TITUS
Black Yajur-Veda: Taittiriya-Samhita
Part No. 10
Previous part

Chapter: 2 
Paragraph: 1 
Verse: 1 
Sentence: 1    प्र॒जाप॑तिः प्र॒जा अ॑सृजत
Sentence: 2    ताः सृ॒ष्टा इ॑न्द्रा॒ग्नी अपा॑गूहताम् ।
Sentence: 3    सो॑ ऽचायत्प्र॒जाप॑तिस् ।
Sentence: 4    इ॑न्द्रा॒ग्नी वै॑ मे प्र॒जा अपा॑घुक्षता॒मिति
Sentence: 5    स ए॒तऐ॑न्द्रा॒ग्नमेका॑दशकपालमपश्यत्
Sentence: 6    तं निर॑वपत्
Sentence: 7    ताव॑स्मै प्र॒जाः प्रासा॑धयताम्
Sentence: 8    इन्द्रा॒ग्नी वा ए॒तस्य॑ प्र॒जामप॑ गूहतो॒ यो ऽल॑म्प्र॒जायै॒ सन्प्र॒जां न वि॒न्दते॑ ।
Sentence: 9    अै॑न्द्रा॒ग्नमेका॑दशकपालं॒ निर्व॑पेत्प्र॒जाका॑मस् ।
Sentence: 10    इ॑न्द्रा॒ग्नी ।।

Verse: 2 
Sentence: 1    ए॒व स्वेन॑ भाग॒धेये॒नोप॑ धावति
Sentence: 2    तावे॒वास्मै॑ प्र॒जाम्प्र सा॑धयतस् ।
Sentence: 3    वि॒न्दते॑ प्र॒जाम्
Sentence: 4    अैन्द्रा॒ग्नमेका॑दशकपालं॒ निर्व॑पे॒त्स्पर्ध॑मानः॒ क्षेत्रे॑ वा सजा॒तेषु॑ वा ।
Sentence: 5    इ॑न्द्रा॒ग्नी ए॒व स्वेन॑ भाग॒धेये॒नोप॑ धावति
Sentence: 6    ताभ्या॑मे॒वेन्द्रि॒यं वी॒र्य॒म्भ्रातृ॑व्यस्य वृङ्क्ते
Sentence: 7    वि पा॒प्मना॒ भ्रातृ॑व्येण जयते ।
Sentence: 8    अप॒ वा ए॒तस्मा॑दिन्द्रि॒यं वी॒र्यं॑ क्रामति॒ यः सं॑ग्रा॒ममु॑पप्र॒याति॑ ।
Sentence: 9    अै॑न्द्रा॒ग्नमेका॑दशकपालं॒ निः ।।

Verse: 3 
Sentence: 1    व॑पेत्संग्रा॒ममु॑पप्रया॒स्यन् ।
Sentence: 2    इ॑न्द्रा॒ग्नी ए॒व स्वेन॑ भाग॒धेये॒नोप॑ धावति
Sentence: 3    तावे॒वास्मि॑न्निन्द्रि॒यं वी॒र्यं॑ धत्तः
Sentence: 4    स॒हेन्द्रि॒येण॑ वी॒र्ये॒णोप॒ प्र या॑ति॒ जय॑ति॒ तं सं॑ग्रा॒मम् ।
Sentence: 5    वि वा ए॒ष इ॑न्द्रि॒येण॑ वी॒र्ये॑णर्ध्यते॒ यः सं॑ग्रा॒मं जय॑ति ।
Sentence: 6    अै॑न्द्रा॒ग्नमेका॑दशकपालं॒ निर्व॑पेत्संग्रा॒मं जि॒त्वा ।
Sentence: 7    इ॑न्द्रा॒ग्नी ए॒व स्वेन॑ भाग॒धेये॒नोप॑ धावति
Sentence: 8    तावे॒वास्मि॑न्निन्द्रि॒यं वी॒र्य॑म् ।।

Verse: 4 
Sentence: 1    ध॑त्तो॒ नेन्द्रि॒येण॑ वी॒र्ये॑ण॒ व्यृ॑ध्यते ।
Sentence: 2    अप॒ वा ए॒तस्मा॑दिन्द्रि॒यं वी॒र्यं॑ क्रामति॒ य एति॑ ज॒नता॑म्
Sentence: 3    अैन्द्रा॒ग्नमेका॑दशकपालं॒ निर्व॑पेज्ज॒नता॑मे॒ष्यन् ।
Sentence: 4    इ॑न्द्रा॒ग्नी ए॒व स्वेन॑ भाग॒धेये॒नोप॑ धावति
Sentence: 5    तावे॒वास्मि॑न्निन्द्रि॒यं वी॒र्यं॑ धत्तः
Sentence: 6    स॒हेन्द्रि॒येण॑ वी॒र्ये॑ण ज॒नता॑मेति
Sentence: 7    पौ॒ष्णं च॒रुमनु॒ निर्व॑पेत्
Sentence: 8    पू॒षा वा इ॑न्द्रि॒यस्य॑ वी॒र्य॑स्यानुप्रदा॒ता
Sentence: 9    पू॒षण॑मे॒व ।।

Verse: 5 
Sentence: 1    स्वेन॑ भाग॒धेये॒नोप॑ धावति
Sentence: 2    स ए॒वास्मा॑ इन्द्रि॒यं वी॒र्य॒मनु॒ प्र य॑छति
Sentence: 3    क्षैत्रप॒त्यं च॒रुं निर्व॑पेज्ज॒नता॑मा॒गत्य॑ ।
Sentence: 4    इ॒यं वै॒ क्षेत्र॑स्य॒ पति॑स् ।
Sentence: 5    अ॒स्यामे॒व प्रति॑ तिष्ठति ।
Sentence: 6    अै॑न्द्रा॒ग्नमेका॑दशकपालमु॒परि॑ष्टा॒न्निर्व॑पेत् ।
Sentence: 7    अ॒स्यामे॒व प्र॑ति॒ष्ठाये॑न्द्रि॒यं वी॒र्य॑मु॒परि॑ष्टादा॒त्मन्ध॑त्ते ।।

Paragraph: 2 
Verse: 1 
Sentence: 1    अ॒ग्नये॑ पथि॒कृते॑ पुरो॒डाश॑म॒ष्टाक॑पालं॒ निर्व॑पे॒द्यो द॑र्शपूर्णमासया॒जी सन्न॑मावा॒स्यां॑ वा पौर्णमा॒सीं वा॑तिपा॒दये॑त्
Sentence: 2    प॒थो वा ए॒षो ऽध्यप॑थेनैति॒ यो द॑र्शपूर्णमासया॒जी सन्न॑मावा॒यां॑ वा पौर्णमा॒सीं वा॑तिपा॒दय॑ति ।
Sentence: 3    अ॒ग्निमे॒व प॑थि॒कृतं॒ स्वेन॑ भाग॒धेये॒नोप॑ धावति
Sentence: 4    स एवैन॒मप॑था॒त्पन्था॒मपि॑ नयति ।
Sentence: 5    अ॑न॒ड्वान्दक्षि॑णा व॒ही ह्य्े॒ष^ ए॒षस्
Sentence: 6    समृ॑द्ध्यै
Sentence: 7    अ॒ग्नये॑ व्र॒तप॑तये ।।

Verse: 2 
Sentence: 1    पु॑रो॒डाश॑म॒ष्टाक॑पालं॒ निर्व॑पे॒द्य आहि॑ताग्निः॒ सन्न॑व्र॒त्यमि॑व॒ चरे॑त् ।
Sentence: 2    अ॒ग्निमे॒व व्र॒तप॑तिं॒ स्वेन॑ भाग॒धेये॒नोप॑ धावति
Sentence: 3    स एवैनं व्र॒तमा ल॑म्भयति
Sentence: 4    व्रत्यो॑ भवति ।
Sentence: 5    अ॒ग्नये॑ रक्षो॒घ्ने पु॑रो॒डाश॑म॒ष्टाक॑पालं॒ निर्व॑पति॒ यं रक्षां॑सि॒ सचे॑रन् ।
Sentence: 6    अ॒ग्निमे॒व र॑क्षो॒हणं॒ स्वेन॑ भाग॒धेये॒नोप॑ धावति
Sentence: 7    स ए॒वास्मा॒द्रक्षां॑स्यप हन्ति
Sentence: 8    निशि॑तायां॒ निर्व॑पेत् ।।

Verse: 3 
Sentence: 1    निशि॑तायां॒ हि रक्षां॑सि प्रे॒रते
Sentence: 2    सम्प्रे॒र्णान्येवैनानि हन्ति
Sentence: 3    परि॑श्रिते याजये॒द्रक्ष॑सा॒मन॑न्ववचाराय
Sentence: 4    रक्षो॒घ्नी या॑ज्यानुवा॒क्ये॑ भवतो॒ रक्ष॑सां॒ स्तृत्यै॑ ।
Sentence: 5    अ॒ग्नये॑ रु॒द्रव॑ते पुरो॒डाश॑म॒ष्टाक॑पालं॒ निर्व॑पेदभि॒चर॑न् ।
Sentence: 6    ए॒षा वा अ॑स्य घो॒रा त॒नूर्यद्रु॒द्रस्
Sentence: 7    तस्मा॑ एवैन॒मा वृ॑श्चति
Sentence: 8    ता॒जगार्ति॒मार्छ॑ति ।
Sentence: 9    अ॒ग्नये॑ सुरभि॒मते॑ पुरो॒डाश॑म॒ष्टाक॑पालं॒ निर्व॑पे॒द्यस्य॒ गावो॑ वा॒ पुरु॑षाः ।।

