   यं जी॒वम॒श्नवा॑महै
   यम् जी॒वम् अ॒श्नवा॑महै
   यं जी॒वम् अ॒श्नवा॑महै

Halfverse: d    न स रि॑ष्याति॒ पूरु॑षः ।।
   न स रि॑ष्याति पूरु॑षः ।।
   न स रि॑ष्याति पूरु॑षः ।।

Verse: 18
Halfverse: a    या ओष॑धीः॒ सोम॑राज्ञीर्ब॒ह्वीः श॒तवि॑चक्षणाः ।
   या ओष॑धीः॒ सोम॑राज्ञीर्
   याः ओष॑धीः सोम॑राज्ञीः
   या ओष॑धीः सोम॑राज्ञीर्

Halfverse: b    ब॒ह्वीः श॒तवि॑चक्षणाः ।
   ब॒ह्वीः श॒तवि॑चक्षणाः ।
   ब॒ह्वीः श॒तवि॑चक्षणाः ।

Halfverse: c    तासां॒ त्वम॑स्युत्त॒मारं॒ कामा॑य॒ शं हृ॒दे ।।
   तासां॒ त्वम॑स्युत्त॒मा
   तासा॑म् त्वम् असि उत्त॒मा
   तासां त्वम् असि उत्त॒मा

Halfverse: d     अरं॒ कामा॑य॒ शं हृ॒दे ।।
   अर॑म् कामा॑य शम् हृ॒दे ।।
   अरं कामा॑य शं हृ॒दे ।।

Verse: 19
Halfverse: a    या ओष॑धीः॒ सोम॑राज्ञी॒र्विष्ठि॑ताः पृथि॒वीमनु॑ ।
   या ओष॑धीः॒ सोम॑राज्ञीर्
   याः ओष॑धीः सोम॑राज्ञीः
   या ओष॑धीः सोम॑राज्ञीर्

Halfverse: b    विष्ठि॑ताः पृथि॒वीमनु॑ ।
   विष्ठि॑ताः पृथि॒वीम् अनु ।
   विष्ठि॑ताः पृथि॒वीम् अनु ।

Halfverse: c    बृह॒स्पति॑प्रसूता अ॒स्यै सं द॑त्त वी॒र्य॑म् ।।
   बृह॒स्पति॑प्रसूता
   बृह॒स्पति॑प्रसूताः
   बृह॒स्पति॑प्रसूता

Halfverse: d    अ॒स्यै सं द॑त्त वी॒र्य॑म् ।।
   अ॒स्यै सम् दत्त वी॒र्य॑म् ।।
   अ॒स्यै सं द॑त्त वी॒रिय॑म् ।।

Verse: 20
Halfverse: a    मा वो॑ रिषत्खनि॒ता यस्मै॑ चा॒हं खना॑मि वः ।
   मा वो॑ रिषत्खनि॒ता
   मा वः रिषत् खनि॒ता
   मा वो रिषत् खनि॒ता

Halfverse: b    यस्मै॑ चा॒हं खना॑मि वः ।
   यस्मै च अ॒हम् खना॑मि वः ।
   यस्मै चा॒हं खना॑मि वः ।

Halfverse: c    द्वि॒पच्चतु॑ष्पद॒स्माकं॒ सर्व॑मस्त्वनातु॒रम् ।।
   द्वि॒पच्चतु॑ष्पद॒स्माकं
   द्वि॒पत् चतु॑ष्पत् अ॒स्माक॑म्
   द्वि॒पच् चतु॑ष्पद् अ॒स्माकं

Halfverse: d    सर्व॑मस्त्वनातु॒रम् ।।
   सर्व॑म् अस्तु अनातु॒रम् ।।
   सर्व॑म् अस्तु अनातु॒रम् ।।

Verse: 21
Halfverse: a    याश्चे॒दमु॑पशृ॒ण्वन्ति॒ याश्च॑ दू॒रम्परा॑गताः ।
   याश्चे॒दमु॑पशृ॒ण्वन्ति
   याः च इ॒दम् उपशृ॒ण्वन्ति
   याश् चे॒दम् उपशृ॒ण्वन्ति

Halfverse: b    याश्च॑ दू॒रम्परा॑गताः ।
   याः च दू॒रम् परा॑गताः ।
   याश् च दू॒रम् परा॑गताः ।

Halfverse: c    सर्वाः॑ सं॒गत्य॑ वीरुधो॒ ऽस्यै सं द॑त्त वी॒र्य॑म् ।।
   सर्वाः॑ सं॒गत्य॑ वीरुधो
   सर्वाः सं॒गत्य वीरुधः
   सर्वाः सं॒गत्य वीरुधो

Halfverse: d    ऽस्यै सं द॑त्त वी॒र्य॑म् ।।
   अ॒स्यै सम् दत्त वी॒र्य॑म् ।।
   अ॒स्यै सं द॑त्त वी॒रिय॑म् ।।

Verse: 22
Halfverse: a    ओष॑धयः॒ सं व॑दन्ते॒ सोमे॑न स॒ह राज्ञा॑ ।
   ओष॑धयः॒ सं व॑दन्ते
   ओष॑धयः सम् वदन्ते
   ओष॑धयः सं व॑दन्ते

Halfverse: b    सोमे॑न स॒ह राज्ञा॑ ।
   सोमे॑न स॒ह राज्ञा ।
   सोमे॑न स॒ह राज॑ञा ।

Halfverse: c    यस्मै॑ कृ॒णोति॑ ब्राह्म॒णस्तं रा॑जन्पारयामसि ।।
   यस्मै॑ कृ॒णोति॑ ब्राह्म॒णस्
   यस्मै कृ॒णोति ब्राह्म॒णः
   यस्मै कृ॒णोति ब्राह्म॒णस्

Halfverse: d    तं रा॑जन्पारयामसि ।।
   तम् राजन् पारयामसि ।।
   तं रा॑जन् पारयामसि ।।

Verse: 23
Halfverse: a    त्वमु॑त्त॒मास्यो॑षधे॒ तव॑ वृ॒क्षा उप॑स्तयः ।
   त्वमु॑त्त॒मास्यो॑षधे
   त्वम् उत्त॒मा अ॑सि ओषधे
   त्वम् उत्त॒मासि ओषधे

Halfverse: b    तव॑ वृ॒क्षा उप॑स्तयः ।
   तव वृ॒क्षाः उप॑स्तयः ।
   तव वृ॒क्षा उप॑स्तयः ।

Halfverse: c    उप॑स्तिरस्तु॒ सो॒ ऽस्माकं॒ यो अ॒स्माँ अ॑भि॒दास॑ति ।।
   उप॑स्तिरस्तु॒ सो॒ ऽस्माकं
   उप॑स्तिः अस्तु सः ।!। अ॒स्माक॑म्
   उप॑स्तिर् अस्तु सो ऽस्माकं

Halfverse: d    यो अ॒स्माँ अ॑भि॒दास॑ति ।।
   यः अ॒स्मान् अभि॒दास॑ति ।।
   यो अ॒स्माँ अ॑भि॒दास॑ति ।।

This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.