TITUS
Black Yajur-Veda: Taittiriya-Samhita
Part No. 29
Previous part

Book: 5 
Chapter: 1 
Paragraph: 1 
Verse: 1 
Sentence: 1    सा॑वि॒त्राणि॑ जुहोति
Sentence: 2    प्रसू॑त्यै
Sentence: 3    चतुर्गृही॒तेन॑ जुहोति
Sentence: 4    चतु॑ष्पादः प॒शवः
Sentence: 5    प॒शूने॒वाव॑ रुन्द्धे
Sentence: 6    चत॑स्रो॒ दिश॑स् ।
Sentence: 7    दि॒क्ष्वे॒व प्रति॑ तिष्ठति
Sentence: 8    छन्दां॑सि दे॒वेभ्यो ऽपा॑क्रामन्
Sentence: 9    न वो॑ ऽभा॒गानि॑ ह॒व्यं व॑क्ष्याम॒ इति
Sentence: 10    तेभ्य॑ ए॒तच्च॑तुर्गृही॒तम॑धारयन्
Sentence: 11    पुरोऽनुवा॒क्या॑यै या॒ज्या॑यै दे॒वता॑यै वषट्का॒राय
Sentence: 12    यच्च॑तुर्गृही॒तं जु॒होति॒ छन्दां॑स्ये॒व तत्प्री॑णाति
Sentence: 13    तान्य॑स्य प्री॒तानि॑ दे॒वेभ्यो॑ ह॒व्यं व॑हन्ति
Sentence: 14    यं का॒मये॑त ।।

Verse: 2 
Sentence: 1    पापी॑यान्त्स्या॒दित्येकै॑कं॒ तस्य॑ जुहुयात् ।
Sentence: 2    आहु॑तीभिरेवैन॒मप॑ गृह्णाति॒ पापी॑यान्भवति
Sentence: 3    यं का॒मये॑त
Sentence: 4    वसी॑यान्त्स्या॒दिति॒ सर्वा॑णि॒ तस्या॑नु॒द्रुत्य॑ जुहुयात् ।
Sentence: 5    आहु॑त्यैवैनम॒भि क्र॑मयति॒ वसी॑यान्भवति ।
Sentence: 6    अथो॑ य॒ज्ञस्यैवै॒षाभिक्रा॑न्तिस् ।
Sentence: 7    एति॒ वा ए॒ष य॒ज्ञमु॒खादृद्ध्या॒ यो॒ ऽग्नेर्दे॒वता॑या॒ एति॑ ।
Sentence: 8    अ॒ष्टावे॒तानि॑ सावि॒त्राणि॑ भवन्ति ।
Sentence: 9    अ॒ष्टाक्ष॑रा गाय॒त्री
Sentence: 10    गा॑य॒त्रः ।।

Verse: 3 
Sentence: 1    अ॒ग्निस्
Sentence: 2    तेनै॒व य॑ज्ञमु॒खादृद्ध्या॑ अ॒ग्नेर्दे॒वता॑यै नैति ।
Sentence: 3    अष्टौ सावि॒त्राणि॑ भव॒न्त्याहु॑तिर्नव॒मी
Sentence: 4    त्रि॒वृत॑मे॒व य॑ज्ञमु॒खे वि या॑तयति
Sentence: 5    यदि॑ का॒मये॑त
Sentence: 6    छन्दां॑सि यज्ञयश॒सेना॑र्पयेय॒मित्यृच॑मन्त॒मां कु॑र्यात् ।
Sentence: 7    छन्दां॑स्ये॒व य॑ज्ञयश॒सेना॑र्पयति
Sentence: 8    यदि॑ का॒मये॑त
Sentence: 9    यज॑मानं यज्ञयश॒सेना॑र्पयेय॒मिति॒ यजु॑रन्त॒मं कु॑र्यात् ।
Sentence: 10    यज॑मानमे॒व य॑ज्ञयश॒सेना॑र्पयति ।
Sentence: 11    ऋ॒चा स्तोमं॒ सम॑र्ध॒येति॑ ।।

Verse: 4 
Sentence: 1    आ॑ह
Sentence: 2    समृ॑द्ध्यै
Sentence: 3    च॒तुर्भि॒रभ्रि॒मा द॑त्ते
Sentence: 4    च॒त्वारि॒ छन्दां॑सि
Sentence: 5    छन्दो॑भिरे॒व
Sentence: 6    दे॒वस्य॑ त्वा सवि॒तुः प्र॑स॒व इत्या॑ह
Sentence: 7    प्रसू॑त्यै ।
Sentence: 8    अ॒ग्निर्दे॒वेभ्यो॒ निला॑यत
Sentence: 9    स वेणु॒म्प्रावि॑शत्
Sentence: 10    स ए॒तामू॒तिमनु॒ सम॑चर॒द्यद्वेणोः॑ सुषि॒रम् ।
Sentence: 11    सु॑षि॒राभ्रि॑र्भवति सयोनि॒त्वाय
Sentence: 12    स यत्र॑य॒त्राव॑स॒त्तत्कृ॒ष्णम॑भवत्
Sentence: 13    कल्मा॒सी भ॑वति रू॒पस॑मृद्ध्यै ।
Sentence: 14    उ॑भयतः॒क्ष्णूर्भ॑वति ।
Sentence: 15    इ॒तश्चा॒मुत॑श्चा॒र्कस्याव॑रुद्ध्यै
Sentence: 16    व्याममा॒त्री भ॑वति ।
Sentence: 17    ए॒तावद्वै॒ पुरु॑षे वी॒र्य॑म् ।
Sentence: 18    वी॒र्य॑सम्मिता ।
Sentence: 19    अप॑रिमिता भवति ।
Sentence: 20    अप॑रिमित॒स्याव॑रुद्ध्यै
Sentence: 21    यो वन॒स्पती॑नाम्पल॒ग्रहिः॒ स ए॑षां वी॒र्या॑वान्
Sentence: 22    पल॒ग्रहि॒र्वेणु॑स् ।
Sentence: 23    वै॑ण॒वी भ॑वति वी॒र्य॒स्याव॑रुद्ध्यै ।।

Paragraph: 2 
Verse: 1 
Sentence: 1    व्यृ॑द्धं॒ वा ए॒तद्य॒ज्ञस्य॒ यद॑य॒जुष्के॑ण क्रि॒यते॑ ।
Sentence: 2    इ॒माम॑गृभ्णन्रश॒नामृ॒तस्येत्य॑श्वाभि॒धानी॒मा द॑त्ते
Sentence: 3    यजु॑ष्कृत्यै य॒ज्ञस्य॒ समृ॑द्ध्यै
Sentence: 4    प्रतू॑र्तं वाजि॒न्ना द्र॒वेत्यश्व॑म॒भि द॑धाति
Sentence: 5    रू॒पमे॒वास्यै॒तन्म॑हि॒मानं॒ व्याच॑ष्टे
Sentence: 6    यु॒ञ्जाथां॒ रास॑भं यु॒वमिति॑ गर्द॒भम्
Sentence: 7    अस॑त्ये॒व ग॑र्द॒भम्प्रति॑ ष्ठापयति
Sentence: 8    तस्मा॒दश्वा॑द्गर्द॒भो ऽस॑त्तरस् ।
Sentence: 9    योगे॑योगे त॒वस्त॑र॒मित्या॑ह ।।

Verse: 2 
Sentence: 1    योगे॒ योग॑ एवैनं युङ्क्ते
Sentence: 2    वाजे॑वाजे हवामह॒ इत्या॑ह ।
Sentence: 3    अन्नं वै॒ वाज॑स् ।
Sentence: 4    अन्न॑मे॒वाव॑ रुन्द्धे
Sentence: 5    सखा॑य॒ इन्द्र॑मू॒तय॒ इत्या॑ह ।
Sentence: 6    इ॑न्द्रि॒यमे॒वाव॑ रुन्द्धे ।
Sentence: 7    अ॒ग्निर्दे॒वेभ्यो॒ निला॑यत
Sentence: 8    तम्प्र॒जाप॑ति॒रन्व॑विन्दत्
Sentence: 9    प्राजाप॒त्यो ऽश्व॑स् ।
Sentence: 10    अश्वे॑न॒ सम्भ॑र॒त्यनु॑वित्त्यै
Sentence: 11    पापवस्य॒सं वा ए॒तत्क्रि॑यते॒ यच्छ्रेय॑सा च॒ पापी॑यसा च समा॒नं कर्म॑ कु॒र्वन्ति
Sentence: 12    पापी॑यान् ।।

