TITUS
Black Yajur-Veda: Taittiriya-Samhita
Part No. 34
Previous part

Chapter: 6 
Paragraph: 1 
Verse: 1 
Sentence: 1=a    हिर॑ण्यवर्णाः॒ शुच॑यः पाव॒का यासु॑ जा॒तः क॒श्यपो॒ यास्विन्द्रः॑ । अ॒ग्निं गर्भं॑ दधिरे॒ विरू॑पा॒स्ता न॒ आपः॒ शं स्यो॒ना भ॑वन्तु ।।
Sentence: 2=b    यासां॒ राजा॒ वरु॑णो॒ याति॒ मध्ये॑ सत्यानृ॒ते अ॑व॒पश्य॒ञ्जना॑नाम् । म॑धु॒श्चुतः॒ शुच॑यो॒ याः पा॑व॒कास्ता न॒ आपः॒ शं स्यो॑ना भवन्तु ।।
Sentence: 3=c    यासां॑ दे॒वा दि॒वि कृ॒ण्वन्ति॑ भ॒क्षं या अ॒न्तरि॑क्षे बहु॒धा भव॑न्ति । याः पृ॑थि॒वीम्पय॑सो॒ ऽन्दन्ति॑ ।।

Verse: 2 
Sentence: 1    शु॒क्रास्ता न॒ आपः॒ शं स्यो॒ना भ॑वन्तु ।।
Sentence: 2=d    शि॒वेन॑ मा॒ चक्षु॑षा पश्यतापः शि॒वया॑ त॒नुवो ऽप॑ स्पृशत॒ त्वच॑म्मे । सर्वां॑ अ॒ग्नींर॑प्सु॒षदो॑ हुवे वो॒ मयि॒ वर्चो॒ बल॒मोजो॒ नि ध॑त्त ।।
Sentence: 3=e    यद॒दः स॑म्प्रय॒तीरहा॒वन॑दता ह॒ते । तस्मा॒दा न॒द्यो॒ नाम॑ स्थ॒ ता वो॒ नामा॑नि सिन्धवः ।।
Sentence: 4=f    यत्प्रेषि॑ता॒ वरु॑णेन॒ ताः शीभं॑ स॒मव॑ल्गत ।।

Verse: 3 
Sentence: 1    तदा॑प्नो॒दिन्द्रो॑ वो य॒तीस्तस्मा॒दापो॒ अनु॑ स्थन ।।
Sentence: 2=g    अ॑पका॒मं स्यन्द॑माना॒ अवी॑वरत वो॒ हिक॑म् । इन्द्रो॑ वः॒ शक्ति॑भिर्देवी॒स्तस्मा॒द्वार्णाम॑ वो हि॒तम् ।।
Sentence: 3=h    एको॑ दे॒वो अप्य॑तिष्ठ॒त्स्यन्द॑माना यथाव॒शम् । उदा॑निषुर्म॒हीरिति॒ तस्मा॑दुद॒कमु॑च्यते ।।
Sentence: 4=i    आपो॑ भ॒द्रा घृ॒तमिदा॑प आसुर॒ग्नीषोमौ॑ बिभ्र॒त्याप॒ इत्ताः । ती॒व्रो रसो॑ मधु॒पृचा॑म् ।।

Verse: 4 
Sentence: 1    अ॑रंग॒म आ मा॑ प्रा॒णेन॑ स॒ह वर्च॑सा गन् ।।
Sentence: 2=k    आदित्प॑श्याम्यु॒त वा॑ शृणो॒म्या मा॒ घोषो॑ गछति॒ वाङ्न॑ आसाम् । मन्ये॑ भेजा॒नो अ॒मृत॑स्य॒ तर्हि॒ हिर॑ण्यवर्णा॒ अतृ॑पं यद्वः ।।
Sentence: 3=l    आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ।।
Sentence: 4=m    यो वः॑ शि॒वत॑मो॒ रस॒स्तस्य॑ भाजयते॒ह नः॑ । उ॑श॒तीरि॑व मा॒तरः॑ ।।
Sentence: 5=n    तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ।।
Sentence: 6=o    दि॒वि श्र॑यस्वा॒न्तरि॑क्षे यतस्व पृथि॒व्या सम्भ॑व ब्रह्मवर्च॒सम॑सि ब्रह्मवर्च॒साय॑ त्वा ।।

Paragraph: 2 
Verse: 1 
Sentence: 1    अ॒पां ग्रहा॑न्गृह्णाति ।
Sentence: 2    ए॒तद्वाव रा॑ज॒सूयं॒ यदे॒ते ग्रहाः॑ स॒वो॒ ऽग्निस् ।
Sentence: 3    व॑रुणस॒वो रा॑ज॒सूय॑मग्निस॒वश्चित्य॑स्
Sentence: 4    ताभ्या॑मे॒व सू॑यते ।
Sentence: 5    अथो॑ उ॒भावे॒व लो॒काव॒भि ज॑यति॒ यश्च॑ राजसू॒येने॑जा॒नस्य॒ यश्चा॑ग्नि॒चिते॑ ।
Sentence: 6    आपो॑ भवन्ति ।
Sentence: 7    आपो॒ वा अ॒ग्नेर्भ्रातृ॑व्यास् ।
Sentence: 8    यद॒पो॒ ऽग्नेर॒धस्ता॑दुप॒दधा॑ति॒ भ्रातृ॑व्याभिभूत्यै
Sentence: 9    भव॑त्या॒त्मना॒ परा॑स्य॒ भ्रातृ॑व्यो भवति ।
Sentence: 10    अ॒मृत॑म् ।।

Verse: 2 
Sentence: 1    वा आप॑स्
Sentence: 2    तस्मा॑द॒द्भिरव॑तान्तम॒भि षि॑ञ्चन्ति
Sentence: 3    नार्ति॒मार्छ॑ति॒ सर्व॒मायु॑रेति॒ यस्यै॒ता उ॑पधी॒यन्ते॒ य उ॑ चैना ए॒वं वेद॑ ।
Sentence: 4    अन्नं॒ वा आपः
Sentence: 5    प॒शव॒ आप॑स् ।
Sentence: 6    अन्न॑म्प॒शव॑स् ।
Sentence: 7    अ॑न्ना॒दः प॑शु॒मान्भ॑वति॒ यस्यै॒ता उ॑पदी॒यन्ते॒ य उ॑ चै नाए॒वं वेद
Sentence: 8    द्वाद॑श भवन्ति
Sentence: 9    द्वाद॑श॒ मासाः॑ संवत्स॒रः
Sentence: 10    सं॑वत्स॒रेनै॒वास्मै॑ ।।

Verse: 3 
Sentence: 1    अन्न॒मव॑ रुन्द्धे
Sentence: 2    पात्रा॑णि भवन्ति
Sentence: 3    पात्रे॒ वा अन्न॑मद्यते
Sentence: 4    सयो॑न्ये॒वान्न॒मव॑ रुन्द्धे ।
Sentence: 5    आ द्वा॑द॒शात्पुरु॑षा॒दन्न॑म॒त्त्यथो॒ पात्रा॒न्न छि॑द्यते॒ यस्यै॒ता उ॑पधी॒यन्ते॒ य उ॑ चैना ए॒वं वेद
Sentence: 6    कु॒म्भाश्च॑ कु॒म्भीश्च॑ मिथु॒नानि॑ भवन्ति
Sentence: 7    मिथु॒नस्य॒ प्रजा॑त्यै
Sentence: 8    प्र प्र॒जया॑ प॒शुभि॑र्मिथुनैर्जायते॒ यस्यै॒ता उ॑पधी॒यन्ते॒ य उ॑ ।।

