TITUS
Black Yajur-Veda: Taittiriya-Samhita
Part No. 17
Previous part

Chapter: 3 
Paragraph: 1 
Verse: 1 
Sentence: 1=a    अग्ने॑ तेजस्विन्तेज॒स्वी त्वं दे॒वेषु॑ भूया॒स्तेज॑स्वन्त॒म्मामायु॑ष्मन्तं॒ वर्च॑स्वन्तम्॑षु कुरु दी॒क्षायै॑ च त्वा॒ तप॑सश्च॒ तेज॑से जुहोमि
Sentence: 2=b    तेजो॒विद॑सि॒ तेजो॑ मा॒ मा हा॑सी॒न्माहं तेजो॑ हासिष॒म्मा मां तेजो॑ हासीत् ।
Sentence: 3=c    इन्द्रौ॑जस्विन्नोज॒स्वी त्वं दे॒वेषु॑ भूया॒ ओज॑स्वन्त॒म्मामायु॑ष्मन्तं॒ वर्च॑स्वन्तम्मनु॑षु कुरु॒ ब्रह्म॑णश्च त्वा क्ष॒त्रस्य॑ च ।।

Verse: 2 
Sentence: 1    ओज॑से जुहोमि ।
Sentence: 2=d    ओ॑जो॒विद॒स्योजो॑ मा॒ मा हा॑सी॒न्माहमोजो॑ हासिष॒म्मा मामोजो॑ हासीत्
Sentence: 3=e    सूर्य॑ भ्राजस्विन्भ्राज॒स्वी त्वं दे॒वेषु॑ भूया॒ भ्राज॑स्वन्त॒म्मामायु॑ष्मन्तं॒ वर्च॑स्वन॑षु कुरु वा॒योश्च॑ त्वा॒पां च॒ भ्राज॑से जुहोमि
Sentence: 4=f    सुव॒र्विद॑सि॒ सुव॑र्मा॒ मा हा॑सी॒न्माहं सुव॑र्हासिष॒म्मा मां सुव॑र्हासीत् ।
Sentence: 5=g    मयि॑ मे॒धाम्मयि॑ प्र॒जाम्मय्य॒ग्निस्तेजो॑ दधातु॒ मयि॑ मे॒धाम्मयि॑ प्र॒जाम्मयीन्द्र॑ इन्द्॒यं द॑धातु॒ मयि॑ मे॒धाम्मयि॑ प्र॒जाम्मयि॒ सूर्यो॒ भ्राजो॑ दधातु ।।

Paragraph: 2 
Verse: 1 
Sentence: 1=a    वा॒युर्हिं॑क॒र्ताग्निः प्र॑स्तो॒ता प्र॒जाप॑तिः॒ साम॒ बृह॒स्पति॑रुद्गा॒ता विश्वे॑ दे॒वा उ॑पगा॒तारो॑ म॒रुतः॑ प्रतिह॒र्तार॒ इन्द्रो॑ नि॒धनं॒ ते दे॒वाः प्रा॑ण॒भृतः॑ प्रा॒णम्मयि॑ दधतु ।
Sentence: 2=b    ए॒तद्वै॒ सर्व॑मध्व॒र्युरु॑पाकु॒र्वन्नु॑द्गा॒तृभ्य॑ उ॒पाक॑रोति॒ ते दे॒वाः प्रा॑ण॒भृतः॑ प्रा॒णम्मयि॑ दध॒त्वित्या॑है॒तदे॒व सर्व॑मा॒त्मन्ध॑त्ते ।
Sentence: 3=c    इडा॑ देव॒हूर्मनु॑र्यज्ञ॒नीस् ।
Sentence: 4=d    बृह॒स्पति॑रुक्थाम॒दानि॑ शंसिषत् ।
Sentence: 5=e    विश्वे॑ दे॒वाः ।।

Verse: 2 
Sentence: 1    सुक्त॒वाच॑स् ।
Sentence: 2=f    पृथि॑वि मात॒र्मा मा॑ हिंसीस् ।
Sentence: 3=g    मधु॑ मनिष्ये॒ मधु॑ जनिष्ये॒ मधु॑ वक्ष्यामि॒ मधु॑ वदिष्यामि॒ मधु॑मतीं दे॒वेभ्यो॒ वाच॑मुद्यासं शुश्रू॒षेण्या॑म्मनु॒ष्ये॑भ्यस्
Sentence: 4=h    तम्मा॑ दे॒वा अ॑वन्तु शो॒भायै॑ पि॒तरो॑ ऽनु मदन्तु ।।

