TITUS Texts: Black Yajur-Veda: Taittiriya-Samhita

TITUS
Black Yajur-Veda: Taittiriya-Samhita
Part No. 20

Book: 4
Chapter: 1
Paragraph: 1
Verse: 1
Sentence: 1=a    यु॑ञ्जा॒नः प्र॑थ॒मम्मन॑स्त॒त्वाय॑ सवि॒ता धियः॑ । अ॒ग्निं ज्योति॑र्नि॒चाय्य॑ पृथि॒व्या अध्याभ॑रत् ।।
Sentence: 2=b    यु॒क्त्वाय॒ मन॑सा दे॒वान्त्सुव॑र्य॒तो धि॒या दिव॑म् । बृ॒हज्ज्योतिः॑ करिष्य॒तः स॑वि॒ता प्र सु॑वति॒ तान् ।।
Sentence: 3=c    यु॒क्तेन॒ मन॑सा व॒यं दे॒वस्य॑ सवि॒तुः स॒वे । सु॑व॒र्गेया॑य॒ शक्त्यै॑ ।।
Sentence: 4=d    यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चितः॑ । वि होत्रा॑ दधे वयुणा॒विदेक॒ इत् ।।

Verse: 2
Sentence: 1    म॒ही दे॒वस्य॑ सवि॒तुः परि॑ष्टुतिः ।।
Sentence: 2=e    यु॒जे वा॒म्ब्रह्म॑ पू॒र्व्यं नमो॑भि॒र्वि श्लोका॑ यन्ति प॒थ्ये॑व॒ सूराः॑ । शृ॒ण्वन्ति॒ विश्वे॑ अ॒मृत॑स्य पु॒त्रा आ ये धामा॑नि दि॒व्यानि॑ त॒स्थुः ।।
Sentence: 3=f    यस्य॑ प्र॒याण॒मव॒न्य इद्य॒युर्दे॒वा दे॒वस्य॑ महि॒मान॒मर्च॑तः । यः पार्थि॑वानि विम॒मे स एत॑शो॒ रजां॑सि दे॒वः स॑वि॒ता म॑हित्व॒ना ।।
Sentence: 4=g    देव॑ सवितः॒ प्र सु॑व य॒ज्ञम्प्र सु॑व ।।

Verse: 3
Sentence: 1    य॒ज्ञप॑ति॒म्भगा॑य दि॒व्यो ग॑न्ध॒र्वः के॑त॒पूः केतं॑ नः पुनातु वा॒चस्पति॒र्वाच॑म॒द्य स्व॑दाति नः ।।
Sentence: 2=h    इ॒मं नो॑ देव सवितर्य॒ज्ञम्प्र सु॑व देवा॒युवं॑ सखि॒विदं॑ सत्रा॒जितं॑ धन॒जितं॑ सुव॒र्जित॑म् ।।
Sentence: 3=i    ऋ॒चा स्तोमं॒ सम॑र्धय गाय॒त्रेण॑ रथंत॒रम् । बृ॒हद्गा॑य॒त्रव॑र्तनि ।।
Sentence: 4=k    दे॒वस्य॑ त्वा सवि॒तुः प्र॑स॒वे॒ ऽश्विनो॑र्बा॒हुभ्या॑म्पू॒ष्णो हस्ता॑भ्याम्गाय॒त्रेण॒ छन्द॒सा द॑दे ऽङ्गिर॒स्वत् ।
Sentence: 5=l    अभ्रि॑रसि॒ नारिः॑ ।।

Verse: 4
Sentence: 1    अ॑सि पृथि॒व्याः स॒धस्था॑द॒ग्निम्पु॑री॒ष्य॑मङ्गिर॒स्वदा भ॑र त्रैष्टु॒भेन॑ त्वा॒ छन्द॒सा द॑दे ऽङ्गिर॒स्वत् ।
Sentence: 2=m    बभ्रि॑रसि॒ नारि॑रसि॒ त्वया॑ व॒यं स॒धस्थ॒ आग्निं श॑केम॒ खनि॑तुम्पुरी॒ष्यं॒ जाग॑तेन त्वा॒ छन्द॒सा द॑दे ऽङ्गिर॒स्वत् ।
Sentence: 3=n    हस्त॑ आ॒धाय॑ सवि॒ता बिभ्र॒दभ्रिं॑ हिर॒ण्ययी॑म् । तया॒ ज्योति॒रज॑स्र॒मिद॒ग्निं खा॒त्वी न॒ आ भ॒रानु॑ष्टुभेन त्वा॒ छन्द॒सा द॑दे ऽङ्गिर॒स्वत् ।।

Paragraph: 2
Verse: 1
Sentence: 1=a    इ॒माम॑गृभ्णन्रश॒नामृ॒तस्य॒ पूर्व॒ आयु॑षि वि॒दथे॑षु क॒व्या । तया॑ दे॒वाः सु॒तमा ब॑भूवुरृ॒तस्य॒ साम॑न्त्स॒रमा॒रप॑न्ती ।।
Sentence: 2=b    प्रतू॑र्तं{F वाजिन्न्{W वजि॑न्न्{ASS वाजिन्न्{BI वाजिन्न्{GOLS आ द्र॑व॒ वरि॑ष्ठा॒मनु॑ सं॒वत॑म् । दि॒वि ते॒ जन्म॑ पर॒मम॒न्तरि॑क्षे॒ नाभिः॑ पृथि॒व्यामधि॒ योनिः॑ ।।
Sentence: 3=c    यु॒ञ्जाथां॒ रास॑भं यु॒वम॒स्मिन्यामे॑ वृषण्वसू । अ॒ग्निम्भर॑न्तमस्म॒युम् ।।
Sentence: 4=d    योगे॑योगे त॒वस्त॑रं॒ वाजे॑वाजे हवामहे । सखा॑य॒ इन्द्र॑मू॒तये॑ ।।
Sentence: 5=e    प्र॒तूर्व॑न् ।।

