TITUS
Black Yajur-Veda: Taittiriya-Samhita
Part No. 32
Previous part

Chapter: 4 
Paragraph: 1 
Verse: 1 
Sentence: 1    दे॑वासु॒राः संय॑त्ता आसन्
Sentence: 2    ते न व्य॑जयन्त
Sentence: 3    स ए॒ता इन्द्र॑स्त॒नूर॑पश्यत्
Sentence: 4    ता उपा॑धत्त
Sentence: 5    ताभिर्वै॒ स त॒नुव॑मिन्द्रि॒यं वी॒र्य॑मा॒त्मन्न॑धत्त
Sentence: 6    ततो॑ दे॒वा अभ॑व॒न्परा॑सुरास् ।
Sentence: 7    यदि॑न्द्रत॒नूरु॑प॒दधा॑ति त॒नुव॑मे॒व ताभि॑रिन्द्रि॒यं वी॒र्यं॒ यज॑मान आ॒त्मन्ध॑त्ते ।
Sentence: 8    अथो॒ सेन्द्र॑मे॒वाग्निं सत॑नुं चिनुते
Sentence: 9    भव॑त्या॒त्मना॒ परा॑स्य॒ भ्रातृ॑व्यः ।।

Verse: 2 
Sentence: 1    भ॑वति
Sentence: 2    य॒ज्ञो दे॒वेभ्यो ऽपा॑क्रामत्
Sentence: 3    तम॑व॒रुधं॒ नाश॑क्नुवन्
Sentence: 4    त ए॒ता य॑ज्ञत॒नूर॑पश्यन्
Sentence: 5    ता उपा॑दधत
Sentence: 6    ताभिर्वै॒ ते य॒ज्ञमवा॑रुन्धत
Sentence: 7    यद्य॑ज्ञत॒नूरु॑प॒दधा॑ति य॒ज्ञमे॒व ताभि॒र्यज॑मा॒नो ऽव॑ रुन्द्धे
Sentence: 8    त्रय॑स्त्रिंशत॒मुप॑ दधाति
Sentence: 9    त्रय॑स्त्रिंशद्वै दे॒वता॑स् ।
Sentence: 10    दे॒वता॑ ए॒वाव॑ रुन्द्धे ।
Sentence: 11    अथो॒ सात्मा॑नमे॒वाग्निं सत॑नुं चिनुते
Sentence: 12    सात्मा॒मुष्मिँ॑ लो॒के ।।

Verse: 3 
Sentence: 1    भ॑वति॒ य ए॒वं वेद
Sentence: 2    ज्योति॑ष्मती॒रुप॑ दधाति
Sentence: 3    ज्योति॑रे॒वास्मि॑न्दधाति ।
Sentence: 4    ए॒ताभि॒र्वा अ॒ग्निश्चि॒तो ज्व॑लति
Sentence: 5    ताभि॑रेवैनं॒ समि॑न्द्धे ।
Sentence: 6    उ॒भयो॑रस्मै लो॒कयो॒र्ज्योति॑र्भवति
Sentence: 7    नक्षत्रेष्ट॒का उप॑ दधाति ।
Sentence: 8    ए॒तानि वै दि॒वो ज्योतीं॑षि
Sentence: 9    तान्ये॒वाव॑ रुन्द्धे
Sentence: 10    सु॒कृतां॒ वा ए॒तानि॒ ज्योतीं॑षि॒ यन्नक्ष॑त्राणि
Sentence: 11    तान्ये॒वाप्नो॑ति ।
Sentence: 12    अथो॑ अनूका॒शमेवै॒तानि॑ ।।

Verse: 4 
Sentence: 1    ज्योतीं॑षि कुरुते सुव॒र्गस्य॑ लो॒कस्यानु॑ख्यात्यै
Sentence: 2    यत्संस्पृ॑ष्टा उपद॒ध्याद्वृष्ट्यै॑ लो॒कमपि॑ दध्या॒दव॑र्षुकः प॒र्जन्यः॑ स्यात् ।
Sentence: 3    असं॑स्पृष्टा॒ उप॑ दधाति॒ वृष्ट्या॑ ए॒व लो॒कं क॑रोति॒ वर्षु॑कः प॒र्जन्यो॑ भवति
Sentence: 4    पु॒रस्ता॑द॒न्याः प्र॒तीची॒रुप॑ दधाति प॒श्चाद॒न्याः प्राची॑स्
Sentence: 5    तस्मा॑त्प्रा॒चीना॑नि च प्रती॒चीना॑नि च॒ नक्ष॑त्रा॒ण्या व॑र्तन्ते ।।

Paragraph: 2 
Verse: 1 
Sentence: 1    ऋ॑त॒व्या॒ उप॑ दधाति ।
Sentence: 2    ऋ॑तू॒नां कॢप्त्यै
Sentence: 3    द्वं॒द्वमुप॑ दधाति
Sentence: 4    तस्मा॑द्द्वं॒द्वमृ॒तव॑स् ।
Sentence: 5    अधृ॑तेव॒ वा ए॒षा यन्म॑ध्य॒मा चिति॑स् ।
Sentence: 6    अ॒न्तरि॑क्षमिव॒ वा ए॒षा
Sentence: 7    द्वं॒द्वम॒न्यासु॒ चिती॒षूप॑ दधाति॒ चत॑स्रो॒ मध्ये॒ धृत्यै॑ ।
Sentence: 8    अ॑न्तः॒श्लेष॑णं॒ वा ए॒ताश्चिती॑नां॒ यदृ॑त॒व्या॑स् ।
Sentence: 9    यदृ॑त॒व्या॑ उप॒दधा॑ति चितीनां॒ विधृ॑त्यै ।
Sentence: 10    अव॑का॒मनूप॑ दधाति ।
Sentence: 11    ए॒षा वा अ॒ग्नेर्योनिः
Sentence: 12    सयो॑निम् ।।

Verse: 2 
Sentence: 1    ए॒वाग्निं चि॑नुते ।
Sentence: 2    उ॒वाच॑ ह वि॒श्वामि॒त्रस् ।
Sentence: 3    अद॒दित्स ब्रह्म॒णान्नं॒ यस्यै॒ता उ॑पधी॒यान्तै॒ य उ॑ चैना ए॒वं वेद॒दिति
Sentence: 4    संवत्स॒रो वा ए॒तम्प्र॑ति॒ष्ठायै॑ नुदते॒ यो॒ ऽग्निं चि॒त्वा न प्र॑ति॒तिष्ठ॑ति
Sentence: 5    पञ्च॒ पूर्वा॒श्चित॑यो भव॒न्त्यथ॑ ष॒ष्ठीं चितिं॑ चिनुते
Sentence: 6    षड्वा ऋ॒तवः॑ संवत्स॒रस् ।
Sentence: 7    ऋ॒तुष्वे॒व सं॑वत्स॒रे प्रति॑ तिष्ठति ।
Sentence: 8    ए॒ता वै॑ ।।

Verse: 3 
Sentence: 1    अधि॑पत्नी॒र्नामेष्ट॑कास् ।
Sentence: 2    यस्यै॒ता उ॑पधी॒यन्ते ऽधि॑पतिरे॒व स॑मा॒नाना॑म्भवति
Sentence: 3    यं द्वि॒ष्यात्तमु॑प॒दध॑द्ध्यायेत् ।
Sentence: 4    ए॒ताभ्य॑ एवैनं दे॒वता॑भ्य॒ आ वृ॑श्चति
Sentence: 5    आर्ति॒मार्छ॑ति ।
Sentence: 6    अङ्गि॑रसः सुव॒र्गं लो॒कं यन्तो॒ या य॒ज्ञस्य॒ निष्कृ॑ति॒रासी॒त्तामृषि॑भ्यः॒ प्रत्औ॑हन्
Sentence: 7    तद्धिर॑ण्यमभवत् ।
Sentence: 8    यद्धि॑रण्यशल्कैः प्रो॒क्षति॑ य॒ज्ञस्य॒ निष्कृ॑त्यै ।
Sentence: 9    अथो॑ भेष॒जमे॒वास्मै॑ करोति ।।