Verse: 4 
Sentence: 1    चै॑ना ए॒वं वेद
Sentence: 2    शुग्वा अ॒ग्निः
Sentence: 3    सो॑ ऽध्व॒र्युं यज॑मानम्प्र॒जाः शु॒चार्प॑यति
Sentence: 4    यद॒प उ॑प॒दधा॑ति॒ शुच॑मे॒वास्य॑ शमयति
Sentence: 5    नार्ति॒मार्छ॑त्यध्व॒र्युर्न यज॑मानः॒ शाम्य॑न्ति प्र॒जा यत्रै॒ता उ॑पधी॒यन्ते॑ ।
Sentence: 6    अ॒पां वा ए॒तानि॒ हृद॑यानि॒ यदे॒ता आप॑स् ।
Sentence: 7    यदे॒ता अ॒प उ॑प॒दधा॑ति दि॒व्याभि॑रेवैनाः॒ सं सृ॑जति॒ वर्षु॑कः प॒र्जन्यः॑ ।।

Verse: 5 
Sentence: 1    भ॑वति
Sentence: 2    यो वा ए॒तासा॑मा॒यत॑नं॒ कॢप्तिं॒ वेदा॒यत॑नवान्भवति॒ कल्प॑ते ऽस्मै ।
Sentence: 3    अ॑नुसी॒तमुप॑ दधाति ।
Sentence: 4    ए॒तद्वा आ॑सामा॒यत॑नमे॒षा कॢप्ति॑स् ।
Sentence: 5    य ए॒वं वेदा॒यत॑नवान्भवति॒ कल्प॑ते ऽस्मै
Sentence: 6    द्वं॒द्वम॒न्या उप॑ दधाति॒ चत॑स्रो॒ मध्ये॒ धृत्यै॑ ।
Sentence: 7    अन्नं॒ वा इष्ट॑कास् ।
Sentence: 8    ए॒तत्खलु वै सा॒क्षादन्नं॒ यदे॒ष च॒रुस् ।
Sentence: 9    यदे॒तं च॒रुमु॑प॒दधा॑ति सा॒क्षात् ।।

Verse: 6 
Sentence: 1    ए॒वास्मा॒ अन्न॒मव॑ रुन्द्धे
Sentence: 2    मध्य॒त उप॑ दधाति
Sentence: 3    मध्य॒त ए॒वास्मा॒ अन्नं॑ दधाति
Sentence: 4    तस्मा॑न्मध्य॒तो ऽन्न॑मद्यते
Sentence: 5    बार्हस्प॒त्यो भ॑वति
Sentence: 6    ब्रह्म वै दे॒वाना॒म्बृह॒स्पति॑स् ।
Sentence: 7    ब्रह्म॑णै॒वास्मा॒ अन्न॒मव॑ रुन्द्धे
Sentence: 8    ब्रह्मवर्च॒सम॑सि ब्रह्मवर्च॒साय॒ त्वेत्या॑ह
Sentence: 9    तेज॒स्वी ब्र॑ह्मवर्च॒सी भ॑वति॒ यस्यै॒ष उ॑पधी॒यते॒ य उ॑ चैनमे॒वं वेद॑ ।।

Paragraph: 3 
Verse: 1 
Sentence: 1    भू॑तेष्ट॒का उप॑ दधाति ।
Sentence: 2    अत्रा॑त्र वै मृ॒त्युर्जा॑यते
Sentence: 3    यत्र॑यत्रै॒व मृ॒त्युर्जाय॑ते॒ तत॑ एवैन॒मव॑ यजते
Sentence: 4    तस्मा॑दग्नि॒चित्सर्व॒मायु॑ एति॒ सर्वे॒ ह्य॑स्य मृ॒त्यवो ऽवे॑ष्टास्
Sentence: 5    तस्मा॑दग्नि॒चिन्नाभिच॑रितवै प्र॒त्यगे॑नमभिचा॒र स्तृ॑णुते
Sentence: 6    सू॒यते॒ वा ए॒ष यो॒ ऽग्निं चि॑नु॒ते
Sentence: 7    दे॑वसु॒वामे॒तानि॑ ह॒वींषि॑ भवन्ति ।
Sentence: 8    ए॒ताव॑न्तो वै दे॒वानां॑ स॒वास्
Sentence: 9    त ए॒व ।।

Verse: 2 
Sentence: 1    अ॑स्मै स॒वान्प्र य॑छन्ति
Sentence: 2    त ए॑नं सुवन्ते
Sentence: 3    स॒वो॒ ऽग्निर्व॑रुणस॒वो रा॑ज॒सूय॑म्ब्रह्मस॒वश्चित्य॑स् ।
Sentence: 4    दे॒वस्य॑ त्वा सवि॒तुः प्र॑स॒व इत्या॑ह
Sentence: 5    सवि॒तृप्र॑सूत एवैन॒म्ब्रह्म॑णा दे॒वता॑भिर॒भि षि॑ञ्चति ।
Sentence: 6    अन्न॑स्यान्नस्या॒भि षि॑ञ्चति ।
Sentence: 7    अन्न॑स्यान्न॒स्याव॑रुद्ध्यै
Sentence: 8    पु॒रस्ता॑त्प्र॒त्यञ्च॑म॒भि षि॑ञ्चति
Sentence: 9    पु॒रस्ता॒द्धि प्र॑ती॒चीन॒मन्न॑म॒द्यते
Sentence: 10    शीर्ष॒तो॒ ऽभि षि॑ञ्चति
Sentence: 11    शीर्ष॒तो ह्यन्न॑म॒द्यते॑ ।
Sentence: 12    आ मुखा॑द॒न्वव॑स्रावयति ।।

Verse: 3 
Sentence: 1    मु॑ख॒त ए॒वास्मा॑ अ॒न्नाद्यं॑ दधाति ।
Sentence: 2    अ॒ग्नेस्त्वा॒ साम्रा॑ज्येना॒भि षि॑ञ्चा॒मीत्या॑ह ।
Sentence: 3    ए॒ष वा अ॒ग्नेः स॒वस्
Sentence: 4    तेनैवैनम॒भि षि॑ञ्चति
Sentence: 5    बृह॒स्पते॑स्त्वा॒ साम्रा॑ज्येना॒भि षि॑ञ्चा॒मीत्या॑ह
Sentence: 6    ब्रह्म वै दे॒वाना॒म्बृह॒स्पति॑स् ।
Sentence: 7    ब्रह्म॑णैवैनम॒भि षि॑ञ्चति ।
Sentence: 8    इन्द्र॑स्य त्वा॒ साम्रा॑ज्येना॒भि षि॑ञ्चा॒मीत्या॑ह ।
Sentence: 9    इ॑न्द्रि॒यमे॒वास्मि॑न्नु॒परि॑ष्टाद्दधाति ।
Sentence: 10    ए॒तत् ।।

Verse: 4 
Sentence: 1    वै॑ राज॒सूय॑स्य रू॒पम् ।
Sentence: 2    य ए॒वं वि॒द्वान॒ग्निं चि॑नु॒त उ॒भावे॒व लो॒काव॒भि ज॑यति॒ यश्च॑ राज॒सूये॑नेजा॒नस्य॒ यश्चा॑ग्न॑स् ।
Sentence: 3    इन्द्र॑स्य सुषुवा॒णस्य॑ दश॒धेन्द्रि॒यं वी॒र्य॒म्परा॑पतत्
Sentence: 4    तद्दे॒वाः सौ॑त्राम॒ण्या सम॑भरन् ।
Sentence: 5    सू॒यते॒ वा ए॒ष यो॒ ऽग्निं चि॑नु॒ते ।
Sentence: 6    अ॒ग्निं चि॒त्वा सौ॑त्राम॒ण्या य॑जेतेन्द्रि॒यमे॒व वी॒र्यं॑ स॒म्भृत्या॒त्मन्ध॑त्ते ।।

