TITUS
Black Yajur-Veda: Taittiriya-Samhita
Part No. 35
Previous part

Chapter: 7 
Paragraph: 1 
Verse: 1 
Sentence: 1    यो वा अय॑थादेवतम॒ग्निं चि॑नु॒त आ दे॒वता॑भ्यो वृश्च्यते॒ पापी॑यान्भवति
Sentence: 2    यो य॑थादेव॒तं न दे॒वता॑भ्य॒ आ वृ॑श्च्यते॒ वसी॑यान्भवति ।
Sentence: 3    आ॑ग्ने॒य्या गा॑यत्रि॒या प्र॑थ॒मां चिति॑म॒भि मृ॑शेत्त्रि॒ष्टुभा॑ द्वि॒तीयां॒ जग॑त्या तृ॒तीभा॑ चतु॒र्थीम्प॒ङ्क्त्या प॑ञ्च॒मीम् ।
Sentence: 4    य॑थादेव॒तमे॒वाग्निं चि॑नुते॒ न दे॒वता॑भ्य॒ आ वृ॑श्च्यते॒ वसी॑यान्भवति ।
Sentence: 5    इडा॑यै॒ वा ए॒षा विभ॑क्तिः
Sentence: 6    प॒शव॒ इडा
Sentence: 7    प॒शुभि॑रेनम् ।।

Verse: 2 
Sentence: 1    चि॑नुते
Sentence: 2    यो वै॑ प्र॒जाप॑तये प्रति॒प्रोच्या॒ग्निं चि॒नोति॒ नार्ति॒मार्छ॑ति ।
Sentence: 3    अश्वा॑व॒भित॑स्तिष्ठेतां कृ॒ष्ण उ॑त्तर॒तः श्वे॒तो दक्षि॑णस्
Sentence: 4    तावा॒लभ्येष्ट॑का॒ उप॑ दध्यात् ।
Sentence: 5    ए॒तद्वै॑ प्र॒जाप॑ते रू॒पम्
Sentence: 6    प्राजाप॒त्यो ऽश्वः
Sentence: 7    सा॒क्षादे॒व प्र॒जाप॑तये प्रति॒प्रोच्या॒ग्निं चि॑नोति॒ नार्ति॒मार्छ॑ति ।
Sentence: 8    ए॒तद्वा अह्नो॑ रू॒पं यच्छ्वे॒तो ऽश्वो॒ रात्रि॑यै कृ॒ष्णस् ।
Sentence: 9    ए॒तदह्नः॑ ।।

Verse: 3 
Sentence: 1    रू॒पं यदिष्ट॑का॒ रात्रि॑यै॒ पुरी॑षम्
Sentence: 2    इष्ट॑का उपधा॒स्यञ्छ्वे॒तमश्व॑म॒भि मृ॑शे॒त्पुरी॑षमुपधा॒स्यन्कृ॒ष्णम्
Sentence: 3    अहोरा॒त्राभ्या॑मेवैनं चिनुते
Sentence: 4    हिरण्यपा॒त्रम्मधोः॑ पू॒र्णं द॑दाति
Sentence: 5    मध॒व्यो॑ ऽसा॒नीति
Sentence: 6    सौ॒र्या चि॒त्रव॒त्यावे॑क्षते
Sentence: 7    चि॒त्रमे॒व भ॑वति म॒ध्यंदि॑ने ।
Sentence: 8    अश्व॒मव॑ घ्रापयति ।
Sentence: 9    असौ॒ वा आ॑दि॒त्य इन्द्र॑ ए॒ष प्र॒जाप॑तिः
Sentence: 10    प्राजाप॒त्यो ऽश्व॑स्
Sentence: 11    तमे॒व सा॒क्षादृ॑ध्नोति ।।

Paragraph: 2 
Verse: 1 
Sentence: 1=a    त्वाम॑ग्ने वृष॒भं चेकि॑तान॒म्पुन॒र्युवा॑नम्ज॒नय॑न्नु॒पागा॑म् । अ॑स्थू॒रि णो॒ गार्ह॑पत्यानि सन्तु ति॒ग्मेन॑ नो॒ ब्रह्म॑णा॒ सं शि॑शाधि ।।
Sentence: 2    प॒शवो॒ वा ए॒ते यदिष्ट॑का॒श्चित्यां॑चित्यामृष॒भमुप॑ दधाति मिथु॒नमे॒वास्य॒ तद्य॒ज्ञे क॑रोति प्र॒जन॑नाय॒ तस्मा॑द्यू॒थेयू॑थ ऋष॒भः
Sentence: 3=b    सं॑वत्स॒रस्य॑ प्रति॒मां यां त्वा॑ रात्र्यु॒पास॑ते । प्र॒जां सु॒वीरां॑ कृ॒त्वा विश्व॒मायु॒र्व्य॑श्नवत् ।।
Sentence: 4    प्रा॑जाप॒त्याम् ।।

Verse: 2 
Sentence: 1    ए॒तामुप॑ दधाती॒यं वावैषैकाष्ट॒का यदेवैकाष्ट॒काया॒मन्नं॑ क्रि॒यते॒ तदेवै॒तयाव॑ रुन्द्धे ।
Sentence: 2    ए॒षा वै॑ प्र॒जाप॑तेः काम॒दुघा॒ तयै॒व यज॑मानो॒ ऽमुष्मिँ॑ लो॒के॒ ऽग्निं दु॑हे
Sentence: 3=c    येन॑ दे॒वा ज्योति॑षो॒र्ध्वा उ॒दाय॒न्येना॑दि॒त्या वस॑वो॒ येन॑ रु॒द्राः । येनाङ्गि॑रसो महि॒मान॑मान॒शुस्तेनै॑तु॒ यज॑मानः स्व॒स्ति ।।
Sentence: 4    सु॑व॒र्गाय॒ वा ए॒ष लो॒काय॑ ।।

Verse: 3 
Sentence: 1    ची॑यते॒ यद॒ग्निस् ।
Sentence: 2    येन॑ दे॒वा ज्योति॑षो॒र्ध्वा उ॒दाय॒न्नित्युख्यं॒ समि॑न्द्ध॒ इष्ट॑का एवै॒ता उप॑ धत्ते वानस्प॒त्याः सु॑व॒र्गस्य॑ लो॒कस्य॒ सम॑ष्ट्यै
Sentence: 3=d    श॒तायु॑धाय श॒तवी॑र्याय श॒तोत॑ये ऽभिमाति॒षाहे॑ । श॒तं यो नः॑ श॒रदो॒ अजी॑ता॒निन्द्रो॑ नेष॒दति॑ दुरि॒तानि॒ विश्वा॑ ।।
Sentence: 4=e    ये च॒त्वारः॑ प॒थयो॑ देव॒याना॑ अन्त॒रा द्यावा॑पृथि॒वी वि॒यन्ति॑ । तेषां॒ यो अज्या॑नि॒मजी॑तिमा॒वहा॒त्तस्मै॑ नो देवाः ।।

Verse: 4 
Sentence: 1    परि॑ दत्ते॒ह सर्वे॑ ।।
Sentence: 2=f    ग्री॒ष्मो हे॑म॒न्त उ॒त नो॑ वस॒न्तः श॒रद्व॒र्षाः सु॑वि॒तं नो॑ अस्तु । तेषा॑मृतू॒नां श॒तशा॑रदानां निवा॒त ए॑षां॒ अभ॑ये स्याम ।।
Sentence: 3=g    इ॑दुवत्स॒राय॑ परिवत्स॒राय॑ संवत्स॒राय॑ कृणुता बृ॒हन्नमः॑ । तेषां॑ व॒यं सु॑मतौ य॒ज्ञिया॑नां॒ ज्योगजी॑ता॒ अह॑ताः स्याम ।।
Sentence: 4=h    भ॒द्रान्नः॒ श्रेयः॒ सम॑नैष्ट देवा॒स्त्वया॑व॒सेन॒ सम॑शीमहि त्वा । स नो॑ मयो॒भूः पि॑तो ।।