Paragraph: 3 
Verse: 1 
Sentence: 1=a    वस॑वस्त्वा॒ प्र बृ॑हन्तु गाय॒त्रेण॒ छन्द॑सा॒ग्नेः प्रि॒यम्पाथ॒ उपे॑हि
Sentence: 2=b    रु॒द्रास्त्वा॒ प्र बृ॑हन्तु त्रैष्टुभेन॒ छन्द॒सेन्द्र॑स्य प्रि॒यम्पाथ॒ उपे॑हि ।
Sentence: 3=c    आ॑दि॒त्यास्त्वा॒ प्र बृ॑हन्तु॒ जाग॑तेन॒ छन्द॑सा॒ विश्वे॑षां दे॒वाना॑म्प्रि॒यम्पाथ॒ उपे॑हि
Sentence: 4=d    मान्दा॑सु ते शुक्र शु॒क्रमा धु॑नोमि
Sentence: 5=e    भ॒न्दना॑सु
Sentence: 6=f    कोत॑नासु
Sentence: 7=g    नूत॑नासु
Sentence: 8=h    रेशी॑षु
Sentence: 9=i    मेषी॑षु
Sentence: 10=k    वाशी॑षु
Sentence: 11=l    विश्व॒भृत्सु
Sentence: 12=m    माध्वी॑षु
Sentence: 13=n    ककु॒हासु
Sentence: 14=o    शक्व॑रीषु ।।

Verse: 2 
Sentence: 1=p    शु॒क्रासु॑ ते शुक्र शु॒क्रमा धू॑नोमि
Sentence: 2=q    शु॒क्रं ते॑ शु॒क्रेण॑ गृह्णा॒म्यह्नो॑ रू॒पेण॒ सूर्य॑स्य र॒श्मिभिः॑ ।
Sentence: 3=r    आस्मि॑न्नु॒ग्रा अ॑चुच्यवुर्दि॒वो धारा॑ असश्चत
Sentence: 4=s    ककु॒हं रू॒पं वृ॑ष॒भस्य॑ रोचते बृ॒हत्सोमः॒ सोम॑स्य पुरो॒गाः शु॒क्रः शु॒क्रस्य॑ पुरो॒गाः ।
Sentence: 5=t    यत्ते॑ सो॒मादा॑भ्यं॒ नाम॒ जागृ॑वि॒ तस्मै॑ ते सोम॒ सोमा॑य॒ स्वाहा॑ ।
Sentence: 6=u    उ॒शिक्त्वं दे॑व सोम गाय॒त्रेण॒ छन्द॑सा॒ग्नेः ।।

Verse: 3 
Sentence: 1    प्रि॒यम्पथो॒ अपी॑हि
Sentence: 2=v    व॒शी त्वं दे॑व सोम त्रैष्टुभेन॒ छन्द॒सेन्द्र॑स्य प्रि॒यम्पाथो॒ अपी॑हि ।
Sentence: 3=w    अ॒स्मत्स॑खा॒ त्वं दे॑व सोम॒ जाग॑तेन॒ छन्द॑सा विश्वेषां दे॒वाना॑म्प्रि॒यम्पाथो॒ अपी॑हि ।
Sentence: 4=x    आ नः॑ प्रा॒ण ए॑तु परा॒वत॒ आन्तरि॑क्षाद्दि॒वस्परि॑ । आयुः॑ पृथि॒व्या अध्य॒मृत॑मसि प्रा॒णाय॑ त्वा ।
Sentence: 5=y    इ॑न्द्रा॒ग्नी मे॒ वर्चः॑ कृणुतां॒ वर्चः॒ सोमो॒ बृह॒स्पतिः॑ । वर्चो॑ मे॒ विश्वे॑ दे॒वा वर्चो॑ मे धत्तमश्विना ।।
Sentence: 6=z    द॑ध॒न्वे वा॒ यदी॒मनु॒ वोच॒द्ब्रह्मा॑णि॒ वेरु॒ तत् । परि॒ विश्वा॑नि॒ काव्या॑ ने॒मिश्च॒क्रमि॑वाभवत् ।।

Paragraph: 4 
Verse: 1 
Sentence: 1    ए॒तद्वा अ॒पां ना॑म॒धेयं॒ गुह्यं॒ यदा॑धा॒वास् ।
Sentence: 2    मान्दा॑सु ते शुक्र शु॒क्रमा धू॑नो॒मीत्या॑ह ।
Sentence: 3    अ॒पामे॒व ना॑म॒धेये॑न॒ गुह्ये॑न दि॒वो वृष्टि॒मव॑ रुन्द्धे
Sentence: 4    शु॒क्रं ते॑ शु॒क्रेण॑ गृह्णा॒मीत्या॑ह ।
Sentence: 5    ए॒तद्वा अह्नो॑ रू॒पं यद्रात्रिः
Sentence: 6    सूर्य॑स्य र॒श्मयो॒ वृष्ट्या॑ ईशते ।
Sentence: 7    अह्न॑ ए॒व रू॒पेण॒ सूर्य॑स्य र॒श्मिभि॑र्दि॒वो वृष्टिं॑ च्यावयति ।
Sentence: 8    आस्मि॑न्नु॒ग्राः ।।

Verse: 2 
Sentence: 1    अ॑चुच्यवु॒रित्या॑ह
Sentence: 2    यथाय॒जुरेवै॒तत्
Sentence: 3    ककु॒हं रू॒पं वृ॑ष॒भस्य॑ रोचते बृ॒हदित्या॑ह ।
Sentence: 4    ए॒तद्वा अ॑स्य ककु॒हं रू॒पं यद्वृष्टि॑स् ।
Sentence: 5    रू॒पेणै॒व वृष्टि॒मव॑ रुन्द्धे
Sentence: 6    यत्ते॑ सो॒मादा॑भ्यं॒ नाम॒ जागृ॒वीत्या॑ह ।
Sentence: 7    ए॒ष ह वै ह॒विषा॑ ह॒विर्य॑जति॒ यो ऽदा॑भ्यं गृही॒त्वा सोमा॑य जु॒होति
Sentence: 8    परा॒ वा ए॒तस्यायुः॑ प्रा॒ण ए॑ति ।।