Paragraph: 4 
Verse: 1 
Sentence: 1    स॒जूरब्दो ऽया॑वभिः
Sentence: 2    स॒जूरु॒षा अरु॑णीभिः
Sentence: 3    स॒जूः सूर्य॒ एत॑श्चेन
Sentence: 4    स॒जोषा॑व॒श्विना॒ दंसो॑भिः
Sentence: 5    स॒जूर॒ग्निर्वै॑श्वान॒र इडा॑भिस् ।
Sentence: 6    घृ॒तेन॒ स्वाहा
Sentence: 7    संवत्स॒रो वा अब्द॑स् ।
Sentence: 8    मासा॒ अया॑वास् ।
Sentence: 9    उ॒षा अरु॑णी
Sentence: 10    सूर्य॒ एत॑शस् ।
Sentence: 11    इ॒मे अ॒श्विना
Sentence: 12    संवत्स॒रो ऽग्निर्वै॑श्वान॒रः
Sentence: 13    प॒शव॒ इडा
Sentence: 14    प॒शवो॑ घृ॒तम् ।
Sentence: 15    सं॑वत्स॒रम्प॒शवो ऽनु॒ प्र जा॑यन्ते
Sentence: 16    संवत्स॒रेणै॒वास्मै॑ प॒शून्प्र ज॑नयति
Sentence: 17    दर्भस्त॒म्बे जु॑होति
Sentence: 18    यत् ।।

Verse: 2 
Sentence: 1    वा अ॒स्या अ॒मृतं॒ यद्वी॒र्यं॒ तद्द॒र्भास्
Sentence: 2    तस्मि॑ञ्जुहोति
Sentence: 3    प्रै॒व जा॑यते ऽन्ना॒दो भ॑वति॒ यस्यै॒वं जुह्व॑ति ।
Sentence: 4    ए॒ता वै॑ दे॒वता॑ अ॒ग्नेः पु॒रस्ता॑द्भागास्
Sentence: 5    ता ए॒व प्री॑णाति ।
Sentence: 6    अथो॒ चक्षु॑रे॒वाग्नेः पु॒रस्ता॒त्प्रति॑ दधाति ।
Sentence: 7    अन॑न्धो भवति॒ य ए॒वं वेद॑ ।
Sentence: 8    आपो॒ वा इ॒दमग्रे॑ सलि॒लमा॑सीत्
Sentence: 9    स प्र॒जाप॑तिः पुष्करपर्णे॒ वातो॑ भू॒तो॑ ऽलेलायत्
Sentence: 10    सः ।।

Verse: 3 
Sentence: 1    प्र॑ति॒ष्ठां नावि॑न्दत
Sentence: 2    स ए॒तद॒पां कु॒लाय॑मपश्यत्
Sentence: 3    तस्मि॑न्न॒ग्निम॑चिनुत
Sentence: 4    तदि॒यम॑भवत्
Sentence: 5    ततो वै॒ स प्रत्य॑तिष्ठत् ।
Sentence: 6    याम्पु॒रस्ता॑दु॒पाद॑धा॒त्तच्छिरो॑ ऽभव॒त्सा प्राची दिग्^दिश्
Sentence: 7    यां द॑क्षिण॒त उ॒पाद॑धा॒त्स दक्षि॑णः प॒क्षो॑ ऽभव॒त्सा द॑क्षि॒णा दिग्^दिश्
Sentence: 8    याम्प॒श्चादु॒पाद॑धा॒त्तत्पुछ॑मभव॒त्सा प्र॒तीची दिग्^दिश्
Sentence: 9    यामु॑त्तर॒त उ॒पाद॑धात् ।।

Verse: 4 
Sentence: 1    स उत्त॑रः प॒क्षो॑ ऽभव॒त्सोदी॑ची दिग्^दिश्
Sentence: 2    यामु॒परि॑ष्टादु॒पाद॑धा॒त्तत्पृ॒ष्ठम॑भव॒त्सोर्ध्वा दिग्^दिश्
Sentence: 3    इ॒यम्वा अ॒ग्निः पञ्चे॑ष्टकस्
Sentence: 4    तस्मा॒द्यद॒स्यां खन॑न्त्य॒भीष्ट॑कां तृ॒न्दन्त्य॒भि शर्क॑राम् ।
Sentence: 5    सर्वा॒ वा इ॒यं वयो॑भ्यो॒ नक्तं॑ दृ॒शे दी॑प्यते
Sentence: 6    तस्मा॑दि॒मां वयां॑सि॒ नक्तं॒ नाध्या॑सते
Sentence: 7    य ए॒वं वि॒द्वान॒ग्निं चि॑नु॒ते प्रत्ये॒व ।।

Verse: 5 
Sentence: 1    ति॑ष्ठत्य॒भि दिशो॑ जयति ।
Sentence: 2    आ॑ग्ने॒यो वै॑ ब्राह्म॒णस्
Sentence: 3    तस्मा॑द्ब्राह्म॒णाय॒ सर्वा॑सु दि॒क्ष्वर्धु॑कम् ।
Sentence: 4    स्वामे॒व तद्दिश॒मन्वे॑ति ।
Sentence: 5    अ॒पां वा अ॒ग्निः कु॒लाय॑म् ।
Sentence: 6    तस्मा॒दापो॒ ऽग्निं हारु॑काः
Sentence: 7    स्वामे॒व तद्योनि॒म्प्र वि॑शन्ति ।।

Paragraph: 5 
Verse: 1 
Sentence: 1    सं॑वत्स॒रमुख्य॑म्भृ॒त्वा द्वि॒तीये॑ संवत्स॒र आ॑ग्ने॒यम॒ष्टाक॑पालं॒ निर्व॑पेऐ॒न्द्रमेका॑लं वैश्वदे॒वं द्वाद॑शकपालम्बार्हस्प॒त्यं च॒रुं वै॑ष्ण॒वं त्रि॑कपा॒लम् ।
Sentence: 2    त्रि॒तीये॑ संवत्स॒रे॑ ऽभि॒जिता॑ यजेत
Sentence: 3    यद॒ष्टाक॑पालो॒ भव॑त्य॒ष्टाक्ष॑रा गाय॒त्र्या॑ग्ने॒यं गा॑य॒त्रम्प्रा॑तःसव॒नम्
Sentence: 4    प्रातःसव॒नमे॒व तेन॑ दाधार गाय॒त्रीं छन्द॑स् ।
Sentence: 5    यदेका॑दशकपालो॒ भव॒त्येका॑दशाक्षरा त्रि॒ष्टुऐ॒न्द्रं त्रै॑ष्टुभ॒म्माध्यं॑दिनं॒ सव॑नम्
Sentence: 6    माध्यं॑दिनमे॒व सव॑नं॒ तेन॑ दाधार त्रि॒ष्टुभ॑म् ।।