Verse: 5 
Sentence: 1    आ वि॑शस्व॒ शं तो॒काय॑ त॒नुवे॑ स्यो॒नः ।।
Sentence: 2    अज्या॑नीरे॒ता उप॑ दधात्ये॒ता वै॑ दे॒वता॒ अप॑राजिता॒स्ता ए॒व प्र वि॑शति नै॒व जी॑यते
Sentence: 3    ब्रह्मवा॒दिनो॑ वदन्ति
Sentence: 4    यद॑र्धमा॒सा मासा॑ ऋ॒तवः॑ संवत्स॒र ओष॑धीः॒ पच॒न्त्यथ॒ कस्मा॑द॒न्याभ्यो॑ दे॒वता॑भ्य आग्रय॒णं निरु॑प्यत॒ इति॑ ।
Sentence: 5    ए॒ता हि तद्दे॒वता॑ उ॒दज॑य॒न्यदृ॒तुभ्यो॑ नि॒र्वपे॑द्दे॒वता॑भ्यः स॒मदं॑ दध्यात् ।
Sentence: 6    आ॑ग्रय॒णं नि॒रुप्यै॒ता आहु॑तीर्जुहोति ।
Sentence: 7    अ॑र्धमा॒साने॒व मासा॑नृ॒तून्त्सं॑वत्स॒रम्प्री॑णाति॒ न दे॒वता॑भ्यः स॒मद॑म्दधाति
Sentence: 8    भ॒द्रान्नः॒ श्रेयः॒ सम॑नैष्ट दे॒वा इत्या॑ह हु॒ताद्या॑य॒ यज॑मान॒स्याप॑राभावाय ।।

Paragraph: 3 
Verse: 1 
Sentence: 1=a    इन्द्र॑स्य॒ वज्रो॑ ऽसि॒ वार्त्र॑घ्नस्तनू॒पा नः॑ प्रतिस्प॒शः । यो नः॑ पु॒रस्ता॑द्दक्षिण॒तः प॒श्चादु॑त्तर॒तो॑ ऽघा॒युर॑भि॒दास॑त्ये॒तं सो ऽश्मा॑नमृछतु ।।
Sentence: 2    दे॑वासु॒राः संय॑त्ता आसन्
Sentence: 3    ते ऽसु॑रा दि॒ग्भ्य आबा॑धन्त
Sentence: 4    तान्दे॒वा इष्वा॑ च॒ वज्रे॑ण॒ चापा॑नुदन्त
Sentence: 5    यद्व॒ज्रिणी॑रुप॒दधा॒तीष्वा चै॒व तद्वज्रे॑ण च॒ यज॑मानो॒ भ्रातृ॑व्या॒नप॑ नुदते
Sentence: 6    दि॒क्षूप॑ ।।

Verse: 2 
Sentence: 1    द॑धाति
Sentence: 2    देवपु॒रा एवै॒तास्त॑नू॒पानीः॒ पर्यू॑हते ।
Sentence: 3=b    अग्ना॑विष्णू सजोषसे॒मा व॑र्धन्तु वां॒ गिरः॑ । द्युम्नै॒र्वाजे॑भि॒रा ग॑तम् ।।
Sentence: 4    ब्र॑ह्मवा॒दिनो॑ वदन्ति
Sentence: 5    यन्न दे॒वता॑यै॒ जुह्व॒त्यथ॑ किंदेव॒त्या॒ वसो॒र्धारेति॑ ।
Sentence: 6    अ॒ग्निर्वसु॒स्तस्यै॒षा धारा
Sentence: 7    विष्णु॒र्वसु॒स्तस्यै॒षा धारा॑ ।
Sentence: 8    आ॑ग्नावैष्ण॒व्यर्चा वसो॒र्धारां॑ जुहोति
Sentence: 9    भाग॒धेये॑नैवैनौ॒ सम॑र्धयति ।
Sentence: 10    अथो॑ ए॒ताम् ।।

Verse: 3 
Sentence: 1    ए॒वाहु॑तिमा॒यत॑नवतीं करोति
Sentence: 2    यत्का॑म एनां जु॒होति॒ तदे॒वाव॑ रुन्द्धे
Sentence: 3    रु॒द्रो वा ए॒ष यद॒ग्निस्
Sentence: 4    तस्यै॒ते त॒नुवौ॑ घो॒रान्या शि॒वान॒या
Sentence: 5    यच्छ॑तरु॒द्रीयं॑ जु॒होति यै॒वास्य॑ घो॒रा त॒नूस्तां तेन॑ शमयति
Sentence: 6    यद्वसो॒र्धारां॑ जु॒होति यै॒वास्य॑ शि॒वा त॒नूस्तां तेन॑ प्रीणाति
Sentence: 7    यो वै॒ वसो॒र्धार॑यै ।।

Verse: 4 
Sentence: 1    प्र॑ति॒ष्ठां वेद॒ प्रत्ये॒व ति॑ष्ठति
Sentence: 2    यदाज्य॑मु॒च्छिष्ये॑त॒ तम्सि॑न्ब्रह्मौद॒नम्प॑चेत्
Sentence: 3    तम्ब्रा॑ह्म॒णाश्च॒त्वारः॒ प्राश्नी॑युस् ।
Sentence: 4    ए॒ष वा अ॒ग्निर्वै॑श्वान॒रो यद्ब्रा॑ह्म॒णस् ।
Sentence: 5    ए॒षा खलु॒ वा अ॒ग्नेः प्रि॒या त॒नूर्यद्वै॑श्वान॒रः
Sentence: 6    प्रि॒याया॑मेवैनां त॒नुवा॒म्प्रति॑ ष्ठापयति
Sentence: 7    चत॑स्रो धे॒नूर्द॑द्यात्
Sentence: 8    ताभि॑रे॒व यज॑मानो॒ ऽमुष्मिँ॑ लो॒के॒ ऽग्निं दु॑हे ।।

Paragraph: 4 
Verse: 1 
Sentence: 1=a    चित्तिं॑ जुहोमि॒ मन॑सा घृ॒तेन॑ ।
Sentence: 2    इत्या॑ह ।
Sentence: 3    अदा॑भ्या वै॒ नामै॒षाहु॑तिर्वैश्वकर्म॒णी
Sentence: 4    नै॑नं चिक्या॒नम्भ्रातृ॑व्यो दभ्नोति ।
Sentence: 5    अथो॑ दे॒वता॑ ए॒वाव॑ रुन्द्धे ।
Sentence: 6=b    अग्ने॒ तम॒द्य ।
Sentence: 7    इति॑ प॒ङ्क्त्या जु॑होति
Sentence: 8    प॒ङ्क्त्याहु॑त्या यज्ञमु॒खमार॑भते
Sentence: 9=c    स॒प्त ते॑ अग्ने स॒मिधः॑ स॒प्त जि॒ह्वास् ।
Sentence: 10    इत्या॑ह
Sentence: 11    होत्रा॑ ए॒वाव॑ रुन्द्धे ।
Sentence: 12    अ॒ग्निर्दे॒वेभ्यो ऽपा॑क्रामद्भाग॒धेय॑म् ।।