Verse: 2
Sentence: 1    एह्य॑व॒क्राम॒न्नश॑स्ती रु॒द्रस्य॒ गाण॑पत्यान्मयो॒भूरेहि॑ । उ॒र्व॒न्तरि॑क्ष॒मन्वि॑हि स्व॒स्तिग॑व्यूति॒रभ॑यानि कृ॒ण्वन् ।।
Sentence: 2=f    पू॒ष्णा स॒युजा॑ स॒ह पृ॑थि॒व्याः स॒धस्था॑द॒ग्निम्पु॑रि॒ष्य॑मङ्गिर॒स्वदछे॑हि ।
Sentence: 3=g    अ॒ग्निम्पु॑री॒ष्य॑मङ्गिर॒स्वदछे॑मस् ।
Sentence: 4=h    अ॒ग्निम्पु॑री॒ष्य॑मङ्गिर॒स्वद्भ॑रिष्यामस् ।
Sentence: 5=i    अ॒ग्निम्पु॑री॒ष्य॑मङ्गिर॒स्वद्भ॑रामः ।
Sentence: 6=k    अन्व॒ग्निरु॒षसा॒मग्र॑मख्य॒दन्वहा॑नि प्रथ॒मो जा॒तवे॑दाः । अनु॒ सूर्य॑स्य ।।

Verse: 3
Sentence: 1    पु॑रु॒त्रा च॑ र॒श्मीननु॒ द्यावा॑पृथि॒वी आ त॑तान ।।
Sentence: 2=l    आ॒गत्य॑ वा॒ज्यध्व॑नः॒ सर्वा॒ मृधो॒ वि धू॑नुते । अ॒ग्निं स॒धस्थे॑ मह॒ति चक्षु॑षा॒ नि चि॑कीषते ।।
Sentence: 3=m    आ॒क्रम्य॑ वाजिन्पृथि॒वीम॒ग्निमि॑छ रु॒चा त्वम् । भूया॑ वृ॒त्वाय॑ नो ब्रूहि॒ यतः॒ खना॑म॒ तं व॒यम् ।।
Sentence: 4=n    द्यौ॑स्ते पृ॒ष्ठम्पृ॑थि॒वी स॒धस्थ॑मा॒त्मान्तरि॑क्षं समु॒द्रस्ते॒ योनिः॑ । वि॒ख्याय॒ चक्षु॑षा॒ त्वम॒भि ति॑ष्ठ ।।

Verse: 4
Sentence: 1    पृ॑तन्य॒तः ।।
Sentence: 2=o    उत्क्रा॑म मह॒ते सौ॑भगाया॒स्मादा॒स्थाना॑द्द्रविणो॒दा वा॑जिन् । व॒यं स्या॑म सुमतौ पृथि॒व्या अ॒ग्निं ख॑नि॒ष्यन्त॑ उ॒पस्थे॑ अस्याः ।।
Sentence: 3=p    उद॑क्रमीद्द्रविणो॒दा वा॒ज्यर्वाकः॒ स लो॒कं सुकृ॑तम्पृथि॒व्याः । ततः॑ खनेम सु॒प्रती॑कम॒ग्निं सुवो॒ रुहा॑णा॒ अधि॒ नाक॑ उत्त॒मे ।।
Sentence: 4=q    {F अ॒पो{W अ॒पो{ASS अ॒पो{BI अ॒पो{GOLS दे॒वीरुप॑ सृज॒ मधु॑मतीरय॒क्ष्माय॑ प्र॒जाभ्यः॑ । तासां॒ स्थाना॒दुज्जि॑हता॒मोष॑धयः सुपिप्प॒लाः ।।
Sentence: 5=r    जिघ॑र्मि ।।

Verse: 5
Sentence: 1    अ॒ग्निम्मन॑सा घृ॒तेन॑ प्रति॒क्ष्यन्त॒म्भुव॑नानि॒ विश्वा॑ । पृ॒थुं ति॑र॒श्चा वय॑सा बृ॒हन्तं॒ व्यचि॑ष्ठ॒मन्नं॑ रभ॒सं विदा॑नम् ।।
Sentence: 2=s    आ त्वा॑ जिघर्मि॒ वच॑सा घृ॒तेना॑र॒क्षसा॒ मन॑सा॒ तज्जु॑षस्व । मर्य॑श्री स्पृह॒यद्व॑र्णो अ॒ग्निर्नाभि॒मृशे॑ त॒नुवा॒ जर्हृ॑षाणः ।।
Sentence: 3=t    परि॒ वाज॑पतिः क॒विर॒ग्निर्हव्या॑न्यक्रमीत् । दध॒द्रत्ना॑नि दा॒शुषे॑ ।।
Sentence: 4=u    परि॑ त्वाग्ने॒ पुरं॑ व॒यं विप्रं॑ सहस्य धीमहि । धृ॒षद्व॑र्णं दि॒वेदि॑वे भे॒त्तार॑म्भङ्गु॒राव॑तः ।।
Sentence: 5=v    त्वम॑ग्ने॒ द्युभि॒स्त्वमा॑शुशु॒क्षणि॒स्त्वम॒द्भ्यस्त्वमश्म॑नस॒ परि॑ । त्वं वने॑भ्य॒स्त्वमोष॑धीभ्य॒स्त्वं नृ॒णां नृ॑पते जायसे॒ शुचिः॑ ।।

Paragraph: 3
Verse: 1
Sentence: 1=a    दे॒वस्य॑ त्वा सवि॒तुः प्र॑स॒वे॒ ऽश्विनो॑र्बा॒हुभ्या॑म्पू॒ष्णो हस्ता॑भ्याम्पृथि॒व्याः स॒धस्थे॒ ऽग्निम्पु॑री॒ष्य॑मङ्गिर॒स्वत्ख॑नामि ।।
Sentence: 2=b    ज्योति॑ष्मन्तं त्वाग्ने सु॒प्रती॑क॒मज॑स्रेण भा॒नुना॒ दीद्या॑नम् । शि॒वम्प्र॒जाभ्यो ऽहिं॑सन्तम्पृथि॒व्याः स॒धस्थे॒ ऽग्निम्पु॑री॒ष्य॑मङ्गिर॒स्वत्ख॑नामि ।।
Sentence: 3=c    अ॒पाम्पृ॒ष्ठम॑सि स॒प्रथा॑ उ॒र्व॒ग्निम्भ॑रि॒ष्यदप॑रावपिष्ठम् । वर्ध॑मानम्म॒ह आ च॒ पुष्क॑रं दि॒वो मात्र॑या वरि॒णा प्र॑थस्व ।।
Sentence: 4=d    शर्म॑ च स्थः ।।