Verse: 4 
Sentence: 1    वा॑ प्र॒मीये॑र॒न्यो वा॑ बिभी॒यात् ।
Sentence: 2    ए॒षा वा अ॑स्य भेष॒ज्या॑ त॒नूर्यत्सु॑रभि॒मती
Sentence: 3    तयै॒वास्मै॑ भेष॒जं क॑रोति
Sentence: 4    सुरभि॒मते॑ भवति पूतीग॒न्धस्याप॑हत्यै ।
Sentence: 5    अ॒ग्नये॒ क्षाम॑वते पुरो॒डाश॑म॒ष्टाक॑पालं॒ निर्व॑पेत्संग्रा॒मे संय॑त्ते
Sentence: 6    भाग॒धेये॑नैवैनं शमयि॒त्वा परा॑न॒भि निर्दि॑शति
Sentence: 7    यमव॑रेषां॒ विध्य॑न्ति॒ जीव॑ति स^ सस्
Sentence: 8    यम्परे॑षा॒म्प्र स मी॑यते
Sentence: 9    जय॑ति॒ तं सं॑ग्रा॒मम् ।।

Verse: 5 
Sentence: 1    अ॒भि वा ए॒ष ए॒तानु॑च्यति॒ येषा॑म्पूर्वाप॒रा अ॒न्वञ्चः॑ प्र॒मीय॑न्ते
Sentence: 2    पुरुषाहु॒तिर्ह्य॑स्य प्रि॒यत॑मा॒ग्नये॒ क्षाम॑वते पुरो॒डाश॑म॒ष्टाक॑पालं॒ निर्व॑पेत् ।
Sentence: 3    भा॑ग॒धेये॑नैवैनं शमयति
Sentence: 4    नैषाम्पु॒रायु॒षोप॑रः॒ प्र मी॑यते ।
Sentence: 5    अ॒भि वा ए॒ष ए॒तस्य॑ गृ॒हानु॑च्यति॒ यस्य॑ गृ॒हान्दह॑ति ।
Sentence: 6    अ॒ग्नये॒ क्षाम॑वते पुरो॒डाश॑म॒ष्टाक॑पालं॒ निर्व॑पेत् ।
Sentence: 7    भा॑ग॒धेये॑नैवैनं शमयति
Sentence: 8    नास्याप॑रं गृ॒हान्द॑हति ।।

Paragraph: 3 
Verse: 1 
Sentence: 1    अ॒ग्नये॒ कामा॑य पुरो॒डाश॑म॒ष्टाक॑पालं॒ निर्व॑पे॒द्यं कामो॒ नोप॒नमे॑त् ।
Sentence: 2    अ॒ग्निमे॒व कामं॒ स्वेन॑ भाग॒धेये॒नोप॑ धावति
Sentence: 3    स एवैनं॒ कामे॑न॒ सम॑र्धयति ।
Sentence: 4    उपै॑नं॒ कामो॑ नमति ।
Sentence: 5    अ॒ग्नये॒ यवि॑ष्ठाय पुरो॒डाश॑म॒ष्टाक॑पालं॒ निर्व॑पे॒त्स्पर्ध॑मानः॒ क्षेत्रे॑ वा सजा॒तेषु॑ वा ।
Sentence: 6    अ॒ग्निमे॒व यवि॑ष्ठं॒ स्वेन॑ भाग॒धेये॒नोप॑ धावति
Sentence: 7    तेनै॒वेन्द्रि॒यं वी॒र्य॒म्भ्रातृ॑व्यस्य ।।

Verse: 2 
Sentence: 1    यु॑वते
Sentence: 2    वि पा॒प्मना॒ भ्रातृ॑व्येण जयते ।
Sentence: 3    अ॒ग्नये॒ यवि॑ष्ठाय पुरो॒डाश॑म॒ष्टाक॑पालं॒ निर्व॑पेदभिच॒र्यमा॑णस् ।
Sentence: 4    अ॒ग्निमे॒व यवि॑ष्ठं॒ स्वेन॑ भाग॒धेये॒नोप॑ धावति
Sentence: 5    स ए॒वास्मा॒द्रक्षां॑सि यवयति
Sentence: 6    नैनमभि॒चर॑न्त्स्तृणुते ।
Sentence: 7    अ॒ग्नय॒ आयु॑ष्मते पुरो॒डाश॑म॒ष्टाक॑पालं॒ निर्व॑पे॒द्यः का॒मये॑त
Sentence: 8    सर्व॒मायु॑रिया॒मिति॑ ।
Sentence: 9    अ॒ग्निमे॒वायु॑ष्मन्तं॒ स्वेन॑ भाग॒धेये॒नोप॑ धावति
Sentence: 10    स ए॒वास्मि॑न् ।।

Verse: 3 
Sentence: 1    आयु॑र्दधाति
Sentence: 2    सर्व॒मायु॑रेति ।
Sentence: 3    अ॒ग्नये॑ जा॒तवे॑दसे पुरो॒डाश॑म॒ष्टाक॑पालं॒ निर्व॑पे॒द्भूति॑कामस् ।
Sentence: 4    अ॒ग्निमे॒व जा॒तवे॑दसं॒ स्वेन॑ भाग॒धेये॒नोप॑ धावति
Sentence: 5    स एवैन॒म्भूतिं॑ गमयति
Sentence: 6    भव॑त्ये॒व ।
Sentence: 7    अ॒ग्नये॒ रुक्म॑ते पुरो॒डाश॑म॒ष्टाक॑पालं॒ निर्व॑पे॒द्रुक्का॑मस् ।
Sentence: 8    अ॒ग्निमे॒व रुक्म॑न्तं॒ स्वेन॑ भाग॒धेये॒नोप॑ धावति
Sentence: 9    स ए॒वास्मि॒न्रुचं॑ दधाति
Sentence: 10    रोच॑त ए॒व ।
Sentence: 11    अ॒ग्नये॒ तेज॑स्वते पुरो॒डाश॑म् ।।

Verse: 4 
Sentence: 1    अ॒ष्टाक॑पालं॒ निर्व॑पे॒त्तेज॑स्कामस् ।
Sentence: 2    अ॒ग्निमे॒व तेज॑स्वन्तं॒ स्वेन॑ भाग॒धेये॒नोप॑ धावति
Sentence: 3    स ए॒वास्मि॒न्तेजो॑ दधाति
Sentence: 4    तेज॒स्व्ये॒व भ॑वति ।
Sentence: 5    अ॒ग्नये॑ साह॒न्त्याय॑ पुरो॒डाश॑म॒ष्टाक॑पालं॒ निर्व॑पे॒त्सीक्ष॑माणस् ।
Sentence: 6    अ॒ग्निमे॒व सा॑ह॒न्त्यं स्वेन॑ भाग॒धेये॒नोप॑ धावति
Sentence: 7    तेनै॒व स॑हते॒ यं सीक्ष॑ते ।।

Paragraph: 4 
Verse: 1 
Sentence: 1    अ॒ग्नये ऽन्न॑वते पुरो॒डाश॑म॒ष्टाक॑पालं॒ निर्व॑पे॒द्यः का॒मये॒तान्न॑वान्त्स्या॒मिति॑ ।
Sentence: 2    अ॒ग्निमे॒वान्न॑वन्तं॒ स्वेन॑ भाग॒धेये॒नोप॑ धावति
Sentence: 3    स एवैन॒मन्न॑वन्तं करो॒त्यन्न॑वाने॒व भ॑वति ।
Sentence: 4    अ॒ग्नये॑ ऽन्ना॒दाय॑ पुरो॒डाश॑म॒ष्टाक॑पालं॒ निर्व॑पे॒द्यः का॒मये॑तान्ना॒दः स्या॒मिति॑ ।
Sentence: 5    अ॒ग्निमे॒वान्ना॒दं स्वेन॑ भाग॒धेये॒नोप॑ धावति
Sentence: 6    स एवैनमन्ना॒दं क॑रोत्यन्ना॒दः ।।

Verse: 2 
Sentence: 1    ए॒व भ॑वति ।
Sentence: 2    अ॒ग्नये ऽन्न॑पतये पुरो॒डाश॑म॒ष्टाक॑पालं॒ निर्व॑पे॒द्यः का॒मये॒तान्न॑पतिः सय॒मिति॑ ।
Sentence: 3    अ॒ग्निमे॒वान्न॑पतिं॒ स्वेन॑ भाग॒धेये॒नोप॑ धावति
Sentence: 4    स एवैन॒मन्न॑पतिं करो॒त्यन्न॑पतिरे॒व भ॑वति ।
Sentence: 5    अ॒ग्नये॒ पव॑मानाय पुरो॒डाश॑म॒ष्टाक॑पालं॒ निर्व॑पेद॒ग्नये॑ पाव॒काया॒ग्नये॒ शुच॑ये॒ ज्योगा॑
Sentence: 6    यद॒ग्नये॒ पव॑मानाय नि॒र्वप॑ति
Sentence: 7    प्रा॒णमे॒वास्मि॒न्तेन॑ दधाति
Sentence: 8    यद॒ग्नये॑ ।।

Verse: 3 
Sentence: 1    पा॑व॒काय
Sentence: 2    वाच॑मे॒वास्मि॒न्तेन॑ दधाति
Sentence: 3    यद॒ग्नये॒ शुच॑ये ।
Sentence: 4    आयु॑रे॒वास्मि॒न्तेन॑ दधात्यु॒त यदी॒तासु॒र्भव॑ति॒ जीव॑त्ये॒व ।
Sentence: 5    ए॒तामे॒व निर्व॑पे॒च्चक्षु॑ष्कामो॒ यद॒ग्नये॒ पव॑मानाय नि॒र्वप॑ति
Sentence: 6    प्रा॒णमे॒वास्मि॒न्तेन॑ दधाति
Sentence: 7    यद॒ग्नये॑ पाव॒काय
Sentence: 8    वाच॑मे॒वास्मि॒न्तेन॑ दधाति
Sentence: 9    यद॒ग्नये॒ शुच॑ये
Sentence: 10    चक्षु॑रे॒वास्मि॒न्तेन॑ दधाति ।।