Verse: 2 
Sentence: 1    इ॒छमा॑नस्
Sentence: 2    तस्मा॑ ए॒तद्भा॑ग॒धेय॒म्प्राय॑छन् ।
Sentence: 3    ए॒तद्वा अ॒ग्नेर॑ग्निहो॒त्रम्
Sentence: 4    ए॒तर्हि॒ खलु॒ वा ए॒ष जा॒तो यर्हि॒ सर्व॑श्चि॒तस् ।
Sentence: 5    जा॒तायै॒वास्मा॒ अन्न॒मपि॑ दधाति
Sentence: 6    स ए॑नम्प्री॒तः प्री॑णाति
Sentence: 7    वसी॑यान्भवति
Sentence: 8=d    ब्रह्मवा॒दिनो॑ वदन्ति॒ यदे॒ष गार्ह॑पत्यश्ची॒यते ऽथ॒ क्वा॒स्याह॑व॒नीय॒ इति॑ ।
Sentence: 9    अ॒सावा॑दि॒त्य इति॑ ब्रूयात् ।
Sentence: 10    ए॒तस्मि॒न्हि सर्वा॑भ्यो दे॒वता॑भ्यो॒ जुह्व॑ति ।।

Verse: 3 
Sentence: 1    य ए॒वं वि॒द्वान॒ग्निं चि॑नु॒ते सा॒क्षादे॒व दे॒वता॑ ऋध्नोति ।
Sentence: 2=e    अग्ने॑ यशस्वि॒न्यश॑से॒मम॑र्प॒येन्द्रा॑वती॒मप॑चितीमि॒हा व॑ह । अ॒यम्मू॒र्धा प॑रमे॒ष्ठी सु॒वर्चाः॑ समा॒नाना॑मुत्त॒मश्लो॑को अस्तु ।।
Sentence: 3    भ॒द्रम्पश्य॑न्त॒ उप॑ सेदु॒रग्रे॒ तपो॑ दी॒क्षामृष॑यः सुव॒र्विदः॑ । ततः॑ क्ष॒त्रम्बल॒मोज॑श्च जा॒तं अदस्मै दे॒वा अ॒भि सं न॑मन्तु ।।
Sentence: 4    धा॒ता वि॑धा॒ता प॑र॒मा ।।

Verse: 4 
Sentence: 1    उ॒त सं॒दृक्प्र॒जाप॑तिः परमे॒ष्ठी वि॒राजा॑ । स्तोमा॒श्छन्दां॑सि नि॒विदो॑ म आहुरे॒तस्मै॑ रा॒ष्ट्रम॒भि सं न॑माम ।।
Sentence: 2    अ॒भ्याव॑र्तध्व॒मुप॒ मेत॑ सा॒कम॒यं शा॒स्ताधि॑पतिर्वो अस्तु । अ॒स्य वि॒ज्ञान॒मनु॒ सं र॑भध्वमि॒मम्प॒श्चादनु॑ जीवाथ॒ सर्वे॑ ।।
Sentence: 3    रा॑ष्ट्र॒भृत॑ ए॒ता उप॑ दधाति ।
Sentence: 4    ए॒षा वा अ॒ग्नेश्चिती॑ राष्ट्र॒भृत्
Sentence: 5    तयै॒वास्मि॑न्रा॒ष्ट्रं द॑धाति
Sentence: 6    रा॒ष्ट्रमे॒व भ॑वति
Sentence: 7    नास्मा॑द्रा॒ष्ट्रम्भ्रं॑शते ।।

Paragraph: 5 
Verse: 1 
Sentence: 1=a    यथा वै पु॒त्रो जा॒तो म्रि॒यत॑ ए॒वं वा ए॒ष म्रि॑यते॒ यस्या॒ग्निरुख्य॑ उ॒द्वाय॑ति
Sentence: 2    यन्नि॑र्म॒न्थ्यं॑ कु॒र्याद्वि छि॑न्द्या॒द्भ्रातृ॑व्यमस्मै जनयेत्
Sentence: 3    स ए॒व पुनः॑ प॒रीध्यः
Sentence: 4    स्वादेवैनं॒ योने॑र्जनयति
Sentence: 5    नास्मै॒ भ्रातृ॑व्यं जनयति
Sentence: 6    तमो॒ वा ए॒तं गृ॑ह्णाति॒ यस्या॒ग्निरुख्य॑ उ॒द्वाय॑ति
Sentence: 7    मृ॒त्युस्तमः
Sentence: 8    कृ॒ष्णं वासः॑ कृ॒ष्णा धे॒नुर्दक्षि॑णा
Sentence: 9    तम॑सा ।।

Verse: 2 
Sentence: 1    ए॒व तमो॑ मृ॒त्युमप॑ हते
Sentence: 2    हिर॑ण्यं ददाति
Sentence: 3    ज्योतिर्वै॒ हिर॑ण्यम् ।
Sentence: 4    ज्योति॑षै॒व तमो ऽप॑ हते ।
Sentence: 5    अथो॒ तेजो वै॒ हिर॑ण्यम् ।
Sentence: 6    तेज॑ ए॒वात्मन्ध॑त्ते
Sentence: 7=b    सुव॒र्न घ॒र्मः स्वाहा
Sentence: 8=b    सुव॒र्नार्कः स्वाहा
Sentence: 9=b    सुव॒र्न शु॒क्रः स्वाहा
Sentence: 10=b    सुव॒र्न ज्योतिः॒ स्वाहा
Sentence: 11=b    सुव॒र्न सूर्यः॒ स्वाहा॑ ।
Sentence: 12    अ॒र्को वा ए॒ष यद॒ग्निर॒सावा॑दि॒त्यः ।।

Verse: 3 
Sentence: 1    अ॑श्वमे॒धस् ।
Sentence: 2    यदे॒ता आहु॑तीर्जु॒होत्य॑र्काश्वमे॒धयो॑रे॒व ज्योतीं॑षि॒ सं द॑धाति ।
Sentence: 3    ए॒ष ह॒ त्वा अ॑र्काश्वमे॒धी यस्यै॒तदग्नौ क्रि॒यते॑ ।
Sentence: 4=c    आपो॒ वा इ॒दमग्रे॑ सलि॒लमा॑सीत्
Sentence: 5    स ए॒ताम्प्र॒जाप॑तिः प्रथ॒मां चिति॑मपश्य॒त्तामुपा॑धत्त॒ तदि॒यम॑भवत्
Sentence: 6    तं वि॒श्वक॑र्माब्रवीत् ।
Sentence: 7    उप॒ त्वाया॒नीति
Sentence: 8    नेह लो॒को॒ ऽस्तीति॑ ।।

Verse: 4 
Sentence: 1    अ॑ब्रवीत्
Sentence: 2    स ए॒तां द्वि॒तीयां॒ चिति॑मपश्य॒त्तामुपा॑धत्त॒ तद॒न्तरि॑क्षमभवत्
Sentence: 3    स य॒ज्ञः प्र॒जाप॑तिम्ब्रवीत् ।
Sentence: 4    उप॒ त्वाया॒नीति
Sentence: 5    नेह लो॒को॒ ऽस्तीत्य॑ब्रवीत्
Sentence: 6    स वि॑श्वकर्माणमब्रवीत् ।
Sentence: 7    उप॒ त्वाया॒नीति
Sentence: 8    केन॑ मोपैष्य॒सीति
Sentence: 9    दिश्या॑भि॒रित्य॑ब्रवीत्
Sentence: 10    तम्दिश्या॑भिरुपैत्
Sentence: 11    ता उपा॑धत्त
Sentence: 12    ता दिशः॑ ।।