Verse: 2
Sentence: 1    वर्म॑ च स्थो॒ अछि॑द्रे बहु॒ले उ॒भे । व्यच॑स्वती॒ सं व॑साथाम्भ॒र्तम॒ग्निम्पु॑री॒ष्य॑म् ।।
Sentence: 2=e    सं व॑साथां सुव॒र्विदा॑ स॒मीची॒ उर॑सा॒ त्मना॑ । अ॒ग्निम॒न्तर्भ॑रि॒ष्यन्ती॒ ज्योति॑ष्मन्त॒मज॑स्र॒मित् ।।
Sentence: 3=f    पु॑री॒ष्यो॑ ऽसि वि॒श्वभ॑राः । अथ॑र्वा त्वा प्रथ॒मो निर॑मन्थदग्ने
Sentence: 4=g    त्वाम॑ग्ने॒ पुष्क॑रा॒दध्यथ॑र्वा॒ निर॑मन्थत । मू॒र्ध्नो विश्व॑स्य वा॒घतः॑ ।।
Sentence: 5=h    तमु॑ त्वा द॒ध्यङ्ङृषिः॑ पु॒त्र ई॑धे ।।

Verse: 3
Sentence: 1    अथ॑र्वणः । वृ॑त्र॒हण॑म्पुरं द॒रम् ।।
Sentence: 2=i    तमु॑ त्वा पा॒थ्यो वृषा॒ समी॑धे दस्यु॒हन्त॑मम् । ध॑नंज॒यं रणे॑रणे ।।
Sentence: 3=k    सीद॑ होतः॒ स्व उ॑ लो॒के चि॑कि॒त्वान्त्सा॒दया॑ य॒ज्ञं सु॑कृ॒तस्य॒ योनौ॑ । दे॑वा॒वीर्दे॒वान्ह॒विषा॑ यजा॒स्यग्ने॑ बृ॒हद्यज॑माने॒ वयो॑ धाः ।।
Sentence: 4=l    नि होता॑ होतृ॒षद॑ने॒ विदा॑नस्त्वे॒षो दी॑दि॒वां अ॑सदत्सु॒दक्षः॑ । अद॑ब्धव्रतप्रमति॒र्वसि॑ष्ठः सहस्रम्भ॒रः शुचि॑जिह्वो अ॒ग्निः ।।
Sentence: 5=m    सं सी॑दस्व म॒हां अ॑सि॒ शोच॑स्व ।।

Verse: 4
Sentence: 1    दे॑व॒वीत॑मः । वि धू॒मम॑ग्ने अरु॒षम्मि॑येध्य सृ॒ज प्र॑शस्त दर्श॒तम् ।।
Sentence: 2=n    जनि॑ष्वा॒ हि जेन्यो॒ अग्रे॒ अह्ना॑म्हि॒तो हि॒तेष्व॑रु॒षो वने॑षु । दमे॑दमे स॒प्त रत्ना॒ दधा॑नो॒ ऽग्निर्होता॒ नि ष॑सादा॒ यजी॑यान् ।।

Paragraph: 4
Verse: 1
Sentence: 1=a    सं ते॑ वा॒युर्मा॑तरिश्वा दधातूत्ता॒नायै॒ हृद॑यं॒ यद्विलि॑ष्टम् । दे॒वानां॒ यश्चर॑ति प्रा॒णथे॑न॒ तस्मै॑ च देवि॒ वष॑डस्तु॒ तुभ्य॑म् ।।
Sentence: 2=b    सुजा॑तो॒ ज्योति॑षा स॒ह शर्म॒ वरू॑थ॒मास॑दः॒ सुवः॑ । वासो॑ अग्ने वि॒श्वरू॑पं॒ सं व्य॑यस्व विभावसो ।।
Sentence: 3=c    उदु॑ तिष्ठ स्वध्व॒रावा॑ नो दे॒व्या कृ॒पा । दृ॒शे च॑ भा॒सा बृ॑ह॒ता सु॑शु॒क्वनि॒राग्ने॑ याहि सुश॒स्तिभिः॑ ।।

Verse: 2
Sentence: 1=d    ऊ॒र्ध्व ऊ॒ षु णऊ॒तये॒ तिष्ठा॑ दे॒वो न स॑वि॒ता । ऊ॒र्ध्वो वाज॑स्य॒ सनि॑ता॒ यद॒ञ्जिभि॑र्वा॒घद्भि॑र्वि॒ह्वया॑महे ।।
Sentence: 2=e    स जा॒तो गर्भो॑ असि॒ रोद॑स्यो॒रग्ने॒ चारु॒र्विभृ॑त॒ ओष॑धीषु । चि॒त्रः शिशुः॒ परि॒ तमां॑स्य॒क्तः प्र मा॒तृभ्यो॒ अधि॒ कनि॑क्रदद्गाः ।।
Sentence: 3=f    स्थि॒रो भ॑व वी॒ड्व॑ङ्ग आ॒शुर्भ॑व वा॒ज्य॑र्वन् । पृ॒थुर्भ॑व सु॒षद॒स्त्वम॒ग्नेः पु॑रीष॒वाह॑नः ।।
Sentence: 4=g    शि॒वो भ॑व ।।

Verse: 3
Sentence: 1    प्र॒जाभ्यो॒ मानु॑षीभ्य॒स्त्वम॑ङ्गिरः । मा द्यावा॑पृथि॒वी अ॒भि शू॑शुचो॒ मान्तरि॑क्ष॒म्मा वन॒स्पती॑न् ।।
Sentence: 2=h    प्रै॑तु वा॒जी कनि॑क्रद॒न्नान॑द॒द्रास॑भः॒ पत्वा॑ । भर॑न्न॒ग्निम्पु॑री॒ष्य॒म्मा पा॒द्यायु॑षः पु॒रा ।।
Sentence: 3=i    रास॑भो वां॒ कनि॑क्रद॒त्सुयु॑क्तो वृषणा॒ रथे॑ । स वा॑म॒ग्निम्पु॑री॒ष्य॑मा॒शुर्दू॒तो व॑हादि॒तः ।।
Sentence: 4=k    वृषा॒ग्निं वृष॑ण॒म्भर॑न्न॒पां गर्भं॑ समु॒द्रिय॑म् । अग्न॒ आ या॑हि ।।

Verse: 4
Sentence: 1    वी॒तय॑ ऋ॒तं स॒त्यम् ।।
Sentence: 2=l    ओष॑धयः॒ प्रति॑ गृह्णीता॒ग्निमे॒तं शि॒वमा॒यन्त॑म॒भ्यत्र॑ यु॒ष्मान् । व्यस्य॒न्विश्वा॒ अम॑ती॒ररा॑तीर्नि॒षीद॑न्नो॒ अप॑ दुर्म॒तिं ह॑नत् ।।
Sentence: 3=m    ओष॑धयः॒ प्रति॑ मोदध्वमेन॒म्पुष्पा॑वतीः सुपिप्प॒लाः । अ॒यं वो॒ गर्भ॑ ऋ॒त्वियः॑ प्र॒त्नं स॒धस्थ॒मास॑दत् ।।