Verse: 4 
Sentence: 1    अथो॑ रू॒पेणैवैनं॒ सम॑र्धयति ।
Sentence: 2    अथो॒ हिर॑ण्यज्योतिषै॒व सु॑व॒र्गं लो॒कमे॑ति
Sentence: 3    साह॒स्रव॑ता॒ प्रोक्ष॑ति
Sentence: 4    साह॒स्रः प्र॒जाप॑तिः
Sentence: 5    प्र॒जाप॑ते॒राप्त्यै॑ ।
Sentence: 6    इ॒मा मे॑ अग्न॒ इष्ट॑का धे॒नवः॑ स॒न्त्वित्या॑ह ।
Sentence: 7    धे॒नूरेवैनाः कुरुते
Sentence: 8    ता ए॑नं काम॒दुघा॑ अ॒मुत्रा॒मुष्मिँ॑ लो॒क उप॑ तिष्ठन्ते ।।

Paragraph: 3 
Verse: 1 
Sentence: 1    रु॒द्रो वा ए॒ष यद॒ग्निः
Sentence: 2    स ए॒तर्हि॑ जा॒तो यर्हि॒ सर्व॑श्चि॒तः
Sentence: 3    स यथा॑ व॒त्सो जा॒त स्तन॑म्प्रे॒प्सत्ये॒वं वा ए॒ष ए॒तर्हि॑ भाग॒धेय॒म्प्रेप्स॑ति
Sentence: 4    तस्मै॒ यदाहु॑तिं॒ न जु॑हु॒याद॑ध्व॒र्युं च॒ यज॑मानं च ध्यायेत् ।
Sentence: 5    श॑तरु॒द्रीयं॑ जुहोति
Sentence: 6    भाग॒धेये॑नैवैनं शमयति
Sentence: 7    नार्ति॒मार्छ॑त्यध्व॒र्युर्न यज॑मानस् ।
Sentence: 8    यद्ग्रा॒म्याणा॑म्पशू॒नाम् ।।

Verse: 2 
Sentence: 1    पय॑सा जुहु॒याद्ग्रा॒म्यान्प॒शूञ्छु॒चार्प॑येत् ।
Sentence: 2    यदा॑र॒ण्याना॑मार॒ण्यान् ।
Sentence: 3    ज॑र्तिलयवा॒ग्वा॑ वा जुहु॒याद्ग॑वीधुकयवा॒ग्वा॑ वा
Sentence: 4    न ग्रा॒म्यान्प॒शून्हि॒नस्ति॒ नार॒ण्यान्
Sentence: 5    अथो॒ खल्वा॑हुस् ।
Sentence: 6    अना॑हुतिर्वै ज॒र्तिला॑श्च ग॒वीधु॑का॒श्चेति॑ ।
Sentence: 7    अ॑जक्षी॒रेण॑ जुहोति ।
Sentence: 8    आ॑ग्ने॒यी वा ए॒षा यद॒जा ।
Sentence: 9    आहु॑त्यै॒व जु॑होति
Sentence: 10    न ग्रा॒म्यान्प॒शून्हि॒नस्ति॒ नार॒ण्यान्
Sentence: 11    अङ्गि॑रसः सुव॒र्गं लो॒कं यन्तः॑ ।।

Verse: 3 
Sentence: 1    अ॒जायां॑ घ॒र्मम्प्रासि॑ञ्चन् ।
Sentence: 2    सा शोच॑न्ती प॒र्णम्परा॑जिहीत
Sentence: 3    सो॒ ऽर्को॑ ऽभवत्
Sentence: 4    तद॒र्कस्या॑र्क॒त्वम्
Sentence: 5    अर्कप॒र्णेन॑ जुहोति सयोनि॒त्वाय॑ ।
Sentence: 6    उद॒ङ्तिष्ठ॑ञ्जुहोति ।
Sentence: 7    ए॒षा वै॑ रु॒द्रस्य दिक्^दिश्
Sentence: 8    स्वाया॑मे॒व दि॒शि रु॒द्रं नि॒रव॑दयते
Sentence: 9    चर॒माया॒मिष्ट॑कायां जुहोति ।
Sentence: 10    अ॑न्त॒त ए॒व रु॒द्रं नि॒रव॑दयते
Sentence: 11    त्रे॒धावि॑भ॒क्तं जु॑होति
Sentence: 12    त्रय॑ इ॒मे लो॒कास् ।
Sentence: 13    इ॒माने॒व लो॒कान्त्स॒माव॑द्वीर्यान्करोति ।
Sentence: 14    इय॒त्यग्रे॑ जुहोति ।।

Verse: 4 
Sentence: 1    अथेय॒त्यथेय॑ति
Sentence: 2    त्रय॑ इ॒मे लो॒कास् ।
Sentence: 3    ए॒भ्य एवैनं लो॒केभ्यः॑ शमयति
Sentence: 4    ति॒स्र उत्त॑रा॒ आहु॑तीर्जुहोति
Sentence: 5    षट्सम्प॑द्यन्ते
Sentence: 6    षड्वा ऋ॒तव॑स् ।
Sentence: 7    ऋ॒तुभि॑रेवै॒नं श॑मयति
Sentence: 8    यद॑नुपरि॒क्रामं॑ जुहु॒याद॑न्तरवचा॒रिणं॑ रु॒द्रं कु॑र्यात् ।
Sentence: 9    अथो॒ खल्वा॑हुः
Sentence: 10    कस्यां॒ वाह॑ दि॒शि रु॒द्रः कस्यां॒ वेति॑ ।
Sentence: 11    अ॑नुपरि॒क्राम॑मे॒व हो॑त॒व्य॑म्
Sentence: 12    अप॑रिवर्गमेवैनं शमयति ।।

Verse: 5 
Sentence: 1    ए॒ता वै॑ दे॒वताः॑ सुव॒र्ग्या॒ या उ॑त्त॒मास्
Sentence: 2    ता यज॑मानं वाचयति
Sentence: 3    ताभि॑रेवैनं सुव॒र्गं लो॒कं ग॑मयति
Sentence: 4    यं द्वि॒ष्यात्तस्य॑ संच॒रे प॑शू॒नां न्य॑स्येत् ।
Sentence: 5    यः प्र॑थ॒मः प॒शुर॑भि॒तिष्ठ॑ति॒ स आर्ति॒मार्छ॑ति ।।

Paragraph: 4 
Verse: 1 
Sentence: 1    अश्म॒न्नूर्ज॒मिति॒ परि॑ षिञ्चति
Sentence: 2    मा॒र्जय॑त्येवैनम्
Sentence: 3    अथो॑ त॒र्पय॑त्ये॒व
Sentence: 4    स ए॑नं तृ॒प्तो ऽक्षु॑ध्य॒न्नशो॑चन्न॒मुष्मिँ॑ लो॒क उप॑ तिष्ठते
Sentence: 5    तृप्य॑ति प्र॒जया॑ प॒शुभि॒र्य ए॒वं वेद
Sentence: 6    तां न॒ इष॒मूर्जं॑ धत्त मरुतः संररा॒णा इत्या॑ह ।
Sentence: 7    अन्नं॒ वा ऊर्ज् ।
Sentence: 8    अन्न॑म्म॒रुत॑स् ।
Sentence: 9    अन्न॑मे॒वाव॑ रुन्द्धे ।
Sentence: 10    अश्मं॑स्ते॒ क्षुध् ।
Sentence: 11    अ॒मुं ते॑ शुक् ।।

Verse: 2 
Sentence: 1    ऋ॑छतु॒ यं द्वि॒ष्म इत्या॑ह
Sentence: 2    यमे॒व द्वेष्टि॒ तम॑स्य क्षु॒धा च॑ शु॒चा चा॑र्पयति
Sentence: 3    त्रिः प॑रिषि॒ञ्चन्पर्ये॑ति
Sentence: 4    त्रि॒वृद्वा अ॒ग्निस् ।
Sentence: 5    यावा॑ने॒वाग्निस्तस्य॒ शुचं॑ शमयति
Sentence: 6    त्रिः पुनः॒ पर्ये॑ति
Sentence: 7    षट्सम्प॑द्यन्ते
Sentence: 8    षड्वा ऋ॒तव॑स् ।
Sentence: 9    ऋ॒तुभि॑रे॒वास्य॒ शुचं॑ शमयति ।
Sentence: 10    अ॒पां वा ए॒तत्पुष्पं॒ यद्वे॑त॒सस् ।
Sentence: 11    अ॒पाम् ।।

