TITUS
Black Yajur-Veda: Taittiriya-Samhita
Part No. 33
Previous part

Chapter: 5 
Paragraph: 1 
Verse: 1 
Sentence: 1    यदेके॑न संस्था॒पय॑ति य॒ज्ञस्य॒ संत॑त्या॒ अवि॑छेदाय ।
Sentence: 2    अै॒न्द्राः प॒शवो॒ ये मु॑ष्क॒रास् ।
Sentence: 3    यऐ॒न्द्राः सन्तो॒ ऽग्निभ्य॑ आल॒भ्यन्ते॑ दे॒वता॑भ्यः स॒मदं॑ दधाति ।
Sentence: 4    आ॑ग्ने॒यीस्त्रि॒ष्टुभो॑ याज्यानुवा॒क्याः॑ कुर्यात् ।
Sentence: 5    यद॑ग्ने॒यीस्तेना॑ग्ने॒यास् ।
Sentence: 6    यत्त्रि॒ष्टुभ॒स्तेनै॒न्द्राः
Sentence: 7    समृ॑द्ध्यै
Sentence: 8    न दे॒वता॑भ्यः स॒मदं॑ दधाति
Sentence: 9    वा॒यवे॑ नि॒युत॑वे तूप॒रमा ल॑भते॒ तेजो॒ ऽग्नेर्वा॒युस्
Sentence: 10    तेज॑स ए॒ष आ ल॑भ्यते
Sentence: 11    तस्मा॑द्य॒द्रिय॑ङ्वा॒युः ।।

Verse: 2 
Sentence: 1    वाति॑ त॒द्रिय॑ङ्ङ॒ग्निर्द॑हति
Sentence: 2    स्वमे॒व तत्तेजो ऽन्वे॑ति
Sentence: 3    यन्न नि॒युत्व॑ते॒ स्यादुन्मा॑द्ये॒द्यज॑मानस् ।
Sentence: 4    नि॒युत्व॑ते भवति॒ यज॑मान॒स्यानु॑न्मादाय
Sentence: 5    वायु॒मती॑ श्वे॒तव॑ती याज्यानुवा॒क्ये॑ भवतः
Sentence: 6    सतेज॒स्त्वाय
Sentence: 7    हिरण्यग॒र्भः{F सम्{W सं{GLOS सम् अवर्त॒ताग्र॒ इत्या॑घा॒रमा घा॑रयति
Sentence: 8    प्र॒जाप॑तिर्वै हिरण्यग॒र्भः
Sentence: 9    प्र॒जाप॑तेरनुरूप॒त्वाय
Sentence: 10    सर्वा॑णि॒ वा ए॒ष रू॒पाणि॑ पशू॒नाम्प्रत्या ल॑भ्यते
Sentence: 11    यच्छ्म॑श्रुण॒स्तत् ।।

Verse: 3 
Sentence: 1    पुरु॑षाणां रू॒पम् ।
Sentence: 2    यत्तू॑प॒रस्तदश्वा॑नाम् ।
Sentence: 3    यद॒न्यतो॑द॒न्तद्गवा॑म् ।
Sentence: 4    यदव्या॑ इव श॒पास्तदवी॑नाम् ।
Sentence: 5    यद॒जस्तद॒जाना॑म् ।
Sentence: 6    वा॒युर्वै॑ पशू॒नाम्प्रि॒यं धाम
Sentence: 7    यद्वा॑य॒व्यो॒ भव॑त्ये॒तमेवैनम॒भि सं॑जाना॒नाः प॒शव॒ उप॑ तिष्ठन्ते
Sentence: 8    वाय॒व्यः॑ का॒र्या३ः प्राजाप॒त्या३ इत्या॑हुस् ।
Sentence: 9    यद्वा॑य॒व्यं॑ कु॒र्यात्प्र॒जाप॑तेरियात् ।
Sentence: 10    यत्प्रा॑जाप॒त्यं कु॒र्याद्वा॒योः ।।

Verse: 4 
Sentence: 1    इ॑यात् ।
Sentence: 2    यद्वा॑य॒व्यः॑ प॒शुर्भव॑ति॒ तेन॑ वा॒योर्नै॑ति
Sentence: 3    यत्प्रा॑जाप॒त्यः पु॑रो॒डाशो॒ भव॑ति॒ तेन॑ प्रा॒जाप॑तेर्नैति
Sentence: 4    यद्द्वाद॑शकपाल॒स्तेन॑ वैश्वान॒रान्नै॑ति ।
Sentence: 5    आ॑ग्नावैष्ण॒वमेका॑दशकपालं॒ निर्व॑पति दीक्षि॒ष्यमा॑णस् ।
Sentence: 6    अ॒ग्निः सर्वा॑ दे॒वता॒ विष्णु॑र्य॒ज्ञस् ।
Sentence: 7    दे॒वता॑श्चै॒व य॒ज्ञं चा र॑भते ।
Sentence: 8    अ॒ग्निर॑व॒मो दे॒वता॑नां॒ विष्णुः॑ पर॒मस् ।
Sentence: 9    यदा॑ग्नावैष्ण॒वमेका॑दशकपालं नि॒र्वप॑ति दे॒वताः॑ ।।

Verse: 5 
Sentence: 1    ए॒वोभ॒यतः॑ परि॒गृह्य॒ यज॑मा॒नो ऽव॑ रुन्द्धे
Sentence: 2    पुरो॒डाशे॑न वै दे॒वा अ॒मुष्मिँ॑ लो॒क आ॑र्धुवञ्च॒रुणा॒स्मिन्
Sentence: 3    यः का॒मये॑त ।
Sentence: 4    अ॑मुष्मिँ लो॒क ऋ॑ध्नुया॒मिति॒ स पु॑रो॒डाशं॑ कुर्वीत ।
Sentence: 5    अ॒मुष्मि॑न्ने॒व लि॒क ऋ॑ध्नोति
Sentence: 6    यद॒ष्टाक॑पाल॒स्तेना॒ग्नेयस् ।
Sentence: 7    यत्त्रि॑कपा॒लस्तेन॑ वैष्ण॒वः
Sentence: 8    समृ॑द्ध्यै
Sentence: 9    यः का॒मये॑त ।
Sentence: 10    अ॒स्मिँ लो॒क ऋ॑ध्नुया॒मिति॒ स च॒रुं कु॑र्वीत ।
Sentence: 11    अ॒ग्नेर्घृ॒तं विष्णो॑स्तण्डु॒लास्
Sentence: 12    तस्मा॑त् ।।

Verse: 6 
Sentence: 1    च॒रुः का॒र्यस् ।
Sentence: 2    अ॒स्मिन्ने॒व लो॒क ऋ॑ध्नोति ।
Sentence: 3    आ॑दि॒त्यो भ॑वति ।
Sentence: 4    इ॒यं वा अदि॑तिस् ।
Sentence: 5    अ॒स्यामे॒व प्रति॑ तिष्ठ॒त्यथो॑ अ॒स्यामे॒वाधि॑ य॒ज्ञं त॑नुते
Sentence: 6    यो वै॑ संवत्स॒रमुख्य॒मभृ॑त्वा॒ग्निं चि॑नु॒ते यथा॑ सा॒मि गर्भो॑ ऽव॒पद्य॑ते ता॒दृगे॒व तत् ।
Sentence: 7    आर्ति॒मार्छे॑त् ।
Sentence: 8    वै॑श्वान॒रं द्वाद॑शकपालम्पु॒रस्ता॒न्निर्व॑पेत्
Sentence: 9    संवत्स॒रो वा अ॒ग्निर्वै॑श्वान॒रस् ।
Sentence: 10    यथा॑ संवत्स॒रमा॒प्त्वा ।।