Paragraph: 5
Verse: 1
Sentence: 1=a    वि पाज॑सा पृ॒थुना॒ शोशु॑चानो॒ बाध॑स्व द्वि॒षो र॒क्षसो॒ अमी॑वाः । सु॒शर्म॑णो बृह॒तः शर्म॑णि स्याम॒ग्नेर॒हं सु॒हव॑स्य॒ प्रणी॑तौ ।।
Sentence: 2=b    आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ।।
Sentence: 3=c    यो वः॑ शि॒वत॑मो॒ रस॒स्तस्य॑ भाजयते॒ ऽह नः॑ । उ॑श॒तीरि॑व मा॒तरः॑ ।।
Sentence: 4=d    तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ।।
Sentence: 5=e    मि॒त्रः ।।

Verse: 2
Sentence: 1    सं॒सृज्य॑ पृथि॒वीम्भूमिं॑ च॒ ज्योति॑षा स॒ह । सुजा॑तं जा॒तवे॑दसम॒ग्निं वै॑श्वान॒रं वि॒भुम् ।।
Sentence: 2=f    अ॑य॒क्ष्माय॑ त्वा॒ सं सृ॑जामि प्र॒जाभ्यः॑ । विश्वे॑ त्वा दे॒वा वै॑श्वान॒राः सं सृ॑ज॒न्त्वानु॑ष्टुभेन॒ छन्द॑साङ्गिर॒स्वत् ।।
Sentence: 3=g    रु॒द्राः स॒म्भृत्य॑ पृथि॒वीम्बृ॒हज्ज्योतिः॒ समी॑धिरे । तेषा॑म्भा॒नुरज॑स्र॒ इच्छु॒क्रो दे॒वेषु॑ रोचते ।।
Sentence: 4=h    संसृ॑ष्टां॒ वसु॑भी रुद्रै॒र्धीरैः॑ कर्म॒ण्या॒म्मृद॑म् । हस्ता॑भ्याम्मृ॒द्वीं कृ॒त्वा सि॑नीवा॒ली क॑रोतु ।।

Verse: 3
Sentence: 1    ताम् ।।
Sentence: 2=i    सि॑नीव॒ली सु॑कप॒र्दा सु॑क्री॒रा स्वौ॑प॒शा । सा तुभ्य॑मदिते मह॒ ओखां द॑धातु॒ हस्त॑योः ।।
Sentence: 3=k    उ॒खां क॑रोतु॒ शक्त्या॑ बा॒हुभ्या॒मदि॑तिर्धि॒या । मा॒ता पु॒त्रं यथो॒पस्थे॒ साग्निम्बि॑भर्तु॒ गर्भ॒ आ ।।
Sentence: 4=l    म॒खस्य॒ शिरो॑ ऽसि
Sentence: 5=m    य॒ज्ञस्य॑ प॒दे स्थः॑ ।
Sentence: 6=n    वस॑वस्त्वा कृण्वन्तु गाय॒त्रेण॒ छन्द॑साङ्गिर॒स्वत्पृ॑थि॒व्य॑सि रु॒द्रास्त्वा॑ कृण्वन्तु त्रैष्टुभेन॒ छन्द॑साङ्गिर॒स्वद॒न्तरि॑क्षमसि ।।

Verse: 4
Sentence: 1    आ॑दि॒त्यास्त्वा॑ कृण्वन्तु॒ जाग॑तेन॒ छन्द॑साङ्गिर॒स्वद्द्यौ॑रसि॒ विश्वे॑ त्वा दे॒वा वै॑श्वान॒राः कृ॑ण्व॒न्त्वानु॑ष्टुभेन॒ छन्द॑साङ्गिर॒स्वद्दिशो॑ ऽसि ध्रु॒वासि॑ धा॒रया॒ मयि॑ प्र॒जां रा॒यस्पोषं॑ गौप॒त्यं सु॒रीर्यं॑ सजा॒तान्यज॑मानाय ।
Sentence: 2=o    अदि॑त्यै॒ रास्ना॑सि ।
Sentence: 3=p    अदि॑तिस्ते॒ बिलं॑ गृह्णातु॒ पाङ्क्ते॑न॒ छन्द॑साङ्गिर॒स्वत् ।
Sentence: 4=q    कृ॒त्वाय॒ सा म॒हीमु॒खाम्मृ॒न्मयीं॒ योनि॑म॒ग्नये॑ । ताम्पु॒त्रेभ्यः॒ सम्प्राय॑छ॒ददि॑तिः श्र॒पया॒निति॑ ।।

Paragraph: 6
Verse: 1
Sentence: 1=a    वस॑वस्त्वा धूपयन्तु गाय॒त्रेण॒ छन्द॑साङ्गिर॒स्वद्रु॒द्रास्त्वा॑ धूपयन्तु त्रैष्टुभेन॒ छन्द॑साङ्गिर॒स्वदा॑दि॒त्यास्त्वा॑ धूपयन्तु॒ जाग॑तेन॒ छन्द॑साङ्गिर॒स्वद्विश्वे॑ त्वा दे॒वा वै॑श्वान॒रा धू॑पय॒न्त्वानु॑ष्टुभेन॒ छन्द॑साङ्गिर॒स्वदिन्द्र॑स्त्वा धूपयत्वङ्॑स्त्वा धूपयत्वङ्गिर॒स्वद्वरु॑णस्त्वा धूपयत्वङ्गिर॒स्वत् ।
Sentence: 2=b    अदि॑तिस्त्वा दे॒वी वि॒श्वदे॑व्यावती पृथि॒व्याः स॒धस्थे॑ ऽङ्गिर॒स्वत्ख॑नत्ववट
Sentence: 3=c    दे॒वानां॑ त्वा॒ पत्नीः॑ ।।