Verse: 3 
Sentence: 1    शरो ऽव॑कास् ।
Sentence: 2    वे॑तसशा॒खया॒ चाव॑काभिश्च॒ वि क॑र्षति ।
Sentence: 3    आपो वै शा॒न्ताः
Sentence: 4    शा॒न्ताभि॑रे॒वास्य॒ शुचं॑ शमयति
Sentence: 5    यो वा अ॒ग्निं चि॒तम्प्र॑थ॒मः प॒शुर॑धि॒क्राम॑तीश्व॒रो वै॒ तं शु॒चा प्र॒दह॑स् ।
Sentence: 6    म॒ण्डूके॑न॒ वि क॑र्षति ।
Sentence: 7    ए॒ष वै॑ पशू॒नाम॑नुपजीवनी॒यस् ।
Sentence: 8    न वा ए॒ष ग्रा॒म्येषु॑ प॒शुषु॑ हि॒तो नार॒ण्येषु
Sentence: 9    तमे॒व शु॒चार्प॑यति ।
Sentence: 10    अ॑ष्टा॒भिर्वि क॑र्षति ।।

Verse: 4 
Sentence: 1    अ॒ष्टाक्ष॑रा गाय॒त्री
Sentence: 2    गा॑य॒त्रो॒ ऽग्निस् ।
Sentence: 3    यावा॑ने॒वाग्निर्तस्य॑ शुचं शमयति
Sentence: 4    पाव॒कव॑तीभिस् ।
Sentence: 5    अन्नं वै पाव॒कस् ।
Sentence: 6    अन्ने॑नै॒वास्य॒ शुचं॑ शमयति
Sentence: 7    मृ॒त्युर्वा ए॒ष यद॒ग्निस् ।
Sentence: 8    ब्रह्म॑ण ए॒तद्रू॒पं यत्कृ॑ष्णाजि॒नम् ।
Sentence: 9    कार्ष्णी॑ उपा॒नहा॒वुप॑ मुञ्चते
Sentence: 10    ब्रह्म॑णै॒व मृ॒त्योर॒न्तर्ध॑त्ते
Sentence: 11    अ॒न्तर्मृ॒त्योर्ध॑त्ते ।
Sentence: 12    अ॒न्तर॒न्नाद्या॒दित्या॑हुस् ।
Sentence: 13    अ॒न्यामु॑पमु॒ञ्चते॒ ऽन्यां नान्तः ।।

Verse: 5 
Sentence: 1    ए॒व मृ॒त्योर्ध॒त्ते वा॒न्नाद्यं॑ रुन्द्धे
Sentence: 2    नम॑स्ते॒ हर॑से शो॒चिष॒ इत्या॑ह
Sentence: 3    नम॒स्कृत्य॒ हि वसी॑यांसमुप॒चर॑न्ति ।
Sentence: 4    अ॒न्यं ते॑ अ॒स्मत्त॑पन्तु हे॒तय॒ इत्या॑ह
Sentence: 5    यमे॒व द्वेष्टि॒ तम॑स्य शु॒चार्प॑यति
Sentence: 6    पाव॒को अ॒स्मभ्यं॑ शि॒वो भ॒वेत्या॑ह ।
Sentence: 7    अन्नं वै पाव॒कस् ।
Sentence: 8    अन्न॑मे॒वाव॑ रुन्द्धे
Sentence: 9    द्वाभ्या॒मधि॑ क्रामति॒ प्रति॑ष्ठित्यै ।
Sentence: 10    अ॑प॒स्य॑वतीभ्यां॒ शान्त्यै॑ ।।

Paragraph: 5 
Verse: 1 
Sentence: 1    नृ॒षदे॒ वडिति॒ व्याघा॑रयति
Sentence: 2    प॒ङ्क्त्याहु॑त्या यज्ञमु॒खमा र॑भते ।
Sentence: 3    अ॑क्ष्ण॒या व्याघा॑रयति
Sentence: 4    तस्मा॑दक्ष्ण॒या प॒शवो ऽङ्गा॑नि॒ प्र ह॑रन्ति॒ प्रति॑ष्ठित्यै
Sentence: 5    यद्व॑षट्कु॒र्याद्या॒तया॑मास्य वषट्का॒रः स्या॑त् ।
Sentence: 6    यन्न व॑षट्कु॒र्याद्रक्षां॑सि य॒ज्ञं ह॑न्युस् ।
Sentence: 7    वडित्या॑ह प॒रोऽक्ष॑मे॒व वष॑ट्करोति
Sentence: 8    नास्य॑ या॒तया॑मा वषट्का॒रो भव॑ति॒ न य॒ज्ञं रक्षां॑सि घ्नन्ति
Sentence: 9    हु॒तादो॒ वा अ॒न्ये दे॒वाः ।।

Verse: 2 
Sentence: 1    अ॑हु॒तादो॒ ऽन्ये
Sentence: 2    तान॑ग्नि॒चिदे॒वोभया॑न्प्रीणाति
Sentence: 3    ये दे॒वा दे॒वाना॒मिति॑ द॒ध्ना म॑धुमि॒श्रेणावो॑क्षति
Sentence: 4    हु॒ताद॑श्चै॒व दे॒वान॑हु॒ताद॑श्च॒ यज॑मानः प्रीणाति
Sentence: 5    ते यज॑मानम्प्रीणन्ति
Sentence: 6    दध्नै॒व हु॒तादः॑ प्री॒णाति॒ मधु॑षाहु॒ताद॑स् ।
Sentence: 7    ग्रा॒म्यं वा ए॒तदन्नं॒ यद्दध्या॑र॒ण्यम्मधु
Sentence: 8    यद्द॒ध्ना म॑धुमि॒श्रेणा॒वोक्ष॑त्यु॒भय॒स्याव॑रुद्ध्यै
Sentence: 9    ग्रुमु॒ष्टिनावो॑क्षति
Sentence: 10    प्राजाप॒त्यः ।।

Verse: 3 
Sentence: 1    वै॑ ग्रुमु॒ष्टिः स॑योनि॒त्वाय
Sentence: 2    द्वाभ्या॒म्प्रति॑ष्ठित्यै ।
Sentence: 3    अ॑नुपरि॒चार॒मवो॑क्षति ।
Sentence: 4    अप॑रिवर्गमेवैनान्प्रीणाति
Sentence: 5    वि वा ए॒ष प्राणैः प्र॒जया॑ प॒शुभि॑रृध्यते॒ यो॒ ऽग्निं चि॒न्वन्न॑धि॒क्राम॑ति
Sentence: 6    प्राण॒दा अ॑पान॒दा इत्या॑ह
Sentence: 7    प्रा॒णाने॒वात्मन्ध॑त्ते
Sentence: 8    वर्चो॒दा व॑रिवो॒दा इत्या॑ह
Sentence: 9    प्र॒जा वै॒ वर्चः॑ प॒शवो॒ वरि॑वः
Sentence: 10    प्र॒जामे॒व प॒शूना॒त्मन्ध॑त्ते ।
Sentence: 11    इन्द्रो॑ वृ॒त्रम॑हन्
Sentence: 12    तं वृ॒त्रः ।।

Verse: 4 
Sentence: 1    ह॒तः षो॑ड॒शभि॑र्भोगैरसिनात्
Sentence: 2    स ए॒ताम॒ग्नये ऽनी॑कवत॒ आहु॑तिमपश्यत्
Sentence: 3    ताम॑जुहोत्
Sentence: 4    तस्या॒ग्निरनी॑कवा॒न्त्स्वेन॑ भाग॒धेये॑न प्री॒तः षो॑डश॒धा वृ॒त्रस्य॑ भो॒गानप्य॑दहत् ।
Sentence: 5    वै॑श्वकर्म॒णेन॑ पा॒प्मनो॒ निर॑मुच्यत
Sentence: 6    यद॒ग्नये ऽनी॑कवत॒ आहु॑तिं जु॒होत्य॒ग्निरे॒वास्यानी॑कवा॒न्त्स्वेन॑ भाग॒धेये॑न प्री॒तः पा॒प्मान॒मपि॑ दहति
Sentence: 7    वैश्वदर्म॒णेन॑ पा॒प्मनो॒ निर्मु॑च्यते
Sentence: 8    यं का॒मये॑त
Sentence: 9    चि॒रम्पा॒प्मनः॑ ।।

Verse: 5 
Sentence: 1    निर्मु॑च्ये॒तेत्येकै॑कं॒ तस्य॑ जुहुयात् ।
Sentence: 2    चि॒रमे॒व पा॒प्मनो॒ निर्मु॑च्यते
Sentence: 3    यं का॒मये॑त
Sentence: 4    ता॒जक्पा॒प्मनो॒ निर्मु॑च्ये॒तेति॒ सर्वा॑णि॒ तस्या॑नु॒द्रुत्य॑ जुह्यात्
Sentence: 5    ता॒जगे॒व पा॒प्मनो॒ निर्मु॑च्यते ।
Sentence: 6    अथो॒ खलु॒ नानै॒व सू॒क्ताभ्यां॑ जुहोति
Sentence: 7    नानै॒व सू॒क्तयो॑र्वी॒र्यं॑ दधाति ।
Sentence: 8    अथो॒ प्रति॑ष्ठित्यै ।।