Verse: 3 
Sentence: 1    ह्यश्वा॑द्गर्द॒भस् ।
Sentence: 2    अश्व॒म्पूर्वं॑ नयन्ति पापवस्य॒सस्य॒ व्यावृ॑त्त्यै
Sentence: 3    तस्मा॒च्छ्रेयां॑स॒म्पापी॑यान्प॒श्चादन्वे॑ति
Sentence: 4    ब॒हुर्वै॒ भव॑तो॒ भ्रातृ॑व्यस् ।
Sentence: 5    भव॑तीव॒ खलु॒ वा ए॒ष यो॒ ऽग्निम्चि॑नु॒ते
Sentence: 6    व॒ज्र्यश्वः
Sentence: 7    प्र॒तूर्व॒न्नेह्य॑व॒क्राम॒न्नश॑स्ती॒रित्या॑ह
Sentence: 8    वज्रे॑णै॒व पा॒प्मान॒म्भ्रातृ॑व्य॒मव॑ क्रामति
Sentence: 9    रु॒द्रस्य॒ गाण॑पत्या॒दित्या॑ह
Sentence: 10    रौ॒द्रा वै॑ प॒शवो॑ रु॒द्रादे॒व ।।

Verse: 4 
Sentence: 1    प॒शून्नि॒र्याच्या॒त्मने॒ कर्म॑ कुरुते
Sentence: 2    पू॒ष्णा स॒युजा॑ स॒हेत्या॑ह
Sentence: 3    पू॒षा वा अध्व॑नां संने॒ता
Sentence: 4    सम॑ष्ट्यै
Sentence: 5    पुरी॑षायतनो॒ वा ए॒ष यद॒ग्निस् ।
Sentence: 6    अङ्गि॑रसो॒ वा ए॒तमग्रे॑ दे॒वता॑नां॒ सम॑भरन्
Sentence: 7    पृथि॒व्याः स॒धस्था॑द॒ग्निम्पु॑री॒ष्य॑मङ्गिर॒स्वदछे॒हीत्या॑ह
Sentence: 8    साय॑तनमेवैनं दे॒वता॑भिः॒ सम्भ॑रति ।
Sentence: 9    अ॒ग्निम्पु॑री॒ष्य॑मङ्गिर॒स्वदछे॑म॒ इत्या॑ह
Sentence: 10    येन॑ ।।

Verse: 5 
Sentence: 1    सं॒गछ॑ते॒ वाज॑मे॒वास्य॑ वृङ्क्ते
Sentence: 2    प्र॒जाप॑तये प्रति॒प्रोच्या॒ग्निः स॒म्भृत्य॒ इत्या॑हुस् ।
Sentence: 3    इ॒यं वै॑ प्र॒जाप॑तिस्
Sentence: 4    तस्या॑ ए॒तच्छ्रोत्रं॒ यद्व॒ल्मीक॑स् ।
Sentence: 5    अ॒ग्निम्पु॑री॒ष्य॑मङ्गिर॒स्वद्भ॑रिष्याम॒ इति॑ वल्मीकव॒पामुप॑ तिष्ठते
Sentence: 6    सा॒क्षादे॒व प्र॒जाप॑तये प्रति॒प्रोच्या॒ग्निं सम्भ॑रति ।
Sentence: 7    अ॒ग्निम्पु॑री॒ष्य॑मङ्गिर॒स्वद्भ॑राम॒ इत्या॑ह
Sentence: 8    येन॑ सं॒गछ॑ते॒ वाज॑मे॒वास्य॑ वृङ्क्ते ।
Sentence: 9    अन्व॒ग्निरु॒षसा॒मग्र॑म् ।।

Verse: 6 
Sentence: 1    अ॑ख्य॒दित्या॑ह ।
Sentence: 2    अनु॑ख्यात्यै ।
Sentence: 3    आ॒गत्य॑ वा॒ज्यध्व॑न आ॒क्रम्य॑ वाजिन्प्राथि॒वीमित्या॑ह ।
Sentence: 4    इ॒छत्येवैन॒म्पूर्व॑या वि॒न्दत्युत्त॑रया
Sentence: 5    द्वाभ्या॒मा क्र॑मयति
Sentence: 6    प्रति॑ष्ठित्यै ।
Sentence: 7    अनु॑रूपाभ्याम् ।
Sentence: 8    तस्मा॒दनु॑रूपाः प॒शवः॒ प्र जा॑यन्ते
Sentence: 9    द्यौस्ते पृ॒ष्ठम्पृ॑थि॒वी स॒धस्थ॒मित्या॑ह ।
Sentence: 10    ए॒भ्यो वा ए॒तं लो॒केभ्यः॑ प्र॒जाप॑तिः॒ सऐ॑रयत् ।
Sentence: 11    रू॒पमे॒वास्यै॒तन्म॑हि॒मानं॒ व्याच॑ष्टे
Sentence: 12    व॒ज्री वा ए॒ष यदश्व॑स् ।
Sentence: 13    दद्भि॑र॒न्यतो॑दद्भ्यो॒ भूयाँ॒ लोम॑भिरुभ॒याद॑द्भ्यस् ।
Sentence: 14    यं द्वि॒ष्यात्तम॑धस्प॒दं ध्या॑येत् ।
Sentence: 15    वज्रे॑णैवैनं स्तृणुते ।।

Paragraph: 3 
Verse: 1 
Sentence: 1    उत्क्रा॒मोद॑क्रमी॒दिति॒ द्वाभ्या॒मुत्क्र॑मयति
Sentence: 2    प्रति॑ष्ठित्यै ।
Sentence: 3    अनु॑रूपाभ्याम् ।
Sentence: 4    तस्मा॒दनु॑रूपाः प॒शवः॒ प्र जा॑यन्ते ।
Sentence: 5    अ॒प उप॑ सृजति
Sentence: 6    यत्र॒ वा आप॑ उप॒गछ॑न्ति॒ तदोष॑धयः॒ प्रति॑ तिष्ठन्ति ।
Sentence: 7    ओष॑धीः प्रति॒तिष्ठ॑न्तीः प॒शवो ऽनु॒ प्रति॑ तिष्ठन्ति
Sentence: 8    प॒शून्य॒ज्ञस् ।
Sentence: 9    य॒ज्ञं यज॑मानस् ।
Sentence: 10    यज॑मानम्प्र॒जास्
Sentence: 11    तस्मा॑द॒प उप॑ सृजति
Sentence: 12    प्रति॑ष्ठित्यै
Sentence: 13    यद॑ध्व॒र्युर॑न॒ग्नावाहु॑तिं जुहु॒याद॒न्धो॑ ऽध्व॒र्युः ।।

Verse: 2 
Sentence: 1    स्या॒द्रक्षां॑सि य॒ज्ञं ह॑न्युस् ।
Sentence: 2    हिर॑ण्यमु॒पास्य॑ जुहोति ।
Sentence: 3    अ॑ग्नि॒वत्ये॒व जु॑होति
Sentence: 4    नान्धो॑ ऽध्व॒र्युर्भव॑ति॒ न य॒ज्ञं रक्षां॑सि घ्नन्ति
Sentence: 5    जिघ॑र्म्य॒ग्निम्मन॑सा घृ॒तेनेत्या॑ह
Sentence: 6    मन॑सा॒ हि पुरु॑षो य॒ज्ञम॑भि॒गछ॑ति
Sentence: 7    प्रति॒क्ष्यन्त॒म्भुव॑नानि॒ विश्वेत्या॑ह
Sentence: 8    सर्वं॒ ह्ये॒ष प्र॒त्यङ्क्षेति
Sentence: 9    पृ॒थुं ति॑र॒श्चा वय॒स बृ॒हन्त॒मित्या॑ह ।
Sentence: 10    अल्पो॒ ह्ये॒ष जा॒तो म॒हान् ।।

Verse: 3 
Sentence: 1    भव॑ति
Sentence: 2    व्यचि॑ष्ठ॒मन्नं॑ रभ॒सं विदा॑न॒मित्या॑ह ।
Sentence: 3    अन्न॑मे॒वास्मै॑ स्वदयति
Sentence: 4    सर्व॑मस्मै स्वदते॒ य ए॒वं वेद॑ ।
Sentence: 5    आ त्वा॑ जिघर्मि॒ वच॑सा घृ॒तेनेत्या॑ह
Sentence: 6    तस्मा॒द्यत्पुरु॑षो॒ मन॑साभि॒गछ॑ति॒ तद्वा॒चा व॑दति ।
Sentence: 7    अ॑र॒क्षसेत्या॑ह
Sentence: 8    रक्ष॑सा॒मप॑हत्यै
Sentence: 9    मर्त्य॑श्री स्पृह॒यद्व॑र्णो अ॒ग्निरित्या॑ह ।
Sentence: 10    अप॑चितिमे॒वास्मि॑न्दधाति ।
Sentence: 11    अप॑चितिमान्भवति॒ य ए॒वं ।।

Verse: 4 
Sentence: 1    वेद
Sentence: 2    मन॑सा त्वै॒ तामाप्तु॑मर्हति॒ याम॑ध्व॒र्युर॑न॒ग्नावाहु॑तिं जु॒होति
Sentence: 3    मन॑स्वतीभ्यां जुहोति ।
Sentence: 4    आहु॑त्यो॒राप्त्यै
Sentence: 5    द्वाभ्या॑म्
Sentence: 6    प्रति॑ष्ठित्यै
Sentence: 7    यज्ञमु॒खेय॑ज्ञमुखे वै क्रि॒यमा॑णे य॒ज्ञं रक्षां॑सि जिघांसन्ति ।
Sentence: 8    एत॑र्हि॒ खलु॒ वा ए॒तद्य॑ज्ञमु॒खं यर्ह्ये॑न॒दाहु॑तिरश्नु॒ते
Sentence: 9    परि॑ लिखति
Sentence: 10    रक्ष॑सा॒मप॑हत्यै
Sentence: 11    ति॒सृभिः॒ परि॑ लिखति
Sentence: 12    त्रि॒वृद्वा अ॒ग्निस् ।
Sentence: 13    यावा॑ने॒वाग्निस्तस्मा॒द्रक्षां॒स्यप॑ हन्ति ।।