Verse: 2
Sentence: 1    दे॒वीर्वि॒श्वदे॑व्यावतीः पृथि॒व्याः स॒धस्थे॑ ऽङ्गिर॒स्वद्द॑धतूखे
Sentence: 2=d    धि॒षणा॑स्त्वा दे॒वीर्वि॒श्वदे॑व्यावतीः पृथि॒व्याः स॒धस्थे॑ ऽङ्गिर॒स्वद॒भीन्ध॑तामुखे॒ ग्नास्त्वा॑ दे॒वीर्वि॒श्वदे॑व्यावतीः पृथि॒व्याः स॒धस्थे॑ ऽङ्गिर॒स्वच्छ्र॑पयन्तूखे॒ वरू॑त्रयो॒ जन॑यस्त्वा दे॒वीर्वि॒श्वदे॑व्यावतीः पृथि॒व्याः स॒धस्थे॑ ऽङ्गिर॒स्वत्प॑चन्तखे ।
Sentence: 3=e    मित्रै॒तामु॒खाम्प॑चै॒षा मा भे॑दि ।
Sentence: 4=f    ए॒तां ते॒ परि॑ ददा॒म्यभि॑त्त्यै
Sentence: 5=g    अ॒भीमाम् ।।

Verse: 3
Sentence: 1    म॑हि॒ना दिव॑म्मि॒त्रो ब॑भूव स॒प्रथाः॑ । उ॒त श्रव॑सा पृथि॒वीम् ।।
Sentence: 2=h    मित्र॑स्य चर्षणी॒धृतः॒ श्रवो॑ दे॒वस्य॑ सान॒सिम् । द्यु॒म्नं चि॒त्रश्र॑वस्तमम् ।।
Sentence: 3=i    दे॒वस्त्वा॑ सवि॒तोद्व॑पतु सुपा॒णिः स्व॑ङ्गु॒रिः । सु॑बा॒हुरु॒त शक्त्या॑ ।।
Sentence: 4=k    अप॑द्यमाना पृथि॒व्याशा॒ दिश॒ आ पृ॑ण । उत्ति॑ष्ठ बृह॒ती भ॑वो॒र्ध्वा ति॑ष्ठ ध्रु॒वा त्वम् ।।
Sentence: 5=l    वस॑व॒स्त्वा छृ॑न्दन्तु गाय॒त्रेण॒ छन्द॑साङ्गिर॒स्वद्रु॒द्रास्त्वा छृ॑न्दन्तु त्रैष्टुभेन॒ छन्द॑साङ्गिर॒स्वदा॑दि॒त्यास्त्वा॑ छृन्दन्तु॒ जाग॑तेन॒ छन्द॑साङ्गिर॒स्वद्वि॑श्वे त्वा दे॒वा वै॑श्वान॒रा आ छृ॑न्द॒न्त्वानु॑ष्टुभेन॒ छन्द॑साङ्गिर॒स्वत् ।।

Paragraph: 7
Verse: 1
Sentence: 1=a    समा॑स्त्वाग्न ऋ॒तवो॑ वर्धयन्तु संवत्स॒रा ऋष॑यो॒ यानि॑ स॒त्या । सं दि॒व्येन॑ दीदिहि रोच॒नेन॒ विश्वा॒ आ भा॑हि प्र॒दिशः॑ पृथि॒व्याः ।।
Sentence: 2=b    सं चे॒ध्यस्वा॑ग्ने॒ प्र च॑ बोधयैन॒मुच्च॑ तिष्ठ मह॒ते सौ॑भगाय । मा च॑ ऋषदुपस॒त्ता ते॑ अग्ने ब्र॒ह्माण॑स्ते य॒शसः॑ सन्तु॒ मान्ये ।।
Sentence: 3=c    त्वाम॑ग्ने वृणते ब्राह्म॒णा इ॒मे शि॒वो अ॑ग्ने ।।

Verse: 2
Sentence: 1    सं॒वर॑णे भवा नः । स॑पत्न॒हा नो॑ अभिमाति॒जिच्च॒ स्वे गये॑ जागृ॒ह्यप्र॑युछन् ।।
Sentence: 2=d    इहै॒वाग्ने॒ अधि॑ धारया र॒यिम्मा त्वा॒ नि क्र॑न्पूर्व॒चितो॑ निका॒रिणः॑ । क्ष॒त्रम॑ग्ने सु॒यम॑मस्तु॒ तुभ्य॑मुपस॒त्ता व॑र्धतां ते॒ अनि॑ष्टृतः ।।
Sentence: 3=e    क्ष॒त्रेणा॑ग्ने॒ स्वायुः॒ सं र॑भस्व मि॒त्रेणा॑ग्ने मित्र॒धेये॑ यतस्व । स॑जा॒ताना॑म्मध्यम॒स्था ए॑धि रा॒ज्ञाम॑ग्ने विह॒व्यो॑ दीदिही॒ह ।।
Sentence: 4=f    अति॑ ।।

Verse: 3
Sentence: 1    निबो॒ अति॒ स्रिधो ऽत्यचि॑त्ति॒मत्यरा॑तिमग्ने । वि॑श्वा॒ ह्य॑ग्ने दुरि॒ता सह॒स्वाथा॒स्मभ्यं॑ स॒हवी॑रां र॒यिं दाः॑ ।।
Sentence: 2=g    अ॑नाधृ॒ष्यो जा॒तवे॑दा॒ अनि॑ष्टृतो वि॒राड॑ग्ने क्षत्र॒भृद्दी॑दिही॒ह । विश्वा॒ आशाः॑ प्रमु॒ञ्चन्मानु॑षीर्भि॒यः शि॒वाभि॑र॒द्य परि॑ पाहि नो वृ॒धे ।।
Sentence: 3=h    बृह॑स्पते सवितर्बो॒धयै॑नं॒ संशि॑तं चित्संत॒रां सं शि॑शाधि । व॒र्धयै॑नम्मह॒ते सौ॑भगाय ।।

Verse: 4
Sentence: 1    विश्व॑ एन॒मनु॑ मदन्तु दे॒वाः ।।
Sentence: 2=i    अ॑मुत्र॒भूया॒दध॒ यद्य॒मस्य॒ बृह॑स्पते अ॒भिश॑स्ते॒रमु॑ञ्चः । प्रत्औ॑हताम॒श्विना॑ मृ॒त्युम॑स्माद्दे॒वाना॑मग्ने भि॒षजा॒ शची॑भिः ।।
Sentence: 3=k    उद्व॒यं तम॑स॒स्परि॒ पश्य॑न्तो॒ ज्योति॒रुत्त॑रम् । दे॒वं दे॑व॒त्रा सू॑र्य॒मग॑न्म॒ ज्योति॑रुत्त॒मम् ।।