Paragraph: 6 
Verse: 1 
Sentence: 1    उदे॑नमुत्त॒रां न॒येति॑ स॒मिध॒ आ द॑धाति
Sentence: 2    यथा॒ जनं॑ य॒ते॑ ऽव॒सं क॒रोति॑ ता॒दृगे॒व तत्
Sentence: 3    ति॒स्र आ द॑धाति
Sentence: 4    त्रि॒वृद्वा अ॒ग्निस् ।
Sentence: 5    यावा॑ने॒वाग्निस्तस्मै॑ भाग॒धेयं॑ करोति ।
Sentence: 6    अौ॑दुम्बरीर्भवन्ति ।
Sentence: 7    ऊर्ग्वा उ॑दु॒म्बर॑स् ।
Sentence: 8    ऊर्ज॑मे॒वास्मा॒ अपि॑ दधाति ।
Sentence: 9    उदु॑ त्वा॒ विश्वे॑ दे॒वा इत्या॑ह
Sentence: 10    प्रा॒णा वै॒ विश्वे॑ दे॒वाः
Sentence: 11    प्राणैः ।।

Verse: 2 
Sentence: 1    एवैन॒मुद्य॑छते ।
Sentence: 2    अग्ने॑ भरन्तु॒ चित्ति॑भि॒रित्या॑ह
Sentence: 3    यस्मा॑ एवैनं चि॒त्तायो॒द्यछ॑ते॒ तेनैवैनं॒ सम॑र्धयति
Sentence: 4    पञ्च॒ दिशो दैवीर्य॒ज्ञम॑वन्तु दे॒वीरित्या॑ह
Sentence: 5    दिशो॒ ह्ये॒षो ऽनु॑ प्र॒च्यव॑ते ।
Sentence: 6    अपाम॑तिं दुर्म॒तिम्बाध॑माना॒ इत्या॑ह॒ रक्ष॑सा॒मप॑हत्यै
Sentence: 7    रा॒यस्पोषे॑ य॒ज्ञप॑तिमा॒भज॑न्ती॒रित्या॑ह
Sentence: 8    प॒शवो वै रा॒यस्पोषः॑ ।।

Verse: 3 
Sentence: 1    प॒शूने॒वाव॑ रुन्द्धे
Sentence: 2    ष॒ड्भिर्ह॑रति
Sentence: 3    षड्वा ऋ॒तव॑स् ।
Sentence: 4    ऋ॒तुभि॑रेवैनं हरति
Sentence: 5    द्वे प॑रि॒गृह्य॑वती भवतो॒ रक्ष॑सा॒मप॑हत्यै
Sentence: 6    सूर्य॑रश्मि॒र्हरि॑केशः पु॒रस्ता॒दित्या॑ह
Sentence: 7    प्रसू॑त्यै
Sentence: 8    ततः॑ पाव॒का आ॒शिषो॑ नो जुषन्ता॒मित्या॑ह ।
Sentence: 9    अन्नं वै पाव॒कस् ।
Sentence: 10    अन्न॑मे॒वाव॑ रुन्द्धे
Sentence: 11    देवासु॒राः संय॑त्ता आसन्
Sentence: 12    ते दे॒वा ए॒तदप्र॑तिरथमपश्यन्
Sentence: 13    तेनै॒व ते ऽप्र॒ति ।।

Verse: 4 
Sentence: 1    असु॑रानजयन्
Sentence: 2    तदप्र॑तिरथस्याप्रतिरथ॒त्वम् ।
Sentence: 3    यदप्र॑तिरथं द्वि॒तीयो॒ होता॒न्वाहा॑प्र॒त्ये॒व तेन॒ यज॑मानो॒ भ्रातृ॑व्याञ्जयति ।
Sentence: 4    अथो॒ अन॑भिजितमे॒वाभि ज॑यति
Sentence: 5    दश॒र्चम्भ॑वति
Sentence: 6    दशा॑क्षरा वि॒राड्^वि॒राज्
Sentence: 7    वि॒राजेमौ लोकौ॒ विधृ॑तौ ।
Sentence: 8    अ॒नयो॑र्लो॒कयो॒र्विधृ॑त्यै ।
Sentence: 9    अथो॒ दशा॑क्षरा वि॒राड्^वि॒राज्
Sentence: 10    अन्नं वि॒राड्^वि॒राज्
Sentence: 11    वि॒राज्ये॒वान्नाद्ये॒ प्रति॑ तिष्ठति ।
Sentence: 12    अस॑दिव॒ वा अ॒न्तरि॑क्षम्
Sentence: 13    अ॒न्तरि॑क्षमि॒वाग्नी॑ध्रम्
Sentence: 14    आग्नी॑ध्रे ।।

Verse: 5 
Sentence: 1    अश्मा॑नं॒ नि द॑धाति
Sentence: 2    स॒त्त्वाय
Sentence: 3    द्वाभ्या॑म्
Sentence: 4    प्रति॑ष्ठित्यै
Sentence: 5    वि॒मान॑ ए॒ष दि॒वो मध्य॑ आस्त॒ इत्या॑ह
Sentence: 6    व्येवै॒तया॑ मिमीते
Sentence: 7    मध्ये॑ दि॒वो निहि॑तः॒ पृश्नि॑र॒श्मेत्या॑ह ।
Sentence: 8    अन्नं वै॒ पृश्नि॑ ।
Sentence: 9    अन्न॑मे॒वाव॑ रुन्द्धे
Sentence: 10    चत॒सृभि॒रा पुछा॑देति
Sentence: 11    च॒त्वारि॒ छन्दां॑सि
Sentence: 12    छन्दो॑भिरे॒व ।
Sentence: 13    इन्द्रं॒ विश्वा॑ अवीवृध॒न्नित्या॑ह
Sentence: 14    वृद्धि॑मे॒वोपाव॑र्तते
Sentence: 15    वाजा॑नां॒ सत्प॑ति॒म्पति॑म् ।।

Verse: 6 
Sentence: 1    इत्या॑ह ।
Sentence: 2    अन्नं वै॒ वाज॑स् ।
Sentence: 3    अन्न॑मे॒वाव॑ रुन्द्धे
Sentence: 4    सुम्न॒हूर्य॒ज्ञो दे॒वां आ च॑ वक्ष॒दित्या॑ह
Sentence: 5    प्र॒जा वै॑ प॒शवः॑ सु॒म्नम्
Sentence: 6    प्र॒जामे॒व प॒शूना॒त्मन्ध॑त्ते
Sentence: 7    यक्ष॑द॒ग्निर्दे॒वो दे॒वां आ च॑ वक्ष॒दित्या॑ह
Sentence: 8    स्व॒गाकृ॑त्यै
Sentence: 9    वाज॑स्य मा प्रस॒वेनो॑द्ग्रा॒भेणोद॑ग्रभी॒दित्या॑ह ।
Sentence: 10    असौ॒ वा आ॑दि॒त्य उ॒द्यन्नु॑द्ग्रा॒भ ए॒ष नि॒म्रोच॑न्निग्रा॒भस् ।
Sentence: 11    ब्रह्म॑णै॒वात्मान॑मुद्गृ॒ह्णाति॒ ब्रह्म॑णा॒ भ्रातृ॑व्यं॒ नि गृ॑ह्णाति ।।

Paragraph: 7 
Verse: 1 
Sentence: 1    प्राची॒मनु॑ प्र॒दिश॒म्प्रेहि॑ वि॒द्वानित्या॑ह
Sentence: 2    देवलो॒कमेवै॒तयो॒पाव॑र्तते
Sentence: 3    क्रम॑ध्वम॒ग्निना॒ नाक॒मित्या॑ह ।
Sentence: 4    इ॒मानेवै॒तया॑ लो॒कान्क्र॑मते
Sentence: 5    पृथि॒व्या अ॒हमुद॒न्तरि॑क्ष॒मारु॑ह॒मित्या॑ह ।
Sentence: 6    इ॒मानेवै॒तया॑ लो॒कान्त्स॒मारो॑हति
Sentence: 7    सुव॒र्यन्तो॒ नापे॑क्षन्त॒ इत्या॑ह
Sentence: 8    सुव॒र्गमेवै॒तया॑ लो॒कमे॑ति ।
Sentence: 9    अग्ने॒ प्रेहि॑ ।।