Verse: 2 
Sentence: 1    छन्द॑स् ।
Sentence: 2    यद्द्वाद॑शकपालो॒ भव॑ति॒ द्वाद॑शाक्षरा॒ जग॑ती वैश्वदे॒वं जाग॑तं तृतीयसव॒नम् ।
Sentence: 3    तृ॑तीयसव॒नमे॒व तेन॑ दाधार॒ जग॑तीं॒ छन्द॑स् ।
Sentence: 4    यद्बा॑र्हस्प॒त्यश्च॒रुर्भव॑ति॒ ब्रह्म वै दे॒वाना॒म्बृह॒स्पति॑स् ।
Sentence: 5    ब्रह्मै॒व तेन॑ दाधार
Sentence: 6    यद्वै॑ष्ण॒वस्त्रि॑कपा॒लो भव॑ति य॒ज्ञो वै॒ विष्णु॑स् ।
Sentence: 7    य॒ज्ञमे॒व तेन॑ दाधार
Sentence: 8    यत्तृ॒तीये॑ संवत्स॒रे॑ ऽभि॒जिता॒ यज॑ते॒ ऽभिजि॑त्यै
Sentence: 9    यत्सं॑वत्स॒रमुख्य॑म्बि॒भर्ती॒ममे॒व ।।

Verse: 3 
Sentence: 1    तेन॑ लो॒कं स्पृ॑णोति
Sentence: 2    यद्द्वि॒तीये॑ संवत्स॒रे॒ ऽग्निं चि॑नु॒ते॒ ऽन्तरि॑क्षमे॒व तेन॑ स्पृणोति
Sentence: 3    यत्तृ॒तीये॑ संवत्स॒रे यज॑ते॒ ऽमुमे॒व तेन॑ लो॒कं स्पृ॑णोति ।
Sentence: 4    ए॒तं वै॒ पर{F आट्णा॒रः{W आ॑त्णा॒रः{GLOS आ॑ट्णा॒रः क॒क्षीवां॑ औशि॒जो वी॒तह॑व्यः श्राय॒सस्त्रस॑दस्युः पौरुकु॒त्स्यः प्र॒जाका॑मा अचिन्वत
Sentence: 5    ततो वै॒ ते स॒हस्रं॑सहस्रम्पु॒त्रान॑विन्दन्त
Sentence: 6    प्रथ॑ते प्र॒जया॑ प॒शुभि॒स्ताम्मात्रा॑माप्नोति॒ यां ते ऽग॑छ॒न्य ए॒वं वि॒द्वान॒ग्निं चि॑नु॒ते ।।

Paragraph: 6 
Verse: 1 
Sentence: 1    प्र॒जाप॑तिर॒ग्निम॑चिनुत
Sentence: 2    स क्षु॒रप॑विर्भू॒त्वाति॑ष्ठत्
Sentence: 3    तं दे॒वा बिभ्य॑तो॒ नोपा॑यन्
Sentence: 4    ते छन्दो॑भिरा॒त्मानं॑ छादयि॒त्वोपा॑यन्
Sentence: 5    तच्छन्द॑सां छन्द॒स्त्वम्
Sentence: 6    ब्रह्म वै॒ छन्दां॑सि
Sentence: 7    ब्रह्म॑ण ए॒तद्रू॒पं यत्कृ॑ष्णाजि॒नम् ।
Sentence: 8    कार्ष्णी॑ उपा॒नहा॒वुप॑ मुञ्चते॒हन्दो॑भिरे॒वात्मानं॑ छादयि॒त्वाग्निमुप॑ चरत्या॒त्मनो ऽहिं॑सायै
Sentence: 9    देवनि॒धिर्वा ए॒ष नि धी॑यते॒ यद॒ग्निः ।।

Verse: 2 
Sentence: 1    अ॒न्ये वा वै नि॒धिमगु॑प्तं वि॒न्दन्ति॒ न वा॒ प्रति॒ प्र जा॑नाति ।
Sentence: 2    उ॒खामा क्रा॑मत्या॒त्मान॑मे॒वाधि॒पां कु॑रुते॒ गुप्त्यै॑ ।
Sentence: 3    अथो॒ खल्वाहु॑स् ।
Sentence: 4    नाक्रम्येति
Sentence: 5    नैरृ॒त्यु॒खा यदा॒क्रामे॒न्निरृ॑ त्याआ॒त्मान॒मपि॑ दध्या॒त्तस्मा॒न्नाक्रम्या
Sentence: 6    पुरुषशी॒र्षमुप॑ दधाति॒ गुप्त्यै॑ ।
Sentence: 7    अथो॒ यथा॑ ब्रू॒यात् ।
Sentence: 8    ए॒तन्मे॑ गोपा॒येति॑ ता॒दृगे॒व तत् ।।

Verse: 3 
Sentence: 1    प्र॒जाप॑ति॒र्वा अथ॑र्वा ।
Sentence: 2    अ॒ग्निरे॒व द॒ध्यङ्ङा॑थर्व॒णस्
Sentence: 3    तस्येष्ट॑का अ॒स्थानि॑ ।
Sentence: 4    ए॒तं ह॒ वाव तदृषि॑र॒भ्यनू॑वाच ।
Sentence: 5    इन्द्रो॑ दधी॒चो अ॒स्थभि॒रिति
Sentence: 6    यदिष्ट॑काभिर॒ग्निं चि॒नोति॒ सात्मा॑नमे॒वाग्निं चि॑नुते
Sentence: 7    सात्मा॒मुष्मिँ॑ लो॒के भ॑वति॒ य ए॒वं वेद
Sentence: 8    शरी॑रं॒ वा ए॒तद॒ग्नेर्यच्चित्य॑ आ॒त्मा वै॑श्वान॒रस् ।
Sentence: 9    यच्चि॒ते वै॑श्वान॒रं जु॒होति॒ शरी॑रमे॒व सं॒स्कृत्य॑ ।।

Verse: 4 
Sentence: 1    अ॒भ्यारो॑हति
Sentence: 2    शरी॑रं॒ वा ए॒तद्यज॑मानः॒ संस्कु॑रुते॒ यद॒ग्निं चि॑नु॒ते
Sentence: 3    यच्चि॒ते वै॑श्वान॒रं जु॒होति॒ शसी॑रमे॒व सं॒स्कृत्या॒त्मना॒भ्यारो॑हति
Sentence: 4    तस्मा॒त्तस्य॒ नाव॑ द्यन्ति॒ जीव॑न्ने॒व दे॒वानप्ये॑ति
Sentence: 5    वैश्वान॒र्यर्चा पुरी॑ष॒मुप॑ दधाति ।
Sentence: 6    इ॒यं वा अ॒ग्निर्वै॑श्वान॒रस्
Sentence: 7    तस्यै॒षा चिति॒र्यत्पुरी॑षम्
Sentence: 8    अ॒ग्निमे॒व वै॑श्वान॒रं चि॑नुते ।
Sentence: 9    ए॒षा वा अ॒ग्नेः प्रि॒या त॒नूर्यद्वै॑श्वान॒रः
Sentence: 10    प्रि॒यामे॒वास्य॑ त॒नुव॒मव॑ रुन्द्धे ।।

Paragraph: 7 
Verse: 1 
Sentence: 1    अ॒ग्नेर्वै॑ दी॒क्षया॑ दे॒वा वि॒राज॑माप्नुवन्
Sentence: 2    ति॒स्रो रात्री॑र्दीक्षि॒तः स्या॑त्
Sentence: 3    त्रि॒पदा वि॒राट्^वि॒राज्
Sentence: 4    वि॒राज॑माप्नोति
Sentence: 5    षड्रात्री॑र्दीक्षि॒तः स्या॑त्
Sentence: 6    षड्वा ऋ॒तवः॑ संवत्स॒रः
Sentence: 7    सं॑वत्स॒रो वि॒राड्^वि॒राज्
Sentence: 8    वि॒राज॑माप्नोति
Sentence: 9    दश॒ रात्री॑र्दीक्षि॒तः स्या॑त् ।
Sentence: 10    दशा॑क्षरा वि॒राड्^वि॒राज्
Sentence: 11    वि॒राज॑माप्नोति
Sentence: 12    द्वाद॑श॒ रात्री॑र्दीक्षि॒तः स्या॑त् ।
Sentence: 13    द्वाद॑श॒ मासाः॑ संवत्स॒रः
Sentence: 14    सं॑वत्स॒रो वि॒राड्^वि॒राज्
Sentence: 15    वि॒राज॑माप्नोति
Sentence: 16    त्रयो॑दश॒ रात्री॑र्दीक्षि॒तः स्या॑त्
Sentence: 17    त्रयो॑दश ।।