Verse: 5 
Sentence: 1    गा॑यत्रि॒या परि॑ लिखति
Sentence: 2    तेजो वै गाय॒त्री
Sentence: 3    तेज॑सैवैन॒म्परि॑ गृह्णाति
Sentence: 4    त्रि॒ष्टुभा॒ परि॑ लिखति ।
Sentence: 5    इ॑न्द्रि॒यं वै त्रि॒ष्टुग्^त्रि॒ष्तुभ्
Sentence: 6    इन्द्रि॒येणैवैन॒म्परि॑ गृह्णाति ।
Sentence: 7    अ॑नु॒ष्टुभा॒ परि॑ लिखति ।
Sentence: 8    अ॑नु॒ष्टुप्सर्वा॑णि॒ छन्दां॑सि परि॒भूः पर्या॑प्त्यै
Sentence: 9    मध्य॒तो॑ ऽनु॒ष्टुभा
Sentence: 10    वाग्वा अनु॒ष्टुप्^नु॒ष्टुभ्
Sentence: 11    तस्मा॑न्मध्य॒तो वा॒चा व॑दामस् ।
Sentence: 12    गा॑यत्रि॒या प्र॑थ॒मया॒ परि॑ लिख॒त्यथा॑नु॒ष्टुभाथ॑ त्रि॒ष्टुभा
Sentence: 13    तेजो वै गाय॒त्री य॒ज्ञो॑ ऽनु॒ष्टुगि॑न्द्रि॒यं त्रि॒ष्टुप्^त्रि॒ष्टुभ्
Sentence: 14    तेज॑सा चै॒वेन्द्रि॒येण॑ चोभ॒यतो॑ य॒ज्ञम्परि॑ गृह्णाति ।।

Paragraph: 4 
Verse: 1 
Sentence: 1    दे॒वस्य॑ त्वा सवि॒तुः प्र॑स॒व इति॑ खनति॒ प्रसू॑त्या॒ अथो॑ धू॒ममेवै॒तेन॑ जनयति
Sentence: 2    ज्योति॑ष्मन्तं त्वाग्ने सु॒प्रती॑क॒मित्या॑ह॒ ज्योति॑रेवै॒तेन॑ जनयति
Sentence: 3    सो॒ ऽग्निर्जा॒तः प्र॒जाः शु॒चार्प॑य॒त्तं दे॒वा अ॑र्ध॒र्चेना॑शमयन् ।
Sentence: 4    शि॒वम्प्र॒जाभ्यो ऽहिं॑सन्त॒मित्या॑ह प्र॒जाभ्य॑ एवैनं शमयति
Sentence: 5    द्वाभ्यां॑ खनति॒ प्रति॑ष्ठित्यै ।
Sentence: 6    अ॒पाम्पृ॒ष्ठम॒सीति॑ पुष्करप॒र्णमा ।।

Verse: 2 
Sentence: 1    ह॑रत्य॒पां वा ए॒तत्पृ॒ष्ठं यत्पु॑ष्करप॒र्णं रू॒पेणैवैन॒दा ह॑रति
Sentence: 2    पुष्करप॒र्णेन॒ सम्भ॑रति॒ योनि॒र्वा अ॒ग्नेः पु॑ष्करप॒र्णं सयो॑निमे॒वाग्निं सम्भ॑रति
Sentence: 3    कृष्णाजि॒नेन॒ सम्भ॑रति य॒ज्ञो वै॑ कृष्णाजि॒नं य॒ज्ञेनै॒व य॒ज्ञं सम्भ॑रति
Sentence: 4    यद्ग्रा॒म्याणा॑म्पशू॒नां चर्म॑णा स॒म्भरे॑द्ग्रा॒म्यान्प॒शूञ्छु॒चार्प॑येत्कृष्णाजि॒नेन॒ सम्भ॑रत्यार॒ण्याने॒व प॒शून् ।।

Verse: 3 
Sentence: 1    शु॒चार्प॑यति
Sentence: 2    तस्मा॑त्स॒माव॑त्पशू॒नाम्प्र॒जाय॑मानानामार॒ण्याः प॒शवः॒ कनी॑यांसः शु॒चा ह्यृ॒तास् ।
Sentence: 3    लो॑म॒तः सम्भ॑र॒त्यतो॒ ह्य॑स्य॒ मेध्य॑म् ।
Sentence: 4    कृ॑ष्णाजि॒नं च॑ पुष्करप॒र्णं च॒ सं स्तृ॑णाती॒यं वै॑ कृष्णाजि॒नमसौ पुष्करप॒र्णमा॒भ्यामेवैनमतः॒ परि॑ गृह्णाति ।
Sentence: 5    अ॒ग्निर्दे॑वेभ्यो॒ निला॑यत॒ तमथ॒र्वान्व॑पश्यत् ।
Sentence: 6    अथ॑र्वा त्वा प्रथ॒मो निर॑मन्थदग्न॒ इति॑ ।।

Verse: 4 
Sentence: 1    आ॑ह॒ य एवैनम॒न्वप॑श्य॒त्तेनैवैनं॒ सम्भ॑रति
Sentence: 2    त्वाम॑ग्ने॒ पुष्क॑रा॒दधीत्या॑ह पुष्करप॒र्णे ह्ये॑न॒मुप॑श्रित॒मवि॑न्दत्
Sentence: 3    तमु॑ त्वा द॒ध्यङ्ङृषि॒रित्या॑ह द॒ध्यङ्वा आ॑थर्व॒णस्ते॑ज॒स्व्या॑सी॒त्तेज॑ ए॒वास्मि॑न्दधात
Sentence: 4    तमु॑ त्वा पा॒थ्यो वृषेत्या॑ह॒ पूर्व॑मे॒वोदि॒तमुत्त॑रेणा॒भि गृ॑णाति ।।

Verse: 5 
Sentence: 1    च॑त॒सृभिः॒ सम्भ॑रति च॒त्वारि॒ छन्दां॑सि॒ छन्दो॑भिरे॒व
Sentence: 2    गा॑य॒त्रीभि॑र्ब्राह्म॒णस्य॑ गाय॒त्रो हि ब्रा॑ह्म॒णस्
Sentence: 3    त्रि॒ष्टुग्भी॑ राज॒न्य॑स्य त्रैष्टुभो॒ हि रा॑ज॒न्यो
Sentence: 4    यं का॒मये॑त॒ वसी॑या॒न्त्स्यादित्यु॒भयी॑भि॒स्तस्य॒ सम्भ॑रे॒त्तेज॑श्चै॒वास्मा॑ इन्द्रि॒यं च॑ स॒मीची॑ दधात्य्
Sentence: 5    अष्टा॒भिः सम्भ॑रत्य॒ष्टाक्ष॑रा गाय॒त्री गा॑य॒त्रो॒ ऽग्निर्यावा॑ने॒वाग्निस्तं सम्भ॑रति
Sentence: 6    सीद॑ होत॒रित्या॑ह दे॒वता॑ ए॒वास्मै॒ सं सा॑दयति
Sentence: 7    नि होतेति॑ मनु॒ष्या॒न्त्सं सी॑द॒स्वेति॒ वयां॑सि
Sentence: 8    जनि॑ष्वा॒ हि जेन्यो॒ अग्रे॒ अह्ना॒मित्या॑ह देवमनु॒ष्याने॒वास्मै॒ संस॑न्ना॒न्प्र ज॑नयति ।।

Paragraph: 5 
Verse: 1 
Sentence: 1    क्रू॒रमि॑व॒ वा अ॑स्या ए॒तत्क॑रोति॒ यत्खन॑ति ।
Sentence: 2    अ॒प उप॑ सृजति ।
Sentence: 3    आपो वै शा॒न्ताः
Sentence: 4    शा॒न्ताभि॑रे॒वास्यै॒ शुचं॑ शमयति
Sentence: 5    सं ते॑ वा॒युर्मा॑त॒रिश्वा॑ दधा॒त्वित्या॑ह
Sentence: 6    प्रा॒णो वै॑ वा॒युः
Sentence: 7    प्रा॒णेनै॒वास्यै॑ प्रा॒णं सं द॑धाति
Sentence: 8    सं ते॑ व॒युरित्या॑ह
Sentence: 9    तस्मा॑द्वा॒युप्र॑च्युता दि॒वो वृष्टि॑रीर्ते
Sentence: 10    तस्मै॑ च देवि॒ वष॑डस्तु ।।