Verse: 7 
Sentence: 1    का॒ल आग॑ते वि॒जाय॑त ए॒वमे॒व सं॑वत्स॒रमा॒प्त्वा का॒ल आग॑ते॒ ऽग्निं चि॑नुते
Sentence: 2    नार्ति॒मार्छ॑ति ।
Sentence: 3    ए॒षा वा अ॒ग्नेः प्रि॒या त॒नूर्यद्वै॑श्वान॒रः
Sentence: 4    प्रि॒यामे॒वास्य॑ त॒नुव॒मव॑ रुन्द्धे
Sentence: 5    त्रीण्ये॒तानि॑ हवींषि भवन्ति
Sentence: 6    त्रय॑ इ॒मे लो॒कास् ।
Sentence: 7    ए॒षां लो॒कानां॒ रोहा॑य ।।

Paragraph: 2 
Verse: 1 
Sentence: 1    प्र॒जाप॑तिः प्र॒जाः सृ॒ष्ट्वा प्रे॒णानु॒ प्रावि॑शत्
Sentence: 2    ताभ्यः॒ पुनः॒ सम्भ॑वितुं॒ नाश॑क्नोत्
Sentence: 3    सो॑ ऽब्रवीत् ।
Sentence: 4    ऋ॒ध्नव॒दित्स यो मे॒ ऽतः पुनः॑ संचिञव॒दिति
Sentence: 5    तं दे॒वाः सम॑चिन्वन्
Sentence: 6    ततो वै॒ त आ॑र्ध्नुवन्
Sentence: 7    यत्स॒मचि॑न्व॒न्तच्चित्य॑स्य चित्य॒त्वम् ।
Sentence: 8    य ए॒वं वि॒दान॒ग्निं चि॑नु॒त ऋ॒ध्नोत्ये॒व
Sentence: 9    कस्मै॒ कम॒ग्निश्ची॑यत॒ इत्या॑हुस् ।
Sentence: 10    अ॑ग्नि॒वान् ।।

Verse: 2 
Sentence: 1    अ॑सा॒नीति॒ वा अ॒ग्निश्ची॑यते ।
Sentence: 2    अ॑ग्नि॒वाने॒व भ॑वति
Sentence: 3    कस्मै॒ कम॒ग्निश्ची॑यत॒ इत्या॑हुस् ।
Sentence: 4    दे॒वा मा॑ वेद॒न्निति॒ वा अ॒ग्निश्ची॑यते
Sentence: 5    वि॒दुरे॑नं दे॒वाः
Sentence: 6    कस्मै॒ कम॒ग्निश्ची॑यत॒ इत्या॑हुस् ।
Sentence: 7    गृ॒ह्य॑सा॒नीति॒ वा अ॒ग्निश्ची॑यते
Sentence: 8    गृ॒ह्ये॒व भ॑वति
Sentence: 9    कस्मै॒ कम॒ग्निश्ची॑यत॒ इत्या॑हुः
Sentence: 10    पशु॒मान॑सा॒नीति॒ वा अ॒ग्निः ।।

Verse: 3 
Sentence: 1    ची॑यते
Sentence: 2    पशु॒माने॒व भ॑वति
Sentence: 3    कस्मै॒ कम॒ग्निश्ची॑यत॒ इत्या॑हुः
Sentence: 4    स॒प्त मा॒ पुरु॑षा॒ उप॑ जीवा॒निति॒ वा अ॒ग्निश्ची॑यते
Sentence: 5    त्रयः॒ प्राञ्च॒स्त्रयः॑ प्र॒त्यञ्च॑ आ॒त्मा स॑प्त॒म ए॒ताव॑न्त एवैनम॒मुष्मिँ॑ लो॒क उप॑ जीवन्ति
Sentence: 6    प्र॒जाप॑तिर॒ग्निम॑चिकीषत
Sentence: 7    तम्पृ॑थि॒व्य॑ब्रवीत् ।
Sentence: 8    न मय्य॒ग्निं चे॑ष्य॒सेति॑ मा धक्ष्यति॒ सा त्वा॑तिद॒ह्यमा॑ना॒ वि ध॑विष्ये ।।

Verse: 4 
Sentence: 1    स पापी॑यान्भविष्य॒सीति
Sentence: 2    सो॑ ऽब्रवीत्
Sentence: 3    तथा॒ वा अ॒हं क॑रिष्यामि॒ यथा॑ त्वा॒ नाति॑ध॒क्ष्यतीति
Sentence: 4    स इ॒माम॒भ्य॑मृशत्
Sentence: 5    प्र॒जाप॑तिस्त्वा सादयतु॒ तया॑ दे॒वत॑याङ्गिर॒स्वद्ध्रु॒वा सी॑द ।
Sentence: 6    इति॑ ।
Sentence: 7    इ॒मामे॒वेष्ट॑कां कृ॒त्वोपा॑ध॒त्तान॑तिदाहाय
Sentence: 8    यत्प्रत्य॒ग्निं चि॑न्वी॒त तद॒भि मृ॑शेत्
Sentence: 9    प्र॒जाप॑तिस्त्वा सादयतु॒ तया॑ दे॒वत॑याङ्गिर॒स्वद्ध्रु॒वा सी॑द ।।

Verse: 5 
Sentence: 1    इति॑ ।
Sentence: 2    इ॒मामे॒वष्ट॑कां कृ॒त्वोप॑ ध॒त्ते ऽन॑तिदाहाय
Sentence: 3    प्र॒जाप॑तिरकामयत
Sentence: 4    प्र जा॑ये॒येति
Sentence: 5    स ए॒तमुख्य॑मपश्यत्
Sentence: 6    तं सं॑वत्स॒रम॑बिभस्
Sentence: 7    ततो वै॒ स प्राजा॑यत
Sentence: 8    तस्मा॑त्संवत्स॒रम्भा॒र्यः प्रै॒व जा॑यते
Sentence: 9    तं वस॑वो ऽब्रुवन्
Sentence: 10    प्र त्वम॑जनिष्ठा व॒यम्प्र जा॑यामहा॒ इति
Sentence: 11    तं वसु॑भ्यः॒ प्राय॑छत्
Sentence: 12    तं त्रीण्यहा॑न्यबिभरुस्
Sentence: 13    तेन॑ ।।

Verse: 6 
Sentence: 1    त्रीणि॑ च श॒तान्यसृ॑जन्त॒ त्रय॑स्त्रिंशतं च
Sentence: 2    तस्मा॑त्त्र्य॒हम्भा॒र्यः प्रै॒व जा॑यते
Sentence: 3    तान्रु॒द्रा अ॑ब्रुवन्
Sentence: 4    प्र यू॒यम॑जनिढ्वं व॒यम्प्र जा॑यामहा॒ इति
Sentence: 5    तं रु॒द्रेभ्यः॒ प्राय॑छन्
Sentence: 6    तं षडहा॑न्यबिभरुस्
Sentence: 7    तेन॒ त्रीणि॑ च श॒तान्यसृ॑जन्त॒ त्रय॑स्त्रिंशतं च
Sentence: 8    तस्मा॑त्षड॒हम्भा॒र्यः प्रै॒व जा॑यते
Sentence: 9    ताना॑दि॒त्या अ॑ब्रुवन्
Sentence: 10    प्र यू॒यम॑जनिढ्वं व॒यम् ।।

Verse: 7 
Sentence: 1    प्र जा॑यामहा॒ इति
Sentence: 2    तमा॑दि॒त्येभ्यः॒ प्राय॑छन्
Sentence: 3    तं द्वाद॒शाहा॑न्यबिभरुस्
Sentence: 4    तेन॒ त्रीणि॑ च श॒तान्यसृ॑जन्त॒ त्रय॑स्त्रिंशतं च
Sentence: 5    तस्मा॑द्द्वादशा॒हम्भा॒र्यः प्रै॒व जा॑यते
Sentence: 6    तेनै॒व ते स॒हस्र॑मसृजन्तो॒खां स॑हस्रत॒मीम् ।
Sentence: 7    य ए॒वमुख्यं॑ साह॒स्रं वेद॒ प्र स॑हस्रम्प॒शूना॑प्नोति ।।