Verse: 2 
Sentence: 1    मासाः॑ संवत्स॒रः
Sentence: 2    सं॑वत्स॒रो वि॒राड्^वि॒राज्
Sentence: 3    पञ्च॑दश॒ रात्री॑र्दीक्षि॒तः स्या॑त्
Sentence: 4    पञ्च॑दश॒ वा अ॑र्धमा॒सस्य॒ रात्र॑यस् ।
Sentence: 5    अ॑र्धमास॒शः सं॑वत्स॒र आ॑प्यते
Sentence: 6    संवत्स॒रो वि॒राड्^वि॒राज्
Sentence: 7    वि॒राज॑माप्नोति
Sentence: 8    स॒प्तद॑श॒ रात्री॑र्दीक्षि॒तः स्या॑त् ।
Sentence: 9    द्वाद॑श॒ मासाः॒ पञ्च॒र्तवः॒ स सं॑वत्स॒रः
Sentence: 10    सं॑वत्स॒रो वि॒राड्^वि॒राज्
Sentence: 11    वि॒राज॑माप्नोति
Sentence: 12    चतु॑र्विंशतिं॒ रात्री॑र्दीक्षि॒तः स्या॑त् ।
Sentence: 13    चतु॑र्विंशतिरर्धमा॒साः सं॑वत्स॒रः
Sentence: 14    सं॑वत्स॒रो वि॒राड्^वि॒राज्
Sentence: 15    वि॒राज॑माप्नोति
Sentence: 16    त्रिं॒शतं॒ रात्री॑र्दीक्षि॒तः स्या॑त् ।।

Verse: 3 
Sentence: 1    त्रिं॒शद॑क्षरा वि॒राड्^वि॒राज्
Sentence: 2    वि॒राज॑माप्नोति
Sentence: 3    मासं॑ दीक्षि॒तः स्या॑त् ।
Sentence: 4    यो मासः॒ स सं॑वत्स॒रः
Sentence: 5    सं॑वत्स॒रो वि॒राड्^वि॒राज्
Sentence: 6    वि॒राज॑माप्नोति
Sentence: 7    च॒तुरो॑ मा॒सो दी॑क्षि॒तः स्या॑त् ।
Sentence: 8    च॒तुरो॒ वा ए॒तम्मा॒सो वस॑वो ऽबिभरु॒स्ते पृ॑थि॒वीमाज॑यन्गाय॒त्रीं छन्द॑स् ।
Sentence: 9    अष्टौ रु॒द्रास्ते॒ ऽन्तरि॑क्ष॒माज॑यन्गाय॒त्रीं छन्द॑स् ।
Sentence: 10    अष्टौ रु॒द्रास्ते॒ ऽन्तरि॑क्ष॒माज॑यन्त्रि॒ष्टुभं॒ छन्द॑स् ।
Sentence: 11    दे॒वाद॑शादि॒त्यास्ते दिव॒माज॑य॒ञ्जग॑तीं॒ छन्द॑स्
Sentence: 12    ततो वै॒ ते व्या॒वृत॑मगछञ्छरैष्ठ्यं दे॒वाना॑म् ।
Sentence: 13    तस्मा॒द्द्वाद॑श मा॒सो भृ॒त्वाग्निं चि॑न्वीत
Sentence: 14    द्वाद॑श॒ मासाः॑ संवत्स॒रः
Sentence: 15    सं॑वत्स॒रो॒ ऽग्निश्चित्य॑स्
Sentence: 16    तस्या॑होरा॒त्राणी॑ष्टकास् ।
Sentence: 17    आ॒प्तेष्ट॑कमेनं चिनु॒ते ऽथो॑ व्या॒वृत॑मे॒व ग॑छति श्रैष्ठ्यं समा॒नाना॑म् ।।

Paragraph: 8 
Verse: 1 
Sentence: 1=a    सु॑व॒र्गाय॒ वा ए॒ष लो॒काय॑ चीयते॒ यद॒ग्निस्
Sentence: 2    तं य॒न्नान्वा॒रोहे॑त्सुव॒र्गाल्लो॒काद्यज॑मानो हीयेत
Sentence: 3    पृथि॒वीमाक्र॑मिषम्प्रा॒णो मा॒ मा हा॑सीत् ।
Sentence: 4    अ॒न्तरि॑क्ष॒माक्र॑मिषम्प्र॒जा मा॒ मा हा॑सीत् ।
Sentence: 5    दिव॒माक्र॑मिषं॒ सुव॑रगन्म ।
Sentence: 6    इत्या॑ह ।
Sentence: 7    ए॒ष वा अ॒ग्नेर॑न्वारो॒हस्
Sentence: 8    तेनैवैनम॒न्वारो॑हति
Sentence: 9    सुव॒र्गस्य॑ लो॒कस्य॒ सम॑ष्ट्यै
Sentence: 10=b    यत्प॒क्षस॑म्मिताम्मिनु॒यात् ।।

Verse: 2 
Sentence: 1    कनी॑यांसं यज्ञक्र॒तुमुपे॑या॒त्पापी॑यस्यस्या॒त्मनः॑ प्र॒जा स्या॑त् ।
Sentence: 2    वेदि॑सम्मिताम्मिनोति
Sentence: 3    ज्यायां॑समे॒व य॑ज्ञक्र॒तुमुपै॑ति
Sentence: 4    नास्या॒त्मनः॒ पापी॑यसी प्र॒जा भ॑वति
Sentence: 5=c    साह॒स्रं चि॑न्वीत प्रथ॒मं चि॑न्वा॒नः
Sentence: 6    स॒हस्र॑सम्मितो॒ वा अ॒यं लो॒कस् ।
Sentence: 7    इ॒ममे॒व लो॒कम॒भि ज॑यति
Sentence: 8    द्विषा॑हस्रं चिन्वीत द्वि॒तीयं॑ चिन्वा॒नस् ।
Sentence: 9    द्विषा॑हस्रं॒ वा अ॒न्तरि॑क्षम्
Sentence: 10    अ॒न्तरि॑क्षमे॒वाभि ज॑यति
Sentence: 11    त्रिषा॑हस्रं चिन्वीत तृ॒तीयं॑ चिन्वा॒नः ।।

Verse: 3 
Sentence: 1    त्रिषा॑हस्रो॒ वा असौ लो॒को॒ ऽमुमे॒व लो॒कम॒भि ज॑यति
Sentence: 2=d    जानुद॒घ्नं चि॑न्वीत प्रथ॒मं चि॑वा॒नस् ।
Sentence: 3    गा॑यत्रियै॒वेमं लो॒कम॒भ्यारो॑हति
Sentence: 4    नाभिद॒घ्नं चि॑न्वीत द्वि॒तीयं॑ चिन्वा॒नस्
Sentence: 5    त्रि॒ष्टुभै॒वान्तरि॑क्षम॒भ्यारो॑हति
Sentence: 6    ग्रीवद॒घ्नं चि॑न्वीत तृ॒तीयं॑ चिन्वा॒नस् ।
Sentence: 7    जग॑त्यै॒वामुं लो॒कम॒भ्यारो॑हति
Sentence: 8=e    नाग्निं चि॒त्वा रा॒मामुपे॑यादयोनौ॒ रेतो॑ धास्या॒मीति
Sentence: 9    न द्वि॒तीयं॑ चि॒त्वान्यस्य॒ स्त्रिय॑म् ।।