Verse: 2 
Sentence: 1    प्र॑थ॒मो दे॑वय॒तामित्या॑ह ।
Sentence: 2    उ॒भये॑ष्वेवै॒तया॑ देवमनु॒ष्येषु॒ चक्षु॑र्दधाति
Sentence: 3    प॒ञ्चभि॒रधि॑ क्रामति
Sentence: 4    पाङ्क्तो॑ य॒ज्ञस् ।
Sentence: 5    यावा॑ने॒व य॒ज्ञस्तेन॑ स॒ह सु॑व॒र्गं लो॒कमे॑ति
Sentence: 6    नक्तो॒षासेति॑ पुरोऽनुवा॒क्या॒मन्वा॑ह
Sentence: 7    प्रत्त्यै॑ ।
Sentence: 8    अग्ने॑ सहस्रा॒क्षेत्या॑ह
Sentence: 9    साह॒स्रः प्र॒जाप॑तिः
Sentence: 10    प्र॒जाप॑ते॒राप्त्यै
Sentence: 11    तस्मै॑ ते विधेम॒ वाजा॑य॒ स्वाहेत्या॑ह ।
Sentence: 12    अन्नं वै॒ वाज॑स् ।
Sentence: 13    अन्न॑मे॒वाव॑ ।।

Verse: 3 
Sentence: 1    रु॑न्द्धे
Sentence: 2    द॒ध्नः पू॒र्णामौ॑दुम्बरीं स्वयमातृ॒ण्णायां॑ जुहोति ।
Sentence: 3    ऊर्ग्वै॒ दधि॑ ।
Sentence: 4    ऊर्गु॑दु॒म्बर॑स् ।
Sentence: 5    असौ स्वयमातृ॒ण्णा ।
Sentence: 6    अ॒मुष्या॑मे॒वोर्जं॑ दधाति
Sentence: 7    तस्मा॑द॒मुतो॒ ऽर्वाची॒मूर्ज॒मुप॑ जीवामस्
Sentence: 8    ति॒सृभिः॑ सादयति
Sentence: 9    त्रि॒वृद्वा अ॒ग्निस् ।
Sentence: 10    यावा॑ने॒वाग्निस्तम्प्र॑ति॒ष्ठां ग॑मयति
Sentence: 11    प्रेद्धो॑ अग्ने दीदिहि पु॒रो न॒ इत्औ॒दुम्ब॑री॒मा द॑धाति ।
Sentence: 12    ए॒ष वै॑ सू॒र्मी कर्ण॑कावती ।
Sentence: 13    ए॒तया॑ ह स्म ।।

Verse: 4 
Sentence: 1    वै॑ दे॒वा असु॑राणां शतत॒र्हांस्तृं॑हन्ति
Sentence: 2    यदे॒तया॑ स॒मिध॑मा॒दधा॑ति॒ वज्र॑मेवै॒तच्छ॑त॒घ्नीं यज॑मानो॒ भ्रातृ॑व्याय॒ प्र ह॑रति॒ स्तृत्यै॑ ।
Sentence: 3    अछ॑म्बट्कारम् ।
Sentence: 4    वि॒धेम॑ ते पर॒मे जन्म॑न्नग्न॒ इति वैकङ्कती॒मा द॑धाति
Sentence: 5    भा ए॒वाव॑ रुन्द्धे
Sentence: 6    तां स॑वि॒तुर्वरे॑ण्यस्य चि॒त्रामिति॑ शमी॒मयीं॒ शान्त्यै॑ ।
Sentence: 7    अ॒ग्निर्वा॑ ह॒ वा अ॑ग्नि॒चितं॑ दु॒हे॑ ऽग्नि॒चिद्वा॒ग्निं दु॑हे
Sentence: 8    ताम् ।।

Verse: 5 
Sentence: 1    स॑वि॒तुर्वरे॑ण्यस्य चि॒त्रामित्या॑ह ।
Sentence: 2    ए॒ष वा अ॒ग्नेर्दोह॑स्
Sentence: 3    तम॑स्य॒ कण्व॑ ए॒व श्रा॑य॒सो॑ ऽवेत्
Sentence: 4    तेन॑ ह समैनं॒ स दु॑हे
Sentence: 5    यदे॒तया॑ स॒मिध॑मा॒दधा॑त्यग्नि॒चिदे॒व तद॒ग्निं दु॑हे
Sentence: 6    स॒प्त ते॑ अग्ने स॒मिधः॑ स॒प्त जि॒ह्वा इत्या॑ह
Sentence: 7    सप्तै॒वास्य॒ साप्ता॑नि प्रीणाति
Sentence: 8    पू॒र्णया॑ जुहोति
Sentence: 9    पू॒र्ण इ॑व॒ हि प्र॒जाप॑तिः
Sentence: 10    प्र॒जाप॑तेः ।।

Verse: 6 
Sentence: 1    आप्त्यै
Sentence: 2    न्यू॑नया जुहोति
Sentence: 3    न्यू॑ना॒द्धि प्र॒जाप॑तिः प्र॒जा असृ॑जत
Sentence: 4    प्र॒जानां॒ सृष्ट्यै॑ ।
Sentence: 5    अ॒ग्निर्दे॒वेभ्यो॒ निला॑यत
Sentence: 6    स दिशो ऽनु॒ प्रावि॑शत् ।
Sentence: 7    जुह्व॒न्मन॑सा॒ दिशो॑ ध्यायेत् ।
Sentence: 8    दि॒ग्भ्य एवैन॒मव॑ रुन्द्धे
Sentence: 9    द॒ध्ना पु॒रस्ता॑ज्जुहो॒त्याज्ये॑नो॒परि॑ष्टात्
Sentence: 10    तेज॑श्चै॒वास्मा॑ इन्द्रि॒यं च॑ स॒मीची॑ दधाति
Sentence: 11    द्वाद॑शकपालो वैश्वान॒रो भ॑वति
Sentence: 12    द्वाद॑श॒ मासाः॑ संवत्स॒रः
Sentence: 13    सं॑वत्स॒रो॒ ऽग्निर्वै॑श्वान॒रः
Sentence: 14    सा॒क्षात् ।।

Verse: 7 
Sentence: 1    ए॒व वै॑श्वान॒रमव॑ रुन्द्धे
Sentence: 2    यत्प्र॑याजानूया॒जान्कु॒र्याद्विक॑स्तिः॒ सा य॒ज्ञस्य
Sentence: 3    दर्विहो॒मं क॑रोति य॒ज्ञस्य॒ प्रति॑ष्ठित्यै
Sentence: 4    रा॒ष्ट्रं वै॑ वैश्वान॒रो विण्म॒रुत॑स् ।
Sentence: 5    वै॑श्वान॒रं हु॒त्वा मा॑रु॒ताञ्जु॑होति
Sentence: 6    रा॒ष्ट्र ए॒व विश॒मनु॑ बध्नाति ।
Sentence: 7    उच्चैर्वैश्वान॒रस्या श्रा॑वयत्युपां॒शु मा॑रु॒ताञ्जु॑होति
Sentence: 8    तस्मा॑द्रा॒ष्ट्रं विश॒मति॑ वदति
Sentence: 9    मारु॒ता भ॑वन्ति
Sentence: 10    म॒रुतो वै दे॒वानां॒ विश॑स् ।
Sentence: 11    दे॑ववि॒शेनै॒वास्मै॑ मनुष्य वि॒शमव॑ रुन्द्धे
Sentence: 12    स॒प्त भ॑वन्ति
Sentence: 13    स॒प्तग॑णा वै म॒रुत॑स् ।
Sentence: 14    ग॑ण॒श ए॒व विश॒मव॑ रुन्द्धे
Sentence: 15    ग॒णेन॑ ग॒णम॑नु॒द्रुत्य॑ जुहोति
Sentence: 16    विश॑मे॒वास्मा॒ अनु॑ वर्त्मानं करोति ।।

Paragraph: 8 
Verse: 1 
Sentence: 1    वसो॒र्धारां॑ जुहोति
Sentence: 2    वसो॑र्मे॒ धारा॑स॒दिति॒ वा ए॒षा हू॑यते
Sentence: 3    घृ॒तस्य॒ वा ए॑नमे॒षा धारा॒मुष्मिँ॑ लो॒के पिन्व॑मा॒नोप॑ तिष्ठते ।
Sentence: 4    आज्ये॑न जुहोति
Sentence: 5    तेजो॒ वा आज्यं॒ तेजो॒ वसो॒र्धारा
Sentence: 6    तेज॑सै॒वास्मै॒ तेजो ऽव॑ रुन्द्धे ।
Sentence: 7    अथो॒ कामा वै॒ वसो॒र्धारा
Sentence: 8    कामा॑ने॒वाव॑ रुन्द्धे
Sentence: 9    यं का॒मये॑त
Sentence: 10    प्रा॒णान॒स्यान्नाद्यं॒ वि ।।