Verse: 4 
Sentence: 1    उ॒त यद्य॒न्धो भ॑वति प्रै॒व प॑श्यति ।
Sentence: 2    अ॒ग्नये॑ पु॒त्रव॑ते पुरो॒डाश॑म॒ष्टाक॑पालं॒ निर्व॑पेत् ।
Sentence: 3    इन्द्रा॑य पु॒त्रिणे॑ पुरो॒डाश॒मेका॑दशकपालम्प्र॒जाका॑मस् ।
Sentence: 4    अ॒ग्निरे॒वास्मै॑ प्र॒जाम्प्र॑ज॒नय॑ति
Sentence: 5    वृ॒द्धामिन्द्रः॒ प्र य॑छति ।
Sentence: 6    अ॒ग्नये॒ रस॑वते ऽजक्षी॒रे च॒रुं निर्व॑पे॒द्यः का॒मये॑त॒ रस॑वान्त्स्या॒मिति॑ ।
Sentence: 7    अ॒ग्निमे॒व रस॑वन्तं॒ स्वेन॑ भाग॒धेये॒नोप॑ धावति
Sentence: 8    स एवैनं॒ रस॑वन्तं करोति ।।

Verse: 5 
Sentence: 1    रस॑वाने॒व भ॑वत्यजक्षी॒रे भ॑वति ।
Sentence: 2    आ॑ग्ने॒यी वा ए॒षा यद॒जा
Sentence: 3    सा॒क्षादे॒व रस॒मव॑ रुन्द्धे ।
Sentence: 4    अ॒ग्नये॒ वसु॑मते पुरो॒डाश॑म॒ष्टाक॑पालं॒ निर्व॑पे॒द्यः का॒मये॑त॒ वसु॑मान्त्स्या॒मिति॑ ।
Sentence: 5    अ॒ग्निम्{F ए॒व{W ए॑व वसु॑मन्तं॒ स्वेन॑ भाग॒धेये॒नोप॑ धावति
Sentence: 6    स एवैनं॒ वसु॑मन्तं करोति॒ वसु॑माने॒व भ॑वति ।
Sentence: 7    अ॒ग्नये॑ वाज॒सृते॑ पुरो॒डाश॑म॒ष्टाक॑पालं॒ निर्व॑पेत्संग्रा॒मे संय॑त्ते
Sentence: 8    वाजं॑ ।।

Verse: 6 
Sentence: 1    वा ए॒ष सि॑सीर्षति॒ यः सं॑ग्रा॒मं जिगी॑षति ।
Sentence: 2    अ॒ग्निः खलु वै दे॒वानां॑ वाज॒सृद॒ग्निमे॒व वा॑ज॒सृतं॒ स्वेन॑ भाग॒धेये॒नोप॑ धावति
Sentence: 3    धाव॑ति॒ वाजं॒ हन्ति॑ वृ॒त्रं जय॑ति॒ तं सं॑ग्रा॒मम्
Sentence: 4    अथो॑ अ॒ग्निरि॑व॒ न प्र॑ति॒धृषे॑ भवति ।
Sentence: 5    अ॒ग्नये॑ ऽग्नि॒वते॑ पुरो॒डाश॑म॒ष्टाक॑पालं॒ निर्व॑पे॒द्यस्या॒ग्नाव॒ग्निम॑भ्यु॒द्धरे॑युस् ।
Sentence: 6    निर्दि॑ष्टभागो॒ वा ए॒तयो॑र॒न्यो ऽनि॑र्दिष्टभागो॒ ऽन्यस्तौ॑ स॒म्भव॑न्तौ॒ यज॑मानम् ।।

Verse: 7 
Sentence: 1    अ॒भि सम्भ॑वतस् ।
Sentence: 2    स ई॑श्व॒र आर्ति॒मार्तो॒र्यद॒ग्नये॑ ऽग्नि॒वते॑ नि॒र्वप॑ति
Sentence: 3    भाग॒धेये॑नैवैनौ शमयति
Sentence: 4    नार्ति॒मार्छ॑ति॒ यज॑मानस् ।
Sentence: 5    अ॒ग्नये॒ ज्योति॑ष्मते पुरो॒डाश॑म॒ष्टाक॑पालं॒ निर्व॑पे॒द्यस्या॒ग्निरुद्धृ॒तो ऽहु॑ते ऽग्निहो॒त्र उ॒द्वाये॒दप॑र आ॒दीप्या॑नू॒द्धृत्य॒ इत्या॑हु॒स्तत्तथा॒ न का॒र्यं॒ यद्भा॑ग॒॒भि पूर्व॑ उद्ध्रि॒यते॒ किमप॑रो॒ ऽभ्युत् ।।

Verse: 8 
Sentence: 1    ह्रि॑ये॒तेति॒ तान्ये॒वाव॒क्षाणा॑नि संनि॒धाय॑ म॒न्थेत् ।
Sentence: 2    इ॒तः प्र॑थ॒मं ज॑ज्ञे अ॒ग्निः स्वाद्योने॒रधि॑ जा॒तवे॑दाः । स गा॑यत्रि॒या त्रि॒ष्टुभा॒ जग॑त्या दे॒वेभ्यो॑ ह॒व्यं व॑हतु प्रजा॒नन्निति
Sentence: 3    छन्दो॑भिरेवैनं॒ स्वाद्योनेः॒ प्र ज॑नयत्ये॒ष वाव सो॒ ऽग्निरित्या॑हु॒र्ज्योति॒स्त्वा अ॑स्य॒ परा॑पतित॒मिति॒ यद॒ग्नये॒ ज्योति॑ष्मते नि॒र्वप॑ति॒ यदे॒वास्य॒ ज्योतिः॒ परा॑पतितं॒ तदे॒वाव॑ रुन्द्धे ।।

Paragraph: 5 
Verse: 1 
Sentence: 1    वै॑श्वान॒रं द्वाद॑शकपालं॒ निर्व॑पेद्वारु॒णं च॒रुं द॑धि॒क्राव्णे॑ च॒रुम॑भिश॒स्यमा॑नस् ।
Sentence: 2    यद्वै॑श्वान॒रो द्वाद॑शकपालो॒ भव॑ति संवत्स॒रो वा अ॒ग्निर्वै॑श्वान॒रः सं॑वत्स॒रेणैवैनं स्वदय॒त्यप॑ पा॒पं वर्णं॑ हते वारु॒णेनैवैनं वरुणपा॒शान्मु॑ञ्चति दधि॒क्राव्णा॑ पुनाति
Sentence: 3    हिर॑ण्यं॒ दक्षि॑णा प॒वित्रं वै॒ हिर॑ण्यम्पु॒नात्येवैनमा॒द्य॑म॒स्यान्न॑म्भवति ।
Sentence: 4    ए॒तामे॒व निर्व॑पेत्प्र॒जाका॑मः
Sentence: 5    संवत्स॒रः ।।

Verse: 2 
Sentence: 1    वा ए॒तस्याशा॑न्तो॒ योनि॑म्प्र॒जायै॑ पशू॒नां निर्द॑हति॒ यो ऽल॑म्प्र॒जायै॒ सन्प्र॒जां न वि॒न्दते
Sentence: 2    यद्वै॑श्वान॒रो द्वाद॑शकपालो॒ भव॑ति संवत्स॒रो वा अ॒ग्निर्वै॑श्वान॒रः सं॑वत्स॒रमे॒व भा॑ग॒धेये॑न शमयति॒ सो॑ ऽस्मै शा॒न्तः स्वाद्योनेः॑ प्र॒जाम्प्र{F ज॑नयति{W जनयत्य्{GLOS जनयति वारु॒णेनैवैनं वरुणपा॒शान्मु॑ञ्चति दधि॒क्राव्णा॑ पुनाति
Sentence: 3    हिर॑ण्यं॒ दक्षि॑णा प॒वित्रं वै॒ हिर॑ण्यम्पु॒नात्येवैनम् ।।

Verse: 3 
Sentence: 1    वि॒न्दते॑ प्र॒जाम् ।
Sentence: 2    वै॑श्वान॒रं द्वाद॑शकपालं॒ निर्व॑पेत्पु॒त्रे जा॒ते
Sentence: 3    यद॒ष्टाक॑पालो॒ भव॑ति गायत्रियैवैनम्ब्रह्मवर्च॒सेन॑ पुनाति॒ यन्नव॑कपालस्त्रि॒वृतै॒वास्मिजो॑ दधाति॒ यद्दश॑कपालो वि॒राजै॒वास्मि॑न्न॒न्नाद्यं॑ दधाति॒ यदेका॑दशकपालस्तृ॒ष्टुभै॒वास्म॒यं द॑धाति॒ यद्द्वाद॑शकपालो॒ जग॑त्यै॒वास्मि॑न्प॒शून्द॑धाति
Sentence: 4    यस्मि॑ञ्जा॒त ए॒तामिष्टि॑म्नि॒र्वप॑ति पू॒तः ।।

Verse: 4 
Sentence: 1    ए॒व ते॑ज॒स्य॑न्ना॒द इ॑न्द्रिया॒वी प॑शु॒मान्भ॑वति ।
Sentence: 2    अव॒ वा ए॒ष सु॑व॒र्गाल्लो॒काच्छि॑द्यते॒ यो द॑र्शपूर्णमासया॒जी सन्न॑मावा॒स्यां॑ वा पौर्णमा॒सीं वा॑तिपा॒दय॑ति सुव॒र्गाय॒ हि लो॒काय॑ दर्शपूर्णमा॒सावि॒ज्येते
Sentence: 3    वैश्वान॒रं द्वाद॑शकपालं॒ निर्व॑पेदमावा॒स्यां॑ वा पौर्णमा॒सीं वा॑ति॒पाद्य
Sentence: 4    संवत्स॒रो वा अ॒ग्निर्वै॑श्वान॒रः सं॑वत्स॒रमे॒व प्री॑णा॒त्यथो॑ संवत्स॒रमे॒वास्मा॒ उप॑ दधाति सुव॒र्गस्य॑ लो॒कस्य॒ सम॑ष्ट्यै ।।