Verse: 4 
Sentence: 1    उपे॑यात् ।
Sentence: 2    न तृ॒तीयं॑ चि॒त्वा कां च॒नोपे॑यात् ।
Sentence: 3    रेतो॒ वा ए॒तन्नि ध॑त्ते॒ यद॒ग्निं चि॑नु॒ते
Sentence: 4    यदु॑पे॒याद्रेत॑सा॒ व्यृ॑ध्येत ।
Sentence: 5    अथो॒ खल्वा॑हुस् ।
Sentence: 6    अ॑प्रज॒स्यं तद्यन्नोपे॒यादिति
Sentence: 7    यद्रे॑तः॒सिचा॑वुप॒दधा॑ति॒ ते ए॒व यज॑मानस्य॒ रेतो॑ बिभृतस्
Sentence: 8    तस्मा॒दुपे॑या॒द्रेत॑सो ऽस्कन्दाय
Sentence: 9=f    त्रीणि॒ वाव रेतां॑सि पि॒ता पु॒त्रः पौ॑त्रः ।।

Verse: 5 
Sentence: 1    यद्द्वे रे॑तः॒सिचा॑वुपद॒ध्याद्रेतो॒ ऽस्य्वि छि॑न्द्यात्
Sentence: 2    ति॒स्र उप॑ दधाति॒ रेत॑सः॒ संत॑त्यै ।
Sentence: 3    इ॒यं वाव प्र॑थ॒मा रे॑तः॒सिग्वाग्वा इ॒यं तस्मा॒त्पश्य॑न्ती॒माम्पश्य॑न्ति॒ वाचं॒ वद॑न्तीम्
Sentence: 4    अ॒न्तरि॑क्षं द्वि॒तीया॑ प्रा॒णो वा अ॒न्तरि॑क्षं॒ तस्मा॒न्नान्तरि॑क्ष॒म्पश्य॑न्ति॒ न प्रा॒णम्
Sentence: 5    असौ तृ॒तीया॒ चक्षु॒र्वा असौ॒ तस्मा॒त्पश्य॑न्त्य॒मूम्पश्य॑न्ति॒ चक्षु॑स् ।
Sentence: 6    यजु॑षे॒मां च॑ ।।

Verse: 6 
Sentence: 1    अ॒मूंचोप॑ दधाति॒ मन॑सा मध्य॒माम्
Sentence: 2    ए॒षां लो॒कानां॒ कॢप्त्यै॑ ।
Sentence: 3    अथो॑ प्रा॒णाना॑म्
Sentence: 4=g    इ॒ष्टो य॒ज्ञो भृगु॑भिराशी॒र्दा वसु॑भि॒स्तस्य॑ त इ॒ष्टस्य॑ वी॒तस्य॒ द्रवि॑णे॒ह भ॑क्षी॒येत्य
Sentence: 5    स्तुतश॒स्त्रे एवै॒तेन॑ दुहे
Sentence: 6    पि॒ता मा॑त॒रिश्वाछि॑द्रा प॒दा धा॒ अछि॑द्रा उ॒शिजः॑ प॒दानु॑ तक्षुः॒ सोमो॑ विश्व॒विन्ने॒ता ने॑ष॒द्बृह॒स्पति॑रुक्थाम॒दानि॑ शंसिष॒दित्या॑ह ।
Sentence: 7    ए॒तद्वा अ॒ग्नेरु॒क्थम् ।
Sentence: 8    तेनैवैन॒मनु॑ शंसति ।।

Paragraph: 9 
Verse: 1 
Sentence: 1=a    सू॒यते॒ वा ए॒षो॑ ऽग्नी॒नां य उ॒खाया॑म्भ्रि॒यते
Sentence: 2    यद॒धः सा॒दये॒द्गर्भाः॑ प्र॒पादु॑काः स्युस् ।
Sentence: 3    अथो॒ यथा॑ स॒वात्प्र॑त्यव॒रोह॑ति ता॒दृगे॒व तत् ।
Sentence: 4    आ॑स॒न्दी सा॑दयति॒ गर्भा॑णां॒ धृत्या॒ अप्र॑पादाय ।
Sentence: 5    अथो॑ स॒वमेवैनं करोति
Sentence: 6=b    गर्भो॒ वा ए॒ष यदुख्यो॒ योनिः॑ शि॒क्य॑म् ।
Sentence: 7    यच्छि॒क्या॑दु॒खां नि॒रूहे॒द्योने॒र्गर्भं॒ निर्ह॑ण्यात्
Sentence: 8    षडु॑द्यामं शि॒क्य॑म्भवति
Sentence: 9    षोढाविहि॒तो वै॑ ।।

Verse: 2 
Sentence: 1    पुरु॑ष आ॒त्मा च॒ शिर॑श्च च॒त्वार्यङ्गा॑नि ।
Sentence: 2    आ॒त्मन्नेवैनम्बिभर्ति
Sentence: 3=c    प्र॒जाप॑ति॒र्वा ए॒ष यद॒ग्निस्
Sentence: 4    तस्यो॒खा चो॒लूख॑लं च॒ स्तनौ
Sentence: 5    ताव॑स्य प्र॒जा उप॑ जीवन्ति
Sentence: 6    यदु॒खां चो॒लूख॑लं चोप॒दधा॑ति॒ ताभ्या॑मे॒व यज॑मानो॒ ऽमुष्मिँ॑ लो॒के॒ ऽग्निं दु॑हे
Sentence: 7=d    संवत्स॒रो वा ए॒ष यद॒ग्निस्
Sentence: 8    तस्य॑ त्रेधाविहि॒ता इ॑ष्टकाः प्राजाप॒त्या वै॑ष्ण॒वीः ।।

Verse: 3 
Sentence: 1    वै॑श्वकर्मणीस् ।
Sentence: 2    हो॑रा॒त्राण्ये॒वास्य॑ प्राजाप॒त्यास् ।
Sentence: 3    यदुख्य॑म्बि॒भर्ति॑ प्राजाप॒त्या ए॒व तदुप॑ धत्ते
Sentence: 4    यत्स॒मिध॑ आ॒दधा॑ति वैष्ण॒वा वै॒ वन॒स्पत॑यस् ।
Sentence: 5    वै॑ष्ण॒वीरे॒व तदुप॑ धत्ते
Sentence: 6    यदिष्ट॑काभिर॒ग्निं चि॒नोती॒यं वै॑ वि॒श्वक॑र्मा
Sentence: 7    वैश्वकर्म॒णीरे॒व तदुप॑ धत्ते
Sentence: 8    तस्मा॑दाहुस्
Sentence: 9    त्रि॒वृद॒ग्निरिति
Sentence: 10=e    तं वा ए॒तं यज॑मान ए॒व चि॑न्वीत
Sentence: 11    यद॑स्या॒न्यश्चि॑नु॒याद्यत्तं दक्षि॑णाभि॒र्न रा॒धये॑द॒ग्निम॑स्य वृञ्जीत
Sentence: 12    यो॑ ऽस्या॒ग्निं चि॑नु॒यात्तं दक्षि॑णाभी राधयेत् ।
Sentence: 13    अ॒ग्निमे॒व तत्स्पृ॑णोति ।।