Paragraph: 3 
Verse: 1 
Sentence: 1    यजु॑षा{F वा{W वा{GLOS वा ए॒षा क्रि॑यते॒ यजु॑षा पच्यते॒ यजु॑षा॒ वि मु॑च्यते॒ यदु॒खा
Sentence: 2    सा वा एषै॒तर्हि॑ या॒तया॑म्नी॒ सा न पुनः॑ प्र॒युज्येत्या॑हुस् ।
Sentence: 3    अग्ने॑ यु॒क्ष्वा हि ये तव॑ यु॒क्ष्वा हि दे॑व॒हूत॑मां॒ इत्यु॒खायां॑ जुहोति
Sentence: 4    तेनैवैना॒म्पुनः॒ प्र यु॑ङ्क्ते॒ तेनाया॑तयाम्नी
Sentence: 5    यो वा अ॒ग्निं यो॒ग आग॑ते यु॒नक्ति॑ यु॒ङ्क्ते यु॑ञ्जा॒नेषु॑ ।
Sentence: 6    अग्ने॑ ।।

Verse: 2 
Sentence: 1    यु॒क्ष्वा हि ये तव॑ यु॒क्ष्वा हि दे॑व॒हूत॑मां॒ इत्या॑ह ।
Sentence: 2    ए॒ष वा अ॒ग्नेर्योग॑स्
Sentence: 3    तेनैवैनं युनक्ति यु॒ङ्क्ते यु॑ञ्जा॒नेषु
Sentence: 4    ब्रह्मवा॒दिनो॑ वदन्ति
Sentence: 5    न्य॑ङ्ङ॒ग्निश्चे॑त॒व्या३ उ॑त्ता॒ना३ इति
Sentence: 6    वय॑सां॒ वा ए॒ष प्र॑ति॒मया॑ चीयते॒ यद॒ग्निस् ।
Sentence: 7    यन्न्य॑ञ्चं चिनु॒यात्पृ॑ष्टि॒त ए॑न॒माहु॑तय ऋछेयुस् ।
Sentence: 8    यदु॑त्ता॒नं न पति॑तुं शक्नुया॒दसु॑वर्ग्यो ऽस्य स्यात्
Sentence: 9    प्रा॒चीन॑मुत्ता॒नम् ।।

Verse: 3 
Sentence: 1    पु॑रुषशी॒षमुप॑ दधाति मुख॒त एवैन॒माहु॑तय ऋछन्ति॒ नोत्ता॒नं चि॑नुते सुव॒र्ग्यो॑ ऽस्य भवति
Sentence: 2    सौ॒र्या जु॑होति॒ चक्षु॑रे॒वास्मि॒न्प्रति॑ दधाति
Sentence: 3    द्विर्जु॑होति॒ द्वे हि चक्षु॑षी
Sentence: 4    समा॒न्या जु॑होति समा॒नं हि चक्षुः॒ समृ॑द्ध्यै
Sentence: 5    देवासु॒राः संय॑त्ता आसन्
Sentence: 6    ते वा॒मं वसु॒ सं न्य॑दधत
Sentence: 7    तद्दे॒वा वा॑म॒भृता॑वृञ्जत
Sentence: 8    तद्वा॑म॒भृतो॑ वामभृ॒त्त्वम् ।
Sentence: 9    यद्वा॑म॒भृत॑मुप॒दधा॑ति वा॒ममे॒व तया॒ वसु॒ यज॑मानो॒ भ्रातृ॑व्यस्य वृङ्क्ते
Sentence: 10    हिर॑ण्यमूर्ध्नी भवति
Sentence: 11    ज्योतिर्वै॒ हिर॑ण्यं॒ ज्योति॑र्वा॒मम् ।
Sentence: 12    ज्योति॑षै॒वास्य॒ ज्योति॑र्वा॒मं वृ॑ङ्क्ते
Sentence: 13    द्विय॒जुर्भ॑वति॒ प्रति॑ष्ठित्यै ।।

Paragraph: 4 
Verse: 1 
Sentence: 1    आपो॒ वरु॑णस्य॒ पत्न॑य आस॒न्ता अ॒ग्निर॒भ्य॑ध्याय॒त्ताः सम॑भव॒त्तस्य॒ रेतः॒ परा॑पत॒त्तदि॒यम॒यं वै॑ वि॒राडसौ स्वराड्^स्व॒राज्
Sentence: 2    यद्वि॒राजा॑वुप॒दधा॑ती॒मे ए॒वोप॑ धत्ते
Sentence: 3    यद्वा असौ॒ रेतः॑ सि॒ञ्चति॒ तद॒स्याम्प्रति॑ तिष्ठति॒ तत्प्र जा॑यते॒ ता ओष॑धयः ।।

Verse: 2 
Sentence: 1    वी॒रुधो॑ भवन्ति॒ ता अ॒ग्निर॑त्ति॒ य ए॒वं वेद प्रै॒व जा॑यते ऽन्ना॒दो भ॑वति॒ यो रे॑त॒स्वी स्यातयां॒ तस्य॒ चित्या॑मु॒भे उप॑ दध्यादि॒मे ए॒वास्मै॑ स॒मीची॒ रेतः॑ सिञ्चतो॒ यः सि॒क्तरे॑ताः॒ स्यात्प्र॑थ॒मायां॒ तस्य॒ चित्या॑म॒न्यामुप॑ दध्यादुत्त॒माया॑म॒न्यां रेत॑ ए॒वास्य॑ सि॒क्तमा॒भ्यामु॑भ॒यतः॒ परि॑ गृह्णाति
Sentence: 2    संवत्स॒रं न कम् ।।

Verse: 3 
Sentence: 1    च॒न प्र॒त्यव॑रोहे॒न्न हीमे कं च॒न प्र॑त्यव॒रोह॑त॒स्तदे॑नयोर्व्र॒तम् ।
Sentence: 2    यो वा अप॑शीर्षाणम॒ग्निं चि॑नु॒ते ऽप॑शीर्षा॒मुष्मिँ॑ लो॒के भ॑वति॒ यः सशी॑र्षाणं चिनु॒ते सशी॑र्षा॒मुष्मिँ॑ लो॒के भ॑वति
Sentence: 3    चित्तिं॑ जुहोमि॒ मन॑सा घृ॒तेन॒ यथा॑ दे॒वा इ॒हागम॑न्वी॒तिहो॑त्रा ऋता॒वृधः॑ समु॒द्रस्य॑ व॒युन॑स्य॒ पत्म॑ञ्जुहोमि वि॒श्वक॑र्मणे॒ विश्वाहाम॑र्त्यं ह॒विरिति॑ स्वयमातृ॒ण्णामु॑पय॑ जुहोति ।।

Verse: 4 
Sentence: 1    ए॒तद्वा अ॒ग्नेः शिरः॒ सशी॑र्षाणमे॒वाग्निं चि॑नुते॒ सशी॑र्षा॒मुष्मिँ॑ लो॒के भ॑वति॒ य ए॒वं वेद
Sentence: 2    सुव॒र्गाय॒ वा ए॒ष लो॒काय॑ चीयते॒ यद॒ग्निस्तस्य॒ यदय॑थापूर्वं क्रि॒यते ऽसु॑वर्ग्यमस्य॒ तत्सु॑व॒र्ग्यो॒ ऽग्निस् ।
Sentence: 3    चिति॑मुप॒धाया॒भि मृ॑शेत् ।
Sentence: 4    चित्ति॒मचि॑त्तिं चिनव॒द्वि वि॒द्वान्पृ॒ष्ठेव॑ वी॒ता वृ॑जि॒ना च॒ मर्ता॑न्रा॒ये च॑ नः स्वप॒त्याय॑ देव॒ दितिं॑ च॒ रास्वादि॑तिमुरु॒ष्येति॑ यथापू॒र्वमेवैना॒मुप॑ धत्ते
Sentence: 5    प्राञ्च॑मेनं चिनुते सुव॒र्ग्यो॑ ऽस्य भवति ।।