Verse: 3 
Sentence: 1    यो॑ ऽं॒शुं गृ॒ह्णाति॑ ।
Sentence: 2    आ नः॑ प्रा॒ण ए॑तु परा॒वत॒ इत्या॑ह ।
Sentence: 3    आयु॑रे॒व प्रा॒णमा॒त्मन्ध॑त्ते ।
Sentence: 4    अ॒मृत॑मसि प्रा॒णाय॒ त्वेति॒ हिर॑ण्यम॒भि व्य॑निति ।
Sentence: 5    अ॒मृतं वै॒ हिर॑ण्य॒मायुः॑ प्रा॒णस् ।
Sentence: 6    अ॒मृते॑नै॒वायु॑रा॒त्मन्ध॑त्ते
Sentence: 7    श॒तमा॑नम्भवति
Sentence: 8    श॒तायुः॒ पुरु॑षः श॒तेन्द्रि॑यस् ।
Sentence: 9    आयु॑ष्ये॒वेन्द्रि॒ये प्रति॑ तिष्ठति ।
Sentence: 10    अ॒प उप॑ स्पृशति
Sentence: 11    भेष॒जं वा आप॑स् ।
Sentence: 12    भे॑ष॒जमे॒व कु॑रुते ।।

Paragraph: 5 
Verse: 1 
Sentence: 1=a    वा॒युर॑सि प्रा॒णो नाम॑ सवि॒तुराधि॑पत्ये ऽपा॒नम्मे॑ दास् ।
Sentence: 2=b    चक्षु॑रसि॒ श्रोत्रं॒ नाम॑ दः॒तुराधि॑पत्य॒ आयु॑र्मे दास् ।
Sentence: 3=c    रू॒पम॑सि॒ वर्णो॒ नाम॒ बृह॒स्पते॒राधि॑पत्ये प्र॒जाम्मे॑ दास् ।
Sentence: 4=d    ऋ॒तम॑सि स॒त्यं नामे॑न्द्र॒स्याधि॑पत्ये क्ष॒त्रम्मे॑ दास् ।
Sentence: 5=e    भू॒तम॑सि॒ भव्यं॒ नाम॑पितृ॒णामाधि॑पत्ये॒ ऽपामोष॑धीनां॒ गर्भं॑ धास् ।
Sentence: 6=f    ऋ॒तस्य॑ त्वा॒ व्यो॑मने ।
Sentence: 7=g    ऋ॒तस्य॑ ।।

Verse: 2 
Sentence: 1    त्वा॒ विभू॑मने ।
Sentence: 2=h    ऋ॒तस्य॑ त्वा॒ विध॑र्मणे ।
Sentence: 3=i    ऋ॒तस्य॑ त्वा स॒त्याय॑ ।
Sentence: 4=k    ऋ॒तस्य॑ त्वा॒ ज्योति॑षे
Sentence: 5    प्र॒जाप॑तिर्वि॒राज॑मपश्य॒त्तया॑ भू॒तं च॒ भव्यं॑ चासृजत॒ तामृषि॑भ्यस्ति॒रो॑ ऽदधा॒त्तां ज॒मद॑ग्नि॒स्तप॑सापश्य॒त्तया वै॒ स पृश्नी॒न्कामा॑नसृजत॒ तत्पृश्नी॑नाम्पृश्नि॒त्वम् ।
Sentence: 6    यत्पृश्न॑यो गृ॒ह्यन्ते॒ पृश्नी॑ने॒व तैः॒ कामा॒न्यज॑मा॒नो ऽव॑ रुन्द्धे
Sentence: 7    वा॒युर॑सि प्रा॒णः ।।

Verse: 3 
Sentence: 1    नामेत्या॑ह प्राणापा॒नावे॒वाव॑ रुन्द्धे
Sentence: 2    चक्षु॑रसि॒ श्रोत्रं॒ नामे॑त्या॒हायु॑रे॒वाव॑ रुन्द्धे
Sentence: 3    रू॒पम॑सि॒ वर्णो॒ नामेत्या॑ह प्र॒जामे॒वाव॑ रुन्द्धे ।
Sentence: 4    ऋ॒तम॑सि स॒त्यं नामेत्या॑ह क्ष॒त्रमे॒वाव॑ रुन्द्धे
Sentence: 5    भू॒तम॑सि॒ भव्यं॒ नामेत्या॑ह प॒शवो॒ वा अ॒पामोष॑धीनां॒ गर्भः॑ प॒शूने॒व ।।