Verse: 5 
Sentence: 1    अ॑भवन् ।
Sentence: 2    स प॑रमे॒ष्ठी प्र॒जाप॑तिमब्रवीत् ।
Sentence: 3    उप॒ त्वाया॒नीति
Sentence: 4    नेह लो॒को॒ ऽस्तीत्य॑ब्रवीत्
Sentence: 5    स वि॒श्वक॑र्माणं च य॒ज्ञं चा॑ब्रवीत् ।
Sentence: 6    उप॑ वा॒माया॒नीति
Sentence: 7    नेह लो॒को॒ ऽस्तीत्य॑ब्रूताम् ।
Sentence: 8    स ए॑तां तृ॒तीयां॒ चिति॑मपश्यत्
Sentence: 9    तामुपा॑धत्त
Sentence: 10    तद॒साव॑भवत्
Sentence: 11    स आ॑दि॒त्यः प्र॒जाप॑तिमब्रवीत् ।
Sentence: 12    उप॑ त्वा ।।
Verse: 6 
Sentence: 1    आया॒नीति
Sentence: 2    नेह लो॒को॒ ऽस्तीत्य॑ब्रवीत्
Sentence: 3    स वि॒श्वक॑र्माणं च य॒ज्ञं चा॑ब्रवीत् ।
Sentence: 4    उप॑ वा॒माया॒नीति
Sentence: 5    नेह लो॒को॒ ऽस्तीत्य॑ब्रूताम् ।
Sentence: 6    स प॑रमे॒ष्ठिन॑मब्रवीत् ।
Sentence: 7    उप॒ त्वाया॒नीति
Sentence: 8    केन॑ मोपैष्य॒सीति
Sentence: 9    लोकम्पृ॒णयेत्य॑ब्रवीत्
Sentence: 10    तं लो॑कम्पृ॒णयोपैत्
Sentence: 11    तस्मा॒दया॑तयाम्नी लोकम्पृ॒णा ।
Sentence: 12    अया॑तयामा॒ ह्यसौ ।।
Verse:  ७
Sentence:  १    आ॑दि॒त्यस्
Sentence: 2    तानृष॑यो ऽब्रुवन् ।
Sentence: 3    उप॑ व॒ आया॒मेति
Sentence: 4    केन॑ न उपैष्य॒थेति
Sentence: 5    भू॒म्नेत्य॑ब्रुवन्
Sentence: 6    तान्द्वाभ्यां॒ चिती॑भ्यामु॒पाय॑न् ।
Sentence: 7    स पञ्च॑चितीकः॒ सम॑पद्यत
Sentence: 8    य ए॒वं वि॒द्वान॒ग्निं चि॑नु॒ते भूया॑ने॒व भ॑वत्य॒भीमाँ लो॒काञ्ज॑यति वि॒दुरे॑नं दे॒वास् ।
Sentence: 9    अथो॑ ए॒तासा॑मे॒व दे॒वता॑नां॒ सायु॑ज्यं गछति ।।

Paragraph: 6 
Verse: 1 
Sentence: 1=a    वयो॒ वा अ॒ग्निर्यद॑ग्नि॒चित्प॒क्षिणो॑ ऽश्नी॒यात्तमे॒वाग्निम॑द्या॒दार्ति॒मार्छे॑त्
Sentence: 2    संवत्स॒रं व्र॒तं च॑रेत्
Sentence: 3    संवत्स॒रं हि व्र॒तं नाति
Sentence: 4=b    प॒शुर्वा ए॒ष यद॒ग्निस् ।
Sentence: 5    हि॒नस्ति॒ खलु वै॒ तम्प॒शुर्य ए॑नम्पु॒रस्ता॑त्प्र॒त्यञ्च॑मुप॒चर॑ति
Sentence: 6    तस्मा॑त्प॒श्चात्प्राङु॑प॒चर्य॑ आ॒त्मनो ऽहिं॑सायै
Sentence: 7=c    तेजो॑ ऽसि॒ तेजो॑ मे यछ पृथि॒वीं य॑छ ।।

Verse: 2 
Sentence: 1    पृ॑थिव्यै मा पाहि॒ ज्योति॑रसि॒ ज्योति॑र्मे यछा॒न्तरि॑क्षं यछा॒न्तरि॑क्षान्मा पाहि॒ सुव॑रसि॒ सुव॑र्मे यछ॒ दिवं॑ यछ दि॒वो मा॑ पाहि ।
Sentence: 2    इति॑ आहै॒ताभि॒र्वा इ॒मे लो॒का विधृ॑तास् ।
Sentence: 3    यदे॒ता उ॑प॒दधा॑त्ये॒षां लो॒कानां॒ विधृ॑त्यै
Sentence: 4    स्वयमातृ॒ण्णा उ॑प॒धाय॑ हिरण्येष्ट॒का उप॑ दधाती॒मे वै॑ लो॒काः स्व॑यमातृ॒ण्णा ज्योति॒र्हिर॑णम् ।
Sentence: 5    यत्स्व॑यमातृ॒ण्णा उ॑प॒धाय॑ ।।

Verse: 3 
Sentence: 1    हि॑रण्येष्ट॒का उ॑प॒दधा॑ती॒मानेवै॒ताभि॑र्लो॒काञ्ज्योति॑ष्मतः कुरु॒ते ऽथो॑ ए॒ताभि॑रे॒वास्मा॑ इ॒मे लो॒काः प्र भा॑न्ति
Sentence: 2=e    यास्ते॑ अग्ने॒ सूर्ये॒ रुच॑ उद्य॒तो दिव॑मात॒न्वन्ति॑ र॒श्मिभिः॑ । ताभिः॒ सर्वा॑भी रु॒चे जना॑य नस्कृधि ।।
Sentence: 3    या वो॑ देवाः॒ सूर्ये॒ रुचो॒ गोष्वश्वे॑षु॒ या रुचः॑ । इन्द्रा॑ग्नी॒ ताभिः॒ सर्वा॑भी॒ रुचं॑ नो धत्त बृहस्पते ।।
Sentence: 4    रुचं॑ नो धेहि ।।

Verse: 4 
Sentence: 1    ब्रा॑ह्म॒णेषु॒ रुचं॒ राज॑सु नस्कृधि । रुचं॑ वि॒श्ये॑षु शू॒द्रेषु॒ मयि॑ धेहि रु॒चा रुच॑म् ।।
Sentence: 2    द्वे॒धा वा अ॒ग्निं चि॑क्या॒नस्य॒ यश॑ इन्द्रि॒यं ग॑छत्य॒ग्निं वा॑ चि॒तमी॑जा॒नं वा
Sentence: 3    यदे॒ता आहु॑तीर्जु॒होति॑ ।
Sentence: 4    आ॒त्मन्ने॒व यश॑ इन्द्रि॒यं ध॑त्ते ।
Sentence: 5=e    ई॑श्व॒रो वा ए॒ष आर्ति॒मार्तो॒र्यो॒ ऽग्निं चि॒न्वन्न॑धि॒क्राम॑ति
Sentence: 6    तत्त्वा॑ यामि॒ ब्रह्म॑णा॒ वन्द॑मानस् ।
Sentence: 7    इति॑ वारु॒ण्यर्चा ।।