Paragraph: 5 
Verse: 1 
Sentence: 1    वि॒श्वक॑र्मा दि॒शाम्पतिः॒ स नः॑ प॒शून्पा॑तु॒ सो॒ ऽस्मान्पा॑तु॒ तस्मै॒ नमः
Sentence: 2    प्र॒जाप॑ती रु॒द्रो वरु॑णो॒ ऽग्निर्दि॒शाम्पतिः॒ स नः॑ प॒शून्पा॑तु॒ सो॒ ऽस्मान्पा॑तु॒ तस्मै॒ नम॑स् ।
Sentence: 3    ए॒ता वै॑ दे॒वता॑ ए॒तेषा॑म्पशू॒नामधि॑पतयस्
Sentence: 4    ताभ्यो॒ वा ए॒ष आ वृ॑श्च्यते॒ यः प॑शुशी॒र्षाण्यु॑प॒दधा॑ति
Sentence: 5    हिरण्येष्ट॒का उप॑ दधाति ।
Sentence: 6    ए॒ताभ्य॑ ए॒व दे॒वता॑भ्यो॒ नम॑स्करोति
Sentence: 7    ब्रह्मवा॒दिनः॑ ।।

Verse: 2 
Sentence: 1    व॑दन्ति ।
Sentence: 2    अग्नौ ग्रा॒म्यान्प॒शून्प्र द॑धाति शु॒चार॒ण्यान॑र्पयति॒ किं तत॒ उच्छिं॑ष॒तीति
Sentence: 3    यद्धि॑रण्येष्ट॒का उ॑प॒दधा॑त्य॒मृतं वै॒ हिर॑ण्यम॒मृते॑नै॒व ग्रा॒म्येभ्यः॑ प॒शुभ्यो॑ भेष॒जं क॑रोति नैनान्हिनस्ति
Sentence: 4    प्रा॒णो वै॑ प्रथ॒मा स्व॑यमातृ॒ण्णा व्या॒नो द्वि॒तीया॑पा॒नस्तृ॒तीया॑ ।
Sentence: 5    अनु॒ प्राण्या॑त्प्रथ॒मां स्व॑यमातृ॒ण्णामु॑प॒धाय
Sentence: 6    प्राणेनै॒व प्रा॒णं सम॑र्धयति
Sentence: 7    व्य॑न्यात् ।।

Verse: 3 
Sentence: 1    द्वि॒तीया॑मुप॒धाय
Sentence: 2    व्या॒नेनै॒व व्या॒नं सम॑र्धयति ।
Sentence: 3    अपा॑न्यात्तृ॒तीया॑मुप॒धाय॑ ।
Sentence: 4    अ॑पा॒नेनै॒वापा॒नं सम॑र्धयति ।
Sentence: 5    अथो॑ प्राणैरेवैनं॒ समि॑न्द्धे
Sentence: 6    भूर्भुवः॒ सुव॒रिति॑ स्वयमातृ॒ण्णा उप॑ दधति ।
Sentence: 7    इ॒मे वै॑ लो॒काः स्व॑यमातृ॒ण्णास् ।
Sentence: 8    ए॒ताभिः॒ खलु वै॒ व्याहृ॑तीभिः प्र॒जाप॑तिः॒ प्राजा॑यत
Sentence: 9    यदे॒ताभि॒र्व्याहृ॑तीभिः स्वयमातृ॒ण्णा उ॑प॒दधा॑ती॒माने॒व लो॒कानु॑प॒धायै॒षु ।।

Verse: 4 
Sentence: 1    लो॒केष्वधि॒ प्र जा॑यते
Sentence: 2    प्रा॒णाय॑ व्या॒नाया॑पा॒नाय॑ वा॒चे त्वा॒ चक्षु॑षे त्वा॒ तया॑ दे॒वत॑याङ्गिर॒स्वद्ध्रु॒वा सी॑द ।
Sentence: 3    अ॒ग्निना वै दे॒वाः सु॑व॒र्गं लो॒कम॑जिगांसन्
Sentence: 4    तेन॒ पति॑तुं॒ नाश॑क्नुवन्
Sentence: 5    त ए॒ताश्चत॑स्रः स्वयमातृ॒ण्णा अ॑पश्यन्
Sentence: 6    ता दि॒क्षूपा॑दधत
Sentence: 7    तेन॑ स॒र्वत॑श्चक्षुषा सुव॒र्गं लो॒कमा॑यन्
Sentence: 8    यच्चत॑स्रः स्वयमातृ॒ण्णा दि॒क्षूप॒दधा॑ति स॒र्वत॑श्चक्षुषै॒व तद॒ग्निना॒ यज॑मानः सुव॒र्गं लो॒कमे॑ति ।।

Paragraph: 6 
Verse: 1 
Sentence: 1=a    अग्न॒ आ या॑हि वी॒तये॑ ।
Sentence: 2    इत्या॒हाह्व॑तैवैनम्
Sentence: 3=b    अ॒ग्निं दू॒तं वृ॑णीमहे ।
Sentence: 4    इत्या॑ह हुत्वैवैनं वृणीते ।
Sentence: 5=c    अ॒ग्निना॒ग्निः समि॑ध्यते ।
Sentence: 6    इत्या॑ह॒ समि॑न्द्ध एवैनम्
Sentence: 7=d    अ॒ग्निर्वृ॒त्राणि॑ जङ्घनत् ।
Sentence: 8    इत्या॑ह॒ समि॑द्ध ए॒वास्मि॑न्निन्द्रि॒यं द॑धाति ।
Sentence: 9=e    अ॒ग्ने स्तोम॑म्मनामहे ।
Sentence: 10    इत्या॑ह मनु॒त एवैनम्
Sentence: 11    ए॒तानि॒ वा अह्नां॑ रू॒पाणि॑ ।।

Verse: 2 
Sentence: 1    अ॑न्व॒हमेवैनं चिनुते ।
Sentence: 2    अवा॑ह्नां रू॒पाणि॑ रुन्द्धे
Sentence: 3    ब्रह्मवा॒दिनो॑ वदन्ति
Sentence: 4    कस्मा॑त्स॒त्याद्यातया॑म्नीर॒न्या इष्ट॑का॒ अय॑तयाम्नी लोकम्पृ॒णेत्ऐ॑न्द्रा॒ग्नी हि बा॑र्हस्प॒त्येति॑ ब्रूयात् ।
Sentence: 5    इ॑न्द्रा॒ग्नी च॒ हि दे॒वाना॒म्बृह॒स्पति॒श्चाया॑तयामानस् ।
Sentence: 6    अ॑नुच॒रव॑ती भवति ।
Sentence: 7    अजा॑मित्वाय ।
Sentence: 8    अ॑नु॒ष्टुभानु॑ चरति ।
Sentence: 9    आ॒त्मा वै॑ लोकम्पृ॒णा प्रा॒णो॑ ऽनु॒ष्टुप्तस्मा॑त्प्रा॒णःसर्वा॒ण्यङ्गा॒न्यनु॑ चरति
Sentence: 10    ता अ॑स्य॒ सूद॑दोहसः ।।

Verse: 3 
Sentence: 1    इत्या॑ह
Sentence: 2    तस्मा॒त्परु॑षिपरुषि॒ रसः
Sentence: 3    सोमं॑ श्रीणन्ति॒ पृशु॑नय॒ इत्या॑ह ।
Sentence: 4    अन्नं वै॒ पृश्न्यन्न॑मे॒वाव॑ रुन्द्धे ।
Sentence: 5    अ॒र्को वा अ॒ग्निर॒क्रो ऽन्न॒मन्न॑मे॒वाव॑ रुन्द्धे
Sentence: 6    जन्म॑न्दे॒वानां॒ विश॑स्तृ॒ष्वा रो॑च॒ने दि॒व इत्या॑ह ।
Sentence: 7    इ॒माने॒वास्मै॑ लो॒काञ्ज्योति॑ष्मतः करोति
Sentence: 8    यो वा इष्ट॑कानाम्प्रति॒ष्ठां वेद॒ प्रत्ये॒व ति॑ष्ठति
Sentence: 9    तया॑ दे॒वत॑याङ्गिर॒स्वद्ध्रु॒वा सी॒देत्या॑ह ।
Sentence: 10    ए॒षा वा इष्ट॑कानाम्प्रति॒ष्ठा य ए॒वं वेद॒ प्रत्ये॒व ति॑ष्ठति ।।