Verse: 4 
Sentence: 1    अव॑ रुन्द्धे ।
Sentence: 2    ए॒तावद्वै॒ पुरु॑षम्प॒रित॒स्तदे॒वाव॑ रुन्द्धे ।
Sentence: 3    ऋ॒तस्य॑ त्वा॒ व्यो॑मन॒ इत्या॑हे॒यं वा ऋ॒तस्य॒ व्यो॑मे॒मामे॒वाभि ज॑यति ।
Sentence: 4    ऋ॒तस्य॑ त्वा॒ विभू॑मन॒ इत्या॑हा॒न्तरि॑क्ष॒म्वा ऋ॒तस्य॒ विभू॑मा॒न्तरि॑क्षमे॒वाभि ज॑यति ।
Sentence: 5    ऋ॒तस्य॑ त्वा॒ विध॑र्मण॒ इत्या॑ह द्यौ॒र्वा ऋ॒तस्य॒ विध॑र्म॒ दिव॑मे॒वाभि ज॑यति ।
Sentence: 6    ऋ॒तस्य॑ ।।

Verse: 5 
Sentence: 1    त्वा॑ स॒त्यायेत्या॑ह॒ दिशो॒ वा ऋ॒तस्य॑ स॒त्यं दिश॑ ए॒वाभि ज॑यति ।
Sentence: 2    ऋ॒तस्य॑ त्वा॒ ज्योति॑ष॒ इत्या॑ह सुव॒र्गो वै॑ लो॒क ऋ॒तस्य॒ ज्योतिः॑ सुव॒र्गमे॒व लो॒कम॒भि ज॑यति ।
Sentence: 3    ए॒ताव॑न्तो वै देवलो॒कास्ताने॒वाभि ज॑यति
Sentence: 4    दश॒ सम्प॑द्यन्ते॒ दशा॑क्षरा वि॒राडन्नं॑ वि॒राड्वि॒राज्ये॒वान्नाद्ये॒ प्रति॑ तिष्ठति ।।

Paragraph: 6 
Verse: 1 
Sentence: 1    दे॒वा वै॒ यद्य॒ज्ञेन॒ नावारु॑न्धत॒ तत्परै॒रवा॑रुन्धत
Sentence: 2    तत्परा॑णाम्पर॒त्वम् ।
Sentence: 3    यत्परे॑ गृ॒ह्यन्ते॒ यदे॒व य॒ज्ञेन॒ नाव॑रु॒न्द्धे तस्याव॑रुद्ध्यै
Sentence: 4    यम्प्र॑थ॒मं गृ॒ह्णाती॒ममे॒व तेन॑ लो॒कम॒भि ज॑यति
Sentence: 5    यं द्वि॒तीय॑म॒न्तरि॑क्षं॒ तेन
Sentence: 6    यं तृ॒तीय॑म॒मुमे॒व तेन॑ लो॒कम॒भि ज॑यति
Sentence: 7    यदे॒ते गृ॒ह्यन्त॑ ए॒षां लो॒काना॑म॒भिजि॑त्यै ।।

Verse: 2 
Sentence: 1    उत्त॑रे॒ष्वहः॑स्व॒मुतो॒ ऽर्वाञ्चो॑ गृह्यन्ते ।
Sentence: 2    अ॑भि॒जित्यै॒वेमाँ लो॒कान्पुन॑रि॒मं लो॒कम्प्र॒त्यव॑रोहन्ति
Sentence: 3    यत्पूर्वे॒ष्वहः॑स्वि॒तः परा॑ञ्चो गृ॒ह्यन्ते॒ तस्मा॑दि॒तः परा॑ञ्च इ॒मे लो॒कास् ।
Sentence: 4    यदुत्त॑रे॒ष्वहः॑स्व॒मुतो॒ ऽर्वाञ्चो॑ गृ॒ह्यन्ते॒ तस्मा॑द॒मुतो॒ ऽर्वाञ्च॑ इ॒मे लो॒कास्
Sentence: 5    तस्मा॒दया॑तयाम्नो लो॒कान्म॑नु॒ष्या॒ उप॑ जीवन्ति
Sentence: 6    ब्रह्मवा॒दिनो॑ वदन्ति
Sentence: 7    कस्मा॑त्स॒त्याद॒द्भ्य ओष॑धयः॒ सम्भ॑व॒न्त्योष॑धयः ।।

Verse: 3 
Sentence: 1    म॑नु॒ष्या॑णा॒मन्न॑म्प्र॒जाप॑तिम्प्र॒जा अनु॒ प्र जा॑यन्त॒ इति
Sentence: 2    परा॒नन्विति॑ ब्रूयात् ।
Sentence: 3    यद्गृ॒ह्णाति॑ ।
Sentence: 4    अ॒द्भ्यस्त्वौ॑षधीभ्यो गृह्णा॒मीति॒ तस्मा॑द॒द्भ्य ओष॑धयः॒ सम्भ॑वन्ति
Sentence: 5    यद्गृ॒ह्णाति॑ ।
Sentence: 6    ओष॑धीभ्यस्त्वा प्र॒जाभ्यो॑ गृह्णा॒मीति॒ तस्मा॒दोष॑धयो मनु॒ष्या॑णा॒मन्न॑म् ।
Sentence: 7    यद्{F गृ॒ह्णाति{W गृह्णाति{GLOS गृ॒ह्णाति
Sentence: 8    प्र॒जाभ्य॑स्त्वा प्र॒जाप॑तये गृह्णा॒मीति॒ तस्मा॑त्प्र॒जाप॑तिम्प्र॒जा अनु॒ प्र जा॑यन्ते ।।