Paragraph: 10 
Verse: 1 
Sentence: 1    प्र॒जाप॑तिर॒ग्निम॑चिनुत॒र्तुभिः॑ संवत्स॒रम् ।
Sentence: 2    व॑स॒न्तेनै॒वास्य॑ पूर्वा॒र्धम॑चिनुत
Sentence: 3    ग्री॒ष्मेण॒ दक्षि॑णम्प॒क्षम् ।
Sentence: 4    व॒र्षाभिः॒ पुछ॑म् ।
Sentence: 5    श॒रदोत्त॑रम्प॒क्षम् ।
Sentence: 6    हे॑म॒न्तेन॒ मध्य॑म्
Sentence: 7    ब्रह्म॑णा॒ वा अ॑स्य॒ तत्पू॑र्वा॒र्धम॑चिनुत
Sentence: 8    क्ष॒त्रेण॒ दक्षि॑णम्प॒क्षम्
Sentence: 9    प॒शुभिः॒ पुछ॑म् ।
Sentence: 10    वि॒शोत्त॑रम्प॒क्षम्
Sentence: 11    आ॒शया॒ मध्य॑म् ।
Sentence: 12    य ए॒वं वि॒द्वान॒ग्निं चि॑नु॒त ऋ॒तुभि॑रेवैनं चिनुते ।
Sentence: 13    अथो॑ ए॒तदे॒व सर्व॒मव॑ ।।

Verse: 2 
Sentence: 1    रु॑न्द्धे
Sentence: 2    शृ॒ण्वन्त्ये॑नम॒ग्निं चि॑क्या॒नम्
Sentence: 3    अत्त्यन्न॑म् ।
Sentence: 4    रोच॑ते ।
Sentence: 5    इ॒यं वाव प्र॑थ॒मा चिति॒रोष॑धयो॒ वन॒स्पत॑यः॒ पुरी॑षम्
Sentence: 6    अ॒न्तरि॑क्षं द्वि॒तीया॒ वयां॑सि॒ पुरी॑षम्
Sentence: 7    असौ तृ॒तीया॒ नक्ष॑त्राणि॒ पुरी॑षम् ।
Sentence: 8    य॒ज्ञश्च॑तु॒र्थी दक्षि॑णा॒ पुरी॑षम् ।
Sentence: 9    यज॑मानः पञ्च॒मी प्र॒जा पुरी॑षम् ।
Sentence: 10    यत्त्रिचि॑तीकं चिन्वी॒त य॒ज्ञं दक्षि॑णामा॒त्मान॑म्प्र॒जाम॒न्तरि॑यात्
Sentence: 11    तस्मा॒त्पञ्च॑चितीकश्चेत॒व्य॑स् ।
Sentence: 12    ए॒तदे॒व सर्वं॑ स्पृणोति
Sentence: 13    यत्ति॒स्रश्चित॑यः ।।

Verse: 3 
Sentence: 1    त्रि॒वृद्ध्य॒ग्निस् ।
Sentence: 2    यद्द्वे द्वि॒पाद्यज॑मानः॒ प्रति॑ष्ठित्यै
Sentence: 3    पञ्च॒ चित॑यो भवन्ति
Sentence: 4    पाङ्क्तः॒ पुरु॑षस् ।
Sentence: 5    आ॒त्मान॑मे॒व स्पृ॑णोति
Sentence: 6    पञ्च॒ चित॑यो भवन्ति
Sentence: 7    प॒ञ्चभिः॒ पुरी॑षैर॒भ्यू॑हति
Sentence: 8    दश॒ सम्प॑द्यन्ते
Sentence: 9    दशा॑क्षरो वै॒ पुरु॑षस् ।
Sentence: 10    यावा॑ने॒व पुरु॑ष॒स्तं स्पृ॑णोति ।
Sentence: 11    अथो॒ दशा॑क्षरा वि॒राड्^वि॒राज्
Sentence: 12    अन्नं वि॒राड्^वि॒राज्
Sentence: 13    वि॒राज्ये॒वान्नाद्ये॒ प्रति॑ तिष्ठति
Sentence: 14    संवत्स॒रो वै॑ ष॒ष्ठी चिति॑स् ।
Sentence: 15    ऋ॒तवः॒ पुरी॑षम् ।
Sentence: 16    षट्चित॑यो भवन्ति॒ षट्पुरी॑षाणि
Sentence: 17    द्वाद॑श॒ सम्प॑द्यन्ते
Sentence: 18    द्वाद॑श॒ मासाः॑ संवत्स॒रः
Sentence: 19    सं॑वत्स॒र ए॒व प्रति॑ तिष्ठति ।।

Paragraph: 11 
Verse: 1 
Sentence: 1    रोहि॑तो धू॒म्ररो॑हितः क॒र्कन्धु॑रोहित॒स्ते प्रा॑जाप॒त्यास् ।
Sentence: 2    ब॒भ्रुर॑रु॒णब॑भ्रुः॒ शुक॑बभ्रु॒स्ते रौ॒द्राः
Sentence: 3    श्येतः॑ श्येता॒क्षः श्येत॑ग्रीव॒स्ते पि॑तृदेव॒त्या॑स्
Sentence: 4    ति॒स्रः कृ॒ष्णा व॒शा वा॑रु॒ण्य॑स्
Sentence: 5    ति॒स्रः श्वे॒ता व॒शाः सौ॒र्य॑स् ।
Sentence: 6    मै॑त्राबार्हस्प॒त्या धू॒म्रल॑लामास्तूप॒राः ।।

Paragraph: 12 
Verse: 1 
Sentence: 1    पृश्नि॑स्तिर॒श्चीन॑पृश्निरू॒र्ध्वपृ॑श्नि॒स्ते मा॑रु॒ताः
Sentence: 2    प॒ल्गूर्लो॑हितो॒र्णी ब॑ल॒क्षी ताः सा॑रस्व॒त्यः
Sentence: 3    पृष॑ती स्थू॒लपृ॑षती क्षु॒द्रपृ॑षती॒ ता वै॑श्वदे॒व्य॑स्
Sentence: 4    ति॒स्रः श्या॒मा व॒शाः पौ॒ष्णिय॑स्
Sentence: 5    ति॒स्रो रोहि॑णीर्व॒शा मै॒त्रिय॑स् ।
Sentence: 6    अै॑न्द्राबार्हस्प॒त्या अ॑रु॒णल॑लामास्तूप॒राः ।।

Paragraph: 13 
Verse: 1 
Sentence: 1    शि॑तिबा॒हुर॒न्यतः॑शितिबाहुः सम॒न्तशि॑तिबाहु॒स्त ऐ॑न्द्रवाय॒वाः
Sentence: 2    शि॑ति॒रन्ध्रो॒ ऽन्यतः॑शितिरन्ध्रः सम॒न्तशि॑तिरन्ध्र॒स्ते मै॑त्रावरु॒णाः
Sentence: 3    शु॒द्धवा॑लः स॒र्वशु॑द्धवालो म॒णिवा॑ल॒स्त आ॑श्वि॒नास्
Sentence: 4    ति॒स्रः शि॒ल्पा व॒शा वै॑श्वदे॒व्य॑स्
Sentence: 5    ति॒स्रः श्येनीः॑ परमे॒ष्ठिने
Sentence: 6    सोमापौ॒ष्णाः श्या॒मल॑लामास्तूप॒राः ।।