Verse: 5 
Sentence: 1    अथो॑ दे॒वता॑ ए॒वान्वा॒रभ्य॑ सुव॒र्गं लो॒कमे॑ति
Sentence: 2    वीर॒हा वा ए॒ष दे॒वानां॒ यो॒ ऽग्निमु॑द्वा॒सय॑ते॒ न वा ए॒तस्य॑ ब्राह्म॒णा ऋ॑ता॒यवः॑ पु॒रान्न॑मन् ।
Sentence: 3    आ॑ग्ने॒यम॒ष्टाक॑पालं॒ निर्व॑पेत् ।
Sentence: 4    वै॑श्वान॒रं द्वाद॑शकपालम॒ग्निमु॑द्वासयि॒ष्यन्
Sentence: 5    यद॒ष्टाक॑पालो॒ भव॑त्य॒ष्टाक्ष॑रा गाय॒त्री गा॑य॒त्रो॒ ऽग्निर्यावा॑ने॒वाग्निस्तस्मा॑ आति॒थ्यं क॑रोति ।
Sentence: 6    अथो॒ यथा॒ जनं॑ य॒ते॑ ऽव॒सं क॒रोति॑ ता॒दृक् ।।

Verse: 6 
Sentence: 1    ए॒व तत् ।
Sentence: 2    द्वाद॑शकपालो वैश्वान॒रो भ॑वति
Sentence: 3    द्वाद॑श॒ मासाः॑ संवत्स॒रः सं॑वत्स॒रः खलु॒ वा अ॒ग्नेर्योनिः॒ स्वामेवैनं॒ योनिं॑ गमयति ।
Sentence: 4    आ॒द्य॑म॒स्यान्न॑म्भवति
Sentence: 5    वैश्वान॒रं द्वाद॑शकपालं॒ निर्व॑पेन्मारु॒तं स॒प्तक॑पालं॒ ग्राम॑कामस् ।
Sentence: 6    आ॑हव॒नीये॑ वैश्वान॒रमधि॑ श्रयति॒ गार्ह॑पत्ये मारु॒तम्पा॑पवस्य॒सस्य॒ विधृ॑त्यै
Sentence: 7    द्वाद॑शकपालो वैश्वान॒रो भ॑वति॒ द्वाद॑श॒ मासाः॑ संवत्स॒रः सं॑वत्स॒रेणै॒वास्मै॑ सजा॒तांश्च्
Sentence: 8    मारु॒तो भ॑वति ।।

Verse: 7 
Sentence: 1    म॒रुतो वै दे॒वानां॒ विशो॑ देववि॒शेनै॒वास्मै॑ मनुष्यवि॒शमव॑ रुन्द्धे
Sentence: 2    स॒प्तक॑पालो भवति स॒प्तग॑णा वै म॒रुतो॑ गण॒श ए॒वास्मै॑ सजा॒तानव॑ रुन्द्धे ।
Sentence: 3    अ॑नू॒च्यमा॑न॒ आ सा॑दयति
Sentence: 4    विश॑मे॒वास्मा॒ अनु॑वर्त्मानं करोति ।।

Paragraph: 6 
Verse: 1 
Sentence: 1    आ॑दि॒त्यं च॒रुं निर्व॑पेत्संग्रा॒ममु॑पप्रया॒स्यन् ।
Sentence: 2    इ॒यं वा अदि॑तिस् ।
Sentence: 3    अ॒स्यामे॒व पूर्वे॒ प्रति॑ तिष्ठन्ति
Sentence: 4    वैश्वान॒रं द्वाद॑शकपालं॒ निर्व॑पेदा॒यत॑नं ग॒त्वा
Sentence: 5    सं॑वत्स॒रो वा अ॒ग्निर्वै॑श्वान॒रः
Sentence: 6    सं॑वत्स॒रः खलु वै दे॒वाना॑मा॒यत॑नम्
Sentence: 7    ए॒तस्मा॒द्वा आ॒यत॑नाद्दे॒वा असु॑रानजयन्
Sentence: 8    यद्वै॑श्वान॒रं द्वाद॑शकपालं नि॒र्वप॑ति
Sentence: 9    दे॒वाना॑मे॒वायत॑ने यतते
Sentence: 10    जय॑ति॒ तं सं॑ग्रा॒मम्
Sentence: 11    ए॒तस्मि॒न्वा एतौ मृजाते ।।

Verse: 2 
Sentence: 1    यो वि॑द्विषा॒णयो॒रन्न॒मत्ति
Sentence: 2    वैश्वान॒रं द्वाद॑शकपालं॒ निर्व॑पेद्विद्विषा॒णयो॒रन्नं॑ ज॒ग्ध्वा
Sentence: 3    सं॑वत्स॒रो वा अ॒ग्निर्वै॑श्वान॒रः
Sentence: 4    सं॑वत्स॒रस्व॑दितमे॒वात्ति
Sentence: 5    नास्मि॑न्मृजाते
Sentence: 6    संवत्स॒राय॒ वा एतौ॒ सम॑माते यौ सम॒माते
Sentence: 7    तयो॒र्यः पूर्वो॑ ऽभि॒द्रुह्य॑ति॒ तं वरु॑णो गृह्णाति
Sentence: 8    वैश्वान॒रं द्वाद॑शकपालं॒ निर्व॑पेत्सममा॒नयोः॒ पूर्वो॑ ऽभि॒द्रुह्य
Sentence: 9    संवत्स॒रो वा अ॒ग्निर्वै॑श्वान॒रः
Sentence: 10    स॑म्वत्स॒रमे॒वाप्त्वा नि॑र्वरु॒णम् ।।

Verse: 3 
Sentence: 1    प॒रस्ता॑द॒भि द्रु॑ह्यति नैनं॒ वरु॑णो गृह्णाति ।
Sentence: 2    आ॒व्यं॒ वा ए॒ष प्रति॑ गृह्णाति॒ यो ऽवि॑म्प्रतिगृ॒ह्णाति
Sentence: 3    वैश्वान॒रं द्वाद॑शकपालं॒ निर्व॑पे॒दवि॑म्प्रति॒गृह्य
Sentence: 4    संवत्स॒रो वा अ॒ग्निर्वै॑श्वान॒रः
Sentence: 5    सं॑वत्स॒रस्व॑दितामे॒व प्रति॑गृह्णाति
Sentence: 6    नाव्य॒म्प्रति॑ गृह्णाति ।
Sentence: 7    आ॒त्मनो॒ वा ए॒ष मात्रा॑माप्नोति॒ य उ॑भ॒याद॑त्प्रतिगृ॒ह्णात्यश्वं॑ वा॒ पुरु॑षं वा
Sentence: 8    वैश्वान॒रं द्वाद॑शकपालं॒ निर्व॑पेदुभ॒याद॑त् ।।

Verse: 4 
Sentence: 1    प्र॑ति॒गृह्य
Sentence: 2    संवत्स॒रो वा अ॒ग्निर्वै॑श्वान॒रः
Sentence: 3    सं॑वत्स॒रस्व॑दितमे॒व प्रति॑ गृह्णाति
Sentence: 4    नात्मनो॒ मात्रा॑माप्नोति
Sentence: 5    वैश्वान॒रं द्वाद॑शकपालं॒ निर्व॑पेत्स॒निमे॒ष्यन् ।
Sentence: 6    सं॑वत्स॒रो वा अ॒ग्निर्वै॑श्वान॒रस् ।
Sentence: 7    य॒दा खलु वै संवत्स॒रं ज॒नता॑यां॒ चर॒त्यथ॒ स ध॑ना॒र्घो भ॑वति
Sentence: 8    यद्वै॑श्वान॒रं द्वाद॑शकपालं नि॒र्वप॑ति संवत्स॒रसा॑तामे॒व स॒निम॒भि प्र च्य॑वते
Sentence: 9    दान॑कामा अस्मै प्र॒जा भ॑वन्ति
Sentence: 10    यो वै॑ संवत्स॒रम् ।।

Verse: 5 
Sentence: 1    प्र॒युज्य॒ न वि॑मु॒ञ्चत्य॑प्रतिष्ठा॒नो वै॒ स भ॑वति ।
Sentence: 2    ए॒तमे॒व वै॑श्वान॒रम्पुन॑रा॒गत्य॒ निर्व॑पेत् ।
Sentence: 3    यमे॒व प्र॑यु॒ङ्क्ते तम्भा॑ग॒धेये॑न॒ वि मु॑ञ्चति॒ प्रति॑ष्ठित्यै
Sentence: 4    यया॒ रज्ज्वो॑त्त॒मां गामा॒जेत्ताम्भ्रातृ॑व्याय॒ प्र हि॑णुयात् ।
Sentence: 5    निरृ॑तिमे॒वास्मै॒ प्र हि॑णोति ।।

Paragraph: 7 
Verse: 1 
Sentence: 1    अै॒न्द्रं च॒रुं निर्व॑पेत्प॒शुका॑मस् ।
Sentence: 2    अै॒न्द्रा वै॑ प॒शव॑स् ।
Sentence: 3    इन्द्र॑मे॒व स्वेन॑ भाग॒धेये॒नोप॑ धावति
Sentence: 4    स ए॒वास्मै॑ प॒शून्प्र य॑छति
Sentence: 5    पशु॒माने॒व भ॑वति
Sentence: 6    च॒रुर्भ॑वति
Sentence: 7    स्वादे॒वास्मै॒ योनेः॑ प॒शून्प्र ज॑नयति ।
Sentence: 8    इन्द्रा॑येन्द्रि॒याव॑ते पुरो॒डाश॒मेका॑दशकपालं॒ निर्व॑पेत्प॒शुका॑मस् ।
Sentence: 9    इ॑न्द्रि॒यं वै॑ प॒शव॑स् ।
Sentence: 10    इन्द्र॑मे॒वेन्द्रि॒याव॑न्तं॒ स्वेन॑ भाग॒धेये॒नोप॑ धावति
Sentence: 11    सः ।।