Verse: 2 
Sentence: 1    तुभ्य॒मित्या॑ह
Sentence: 2    षड्वा ऋ॒तव॑स् ।
Sentence: 3    ऋ॒तुष्वे॒व वृष्टिं॑ दधाति
Sentence: 4    तस्मा॒त्सर्वा॑नृ॒तून्व॑र्षति
Sentence: 5    यद्व॑षट्कु॒र्याद्रक्षां॑सि य॒ज्ञं ह॑न्युस् ।
Sentence: 6    वडित्या॑ह
Sentence: 7    प॒रोऽक्ष॑मे॒व वष॑ट्करोति
Sentence: 8    नास्य॑ या॒तया॑मा वषट्का॒रो भव॑ति॒ न य॒ज्ञं रक्षां॑सि घनति
Sentence: 9    सुजा॑तो॒ ज्योति॑षा स॒हेत्य॑नु॒ष्टुभोप॑ नह्यति ।
Sentence: 10    अ॑नु॒ष्टुप् ।।

Verse: 3 
Sentence: 1    सर्वा॑णि॒ छन्दां॑सि
Sentence: 2    छन्दां॑सि॒ खलु॒ वा अ॒ग्नेः प्रि॒या त॒नूः
Sentence: 3    प्रि॒ययैवैनं त॒नुवा॒ परि॑ दधाति
Sentence: 4    वेदु॑को॒ वासो॑ भवति॒ य ए॒वं वेद॑ वारु॒णो वा अ॒ग्निरुप॑नद्धस् ।
Sentence: 5    उदु॑ तिष्ठ स्वध्वरो॒र्ध्व ऊ॒ षु ण॑ ऊ॒तय॒ इति॑ सावि॒त्रीभ्या॒मुत्ति॑ष्ठति
Sentence: 6    सवि॒तृप्र॑सूत ए॒वास्यो॒र्ध्वां व॑रुण मे॒निमुत्सृ॑जति
Sentence: 7    द्वाभ्या॑म्
Sentence: 8    प्रति॑ष्ठित्यै
Sentence: 9    स जा॒तो गर्भो॑ असि ।।

Verse: 4 
Sentence: 1    रोद॑स्यो॒रित्या॑ह ।
Sentence: 2    इ॒मे वै॒ रोद॑सी
Sentence: 3    तयो॑रे॒ष गर्भो॒ यद॒ग्निस्
Sentence: 4    तस्मा॑दे॒वमा॑ह ।
Sentence: 5    अग्ने॒ चारु॒र्विभृ॑त॒ ओष॑धी॒ष्वित्या॑ह
Sentence: 6    य॒दा ह्ये॒तं वि॒भर॒न्त्यथ॒ चारु॑तरो॒ भव॑ति
Sentence: 7    प्र मा॒तृभ्यो॒ अधि॒ कनि॑क्रदद्गा॒ इत्या॑ह ।
Sentence: 8    ओष॑धयो॒ वा अ॑स्य मा॒तर॑स्
Sentence: 9    ताभ्य॑ एवैन॒म्प्र च्या॑वयति
Sentence: 10    स्थि॒रो भ॑व वी॒ड्व॑ङ्ग॒ इति॑ गर्द॒भ आ सा॑दयति ।।

Verse: 5 
Sentence: 1    सं न॑ह्यत्येवैनमे॒तया॑ स्थे॒म्ने
Sentence: 2    ग॑र्द॒भेन॒ सम्भ॑रति
Sentence: 3    तस्मा॑द्गर्द॒भः प॑शू॒नाम्भा॑रभा॒रित॑मस् ।
Sentence: 4    ग॑र्द॒भेन॒ सम्भ॑रति
Sentence: 5    तस्मा॑द्गर्द॒भो ऽप्य॑नाले॒शेत्य॒न्यान्प॒शून्मे॑द्यति ।
Sentence: 6    अन्नं॒ ह्ये॑नेना॒र्कं स॒म्भर॑न्ति
Sentence: 7    गर्द॒भेन॒ सम्भ॑रति
Sentence: 8    तस्मा॑द्गर्द॒भो द्वि॒रेताः॒ सन्कनि॑ष्ठम्पशू॒नाम्प्र जा॑यते ।
Sentence: 9    अ॒ग्निर्ह्य॑स्य॒ योनिं॑ नि॒र्दह॑ति
Sentence: 10    प्र॒जासु॒ वा ए॒ष ए॒तर्ह्यारू॑ढः ।।

Verse: 6 
Sentence: 1    स ई॑श्व॒रः प्र॒जाः शु॒चा प्र॒दहः
Sentence: 2    शि॒वो भ॑व प्र॒जाभ्य॒ इत्या॑ह
Sentence: 3    प्र॒जाभ्य॑ एवैनं शमयति
Sentence: 4    मानु॑षीभ्य॒स्त्वम॑ङ्गिर॒ इत्या॑ह
Sentence: 5    मान॒व्यो॒ हि प्र॒जास् ।
Sentence: 6    मा द्यावा॑पृथि॒वी अ॒भि शू॑शुचो॒ मान्तरि॑क्ष॒म्मा वन॒स्पती॒नित्या॑ह ।
Sentence: 7    ए॒भ्य एवैनं लो॒केभ्यः॑ शमयति
Sentence: 8    प्रैतु वा॒जी कनि॑क्रद॒दित्या॑ह
Sentence: 9    वा॒जी ह्य्े॒ष^ ए॒षस्
Sentence: 10    नान॑द॒द्रास॑भः॒ पत्वेति॑ ।।

Verse: 7 
Sentence: 1    आ॑ह
Sentence: 2    रास॑भ॒ इति॒ ह्ये॒तमॄष॒यो ऽव॑दन्
Sentence: 3    भर॑न्न॒ग्निम्पु॑री॒ष्य॒मित्या॑ह ।
Sentence: 4    अ॒ग्निं ह्ये॒ष भर॑ति
Sentence: 5    मा पा॒द्यायु॑षः पु॒रेत्या॑ह ।
Sentence: 6    आयु॑रे॒वास्मि॑न्दधाति
Sentence: 7    तस्मा॑द्गर्द॒भः सर्व॒मायु॑रेति
Sentence: 8    तस्मा॑द्गर्द॒भे पु॒रायु॑षः॒ प्रमी॑ते बिभ्यति
Sentence: 9    वृषा॒ग्निं वृष॑ण॒म्भर॒न्नित्या॑ह
Sentence: 10    वृषा॑ ह्य्े॒ष^ ए॒षस्
Sentence: 11    वृषा॒ग्निस् ।
Sentence: 12    अ॒पां गर्भ॑म् ।।

Verse: 8 
Sentence: 1    स॑मु॒द्रिय॒मित्या॑ह ।
Sentence: 2    अ॒पां ह्ये॒ष गर्भो॒ यद॒ग्निस् ।
Sentence: 3    अग्न॒ आ या॑हि वी॒तय॒ इति॒ वा इमौ लोकौ व्ऐताम्
Sentence: 4    अग्न॒ आ या॑हि वी॒तय॒ इति॒ यदाह॑ ।
Sentence: 5    अ॒नयो॑र्लो॒कयो॒र्वीत्यै
Sentence: 6    प्रच्यु॑तो॒ वा ए॒ष आ॒यत॑ना॒दग॑तः प्रति॒ष्ठाम् ।
Sentence: 7    स ए॒तर्ह्य॑ध्व॒र्युं च॒ यज॑मानं च ध्यायति ।
Sentence: 8    ऋ॒तं स॒त्यमित्या॑ह ।
Sentence: 9    इ॒यं वा ऋ॒तमसौ ।।

Verse: 9 
Sentence: 1    स॒त्यम्
Sentence: 2    अ॒नयो॑रेवैन॒म्प्रति॑ ष्ठापयति॒ नार्ति॒मार्छ॑त्यध्व॒र्युर्न यज॑मानस् ।
Sentence: 3    वरु॑णो॒ वा ए॒ष यज॑मानमभ्ऐति॒ यद॒ग्निरुप॑नद्धस् ।
Sentence: 4    ओष॑धयः॒ प्रति॑ गृह्णीता॒ग्निमे॒तमित्या॑ह
Sentence: 5    शान्त्यै
Sentence: 6    व्यस्य॒न्विश्वा॒ अम॑ती॒ररा॑ती॒रित्या॑ह
Sentence: 7    रक्ष॑सा॒मप॑हत्यै
Sentence: 8    नि॒षीद॑न्नो॒ अप॑ दुर्म॒तिं ह॑न॒दित्या॑ह
Sentence: 9    प्रति॑ष्ठित्यै ।
Sentence: 10    ओष॑धयः॒ प्रति॑ मोदध्वम् ।।