Paragraph: 7 
Verse: 1 
Sentence: 1    प्र॒जाप॑तिर्देवासु॒रान॑सृजत
Sentence: 2    तदनु॑ य॒ज्ञो॑ ऽसृज्यत य॒ज्ञं छन्दां॑सि
Sentence: 3    ते विष्व॑ञ्चो॒ व्य॑क्रामन् ।
Sentence: 4    सो ऽसु॑रा॒ननु॑ य॒ज्ञो ऽपा॑क्रामद्य॒ज्ञं छन्दां॑सि
Sentence: 5    ते दे॒वा अ॑मन्यन्त ।
Sentence: 6    अ॒मी वा इ॒दम॑भूव॒न्यद्व॒यं स्म इति
Sentence: 7    ते प्र॒जाप॑ति॒मुपा॑धावन् ।
Sentence: 8    सो॑ ऽब्रवीत्प्र॒जाप॑तिस् ।
Sentence: 9    छन्द॑सां वी॒र्य॑मा॒दाय॒ तद्वः॒ प्र दा॑स्या॒मीति
Sentence: 10    स छन्द॑सां वी॒र्य॑म् ।।

Verse: 2 
Sentence: 1    आ॒दाय॒ तदे॑भ्यः॒ प्राय॑छत्
Sentence: 2    तदनु॒ छन्दां॒स्यपा॑क्राम॒ञ्छन्दां॑सि य॒ज्ञस्
Sentence: 3    ततो॑ दे॒ वाअभ॑वन्प॒रासु॑रास् ।
Sentence: 4    य ए॒वं छन्द॑सां वी॒र्यं॒ वेदा श्रा॑व॒यास्तु॑ श्रौष॒ड्यज॒ ये यज॑माहे वषट्का॒रो भव॑त्या॒त्मना॒ परा॑स्य॒ भ्रातृ॑व्यो भवति
Sentence: 5    ब्रह्मवा॒दिनो॑ वदन्ति
Sentence: 6    कस्मै॒ कम॑ध्व॒र्युरा श्रा॑वय॒तीति
Sentence: 7    छन्द॑सां वी॒र्या॒येति॑ ब्रूयात् ।
Sentence: 8    ए॒तद्वै॑ ।।

Verse: 3 
Sentence: 1    छन्द॑सां वी॒र्य॒मा श्रा॑व॒यास्तु श्रौष॒ड्यज॒ ये यजा॑महे वषट्का॒रस् ।
Sentence: 2    य ए॒वं वेद॒ सवी॑र्यैरे॒व छन्दो॑भिरर्चति॒ यत्किं चार्च॑ति
Sentence: 3    यदिन्द्रो॑ वृ॒त्रमह॑न्नमे॒ध्यं तद्यद्यती॑न॒पाव॑पदमे॒ध्यं तदथ॒ कस्मा॑ऐ॒न्द्रो य॒ज्ञ आ सं॒स्थातो॒रित्यहु॑स् ।
Sentence: 4    इन्द्र॑स्य॒ वा ए॒षा य॒ज्ञिया॑ त॒नूर्यद्य॒ज्ञस्
Sentence: 5    तामे॒व तद्य॑जन्ति
Sentence: 6    य ए॑वं॒ वेदोपै॑नं य॒ज्ञो न॑मति ।।

Paragraph: 8 
Verse: 1 
Sentence: 1=a    आ॑यु॒र्दा अ॑ग्ने ह॒विषो॑ जुषा॒णो घृ॒तप्र॑थीको घृ॒तयो॑निरेधि । घृ॒तम्पी॒त्वा मधु॒ चारु॒ गव्य॑म्पि॒तेव॑ पु॒त्रम॒भि र॑क्षतादि॒मम् ।।
Sentence: 2    आ वृ॑श्च्यते॒ वा ए॒तद्यज॑मानो॒ ऽग्निभ्यां॒ यदे॑नयोः शृतं॒कृत्याथा॒न्यत्रा॑वभृ॒थमवैति ।
Sentence: 3    आ॑यु॒र्दा अ॑ग्ने ह॒विषो॑ जुषा॒ण इत्य॑वभृ॒थम॑वै॒ष्यञ्जु॑हुया॒दाहु॑त्यैवैनौ शमयति
Sentence: 4    नार्ति॒मार्छ॑ति॒ यज॑मानस् ।
Sentence: 5=b    यत्कुसी॑दम् ।।