Verse: 2 
Sentence: 1    ए॒वास्मा॑ इन्द्रि॒यम्प॒शून्प्र य॑छति
Sentence: 2    पशु॒माने॒व भ॑वति ।
Sentence: 3    इन्द्रा॑य घ॒र्मव॑ते पुरो॒डाश॒मेका॑दशकपालं॒ निर्व॑पेद्ब्रह्मवर्च॒सका॑मस् ।
Sentence: 4    ब्र॑ह्मवर्च॒सं वै॑ घ॒र्मस् ।
Sentence: 5    इन्द्र॑मे॒व घ॒र्मव॑न्तं॒ स्वेन॑ भाग॒धेये॒नोप॑ धावति
Sentence: 6    स ए॒वास्मि॑न्ब्रह्मवर्च॒सं द॑धाति
Sentence: 7    ब्रह्मवर्च॒स्ये॒व भ॑वति ।
Sentence: 8    इन्द्रा॑या॒र्कव॑ते पुरो॒डाश॒मेका॑दशकपालं॒ निर्व॑पे॒दन्न॑कामस् ।
Sentence: 9    अ॒र्को वै॑ दे॒वाना॒मन्न॑म्
Sentence: 10    इन्द्र॑मे॒वार्कव॑न्तं॒ स्वेन॑ भाग॒धेये॑न ।।

Verse: 3 
Sentence: 1    उप॑ धावति
Sentence: 2    स ए॒वास्मा॒ अन्न॒म्प्र य॑छति ।
Sentence: 3    अ॑न्ना॒द ए॒व भ॑वति ।
Sentence: 4    इन्द्रा॑य घ॒र्मव॑ते पुरो॒डाश॒मेका॑दशकपालं॒ निर्व॑पे॒दिन्द्रा॑येन्द्रि॒याव॑त॒ इन्द्रा॑या॑ते॒ भूति॑कामस् ।
Sentence: 5    यदिन्द्रा॑य घ॒र्मव॑ते नि॒र्वप॑ति॒ शिर॑ ए॒वास्य॒ तेन॑ करोति
Sentence: 6    यदिन्द्रा॑येन्द्रि॒याव॑त आ॒त्मान॑मे॒वास्य॒ तेन॑ करोति
Sentence: 7    यदिन्द्रा॑या॒र्कव॑ते भू॒त ए॒वान्नाद्ये॒ प्रति॑ तिष्ठति॒ भव॑त्ये॒व ।
Sentence: 8    इन्द्रा॑य ।।

Verse: 4 
Sentence: 1    अं॑हो॒मुचे॑ पुरो॒डाश॒मेका॑दशकपालं॒ निर्व॑पे॒द्यः पा॒प्मना॑ गृही॒तः स्यात्
Sentence: 2    पा॒प्मा वा अंह॑स् ।
Sentence: 3    इन्द्र॑मे॒वांहो॒मुचं॒ स्वेन॑ भाग॒धेये॒नोप॑ धावति
Sentence: 4    स एवैनम्पा॒प्मनो ऽं॑हसो मुञ्चति ।
Sentence: 5    इन्द्रा॑य वैमृ॒धाय॑ पुरो॒डाश॒मेका॑दशकपालं॒ निर्व॑पे॒द्यम्मृधो॒ ऽभि प्र॒वेपे॑रन्रा॒ष्ट्राणि॑ वा॒भि स॑मि॒युस् ।
Sentence: 6    इन्द्र॑मे॒व वै॑मृ॒धं स्वेन॑ भाग॒धेये॒नोप॑ धावति
Sentence: 7    स ए॒वास्मा॒न्मृधः॑ ।।

Verse: 5 
Sentence: 1    अप॑ हन्ति ।
Sentence: 2    इन्द्रा॑य त्रा॒त्रे पु॑रो॒डाश॒मेका॑दशकपालं॒ निर्व॑पेद्ब॒द्धो वा॒ परि॑यत्तो वा ।
Sentence: 3    इन्द्र॑मे॒व त्रा॒तारं॒ स्वेन॑ भाग॒धेये॒नोप॑ धावति
Sentence: 4    स एवैनं त्रायते ।
Sentence: 5    इन्द्रा॑यार्काश्वमे॒धव॑ते पुरो॒डाश॒मेका॑दशकपालं॒ निर्व॑पे॒द्यम्म॑हाय॒ज्ञो नोप॒नमे॑त् ।
Sentence: 6    ए॒ते वै॑ महाय॒ज्ञस्या॑न्त्ये त॒नू यद॑र्काश्वमेधौ ।
Sentence: 7    इन्द्र॑मे॒वार्का॑श्वमे॒धव॑न्तं॒ स्वेन॑ भाग॒धेये॒नोप॑ धावति
Sentence: 8    स ए॒वास्मा॑ अन्त॒तो म॑हाय॒ज्ञं च्या॑वयति ।
Sentence: 9    उपै॑नं महाय॒ज्ञो न॑मति ।।

Paragraph: 8 
Verse: 1 
Sentence: 1    इन्द्रा॒यान्वृ॑जवे पुरो॒डाश॒मेका॑दशकपालं॒ निर्व॑पे॒द्ग्राम॑कामस् ।
Sentence: 2    इन्द्र॑मे॒वान्वृ॑जुं॒ स्वेन॑ भाग॒धेये॒नोप॑ धावति
Sentence: 3    स ए॒वास्मै॑ सजा॒ताननु॑कान्करोति
Sentence: 4    ग्रा॒म्ये॒व भ॑वति ।
Sentence: 5    इ॑न्द्राण्यै च॒रुं निर्व॑पे॒द्यस्य॒ सेनासं॑शितेव॒ स्यात् ।
Sentence: 6    इ॑न्द्रा॒णी वै॒ सेना॑यै दे॒वता॑ ।
Sentence: 7    इ॑न्द्रा॒णीं ए॒व स्वेन॑ भाग॒धेये॒नोप॑ धावति
Sentence: 8    सै॒वास्य॒ सेनां॒ सं श्य॑ति
Sentence: 9    बल्ब॑जा॒नपि॑ ।।

Verse: 2 
Sentence: 1    इ॒ध्मे सं न॑ह्येत् ।
Sentence: 2    गौ॒र्यत्राधि॑ष्कन्ना॒ न्यमे॑ह॒त्ततो॒ बल्ब॑जा॒ उद॑तिष्ठन्
Sentence: 3    गवा॑मेवैनं न्या॒यम॑पि॒नीय॒ गा वे॑दयति ।
Sentence: 4    इन्द्रा॑य मन्यु॒मते॒ मन॑स्वते पुरो॒डाश॒मेका॑दशकपालं॒ निर्व॑पेत्संग्रा॒मे संय॑त्ते ।
Sentence: 5    इ॑न्द्रि॒येण वै म॒न्युना॒ मन॑सा संग्रा॒मं ज॑यति ।
Sentence: 6    इन्द्र॑मे॒व म॑न्यु॒मन्त॒म्मन॑स्वन्तं॒ स्वेन॑ भाग॒धेये॒नोप॑ धावति
Sentence: 7    स ए॒वास्मि॑न्निन्द्रि॒यम्म॒न्युम्मनो॑ दधाति
Sentence: 8    जय॑ति॒ तम् ।।

Verse: 3 
Sentence: 1    सं॑ग्रा॒मम्
Sentence: 2    ए॒तामे॒व निर्व॑पे॒द्यो ह॒तम॑नाः स्व॒यम्पा॑प इव॒ स्यात् ।
Sentence: 3    ए॒तानि॒ हि वा ए॒तस्मा॒दप॑क्रान्तानि ।
Sentence: 4    अथै॒ष ह॒तम॑नाः स्व॒यम्पा॑प॒ इन्द्र॑मे॒व म॑न्यु॒मन्त॒म्मन॑स्वन्तं॒ स्वेन॑ भाग॒धेये॒नोप॑ धावति
Sentence: 5    स ए॒वास्मि॑न्निन्द्रि॒यम्म॒न्युम्मनो॑ दधाति
Sentence: 6    न ह॒तम॑नाः स्व॒यम्पा॑पो भवति ।
Sentence: 7    इन्द्रा॑य दा॒त्रे पु॑रो॒डाश॒मेका॑दशकपालं॒ निर्व॑पे॒द्यः का॒मये॑त
Sentence: 8    दान॑कामा मे प्र॒जाः स्युः॑ ।।

Verse: 4 
Sentence: 1    इति॑ ।
Sentence: 2    इन्द्र॑मे॒व दा॒तारं॒ स्वेन॑ भाग॒धेये॒नोप॑ धावति
Sentence: 3    स ए॒वास्मै॒ दान॑कामाः प्र॒जाः क॑रोति
Sentence: 4    दान॑कामा अस्मै प्र॒जा भ॑वन्ति ।
Sentence: 5    इन्द्रा॑य प्रदा॒त्रे पु॑रोडाश॒मेका॑दशकपालं॒ निर्व॑पे॒द्यस्मै॒ प्रत्त॑मिव॒ सन्न प्र॑दी॒येत॑ ।
Sentence: 6    इन्द्र॑मे॒व प्र॑दा॒तारं॒ स्वेन॑ भाग॒धेये॒नोप॑ धावति
Sentence: 7    स ए॒वास्मै॒ प्र दा॑पयति ।
Sentence: 8    इन्द्रा॑य सु॒त्राम्णे॑ पुरो॒डाश॒मेका॑दशकपालं॒ निर्व॑पे॒दप॑रुद्धो वा ।।

Verse: 5 
Sentence: 1    अ॑परु॒ध्यमा॑नो वा ।
Sentence: 2    इन्द्र॑मे॒व सु॒त्रामा॑णं॒ स्वेन॑ भाग॒धेये॒नोप॑ धावति
Sentence: 3    स एवैनं त्रायते ।
Sentence: 4    अ॑नपरु॒ध्यो भ॑वति ।
Sentence: 5    इन्द्रो वै स॒दृङ्दे॒वता॑भिरासीत्
Sentence: 6    स न व्या॒वृत॑मगछत्
Sentence: 7    स प्र॒जाप॑ति॒मुपा॑धावत्
Sentence: 8    तस्मा॑ ए॒तऐ॒न्द्रमेका॑दशकपालं॒ निर॑वपत्
Sentence: 9    तेनै॒वास्मि॑न्निन्द्रि॒यम॑दधात् ।
Sentence: 10    श॑क्वरी याज्यानुवा॒क्ये॑ अकरोत् ।
Sentence: 11    वज्रो वै॒ शक्व॑री
Sentence: 12    स ए॑नं॒ वज्रो॒ भूत्या॑ ऐन्द्ध ।।