Verse: 10 
Sentence: 1    ए॑न॒मित्या॑ह ।
Sentence: 2    ओष॑धयो॒ वा अ॒ग्नेर्भा॑ग॒धेय॑म् ।
Sentence: 3    ताभि॑रेवैनं॒ सम॑र्धयति
Sentence: 4    पुष्पा॑वतीः सुपिप्पला॒ इत्या॑ह
Sentence: 5    तस्मा॒दोष॑धयः॒ पलं॑ गृह्णन्ति ।
Sentence: 6    अ॒यं वो॒ गर्भ॑ ऋ॒त्वियः॑ प्र॒त्नं स॒धस्थ॒मास॑द॒दित्या॑ह
Sentence: 7    याभ्य॑ एवैनम्प्रच्या॒वय॑ति॒ तास्वेवैन॒म्प्रति॑ ष्ठापयति
Sentence: 8    द्वाभ्या॑मु॒पाव॑हरति
Sentence: 9    प्रति॑ष्ठित्यै ।।

Paragraph: 6 
Verse: 1 
Sentence: 1    वा॑रु॒णो वा अ॒ग्निरुप॑नद्धस् ।
Sentence: 2    वि पाज॒सेति॒ वि स्रं॑सयति
Sentence: 3    सवि॒तृप्र॑सूत ए॒वास्य॒ विषू॑चीं वरुणमे॒निं वि सृ॑जति ।
Sentence: 4    अ॒प उप॑ सृजति ।
Sentence: 5    आपो वै शा॒न्ताः
Sentence: 6    शा॒न्ताभि॑रे॒वास्य॒ शुचं॑ शमयति
Sentence: 7    ति॒सृभि॒रुप॑ सृजति
Sentence: 8    त्रि॒वृद्वा अ॒ग्निस् ।
Sentence: 9    यावा॑ने॒वाग्निस्तस्य॒ शुचं॑ शमयति
Sentence: 10    मि॒त्रः सं॒सृज्य॑ पृथि॒वीमित्या॑ह
Sentence: 11    मि॒त्रो वै॑ शि॒वो दे॒वाना॑म् ।
Sentence: 12    तेनै॒व ।।

Verse: 2 
Sentence: 1    ए॑नं॒ सं सृ॑जति
Sentence: 2    शान्त्यै
Sentence: 3    यद्ग्रा॒म्याणा॒म्पात्रा॑णां क॒पालैः॑ संसृ॒जेद्ग्रा॒म्याणि॒ पात्रा॑णि शु॒चार्प॑येत् ।
Sentence: 4    अ॑र्मकपालैः॒ सं सृ॑जति ।
Sentence: 5    ए॒तानि वाअनुपजीवनी॒यानि
Sentence: 6    तान्ये॒व शु॒चार्प॑यति
Sentence: 7    शर्क॑राभिः॒ सं सृ॑जति
Sentence: 8    धृत्यै॑ ।
Sentence: 9    अथो॑ शं॒त्वाय॑ ।
Sentence: 10    अ॑जलोमैः॒ सं सृ॑जति ।
Sentence: 11    ए॒षा वा अ॒ग्नेः प्रि॒या त॒नूर्यद॒जा
Sentence: 12    प्रि॒ययैवैनं त॒नुवा॒ सं सृ॑ज॒त्यथो॒ तेज॑सा
Sentence: 13    कृष्णाजि॒नस्य॒ लोम॑भिः॒ सम् ।।

Verse: 3 
Sentence: 1    सृ॑जति
Sentence: 2    य॒ज्ञो वै॑ कृष्णाजि॒नम् ।
Sentence: 3    य॒ज्ञेनै॒व य॒ज्ञं सं सृ॑जति
Sentence: 4    रु॒द्राः स॒म्भृत्य॑ पृथि॒वीमित्या॑ह ।
Sentence: 5    ए॒ता वा ए॒तं दे॒वता॒ अग्रे॒ सम॑भरन्
Sentence: 6    ताभि॑रेवैनं॒ सम्भ॑रति
Sentence: 7    म॒खस्य॒ शिरो॒ ऽसीत्या॑ह
Sentence: 8    य॒ज्ञो वै॑ म॒खस
Sentence: 9    तस्यै॒तच्छिरो॒ यदु॒खा
Sentence: 10    तस्मा॑दे॒वमा॑ह
Sentence: 11    य॒ज्ञस्य॑ प॒दे स्थ॒ इत्या॑ह
Sentence: 12    य॒ज्ञस्य॒ ह्ये॒ते ।।

Verse: 4 
Sentence: 1    प॒दे
Sentence: 2    अथो॒ प्रति॑ष्ठित्यै
Sentence: 3    प्रान्याभि॒र्यछ॒त्यन्वन्यैर्मन्त्रयते
Sentence: 4    मिथुन॒त्वाय
Sentence: 5    त्र्यु॑द्धिं करोति॒ त्रय॑ इ॒मे लो॒का ए॒षां लो॒काना॒माप्त्यै
Sentence: 6    छन्दो॑भिः करोति
Sentence: 7    वी॒र्यं वै॒ छन्दां॑सि
Sentence: 8    वी॒र्ये॑णैवैनां करोति
Sentence: 9    यजु॑षा॒ बिलं॑ करोति
Sentence: 10    व्यावृ॑त्त्यै ।
Sentence: 11    इय॑तीं करोति
Sentence: 12    प्र॒जाप॑तिना यज्ञमु॒खेन॒ सम्मि॑ताम् ।
Sentence: 13    द्वि॑स्त॒नां क॑रोति
Sentence: 14    द्यावा॑पृथि॒व्योर्दोहा॑य
Sentence: 15    चतु॑स्तनां करोति
Sentence: 16    पशू॒नां दोहा॑य ।
Sentence: 17    अ॒ष्टास्त॑नां करोति
Sentence: 18    छन्द॑सां॒ दोहा॑य
Sentence: 19    नवा॑श्रिमभि॒चर॑तः कुर्यात्
Sentence: 20    त्रि॒वृत॑मे॒व वज्रं॑ स॒म्भृत्य॒ भ्रातृ॑व्याय॒ प्र ह॑रति
Sentence: 21    स्तृत्यै
Sentence: 22    कृ॒त्वाय॒ स म॒हीमु॒खामिति॒ नि द॑धाति
Sentence: 23    दे॒वता॑स्वेवैना॒म्प्रति॑ ष्ठापयति ।।

Paragraph: 7 
Verse: 1 
Sentence: 1    स॒प्तभि॑र्धूपयति
Sentence: 2    स॒प्त वै॑ शीर्ष॒ण्याः॑ प्रा॒णाः
Sentence: 3    शिर॑ ए॒तद्य॒ज्ञस्य॒ यदु॒खा
Sentence: 4    शी॒र्षन्ने॒व य॒ज्ञस्य॑ प्रा॒णान्द॑धाति
Sentence: 5    तस्मा॑त्स॒प्त शी॒र्षन्प्रा॒णास् ।
Sentence: 6    अ॑श्वश॒केन॑ धूपयति
Sentence: 7    प्राजाप॒त्यो वा अश्वः
Sentence: 8    सयोनि॒त्वाय॑ ।
Sentence: 9    अदि॑ति॒स्त्वेत्या॑ह ।
Sentence: 10    इ॒यं वा अदि॑तिस् ।
Sentence: 11    अदि॑त्यै॒वादि॑त्यां खनत्य॒स्या अक्रू॑रंकाराय
Sentence: 12    न हि स्वः स्वं हि॒नस्ति
Sentence: 13    दे॒वानां॑ त्वा॒ पत्नी॒रित्या॑ह
Sentence: 14    दे॒वाना॑म् ।।

Verse: 2 
Sentence: 1    वा ए॒ताम्पत्न॒यो ऽग्रे॑ ऽकुर्वन्
Sentence: 2    ताभि॑रेवैनां दधाति
Sentence: 3    धि॒षणा॒स्त्वेत्या॑ह
Sentence: 4    वि॒द्या वै॑ धि॒षणा॑स् ।
Sentence: 5    वि॒द्याभि॑रेवैनाम॒भीन्द्धे
Sentence: 6    ग्नास्त्वेत्या॑ह
Sentence: 7    छन्दां॑सि वै॒ ग्नास् ।
Sentence: 8    छन्दो॑भिरेवैनां श्रपयति
Sentence: 9    वरू॑त्रय॒स्त्त्वेत्या॑ह
Sentence: 10    होत्रा वै॒ वरू॑त्रयस् ।
Sentence: 11    होत्रा॑भिरेवैनाम्पचति
Sentence: 12    जन॑य॒स्त्वेत्या॑ह
Sentence: 13    दे॒वानां वै॒ पत्नीः॑ ।।

Verse: 3 
Sentence: 1    जन॑यस्
Sentence: 2    ताभि॑रेवैनाम्पचति
Sentence: 3    ष॒ड्भिः प॑चति
Sentence: 4    षड्वा ऋ॑तवस् ।
Sentence: 5    ऋ॒तुभि॑रेवैनाम्पचति
Sentence: 6    द्विः पच॒न्त्वित्या॑ह
Sentence: 7    तस्मा॒द्द्विः सं॑वत्स॒रस्य॑ स॒स्यम्प॑च्यते
Sentence: 8    वारु॒ण्यु॒खाभीद्धा
Sentence: 9    मै॒त्रियोपै॑ति
Sentence: 10    शान्त्यै
Sentence: 11    दे॒वस्त्वा॑ सवि॒तोद्व॑प॒त्वित्या॑ह
Sentence: 12    सवि॒तृप्र॑सूत एवैना॒म्ब्रह्म॑णा दे॒वता॑भि॒रुद्व॑पति ।
Sentence: 13    अप॑द्यमाना पृथि॒व्याशा॒ दिश॒ आ पृ॑ण ।।