Verse: 5 
Sentence: 1    जु॑हुया॒च्छान्ति॑रेवै॒षाग्नेर्गुप्ति॑रा॒त्मन॑स् ।
Sentence: 2=f    ह॒विष्कृ॑तो॒ वा ए॒ष यो॒ ऽग्निं चि॑नु॒ते
Sentence: 3    यथा वै ह॒वि स्कन्द॑त्ये॒वं वा ए॒ष स्क॑न्दति॒ यो॒ ऽग्निं चि॒त्वा स्त्रि॑यमुपैति मैत्रावरु॒ण्य॑या यजेत मैत्रावरु॒णता॑मे॒वोपै॑त्या॒त्मनो ऽस्क॑न्दाय
Sentence: 4=g    यो वा अ॒ग्निमृ॑तु॒स्थां वेद॒र्तुरृ॑तुरस्मै॒ कल्प॑मान एति॒ प्रत्ये॒व ति॑ष्ठति
Sentence: 5    संवत्स॒रो वा अ॒ग्निः ।।

Verse: 6 
Sentence: 1    ऋ॑तु॒स्थास्तस्य॒ वस॑न्तः॒ शिरो॑ ग्री॒ष्मो दक्षि॑णः प॒क्षो व॒र्षाः पुछं॑ श॒रदुत्त॑रः प॒क्षो हे॑म॒न्तो मध्य॑म्पूर्वप॒क्षाश्चित॑यो ऽपरप॒क्षाः पुरी॑षमहोरा॒त्राणीष्त॑का ए॒ष वा अ॒ग्निरृ॑तु॒स्था य ए॒वं वेद॒र्तुरृ॑तुरस्मै॒ कल्प॑मान एति॒ प्रत्ये॒व ति॑ष्ठै
Sentence: 2=h    प्र॒जाप॑ति॒र्वा ए॒तं ज्यै॑ष्ठ्यकामो॒ न्य॑धत्त
Sentence: 3    ततो वै॒ स ज्यै॑ष्ठ्यमगछत् ।
Sentence: 4    य ए॒वं वि॒द्वान॒ग्निं चि॑नु॒ते ज्यै॑ष्ठ्यमे॒व ग॑छति ।।

Paragraph: 7 
Verse: 1 
Sentence: 1=a    यदाकू॑तात्स॒मसु॑स्रोद्धृ॒दो वा॒ मन॑सो वा॒ सम्भृ॑तं॒ चक्षु॑षो वा । तमनु॒ प्रेहि॑ सुकृ॒तस्य॑ लो॒कं यत्रर्ष॑यः प्रथम॒जा ये पु॑रा॒णाः ।।
Sentence: 2=b    ए॒तं स॑धस्थ॒ परि॑ ते ददामि॒ यमा॒वहा॑च्छेव॒धिं जा॒तवे॑दाः । अ॑न्वाग॒न्ता य॒ज्ञप॑तिर्वो॒ अत्र॒ तं स॑म जानीत पर॒मे व्यो॑मन् ।।
Sentence: 3=c    जा॑नी॒तादे॑नम्पर॒मे व्यो॑म॒न्देवाः॑ सधस्था वि॒द रू॒पम॑स्य । यदा॒गछा॑त् ।।

Verse: 2 
Sentence: 1    प॒थिभि॑र्देव॒यानै॑रिष्टापू॒र्ते कृ॑णुतादा॒विर॑स्मै ।।
Sentence: 2=d    सम्प्र च्य॑वध्व॒मनु॒ सम्प्र या॒ताग्ने॑ प॒थो दे॑व॒याना॑न्कृणुध्वम् । अ॒स्मिन्त्स॒धस्थे॒ अध्युत्त॑रस्मि॒न्विश्वे॑ देवा॒ यज॑मानश्च सीदत ।।
Sentence: 3=e    प्र॑स्त॒रेण॑ परि॒धिना॑ स्रु॒चा वेद्या॑ च ब॒र्हिषा॑ । ऋ॒चेमं य॒ज्ञं नो॑ वह॒ सुव॑र्दे॒वेषु॒ गन्त॑वे ।।
Sentence: 4=f    यदि॒ष्टम्यत्प॑रा॒दानं॒ यद्द॒त्तं या च॒ दक्षि॑णा । तत् ।।

Verse: 3 
Sentence: 1    अ॒ग्निर्वै॑श्वकर्म॒णः सुव॑र्दे॒वेषु॑ नो दधत् ।।
Sentence: 2=g    येना॑ स॒हस्रं॒ वह॑सि॒ येना॑ग्ने सर्ववेद॒सम् । तेने॒मं य॒ज्ञं नो॑ वह॒ सुव॑र्दे॒वेषु॒ गन्त॑वे ।।
Sentence: 3=h    येना॑ग्ने॒ दक्षि॑णा यु॒क्ता य॒ज्ञं वह॑न्त्यृ॒त्विजः॑ । तेने॒मं य॒ज्ञं नो॑ वह॒ सुव॑र्दे॒वेषु॒ गन्त॑वे ।।
Sentence: 4=i    येना॑ग्ने सु॒कृतः॑ प॒था मधो॒र्धारा॑ व्यान॒शुः । तेने॒मं य॒ज्ञं नो॑ वह॒ सुव॑र्दे॒वेषु॒ गन्त॑वे ।।
Sentence: 5=k    यत्र॒ धारा॒ अन॑पेता॒ मधो॑र्घृ॒तस्य॑ च॒ याः । तद॒ग्निर्वै॑श्वकर्म॒णः सुव॑र्दे॒वेषु॑ नो दधत् ।।

Paragraph: 8 
Verse: 1 
Sentence: 1=a    यास्ते॑ अग्ने स॒मिधो॒ यानि॒ धाम॒ या जि॒ह्वा जा॑तवेदो॒ यो अ॒र्चिः । ये ते॑ अग्ने मे॒डयो॒ य इन्द॑व॒स्तेभि॑रा॒त्मानं॑ चिनुहि प्रजा॒नन् ।।
Sentence: 2    उ॑त्सन्नय॒ज्ञो वा ए॒ष यद॒ग्निः किं वाहै॒तस्य॑ क्रि॒यते॒ किं वा॒ न यद्वा अ॑ध्व॒र्युर॒ग्नेश्चिनो वै॒ तद॒न्तरे॑ति॒ यास्ते॑ अग्ने स॒मिधो॒ यानि॑ ।।

Verse: 2 
Sentence: 1    धामेत्या॑है॒षा वा अ॒ग्नेः स्व॑यंचि॒तिर॒ग्निरे॒व तद॒ग्निं चि॑नोति॒ नाध्व॒र्युरा॒त्मनो॒ ऽन्तरे॑ति
Sentence: 2    चत॑स्र॒ आशाः॒ प्र च॑रन्त्व॒ग्नय॑ इ॒मं नो॑ य॒ज्ञं न॑यतु प्रजा॒नन् । घृ॒तम्पिन्व॑न्न॒जरं॑ सु॒वीर॒म्ब्रह्म॑ स॒मिद्भ॑व॒त्याहु॑तीनाम् ।।
Sentence: 3    सु॑व॒र्गाय॒ वा ए॒ष लो॒कायोप॑ धीयते॒ यत्कू॒र्मश्चत॑स्र॒ आशाः॒ प्र च॑रन्त्व॒ग्नय॒ इत्या॑ह ।।

Verse: 3 
Sentence: 1    दिश॑ एवै॒तेन॒ प्र जा॑नाती॒मं नो॑ य॒ज्ञं न॑यतु प्रजा॒नन्नित्या॑ह सुव॒र्गस्य॑ लो॒कस्या॒भिनी॑त्यै॒ ब्रह्म॑ स॒मिद्भ॑व॒त्याहु॑तीना॒मित्या॑ह॒ ब्रह्म॑णा वै दे॒वाः सु॑व॒र्गं लो॒कमा॑य॒न्य॑ति॒ ब्रह्म॑णै॒व तद्यज॑मानः सुव॒र्गं लो॒कमे॑ति
Sentence: 2    प्र॒जाप॑ति॒र्वा ए॒ष यद॒ग्निस्तस्य॑ प्र॒जाः प॒शव॒श्छन्दां॑सि रू॒पं सर्वा॒न्वर्णा॒निष्ट॑कानां कुर्याद्रू॒पेणै॑व प्र॒जाम्प॒शूञ्छन्दां॒स्यव॑ रु॒न्द्धे ऽथो॑ प्र॒जाभ्य॑ एवैनम्प॒शुभ्य॒॑भ्यो ऽव॒रुद्ध्य॑ चिनुते ।।