Paragraph: 7 
Verse: 1 
Sentence: 1    सु॑व॒र्गाय॒ वा ए॒ष लो॒काय॑ चीयते॒ यद॒ग्निस् ।
Sentence: 2    वज्र॑ एकाद॒शिनी
Sentence: 3    यद॒ग्नावे॑काद॒शिनी॑म्मिनु॒याद्वज्रे॑णैनं सुव॒र्गाल्लो॒काद॒न्तर्द॑ध्यात् ।
Sentence: 4    यन्न मि॑नु॒यात्स्वरु॑भिः प॒शून्व्य॑र्धयेत् ।
Sentence: 5    ए॑कयू॒पम्मि॑नोति
Sentence: 6    नैनं॒ वज्रे॑ण सुव॒र्गाल्लो॒काद॑न्त॒र्दधा॑ति॒ न स्वरु॑भिः प॒शून्व्य॑र्धयति
Sentence: 7    वि वा ए॒ष इ॑न्द्रि॒येण॑ वी॒र्ये॑णर्ध्यते॒ यो॒ ऽग्निं चि॒न्वन्न॑धि॒क्राम॑ति ।
Sentence: 8    अै॑न्द्रि॒या ।।

Verse: 2 
Sentence: 1    ऋ॒चाक्रम॑ण॒म्प्रतीष्ट॑का॒मुप॑ दध्यात् ।
Sentence: 2    नेन्द्रि॒येण॑ वी॒र्ये॑ण॒ व्यृ॑ध्यते
Sentence: 3    रु॒द्रो वा ए॒ष यद॒ग्निस्
Sentence: 4    तस्य॑ ति॒स्रः श॑र॒व्याः॑ प्र॒तीची॑ ति॒रश्च्य॒नूची
Sentence: 5    ताभ्यो॒ वा ए॒ष आ वृ॑श्च्यते॒ यो॒ ऽग्निं चि॑नु॒ते ।
Sentence: 6    अ॒ग्निं चि॒त्वा ति॑सृध॒न्वमया॑चितम्ब्राह्म॒णाय॑ दद्यात्
Sentence: 7    ताभ्य॑ ए॒व नम॑स्करोति ।
Sentence: 8    अथो॒ ताभ्य॑ ए॒वात्मानं॒ निष्क्री॑नीते
Sentence: 9    यत्ते॑ रुद्र पु॒रः ।।

Verse: 3 
Sentence: 1    धनु॒स्तद्वातो॒ अनु॑ वातु ते
Sentence: 2    तस्मै॑ ते रुद्र संवत्स॒रेण॒ नम॑स्करोमि
Sentence: 3    यत्ते॑ रुद्र दक्षि॒णा धनु॒स्तद्वातो॒ अनु॑ वातु ते
Sentence: 4    तस्मै॑ ते रुद्र परिवत्स॒रेण॒ नम॑स्करोमि
Sentence: 5    यत्ते॑ रुद्र प॒श्चाद्धनु॒स्तद्वातो॒ अनु॑ वातु ते
Sentence: 6    तस्मै॑ ते रुद्रेदावत्स॒रेण॒ नम॑स्करोमि
Sentence: 7    यत्ते॑ रुद्रोत्त॒राद्धनु॒स्तत् ।।

Verse: 4 
Sentence: 1    वातो॒ अनु॑ वातु ते
Sentence: 2    तस्मै॑ ते रुद्रेदुवत्स॒रेण॒ नम॑स्करोमि
Sentence: 3    यत्ते॑ रुद्रो॒परि॒ धनु॒स्तद्वातो॒ अनु॑ वातु ते
Sentence: 4    तस्मै॑ ते रुद्र वत्स॒रेण॒ नम॑स्करोमि
Sentence: 5    रु॒द्रो वा ए॒ष यद॒ग्निः
Sentence: 6    स यथा॑ व्या॒घ्रः क्रु॒द्धस्तिष्ठ॑त्ये॒वं वा ए॒ष ए॒तर्हि
Sentence: 7    संचि॑तमेतै॒रुप॑ तिष्ठते
Sentence: 8    नमस्कारैरेवैनं शमयति
Sentence: 9    ये ऽग्नयः॑ ।।

Verse: 5 
Sentence: 1    पु॑री॒ष्याः॒ प्रवि॑ष्टाः पृथि॒वीमनु॑ ।
Sentence: 2    तेषां॒ त्वम॑स्युत्त॒मः प्र णो॑ जी॒वात॑वे सुव ।।
Sentence: 3    आपं॑ त्वाग्ने॒ मन॑सा ।
Sentence: 4    आपं॑ त्वाग्ने॒ तप॑सा ।
Sentence: 5    आपं॑ त्वाग्ने दी॒क्षया॑ ।
Sentence: 6    आपं॑ त्वाग्न उप॒सद्भि॑स् ।
Sentence: 7    आपं॑ त्वाग्ने सु॒त्यया॑ ।
Sentence: 8    आपं॑ त्वाग्ने॒ दक्षि॑णाभिस् ।
Sentence: 9    आपं॑ त्वाग्ने ऽवभृ॒थेन॑ ।
Sentence: 10    आपं॑ त्वाग्ने व॒शया॑ ।
Sentence: 11    आपं॑ त्वाग्ने स्वगाका॒रेणेत्या॑ह ।
Sentence: 12    ए॒षा वा अ॒ग्नेराप्ति॑स्
Sentence: 13    तयैवैनमाप्नोति ।।

Paragraph: 8 
Verse: 1 
Sentence: 1    गा॑य॒त्रेण॑ पु॒रस्ता॒दुप॑ तिष्ठते प्रा॒णमे॒वास्मि॑न्दधाति
Sentence: 2    बृह॑द्रथंत॒राभ्या॑म्प॒क्षावोज॑ ए॒वास्मि॑न्दधाति ।
Sentence: 3    ऋ॑तु॒स्थाय॑ज्ञाय॒ज्ञिये॑न॒ पुछ॑मृ॒तुष्वे॒व प्रति॑ तिष्ठति
Sentence: 4    पृष्ठै॒रुप॑ तिष्ठते
Sentence: 5    तेजो वै पृ॒ष्ठानि
Sentence: 6    तेज॑ ए॒वास्मि॑न्दधाति
Sentence: 7    प्र॒जाप॑तिर॒ग्निम॑सृजत
Sentence: 8    सो॑ ऽस्मात्सृ॒ष्टः परा॑ऐत्
Sentence: 9    तं वा॑रव॒न्तीये॑नावारयत॒ तद्वा॑रव॒न्तीय॑स्य वारवन्तीय॒त्वम् ।
Sentence: 10    श्यै॒तेन॑ श्ये॒ती अ॑कुरुत॒ तच्छ्यै॒तस्य॑ श्यैत॒त्वम् ।।

Verse: 2 
Sentence: 1    यद्वा॑रव॒न्तीये॑नोप॒तिष्ठ॑ते वा॒रय॑त एवैनम् ।
Sentence: 2    श्यै॒तेन॑ श्ये॒ती कु॑रुते
Sentence: 3    प्र॒जाप॑ते॒र्हृद॑येनापिप॒क्षम्प्रत्युप॑ तिष्ठते
Sentence: 4    प्रे॒माण॑मे॒वास्य॑ गछति
Sentence: 5    प्राच्या॑ त्वा दि॒शा सा॑दयामि गाय॒त्रेण॒ छन्द॑सा॒ग्निना॑ दे॒वत॑या॒ग्नेः शी॒र्ष्णाग्नेः शिर॒ उप॑ दधामि
Sentence: 6    दक्षि॑णया त्वा दि॒शा सा॑दयामि त्रैष्टुभेन॒ छन्द॒सेन्द्रे॑ण दे॒वत॑या॒ग्नेः प॒क्षेणा॒ग्नेः प॒क्षमुप॑ दधामि
Sentence: 7    प्र॒तीच्या॑ त्वा दि॒शा सा॑दयामि ।।