Verse: 4 
Sentence: 1    इत्या॑ह
Sentence: 2    तस्मा॑द॒ग्निः सर्वा॒ दिशो ऽनु॒ वि भा॑ति ।
Sentence: 3    उत्ति॑ष्ठ बृह॒ती भ॑वो॒र्ध्वा ति॑ष्ठ ध्रु॒वा त्वमित्या॑ह
Sentence: 4    प्रति॑ष्ठित्यै ।
Sentence: 5    अ॑सु॒र्य॒म्पात्र॒मना॑छृण्णम्
Sentence: 6    आ छृ॑णत्ति देव॒त्राक॑र्
Sentence: 7    अजक्षी॒रेणा छृ॑णत्ति
Sentence: 8    पर॒मं वा ए॒तत्पयो॒ यद॑जक्षी॒रम्
Sentence: 9    पर॒मेणैवैन॒म्पय॒सा छृ॑णत्ति
Sentence: 10    यजु॑षा
Sentence: 11    व्यावृ॑त्त्यै
Sentence: 12    छन्दो॑भि॒रा छृ॑णत्ति
Sentence: 13    छन्दो॑भि॒र्वा ए॒षा क्रि॑यते
Sentence: 14    छन्दो॑भिरे॒व छन्दां॒स्या छृ॑णत्ति ।।

Paragraph: 8 
Verse: 1 
Sentence: 1    एक॑विंशत्या॒ माषैः॑ पुरुषशी॒र्षमछै॑ति ।
Sentence: 2    अ॑मे॒ध्या वै॒ माषा॑ अमे॒ध्यम्पु॑रुषशी॒र्षम्
Sentence: 3    अमेध्यैरे॒वास्या॑मे॒ध्यं नि॑रव॒दाय॒ मेध्यं॑ कृ॒त्वा ह॑रति ।
Sentence: 4    एक॑विंशतिर्भवन्ति ।
Sentence: 5    ए॑कविं॒शो वै॒ पुरु॑षः
Sentence: 6    पुरु॑ष॒स्याप्त्यै
Sentence: 7    व्यृ॑द्धं॒ वा ए॒तत्प्राणैरमे॒ध्यं यत्पु॑रुषशी॒र्षम् ।
Sentence: 8    स॑प्त॒धा वितृ॑ण्णां वल्मीकव॒पाम्प्रति॒ नि द॑धाति
Sentence: 9    स॒प्त वै॑ शीर्ष॒ण्याः॑ प्रा॒णाः
Sentence: 10    प्राणैरेवैन॒त्सम॑र्धयति
Sentence: 11    मेध्य॒त्वाय
Sentence: 12    याव॑न्तः ।।

Verse: 2 
Sentence: 1    वै॑ मृ॒त्युब॑न्धव॒स्तेषां॑ य॒म आधि॑पत्य॒म्परी॑याय
Sentence: 2    यमगा॒थाभिः॒ परि॑ गायति
Sentence: 3    य॒मादेवैनद्वृङ्क्ते
Sentence: 4    ति॒सृभिः॒ परि॑ गायति
Sentence: 5    त्रय॑ इ॒मे लो॒कास् ।
Sentence: 6    ए॒भ्य एवैनल्लो॒केभ्यो॑ वृङ्क्ते
Sentence: 7    तस्मा॒द्गाय॑ते॒ न देय॑म् ।
Sentence: 8    गाथा॒ हि तद्वृ॒ङ्क्ते ।
Sentence: 9    अ॒ग्निभ्यः॑ प॒शूना ल॑भते
Sentence: 10    कामा॒ वा अ॒ग्नयः
Sentence: 11    कामा॑ने॒वाव॑ रुन्द्धे
Sentence: 12    यत्प॒शून्नालभे॒तान॑वरुद्धा अस्य ।।

Verse: 3 
Sentence: 1    प॒शवः॑ स्युस् ।
Sentence: 2    यत्पर्य॑ग्निकृतानुत्सृ॒जेद्य॑ज्ञवेश॒सं कु॑र्यात् ।
Sentence: 3    यत्सं॑स्था॒पये॑द्या॒तया॑मानि शी॒र्षाणि॑ स्युस् ।
Sentence: 4    यत्प॒शूना॒लभ॑ते॒ तेनै॒व प॒शूनव॑ रुन्द्धे
Sentence: 5    यत्पर्य॑ग्निकृतानुत्सृ॒जति॑ शी॒र्ष्णामया॑तयामत्वाय
Sentence: 6    प्राजाप॒त्येन॒ सं स्था॑पयति य॒ज्ञो वै॑ प्र॒जाप॑तिर्य॒ज्ञ ए॒व य॒ज्ञम्प्रति॑ ष्ठापयति
Sentence: 7    प्र॒जाप॑तिः प्र॒जा अ॑सृजत
Sentence: 8    स रि॑रिचा॒नो॑ ऽमन्यत
Sentence: 9    स ए॑ता आ॒प्रीर॑पश्यत्
Sentence: 10    ताभिर्वै॒ स मु॑ख॒तः ।।

Verse: 4 
Sentence: 1    आ॒त्मान॒माप्री॑णीत
Sentence: 2    यदे॒ता आ॒प्रियो॒ भव॑न्ति
Sentence: 3    य॒ज्ञो वै॑ प्र॒जाप॑तिस् ।
Sentence: 4    य॒ज्ञमेवै॒ताभि॑र्मुख॒त आ प्री॑णाति ।
Sentence: 5    अप॑रिमितछन्दसो भवन्ति ।
Sentence: 6    अप॑रिमितः प्र॒जाप॑तिः
Sentence: 7    प्र॒जाप॑ते॒राप्त्यै॑ ।
Sentence: 8    ऊ॑नातिरि॒क्ता मि॑थु॒नाः
Sentence: 9    प्रजा॑त्यै
Sentence: 10    लोम॒शं वै॒ नामै॒तच्छन्दः॑ प्र॒जाप॑तेः
Sentence: 11    प॒शवो॑ लोम॒शाः
Sentence: 12    प॒शूने॒वाव॑ रुन्द्धे
Sentence: 13    सर्वा॑णि॒ वा ए॒ता रू॒पाणि
Sentence: 14    सर्वा॑णि रू॒पाण्यग्नौ॒ चित्ये॑ क्रियन्ते
Sentence: 15    तस्मा॑दे॒ता अ॒ग्नेश्चित्य॑स्य ।।

Verse: 5 
Sentence: 1    भ॑वन्ति ।
Sentence: 2    एक॑विंशतिं सामिधे॒नीरन्वा॑ह
Sentence: 3    रुग्वा ए॑कविं॒शो रुच॑मे॒व ग॑छति ।
Sentence: 4    अथो॑ प्रति॒ष्ठामे॒व प्र॑ति॒ष्ठा ह्ये॑कविं॒शस् ।
Sentence: 5    चतु॑र्विंशति॒मन्वा॑ह
Sentence: 6    चतु॑र्विंशतिरर्धमा॒साः सं॑वत्स॒रः
Sentence: 7    सं॑वत्स॒रो॒ ऽग्निर्वै॑श्वान॒रः
Sentence: 8    सा॒क्षादे॒व वै॑श्वान॒रमव॑ रुन्द्धे
Sentence: 9    परा॑ची॒रन्वा॑ह
Sentence: 10    परा॑ङिव॒ हि सु॑व॒र्गो लो॒कः
Sentence: 11    समा॑स्त्वाग्न ऋ॒तवो॑ वर्धय॒न्त्वित्या॑ह
Sentence: 12    समा॑भिरे॒वाग्निं व॑र्धयति ।।

Verse: 6 
Sentence: 1    ऋ॒तुभिः॑ संवत्स॒रम् ।
Sentence: 2    विश्वा॒ आ भा॑हि प्र॒दिशः॑ पृथि॒व्या इत्या॑ह
Sentence: 3    तस्मा॑द॒ग्निः सर्वा॒ दिशो ऽनु॒ वि भा॑ति
Sentence: 4    प्रत्औ॑हताम॒श्विना॑ मृ॒त्युम॑स्मा॒दित्या॑ह
Sentence: 5    मृ॒त्युमे॒वास्मा॒दप॑ नुदति ।
Sentence: 6    उद्व॒यं तम॑स॒स्परीत्या॑ह
Sentence: 7    पा॒प्मा वै॒ तमः
Sentence: 8    पा॒प्मान॑मे॒वास्मा॒दप॑ हन्ति ।
Sentence: 9    अग॑न्म॒ ज्योति॑रुत्त॒ममित्या॑ह ।
Sentence: 10    असौ॒ वा आ॑दि॒त्यो ज्योति॑रुत्त॒मम्
Sentence: 11    आदि॒त्यस्यै॒व सायु॑ज्यं गछति
Sentence: 12    न सं॑वत्स॒रस्ति॑ष्ठति॒ नास्य॒ श्रीस्ति॑ष्ठति॒ यस्यै॒ताः क्रि॒यन्ते
Sentence: 13    ज्योति॑ष्मतीमुत्त॒मामन्वा॑ह
Sentence: 14    ज्योति॑रे॒वास्मा॑ उ॒परि॑ष्टाद्दधाति
Sentence: 15    सुव॒र्गस्य॑ लो॒कस्यानु॑ख्यात्यै ।।