Verse: 6 
Sentence: 1    सो॑ ऽभवत्
Sentence: 2    सो॑ ऽबिभेद्भू॒तः
Sentence: 3    प्र मा॑ धक्ष्य॒तीति
Sentence: 4    स प्र॒जाप॑ति॒म्पुन॒रुपा॑धावत्
Sentence: 5    स प्र॒जाप॑तिः॒ शक्व॑र्या॒ अधि॑ रे॒वतीं॒ निर॑मिमीत॒ शान्त्या॒ अप्र॑दाहाय
Sentence: 6    यो ऽलं॑ श्रियै॒ सन्त्स॒दृङ्क्स॑मानैः॒ स्यात्तस्मा॑ ए॒तऐं॒द्रमेका॑दशकपालं॒ निर्व॑पेत् ।
Sentence: 7    इन्द्र॑मे॒व स्वेन॑ भाग॒धेये॒नोप॑ धावति
Sentence: 8    स ए॒वास्मि॑न्निन्द्रि॒यं द॑धाति
Sentence: 9    रे॒वती॑ पुरोऽनुवा॒क्या॑ भवति॒ शान्त्या॒ अप्र॑दाहाय
Sentence: 10    शक्व॑री या॒ज्या
Sentence: 11    वज्रो वै॒ शक्व॑री
Sentence: 12    स ए॑नं॒ वज्रो॒ भूत्या॑ इन्द्धे
Sentence: 13    भव॑त्ये॒व ।।

Paragraph: 9 
Verse: 1 
Sentence: 1    आ॑ग्नावैष्ण॒वमेका॑दशकपालं॒ निर्व॑पेदभि॒चर॒न्त्सर॑स्व॒त्याज्य॑भागा स्याद्बार्हस्प॒त्यश्स् ।
Sentence: 2    यदा॑ग्नावैष्ण॒व एका॑दशकपालो॒ भव॑ति ।
Sentence: 3    अ॒ग्निः सर्वा॑ दे॒वता॒ विष्णु॑र्य॒ज्ञो दे॒वता॑भिश्चैवैनं य॒ज्ञेन॑ चा॒भि च॑रति
Sentence: 4    सर॑स्व॒त्याज्य॑भागा भवति॒ वाग्वै॒ सर॑स्वती वाचैवैनम॒भि च॑रति
Sentence: 5    बार्हस्प॒त्यश्च॒रुर्भ॑वति॒ ब्रह्म वै दे॒वाना॒म्बृह॒स्पति॒र्ब्रह्म॑णैवैनम॒भि च॑रति ।।

Verse: 2 
Sentence: 1    प्रति वै प॒रस्ता॑दभि॒चर॑न्तम॒भि च॑रन्ति
Sentence: 2    द्वेद्वे॑ पु॒रोऽनु॑वा॒क्ये॑ कुर्या॒दति॒ प्रयु॑क्त्यै ।
Sentence: 3    ए॒तयै॒व य॑जेताभिच॒र्यमा॒णो दे॒वता॑भिरे॒व दे॒वताः॑ प्रति॒चर॑ति य॒ज्ञेन॑ य॒ज्ञं वा॒चा वाच॒म्ब्रह्म॑णा॒ ब्रह्म॒ स दे॒वता॑श्चै॒व य॒ज्ञं च॑ मध्य॒तो व्यव॑सर्पति॒ तस्य॒ न कुत॑श्च॒॒धो भ॑वति
Sentence: 4    नैनमभि॒चर॑न्त्स्तृणुते ।
Sentence: 5    आ॑ग्नावैष्ण॒वमेका॑दशकपालं॒ निर्व॑पे॒द्यं य॒ज्ञो न ।।

Verse: 3 
Sentence: 1    उ॑प॒नमे॑त् ।
Sentence: 2    अ॒ग्निः सर्वा॑ दे॒वता॒ विष्णु॑र्य॒ज्ञो॒ ऽग्निं चै॒व विष्णुं॑ च॒ स्वेन॑ भाग॒धेये॒नोप॑ धावति॒ तावे॒वास्मै॑ य॒ज्ञम्प्र य॑छत॒ उपै॑नं य॒ज्ञो न॑मति ।
Sentence: 3    आ॑ग्नावैष्ण॒वं घृ॒ते च॒रुं निर्व॑पे॒च्चक्षु॑ष्कामस् ।
Sentence: 4    अ॒ग्नेर्वै॒ चक्षु॑षा मनु॒ष्या॒ वि प॑श्यन्ति य॒ज्ञस्य॑ दे॒वा अ॒ग्निं चै॒व विष्णुं॑ च॒ स्वेन॑ भाग॒धेये॒नोप॑ धावति
Sentence: 5    तावे॒व ।।

Verse: 4 
Sentence: 1    अ॑स्मि॒ञ्चक्षु॑र्धत्त॒श्चक्षु॑ष्माने॒व भ॑वति
Sentence: 2    धेन्वै॒ वा ए॒तद्रेतो॒ यदाज्य॑मन॒डुह॑स्तण्डु॒ला मि॑थु॒नादे॒वास्मै॒ चक्षुः॒ प्र ज॑नयति
Sentence: 3    घृ॒ते भ॑वति॒ तेजो वै घृ॒तं तेज॒श्चक्षु॒स्तेज॑सै॒वास्मै॒ तेज॒श्चक्षु॒रव॑ रुन्द्धे ।
Sentence: 4    इ॑न्द्रि॒यं वै॑ वी॒र्यं॑ वृङ्क्ते॒ भ्रातृ॑व्यो॒ यज॑मा॒नो ऽय॑जमानस्याध्व॒रक॑ल्पा॒म्प्रति॒ निर्व॑पे॒द्भ्रातृ॑व्ये॒ यज॑माने॒ नास्ये॑न्द्रि॒यं ।।

Verse: 5 
Sentence: 1    वी॒र्यं॑ वृङ्क्ते
Sentence: 2    पु॒रा वा॒चः प्रव॑दितो॒र्निर्व॑पे॒द्याव॑त्ये॒व वाक्तामप्रो॑दिता॒म्भ्रातृ॑व्यस्य वृङ्क्ते॒ ताम॑स्य॒ वाच॑म्प्र॒वद॑न्ती॒मन्या॒ वाचो ऽनु॒ प्र व॑दन्ति॒ ता इ॑न्द्रि॒यं वी॒र्यं॒ यज॑माने दधति ।
Sentence: 3    आ॑ग्नावैष्ण॒वम॒ष्टाक॑पालं॒ निर्व॑पेद्प्रातःसव॒नस्या॑का॒ले सर॑स्व॒त्याज्य॑भागा स्याद्बारस् ।
Sentence: 4    यद॒ष्टाक॑पालो॒ भव॑त्य॒ष्टाक्ष॑रा गाय॒त्री गा॑य॒त्रम्प्रा॑तःसव॒नम्प्रा॑तःसव॒नमे॒व तेना॑प्नोति ।।

Verse: 6 
Sentence: 1    आ॑ग्नावैष्ण॒वमेका॑दशकपालं॒ निर्व॑पे॒न्माध्यं॑दिनस्य॒ सव॑नस्याका॒ले सर॑स्व॒त्याज्य॑भागा स्याद्बार्हस्प॒त्यश्च॒रुस् ।
Sentence: 2    यदेका॑दशकपालो॒ भव॒त्येका॑दशाक्षरा तृ॒ष्टुप्त्रै॑ष्टुभ॒म्माध्यं॑दिनं॒ सव॑न॒म्माध्यं॑दिनम॒व सव॑नं॒ तेना॑प्नोति ।
Sentence: 3    आ॑ग्नावैष्ण॒वं द्वाद॑शकपालं॒ निर्व॑पेद्तृतीयसव॒नस्या॑का॒ले सर॑स्व॒त्याज्य॑भागा स्याद्बास् ।
Sentence: 4    यद्द्वाद॑शकपालो॒ भव॑ति॒ द्वाद॑शाक्षरा॒ जग॑ती॒ जाग॑तं तृतीयसव॒नं तृ॑तीयसव॒नमे॒व तेना॑प्नोत
Sentence: 5    दे॒वता॑भिरे॒व दे॒वताः॑ ।।

Verse: 7 
Sentence: 1    प्र॑ति॒चर॑ति य॒ज्ञेन॑ य॒ज्ञं वा॒चा वाच॒म्ब्रह्म॑णा॒ ब्रह्म॑ क॒पालै॑रे॒व छन्दां॑स्या॒प्नोति॑ पुरो॒डाशैः॒ सव॑नानि
Sentence: 2    मैत्रावरु॒णमेक॑कपालं॒ निर्व॑पेद्व॒शायै॑ का॒ले
Sentence: 3    यै॒वासौ॒ भ्रातृ॑व्यस्य व॒शानु॑ब॒न्ध्या॒ सो एवैषै॒तस्यै॑ककपालो भवति॒ न हि क॒पालैः॑ प॒शुमर्ह॒॑म् ।।

Paragraph: 10 
Verse: 1 
Sentence: 1    अ॒सावा॑दि॒त्यो न व्य॑रोचत॒ तस्मै॑ दे॒वाः प्राय॑श्चित्तिऐछ॒न्तस्मा॑ ए॒तं सो॑मारौ॒द्रं च॒रुं निर॑वप॒न्तेनै॒वास्मि॒न्रुच॑मदधुस् ।
Sentence: 2    यो ब्र॑ह्मवर्च॒सका॑मः॒ स्यात्तस्मा॑ ए॒तं सो॑मारौ॒द्रं च॒रुं निर्व॑पेत्
Sentence: 3    सोमं॑ चै॒व रु॒द्रं च॒ स्वेन॑ भाग॒धेये॒नोप॑ धावति॒ तावे॒वास्मि॑न्ब्रह्मवर्च॒सं ध॑त्तो ब्रह्म॒व भ॑वति
Sentence: 4    तिष्यापूर्णमा॒से निर्व॑पेद्रु॒द्रः ।।