Verse: 3 
Sentence: 1    जाग॑तेन॒ छन्द॑सा सवि॒त्रा दे॒वत॑या॒ग्नेः पुछे॑ना॒ग्नेः पुछ॒मुप॑ दधामि ।
Sentence: 2    उदी॑च्या त्वा दि॒शा सा॑दया॒म्यानु॑ष्टुभेन॒ छन्द॑सा मि॒त्रावरु॑णाभ्यां दे॒वत॑या॒ग्नेः प॒क्॒ग्नेः प॒क्षमुप॑ दधामि ।
Sentence: 3    ऊ॒र्ध्वया॑ त्वा दि॒शा सा॑दयामि॒ पाङ्क्ते॑न॒ छन्द॑सा॒ बृह॒स्पति॑ना दे॒वत॑या॒ग्नेः पृ॒ष्ठेना॒ग्नेः पृ॒ष्ठमुप॑ दधामि
Sentence: 4    यो वा अपा॑त्मानम॒ग्निं चि॑नु॒ते ऽपा॑त्मा॒मुष्मिँ॑ लो॒के भ॑वति
Sentence: 5    यः सात्मा॑नं{F चिनु॒ते{W चि॑नुते{GLOS चिनु॒ते सात्मा॒मुष्मिँ॑ लो॒के भ॑वति ।
Sentence: 6    आ॑त्मेष्ट॒का उप॑ दधाति ।
Sentence: 7    ए॒ष वा अ॒ग्नेरा॒त्मा
Sentence: 8    सात्मा॑नमे॒वाग्निं चि॑नुते
Sentence: 9    सात्मा॒मुष्मिँ॑ लो॒के भ॑वति॒ य ए॒वं वेद॑ ।।

Paragraph: 9 
Verse: 1 
Sentence: 1=a    अग्न॑ उदधे॒ या त॒ इषु॑र्यु॒वा नाम॒ तया॑ नो मृड॒ तस्या॑स्ते॒ नम॒स्तस्या॑स्त॒ उप॒ जीव॑न्तो भूयासम ।
Sentence: 2=b    अग्ने॑ दुध्र
Sentence: 3=c    गह्य
Sentence: 4=d    किंशिल
Sentence: 5=e    वन्य॒ या त॒ इषु॑र्यु॒वा नाम॒ तया॑ नो मृड॒ तस्या॑स्ते॒ नम॒स्तस्या॑स्त॒ उप॒ जीव॑न्तो भूयास्म
Sentence: 6=f    पञ्च॒ वा ए॒ते॒ ऽग्नयो॒ यच्चित॑य उद॒धिरे॒व नाम॑ प्रथ॒मो दु॒ध्रः ।।

Verse: 2 
Sentence: 1    द्वि॒तीयो॒ गह्य॑स्तृ॒तीयः॑ किंशि॒लश्च॑तु॒र्थो वन्यः॑ पञ्च॒मस्तेभ्यो॒ यदाहु॑ती॒र्न जु॑हु॒य॒र्युं च॒ यज॑मानं च॒ प्र द॑हेयु॒र्यदे॒ता आहु॑तीर्जु॒होति॑ भाग॒धेये॑नैवैनाञ्छमयति॒ नार्ति॒मर्न यज॑मानस् ।
Sentence: 2=g    वाङ्म॑ आ॒सन्न॒सोः प्रा॒णो॒ ऽक्ष्योश्चक्षुः॒ कर्ण॑योः॒ श्रोत्र॑म्बाहु॒वोर्बल॑मूरु॒वोरोजो ऽरि॑ष्टा॒ विश्वा॒न्यङ्गा॑नि त॒नूः ।।

Verse: 3 
Sentence: 1    त॒नुवा॑ मे स॒ह नम॑स्ते अस्तु॒ मा मा॑ हिंसीस् ।
Sentence: 2=h    अप॒ वा ए॒तस्मा॑त्प्रा॒णाः क्रा॑मन्ति॒ यो॒ ऽग्निं चि॒न्वन्न॑धि॒क्राम॑ति॒ वाङ्म॑ आ॒सन्न॒सोः प्रा॒णस् ।
Sentence: 3    इत्या॑ह प्रा॒णाने॒वात्मन्ध॑त्ते
Sentence: 4=i    यो रु॒द्रो अग्नौ॒ यो अ॒प्सु य ओष॑धीषु॒ यो रु॒द्रो विश्वा॒ भुव॑नावि॒वेश॒ तस्मै॑ रु॒द्राय॒ नमो॑ अस्तु ।
Sentence: 5=k    आहु॑तिभागा॒ वा अ॒न्ये रु॒द्रा ह॒विर्भा॑गाः ।।

Verse: 4 
Sentence: 1    अ॒न्ये श॑तरु॒द्रीयं॑ हु॒त्वा गा॑वीधु॒कं च॒रुमे॒तेन॒ यजु॑षा चर॒माया॒मिष्ट॑कायां॒ नि द॑ध्यादनं शमयति॒ तस्य त्वै शतरु॒द्रीयं॑ हु॒तम्
Sentence: 2    इत्या॑हु॒र्यस्यै॒तदग्नौ क्रि॒यत॒ इति
Sentence: 3=l    वस॑वस्त्वा रुद्रैः पु॒रस्ता॑त्पान्तु पि॒तर॑स्त्वा य॒मरा॑जानः पि॒तृभि॑र्दक्षिण॒तः पा॑न्त्वस्त्वा॒ विश्वै॑र्देवैः प॒श्चात्पा॑न्तु द्युता॒नस्त्वा॑ मारु॒तो म॒रुद्भि॑रुत्तर॒तः पा॑तु ।५   दे॒वास्त्वेन्द्र॑ज्येष्ठा॒ वरु॑णराजानो॒ ऽधस्ता॑च्चो॒परि॑ष्ठाच्च पान्तु

Verse: 5 
Sentence: 1=m    न वा ए॒तेन॑ पू॒तो न मेध्यो॒ न प्रोक्षि॑तो॒ यदे॑न॒मतः॑ प्रा॒चीन॑म्प्रो॒क्षति॒ यत्संचि॑त॒माज्॑न प्रो॒क्षति॒ तेन॑ पू॒तस्तेन॒ मेध्य॒स्तेन॒ प्रोक्षि॑तः ।।

Paragraph: 10 
Verse: 1 
Sentence: 1=a    स॒मीची॒ नामा॑सि॒ प्राची दिक्^दिश्
Sentence: 2    तस्या॑स्ते॒ ऽग्निरधि॑पतिरसि॒तो र॑क्षि॒ता
Sentence: 3    यश्चाधि॑पति॒र्यश्च॑ गो॒प्ता ताभ्यां॒ नमस्तौ नो मृडयताम् ।
Sentence: 4    ते यं द्वि॒ष्मो यश्च॑ नो॒ द्वेष्टि॒ तं वां॒ जम्भे॑ दधामि ।
Sentence: 5    ओ॑ज॒स्विनी॒ नामा॑सि दक्षि॒णा दिक्^दिश्
Sentence: 6    तस्या॑स्त॒ इन्द्रो ऽधि॑पतिः॒ पृदा॑कुः
Sentence: 7    प्राची॒ नामा॑सि प्र॒तीची दिक्^दिश्
Sentence: 8    तस्या॑स्ते ।।