Verse: 2 
Sentence: 1    अप्र॑तीत्त॒म्मयि॒ येन॑ य॒मस्य॑ ब॒लिना॒ चरा॑मि । इहै॒व सन्नि॒रव॑दये॒ तदे॒तत्तद॑ग्ने अनृ॒णो भ॑वामि ।।
Sentence: 2=c    विश्व॑लोप विश्वदा॒वस्य॑ त्वा॒सञ्जु॑होम्य॒ग्धादेको॑ ऽहु॒तादेकः॑ समस॒नादेकः॑ । ते नः॑ कृण्वन्तु भेष॒जं सदः॒ सहो॒ वरे॑ण्यम् ।।
Sentence: 3=d    अ॒यं नो॒ नभ॑सा पु॒रः सं॒स्पानो॑ अ॒भि र॑क्षतु । गृ॒हाणा॒मस॑मर्त्यै ब॒हवो॑ नो गृ॒हा अ॑सन् ।।
Sentence: 4=e    स त्वं नः॑ ।।

Verse: 3 
Sentence: 1    न॑भसस्पत॒ ऊर्जं॑ नो धेहि भ॒द्रया॑ । पुन॑र्नो न॒ष्टमा कृ॑धि॒ पुन॑र्नो र॒यिमा कृ॑धि
Sentence: 2=f    देव॑ संस्पान सहस्रपो॒षस्ये॑शिषे॒ स नो॑ रा॒स्वाज्या॑निं रा॒यस्पोषं॑ सु॒वीरं॑ संवत्स॒रीणां॑ स्व॒स्तिम् ।।
Sentence: 3    अ॒ग्निर्वाव॑ य॒म इ॒यं य॒मी
Sentence: 4    कुसी॑दं॒ वा ए॒तद्य॒मस्य॒ यज॑मान॒ आ द॑त्ते॒ यदोष॑धीभि॒र्वेदिं॑ स्तृ॒णाति
Sentence: 5    यदनु॑पौष्य प्रया॒याद्ग्री॑वब॒द्धमे॑नम् ।।

Verse: 4 
Sentence: 1    अ॒मुष्मिँ॑ लो॒के ने॑नीयेरन्
Sentence: 2    यत्कुसी॑द॒मप्र॑तीत्त॒म्मयी॒त्युपौ॑षतीहै॒व सन्य॒मं कुसी॑दं निरव॒दाया॑नृ॒णः सु॑व॒र्गं लो॒कमे॑ति
Sentence: 3    यदि॑ मि॒श्रमि॑व॒ चरे॑द॒ञ्जलि॑ना॒ सक्तू॑न्प्रदा॒व्ये॑ जुहुयात् ।
Sentence: 4    ए॒ष वा अ॒ग्निर्वै॑श्वान॒रो यत्प्र॑दा॒व्यः॒ स एवैनं स्वदयति ।
Sentence: 5    अह्नां॑ वि॒धान्या॑मेकाष्ट॒काया॑मपू॒पं चतुः॑शरावम्प॒क्त्वा प्रा॒तरे॒तेन॑ क॒क्षमुपौ॑षेत् ।
Sentence: 6    यदि॑ ।।

Verse: 5 
Sentence: 1    दह॑ति पुण्य॒सम॑म्भवति॒ यदि॒ न दह॑ति पाप॒सम॑म्
Sentence: 2    ए॒तेन॑ ह स्म॒ वा ऋष॑यः पु॒रा वि॒ज्ञाने॑न दीर्घस॒त्त्रमुप॑ यन्ति
Sentence: 3    यो वा उ॑पद्र॒ष्टार॑मुपश्रो॒तार॑मनुख्या॒तारं॑ वि॒द्वान्यज॑ते॒ सम॑मुष्मिँ लो॒क इ॑ष्टापु॒र्तन॑ गछते ।
Sentence: 4    अ॒ग्निर्वा उ॑पद्र॒ष्टा व॒युरु॑पश्रो॒तादि॒त्यो॑ ऽनुख्या॒ता
Sentence: 5    तान्य ए॒वं वि॒द्वान्यज॑ते॒ सम॒मुष्मिँ॑ लो॒क इ॑ष्टापू॒र्तेन॑ गछते ।
Sentence: 6    अ॒यं नो॒ नभ॑सा पु॒रः ।।

Verse: 6 
Sentence: 1    इत्य॑ अहा॒ग्निर्वै॒ नभ॑सा पु॒रो॒ ऽग्निमे॒व तदा॑ह ।
Sentence: 2    ए॒तन्मे॑ गोपा॒येति
Sentence: 3    स त्वं नो॑ नभसस्पत॒ इत्या॑ह
Sentence: 4    वा॒युर्वै॒ नभ॑स॒स्पति॑र्वा॒युमे॒व तदा॑ह
Sentence: 5    ए॒तन्मे॑ गोपा॒येति
Sentence: 6    देव॑ संस्पा॒नेत्या॑ह
Sentence: 7    असौ॒ वा आ॑दि॒त्यो दे॒वः सं॒स्पान॑ आदि॒त्यमे॒व तदा॑ह
Sentence: 8    ए॒तन्मे॑ गोपा॒येति॑ ।।