Paragraph: 8
Verse: 1
Sentence: 1=a    ऊ॑र्ध्वा अस्य स॒मिधो॑ भवन्त्यू॒र्ध्वा शु॒क्रा शो॒चींष्य॒ग्नेः । द्यु॒मत्त॑मा सु॒प्रती॑कस्य सू॒नोः ।।
Sentence: 2=b    तनू॒नपा॒दसु॑रो वि॒श्ववे॑दा दे॒वो दे॒वेषु॑ दे॒वः । प॒थ आन॑क्ति॒ मध्वा॑ घृ॒तेन॑ ।।
Sentence: 3=c    मध्वा॑ य॒ज्ञं न॑क्षसे प्रीणा॒नो नरा॒शंसो॑ अग्ने । सु॒कृद्दे॒वः स॑वि॒ता वि॒श्ववा॑रः ।।
Sentence: 4=d    अछा॒यमे॑ति॒ शव॑सा घृ॒तेने॑डा॒नो वह्नि॒र्नम॑सा । अ॒ग्निं स्रुचो॑ अध्व॒रेषु॑ प्र॒यत्सु॑ ।।
Sentence: 5=e    स य॑क्षदस्य महि॒मान॑म॒ग्नेः सः ।।

Verse: 2
Sentence: 1    ई॑ म॒न्द्रासु॑ प्र॒यसः॑ । वसु॒श्चेति॑ष्ठो वसु॒धात॑मश्च ।।
Sentence: 2=f    द्वारो॑ दे॒वीरन्व॑स्य॒ विश्वे॑ व्र॒ता द॑दन्ते अ॒ग्नेः । उ॑रु॒व्यच॑सो॒ धाम्ना॒ पत्य॑मानाः ।।
Sentence: 3=g    ते अ॑स्य योषणे दि॒व्ये न योना॑वु॒षासा॒नक्ता॑ । इ॒मं य॒ज्ञम॑वतामध्व॒रं नः॑ ।।
Sentence: 4=h    दै॑व्या होतारावू॒र्ध्वम॑ध्व॒रं नो॒ ऽग्नेर्जि॒ह्वाम॒भि गृ॑णीतम् । कृ॑णु॒तं नः॒ स्वि॑ष्टिम् ।।
Sentence: 5=i    ति॒स्रो दे॒वीर्ब॒र्हिरेदं स॑द॒न्त्विडा॒ सर॑स्वती ।।

Verse: 3
Sentence: 1    भार॑ती म॒ही गृ॑णा॒ना ।।
Sentence: 2=k    तन्न॑स्तु॒रीप॒मद्भु॑तम्पुरु॒क्षु त्वष्टा॑ सु॒वीर॑म् । रा॒यस्पोषं॒ वि ष्य॑तु॒ नाभि॑म॒स्मे ।।
Sentence: 3=l    वन॑स्प॒ते ऽव॑ सृजा॒ ररा॑ण॒स्त्मना॑ दे॒वेषु॑ । अ॒ग्निर्ह॒व्यं श॑मि॒ता सू॑दयाति ।।
Sentence: 4=m    अग्ने॒ स्वाहा॑ कृणुहि जातवेद॒ इन्द्रा॑य ह॒व्यम् । विश्वे॑ दे॒वा ह॒विरि॒दं जु॑षन्ताम् ।।
Sentence: 5=n    हि॑रण्यग॒र्भः सम॑वर्त॒ताग्रे॑ भू॒तस्य॑ जा॒तः पति॒रेक॑ आसीत् । स दा॑धार पृथि॒वीं द्याम् ।।

Verse: 4
Sentence: 1    उ॒तेमां कस्मै॑ दे॒वाय॑ ह॒विषा॑ विधेम ।।
Sentence: 2=o    यः प्राण॑तो निमिष॒तो म॑हित्वैक॒ इद्राजा॒ जग॑तो ब॒भूव॑ । य ईशे॑ अस्य द्वि॒पद॒श्चतु॑ष्पदः॒ कस्मै॑ दे॒वाय॑ ह॒विषा॑ विधेम ।।
Sentence: 3=p    य आ॑त्म॒दा ब॑ल॒दा यस्य॒ विश्व॑ उ॒पास॑ते प्रशिषं॒ यस्य॑ दे॒वाः । यस्य॑ छा॒यामृतं॒ यस्य॑ मृ॒त्युः कस्मै॑ दे॒वाय॑ ह॒विषा॑ विधेम ।।
Sentence: 4=q    यस्ये॑मे हि॒म व॑न्तो महि॒त्वा यस्य॑ समु॒द्रं र॒सया॑ स॒ह ।।

Verse: 5
Sentence: 1    आ॒हुः । यस्ये॒माः प्र॒दिशो॒ यस्य॑ बा॒हू कस्मै॑ दे॒वाय॑ ब॒विषा॑ विधेम ।।
Sentence: 2=r    यं क्रन्द॑सी॒ अव॑सा त॒स्तभा॑ने अभ्यैक्षेता॒म्मन॑सा॒ रेज॑माने । यत्राधि॒ सूर॒ उदि॑तौ॒ व्येति॒ कस्मै॑ दे॒वाय॑ ह॒विषा॑ विधेम ।।
Sentence: 3=s    येन द्यौरु॒ग्रा पृ॑थि॒वी च॑ दृ॒ढे येन॒ सुव॒ स्तभि॑तं॒ येन॒ नाकः॑ । यो अ॒न्तरि॑क्षे॒ रज॑सो वि॒मानः॒ कस्मै॑ दे॒वाय॑ ह॒विषा॑ विधेम ।।
Sentence: 4=t    आपो॑ ह॒ यन्म॑ह॒तीर्विश्व॑म् ।।

Verse: 6
Sentence: 1    आय॒न्दक्षं॒ दधा॑ना ज॒नय॑न्तीर॒ग्निम् । ततो॑ दे॒वानां॒ निर॑वर्त॒तासु॒रेकः॒ कस्मै॑ दे॒वाय॑ ह॒विषा॑ विधेम ।।
Sentence: 2=u    यश्चि॒दापो॑ महि॒ना प॒र्यप॑श्य॒द्दक्षं॒ दधा॑ना ज॒नय॑न्तीर॒ग्निम् । यो दे॒वेष्वधि॑ दे॒व एक॒ आसी॒त्कस्मै॑ दे॒वाय॑ ह॒विषा॑ विधेम ।।