Paragraph: 9 
Verse: 1 
Sentence: 1    ष॒ड्भिर्दी॑क्षयति
Sentence: 2    षड्वा ऋ॒तव॑स् ।
Sentence: 3    ऋ॒तुभि॑रेवैनं दीक्षयति
Sentence: 4    स॒प्तभि॑र्दीक्षयति
Sentence: 5    स॒प्त छन्दां॑सि
Sentence: 6    छन्दो॑भिरेवैनं दीक्षयति
Sentence: 7    विश्वे॑ दे॒वस्य॑ ने॒तुरित्य॑नु॒ष्टुभो॑त्त॒मया॑ जुहोति
Sentence: 8    वाग्वा अनु॒ष्टुप्^नु॒ष्टुभ्
Sentence: 9    तस्मा॑त्प्रा॒णानां॒ वागु॑त्त॒मा ।
Sentence: 10    एक॑स्माद॒क्षरा॒दना॑प्तम्प्रथ॒मम्प॒दम् ।
Sentence: 11    तस्मा॒द्यद्वा॒चो ऽना॑प्तं॒ तन्म॑नु॒ष्या॒ उप॑ जीवन्ति
Sentence: 12    पू॒र्णया॑ जुहोति
Sentence: 13    पू॒र्ण इ॑व॒ हि प्र॒जाप॑तिः ।।

Verse: 2 
Sentence: 1    प्र॒जाप॑ते॒राप॑त्यै
Sentence: 2    न्यू॑नया जुहोति
Sentence: 3    न्यू॑ना॒द्धि प्र॒जाप॑तिः प्र॒जा असृ॑जत
Sentence: 4    प्र॒जानां॒ सृष्ट्यै
Sentence: 5    यद॒र्चिषि॑ प्रवृ॒ञ्ज्याद्भू॒तमव॑ रुन्धीत
Sentence: 6    यदङ्गा॑रेषु भवि॒ष्यत् ।
Sentence: 7    अङ्गा॑रेषु॒ प्र वृ॑णक्ति
Sentence: 8    भवि॒ष्यदे॒वाव॑ रुन्द्धे
Sentence: 9    भवि॒ष्यद्धि भूयो॑ भू॒तात् ।
Sentence: 10    द्वाभ्या॒म्प्र वृ॑णक्ति
Sentence: 11    द्वि॒पाद्यज॑मानः
Sentence: 12    प्रति॑ष्ठित्यै
Sentence: 13    ब्रह्म॑णा॒ वा ए॒षा यजु॑षा॒ सम्भृ॑ता॒ यदु॒खा
Sentence: 14    सा यद्भिद्ये॒तार्ति॒मार्छे॑त् ।।

Verse: 3 
Sentence: 1    यज॑मानो ह॒न्येता॑स्य य॒ज्ञस् ।
Sentence: 2    मित्रै॒तामु॒खां त॒पेत्या॑ह
Sentence: 3    ब्रह्म वै मि॒त्रस् ।
Sentence: 4    ब्रह्म॑न्नेवैना॒म्प्रति॑ ष्ठापयति
Sentence: 5    नार्ति॒मार्छ॑ति॒ यज॑मानो॒ नास्य॑ य॒ज्ञो ह॑न्यते
Sentence: 6    यदि॒ भिद्ये॑त तैरे॒व क॒पालैः॒ सं सृ॑जेत्
Sentence: 7    सै॒व ततः॒ प्राय॑श्चित्तिस् ।
Sentence: 8    यो ग॒तश्रीः॒ स्यान्म॑थि॒त्वा तस्याव॑ दध्यात् ।
Sentence: 9    भू॒तो वा ए॒ष^ ए॒षस्
Sentence: 10    स स्वां ।।

Verse: 4 
Sentence: 1    दे॒वता॒मुपै॑ति॒ यो भूति॑कामः॒ स्यात् ।
Sentence: 2    य उ॒खायै॑ स॒म्भवे॒त्स ए॒व तस्य॑ स्यात् ।
Sentence: 3    अतो॒ ह्ये॒ष स॒म्भव॑ति ।
Sentence: 4    ए॒ष वै॑ स्वय॒म्भूर्नाम
Sentence: 5    भव॑त्ये॒व
Sentence: 6    यं का॒मये॑त
Sentence: 7    भ्रातृ॑व्यमस्मै जनयेय॒मित्य॒न्यत॒स्तस्या॒हृत्याव॑ दध्यात्
Sentence: 8    सा॒क्षादे॒वास्मै॒ भ्रातृ॑व्यं जनयति ।
Sentence: 9    अ॑म्ब॒रीषा॒दन्न॑काम॒स्याव॑ दध्यात् ।
Sentence: 10    अ॑म्ब॒रीषे॒ वा अन्न॑म्भ्रियते
Sentence: 11    सयो॑न्ये॒वान्न॑म् ।।

Verse: 5 
Sentence: 1    अव॑ रुन्द्धे
Sentence: 2    मुञ्जा॒नव॑ दधाति ।
Sentence: 3    ऊर्ग्वै॒ मुञ्जा॑स् ।
Sentence: 4    ऊर्ज॑मे॒वास्मा॒ अपि॑ दधाति ।
Sentence: 5    अ॒ग्निर्दे॒वेभ्यो॒ निला॑यत
Sentence: 6    स क्रु॑मु॒कम्प्रावि॑शत्
Sentence: 7    क्रुमु॒कमव॑ दधाति
Sentence: 8    यदे॒वास्य॒ तत्र॒ न्य॑क्तं॒ तदे॒वाव॑ रुन्द्धे ।
Sentence: 9    आज्ये॑न॒ सं यौ॑ति ।
Sentence: 10    ए॒तद्वा अ॒ग्नेः प्रि॒यं धाम॒ यदाज्य॑म्
Sentence: 11    प्रि॒येणैवैनं॒ धाम्ना॒ सम॑र्धय॒त्यथो॒ तेज॑सा ।।

Verse: 6 
Sentence: 1    वै॑कंकरी॒मा द॑धाति
Sentence: 2    भा ए॒वाव॑ रुन्द्धे
Sentence: 3    शमी॒मयी॒मा द॑धाति
Sentence: 4    शान्त्यै
Sentence: 5    सीद॒ त्वम्मा॒तुर॒स्या उ॒पस्थ॒ इति॑ ति॒सृभि॑र्जा॒तमुप॑ तिष्ठते
Sentence: 6    त्रय॑ इ॒मे लो॒कास् ।
Sentence: 7    ए॒ष्वे॒व लो॒केष्वा॒विदं॑ गछति ।
Sentence: 8    अथो॑ प्रा॒णाने॒वात्मन्ध॑त्ते ।।

Paragraph: 10 
Verse: 1 
Sentence: 1    न ह॑ स्म वै पु॒राग्निरप॑रशुवृक्णं दहति
Sentence: 2    तद॑स्मै प्रयो॒ग ए॒वर्षि॑रस्वदयत् ।
Sentence: 3    यद॑ग्ने॒ यानि॒ कानि॒ चेति॑ स॒मिध॒मा द॑धाति ।
Sentence: 4    अप॑रशुवृक्णमे॒वास्मै॑ स्वदयति
Sentence: 5    सर्व॑मस्मै स्वदते॒ य ए॒वं वेद॑ ।
Sentence: 6    अौ॑दुम्बरी॒मा द॑धाति ।
Sentence: 7    ऊर्ग्वा उ॑दु॒म्बर॑स् ।
Sentence: 8    ऊर्ज॑मे॒वास्मा॒ अपि॑ दधाति
Sentence: 9    प्र॒जाप॑तिर॒ग्निम॑सृजत
Sentence: 10    तं सृ॒ष्टं रक्षां॑सि ।।

Verse: 2 
Sentence: 1    अ॑जिघांसन् ।
Sentence: 2    स ए॒तद्रा॑क्षो॒घ्नम॑पश्यत्
Sentence: 3    तेन वै॒ स रक्षां॒स्यपा॑हत
Sentence: 4    यद्रा॑क्षो॒घ्नम्भव॑त्य॒ग्नेरे॒व तेन॑ जा॒ताद्रक्षां॒स्यप॑ हन्ति ।
Sentence: 5    आश्व॑त्थी॒मा द॑धाति ।
Sentence: 6    अ॑श्व॒त्थो वै॒ वन॒स्पती॑नां सपत्नसा॒हो विजि॑त्यै
Sentence: 7    वैकङ्कती॒मा द॑धाति
Sentence: 8    भा ए॒वाव॑ रुन्द्धे
Sentence: 9    शमी॒मयी॒मा द॑धाति
Sentence: 10    शान्त्यै
Sentence: 11    संशि॑तम्मे॒ ब्रह्मोदे॑षाम्बा॒हू अ॑तिर॒मित्यु॑त्त॒मे औ॑दुम्बरी ।।