Verse: 2 
Sentence: 1    सोमो ऽधि॑पतिः स्व॒जस् ।
Sentence: 2    अ॑व॒स्थावा॒ नामा॒स्युदी॑ची दिक्^दिश्
Sentence: 3    तस्या॑स्ते॒ वरु॒णो ऽधि॑पतिस्ति॒रश्च॑राजिस् ।
Sentence: 4    अधि॑पत्नी॒ नामा॑सि बृह॒ती दिक्^दिश्
Sentence: 5    तस्या॑स्ते॒ बृह॒स्पति॒रधि॑पतिः श्वि॒त्रस् ।
Sentence: 6    व॒शिनी॒ नामा॑सी॒यं दिक्^दिश्
Sentence: 7    तस्या॑स्ते य॒मो ऽधि॑पतिः क॒ल्माष॑ग्रीवो रक्षि॒ता
Sentence: 8    यश्चाधि॑पति॒र्यश्च॑ गो॒प्ता ताभ्यां॒ नमस्तौ नो मृडयताम् ।
Sentence: 9    ते यं द्वि॒ष्मो यश्च॑ ।।

Verse: 3 
Sentence: 1    नो॒ द्वेष्टि॒ तं वां॒ जम्भे॑ दधामि ।
Sentence: 2=b    ए॒ता वै॑ दे॒वता॑ अ॒ग्निं चि॒तं र॑क्षन्ति
Sentence: 3    ताभ्यो॒ यदाहु॑ती॒र्न जु॑हु॒याद॑ध्व॒र्युं च॒ यज॑मानं च ध्यायेयुस् ।
Sentence: 4    यदे॒ता आहु॑तीर्जु॒होति॑ भाग॒धेये॑नैवैनाञ्छमयति
Sentence: 5    नार्ति॒मार्छ॑त्यध्व॒र्युर्न यज॑मानस् ।
Sentence: 6=c    हे॒तयो॒ नाम॑ स्थ
Sentence: 7    तेषां॑ वः पु॒रो गृ॒हास् ।
Sentence: 8    अ॒ग्निर्व॒ इष॑वः सलि॒लस् ।
Sentence: 9    नि॑लि॒म्पा नाम॑ ।।

Verse: 4 
Sentence: 1    स्थ
Sentence: 2    तेषां॑ वो दक्षि॒णा गृ॒हाः
Sentence: 3    पि॒तरो॑ व॒ इष॑वः॒ सग॑रस् ।
Sentence: 4    व॒ज्रिणो॒ नाम॑ स्थ
Sentence: 5    तेषां॑ वः प॒श्चाद्गृ॒हाः
Sentence: 6    स्वप्नो॑ व॒ इष॑वो॒ गह्व॑रस् ।
Sentence: 7    अ॑व॒स्थावा॑नो॒ नाम॑ स्थ
Sentence: 8    तेषां॑ व उत्त॒राद्गृ॒हास् ।
Sentence: 9    आपो॑ व॒ इष॑वः समु॒द्रस् ।
Sentence: 10    अधि॑पतयो॒ नाम॑ स्थ
Sentence: 11    तेषां॑ व उ॒परि॑ गृ॒हास् ।
Sentence: 12    व॒र्षं व॒ इष॒वो ऽव॑स्वान्
Sentence: 13    क्र॒व्या नाम॑ स्थ॒ पार्थि॑वास्
Sentence: 14    तेषां॑ व इ॒ह गृ॒हाः ।।

Verse: 5 
Sentence: 1    अन्नं॑ व॒ इष॑वो निमि॒षो वा॑तना॒मम् ।
Sentence: 2    तेभ्यो॑ वो॒ नम॑स्
Sentence: 3    ते नो॑ मृडयत
Sentence: 4    ते यं द्वि॒ष्मो यश्च॑ नो॒ द्वेष्टि॒ तं वो॒ जम्भे॑ दधामि
Sentence: 5=d    हु॒तादो॒ वा अ॒न्ये दे॒वा अ॑हु॒तादो॒ ऽन्ये
Sentence: 6    तान॑ग्नि॒चिदे॒वोभया॑न्प्रीणाति
Sentence: 7    द॒ध्ना म॑धुमि॒श्रेणै॒ता आहु॑तीर्जुहोति
Sentence: 8    भाग॒धेये॑नैवैनान्प्रीणाति ।
Sentence: 9    अथो॒ खल्वा॑हुस् ।
Sentence: 10    इष्ट॑का वै दे॒वा अ॑हु॒ताद॒ इति॑ ।।

Verse: 6 
Sentence: 1    अ॑नुपरि॒क्रामं॑ जुहोति ।
Sentence: 2    अप॑रिवर्गमेवैनान्प्रीणाति ।
Sentence: 3=e    इ॒मं स्तन॒मूर्ज॑स्वन्तं धया॒पाम्प्रप्या॑तमग्ने सरि॒रस्य॒ मध्ये॑ ।
Sentence: 4=e    उत्सं॑ जुषस्व॒ मधु॑मन्तमूर्व समु॒द्रियं॒ सद॑न॒मा वि॑शस्व ।।
Sentence: 5=f    यो वा अ॒ग्निम्प्र॒युज्य॒ न वि॑मु॒ञ्चति॒ यथाश्वो॑ यु॒क्तो ऽवि॑मुच्यमानः॒ क्षुध्य॑न्परा॒भव॑त॒ग्निः परा॑ भवति
Sentence: 6    तम्प॑रा॒भव॑न्तं॒ यज॑मा॒नो ऽनु॒ परा॑ भवति
Sentence: 7    सो॒ ऽग्निं चि॒त्वा लू॒क्षः ।।

Verse: 7 
Sentence: 1    भ॑वति ।
Sentence: 2    इ॒मं स्तन॒मूर्ज॑स्वन्तं धया॒पामित्याज्य॑स्य पू॒र्णां स्रुचं॑ जुहोति ।
Sentence: 3    ए॒ष वा अ॒ग्नेर्वि॑मो॒कस् ।
Sentence: 4    वि॒मुच्यै॒वास्मा॒ अन्न॒मपि॑ दधाति
Sentence: 5    तस्मा॑दाहु॒र्यश्चै॒वं वेद॒ यश्च॒ न
Sentence: 6    सु॒धायं॑ ह वै वा॒जी सुहि॑तो दधा॒तीति॑ ।
Sentence: 7    अ॒ग्निर्वाव वा॒जी
Sentence: 8    तमे॒व तत्प्री॑णाति
Sentence: 9    स ए॑नम्प्री॒तः प्री॑णाति॒ वसी॑यान्भवति ।।

Paragraph: 11 
Verse: 1 
Sentence: 1    इन्द्रा॑य॒ राज्ञे॑ सूक॒रस् ।
Sentence: 2    वरु॑णाय॒ राज्ञे॒ कृष्ण॑स् ।
Sentence: 3    य॒माय॒ राज्ञ॒ ऋश्य॑स् ।
Sentence: 4    ऋ॑ष॒भाय॒ राज्ञे॑ गव॒यः
Sentence: 5    शा॑र्दू॒लाय॒ राज्ञे॑ गौ॒रः
Sentence: 6    पु॑रुषरा॒जाय॑ म॒र्कटः
Sentence: 7    क्षिप्रश्ये॒नस्य॒ वर्ति॑का
Sentence: 8    नीलं॑गोः॒ क्रिमिः
Sentence: 9    सोम॑स्य॒ राज्ञः॑ कुलुं॒गः
Sentence: 10    सिन्धोः॑ शिंशु॒मार॑स् ।
Sentence: 11    हि॒मव॑तो ह॒स्ती ।।

Paragraph: 12 
Verse: 1 
Sentence: 1    म॒युः प्रा॑जाप॒त्यस् ।
Sentence: 2    ऊ॒लो हली॑क्ष्णो वृषदं॒शस्ते धा॒तुः
Sentence: 3    सर॑स्वत्यै॒ शारिः॑ श्ये॒ता पु॑रुष॒वाच् ।
Sentence: 4    सर॑स्वते॒ शुकः॑ श्ये॒तः पु॑रुष॒वाच् ।
Sentence: 5    आ॑र॒ण्यो॒ ऽजो न॑कु॒लः शका॒ ते पौ॒ष्णास् ।
Sentence: 6    वा॒चे क्रौ॒ञ्चः ।।