Paragraph: 9
Verse: 1
Sentence: 1=a    आकू॑तिम॒ग्निम्प्र॒युजं॒ स्वाहा॒ मनो॑ मे॒धाम॒ग्निम्प्र॒युजं॒ स्वाहा॑ चि॒त्तं विज्ञा॑तम॒ग्नजं॒ स्वाहा॑ वा॒चो विधृ॑तिम॒ग्निम्प्र॒युजं॒ स्वाहा॑ प्र॒जाप॑तये॒ मन॑वे॒ स्वाहा॒ग्नये॑ वैश्वान॒राय॒ स्वाहा
Sentence: 2=b    विश्वे॑ दे॒वस्य॑ ने॒तुर्मर्तो॑ वृणीत स॒ख्यं विश्वे॑ रा॒य इ॑षुध्यसि द्यु॒म्नं वृ॑णीत पु॒ष्यसे॒ स्वाहा
Sentence: 3=c    मा सु भि॑त्था॒ मा सु रि॑षो॒ दृंह॑स्व वी॒डय॑स्व॒ सु । अम्ब॑ धृष्णु वी॒रय॑स्व ।।

Verse: 2
Sentence: 1    अ॒ग्निश्चे॒दं क॑रिष्यथः ।।
Sentence: 2=d    दृंह॑स्व देवि पृथिवि स्व॒स्तय॑ आसु॒री मा॒या स्व॒धया॑ कृ॒तासि॑ । जुष्टं॑ दे॒वानां॑ इ॒दम॑स्तु ह॒व्यमरि॑ष्टा॒ त्वमुदि॑हि य॒ज्ञे अ॒स्मिन् ।।
Sentence: 3=e    मित्रै॒तामु॒खां त॑पै॒षा मा भे॑दि ।
Sentence: 4=f    ए॒ताम्ते॒ परि॑ ददा॒म्यभि॑त्त्यै ।
Sentence: 5=g    द्र्व॑न्नः स॒र्पिरा॑सुतिः प्र॒त्नो होता॒ वरे॑ण्यः । सह॑सस्पु॒त्रो अद्भु॑तः ।।
Sentence: 6=h    पर॑स्या॒ अधि॑ सं॒वतो ऽव॑रां अ॒भ्या ।।

Verse: 3
Sentence: 1    त॑र । यत्रा॒हमस्मि॒ तां अ॑व ।।
Sentence: 2=i    प॑र॒मस्याः॑ परा॒वतो॒ र्हिद॑श्व इ॒हा ग॑हि । पु॑री॒ष्यः॑ पुरुप्रि॒यो ऽग्ने॒ त्वं त॑रा॒ मृधः॑ ।।
Sentence: 3=k    सीद॒ त्वम्मा॒तुर॒स्या उ॒पस्थे॒ विश्वा॑न्यग्ने व॒युना॑नि वि॒द्वान् । मै॑नाम॒र्चिषा॒ मा तप॑सा॒भि शू॑शुचो॒ ऽन्तर॑स्यां शु॒क्रज्यो॑ति॒र्वि भा॑हि ।।
Sentence: 4=l    अ॒न्तर॑ग्ने रु॒चा त्वमु॒खायै॒ सद॑ने॒ स्वे । तस्या॒स्त्वं हर॑सा॒ तप॒ङ्जात॑वेदः शि॒वो भ॑व ।।
Sentence: 5=m    शि॒वो भू॒त्वा म॒ह्यम॒ग्ने ऽथो॑ सीद शि॒वस्त्वम् । शि॒वाः कृ॒त्वा दिशः॒ सर्वाः॒ स्वां योनि॑मि॒हास॑दः ।।

Paragraph: 10
Verse: 1
Sentence: 1=a    यद॑ग्ने॒ यानि॒ कानि॒ चा ते॒ दारू॑णि द॒ध्मसि॑ । तद॑स्तु॒ तुभ्य॒मिद्घृ॒तं तज्जु॑षस्व यविष्ठ्य ।।
Sentence: 2=b    यदत्त्यु॑प॒जिह्वि॑का॒ यद्व॒म्रो अ॑ति॒सर्प॑ति । सर्वं॒ तद॑स्तु ते घृ॒तं तज्जु॑षस्व यविष्ठ्य ।।
Sentence: 3=c    रात्रिं॑रात्रि॒मप्र॑याव॒म्भर॒त्नो ऽश्वा॑येव॒ तिष्ठ॑ते घा॒सम॑स्मै । रा॒यस्पोषे॑ण॒ समि॒षा मद॒न्तो ऽग्ने॒ मा ते॒ प्रति॑वेशा रिषाम ।।
Sentence: 4=d    नाभा॑ ।।

Verse: 2
Sentence: 1    पृ॑थि॒व्याः स॑मिधा॒नम॒ग्निं रा॒यस्पोषा॑य बृह॒ते ह॑वामहे । इ॑रम्म॒दम्बृ॒हदु॑क्थं॒ यज॑त्रं॒ जेता॑रम॒ग्निम्पृत॑नासु सास॒हिम् ।।
Sentence: 2=e    याः सेना॑ अ॒भीत्व॑रीराव्या॒धिनी॒रुग॑णा उ॒त । ये स्ते॒ना ये च॒ तस्क॑रा॒स्तांस्ते॑ अ॒ग्ने ऽपि॑ दधाम्या॒स्ये॑ ।।
Sentence: 3=f    दंष्ट्रा॑भ्याम्म॒लिम्लू॒ञ्जम्भ्यै॒स्तस्क॑रां उ॒त । हनू॑भ्यां॒ स्तेना॑न्भगव॒स्तांस्त्वं खा॑द॒ सुखा॑दितान् ।।
Sentence: 4=g    ये जने॑षु म॒लिम्ल॑व स्ते॒नास॒स्तस्क॑रा॒ वने॑ । ये ।।

Verse: 3
Sentence: 1    कक्षे॑ष्वघा॒यव॒स्तांस्ते॑ दधामि॒ जम्भ॑योः ।।
Sentence: 2=h    यो अ॒स्मभ्य॑मराती॒याद्यश्च॑ नो॒ द्वेष॑ते॒ जनः॑ । निन्दा॒द्यो अ॒स्मान्दिप्सा॑च्च॒ सर्वं॒ तम्म॑स्म॒सा कु॑रु ।।
Sentence: 3=i    संशि॑तम्मे॒ ब्रह्म॒ संशि॑तं वी॒र्य॒म्बल॑म् । संशि॑तम्क्ष॒त्रं जि॒ष्णु यस्या॒हमस्मि॑ पु॒रोहि॑तः ।।
Sentence: 4=k    उदे॑षाम्बा॒हू अ॑तिर॒मुद्वर्च॒ उदू॒ बल॑म् । क्षि॒णोमि॒ ब्रह्म॑णा॒मित्रा॒नुन्न॑यामि ।।