Paragraph: 9 
Verse: 1 
Sentence: 1=a    ए॒तं युवा॑न॒म्परि॑ वो ददामि॒ तेन॒ क्रीड॑न्तीश्चरत प्रि॒येण॑ । मा नः॑ शाप्त ज॒नुषा॑ सुभागा रा॒यस्पोषे॑ण॒ समि॒षा म॑देम ।।
Sentence: 2=b    नमो॑ महि॒म्न उ॒त चक्षु॑षे ते॒ मरु॑ताम्पित॒स्तद॒हं गृ॑णामि । अनु॑ मन्यस्व सु॒यजा॑ यजाम॒ जुष्टं॑ दे॒वाना॑मि॒दम॑स्तु ह॒व्यम् ।।
Sentence: 3=c    दे॒वाना॑मे॒ष उ॑पना॒ह आ॑सीद॒पां गर्भ॒ ओष॑धीषु॒ न्य॑क्तः । सोम॑स्य द्र॒प्सम॑वृणीत पू॒षा ।।

Verse: 2 
Sentence: 1    बृ॒हन्नद्रि॑रभव॒त्तदे॑षाम् ।।
Sentence: 2=d    पि॒ता व॒त्साना॒म्पति॑रघ्नि॒याना॒मथो॑ पि॒ता म॑ह॒तां गर्ग॑राणाम् । व॒त्सो ज॒रायु॑ प्रति॒धुक्पी॒यूष॑ आ॒मिक्षा॒ मस्तु॑ घृ॒तम॑स्य॒ रेतः॑ ।।
Sentence: 3=e    त्वां गावो॑ ऽवृणत रा॒ज्याय॒ त्वां ह॑वन्त म॒रुतः॑ स्व॒र्काः । वर्ष्म॑न्क्ष॒त्रस्य॑ क॒कुभि॑ शिश्रिया॒णस्ततो॑ न उ॒ग्रो वि भ॑जा॒ वसू॑नि ।।
Sentence: 4    व्यृ॑द्धेन॒ वा ए॒ष प॒शुना॑ यजते॒ यस्यै॒तानि॒ न क्रि॒यन्त॑ ए॒ष ह त्वै॒ समृ॑द्धेन यजते॒ यस्यै॒तनि॑ क्रि॒यन्ते॑ ।।

Paragraph: 10 
Verse: 1 
Sentence: 1=a    सूर्यो॑ दे॒वो दि॑वि॒षद्भ्यो॑ धा॒ता क्ष॒त्राय॑ वा॒युः प्र॒जाभ्यः॑ । बृह॒स्पति॑स्त्वा प्र॒जाप॑तये॒ ज्योति॑ष्मतीं जुहोतु ।।
Sentence: 2=b    यस्या॑स्ते॒ हरि॑तो॒ गर्भो ऽथो॒ योनि॑र्हिर॒ण्ययी॑ । अङ्गा॒न्यह्रु॑ता॒ यस्यै॒ तां देवैः॒ सम॑जीगमम् ।।
Sentence: 3=c    आ व॑र्तन वर्तय॒ नि नि॑वर्तन वर्त॒येन्द्र॑ नर्दबुद । भू॒म्याश्चत॑स्रः प्र॒दिश॒स्ताभि॒रा व॑र्तया॒ पुनः॑ ।।
Sentence: 4=d    वि ते॑ भिनद्मि तक॒रीं वि योनिं॒ वि ग॑वीन्यौ । वि ।।

Verse: 2 
Sentence: 1    मा॒तरं॑ च पु॒त्रं च॒ वि गर्भं॑ च ज॒रायु॑ च ।
Sentence: 2=e    ब॒हिस्ते॑ अस्तु॒ बालिति॑ ।
Sentence: 3=f    उ॑रुद्र॒प्सो वि॒श्वरू॑प॒ इन्दुः॒ पव॑मानो॒ धीर॑ आनञ्ज॒ गर्भ॑म्
Sentence: 4=g    एक॑पदी द्वि॒पदी॑ त्रि॒पदी॒ चतु॑ष्पदी॒ पञ्च॑पदी॒ षट्प॑दी स॒प्तप॑द्य॒ष्टाप॑दी॒ भुव॒नानु॑ प्रथतां॒ स्वाहा
Sentence: 5=h    म॒ही द्यौः॑ पृथि॒वी च॑ न इ॒मं य॒ज्ञम्मि॑मिक्षताम् । पि॑पृ॒तां नो॑ भ॒रीम॑भिः ।।

Paragraph: 11 
Verse: 1 
Sentence: 1=a    इ॒दं वा॑मा॒स्ये॑ ह॒विः प्रि॒यमि॑न्द्राबृहस्पती । उ॒क्थम्मद॑श्च शस्यते ।।
Sentence: 2=b    अ॒यं वा॒म्परि॑ षिच्यते॒ सोम॑ इन्द्राबृहस्पती । चारु॒र्मदा॑य पी॒तये॑ ।।
Sentence: 3=c    अ॒स्मे इ॑न्द्राबृहस्पती र॒यिं ध॑त्तं शत॒ग्विन॑म् । अश्वा॑वन्तं सह॒स्रिण॑म् ।।
Sentence: 4=d    बृह॒स्पति॑र्नः॒ परि॑ पातु प॒श्चादु॒तोत्त॑रस्मा॒दध॑रादघा॒योः । इन्द्रः॑ पु॒रस्ता॑दु॒त म॑ध्य॒तो नः॒ सखा॒ सखि॑भ्यो॒ वरि॑वः कृणोतु ।।
Sentence: 5=e    वि ते॒ विष्व॒ग्वात॑जूतासो अग्ने॒ भामा॑सः ।।