Verse: 2 
Sentence: 1    छि॑न्द्या॒मिति॑ वि॒ग्राहं॒ तस्य॑ जुहुयात्
Sentence: 2    प्रा॒णाने॒वास्या॒न्नाद्यं॒ वि छि॑नत्ति
Sentence: 3    यं का॒मये॑त
Sentence: 4    प्रा॒णान॑स्या॒न्नाद्यं॒ सं त॑नुया॒मिति॒ संत॑तां॒ तस्य॑ जुहुयात्
Sentence: 5    प्रा॒णाने॒वास्या॒न्नाद्यं॒ सं त॑नोति
Sentence: 6    द्वाद॑श द्वाद॒शानि॑ जुहोति॒ द्वाद॑श॒ मासाः॑ संवत्स॒रः
Sentence: 7    सं॑वत्स॒रेणै॒वास्मा॒ अन्न॒मव॑ रुन्द्धे ।
Sentence: 8    अन्नं॑ च॒ मे ऽक्षु॑च्च म॒ इत्या॑ह ।
Sentence: 9    ए॒तद्वै॑ ।।

Verse: 3 
Sentence: 1    अन्न॑स्य रू॒पम् ।
Sentence: 2    रू॒पेणै॒वान्न॒मव॑ रुन्द्धे ।
Sentence: 3    अ॒ग्निश्च॑ म॒ आप॑श्च म॒ इत्या॑ह ।
Sentence: 4    ए॒षा वा अन्न॑स्य॒ योनिः
Sentence: 5    सयो॑न्ये॒वान्न॒मव॑ रुन्द्धे ।
Sentence: 6    अ॑र्धे॒न्द्राणि॑ जुहोति
Sentence: 7    दे॒वता॑ ए॒वाव॑ रुन्द्धे
Sentence: 8    यत्सर्वे॑षाम॒र्धमिन्द्रः॒ प्रति॒ तस्मा॒दिन्द्रो॑ दे॒वता॑नाम्भूयिष्ठ॒भाक्त॑मस् ।
Sentence: 9    इन्द्र॒मुत्त॑रमाह ।
Sentence: 10    इ॑न्द्रि॒यमे॒वास्मि॑न्नु॒परि॑ष्टाद्दधाति
Sentence: 11    यज्ञायु॒धानि॑ जुहोति
Sentence: 12    य॒ज्ञः ।।

Verse: 4 
Sentence: 1    वै॑ यज्ञायु॒धानि
Sentence: 2    य॒ज्ञमे॒वाव॑ रुन्द्धे ।
Sentence: 3    अथो॑ ए॒तद्वै॑ य॒ज्ञस्य॑ रू॒पम् ।
Sentence: 4    रू॒पेणै॒व य॒ज्ञमव॑ रुन्द्धे ।
Sentence: 5    अ॑वभृ॒थश्च॑ मे स्वगाका॒रश्च॑ म॒ इत्या॑ह
Sentence: 6    स्व॒गाकृ॑त्यै ।
Sentence: 7    अ॒ग्निश्च॑ मे घ॒र्मश्च॑ म॒ इत्या॑ह ।
Sentence: 8    ए॒तद्वै॑ ब्रह्मवर्च॒सस्य॑ रू॒पम् ।
Sentence: 9    रू॒पेनै॒व ब्र॑ह्मवर्च॒समव॑ रुन्द्धे ।
Sentence: 10    ऋक्च॑ मे॒ साम॑ च म॒ इत्या॑ह ।।

Verse: 5 
Sentence: 1    ए॒तद्वै॒ छन्द॑सां रू॒पम् ।
Sentence: 2    रू॒पेणै॒व छन्दां॒स्यव॑ रुन्द्धे
Sentence: 3    गर्भा॑श्च मे व॒त्साश्च॑ म॒ इत्या॑ह ।
Sentence: 4    ए॒तद्वै॑ पशू॒नां रू॒पम् ।
Sentence: 5    रू॒पेणै॒व प॒शूनव॑ रुन्द्धे
Sentence: 6    कल्पा॑ञ्जुहोति ।
Sentence: 7    अक्ळ्प्त॑स्य॒ कॢप्त्यै
Sentence: 8    युग्मदयु॒जे जु॑होति
Sentence: 9    मिथुन॒त्वाय॑ ।
Sentence: 10    उ॑त्त॒राव॑ती भवतस् ।
Sentence: 11    अ॒भिक्रा॑न्त्यै ।
Sentence: 12    एका॑ च मे ति॒स्रश्च॑ म॒ इत्या॑ह
Sentence: 13    देवछन्द॒सं वा एका॑ च ति॒स्रश्च॑ ।।

Verse: 6 
Sentence: 1    म॑नुष्यछन्द॒सं चत॑स्रश्चाष्टौ च
Sentence: 2    देवछन्द॒सं चै॒व म॑नुष्यछन्द॒सं चाव॑ रुन्द्धे ।
Sentence: 3    आ त्रय॑स्त्रिंशतो जुहोति
Sentence: 4    त्रय॑स्त्रिंशद्वै दे॒वता॑स् ।
Sentence: 5    दे॒वता॑ ए॒वाव॑ रुन्द्धे ।
Sentence: 6    आष्टाच॑त्वारिंशतो जुहोति ।
Sentence: 7    अ॒ष्टाच॑त्वारिंशदक्षरा॒ जग॑ती
Sentence: 8    जाग॑ताः प॒शव॑स् ।
Sentence: 9    जग॑त्यै॒वास्मै॑ प॒शूनव॑ रुन्द्धे
Sentence: 10    वाज॑श्च प्रस॒वश्चेति॑ द्वाद॒शं जु॑होति
Sentence: 11    द्वाद॑श॒ मासाः॑ संवत्स॒रः
Sentence: 12    सं॑वत्स॒र ए॒व प्रति॑ तिष्ठति ।।

Paragraph: 9 
Verse: 1 
Sentence: 1    अ॒ग्निर्दे॒वेभ्यो ऽपा॑क्रामद्भाग॒धेय॑मि॒छमा॑नस्
Sentence: 2    तं दे॒वा अ॑ब्रुवन् ।
Sentence: 3    उप॑ न॒ आ व॑र्तस्व ह॒व्यं नो॑ व॒हेति
Sentence: 4    सो॑ ऽब्रवीत् ।
Sentence: 5    वरं॑ वृणै॒ मह्य॑मे॒व वा॑जप्रस॒वीयं॑ जुहव॒न्निति
Sentence: 6    तस्मा॑द॒ग्नये॑ वाजप्रस॒वीयं॑ जुह्वति
Sentence: 7    यद्वा॑जप्रस॒वीयं॑ जु॒होत्य॒ग्निमे॒व तद्भा॑ग॒धेये॑न॒ सम॑र्धयति ।
Sentence: 8    अथो॑ अभिषे॒क ए॒वास्य स^ सस्
Sentence: 9    चतुर्द॒शभि॑र्जुहोति
Sentence: 10    स॒प्त ग्रा॒म्या ओष॑धयः स॒प्त ।।

Verse: 2 
Sentence: 1    आ॑र॒ण्यास् ।
Sentence: 2    उ॒भयी॑षा॒मव॑रुद्ध्यै ।
Sentence: 3    अन्न॑स्यान्नस्य जुहोति ।
Sentence: 4    अन्न॑स्यान्न॒स्याव॑रुद्ध्यै ।
Sentence: 5    अौ॑दुम्बरेण स्रु॒वेण॑ जुहोति ।
Sentence: 6    ऊर्ग्वा उ॑दु॒म्बर॒ ऊर्गन्न॑म्
Sentence: 7    ऊर्जै॒वास्मा॒ ऊर्ज॒मन्न॒मव॑ रुन्द्धे ।
Sentence: 8    अ॒ग्निर्वै॑ दे॒वाना॑म॒भिषि॑क्तो ऽग्नि॒चिन्म॑नु॒ष्या॑णाम् ।
Sentence: 9    तस्मा॑दग्नि॒चिद्वर्ष॑ति॒ न धा॑वेत् ।
Sentence: 10    अव॑रुद्धं॒ ह्य॒स्यान्न॑म्
Sentence: 11    अन्न॑मिव॒ खलु वै व॒र्षम् ।
Sentence: 12    यद्धावे॑द॒न्नाद्या॑द्धावेत् ।
Sentence: 13    उ॒पाव॑र्तेत ।
Sentence: 14    अ॒न्नाद्य॑मे॒वाभि ।।