Paragraph: 9 
Verse: 1 
Sentence: 1=a    मयि॑ गृह्णा॒म्यग्रे॑ अ॒ग्निं रा॒यस्पोषा॑य सुप्रजा॒स्त्वाय॑ सु॒वीर्या॑य । मयि॑ प्र॒जाम्मयि॒ वर्चो॑ दधा॒म्यरि॑ष्टाः स्याम त॒नुवा॑ सु॒वीराः॑ ।।
Sentence: 2    यो नो॑ अ॒ग्निः पि॑तरो हृ॒त्स्व॒न्तरम॑र्त्यो॒ मर्त्यां॑ आवि॒वेश॑ । तमा॒त्मन्परि॑ गृह्णीमहे व॒यम्मा सो अ॒स्मां अ॑व॒हाय॒ परा॑ गात् ।।
Sentence: 3    यद॑ध्व॒र्युरा॒त्मन्न॒ग्निमगृ॑हीत्वा॒ग्निं चि॑नु॒याद्यो॑ ऽस्य॒ स्वो ऽग्निस्तमपि॑ ।।

Verse: 2 
Sentence: 1    यज॑मानाय चिनुयाद॒ग्निं खलु वै प॒शवो ऽनूप॑ तिष्ठन्ते ऽप॒क्रामु॑का अस्मात्प॒शवः॑ स्यु॒र्मयि॑ गृह्णा॒म्यग्रे॑ अ॒ग्निमित्या॑हा॒त्मन्ने॒व स्वम॒ग्निं दा॑धार॒ नास्मा॑त्प॒शवो ऽप॑ क्रामन्ति
Sentence: 2    ब्रह्मवा॒दिनो॑ वदन्ति॒ यन्मृच्चाप॑श्चा॒ग्नेर॑ना॒द्यमथ॒ कस्मा॑न्मृ॒दा चा॒द्भिश्चा॒ग्निश्त॒ इति॒ यद॒द्भिः संयौति ।।

Verse: 3 
Sentence: 1    आपो वै॒ सर्वा॑ दे॒वता॑ दे॒वता॑भिरेवैनं॒ सं सृ॑जति॒ यन्मृ॒दा चि॒नोती॒यं वा अ॒ग्निर्वै॑श्वान॒रो॒ ऽग्निनै॒व तद॒ग्निं चि॑नोति
Sentence: 2    ब्रह्मवा॒दिनो॑ वदन्ति॒ यन्मृ॒दा चा॒द्भिश्चा॒ग्निश्ची॒यतेथ॒ कस्मा॑द॒ग्निरु॑च्यत॒ इति॒ यच्छन्दो॑भिश्चि॒नोत्य॒ग्नयो वै॒ छन्दां॑सि॒ तस्मा॑द॒ग्निरु॑च्य॒ते ऽथो॑ इ॒यं वा अ॒ग्निर्वै॑श्वान॒रो यत् ।।

Verse: 4 
Sentence: 1    मृ॒दा चि॒नोति॒ तस्मा॑द॒ग्निरु॑च्यते
Sentence: 2    हिरण्येष्ट॒का उप॑ दधाति॒ ज्योतिर्वै॒ हिर॑ण्यं॒ ज्योति॑रे॒वास्मि॑न्दधा॒त्यथो॒ तेजो वै॒ हिर॑ण्यं॒ तेज॑ ए॒वात्मन्ध॑त्ते
Sentence: 3    यो वा अ॒ग्निं स॒र्वतो॑मुखं चिनु॒ते सर्वा॑सु प्र॒जास्वन्न॑मत्ति॒ सर्वा॒ दिशो॒ ऽभि ज॑यति गाय॒त्रीम्पु॒रस्ता॒दुप॑ दधाति तृ॒ष्टुभं॑ दक्षिण॒तो जग॑तीम्प॒श्चाद॑नु॒ष्टुभ॑मुत्तर॒तः प॒ङ्क्तिम्मध्य॑ ए॒ष वा अ॒ग्निः स॒र्वतो॑मुख॒स्तं य ए॒वं वि॒द्वांश्चि॑नु॒ते सर्वा॑सु प्र॒जास्वन्न॑मत्ति॒ सर्वा॒ दिशो॒ ऽभि ज॑य॒त्यथो॑ दि॒श्ये॒व दिश॒म्प्र व॑यति॒ तस्मा॑द्दि॒शि दिक्प्रोता॑ ।।

Paragraph: 10 
Verse: 1 
Sentence: 1    प्र॒जाप॑तिर॒ग्निम॑सृजत
Sentence: 2    सो॑ ऽस्मात्सृ॒ष्टः प्राङ्प्राद॑रव॒त्तस्मा॒ अश्व॒म्प्रत्या॑स्यत्
Sentence: 3    स द॑क्षि॒णाव॑र्तत॒ तस्मै॑ वृ॒ष्णिम्प्रत्या॑स्यत्
Sentence: 4    स प्र॒त्यङ्ङाव॑र्तत॒ तस्मा॑ ऋष॒भम्प्रत्या॑स्यत्
Sentence: 5    स उद॒ङ्ङाव॑र्तत॒ तस्मै॑ ब॒स्तम्प्रत्या॑स्यत्
Sentence: 6    स ऊ॒र्ध्वो॑ ऽद्रव॒त्तस्मै॒ पुरु॑ष॒म्प्रत्या॑स्यत् ।
Sentence: 7    यत्प॑शुशी॒र्षाण्यु॑प॒दधा॑ति स॒र्वत॑ एवैनम् ।।

Verse: 2 
Sentence: 1    अ॑व॒रुध्य॑ चिनुते ।
Sentence: 2    ए॒ता वै॑ प्राण॒भृत॒श्चक्षु॑ष्मती॒रिष्ट॑का॒ यत्प॑शुशी॒र्षाणि
Sentence: 3    यत्प॑शुशी॒र्षाण्यु॑प॒दधा॑ति॒ ताभि॑रे॒व यज॑मानो॒ ऽमुष्मिँ॑ लो॒के प्राणि॒त्यथो॒ ताभि॑रे॒वास्मा॑ इ॒मे लो॒काः प्र भा॑न्ति
Sentence: 4    मृ॒दाभि॒लिप्योप॑ दधाति मेध्य॒त्वाय
Sentence: 5    प॒शुर्वा ए॒ष यद॒ग्निरन्न॑म्प॒शव॑स् ।
Sentence: 6    ए॒ष खलु॒ वा अ॒ग्निर्यत्प॑शुशी॒र्षाणि
Sentence: 7    यं का॒मये॑त
Sentence: 8    कनी॑यो॒ ऽस्यान्न॑म् ।।

Verse: 3 
Sentence: 1    स्यादिति॑संत॒रां तस्य॑ पशुशी॒र्षाण्युप॑ दध्या॒त्कनी॑य ए॒वास्यान्न॑म्भवति
Sentence: 2    यं का॒मये॑त
Sentence: 3    स॒माव॑द॒स्यान्नं॑ स्या॒दिति॑ मध्य॒तस्तस्योप॑ दध्यात्स॒माव॑दे॒वास्यान्न॑म्भवति
Sentence: 4    यं का॒मये॑त
Sentence: 5    भूयो॒ ऽस्यान्नं॑ स्या॒दित्यन्ते॑षु॒ तस्य॑ व्यु॒दूह्योप॑ दध्यादन्त॒त ए॒वास्मा॒ अन्न॒मव॑ रुन्द्धे॒ भूयो॒ ऽस्यान्न॑म्भवति ।।