Verse: 3 
Sentence: 1    वा॑चयति
Sentence: 2    ब्रह्म॑णै॒व क्ष॒त्रं सं श॑यति क्ष॒त्रेण॒ ब्रह्म
Sentence: 3    तस्मा॑द्ब्राह्म॒णो रा॑ज॒न्य॑वा॒नत्य॒न्यम्ब्रा॑ह्म॒णं तस्मा॑द्राज॒न्यो॑ ब्राह्म॒णवा॒नत्य॒न्यं रा॑ज॒न्य॑म्
Sentence: 4    मृ॒त्युर्वा ए॒ष यद॒ग्निस् ।
Sentence: 5    अ॒मृतं॒ हिर॑ण्यम् ।
Sentence: 6    रु॒क्ममन्त॑र॒म्प्रति॑ मुञ्चते ।
Sentence: 7    अ॒मृत॑मे॒व मृ॒त्योर॒न्तर्ध॑त्ते ।
Sentence: 8    एक॑विंशतिनिर्बाधो भवति ।
Sentence: 9    एक॑विंशतिर्वै देवलो॒का द्वाद॑श॒ मासाः॒ पञ्च॒र्तव॒स्त्रय॑ इ॒मे लो॒का अ॒सावा॑दि॒त्यः ।।

Verse: 4 
Sentence: 1    ए॑कविं॒श ए॒ताव॑न्तो वै देवलो॒कास्
Sentence: 2    तेभ्य॑ ए॒व भ्रातृ॑व्यम॒न्तरे॑ति
Sentence: 3    निर्बाधैर्वै दे॒वा असु॑रान्निर्बा॒धे॑ ऽकुर्वत
Sentence: 4    तन्नि॑र्बा॒धानां॑ निर्बाध॒त्वम् ।
Sentence: 5    नि॑र्बा॒धी भ॑वति
Sentence: 6    भ्रातृ॑व्याने॒व नि॑र्बा॒धे कु॑रुते
Sentence: 7    सावित्रि॒या प्रति॑ मुञ्चते
Sentence: 8    प्रसू॑त्यै
Sentence: 9    नक्तो॒षासेत्युत्त॑रया ।
Sentence: 10    अ॑होरा॒त्राभ्या॑मेवैन॒मुद्य॑छते
Sentence: 11    दे॒वा अ॒ग्निं धा॑रयन्द्रविणो॒दा इत्या॑ह
Sentence: 12    प्रा॒णा वै॑ दे॒वा द्र॑विणो॒दास् ।
Sentence: 13    अ॑होरा॒त्राभ्या॑मेवैनमु॒द्यत्य॑ ।।

Verse: 5 
Sentence: 1    प्राणैर्दाधार ।
Sentence: 2    आसी॑नः॒ प्रति॑ मुञ्चते
Sentence: 3    तस्मा॒दासी॑नाः प्र॒जाः प्र जा॑यन्ते
Sentence: 4    कृष्णाजि॒नमुत्त॑रम् ।
Sentence: 5    तेजो वै॒ हिर॑ण्य॒म्ब्रह्म॑ कृष्णाजि॒नम् ।
Sentence: 6    तेज॑सा चैवैन॒म्ब्रह्म॑णा चोभ॒यतः॒ परि॑ गृह्णाति
Sentence: 7    षडु॑द्यामं शि॒क्य॑म्भवति
Sentence: 8    षड्वा ऋ॒तव॑स् ।
Sentence: 9    ऋ॑तुभिरेवैन॒मुद्य॑छते
Sentence: 10    यद्द्वाद॑शोद्यामं संवत्स॒रेणै॒व
Sentence: 11    मौ॒ञ्जम्भ॑वति ।
Sentence: 12    ऊर्ग्वै॒ मुञ्जा॑स् ।
Sentence: 13    ऊर्जैवैनं॒ सम॑र्धयति
Sentence: 14    सुप॒र्णो॑ ऽसि ग॒रुत्मा॒नित्यवे॑क्षते
Sentence: 15    रू॒पमे॒वास्यै॒तन्म॑हि॒मानं॒ व्याच॑ष्टे
Sentence: 16    दिवं॑ गछ॒ सुवः॑ प॒तेत्या॑ह
Sentence: 17    सुव॒र्गमेवैनं लो॒कं ग॑मयति ।।

Paragraph: 11 
Verse: 1 
Sentence: 1=a    समि॑द्धो अ॒ञ्जन्कृद॑रम्मती॒नां घृ॒तम॑ग्ने॒ मधु॑म॒त्पिन्व॑मानः । वा॒जी वह॑न्वा॒जिनं॑ जातवेदो दे॒वानां॑ वक्षि पि॒र्यमा स॒धस्थ॑म् ।।
Sentence: 2=b    घृ॒तेना॒ञ्जन्त्सम्प॒थो दे॑व॒याना॑न्प्रजा॒नन्वा॒ज्यप्ये॑तु दे॒वान् । अनु॑ त्वा सप्ते प्र॒दिशः॑ सचन्तां स्व॒धामस्मै॒ यज॑मानाय धेहि ।।
Sentence: 3=c    ईड्य॒श्चासि॒ वन्द्य॑श्च वाजिन्ना॒शुश्चासि॒ मेध्य॑श्च सप्ते । अ॒ग्निष्ट्वा॑ ।।

Verse: 2 
Sentence: 1    देवै॒र्वसु॑भिः स॒जोषाः॑ प्री॒तं वह्निं॑ वहतु जा॒तवे॑दाः ।।
Sentence: 2=d    स्ती॒र्णम्ब॒र्हिः सु॒ष्टरी॑मा जुषा॒णोरु पृ॒थु प्रथ॑मानम्पृथि॒व्याम् । दे॒वेभि॑र्यु॒क्तमदि॑तिः स॒जोषाः॑ स्यो॒नं कृ॑ण्वा॒ना सु॑वि॒ते द॑धातु ।।
Sentence: 3=e    ए॒ता उ॑ वः सु॒भगा॑ वि॒श्वरू॑पा॒ वि पक्षो॑भिः॒ श्रय॑माणा॒ उदातैः॑ । ऋ॒ष्वाः स॒तीः क॒वषः॒ शुम्भ॑माना॒ द्वारो॑ दे॒वीः सु॑प्राय॒णा भ॑वन्तु ।।
Sentence: 4=f    अ॑न्त॒रा मि॒त्रावरु॑णा॒ चर॑न्ती॒ मुखं॑ य॒ज्ञाना॑म॒भि सं॑विदा॒ने । उ॒षासा॑ वाम् ।।

Verse: 3 
Sentence: 1    सु॑हिर॒ण्ये सु॑शि॒ल्पे ऋ॒तस्य॒ योना॑वि॒ह सा॑दयामि ।।
Sentence: 2=g    प्र॑थ॒मा वां॑ सर॒थिना॑ सु॒वर्णा॑ देवौ॒ पश्य॑न्तौ॒ भुव॑नानि॒ विश्वा॑ । अपि॑प्रयं॒ चोद॑ना वा॒म्मिमा॑ना॒ होता॑रा॒ ज्योतिः॑ प्र॒दिशा॑ दि॒शन्ता॑ ।।
Sentence: 3=h    आ॑दित्यैर्नो॒ भार॑ती वष्टु य॒ज्ञं सर॑स्वती स॒ह रुद्रैर्न आवीत् । इडोप॑हूता॒ वसु॑भिः स॒जोषा॑ य॒ज्ञं नो॑ देवीर॒मृते॑षु धत्त ।।
Sentence: 4=i    त्वष्टा॑ वी॒रं दे॒वका॑मं जजान॒ त्वष्टु॒रर्वा॑ जायत आ॒शुरश्वः॑ ।।

Verse: 4 
Sentence: 1    त्वष्टे॒दं विश्व॒म्भुव॑नं जजान ब॒होः क॒र्तार॑मि॒ह य॑क्षि होतः ।।
Sentence: 2=k    अश्वो॑ घृ॒तेन॒ त्मन्या॒ सम॑क्त॒ उप॑ दे॒वां ऋ॑तु॒शः पाथ॑ एतु । वन॒स्पति॑र्देवलो॒कम्प्र॑जा॒नन्न॒ग्निना॑ ह॒व्या स्व॑दि॒तानि॑ वक्षत् ।।
Sentence: 3=l    प्र॒जाप॑ते॒स्तप॑सा वावृधा॒नः स॒द्यो जा॒तो द॑धिषे य॒ज्ञम॑ग्ने । स्वाहा॑कृतेन ह॒विषा॑ पुरोगा या॒हि सा॒ध्या ह॒विर॑दन्तु दे॒वाः ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.