Verse: 4
Sentence: 1    स्वां अ॒हम् ।
Sentence: 2=l    दृ॑शा॒नो रु॒क्म उ॒र्व्या व्य॑द्यौद्दु॒र्मर्ष॒मायुः॑ श्रि॒ये रु॑चा॒नः । अ॒ग्निर॒मृतो॑ अभव॒द्वयो॑भि॒र्यदे॑नं द्यौ॒रज॑नयत्सु॒रेताः॑ ।।
Sentence: 3=m    विश्वा॑ रू॒पाणि॒ प्रति॑ मुञ्चते क॒विः प्रासा॑वीद्भ॒द्रं द्वि॒पदे॒ चतु॑ष्पदे । वि नाक॑मख्यत्सवि॒ता वरे॒ण्यो ऽनु॑ प्र॒याण॑मु॒षसो॒ वि रा॑जति ।।
Sentence: 4=n    नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेकं॑ समी॒ची । द्यावा॒ क्षामा॑ रु॒क्मः ।।

Verse: 5
Sentence: 1    अ॒न्तर्वि भा॑ति दे वाअ॒ग्निं धा॑रयन्द्रविणो॒दाः ।।
Sentence: 2=o    सु॑प॒र्णो॑ ऽसि ग॒रुत्मा॑न्त्रि॒वृत्ते॑ शिरो गाय॒त्रं चक्षु॒ स्तोम॑ आ॒त्मा साम॑ ते त॒नूर्वा॑�॒रे पक्षौ॑ यज्ञाय॒ज्ञिय॒म्पुछं॒ छन्दां॒स्यङ्गा॑नि॒ धिष्णि॑याः॒ शपा॒ यजूं॑षि॒ नाम॑ ।
Sentence: 3=p    सु॑प॒र्णो॑ ऽसि ग॒रुत्मा॒न्दिवं॑ गछ॒ सुवः॑ पत ।।

Paragraph: 11
Verse: 1
Sentence: 1=a    अग्ने॒ यं य॒ज्ञम॑ध्व॒रं वि॒श्वतः॑ परि॒भूरसि॑ । स इद्दे॒वेषु॑ गछति ।।
Sentence: 2=b    सोम॒ यास्ते॑ मयो॒भुव॑ ऊ॒तयः॒ सन्ति॑ दा॒शुषे॑ । ताभि॑र्नो ऽवि॒ता भ॑व ।।
Sentence: 3=c    अ॒ग्निर्मू॒र्धा
Sentence: 4=d    भुवः॑ ।
Sentence: 5=e    त्वं नः॑ सोम
Sentence: 6=f    या ते॒ धामा॑नि ।
Sentence: 7=g    तत्स॑वि॒तुर्वरे॑ण्य॒म्भर्गो॑ दे॒वस्य॑ धीमहि । धियो॒ यो नः॑ प्रचो॒दया॑त् ।।
Sentence: 8=h    अचि॑त्ती॒ यच्च॑कृ॒मा दै॑व्ये॒ जने॒ दीनै॒र्दक्षैः॒ प्रभू॑ती पूरुष॒त्वता॑ ।।

Verse: 2
Sentence: 1    दे॒वेषु॑ च सवित॒र्मानु॑षेषु च॒ त्वं नो॒ अत्र॑ सुवता॒दना॑गसः ।।
Sentence: 2=i    चो॑दयि॒त्री सू॒नृता॑नां॒ चेत॑न्ती सुमती॒नाम् । य॒ज्ञं द॑धे॒ सर॑स्वती ।।
Sentence: 3=k    पावी॑रवी क॒न्या॑ चि॒त्रायुः॒ सर॑स्वती वी॒रप॑त्नी॒ धियं॑ धात् । ग्नाभि॒रछि॑द्रं शर॒णं स॒जोषा॑ दुरा॒धर्षं॑ गृण॒ते शर्म॑ यंसत् ।।
Sentence: 4=l    पू॒षा गा अन्वे॑तु नः पू॒षा र॑क्ष॒त्वर्व॑तः । पू॒षा वाजं॑ सनोतु नः ।।
Sentence: 5=m    शु॒क्रं ते॑ अ॒न्यद्य॑ज॒तं ते॑ अ॒न्यत् ।।

Verse: 3
Sentence: 1    विषु॑रूपे॒ अह॑नी द्यौरिवासि । विश्वा॒ हि मा॒या अव॑सि स्वधावो भ॒द्रा ते॑ पूषन्नि॒ह रा॒तिर॑स्तु ।।
Sentence: 2=n    ते॑ ऽवर्धन्त॒ स्वत॑वसो महित्व॒ना नाकं॑ त॒स्थुरु॒रु च॑क्रिरे॒ सदः॑ । विष्णु॒र्यद्धाव॒द्वृष॑णम्मद॒च्युतं॒ वयो॒ न सी॑द॒न्नधि॑ ब॒र्हिषि॑ प्रि॒ये ।
Sentence: 3=o    प्र चि॒त्रम॒र्कं गृ॑ण॒ते तु॒राय॒ मारु॑ताय॒ स्वत॑वसे भरध्वम् । ये सहां॑सि॒ सह॑सा॒ सह॑न्ते ।।

Verse: 4
Sentence: 1    रेज॑ते अग्ने पृथि॒वी म॒खेभ्यः॑ ।।
Sentence: 2=p    विश्वे॑ दे॒वास् ।
Sentence: 3=q    विश्वे॑ दे॒वाः ।
Sentence: 4=r    द्यावा॑ नः पृथि॒वी इ॒मं सि॒ध्रम॒द्य दि॑वि॒स्पृश॑म् । य॒ज्ञं दे॒वेषु॑ यछताम् ।।
Sentence: 5=s    प्र पू॑र्व॒जे पि॒तरा॒ नव्य॑सीभिर्गी॒र्भिः कृ॑णुध्वं॒ सद॑ नेऋ॒तस्य॑ । आ नो॑ द्यावापृथिवी दैव्येन॒ जने॑न यातम्म॒हि वां॒ वरू॑थम् ।।
Sentence: 6=t    अ॒ग्निं स्तोमे॑न बोधय समिधा॒नो अम॑र्त्यम् । ह॒व्या दे॒वेषु॑ नो दधत् ।।
Sentence: 7=u    स ह॑व्य॒वाडम॑र्त्य उ॒शिग्दू॒तश्चनो॑हितः । अ॒ग्निर्धि॒या समृ॑ण्वति ।।
Sentence: 8=v    शं नो॑ भवन्तु
Sentence: 9=w    वाजे॑वाजे ।।

This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.