Verse: 2 
Sentence: 1    वै॑ ति॒ष्यः॒ सोमः॑ पू॒र्णमा॑सः सा॒क्षादे॒व ब्र॑ह्मवर्च॒समव॑ रुन्द्धे
Sentence: 2    परि॑श्रिते याजयति ब्रह्मवर्च॒सस्य॒ परि॑गृहीत्यै
Sentence: 3    श्वे॒तायै॑ श्वे॒तव॑त्सायै दु॒ग्धम्म॑थि॒तमाज्य॑मभव॒त्याज्य॒म्प्रोक्ष॑ण॒माज्ये॑न मार्जयन्ते॒ यव॑दे॒व ब्र॑ह्मवर्च॒सं तत्सर्वं॑ करो॒त्यति॑ ब्रह्मवर्च॒सं क्रि॑यत॒ इत्या॑हुस् ।
Sentence: 4    ई॑श्व॒रो दु॒श्चर्मा॒ भवि॑तो॒रिति॑ मान॒वी ऋचौ॑ धा॒य्ये॑ कुर्या॒द्यद्वै॒ किं च॒ मनु॒रव॑द॒त्तदम् ।।

Verse: 3 
Sentence: 1    भे॑ष॒जमे॒वास्मै॑ करोति
Sentence: 2    यदि॑ बिभी॒याद्दु॒श्चर्मा॑ भविष्या॒मीति॑ सोमापौ॒ष्णं च॒रुं निर्व॑पेत्सौ॒म्यो वै॑ दे॒वत॑या॒ पुरु॑षः पौ॒ष्णाः प॒शवः॒ स्वयै॒वास्मै॑ दे॒वत॑या प॒शुभि॒स्त्वचं॑ करोति॒ न दु॒श्चर्मा॑ भवति
Sentence: 3    सोमारौ॒द्रं च॒रुं निर्व॑पेत्प्र॒जाका॑मः॒ सोमो वै रेतो॒धा अ॒ग्निः प्र॒जाना॑म्प्रजनयि॒ता सोम॑ ए॒वास्मै॒ रेतो॒ दधा॑त्य ग॒निः प्र॒जाम्प्र ज॑नयति वि॒न्दते॑ ।।

Verse: 4 
Sentence: 1    प्र॒जाम् ।
Sentence: 2    सो॑मारौ॒द्रं च॒रुं निर्व॑पेदभि॒चर॑न्त्सौ॒म्यो वै॑ दे॒वत॑या॒ पुरु॑ष ए॒ष रु॒द्रो यद॒ग्निः स्वाया॑ एवैनं दे॒वता॑यै नि॒ष्क्रीय॑ रु॒द्रायापि॑ दधाति॒ ताज॒गार्ति॒मार्छ॑ति
Sentence: 3    सोमारौ॒द्रं च॒रुं निर्व॑पे॒ज्ज्योगा॑मयावी॒ सोमं॒ वा ए॒तस्य॒ रसो॑ गछत्य॒ग्निं शरी॑रं॒ यस्य॒ ज्योगा॒मय॑ति॒ सोमा॑दे॒वास्य॒ रसं॑ निष्क्री॒णात्य॒ग्नेः शरी॑रमु॒त यदि॑ ।।

Verse: 5 
Sentence: 1    इ॒तासु॒र्भव॑ति॒ जीव॑त्ये॒व सो॑मारु॒द्रयो॒र्वा ए॒तं ग्र॑सि॒तं होता॒ निष्खि॑दति॒ स ई॑श्व॒र आर्ति॒मार्तो॑रन॒ड्वान्होत्रा॒ देयो॒ वह्नि॒र्वा अ॑न॒ड्वान्वह्नि॒र्होता॒ वह्नि॑नै॒व वह्नि॑मा॒त्मानं॑ स्पृणोति
Sentence: 2    सोमारौ॒द्रं च॒रुं निर्व॑पे॒द्यः का॒मये॑त॒ स्वे ऽस्मा॑ आ॒यत॑ने॒ भ्रातृ॑व्यं जनयेय॒मिति॒ वेदि॑म्परि॒गृह्या॒र्धमु॑द्ध॒न्याद॒र्धं नार्धम्ब॒र्हिष॑ स्तृणी॒याद॒र्धं नार्धमि॒ध्मस॒र्धं न स्व ए॒वास्मा॑ आ॒यत॑ने॒ भ्रातृ॑व्यं जनयति ।।

Paragraph: 11 
Verse: 1 
Sentence: 1    अै॒न्द्रमेका॑दशकपालं॒ निर्व॑पेन्मारु॒तं स॒प्तक॑पालं॒ ग्राम॑कामस् ।
Sentence: 2    इन्द्रं॑ चै॒व म॒रुत॑श्च॒ स्वेन॑ भाग॒धेये॒नोप॑ धावति
Sentence: 3    त ए॒वास्मै॑ सजा॒तान्प्र य॑छन्ति
Sentence: 4    ग्रा॒म्ये॒व भ॑वति ।
Sentence: 5    आ॑हव॒नीय॑ ऐ॒न्द्रमधि॑ श्रयति॒ गार्ह॑पत्ये मारु॒तम्
Sentence: 6    पापवस्य॒सस्य॒ विधृ॑त्यै
Sentence: 7    स॒प्तक॑पालो मारु॒तो भ॑वति
Sentence: 8    स॒प्तग॑णा वै म॒रुत॑स् ।
Sentence: 9    ग॑ण॒श ए॒वास्मै॑ सजा॒तानव॑ रुन्द्धे ।
Sentence: 10    अ॑नू॒च्यमा॑न॒ आ सा॑दयति
Sentence: 11    विश॑मे॒व ।।

Verse: 2 
Sentence: 1    अ॑स्मा॒ अनु॑वर्त्मानं करोति ।
Sentence: 2    ए॒तामे॒व निर्व॑पे॒द्यः का॒मये॑त
Sentence: 3    क्ष॒त्राय॑ च वि॒शे च॑ स॒मदं॑ दध्या॒मिति॑ ।
Sentence: 4    अै॒न्द्रस्या॑व॒द्यन्ब्रू॑यात् ।
Sentence: 5    इन्द्रा॒यानु॑ ब्रू॒हीत्या॒श्राव्य॑ ब्रूयात् ।
Sentence: 6    म॒रुतो॑ य॒जेति
Sentence: 7    मारु॒तस्या॑व॒द्यन्ब्रू॑यात् ।
Sentence: 8    म॒रुद्भ्यो ऽनु॑ ब्रू॒हीत्या॒श्राव्य॑ ब्रूयात् ।
Sentence: 9    इन्द्रं॑ य॒जेति
Sentence: 10    स्व एवैभ्यो भाग॒धेये॑ स॒मदं॑ दधाति
Sentence: 11    वितृंहा॒णास्ति॑ष्ठन्ति ।
Sentence: 12    ए॒तामे॒व ।।

Verse: 3 
Sentence: 1    निर्व॑पे॒द्यः का॒मये॑त
Sentence: 2    कल्पे॑र॒न्निति
Sentence: 3    यथादेव॒तम॑व॒दाय॑ यथादेव॒तं य॑जेत् ।
Sentence: 4    भा॑ग॒धेये॑नैवैनान्यथाय॒थं क॑ल्पयति
Sentence: 5    कल्प॑न्त ए॒व ।
Sentence: 6    अै॒न्द्रमेका॑दशकपालं॒ निर्व॑पेद्वैश्वदे॒वं द्वाद॑शकपालं॒ ग्राम॑कामस् ।
Sentence: 7    इन्द्रं॑ चै॒व विश्वां॑श्च दे॒वान्त्स्वेन॑ भाग॒धेये॒नोप॑ धावति
Sentence: 8    त ए॒वास्मै॑ सजा॒तान्प्र य॑छन्ति
Sentence: 9    ग्रा॒म्ये॒व भ॑वति ।
Sentence: 10    अै॒न्द्रस्या॑व॒दाय॑ वैश्वदे॒वस्याव॑ द्ये॒दथै॒न्द्रस्य॑ ।।

Verse: 4 
Sentence: 1    उ॒परि॑ष्टात् ।
Sentence: 2    इ॑न्द्रि॒येनै॒वास्मा॑ उभ॒यतः॑ सजा॒तान्परि॑ गृह्णाति ।
Sentence: 3    उ॑पाधा॒य्य॑पूर्वयं॒ वासो॒ दक्षि॑णा सजा॒ताना॒मुप॑हित्यै
Sentence: 4    पृश्नि॑यै दु॒ग्धे प्रै॑यंगवं च॒रुं निर्व॑पेन्म॒रुद्भ्यो॒ ग्राम॑कामः
Sentence: 5    पृश्नि॑यै वै॒ पय॑सो म॒रुतो॑ जा॒ताः पृश्नि॑यै प्रि॒यंग॑वस् ।
Sentence: 6    मा॑रु॒ताः खलु वै दे॒वत॑या सजा॒तास् ।
Sentence: 7    म॒रुत॑ ए॒व स्वेन॑ भाग॒धेये॒नोप॑ धावति
Sentence: 8     तए॒वास्मै॑ सजा॒तान्प्र य॑छन्ति
Sentence: 9    ग्रा॒म्ये॒व भ॑वति
Sentence: 10    प्रि॒यव॑ती याज्यानुवा॒क्ये॑ ।।

Verse: 5 
Sentence: 1    भ॑वतः प्रि॒यमेवैनं समा॒नानां॑ करोति
Sentence: 2    द्वि॒पदा॑ पुरोऽनुवा॒क्या॑ भवति द्वि॒पद॑ ए॒वाव॑ रुन्द्धे
Sentence: 3    चतु॑ष्पदा या॒ज्या॒ चतु॑ष्पद ए॒व प॒शूनव॑ रुन्द्धे
Sentence: 4    दे॒वासु॒राः संय॑त्ता आसन्
Sentence: 5    ते दे॒वा मि॒थो विप्रि॑या आसन्
Sentence: 6    ते॒ ऽन्यो॒ऽन्यस्मै ज्यैष्ठ्या॒याति॑ष्ठमानाश्चतु॒र्धा व्य॑क्रामन्न॒ग्निर्वसु॑भिः॒ सोमो॑ रुद्रै॒रिन्द्रो॑ म॒रुद्भि॒र्वरु॑ण आदित्यैः
Sentence: 7    स इन्द्रः॑ प्र॒जाप॑ति॒मुपा॑धावत्
Sentence: 8    तम् ।।