Verse: 2 
Sentence: 1    शु॑चे॒ शुच॑यश्चरन्ति । तु॑विम्र॒क्षासो॑ दि॒व्या नव॑ग्वा॒ वना॑ वनन्ति धृष॒ता रु॒जन्तः॑ ।।
Sentence: 2=f    त्वाम॑ग्ने॒ मानु॑षीरीडते॒ विशो॑ होत्रा॒विदं॒ विवि॑चिं रत्न॒धात॑मम् । गुहा॒ सन्तं॑ सुभग वि॒श्वद॑र्शतं तुविष्म॒णसं॑ सु॒यजं॑ घृत॒श्रिय॑म् ।।
Sentence: 3=g    धा॒ता द॑दातु नो र॒यिमीशा॑नो॒ जग॑त॒स्पतिः॑ । स नः॑ पू॒र्णेन॑ वावनत् ।।
Sentence: 4=h    धा॒ता प्र॒जाया॑ उ॒त रा॒य ई॑शे धा॒तेदं विश्व॒म्भुव॑नं जजान । धा॒ता पु॒त्रं यज॑मानाय॒ दाता॑ ।।

Verse: 3 
Sentence: 1    तस्मा॑ उ ह॒व्यं घृ॒तव॑द्विधेम ।।
Sentence: 2=i    धा॒ता द॑दातु नो र॒यिम्प्राचीं॑ जी॒वातु॒मक्षि॑ताम् । व॒यं दे॒वस्य॑ धीमहि सुम॒तिं स॒त्यरा॑धसः ।।
Sentence: 3=k    धा॒ता द॑दातु दा॒शुषे॒ वसू॑नि प्र॒जाका॑माय मी॒ढुषे॑ दुरो॒णे । तस्मै॑ दे॒वा अ॒मृताः॒ सं व्य॑यन्तां॒ विश्वे॑ दे॒वासो॒ अदि॑तिः स॒जोषाः॑ ।।
Sentence: 4=l    अनु॑ नो॒ ऽद्यानु॑मतिर्य॒ज्ञं दे॒वेषु॑ मन्यताम् । अ॒ग्निश्च॑ हव्य॒वाह॑नो॒ भव॑तां दा॒शुषे॒ मयः॑ ।।
Sentence: 5=m    अन्विद॑नुमते॒ त्वम् ।।

Verse: 4 
Sentence: 1    मन्या॑सै॒ शं च॑ नः कृधि । क्रत्वे॒ दक्षा॑य नो हिनु॒ प्र ण॒ आयूं॑षि तारिषः ।।
Sentence: 2=n    अनु॑ मन्यतामनु॒मन्य॑माना प्र॒जाव॑न्तं र॒यिमक्षी॑यमाणम् । तस्यै॑ व॒यं हेड॑सि॒ मापि॑ भूम॒ सा नो॑ देवी सु॒हवा॒ शर्म॑ यछतु ।।
Sentence: 3=o    यस्या॑मि॒दम्प्र॒दिशि॒ यद्वि॒रोच॒ते ऽनु॑मति॒म्प्रति॑ भूषन्त्या॒यवः॑ । यस्या॑ उ॒पस्थ॑ उ॒र्व॒न्तरि॑क्षं॒ सा नो॑ दे॒वी सु॒हवा॒ शर्म॑ यछतु ।।

Verse: 5 
Sentence: 1=p    रा॒काम॒हं सु॒हवां॑ सुष्टु॒ती हु॑वे शृ॒णोतु॑ नः सु॒भगा॒ बोध॑तु॒ त्मना॑ । सीव्य॒त्वपः॑ सू॒च्याछि॑द्यमानया॒ ददा॑तु वी॒रं श॒तदा॑यमु॒क्थ्य॑म् ।।
Sentence: 2=q    यास्ते॑ राके सुम॒तयः॑ सु॒पेश॑सो॒ याभि॒र्ददा॑सि दा॒शुषे॒ वसू॑नि । ताभि॑र्नो अ॒द्य सु॒मना॑ उ॒पाग॑हि सहस्रपो॒षं सु॑भगे॒ ररा॑णा ।।
Sentence: 3=r    सिनी॑वालि
Sentence: 4=s    या सु॑पा॒णिः ।
Sentence: 5=t    कु॒हूम॒हं सु॒भगां॑ विद्म॒नाप॑सम॒स्मिन्य॒ज्ञे सु॒हवां॑ जोहवीमि । सा नो॑ ददातु॒ श्रव॑णम्पितृ॒णां तस्या॑स्ते देवि ह॒विषा॑ विधेम ।।
Sentence: 6=u    कु॒हूर्दे॒वाना॑म॒मृत॑स्य॒ पत्नी॑ ह॒व्या नो॑ अ॒स्य ह॒विष॑श्चिकेतु । सं दा॒शुषे॑ कि॒रतु॒ भूरि॑ वा॒मं रा॒यस्पोषं॑ चिकि॒तुषे॑ दधातु ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.