Verse: 3 
Sentence: 1    उ॒पाव॑र्तते
Sentence: 2    नक्तो॒षासेति॑ कृ॒ष्णायै॑ श्वे॒तव॑त्सायै॒ पय॑सा जुहोति ।
Sentence: 3    अह्नै॒वास्मै॒ रात्रि॒म्प्र दा॑पयति॒ रात्रि॒याह॑र्
Sentence: 4    अहोरा॒त्रे ए॒वास्मै॒ प्रत्ते॒ काम॑म॒न्नाद्यं॑ दुहाते
Sentence: 5    राष्ट्र॒भृतो॑ जुहोति
Sentence: 6    रा॒ष्ट्रमे॒वाव॑ रुन्द्धे
Sentence: 7    ष॒ड्भिर्जु॑होति
Sentence: 8    साड्वा ऋ॒तव॑स् ।
Sentence: 9    ऋ॒तुष्वे॒व प्रति॑ तिष्ठति
Sentence: 10    भुव॑नस्य पत॒ इति॑ रथमु॒खे पञ्चाहु॑तीर्जुहोति
Sentence: 11    वज्रो वै॒ रथ॑स् ।
Sentence: 12    वज्रे॑णै॒व दिशः॑ ।।

Verse: 4 
Sentence: 1    अ॒भि ज॑यति ।
Sentence: 2    अ॑ग्नि॒चितं॑ ह॒ वा अ॒मुष्मिँ॑ लो॒के वातो॒ ऽभि प॑वते
Sentence: 3    वातना॒मानि॑ जुहोति ।
Sentence: 4    अ॒भ्येवैनम॒मुष्मिँ॑ लो॒के वातः॑ पवते
Sentence: 5    त्रीणि॑ जुहोति
Sentence: 6    त्रय॑ इ॒मे लो॒कास् ।
Sentence: 7    ए॒भ्य ए॒व लो॒केभ्यो॒ वात॒मव॑ रुन्द्धे
Sentence: 8    समु॒द्रो॑ ऽसि॒ नभ॑स्वा॒नित्या॑ह ।
Sentence: 9    ए॒तद्वै॒ वात॑स्य रू॒पम् ।
Sentence: 10    रू॒पेणै॒व वात॒मव॑ रुन्द्धे ।
Sentence: 11    अ॑ञ्ज॒लिना॑ जुहोति
Sentence: 12    न ह्ये॒तेषा॑म॒न्यथाहु॑तिरव॒कल्प॑ते ।।

Paragraph: 10 
Verse: 1 
Sentence: 1    सु॑व॒र्गाय वै लो॒काय॑ देवर॒थो यु॑ज्यते यत्राकू॒ताय॑ मनुष्यर॒थ ए॒ष खलु वै देवर॒थो यद॒ग्निर॒ग्निं यु॑नज्मि॒ शव॑सा घृ॒तेनेत्या॑ह यु॒नक्त्येवैनं॒ स ए॑नं यु॒क्तः सु॑व॒र्गं लो॒कम॒भि व॑हति
Sentence: 2    यत्स्वर्वा॑भिः प॒ञ्चभि॑र्यु॒ञ्ज्याद्यु॒क्तो॑ ऽस्या॒ग्निः प्रच्यु॑तः स्या॒दप्र॑तिष्ठिता॒ आहु॑तयः॒ स्युरप्र॑तिष्ठिता॒ स्तोमा॒ अप्र॑तिष्ठितान्यु॒क्थानि॑ ति॒सृभिः॑ प्रातःसव॒ने॒ ऽभि मृ॑शति त्रि॒वृत् ।।

Verse: 2 
Sentence: 1    वा अ॒ग्निर्यावा॑ने॒वाग्निस्तं यु॑नक्ति॒ यथान॑सि यु॒क्त आ॑धी॒यत॑ ए॒वमे॒व तत्प्रत्याहु॑तय॒स॑न्ति॒ प्रति॒ स्तोमाः॒ प्रत्यु॒क्थानि
Sentence: 2    यज्ञाय॒ज्ञिय॑स्य स्तो॒त्रे द्वाभ्या॑म॒भि मृ॑शत्ये॒तावान्वै य॒ज्ञो यावा॑नग्निष्टो॒मो भू॒मा त्वा अ॒स्यात॑ ऊ॒र्ध्वः क्रि॑यते॒ यावा॑ने॒व य॒ज्ञस्तम॑न्त॒तो॒ ऽन्वारो॑हति॒ द्वाभ्या॒म्प्रति॑ष्ठित्या॒ एक॒याप्र॑स्तुत॒म्भव॒त्यथ॑ ।।

Verse: 3 
Sentence: 1    अ॒भि मृ॑श॒त्युपै॑न॒मुत्त॑रो य॒ज्ञो न॑म॒त्यथो॒ संत॑त्यै
Sentence: 2    प्र वा ए॒षो॒ ऽस्माल्लो॒काच्च्य॑वते॒ यो॒ ऽग्निं चि॑नु॒ते न वा ए॒तस्या॑निष्ट॒क आहु॑ति॒रव॑ कल्पते॒ यां वा ए॒षो॑ ऽनिष्ट॒क आहु॑तिं जु॒होति
Sentence: 3    स्रव॑ति वै॒ सा तां स्रव॑न्तीं य॒ज्ञो ऽनु॒ परा॑ भवति य॒ज्ञं यज॑मानो॒ यत्पु॑नश्चि॒तिं चि॑नु॒त आहु॑तीना॒म्प्रति॑ष्ठित्यै॒ प्रत्याहु॑तय॒स्तिष्ठ॑न्ति ।।

Verse: 4 
Sentence: 1    न य॒ज्ञः प॑रा॒भव॑ति॒ न यज॑मानस् ।
Sentence: 2    अ॒ष्टावुप॑ दधात्य॒ष्टाक्ष॑रा गाय॒त्री गा॑य॒त्रेणैवैनं॒ छन्द॑सा चिनुते॒ यदेका॑दश त्रैष्टुभन॒ यद्द्वाद॑श॒ जाग॑तेन॒ छन्दो॑भिरेवैनं चिनुते
Sentence: 3    नपा॒त्को वै॒ नामै॒षो॒ ऽग्निर्यत्पु॑नश्चि॒तिर्य ए॒वं वि॒द्वान्पु॑नश्चि॒तिं चि॑नु॒त आ तृ॒तीया॒त्पुरु॑षा॒दन्न॑मत्ति
Sentence: 4    यथा वै पुनरा॒धेय॑ ए॒वम्पु॑नश्चि॒तिर्यो॑ ऽग्न्या॒धेये॑न॒ न ।।

Verse: 5 
Sentence: 1    ऋ॒ध्नोति॒ स पु॑नरा॒धेय॒मा ध॑त्ते॒ यो॒ ऽग्निं चि॒त्वा नर्ध्नोति॒ स पु॑नश्चि॒तिं चि॑नुते॒ यत्पु॑नश्चि॒तिं चि॑नु॒त ऋद्ध्यै॑ ।
Sentence: 2    अथो॒ खल्वा॑हु॒र्न चे॑त॒व्येति॑ रु॒द्रो वा ए॒ष यद॒ग्निर्यथा॑ व्या॒घ्रं सु॒प्तम्बो॒धय॑ति ता॒दृगे॒व तत् ।
Sentence: 3    अथो॑ खल्वाहुश्चेत॒व्येति॒ यथा॒ वसी॑यांसम्भाग॒धेये॑न बो॒धय॑ति ता॒दृगे॒व तत् ।
Sentence: 4    मनु॑र॒ग्निम॑चिनुत॒ तेन॒ नार्ध्नो॒त्स ए॒ताम्पु॑नश्चि॒तिम॑पश्य॒त्ताम॑चिनुत॒ तया वै॒ स आ॑र्ध्नो॒द्यत्पु॑नश्चि॒तिं चि॑नु॒त ऋद्ध्यै॑ ।।