Verse: 6 
Sentence: 1    ए॒तया॑ सं॒ज्ञान्या॑याजयत् ।
Sentence: 2    अ॒ग्नये॒ वसु॑मते पुरो॒डाश॑म॒ष्टाक॑पालं॒ निर॑वप॒त्सोमा॑य रु॒द्रव॑ते च॒रुमिन्द्रा॑य म॒रुत्व॑ते पुरो॒डाश॒मेका॑दशकपालं॒ वरु॑णायादि॒त्यव॑ते॒ चरु॑म् ।
Sentence: 3    ततो॒ वा इन्द्रं॑ दे॒वा ज्यै॑ष्ठ्याया॒भि सम॑जानत
Sentence: 4    यः स॑मानैर्मि॒थो विप्रि॑यः॒ स्यात्तमे॒तया॑ सं॒ज्ञान्या॑ याजयेत् ।
Sentence: 5    अ॒ग्नये॒ वसु॑मते पुरो॒डाश॑म॒ष्टाक॑पालं॒ निर्व॑पे॒त्सोमा॑य रु॒द्रव॑ते च॒रुमिन्द्रा॑य म॒रुत्व॑ते पुरो॒डाश॒मेका॑दशकपालं॒ वरु॑णायादि॒त्यव॑ते च॒रुम्
Sentence: 6    इन्द्र॑मेवैनम्भू॒तं ज्यै॑ष्ठ्याय समा॒ना अ॒भि सं जा॑नते
Sentence: 7    वसि॑ष्ठः समा॒नाना॑म्भवति ।।

Paragraph: 12 
Verse: 1 
Sentence: 1=a    हि॑र्ण्यग॒र्भस् ।
Sentence: 2=b    आपो॑ ह॒ यत्
Sentence: 3=c    प्रजा॑पते
Sentence: 4=d    स वे॑द पु॒त्रः पि॒तरं॒ स मा॒तरं॒ स सू॒नुर्भु॑व॒त्स भु॑व॒त्पुन॑र्मघः । स द्याऔ॑र्णोद॒न्तरि॑क्षं॒ स सुवः॒ स विश्वा॒ भुवो॑ अभव॒त्स आभ॑वत् ।।
Sentence: 5=e    उदु॒ त्यम् ।
Sentence: 6=f    चि॒त्रम्
Sentence: 7=g    स प्र॑त्न॒वन्नवी॑य॒साग्ने॑ द्यु॒म्नेन॑ सं॒यता॑ । बृ॒हत्त॑तन्थ भा॒नुना॑ ।।
Sentence: 8=h    नि काव्या॑ वे॒धसः॒ शश्व॑तस्क॒र्हस्ते॒ दधा॑नः ।।

Verse: 2 
Sentence: 1    नर्या॑ पु॒रूणि॑ । अ॒ग्निर्भु॑वद्रयि॒पती॑ रयी॒णां स॒त्रा च॑क्रा॒णो अ॒मृता॑नि॒ विश्वा॑ ।।
Sentence: 2=i    हिर॑ण्यपानिमू॒तये॑ सवि॒तार॒मुप॑ ह्वये । स चेत्ता॑ दे॒वता॑ प॒दम् ।।
Sentence: 3=k    वा॒मम॒द्य स॑वितर्वा॒ममु॒ श्वो दि॒वेदि॑वे वा॒मम॒स्मभ्यं॑ सावीः । वा॒मस्य॒ हि क्षय॑स्य देव॒ भूरे॑र॒या धि॒या वा॑म॒भाजः॑ स्याम ।।
Sentence: 4=l    बडि॒त्था पर्व॑तानां खि॒द्रम्बि॑भर्षि पृथिवि । प्र या भू॑मि प्रवत्वति म॒ह्ना जि॒नोषि॑ ।।

Verse: 3 
Sentence: 1    म॑हिनि ।।
Sentence: 2=m    स्तोमा॑सस्त्वा विचारिणि॒ प्रति॑ ष्टोभन्त्य॒क्तुभिः॑ । प्र या वाजं॒ न हेष॑न्तम्प्रे॒रुमस्य॑स्यर्जुनि ।।
Sentence: 3=n    ऋ॑दू॒दरे॑ण॒ सख्या॑ सचेय॒ यो मा॒ न रिष्ये॑द्धर्यश्व पी॒तः । अ॒यं यः सोमो॒ न्यधा॑य्य॒स्मे तस्मा॒ इन्द्र॑म्प्र॒तिर॑मे॒म्यछ॑ ।।
Sentence: 4=o    आपा॑न्तमन्युस्तृ॒पल॑प्रभर्मा॒ धुनिः॒ शिमी॑वा॒ञ्छरु॑मां ऋजी॒षी । सोमो॒ विश्वा॑न्यत॒सा वना॑नि॒ नार्वागिन्द्र॑म्प्रति॒माना॑नि देभुः ।।
Sentence: 5=p    प्र ।।

Verse: 4 
Sentence: 1    सु॑वा॒नः सोम॑ ऋत॒युश्चि॑के॒तेन्द्रा॑य॒ ब्रह्म॑ ज॒मद॑ग्नि॒रर्च॑न् । वृषा॑ य॒न्तासि॒ शव॑सस्तु॒रस्या॒न्तर्य॑छ गृण॒ते ध॒र्त्रं दृं॑ह ।।
Sentence: 2=q    स॒बाध॑स्ते॒ मदं॑ च शुष्म॒यं च॒ ब्रह्म॒ नरो॑ ब्रह्म॒कृतः॑ सपर्यन् । अ॒र्को वा॒ यत्तु॒रते॒ सोम॑चक्षा॒स्तत्रेदिन्द्रो॑ दधते पृ॒सु तु॒र्याम् ।।
Sentence: 3=r    वष॑ट्ते विष्णवा॒स आ कृ॑णोमि॒ तन्मे॑ जुषस्व शिपिविष्ट ह॒व्यम् ।।

Verse: 5 
Sentence: 1    वर्ध॑न्तु त्वा सुष्टु॒तयो॒ गिरो॑ मे यू॒यम्पा॑त स्व॒स्तिभिः॒ सदा॑ नः ।।
Sentence: 2=s    प्र तत्ते॑ अ॒द्य शि॑पिविष्ट॒ नामा॒र्यः शं॑सामि व॒युना॑नि वि॒द्वान् । तं त्वा॑ गृणामि त॒वस॒मत॑वीया॒न्क्षय॑न्तमस्य॒ रज॑सः परा॒के ।।
Sentence: 3=t    किमित्ते॑ विष्णो परि॒चक्ष्य॑म्भू॒त्प्र यद्व॑व॒क्षे शि॑पिवि॒ष्टो अ॑स्मि । मा वर्पो॑ अ॒स्मदप॑ गूह ए॒तद्यद॒न्यरू॑पः समि॒थे ब॒भूथ॑ ।।

Verse: 6 
Sentence: 1=u    अग्ने॒ दा दा॒शुषे॑ र॒यिं वी॒रव॑न्त॒म्परी॑णसम् । शि॑शी॒हि नः॑ सूनु॒मतः॑ ।।
Sentence: 2=v    दा नो॑ अग्ने श॒तिनो॒ दाः स॑ह॒स्रिणो॑ दु॒रो न वाजं॒ श्रुत्या॒ अपा॑ वृधि । प्राची॒ द्यावा॑पृथि॒वी ब्रह्म॑णा कृधि॒ सुव॒र्ण शु॒क्रमु॒षसो॒ वि दि॑द्युतुः ।।
Sentence: 3=w    अ॒ग्निर्दा॒ द्रवि॑णं वी॒रपे॑शा अ॒ग्निरृषिं॒ यः स॒हस्रा॑ स॒नोति॑ । अ॒ग्निर्दि॒वि ह॒व्यमा त॑ताना॒ग्नेर्धामा॑नि॒ विभृ॑ता पुरु॒त्रा ।।
Sentence: 4=x    मा ।।

Verse: 7 
Sentence: 1    नो॑ मर्धीस् ।
Sentence: 2=y    आ तू भ॑र
Sentence: 3=z    घृ॒तं न पू॒तं त॒नूर॑रे॒पाः शुचि॒ हिर॑ण्यम् । तत्ते॑ रु॒क्मो न रो॑चत स्वधावः
Sentence: 4=aa    उ॒भे सु॑श्चन्द्र स॒र्पिषो॒ दर्वी॑ श्रीणीष आ॒सनि॑ । उ॒तो न॒ उत्पु॑पूर्या उ॒क्थेषु॑ शवसस्पत॒ इषं॑ स्तो॒तृभ्य॒ आ भ॑र ।।
Sentence: 5=bb    वायो॑ श॒तं हरी॑णां यु॒वस्व॒ पोष्या॑नाम् । उ॒त वा॑ ते सह॒सृणो॒ रथ॒ आ या॑तु॒ पाज॑सा ।।
Sentence: 6=cc    प्र याभिः॑ ।।

Verse: 8 
Sentence: 1    यासि॑ दा॒श्वांस॒मछा॑ नि॒युद्भि॑र्वायवि॒ष्टये॑ दुरो॒णे । नि नो॑ र॒यिं सु॒भोज॑सं युवे॒ह नि वी॒रव॒द्गव्य॒मश्वि॑यं च॒ राधः॑ ।।
Sentence: 2=dd    रे॒वती॑र्नः सध॒माद॒ इन्द्रे॑ सन्तु तु॒विवा॑जाः । क्षु॒मन्तो॒ याभि॒र्मदे॑म ।।
Sentence: 3=ee    रे॒वां इद्रे॒वत॑ स्तो॒ता स्यात्त्वाव॑तो म॒घोनः॑ । प्रेदु॑ हरिवः श्रु॒तस्य॑ ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.