Paragraph: 13 
Verse: 1 
Sentence: 1    अ॒पां नप्त्रे॑ ज॒षस् ।
Sentence: 2    ना॒क्रो मक॑रः कुलि॒कय॒स्ते ऽकू॑पारस्य
Sentence: 3    वा॒चे पै॑ङ्गरा॒जस् ।
Sentence: 4    भगा॑य कु॒षीत॑कस् ।
Sentence: 5    आ॒ती वा॑ह॒सो दर्वि॑दा॒ ते वा॑य॒व्या॑स् ।
Sentence: 6    दि॒ग्भ्यश्च॑क्रवा॒कः ।।

Paragraph: 14 
Verse: 1 
Sentence: 1    बला॑याजग॒रस् ।
Sentence: 2    आ॒खुः सृ॑ज॒या श॒यण्ड॑क॒स्ते मै॒त्रास् ।
Sentence: 3    मृ॒त्यवे॑ ऽसि॒तस् ।
Sentence: 4    म॒न्यवे॑ स्व॒जः
Sentence: 5    कु॑म्भी॒नसः॑ पुष्करसा॒दो लो॑हिता॒हिस्ते त्वा॒ष्ट्राः
Sentence: 6    प्र॑ति॒श्रुत्का॑यै वाह॒सः ।।

Paragraph: 15 
Verse: 1 
Sentence: 1    पु॑रुषमृ॒गश्च॒न्द्रम॑से
Sentence: 2    गो॒धा काल॑का दार्वाघा॒टस्ते वन॒स्पती॑नाम्
Sentence: 3    ए॒ण्यह्ने॑ कृष्णो॒ रात्रि॑यै
Sentence: 4    पि॒कः क्ष्विङ्का॒ नील॑शीर्ष्णी॒ ते॑ ऽर्य॒म्णे
Sentence: 5    धा॒तुः क॑त्क॒टः ।।

Paragraph: 16 
Verse: 1 
Sentence: 1    सौ॒री ब॒लाका॑ ।
Sentence: 2    ऋ॑श्यो म॒यूरः॑ श्ये॒नस्ते ग॑न्ध॒र्वाणा॑म् ।
Sentence: 3    वसू॑नां क॒पिञ्ज॑लस् ।
Sentence: 4    रु॒द्राणां॑ तित्ति॒रिस् ।
Sentence: 5    रो॒हित्कु॑ण्डृ॒णाची॑ गो॒लत्ति॑का॒ ता अ॑प्स॒रसा॑म्
Sentence: 6    अर॑ण्याय सृम॒रः ।।

Paragraph: 17 
Verse: 1 
Sentence: 1    पृ॑ष॒तो वै॑श्वदे॒वः
Sentence: 2    पि॒त्वो न्यङ्कुः॒ कश॒स्ते ऽनु॑मत्यै ।
Sentence: 3    अ॑न्यवा॒पो ऽर्ध॑मा॒साना॑म्
Sentence: 4    मा॒सां क॒श्यपः
Sentence: 5    क्वयिः॑ कु॒टरु॑र्दात्यौ॒हस्ते सि॑नीवाल्यै
Sentence: 6    बृह॒स्पत॑ये शित्पु॒टः ।।

Paragraph: 18 
Verse: 1 
Sentence: 1    शका॑ भौ॒मी
Sentence: 2    पा॒ङ्क्त्रः कशो॑ मान्थी॒लव॒स्ते पि॑तृ॒णाम्
Sentence: 3    ऋतू॒नां जह॑का
Sentence: 4    संवत्स॒राय॒ लोपा
Sentence: 5    क॒पोत॒ उलू॑कः श॒शस्ते नै॑रृ॒ताः
Sentence: 6    कृ॑क॒वाकुः॑ सावि॒त्रः ।।

Paragraph: 19 
Verse: 1 
Sentence: 1    रुरू॑ रौ॒द्रः
Sentence: 2    कृ॑कला॒सः श॒कुनिः॒ पिप्प॑का॒ ते श॑र॒व्या॑यै
Sentence: 3    हरि॒णो मा॑रु॒तस् ।
Sentence: 4    ब्रह्म॑णे शा॒र्गस्
Sentence: 5    त॒रक्षुः॑ कृ॒ष्णः श्वा च॑तुर॒क्षो ग॑र्द॒भस्त इ॑तरज॒नाना॑म्
Sentence: 6    अ॒ग्नये॒ धूङ्क्ष्णा॑ ।।

Paragraph: 20 
Verse: 1 
Sentence: 1    अ॑ल॒ज आ॑न्तरि॒क्षस् ।
Sentence: 2    उ॒द्रो म॒द्गुः प्ल॒वस्ते॒ ऽपाम्
Sentence: 3    अदि॑त्यै हंस॒साचि॑स् ।
Sentence: 4    इ॑न्द्राण्यै॒ कीर्शा
Sentence: 5    गृध्रः॑ शितिक॒क्षी वा॑र्ध्राण॒सस्ते दि॒व्यास् ।
Sentence: 6    द्या॑वापृथि॒व्या॑ श्वा॒वित् ।।

Paragraph: 21 
Verse: 1 
Sentence: 1    सु॑प॒र्णः पा॑र्ज॒न्यस् ।
Sentence: 2    हं॒सो वृको॑ वृषदं॒शस्त ऐ॒न्द्रास् ।
Sentence: 3    अ॒पामु॒द्रस् ।
Sentence: 4    अ॑र्य॒म्णे लो॑पा॒शः
Sentence: 5    सिं॒हो न॑कु॒लो व्या॒घ्रस्ते म॑हे॒न्द्राय
Sentence: 6    कामा॑य॒ पर॑स्वान् ।।

Paragraph: 22 
Verse: 1 
Sentence: 1    आ॑ग्ने॒यः कृ॒ष्णग्री॑वः
Sentence: 2    सारस्व॒ती मे॒षी
Sentence: 3    ब॒भ्रुः सौ॒म्यः
Sentence: 4    पौ॒ष्णः श्या॒मः
Sentence: 5    शि॑तिपृ॒ष्ठो बा॑र्हस्प॒त्यः
Sentence: 6    शि॒ल्पो वै॑श्वदे॒वस् ।
Sentence: 7    अै॒न्द्रो॑ ऽरु॒णस् ।
Sentence: 8    मा॑रु॒तः क॒ल्माष॑स् ।
Sentence: 9    अै॑न्द्रा॒ग्नः सं॑हि॒तस् ।
Sentence: 10    अ॒धोरा॑मः सावि॒त्रस् ।
Sentence: 11    वा॑रु॒णः पेत्वः॑ ।।

Paragraph: 23 
Verse: 1 
Sentence: 1    अश्व॑स्तूप॒रो गो॑मृ॒गस्ते प्रा॑जाप॒त्यास् ।
Sentence: 2    आ॑ग्नेयौ कृ॒ष्णग्री॑वौ
Sentence: 3    त्वाष्ट्रौ लोमशसक्थौ
Sentence: 4    शितिपृष्ठौ बार्हस्पत्यौ
Sentence: 5    धा॒त्रे पृ॑षोद॒रः
Sentence: 6    सौ॒र्यो ब॒लक्षः॒ पेत्वः॑ ।।

Paragraph: 24 
Verse: 1 
Sentence: 1    अ॒ग्नये ऽनी॑कवते॒ रोहि॑ताञ्जिरन॒ड्वान्
Sentence: 2    अ॒धोरा॑मौ सावित्रौ
Sentence: 3    पौष्णौ रज॒तना॑भी
Sentence: 4    वैश्वदेवौ पि॒शंगौ॑ दूपरौ
Sentence: 5    मारु॒तः क॒ल्माष॑स् ।
Sentence: 6    आ॑ग्ने॒यः कृ॒ष्णो॒ ऽजः
Sentence: 7    सा॑रस्व॒ती मे॒षी
Sentence: 8    वा॑रु॒णः कृ॒ष्ण एक॑शितिपा॒त्पेत्वः॑ ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.