Paragraph: 14 
Verse: 1 
Sentence: 1    उ॑न्न॒त ऋ॑ष॒भो वा॑म॒नस्त ऐ॑न्द्रावरु॒णाः
Sentence: 2    शिति॑ककुच्छितिपृ॒ष्ठः शिति॑भस॒त्त ऐ॑न्द्राबार्हस्प॒त्याः
Sentence: 3    शि॑ति॒पाच्छि॒त्योष्ठः॑ शिति॒भ्रुस्त ऐ॑न्द्रावैष्ण॒वास्
Sentence: 4    ति॒स्रः सि॒ध्मा व॒शा वै॑श्वकर्म॒ण्य॑स्
Sentence: 5    ति॒स्रो धा॒त्रे पृ॑षोद॒रा ऐ॑न्द्रापौ॒ष्णाः श्येत॑ललामास्तूप॒राः ।।

Paragraph: 15 
Verse: 1 
Sentence: 1    क॒र्णास्त्रयो॑ या॒माः
Sentence: 2    सौ॒म्यास्त्रयः॑ श्वितिं॒गा अ॒ग्नये॒ यवि॑ष्ठाय॒ त्रयो॑ नकु॒लास्
Sentence: 3    ति॒स्रो रोहि॑णी॒स्त्र्यव्य॒स्ता वसू॑नाम् ।
Sentence: 4    ति॒स्रो॑ ऽरु॒णा दि॑त्यौ॒ह्य॒स्ता रु॒द्राणा॑म् ।
Sentence: 5    सो॑मै॒न्द्रा ब॒भ्रुल॑लामास्तूप॒राः ।।

Paragraph: 16 
Verse: 1 
Sentence: 1    शु॒ण्ठास्त्रयो॑ वैष्ण॒वास् ।
Sentence: 2    अ॑धीलोध॒कर्णा॒स्त्रयो॒ विष्ण॑व उरुक्र॒माय
Sentence: 3    लप्सु॒दिन॒स्त्रयो॒ विष्ण॑व उरुगा॒याय
Sentence: 4    पञ्चा॑वीस्ति॒स्र आ॑दि॒त्याना॑म् ।
Sentence: 5    त्रि॑व॒त्सास्ति॒स्रो ऽङ्गि॑रसाम्
Sentence: 6    अैन्द्रावैष्ण॒वा गौ॒रल॑लामास्तूप॒राः ।।

Paragraph: 17 
Verse: 1 
Sentence: 1    इन्द्रा॑य॒ राज्ञे॒ त्रयः॑ शितिपृ॒ष्ठास् ।
Sentence: 2    इन्द्रा॑याधिरा॒जाय॒ त्रयः॒ शिति॑ककुदस् ।
Sentence: 3    इन्द्रा॑य स्व॒राज्ञे॒ त्रयः॒ शिति॑भसदस्
Sentence: 4    ति॒स्रस्तु॑र्यौ॒ह्यः॑ सा॒ध्याना॑म् ।
Sentence: 5    ति॒स्रः प॑ष्ठौ॒ह्यो॒ विश्वे॑षां दे॒वाना॑म्
Sentence: 6    आग्ने॒न्द्राः कृ॒ष्णल॑लामास्तूप॒राः ।।

Paragraph: 18 
Verse: 1 
Sentence: 1    अदि॑त्यै॒ त्रयो॑ रोहितै॒तास् ।
Sentence: 2    इ॑न्द्राण्यै॒ त्रयः॑ कृष्णै॒ताः
Sentence: 3    कुह्वै॒ त्रयो॑ ऽरुणै॒तास्
Sentence: 4    ति॒स्रो धे॒नवो॑ रा॒कायै
Sentence: 5    त्रयो॑ ऽन॒ड्वाहः॑ सिनीवा॒ल्यास् ।
Sentence: 6    आ॑ग्नावैष्ण॒वा रोहि॑तललामास्तूप॒राः ।।

Paragraph: 19 
Verse: 1 
Sentence: 1    सौ॒म्यास्त्रयः॑ पि॒शंगाः
Sentence: 2    सोमा॑य॒ राज्ञे॒ त्रयः॑ सा॒रंगाः
Sentence: 3    पार्ज॒न्या नभो॑रूपास्
Sentence: 4    ति॒स्रो॒ ऽजा म॒ल्हा इ॑न्द्राण्यै
Sentence: 5    ति॒स्रो मे॒ष्य॑ आदि॒त्यास् ।
Sentence: 6    {F द्या॑वापृथि॒या{W द्वावापृथि॒या मा॒लंगा॑स्तूप॒राः ।।

Paragraph: 20 
Verse: 1 
Sentence: 1    वा॑रु॒णास्त्रयः॑ कृ॒ष्णल॑लामास् ।
Sentence: 2    वरु॑णाय॒ राज्ञे॒ त्रयो॒ रोहि॑तोललामास् ।
Sentence: 3    वरु॑णाय रि॒शाद॑से॒ त्रयो॑ ऽरु॒णल॑लामाः
Sentence: 4    शि॒ल्पास्त्रयो॑ वैश्वदे॒वास्
Sentence: 5    त्रयः॒ पृश्न॑यः सर्वदेव॒त्या॑स् ।
Sentence: 6    अै॑न्द्रासू॒राः श्येत॑ललामास्तूप॒राः ।।

Paragraph: 21 
Verse: 1 
Sentence: 1    सोमा॑य स्व॒राज्ञे॑ ऽनोवा॒हाव॑न॒ड्वाहौ॑ ।
Sentence: 2    इ॑न्द्रा॒ग्निभ्या॑मोजो॒दाभ्या॒मुष्टा॑रौ ।
Sentence: 3    इ॑न्द्रा॒ग्निभ्या॑म्बल॒दाभ्यां॑ सीरवा॒हाववी
Sentence: 4    द्वे धे॒नू भौ॒मी
Sentence: 5    दि॒ग्भ्यो वड॑बे
Sentence: 6    द्वे धे॒नू भौ॒मी
Sentence: 7    वै॑रा॒जी पु॑रु॒षी
Sentence: 8    द्वे धे॒नू भौ॒मी
Sentence: 9    व॒यव॑ आरोहणवा॒हाव॑न॒ड्वाहौ
Sentence: 10    वारु॒णी कृ॒ष्णे व॒शे
Sentence: 11    अ॑राड्यौ दि॒व्यावृ॑षभौ परिमरौ ।।

Paragraph: 22 
Verse: 1 
Sentence: 1    एका॑दश प्रा॒तर्ग॒व्याः प॒शव॑ प॒शव॒ आ ल॑भ्यन्ते छग॒लः क॒ल्माषः॑ किकिदी॒विर्वि॑दी॒गय॒स्ते त्वा॒ष्ट्राः
Sentence: 2    सौ॒रीर्नव॑ श्वे॒ता व॒शा अ॑नूब॒न्ध्या॑ भवन्ति ।
Sentence: 3    आ॑ग्ने॒य ऐ॑न्द्रा॒ग्न आ॑श्वि॒नस्ते वि॑शालयू॒प आ ल॑भ्यन्ते ।।

Paragraph: 23 
Verse: 1 
Sentence: 1    पि॒शंगा॒स्त्रयो॑ वास॒न्ताः
Sentence: 2    सा॒रंगा॒स्त्रयो ग्रैष्माः
Sentence: 3    पृष॑न्त॒स्त्रयो॒ वार्षि॑काः
Sentence: 4    पृश्न॑य॒स्त्रयः॑ शार॒दाः
Sentence: 5    पृ॑श्निस॒क्थास्त्रयो हैमन्तिकास्
Sentence: 6    अवलि॒प्तास्त्रयः॑ शैशि॒राः
Sentence: 7    सं॑वत्स॒राय॒ निव॑क्षसः ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.