Paragraph: 11 
Verse: 1 
Sentence: 1    स्ते॒गान्दंष्ट्रा॑भ्याम्
Sentence: 2    म॒ण्डूका॒ञ्जम्भ्ये॑भिस् ।
Sentence: 3    आद॑कां खा॒देन॑ ।
Sentence: 4    ऊर्जं॑ संसूदेन ।
Sentence: 5    अर॑ण्यं॒ जाम्बी॑लेन
Sentence: 6    मृद॑म्ब॒र्स्वे॑भिः
Sentence: 7    शर्क॑राभि॒रव॑काम्
Sentence: 8    अव॑काभिः॒ शर्क॑राम्
Sentence: 9    उत्सा॒देन॑ जि॒ह्वाम्
Sentence: 10    अवक्र॒न्देन॒ तालु॑म् ।
Sentence: 11    सर॑स्वतीं जिह्वा॒ग्रेण॑ ।।

Paragraph: 12 
Verse: 1 
Sentence: 1    वाजं॒ हनू॑भ्याम्
Sentence: 2    अ॒प आ॒स्ये॑न ।
Sentence: 3    आ॑दि॒त्यां छ्मश्रु॑भिस् ।
Sentence: 4    उ॑पया॒ममध॑रेणोष्ठेन
Sentence: 5    सदुत्त॑रेण ।
Sentence: 6    अन्त॑रेणानूका॒शम्
Sentence: 7    प्रका॒शेन॒ बाह्य॑म् ।
Sentence: 8    स्त॑नयि॒नुं नि॑र्बा॒धेन
Sentence: 9    सूर्या॒ग्नी चक्षु॑र्भ्याम् ।
Sentence: 10    वि॒द्युतौ॑ क॒नान॑काभ्याम्
Sentence: 11    अ॒शनि॑म्म॒स्तिष्के॑ण
Sentence: 12    बल॑म्म॒ज्जभिः॑ ।।

Paragraph: 13 
Verse: 1 
Sentence: 1    कू॒र्माञ्छपैस् ।
Sentence: 2    अ॒छला॑भिः क॒पिञ्ज॑लान् ।
Sentence: 3    साम॒ कुष्ठि॑काभिस् ।
Sentence: 4    ज॒वं जङ्घा॑भिस् ।
Sentence: 5    अ॑ग॒दं जानु॑भ्याम् ।
Sentence: 6    वी॒र्यं॑ कु॒हाभ्या॑म्
Sentence: 7    भ॒यम्प्र॑चा॒लाभ्या॑म् ।
Sentence: 8    गुहो॑पप॒क्षाभ्या॑म्
Sentence: 9    अ॒श्विना॒वंसा॑भ्याम्
Sentence: 10    अदि॑तिं शी॒र्ष्णा
Sentence: 11    निरृ॑तिं॒ निर्जा॑ल्मकेन शी॒र्ष्णा ।।

Paragraph: 14 
Verse: 1 
Sentence: 1    योक्त्रं॒ गृध्रा॑भिस् ।
Sentence: 2    यु॒गमान॑तेन
Sentence: 3    चि॒त्तम्मन्या॑भिः
Sentence: 4    संक्रो॒शान्प्राणैः
Sentence: 5    प्रका॒शेन॒ त्वच॑म्
Sentence: 6    पराका॒शेनान्त॑राम्
Sentence: 7    म॒शका॒न्केशै॑स् ।
Sentence: 8    इन्द्रं॒ स्वप॑सा॒ वहे॑न
Sentence: 9    बृह॒स्पतिं॑ श्कुनिसा॒देन
Sentence: 10    रथ॑मु॒ष्णिहा॑भिः ।।

Paragraph: 15 
Verse: 1 
Sentence: 1    मि॒त्रावरु॑णौ॒ श्रोणी॑भ्याम्
Sentence: 2    इन्द्रा॒ग्नी शि॑ख॒ण्डाभ्या॑म्
Sentence: 3    इन्द्रा॒बृह॒स्पती॑ ऊ॒रुभ्या॑म्
Sentence: 4    इन्द्रा॒विष्णू॑ अष्ठी॒वद्भ्या॑म् ।
Sentence: 5    स॑वि॒तार॒म्पुछे॑न
Sentence: 6    गन्ध॒र्वाञ्छेपे॑न ।
Sentence: 7    अ॑प्स॒रसो॑ मु॒स्खाभ्या॑म्
Sentence: 8    पव॑मानम्पा॒युना
Sentence: 9    प॒वित्र॒म्पोत्रा॑भ्याम्
Sentence: 10    आ॒क्रम॑णं स्थू॒राभ्या॑म्
Sentence: 11    प्रति॒क्रम॑णं॒ कुष्ठा॑भ्याम् ।।

Paragraph: 16 
Verse: 1 
Sentence: 1    इन्द्र॑स्य क्रो॒डस् ।
Sentence: 2    अदि॑त्यै पाज॒स्य॑म् ।
Sentence: 3    दि॒शां ज॒त्रव॑स् ।
Sentence: 4    जी॒मूता॑न्हृदयौप॒शाभ्या॑म्
Sentence: 5    अ॒न्तरि॑क्षम्पुरि॒तता
Sentence: 6    नभ॑ उद॒र्ये॑ण ।
Sentence: 7    इ॑न्द्रा॒णीम्प्ली॒ह्ना
Sentence: 8    व॒ल्मीका॑न्क्लो॒म्ना
Sentence: 9    गि॒रीन्प्ला॒शिभिः
Sentence: 10    समु॒द्रमु॒दरे॑ण
Sentence: 11    वैश्वान॒रम्भस्म॑ना ।।

Paragraph: 17 
Verse: 1 
Sentence: 1    पू॒ष्णो व॑नि॒ष्ठुस् ।
Sentence: 2    अ॑न्धा॒हे स्थू॑रगु॒दा
Sentence: 3    स॒र्पान्गुदा॑भिस् ।
Sentence: 4    ऋ॒तून्पृ॒ष्टीभि॑स् ।
Sentence: 5    दिव॑म्पृ॒ष्ठेन
Sentence: 6    वसू॑नाम्प्रथ॒मा कीक॑सा
Sentence: 7    रु॒द्राणां॑ द्वि॒तीया॑ ।
Sentence: 8    आ॑दि॒त्यानां॑ तृ॒तीया॑ ।
Sentence: 9    अङ्गि॑रसां चतु॒र्थी
Sentence: 10    सा॒ध्याना॑म्पञ्च॒मी
Sentence: 11    वि॑श्वेषां दे॒वानां॑ ष॒ष्ठी ।।

Paragraph: 18 
Verse: 1 
Sentence: 1    ओजो॑ ग्री॒वाभि॑स् ।
Sentence: 2    निरृ॑तिम॒स्थभि॑स् ।
Sentence: 3    इन्द्रं॒ स्वप॑सा॒ वहे॑न
Sentence: 4    रु॒द्रस्य॑ विच॒ल स्क॒न्धस् ।
Sentence: 5    अ॑होरा॒त्रयो॑र्द्वि॒तीय॑स् ।
Sentence: 6    अ॑र्धमा॒सानां॑ तृ॒तीय॑स् ।
Sentence: 7    मा॒सां च॑तु॒र्थस् ।
Sentence: 8    ऋ॑तू॒नाम्प॑ञ्च॒मः
Sentence: 9    सं॑वत्स॒रस्य॑ ष॒ष्ठः ।।