Paragraph: 11 
Verse: 1 
Sentence: 1    छ॑न्द॒श्चितं॑ चिन्वीत प॒शुका॑मः प॒शवो वै॒ छन्दां॑सि पशु॒माने॒व भ॑वति
Sentence: 2    श्येन॒चितं॑ चिन्वीत सुव॒र्गका॑मः श्ये॒नो वै॒ वय॑सा॒म्पति॑ष्ठः श्ये॒न ए॒व भू॒त्वा सु॑व॒र्गं लो॒कम्प॑तति
Sentence: 3    कङ्क॒चितं॑ चिन्वीत॒ यः का॒मये॑त शीर्ष॒ण्वान॒मुष्मिँ॑ लो॒के स्या॒मिति॑ शीर्ष॒ण्वाने॒वामुष्मिँ॑ लो॒के भ॑वति ।
Sentence: 4    अ॑लज॒चितं॑ चिन्वीत॒ चतुः॑सीतम्प्रति॒ष्ठाका॑म॒श्चत॑स्रो॒ दिशो॑ दि॒क्ष्वे॑व॒ प्रति॑ तिष्ठति
Sentence: 5    प्रौग॒चितं॑ चिन्वीत॒ भ्रातृ॑व्यवा॒न्प्र ।।

Verse: 2 
Sentence: 1    ए॒व भ्रातृ॑व्यान्नुदते ।
Sentence: 2    उ॑भ॒यतः॑प्रौगं चिन्वीत॒ यः का॒मये॑त॒ प्र जा॒तान्भ्रातृ॑व्यान्नु॒देय॒ प्रति॑जनि॒ष्यमा॑णा॒नति प्रै॒व जा॒तान्भ्रातृ॑व्यान्नु॒दते॒ प्रति॑ जनि॒ष्यमा॑णान्
Sentence: 3    रथचक्र॒चितं॑ चिन्वीत॒ भ्रातृ॑व्य॒वान्वज्रो वै॒ रथो॒ वज्र॑मे॒व भ्रातृ॑व्येभ्यः॒ प्र ह॑रति
Sentence: 4    द्रोण॒चितं॑ चिन्वी॒तान्न॑कामो॒ द्रोणे॒ वा अन्न॑म्भ्रियते॒ सयो॑न्ये॒वान्न॒मव॑ रुन्द्धे
Sentence: 5    समू॒ह्यं॑ चिन्वीत प॒शुका॑मः पशु॒माने॒व भ॑वति ।।

Verse: 3 
Sentence: 1    प॑रिचा॒य्यं॑ चिन्वीत॒ ग्राम॑कामो ग्रा॒म्ये॒व भ॑वति
Sentence: 2    श्मशान॒चितं॑ चिन्वीत॒ यः का॒मये॑त पितृलो॒क ऋ॑ध्नुया॒मिति॑ पितृलो॒क ए॒वर्ध्नो॑ति
Sentence: 3    विश्वामित्रजमद॒ग्नी वसि॑ष्ठेनास्पर्धेतां॒ स ए॒ता ज॒मद॑ग्निर्विह॒व्या॑ अपश्य॒त्ता उपा॑धत्त॒ ताभिर्वै॒ स वसि॑ष्ठ॒स्येन्द्रि॒यं वी॒र्य॑मवृङ्क्त॒ यद्वि॑ह॒व्या॑ उप॒दधा॑तीन्द्रि॒यमे॒व ताभि॑र्वी॒र्यं॒ यज॑मानो॒ भ्रातृ॑व्यस्य वृङ्क्ते
Sentence: 4    होतु॒र्धिष्णि॑य॒ उप॑ दधाति यजमानायत॒नं वै॑ ।।

Verse: 4 
Sentence: 1    होता॒ स्व ए॒वास्मा॑ आ॒यत॑न इन्द्रि॒यं वी॒र्य॒मव॑ रुन्द्धे
Sentence: 2    द्वाद॒शोप॑ दधाति॒ द्वाद॑शाक्षरा॒ जग॑ती॒ जाग॑ताः प॒शवो॒ जग॑त्यै॒वास्मै॑ प॒शूनव॑ रुन्द्धे ।
Sentence: 3    अ॒ष्टाव॑ष्टाव॒न्येषु॒ धिष्णि॑येषूप दधात्य॒ष्टाश॑पाः प॒शवः॑ प॒शूने॒वाव॑ रुन्द्धे
Sentence: 4    षण्मा॑र्जा॒लीये॒ षड्वा ऋ॒तव॑ ऋ॒तवः॒ खलु वै दे॒वाः पि॒तर॑ ऋ॒तूने॒व दे॒वान्पि॒तॄन्प्री॑णाति ।।

Paragraph: 12 
Verse: 1 
Sentence: 1    पव॑स्व॒ वाज॑सातय॒ इत्य॑नु॒ष्टुक्प्र॑ति॒पद्भ॑वति
Sentence: 2    ति॒र्सो॑ ऽनु॒ष्टुभ॒श्चत॑र्सो गाय॒त्रिय॑स् ।
Sentence: 3    यत्ति॒स्रो॑ ऽनु॒ष्टुभ॒स्तस्मा॑दश्श्वस्त्रि॒भिस्तिष्ठं॑स्तिष्ठति
Sentence: 4    यच्चत॑स्रो गाय॒त्रिय॒स्तस्मा॒त्सर्वां॑श्च॒तुरः॑ प॒दः प्र॑ति॒दध॒त्पला॑यते
Sentence: 5    पर॒मा वा ए॒षा छन्द॑सां॒ यद्नु॒ष्टुक्^नु॒ष्टुभ्
Sentence: 6    पर॒मश्च॑तुष्टो॒म स्तोमा॑नाम्
Sentence: 7    पर॒मस्त्रि॑रा॒त्रो य॒ज्ञाना॑म्
Sentence: 8    पर॒मो ऽश्वः॑ पशू॒नाम्
Sentence: 9    पर॑मेणैवैनम्पर॒मतां॑ गमयति ।
Sentence: 10    ए॑कविं॒शमह॑र्भवति ।।

Verse: 2 
Sentence: 1    यस्मि॒न्नश्व॑ आल॒भ्यते
Sentence: 2    द्वाद॑श॒ मासाः॒ पञ्च॒र्तव॒स्त्रय॑ इ॒मे लो॒का अ॒सावा॑दि॒त्य ए॑कविं॒श ए॒ष प्र॒जाप॑तिः
Sentence: 3    प्राजाप॒त्यो ऽश्व॑स्
Sentence: 4    तमे॒व सा॒क्षादृ॑ध्नोति
Sentence: 5    शक्व॑रयः पृ॒ष्ठम्भ॑वन्ति ।
Sentence: 6    अ॒न्यद॑न्य॒च्छन्द॑स् ।
Sentence: 7    अ॒न्ये॑ऽन्ये॒ वा ए॒ते प॒शव॒ आ ल॑भ्यन्त उ॒तेव॑ ग्रा॒म्या उ॒तेवार॒ण्यास् ।
Sentence: 8    यच्छक्व॑रयः पृ॒ष्ठम्भव॒न्त्यश्व॑स्य सर्व॒त्वाय
Sentence: 9    पार्थुर॒श्मम्ब्र॑ह्मसा॒मम्भ॑वति
Sentence: 10    र॒श्मिना॒ वा अश्वः॑ ।।

Verse: 3 
Sentence: 1    य॒तस् ।
Sentence: 2    ई॑श्व॒रो वा अश्वो ऽय॒तो ऽप्र॑तिष्ठितः॒ परा॑म्परा॒वतं॒ गन्तो॑स् ।
Sentence: 3    यत्पा॑र्थुर॒श्मम्ब्र॑ह्मसा॒मम्भव॒त्यश्व॑स्य॒ यत्यै॒ धृत्यै
Sentence: 4    संकृ॑त्यछावाकसा॒मम्भ॑वति ।
Sentence: 5    उ॑त्सन्नय॒ज्ञो वा ए॒ष यद॑श्वमे॒धः
Sentence: 6    कस्तद्वे॒देत्या॑हु॒र्यदि॒ सर्वो॑ वा क्रि॒यते॒ न वा॒ सर्व॒ इति
Sentence: 7    यत्संकृ॑त्यछावाकसा॒मम्भव॒त्यश्व॑स्य सर्व॒त्वाय॒ पर्या॑प्त्या॒ अन॑न्तरायाय
Sentence: 8    सर्व॑स्तोमो ऽतिरा॒त्र उ॑त्त॒ममह॑र्भवति॒ सर्व॒स्याप्त्यै॒ सर्व॑स्य॒ जित्यै
Sentence: 9    सर्व॑मे॒व तेना॑प्नोति॒ सर्वं॑ जयति ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.