Paragraph: 19 
Verse: 1 
Sentence: 1    आ॑न॒न्दं न॒न्दथु॑ना
Sentence: 2    काम॑म्प्रत्या॒साभ्या॑म्
Sentence: 3    भ॒यं शि॑ती॒मभ्या॑म्
Sentence: 4    प्र॒शिष॑म्प्रशा॒साभ्या॑म् ।
Sentence: 5    सू॑र्याचन्द्र॒मसौ॒ वृक्या॑भ्याम् ।
Sentence: 6    श्या॑मशबलौ॒ मत॑स्नाभ्याम् ।
Sentence: 7    व्यु॑ष्टिं रू॒पेण
Sentence: 8    निम्रु॑क्ति॒मरू॑पेण ।।

Paragraph: 20 
Verse: 1 
Sentence: 1    अह॑र्मां॒सेन
Sentence: 2    रात्रि॒म्पीव॑सा ।
Sentence: 3    अ॒पो यू॒षेण
Sentence: 4    घृ॒तं रसे॑न्
Sentence: 5    श्यां वस॑या
Sentence: 6    दू॒षीका॑भिर्ह्रा॒दुनि॑म्
Sentence: 7    अश्रु॑भिः॒ पृष्वा॑म् ।
Sentence: 8    दिवं॑ रू॒पेण
Sentence: 9    नक्ष॑त्राणि॒ प्रति॑रूपेण
Sentence: 10    पृथि॒वीं चर्म॑णा
Sentence: 11    छ॒वीं छ॒व्या॑ ।
Sentence: 12    उ॒पाकृ॑ताय॒ स्वाहा॑ ।
Sentence: 13    आल॑ब्धाय॒ स्वाहा
Sentence: 14    हु॒ताय॒ स्वाहा॑ ।।

Paragraph: 21 
Verse: 1 
Sentence: 1    अ॒ग्नेः प॑क्ष॒तिः
Sentence: 2    सर॑स्वत्यै॒ निप॑क्षतिः
Sentence: 3    सोम॑स्य तृ॒तीया॑ ।
Sentence: 4    अ॒पां च॑तु॒र्थी ।
Sentence: 5    ओष॑धीनाम्पञ्च॒मी
Sentence: 6    सं॑वत्स॒रस्य॑ ष॒ष्ठी
Sentence: 7    म॒रुतां॑ सप्त॒मी
Sentence: 8    बृह॒स्पते॑रष्ट॒मी
Sentence: 9    मि॒त्रस्य॑ नव॒मी
Sentence: 10    वरु॑णस्य दश॒मी ।
Sentence: 11    इन्द्र॑स्यैकाद॒शी
Sentence: 12    विश्वे॑षां दे॒वानां॑ द्वाद॒शी
Sentence: 13    द्यावा॑पृथि॒व्योः पा॒र्श्वम् ।
Sentence: 14    य॒मस्य॑ पाटू॒रः ।।

Paragraph: 22 
Verse: 1 
Sentence: 1    वा॒योः प॑क्ष॒तिः
Sentence: 2    सर॑स्वतो॒ निप॑क्षतिस् ।
Sentence: 3    च॒न्द्रम॑सस्तृ॒तीया
Sentence: 4    नक्ष॑त्राणां चतु॒र्थी
Sentence: 5    स॑वि॒तुः प॑ञ्च॒मी
Sentence: 6    रु॒द्रस्य॑ ष॒ष्ठी
Sentence: 7    सर्पा॑णां सप्त॒मी ।
Sentence: 8    अ॑र्य॒म्णो॑ ऽष्ट॒मी
Sentence: 9    त्वष्टु॑र्नव॒मी धा॒तुर्द॑श॒मी ।
Sentence: 10    इ॑न्द्रा॒ण्या ए॑काद॒शी ।
Sentence: 11    अदि॑त्यै द्वाद॒शी
Sentence: 12    द्यावा॑पृथि॒व्योः पा॒र्श्वम् ।
Sentence: 13    यम्यै पाटू॒रः ।।

Paragraph: 23 
Verse: 1 
Sentence: 1    पन्था॑मनू॒वृग्भ्या॑म् ।
Sentence: 2    संत॑तिं स्नाव॒न्या॑भ्याम् ।
Sentence: 3    शुका॑न्पि॒त्तेन
Sentence: 4    हरि॒माणं॑ य॒क्ना
Sentence: 5    हली॑क्ष्णान्पापव॒तेन
Sentence: 6    कू॒श्माञ्छक॑भिः
Sentence: 7    शव॒र्तानूव॑ध्येन
Sentence: 8    शुनो॑ वि॒शस॑नेन
Sentence: 9    स॒र्पाँ लो॑हितग॒न्धेन
Sentence: 10    वयां॑सि पक्वग॒न्धेन
Sentence: 11    पि॒पीलि॑काः प्रशा॒देन॑ ।।

Paragraph: 24 
Verse: 1 
Sentence: 1    क्रमै॒रत्य॑क्रमीद्वा॒जी विश्वै॑र्देवैर्य॒ज्ञियैः॑ संविदा॒नः
Sentence: 2    स नो॑ नय सुकृ॒तस्य॑ लो॒कं तस्य॑ ते व॒यं स्व॒धया॑ मदेम ।।

Paragraph: 25 
Verse: 1 
Sentence: 1=a    द्यौ॑स्ते पृ॒ष्ठम्
Sentence: 2=a    पृथि॒वी स॒धस्थ॑म्
Sentence: 3=a    आ॒त्मान्तरि॑क्षम् ।
Sentence: 4=a    स॑मु॒द्रो योनिः
Sentence: 5=b    सूर्य॑स्ते॒ चक्षु॑स् ।
Sentence: 6=b    वातः॑ प्रा॒णस् ।
Sentence: 7=b    च॒न्द्रमाः॒ श्रोत्र॑म्
Sentence: 8=b    मासा॑श्चार्धमा॒षाश्च॒ पर्वा॑णि ।
Sentence: 9=b    ऋ॒तवोङ्गा॑नि
Sentence: 10=b    संवत्स॒रो म॑हि॒मा ।।

Paragraph: 26 
Verse: 1 
Sentence: 1    अ॒ग्निः प॒शुरा॑सीत्
Sentence: 2    तेना॑यजन्त
Sentence: 3    स ए॒तं लो॒कम॑जय॒द्यस्मि॑न्न॒ग्निः
Sentence: 4    स ते॑ लो॒कस्
Sentence: 5    तं जे॑ष्यसि ।
Sentence: 6    अथाव॑ जिघ्र
Sentence: 7    वा॒युः प॒शुरा॑सीत्
Sentence: 8    तेना॑यजन्त
Sentence: 9    स ए॒तं लो॒कम॑जय॒द्यस्मि॑न्वा॒युः
Sentence: 10    स ते॑ लो॒कस्
Sentence: 11    तस्मा॑त्त्वा॒न्तरे॑ष्यामि॒ यदि॒ नाव॒जिघ्र॑सि ।
Sentence: 12    आ॑दि॒त्यः प॒शुरा॑सीत्
Sentence: 13    तेना॑यजन्त
Sentence: 14    स ए॒तं लो॒कम॑जय॒द्यस्मि॑न्नादि॒त्यः
Sentence: 15    स ते॑ लो॒कस्
Sentence: 16    तं जे॑ष्यसि॒ यद्य॑व॒जिघ्र॑सि ।।

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.